1. Ladjikɛnge Yeso ndalɔmbɛ Yehova djɛ nde nama ambeki wande?

L’OTSHO w’ekomo wɔ lowiko lɔnde lanɛ lá looko, Yeso akanelaka ekakasano wengopomana l’ambeki wande. Má ngandji kindokaka ambeki wande, Yeso alɔmbaka Papa kɛnde djɛ ‘nama ambeki wande me kanga nyɛtshi.’ (Dj. 17:14, 15) Yeso ewaki ante m’ɔkɔngɔ wɔ nde mpanda t’olongo, Satana Djabolo angokindjɛ nanyɛ onto onkfumɔ wɔkɔpa nkambela Yehova. Djɛkondeke enkambi wɛ Yehova walekɔ la djonyi djɛ namema.

2. Kɛkɔnge kekoka ntoshikikɛ djɛ Yehova angokadjimola alɔmbɛlɔ waso?

² Yehova akadjimolaka alɔmbɛlɔ wa Wɔnande Yeso, mande Nde ndowokaka ngandji. Ntsha iso nangha la wolo djɛ nsasangɛ Yehova, nde angɔtɔkɔpa edjinge iso, la angokadjimola l’alɔmbɛlɔ waso, w’ɔlɔmbaso djɛ ntokotshɛ la ntolama. Etengo oyɛnde Owandji wɔ nkfumbo w’oyakiyanyɛka nkambo djɛ nkfumbo kɛnde, Yehova angokindjɛ nkotshɛ la ngandji kenkfumɔ ehomba wɛ wana wande. Nde nanghaka nghɔsɔ ngo dj’ipa djiina djɛnde ntepela ente lokumu lɔnde, ntshitana!

3. Lamo oyɛso la djonyi djɛ olamelo wɔ Yehova lɔɔko kɛnɛ?

³ Lɔɔko kɛnɛ ndeke isomboleka ndjala la djonyi dj’olamelo wime Yehova. Satana akilikamaka m’olongo, edjinge ‘alekɔ la nkɛlɛ k’efula.’ (Ndj. 12:12) Nde amboshiyɛ ndonga ndjawoyɛ anto watɛnyɛ ndjolo ante, ‘onanghelawɔ nde Ndjambe olemo w’ekina.’ (Dj. 16:2) Anto ankina wapayapɛyɛ le Ndjambe, ntɛnyɛka ndjolo ladjikɛnde, topingela lawayi wel’andja wanɛ. Kaanga lawopo wɔkɔnge w’anto ɔtɛnyɛwɔ ndjolo, iso topalekɔ la wɔma. Lamo? Mánde Otepela wɔ Ndjambe ntepelaka ante: ‘Nkfumi alekɔ la nkɔmano, edjinge angonyokeketshɛ la angonyolama  me onto w’ɔpɔlɔ.’ (2 Te. 3:3) Wopo wɔkɔnge Yehova otolamakande? Nyontshɔ tokolenda topo tope.

4. Lá nkilika Ɛfɛsɛ 6:13-17, ɔlɔtɔ wɔkɔnge Yehova ndatɔpɛyɛ djɛ ntolama?

⁴ Yehova ambɔtɔpɛyɛ ɔlɔtɔ onkfumɔ wɔ mbandji w’okoka ntolama má onanyelo wɔ Satana. (Wala Ɛfɛsɛ 6:13-17.) Ɔlɔtɔ wɔ nyuma wɔsɔ wolekɔ wolo edjinge nkambaka wɔlɔ! Koko ɔlɔtɔ wɔsɔ wongotolama ngo ntsha tɔngɔlɔta ekete kenkfumɔ kekfumba ɔlɔtɔ wɔkɔ edjinge tombotshikala la wɔkɔ. Kɛkɔnge kesakisola ekete kɛmɔkɛmɔ kɛ ɔlɔtɔ wɔkɔ? Nyontshɔ tokoshishima la ntɔnɔ nkfumɔ.

