1. Wepo w’ekakasano wɛkɔnge ɛmɔtshi wekoka mpomana l’enkambi wɛ Yehova?

WƐ OLEKONYƐNA ndjolo l’okakasano ɔmɔtshi wɔ wolo? Mbala imɔtshi onto ɔmɔtshi welá otshumano akonanghelaka nkambo mɔtshi djɛ nyɛtshi. (Dja. 3:2) Kana winá ɛmɔtshi winako welá nkalasa kana wel’olemo, wangɔkɔnyɔlake m’ɔtɛ w’okambelɛ Yehova. (1 Pɛ. 4:3, 4) Kana mbala imɔtshi ase nkfumbo kɛko mponaka nkoshimba dj’ipa ndjingela nsanghanyɛ kana ipa nshimela anto nkina kɛnɛ kelendana la djawo djɛko. (Mat. 10:35, 36) Ntsha ohemba womboleka wolo, mbala imɔtshi okoka nkanela ente angoleka wɔlɔ ntshika nkambela Yehova. Koko wɛ nkoka ndashikikɛ ente ayale kaanga okakasano wɔkɔnge wopomana la wɛ, Yehova angɔkɔpɛyɛ balo djɛ wɛ ndɔsa akano wa wɔlɔ edjinge wolo wɔ wɛ ndjewa nkfulumeyɛ okakasano wɔkɔ.

2. Lá nkilika Ɔrɔma 15:4, eposelo wɛkɔnge wekoka ndjala la walelo w’Otepela wɔ Ndjambe leso?

² L’Otepela wɔnde, Yehova ananghaka djɛ ndjɔmbɔmba yɛnyɛ wopo wɔ anto wa ntshamba djɛ djɔ iyakfulumeyɛka ehemba wɛ wolo nfunama lá Bible. Lamo? Dj’iso mba olakanyelo mewɔ lɔɔko kɛnɛ. Kɛsɔ ndeke Yehova ndatshinde ɔpɔstɔlɔ Poolo djɛ nfuna. (Wala Ɔrɔma 15:4.) Mbala ɛkɔndɔ wɛsɔ nkoka ntɔpɛyɛ lokembo edjinge nkongi. Koko, dj’iso mba wapɔ m’eteyi, topakoke nkoma ngo lá mbala Bible toko. Iso ladjɛ ndjawola djɛ Afunelo ntshikitanyɛ ekanedji kɛso edjinge nkota eloko wɛso. Ndjɔmbɔmba, kɛkɔnge k’okokaso nangha ntsha tolekɔ la djonyi djɛ mba alako amɔtshi lá kɛnɛ kelendana l’okakasano wombopomana laso? Iso nkoka nkamba la topo tɔnɛyi tɔwɔlama tɔnɛ: 1) Dɔmbɛlɔ, 2) Nkanela, 3) Ntɔnɔla, edjinge 4) Kamba la kɛnɛ k’ekɛ. Nyontshɔ tokolenda kɛnɛ kesakisola nkambo la nkambo. * Masɔ tongokamba la yopo  yɛsɔ djɛ mba olakanyelo má nkambo mɔtshi djekomelisa Nkfumi Davidɛ nya ɔpɔstɔlɔ Poolo.

3. Lá ntondo kɛ wɛ mbanga mbala Bible, kɛkɔnge k’oyɛ ladjɛ nangha, edjinge lamo?

³ 1) Dɔmbɛlɔ. Lá ntondo kɛ wɛ mbanga mbala Bible, lɔmba Yehova djɛ nde nkokotshɛ djɛ wɛ nyɛna wopo w’okokɛ mba wapɔ má kɛnɛ k’owalɛ. Ndjɔmbɔmba, ntsha ohonɛ nde dako djɛ nkandola, okakasano lɔmba Yehova djɛ nde nkokotshɛ djɛ wɛ mba tɔkfɔ timá Bible tokoka nkɔlɔndjɛ djɛ ndɔsa akano wa wɔlɔ.​—Flp. 4:6, 7; Dja. 1:5.

