1-2. Kɔmantɛrɛ kɛkɔnge kɛpɛyisa onfunyi ɔmɔtshi, edjinge kɛkɔnge k’ɔkɔpaso nyɛna lá djamba djɛnɛ?

LƆƆKO kɛnɛ miliyɔ y’anto ntepelaka ambɔ walekɔ la djawo te Yeso, koko wapalɛmɛyɛ kɛnɛ k’olakanyɛnde. (2 Ti. 4:3, 4) Djɛkondeke, onfunyi ɔmɔtshi afunaka ante: “Ntsha lɔɔko kɛnɛ onto ɔmɔtshi wolekɔ ngete ‘Yeso’ alekɔ l’anteyi kɛso ko atepela akambo ngongete Yeso ndatepelaka . . . , tongotona onto wɔsɔ etengo iyatone Yeso amboheta ɛnɔnyi nunu mpe? . . . Okadjimwelo w’iyaleke mpɛyɛ nde: Ee, tongotona.”

² Anto efula wal’ɛtɛndɔ kɛ ntondo w’okaka Yeso alakanyɛ edjinge wɔwɛnaka anangha ansese, koko watonaka ndjala la djawo te nde. Lamo? Lá djamba djemboheta, tɛnaka donga nɛyi djetshindisa anto djɛ ntakana l’ɔtɛ wɔ kɛnɛ kɛ Yeso ndatepelaka la kindananghaka. Nyontshɔ tolende donga nkina nɛyi. Winá w’isotashishima donga djɛsɔ, tongɛna lamo anto otonawɔ ambeki wa Yeso lɔɔko kɛnɛ edjinge wopo w’okokaso ndjewo dj’ipa ntakana.

3. Kɛkɔnge kɛ Yeso ndananghe ketshindisa anto amɔtshi djɛ ntakana?

³ Winá wɔ Yeso ndayalaka lanɛ lá looko, nde ahetshɛki winá la nkopo y’anto inkfumɔ. Nde alɛki nya ase okfudji edjinge nyta ase wolo, koko nde ahetshɛki lonkina winá efula l’ase ɔmvɔ edjinge l’anto w’ɛnaki ndjolo. Lonkina, nde ayalaki la djandji te anto w’iyɔsaka etengo ananghi ‘y’evunga.’ Anto amɔtshi w’etako watonaka Yeso má kɛnɛ kɛ ndatepela. Iwɔ wopolaka ambeki wande ambɔ: ‘Lamo ɔlɛnyo esanga la wafutisɛ  elambo edjinge l’ananghi y’evunga?’ Yeso akadjimolaka ante: ‘Anto wayalaka ndemba vu wapahonaka ifulumɛ, koko ngo anto walekɔ l’elando. Lemi ndjɛka ndohona ape anto wa wɔlɔ, koko ananghi y’evunga dj’iwɔ ndapɛla.’​—Luka 5:29-32.

4. Lá nkilika prɔfɛsi kɛ Izaya, kɛkɔnge kɛ ase Juda iyayale ladjɛ ndjewa lá nkambo djɛ Mesiya?

⁴ Kɛkɔnge ketepela Afunelo? Ilá efula lá ntondo kɛ Mesiya ndjɛ, ɔprɔfɛtɛ Izaya atepelaka nkambo djɛnde etengo onto wopangáwolama me ase andja. Prɔfɛsi kɛkɔ kewoyɛka ante: ‘Nde ɔnywamaka edjinge atonamaka me anto . . . Ayalaka etengo elongi kɛnde kisamaka meso. Nde ɔnywamaka, edjinge tɔwɔsaka etengo onto w’anyanya.’ (Iza. 53:3) Prɔfɛsi kɛnyɛka djɛ ‘anto’ wangotona Mesiya, djɛkondeke ase Juda wel’ɛtɛndɔ kɛ ntondo wewaka ambɔ Yeso angotonama.

5. Wopo wɔkɔnge anto efula lɔɔko kɛnɛ ɔsakawɔ ambeki wa Yeso?

⁵ Tɛna wopo w’okakasano wɔ nghɔsɔ lɔɔko kɛnɛ? Ee. Ewandji wɛ ntolo efula djalaka l’osasa wɔ ndongola lá ntolo djɛwɔ anto wɔsama la djonyi, walekɔ l’okfudji edjinge wɔsama etengo anto wabalo l’andja wanɛ. Iwɔ ndjawolaka wepo w’anto wa nghɔsɔ lá ntolo djɛwɔ kaanga ntsha wanangha akambo wapokana l’ɛlɛmbɛ wɛ Ndjambe. Ewandji wɛkɔ wɛ ntolo ndendaka enkambi wɛ Yehova welekɔ l’entete, edjinge walekɔ la nanghedji djɛ wɛlɔ la wiso wa nyɛtshi, mande wapalekɔ anto wa lomo lá nkilika as’andja wanɛ. Etengo Poolo ndatepela, Ndjambe nsɔnaka anto ‘wapalekɔ la ntshina.’ (1 Kɔ. 1:26-29) Koko le Yehova, enkambi wɛnde enkfumɔ welekɔ la nkɔmano, walekɔ la ntshina.