5. Okaba w’akambo wa nsɔsɔlɔ osakisolande nge, edjinge lamo oyɛso ladjɛ ndɔlɔtaka?

⁵ Okaba w’akambo wa nsɔsɔlɔ nsakisolaka akambo wa nsɔsɔlɔ w’otanaso l’Otepela wɔ Ndjambe, Bible. Lamo oyɛso ladjɛ ndɔta okaba wɔsɔ? Ladjikɛnde Satana alekɔ ‘is’ongolo.’ (Dj. 8:44) Nde ambotepelá ongolo nunu dj’ɛnɔnyi, edjinge ‘adjimbola looko l’otondo’! (Ndj. 12:9) Koko akambo wa nsɔsɔlɔ w’otanaso lá Bible ntolamaka dj’ipa iso ndjimbama. Wopo wɔkɔnge okokaso ndɔta okaba wɔ djingingi wɔsɔ? Iso nanghaka nkambo djɛsɔ má ndjekaka nsɔsɔlɔ kelendana la Yehova, má ndɔtɛmɔlaka ‘lá nyuma edjinge lá nsɔsɔlɔ,’ edjinge má ndjalaka sii l’akambo ankfumɔ.​—Dj. 4:24; Ɛfɛ. 4:25; Heb. 13:18.

6. Odjipɔ wɔ sii wolama oloko osakisolande nge, edjinge lamo oyɛso ladjɛ ndɔlɔtaka?

⁶ Odjipɔ wɔ sii wolama ikole nsakisolaka ɛlɛmbɛ wɛ sii wɛ Yehova. Lamo oyɛso ladjɛ ndɔta odjipɔ w’ikole wɔsɔ? Ngo ngete odjipɔ w’ikole olamawɔ oloko w’ongala má akfula, odjipɔ wɔ sii wolama oloko, namaka oloko wɔso wɔ djingingi kana l’onto lɔso lɔ leteyi má lodjimbo lɔ nyɛtshi l’andja wanɛ. (Woo. 4:23) Yehova ntɔlɔmbaka dj’iso ndɔkɔpa edjinge ndokambela l’oloko wɔso onkfumɔ. (Mat. 22:36, 37) Djɛkondeke, Satana mponaka djɛ ndjatola oloko wɔso má ntotshinda dj’iso nkɔpa nkete dje l’andja wanɛ, nkete djɛ Yehova otonakande. (Dja. 4:4; 1 Dj. 2:15, 16) Edjinge ntsha nde apalongisa masɔ, nde ntɛnyɛka ndjolo djɛ ntotshinda la wolo dj’iso nangha akambo wapokana l’ɛlɛmbɛ wɛ Yehova.

7. Wopo w’ɔkɔnge okokaso ndɔta odjipɔ wɔ sii wolama ikole?

⁷ Iso ndɔtaka odjipɔ wɔ sii djɛ ndjipa oloko má nkamba l’ɛlɛmbɛ wɛ Yehova lá kɛnɛ kelekɔ wɔlɔ la kelekɔ nyɛtshi, edjinge má mbika la nkilika ɛlɛmbɛ wɛkɔ. (Yee. 97:10) Anto amɔtshi ndaawokokaka etengo ɛlɛmbɛ wɛ Yehova ndawilaka lá nkenya. Koko ntsha iso ntshika nkamba la tɔkfɔ tɔ Bible lá lowiko lɔso, tongoyala etengo ongala wimɛ odjipɔ wɔnde w’ikole l’antenyi kɛ mbandji, mande akanela ante wolekɔ odjito efula. Ɔsɔ angoyala nsɔsɔlɔ nkambo dj’enkesa! Le wanɛ wa kɔpa Yehova, ɛlɛmbɛ wɛnde ‘wepalekɔ odjito,’ koko mbikɛka mbiko.​—1 Dja. 5:3.