4. Kɛkɔnge kekoka nkokotshɛ djɛ wɛ nyɛna ɔkɔndɔ wɔ Bible etengo onanghemawɔ nde winá wɔsɔ?

⁴ 2) Nkanela. Yehova atɔpɛyɛka nkoka djɛ nkamɔ efula djɛ nkanela akambo. Djɛ nkokotshɛ djɛ nyɛna ɔkɔndɔ wɔ Bible etengo onanghemawɔ nde winá wɔsɔ, kanela edjinge ɛna lá wɔɔngɔ kɛnɛ kehetisa, ɔsa etengo wɛ ndeke onto wɔkɔ w’owalɛ nkambo djɛnde. Hona djɛ nyɛna akambo wandɛnyi, edjinge yawoka etengo wopo wɔ ndoyawoke.

5. Ntɔnɔla osakisolande nge, ko wopo wɔkɔnge okokɛ ntɔnɔla?

⁵ 3) Ntɔnɔla. Ntɔnɔla nsakisolaka nkanela la ntɔnɔ nkfumɔ lá kɛnɛ k’owalɛ edjinge wopo w’olendanɛ la nkambo djɛkɔ. Nkambo djɛsɔ nkokotshɛka djɛ wɛ ndjokanyɛ tokanyi edjinge mba looka lɔ wɔlɔ lá kɛnɛ k’owalɛ. Alekɔ etengo mbolo yɛ nkalo dj’otondo djɛ bango l’eteyi kɛ kartɔ. Ntɔnɔla alekɔ etengo ndjongɛ mbolo yɛsɔ djɛ mposɛ nkalo. Djɛ nkokotshɛ djɛ wɛ ntɔlɔla wɔlɔ wɛ nkoka ndawopola edjinge nkadjimola lá weepó etengo wɛnɛ: ‘Kanga ɔkɔndɔ wɔnɛ ndananghe nge djɛ nde ndakotshɛ nyɔmɛlɛ? Wopo wɔkɔnge Yehova ndokotshɛ? Wopo wɔkɔnge w’okokami nkamba la elakanyelo wɛ momeka djɛ nkfulumeyɛ ohemba wɔmi?’

6. Lamo oyɛso ladjɛ nkamba la kɛnɛ k’ekaso?

⁶ 4) Kamba la kɛnɛ k’ekɛ. Yeso atepelaka ante: Ntsha topakambe la kɛnɛ k’ekaso, tolekɔ etengo onto wombopika mvulu kɛnde lá lɔsɛnga. Nde nkambaka la wolo, koko apawaka wapɔ má welo w’ilande. Lamo? Mande winá woyɛ lompopo la dola, lɔkɔ ntshitaka mvulu, edjinge ndokfulumolaka. (Mat. 7:24-27) Wopo wɔk’ɔmɔ ndeke, ntsha iso ndɔmbaka, nyɛnaka wopo wohetisa akambo, edjinge ntɔnɔlaka ko topakambe la kɛnɛ k’ekaso, mbɔkoko topangowa wapɔ má welo w’ilaso. Winá wɔ djawo djɛso iyongopomana la ehemba kana la ndjolo, djepangoyala wolo djɛ nkfulumeyɛ. Koko ntsha iso ndjekaka edjinge nkambaka la kɛnɛ k’ekaso, tɔngɔsaka akano wa wɔlɔ, tongowa vu, edjinge tongoyala la djawo djɛ wolo. (Iza. 48:17, 18) Winá w’isotakambe l’akambo anɛyi w’isomboshiyɛ nyɛna wanɛ, nyontshɔ tolende olakanyelo w’okokaso mba má nkambo mɔtshi djekomelisa Nkfumi Davidɛ.

7. Ɔkɔndɔ w’ɔkɔnge wɔ Bible w’ɔkɔpaso ndjeka winá wɔsɔ?

⁷ Ilongo yɛko kana ose nkfumbo kɛko kɛmɔtshi ambokonanghela nkambo mɔtshi djɛ nyɛtshi? Ntsha nghɔsɔ, okoka mba wapɔ má ndjeka ɔkɔndɔ wɔ Absalɔmɔ wɔna Nkfumi Davidɛ, wonanghelisa papa kɛnde nkambo djɛ nyɛtshi edjinge wohonisa djɛ ndopapola onkfumi.​—2 Sa. 15:5-14, 31; 18:6-14.