8. Kɛkɔnge kesakisola ndjala l’osasalo m’ekolo wɛso djɛ mpoposanyɛ losango lɔwɔlɔ?

⁸ Poolo atokeketshɛka lonkina djɛ ndjala l’osasalo l’ekolo wɛso djɛ Ndjewoyɛ losango lɔ wɔlɔ lɔ vu. Kɛsɔ nsakisolaka djɛ iso la djɛ ndjala winá enkfumɔ entshupa djɛ mpoposanyɛ losango lɔwɔlɔ l’Onkfumi. Winá w’oshimelaso anto ankina losango l’imá Bible, djawo djɛso nkembaka. Alekɔ ekeketshelo efula djɛ nyɛna wopo wɔ enkambi wɛ Yehova we lá andja w’otondo, ohonakawɔ mbamba djɛ mpoposanyɛ losango lɔwɔlɔ, winá woyɛwɔ l’olemo, lá ankalasa, lá ntatshi djɛ looko dj’onanghawɔ opoto edjinge winá w’opoposanyɛwɔ lá mvulu la mvulu, lá lobengo winá w’owembolawɔ boto djɛwɔ kana winá w’osawolawɔ l’anto ankina w’ewawɔ edjinge kaanga winá w’odjipamawɔ lá winá ɛmɔtshi l’amvulu. Ntsha tomboyala la wɔma, ko ntshika mpoposanyɛ, tɔngɔfɛna l’ongala wimɛ sabata m’ekolo lá winá wɔ mbandji, apangoyala wolo dj’ekolo wɛnde mpotala. Eposelo wengoyala la nkambo  djɛsɔ nde, nde apangoyala l’akoka wa ndawikɛ nyɔmɛlɛ winá wɔ antonyi onanyɛwɔ edjinge apangoyala l’akoka wa nkilika ɛlɛmbɛ wime owandji wɔnde.

9. Lamo oyɛso la djonyi djɛ ndɔta nguwa k’ekekete kɛ djawo?

⁹ Nguwa k’ekekete kɛ djawo nsakisolaka djawo djelekɔ laso te Yehova edjinge tá alaka wande. Tolekɔ la djawo ente, nde angokotshɛ alaka wande ankfumɔ. Djawo djɛsɔ ngotokotshɛ djɛ ndjimɛ ‘akfula ankfumɔ walangalanga wime kanga nyɛtshi.’ Lamo oyɛso ladjonyi djɛ ndɔta nguwa k’ekekete kɛsɔ? Ladjikɛnde kɛkɔ ntolamaka dj’ipa iso ndjimbwama m’olakanyelo w’ongolo wɔ w’apɔsta, edjinge dj’ipa iso ndɛmba winá w’anto ɔtɔnyɔlawɔ. Ntsha topalekɔ la djawo, topangoyala la wolo wɔ mpikama winá w’anto otodjimbolawɔ djɛ mpendola ɛlɛmbɛ wɛ Yehova. Koko djawo djɛso ntolamaka winá enkfumɔ dj’ipa iso nangha nkambo mɔtshi djepa sasangɛ Yehova l’olemo kana lá nkalasa. (1 Pɛ. 3:15) Winá enkfumɔ w’otonaso elemo w’ofutawɔ nfalanga efula, koko wepatɔpɛyɛ mbamba k’iso ndaapɛyɛ tshɛ l’olemo wɔ Yehova, djawo djɛso ntolamaka. (Heb. 13:5, 6) Edjinge winá enkfumɔ w’okambelaso Yehova kaanga l’anteyi k’ekakasano, djawo djɛso ntolamaka.​—1 Te. 2:2.

10. Etawɔ itombo y’ewiko nge, ko lamo oyɛso ladjɛ ndɔlɔta?

 ¹⁰ Itombo yɛ ewiko aleko nkongi djɛtɔpeyisa Yehova, nkongi djɛ ente, nde angofuta onto onkfumɔ wonangha ɛkɔpa kɛnde. (1 Te. 5:8; 1 Ti. 4:10; Tito 1:1, 2) Etengo itombo yɛ nsɔsɔlɔ olamakawɔ ɔtɛ w’ongala, nkongi djɛso dj’ewiko namaka ekanedji kɛso kɛ yimba. Lá wopo wɔkɔnge? Nkongi djɛsɔ ntokotshɛka dj’iso ndjila yimba ngo lá alaka wa Ndjambe, edjinge ipa ndɛmba amboleka l’ɔtɛ w’ekakasano wɛso. Wopo wɔkɔnge okokaso ndɔta itombo y’ewiko yɛsɔ? Iso nanghaka nkambo djɛsɔ má nkindjɛka nangha djɛ tokanyi tɔso djɛlama la tokanyi tɔ Ndjambe. Ndjɔmbɔmba, iso ndjilaka nkongi djɛso ape l’okfudji wopa bako, koko le Ndjambe.​—Yee. 26:2; 104:34; 1 Ti. 6:17.

11. Etawɔ lokfula lɔ mbandji lɔ nyuma nge, edjinge lamo oyɛso ladjɛ nkamba la lɔkɔ?

¹¹ Lokfula lɔ mbandji lɔ nyuma oyɛwonde Otepela wɔ Ndjambe, Bible. Lokfula lɔsɔ, lolekɔ la nkfulu kɛ mposɛ engolo enkfumɔ lá bandja, edjinge kɛ ntshungola anto má lonfumbe lɔ elakanyelo w’engolo la má nkfumbo djɛ nyɛtshi. (2 Kɔ. 10:4, 5; 2 Ti. 3:16, 17; Heb. 4:12) Iso ndjekaka djɛ nkamba la lokfula lɔsɔ lá yopo yɛ wɔlɔ má nanghaka wekelo w’onto nyɔmɛlɛ edjinge má ndjawola okfumbelo w’owaso me olonghanyelo wɔ Ndjambe. (2 Ti. 2:15) Lá djiko djɛ ɔlɔtɔ onkina wɔ mbandji, Yehova ntɔpɛyɛka yopo inkina yɛ nkfulu djɛ ntolama. Yopo yɛkɔnge yɛsɔ?

12. Kɛkɔnge k’oyɛso la djonyi lonkina, edjinge lamo?

¹² Ongala wɔ nsɔsɔlɔ, ndjewaka ante nde nyɔmɛlɛ apakoke ndongela oloyi w’angala lá mbandji, nde ndjalaka la djonyi dj’osukɔ wɔ winande angala ankina. Wopo wɔk’ɔmɔ ndeke, isɔmɛlɛ topangolongela Satana nya anto wande wokilika, tolekɔ la djonyi dj’osukɔ wɔ wananyɔ l’ankaana. Yehova atɔpɛyɛka ‘nkfumbo k’otondo kɛ wananyɔ’ we l’andja w’otondo djɛ ntokotshɛ.​—1 Pɛ. 2:17.

13. Lá nkilika Hebero 10:24, 25, wapɔ wɛkɔnge w’owaso má ndjingelaka nsanghanyɛ yɛso?

¹³ Yopo imɔtshi yowaso osukɔ nde, má ndjingelaka nsanghanyɛ yɛso. (Wala Hebero 10:24, 25.) Isankfumɔ ndɛmbaka lá winá ɛmɔtshi, edjinge ntsha nkambo djɛsɔ djembotokomela, nsanghanyɛ nkoka ntokeketshɛ. Iso mbaka nkfulu má wa kɔmantɛrɛ y’imanse k’oloko yɛpɛyɛka wananyɔ l’ankaana. Wamba wimá Bible edjinge tosawo tonanghawɔ lá nsanghanyɛ nkembɛka nkano djɛso te Yehova. Edjinge tongowake lokembo winá w’osawolaso lawɔ lá ntondo edjinge l’ɔkɔngɔ wɔ losanghanyɛ. (1 Te. 5:14) Nsanghanyɛ yɛso, ntɔpɛyɛka mbamba kɛ mba osasa woyɛ má nkotshɛ anto ankina. (Ele. 20:35; Ɔrɔ. 1:11, 12) Nsanghayɛ yɛso, ntokotshɛka lá topo tonkina lonkina. Ingotokotshɛke dj’iso ndjala ansakodji edjinge wetsha wɛ wɔlɔ. Ndjɔmbɔmba, iso ndjekaka wopo wɔ nkamba la nkete djelekɔ lá Epeko kɛso k’olakanyelo. Djɛkondeke, lɔngɔsɔlaka nsanghanyɛ wɔlɔ. Lá winá wɔ losanghanyɛ, ekameyɛka la nkɔmɛ nkfumɔ. M’ɔkɔngɔ wɔ losanghanyɛ, kamba l’okfumbelo wɔ ngowaki. Má nangha akambo wasɔ, wɛ ongokoma ‘ongala wɔ wɔlɔ wɔ Kristo Yeso.’​—2 Ti. 2:3.