8. Kɛkɔnge k’okokɛ nangha djɛ mba okotshɔ wɔ Yehova?

⁸ 1) Dɔmbɛlɔ. L’ɔkɔndɔ wɔkɔ lá wɔɔngɔ, shimela Yehova wopo woyawokɛ lá kɛnɛ kelendana lá nkambo djɛ nyɛtshi dj’iyakonanghela. (Yee. 6:6-9) Shimela Yehova akambo papoo. Masɔ, lɔmba Yehova djɛ nde nkokotshɛ djɛ wɛ mba tɔkfɔ tokoka nkɔlɔndjɛ djɛ wɛ ndjewa kɛnɛ k’okokɛ nangha l’okakasano wombokokomela.

9. Kotepela lá yopasɛ kɛnɛ kehetisa l’antenyɛ Davidɛ nya Absalɔmɔ?

⁹ 2) Nkanela. Kokanela lá kɛnɛ kehetisa lá wamba wanɛ, edjinge ɛna lá wɔɔngɔ wopo wɔ Nfkumi Davidɛ ndoyawoka. Wɔna Davidɛ le Absalɔmɔ akambaka ɛnɔnyi efula djɛ ntshinda anto djɛ ndɔkɔpa. (2 Sa. 15:7) Winá wɔ Absalɔmɔ ndɛnyi ante winá wɔ wɔlɔ wombotanema, nde atomaka  antɔmbi l’Isariyɛlɛ y’otondo dj’iwɔ ndɔngɔsala anto dj’iwɔ ndowawola etengo nkfumi kɛwɔ. Edjinge nde adjimbolaka Ahitɔfɛlɛ, kanga loyalaki ilongo yɛ ma ma edjinge ndaki kɛ Davidɛ djɛnde ndosuka lá ɔtɔmbɔkwɛlɔ wɔ nde. Absalɔmɔ ayawilaka nkfumi nyɔmɛlɛ, edjinge masɔ nde ahonaka mvunda la ndjaka Davidɛ, kanga loyalaki mbala imɔtshi l’olando wɔ wolo l’etena kɛsɔ. (Yee. 41:1-9) Davidɛ isolaka nkfuko k’iyotshwela kɛsɔ ko nde alotaka tá Jerusalɛmɛ. L’ekomo, angala wa Absalɔmɔ wananyɛka angala wa nkɔmano wa Davidɛ. Koko angala w’antɔmbɔki wasɔ watalonga mbandji, ko Absalɔmɔ wa wɔna Davidɛ ayakemaka.

10. Kɛkɔnge kɛ Nkfumi Davidɛ ndakoke nangha?

¹⁰ Lonkina, k’ɛɛna wopo wɔ Davidɛ oyawokande winá wombokomela akambo ankfumɔ wasɔ. Nde akɔpaki Absalɔmɔ edjinge ilelaki Ahitɔfɛlɛ oloko. Koko, anto wakɔ wande ape wa ma ma wasɔ wotshwelaka nkfuko. Wonanghelaka nkambo djɛ nyɛtshi efula edjinge wahonaka ndoyaka. Davidɛ akokaka ndjɛkɔ tolongo tɔnde tonkina, lá nfɛnyɛ ante iwɔ nkoka ndingela l’ɔtɔmbɔkwɛlo wɔ Absalɔmɔ. Nde akokaka mpona ngo wapɔ wɔnde nyɔmɛlɛ edjinge mpona ndota t’owila onkina ngo nde nyɔmɛlɛ. Kana nde akokaka ndɛmba amboleka. Koko Davidɛ atanangha akambo ankfumɔ wasɔ. Nde alongelaka okakasano wɔ wolo wɔsɔ. Lamo ndayale l’akoka wanangha nghɔsɔ?

11. Davidɛ ndananghe nge l’okakasano wɔ wolo wɔsɔ?

¹¹ 3) Tɔnɔla. Tɔkfɔ tɔkɔnge tokokɛ ndjeka m’ɔkɔndɔ wɔsɔ? Kokadjimola lá woopó wɔnɛ: “Kɛkɔnge kɛ Davidɛ ndakoke nangha nyɔmɛlɛ djɛ ndakotshɛ?” Davidɛ atanangha akambo la lopopa lopopa, kana ndɔsa akano wapalekɔ la balo. Lonkina nde atoka wɔma w’indeko wokokisa ndokomɛ djɛ nsamba ndɔsa kaanga nkano. Koko, nde alɔmbaka Yehova djɛ nde ndokotshɛ. Nde alɔmbaka lonkina okotshɔ wɔ tolongo tɔnde edjinge mbala kɛkɔ kɛmɔ nde akambaka l’akano wa ndɔshi. Kaanga nkambo djɛsɔ iyokote efula l’oloko, Davidɛ atatshika ndjilela anto ankina oloko. Edjinge atakoma kanga lɔnkɛnkɛlɛ koko nde akindjɛka ndawɛkɛ te Yehova edjinge te tolongo tɔnde.