14. Okotshɔ w’ɔkɔnge onkina w’okotshɛso?

¹⁴ Iso mbaka lonkina osukɔ wɔ wa miliyɔ yɛ andjelo wa nkfulu. Kokanela kɛnɛ kekoka nangha ngo ondjelo ɔmɔ toko! (Iza. 37:36) Masɔ, kokanela kɛnɛ kɛ oloyi w’angala w’andjelo okokawɔ nangha. Lako onto kana ɔdjɛngɛ w’okoka nana l’angala wa nkfulu wa Yehova. Yehova alekɔ kaanga nkfulu inkfumɔ. Djɛkondeke, ntsha nde alekɔ laso, tongoyalaka winá enkfumɔ la wolo ndeka antonyi waso, ayale lofulo lɔkɔnge loyɛwɔ. (Tos. 6:16) Iso nkoka ndashikikɛ ente, nkambo djɛsɔ dekɔ nsɔsɔlɔ! Kanela anto ankfumɔ wakoka nkokotshɛ winá w’oyawokɛ  etengo ɔmbɔlɛmba má kɛnɛ kɛ winako ɔmɔtshi wel’olemo, welá nkalasa kana ewoto kɛko kɛmɔtshi kepakambela Yehova otepelande kana onanghande. Vungɔ ente opalekɔ nghɔmɛlɛ lá mbandji kɛsɔ. Okilikɛnde ɛlɔndjɛlɔ kɛ Yehova.

15. Lá nkilika Izaya 54:15, 17, lamo onto nyopakoke nshimba enkambi wɛ Ndjambe djɛ mpoposanyɛ?

¹⁵ Andja walekɔ l’ɛlɔndjɛlɔ kɛ Satana wanɛ, walekɔ la donga efula djɛ ntotona. Iso topingelaka lá wayi wa pɔlitikɛ edjinge topingelaka lá ambandji yɛwɔ. Iso mpoposanyɛka djiina djɛ Ndjambe le anto, mpoposanyɛka ente ngo Onkfumi wɔ Ndjambe toko ndeke longoyakala anto vu, edjinge nɛmɛyɛka ɛlɛmbɛ wɛ nde wɛ sii. Iso nyɛnyɛka anto ente, owandji w’andja wanɛ alekɔ kanga ongolo edjinge odjakanyi w’ekekete. (Dj. 8:44) Edjinge tewoyɛ ente, andja wa Satana wakɔpa ntshitana lak’ila. Koko, Satana nya anto wokilika wapangokoka kaanga ndambo daambi ntoshimba djɛ nangha olemo w’ipoposanyɛ. Koko, tongosasangɛka Yehova lá topo tonkfumɔ t’okokaso nangha! Kaanga nkfulu kɛkɔnge kelekɔ la Satana kɛsɔ, nde apalekɔ l’akoka wa nshimba losango l’Onkfumi djɛ nkoma lá atshuku wa looko l’otondo. Tolekɔ l’akoka wa nangha akambo wasɔ, ngo mande Yehova ntolamaka.​—Wala Izaya 54:15, 17.

16. Wopo w’ɔkɔnge Yehova nyongowikɛ enkambi wɛnde winá wɔ ndjolo k’ekekete?

¹⁶ Kɛkɔnge ketokongela lá ntondo? Winá wɔ ndjolo k’ekekete, Yehova angotowikɛ má topo tope tɔ nkamɔ. Ntondo ntondo, nde angowikɛ enkambi wende wɛ nkɔmano, winá wɔ nyongotshinda ewandji wel’andja wanɛ djɛ ntshita Babilɔnɛ k’ekekete, otshumano wɔ ntolo dj’engolo. (Ndj. 17:16-18; 18:2, 4) Masɔ, nde angowikɛ enkambi wɛnde winá wɔ ndongotshita nkete nkina djel’andja wa Satana l’Armagɛdɔnɛ.—Ndj. 7:9, 10; 16:14, 16.

17. Wapɔ wɔkɔnge w’isongowa ntsha tomboyala entshupa la Yehova?

¹⁷ Ntsha tomboyala entshupa la Yehova, Satana apangokoka ntonangha kaanga nkambo mɔ kaanga okindjɛnde ntonanyɛ. Lá nsɔsɔlɔ, nde ndeke onto wongotshitana lotshinda lotshinda. (Ɔrɔ. 16:20) Djɛkondeke, lɔta ɔlɔtɔ onkfumɔ wɔ mbandji edjinge kindjɛka nkambaka la wɔkɔ! Tohonake nanyɛ Satana nya andja wande mbandji nghɔmɛlɛ. Sukaka wananyɔ l’ankaana yɛko. Edjinge nkilikaka ɛlɔndjɛlɔ kɛ Yehova. Ntsha wɛ nangha nghɔsɔ, okoka ndashikikɛ ente Papa kɛko kel’olongo angokokeketshɛka edjinge angokolamaka.​—Iza. 41:10.