12. Kɛkɔnge kɛ Yehova ndananghe djɛ nkotshɛ Davidɛ?

¹² Wopo wɔkɔnge Yehova ndakotshɛ Davidɛ? Má nangha ndambo k’ehonelo, ɔngɛna ente Yehova apɛyɛka Davidɛ nkfulu kindayalaka la djonyi djɛ nkfulumɛyɛ okakasano wɔsɔ. (Yee. 3:1-8; efunelo welá djiko) Yehova atshɔkɔlaka akano wa Davidɛ ndɔshi. Edjinge nde asukaka tolongo tɔ Davidɛ tɔ nkɔmano djɛ nama nkfumi kɛwɔ.

13. Wopo wɔkɔnge okokɛ ndjokola Davidɛ ntsha onto ɔmɔtshi ambokonanghela nkambo djɛ nyɛtshi efula? (Mateo 18:15-17)

¹³ 4) Kamba la kɛnɛ k’ekɛ. Yawopola nghɔmɛlɛ ente, ‘Wopo wɔkɔnge okokami ndjokola Davidɛ?’ Angoyala djonyi wɛ nangha lankeke djɛ wɛ nkandola okakasano wɔsɔ. Lá nkilika nkambo djembokokomela, wɛ nkoka nkamba l’alako wa Yeso welá Mateo shapitrɛ 18 mbala kɛkɔ kɛmɔ kana nkilika tɔkfɔ. (Wala Mateo 18:15-17.) Koko tɔsake akano wa lopopa lopopa winá w’oyalɛ la yɛnyi kana la nkɛlɛ. Wɛ ladjɛ ndɔmba Yehova djɛ nde nkɔpɛyɛ vu djel’oloko edjinge balo dj’oyɛ la djonyi djɛ nkandola okakasano wɔsɔ lá wopo wɔ wɔlɔ. Tɛkɔke tolongo tɔko. Koko, yala entshupa djɛ wɛ ndjawola okotshɔ w’ɔkɔpɛyɛwɔ. (Woo. 17:17) Koko nkambo deka djonyi nde, kilika alako wa Yehova ɔkɔpɛyɛnde m’Otepela wɔnde.​—Woo. 3:5, 6.

14. L’akambo amɔtshi wakɔnge 2 Timɔte 1:12-16; 4:6-11, 17-22 okokawɔ nkokeketshɛ?

¹⁴ Ose nkfumbo kɛko ɔmɔtshi angɔkɛnyɛke ndjolo m’ɔtɛ w’okambelɛ Yehova? Kana intansɛ nde l’owila wɔ iyomboshimba akambo amɔtshi kana akambo ankfumɔ walendana l’enkambi wɛ Yehova? Ntsha nghɔsɔ, wɛ nkoka nkeketshama má mbala 2 Timɔte 1:12-16 edjinge 4:6-11,  17-22. * Poolo afunaka etenyi k’Efunelo wɛnɛ winá wɔ ndayalaka lá lokando.

15. Kɛkɔnge k’okokɛ ndɔmba Yehova?

¹⁵ 1) Dɔmbɛlɔ. Lá ntondo kɛ wɛ mbala avɛrse wanɛ, shimela Yehova okakasano wɔko edjinge wopo w’oyawokɛ lá kɛnɛ kelendana l’okakasano wɔkɔ. Shimelande akambo papoo. Masɔ lɔmba Yehova djɛnde nkokotshɛ djɛ wɛ ndjisola tɔkfɔ m’ɔkɔndɔ wɔ ekakasano wepomanisa la Poolo, tongokokotshɛ djɛ wɛ ndjewa kɛnɛ k’okokɛ nangha l’okakasano wɔ ngombopomana la wɔkɔ.

16. Kɔkɔndɔla lá yopasɛ kɛnɛ kekomelisa Poolo?

¹⁶ 2) Nkanela. Ɛna etengo wɛ ndeke lombopomana la nkambo djepomanisa la Poolo. Nde alekɔ lá lokando l’Ɔrɔma nkolama la mulɔla. Nde ayalaki ntondo lá lokando koko winá wɔsɔ, amboyashikikɛ ante nde akɔpa ndjakema. Ntombe yɛnde imɔtshi wokadjɛka, edjinge lá lolelemba nde ambɔlɛmba.—2 Ti. 1:15.

17. Kɛkɔnge kɛ Poolo ndakoke nangha?

¹⁷ Poolo akokaka ndjila yimba l’akambo wamboheta lá ntateyɛ nkanela ante, otasambami ndjala Okristo ntshimi mbala imɔtshi ntasamba mvundama. Nde akokaka mbombela wananyɔ welá distrikɛ dj’Aziya wokadjisá onkomba edjinge nde akokaka ntshika djɛ ndjilela tolongo tɔnde tonkina oloko. Koko l’akambo ankfumɔ wasɔ, Poolo atanangha kaanga nkambo mɔ. Lamo ndayale l’akoka wa nkindjɛ ndawɛkɛ edjinge ndjala la nkongi te Yehova la te tolongo tɔnde tonkina?

18. Kɛkɔnge kɛ Poolo ndananghe winá wɔ ndapomana l’okakasano wɔ wɔlɔ wɔsɔ?

¹⁸ 3) Tɔnɔla. Kadjimola lá woopó wɔnɛ: “Wopo wɔkɔnge Poolo ndoyakotshɛ nyɔmɛlɛ?” Kaanga Poolo ndewaka ante lako ilá nde akɔpa ndjakema, atavungɛ ante alekɔ djonyi efula mpɛyɛka Yehova lomo. Edjinge nde akindjɛka nkanela wopo w’okokande nkeketshɛ anto ankina. Nde ayawɛkɛki te Yehova má alɔmbɛlɔ wa mbala la mbala. (2 Ti. 1:3) L’edjena kɛnde nkindjɛ nkanela ngo wopo wɔ wananyɔ iyokadjɛ, nde ɛnyɛka djedjɛ djɛnde dj’efula t’osukɔ wɔ ngandji wɔ tolongo tɔnde tokotshisa la nkɔmano nkfumɔ lá topo tɛnama papoo. Ládjiko djɛ masɔ, Poolo akindjɛki ndjeka Otepela wɔ Ndjambe. (2 Ti. 3:16, 17; 4:13) Nkambo djeleka djonyi nde, nde ayalaki la ndashikikɛ ante Yehova nya Yeso ndɔkɔpaka. Iwɔ watókadjɛ, edjinge wangoyofuta l’olemo wɔnde wɔ nkɔmano.

19. Wopo wɔkɔnge Yehova ndakotshɛ Poolo?

¹⁹ Yehova ashimela Poolo lá ntondo ante, etengo oyɛnde Okristo, nde angopomana la ekakasano. (Ele. 21:11-13) Wopo wɔkɔnge Yehova ndakotshɛ Poolo? Nde akadjimolaka alɔmbɛlɔ wa Poolo edjinge ɔpɛyɛki nkfulu winá la winá. (2 Ti. 4:17) Poolo ayalaki l’eshikikelo ante, angowa lofuto lɔ ndakambe la wolo djɛ mba. Lonkina Yehova akambaka la tolongo tɔ Poolo dj’iwɔ ndɔpɛyɛ okotshɔ wɛnama papoo.

20. Wopo wɔkɔnge okokaso ndjokola djawo djɛ Poolo ndɛnyɛ lá Ɔrɔma 8:38, 39?

²⁰ 4) Kamba la kɛnɛ k’ekɛ. Yawopola nghɔmɛlɛ ente: ‘Wopo wɔkɔnge w’okokami ndjokola Poolo?’ Etengo Poolo, iso ladjɛ ndjawola ente tɔngɛna ndjolo m’ɔtɛ wɔ djawo djɛso. (Mar. 10:29, 30) Dj’iso nama nkɔmano djɛso lá winá w’ehemba, iso ladjɛ ndawɛkɛ te Yehova lá alɔmbɛlɔ edjinge ndjala la nonghanyi kɛ wɔlɔ kɛ wekelo wɔ Bible. Edjinge iso ladjɛ mvungɔka winá enkfumɔ ente, nkambo mɔtshi deka djonyi dj’oyɛso ladjɛ nangha nde, mpɛyɛ Yehova lomo. Iso nkoka ndashikikɛ ente Yehova apatokadjɛki kaanga ndambo daambi edjinge lako ekete kekoka ntatola má ngandji kɛnde.​—Wala Ɔrɔma 8:38, 39; Heb. 13:5, 6.

21. Kɛkɔnge kekotshisa Aya nya Hector djɛ ndongela ekakasano wepomanisa lawɔ?

²¹ Ayale kaanga nkambo djɛkɔnge djembotokomela,  iso nkoka mba lokembo má ndjɔmbɔmba yemá Bible. Ndjɔmbɔmba, nkaana kɛso Aya, kanga lolekɔ yat’ekalo lá Japon, ntepelaka ante: Ɔkɔndɔ wɔ Yɔna wokotshɛka djɛ nde nyimɛ wɔma l’olemo w’ipoposanyɛ welá ntshandjawala. Hector, wananyɔ w’olangala welá Indonésie wolekɔ la ambotshi wapakambela Yehova, atepelaka ante: Ndjɔmbɔmba k’Oruta kɔpɛyɛka olakanyelo djɛnde ndjeka akambo efula walendana la Yehova edjinge ndokambela.

22. Kɛkɔnge kekoka nkokotshɛ djɛ wɛ mba wapɔ efula má adramɛ welá Bible kana má ɔnɔnghɔ wɔ wamba wolekɔ l’ɔtɛ wɔ djoyi ante “Nyokole djawo djɛwɔ”?

²² Okokɛ ntana ndjɔmbɔmba inkina yemá Bible yengokokeketshɛ má mpe? Tovideo tɔso edjinge adramɛ wa lekameyɛ edjinge ɔnɔnghɔ wɔ wamba wolekɔ l’ɔtɛ wɔ djoyi ante: “Nyokole djawo djɛwɔ” nkoka nkokotshɛ djɛ nyɛna ɛkɔndɔ wɛ Bible etengo onanghemawɔ nde lɔɔko. * Lá ntondo kɛ wɛ ndenda, ndjekameyɛ kana mbala ɛkɔndɔ wɛ wɔlɔ wɛsɔ, lɔmba Yehova djɛnde nkokotshɛ djɛ wɛ ntana elakanyelo wɛ djonyi wekoka nkamba lawɛ. Ɛna etengo wɛ ndeke onto w’otepelawɔ l’ɔkɔndɔ wɔkɔ. Tɔnɔla lá kɛnɛ kenanghisá enkambi wɛ Yehova wɛ nkɔmano wɛsɔ edjinge wopo wɔ iyoyakotshɛ iyɔmɛlɛ djɛ ndongela ekakasano wɛsɔ. Masɔ, kamba la elakanyelo wɛ ngombowa lá kɛnɛ kembokokomela. Kawoyɛ Yehova lokasa l’okotshɔ wɔ ndɔɔkɔpɛyɛka winá enkfumɔ edjinge ɛnyɛ ente olekɔ la djedjɛ l’okotshɔ wɔsɔ, má mponaka mbamba yɛ nkeketshɛ edjinge nsukaka anto ankina.

23. Lá nkilika Izaya 41:10, 13, kɛkɔnge kɛ Yehova ndombotolaka djɛ ntonanghela?

²³ Lowiko lɔ l’andja wa lɔndjɛma me Satana wanɛ, nkoka ndjala wolo efula edjinge lá winá ɛmɔtshi topewaka kɛnɛ k’okokaso nangha. (2 Ti. 3:1) Koko topakoke ndakiyanyɛ kana ndjala la wɔma. Yehova ndjewaka kɛnɛ ketokomela. Winá w’oyɛso la djonyi dj’okotshɔ, nde angotokota lá lɔwɔ lɔnde lɔ nkfulu. (Wala Izaya 41:10, 13.) Tolekɔ la eshikikelo ente ntsha tomboyawɛkɛ tá osuko wɔnde, tokoka mba lokembo má Afunelo edjinge mba wolo wɔ ndongela ekakasano enkfumɔ.