6. Kɛkɔnge kɛ Yeso ndatepela lá Mateo 11:25, 26, edjinge wopo wɔkɔnge okokaso ndowokola?

⁶ Wopo wɔkɔnge w’okokaso ndjewɔ dj’ipa ntakana? (Wala Mateo 11:25, 26.) Totadjimbɔke má wopo wɔ andja wanɛ ɔsakawɔ enkambi wɛ Ndjambe. Ewa ente Yehova nkambaka ngo l’anto w’okitshakitshɛ djɛ nangha ɛkɔpa kɛnde. (Yee. 138:6) Edjinge tɔnɔla l’efula k’akambo kɛ ndombonangha má nkamba l’anto w’andja wanɛ ɔsawɔ etengo anto wapalekɔ la balo kana wapewe onkanda.

7. Lamo Yeso ndete Afarisɛ ante anto wa ndongi mpe, ko iyelola ngete mo?

⁷ L’oloko wolo onkfumɔ, Yeso aposɛka nanghedji djɛ ndongi mpe dj’ewandji wɛ ntolo wɛl’etsho wɛnde lá bandja. Ndjɔmbɔmba, nde aposɛka lá bandja eyalelo kɛ ndongi mpe keyalaki l’Afarisɛ, wayakiyanyɛki efula ngo lá wopo w’osolawɔ ɛwɔ wɛwɔ ndeka lá wopo w’okokawɔ nkotshɛ ehomba wɛ ambotshi wawɔ. (Mat. 15:1-11) Mbala imɔtshi ambeki wa Yeso wakamɔka má etepala wɛnde. Djɛkondeke, iyowopola ambɔ: ‘Wɛ ewa ente Afarisɛ wambotakanaka má ndjoka kɛnɛ kɛ ngotepelaki?’ Yeso akadjimolaka ante: ‘Otamba onkfumɔ wɔ Papa kel’olongo ndotakoná, wongofumolama. Nyatshike. Oyɛwɔnde tɔlɔndjɛ tombowodjɛ wiso. Ntsha, onto wombowodjɛ wiso alɔndjɛ onto wombowodjɛ wiso, iyape kɛkɔ wangokitela tá mpeku.’ (Mat. 15:12-14) Kaanga ewandji wɛ ntolo iyomalaká má kɛnɛ kɛ Yeso ndatepelaka, nde atatshika ntepela kɛnɛ kelekɔ nsɔsɔlɔ.

8. Wopo wɔkɔnge Yeso ndɛnyɛ ante apalekɔ elakanyelo enkfumɔ welakanyɛ ntolo ndeke losasangɛ Ndjambe?

⁸ Lonkina Yeso aposɛka elakanyelo w’engolo wɛ ntolo lá bandja. Nde atatepela ante elakanyelo enkfumɔ welakanyɛ ase ntolo oyɛwɔnde me Ndjambe. Koko, nde atepelaka ante anto efula wanghingela tá mboka k’ekekete kɛtɔla tá etshitanelo koko ngo anto daambi toko ndeke longhingela tá mboka kɛ ndaambi kɛtɔla tá lowiko. (Mat. 7:13, 14) Nde atepelaka  papoo ante, anto amɔtshi wangɛnyɛka etengo iwɔ nkambelaka Ndjambe, koko lá nsɔsɔlɔ wapokambela. Nde apɛyɛka ndjewo kɛnɛ ante: ‘Nyowadjɛ mande w’aprɔfɛtɛ y’engolo wangoyɛ lenyo wambɔlɔta mposo y’ɛnkɔkɔ, koko l’etenyi oyɛwɔnde ndjawondo yɛ mpango. Nyongawewa má mbambo yɛwɔ.’​—Mat. 7:15-20.

9. Elakanyelo ɛmɔtshi wɛkɔnge w’engolo welakanyɛki ntolo Yeso ndaposɛ lá bandja?

⁹ Kɛkɔnge ketepela Afunelo? Prɔfɛsi yɛ Bible yewoyɛka lá ntondo ante entete lá nkambo djɛ mvulu kɛ Yehova kɛngɔlɛ Mesiya. (Yee. 69:9; Dj. 2:14-17) Entete kɛsɔ ketshindaka Yeso djɛ mposɛ elakanyelo edjinge nkfumbo dj’engolo djɛ ntolo lá bandja. Afarisɛ w’awolaki ambɔ anima apavu, Yeso alakanyɛki ante anto wambovɔ oyɛwɔnde l’ilɔ. (Dj. 11:11) Asadukɛ watawolaki ekfundwelo, Yeso akfundolaka ilongo yɛnde Lazaro. (Dj. 11:43, 44; Ele. 23:8) Afarisɛ walakanyɛki ambɔ Ndjambe alonghanyɛka lá ntondo akambo wangotokomela kana wangonanghema lá lowiko lɔso, Yeso alakanyɛka ante, onto nkoka nsɔna nkambela Ndjambe kana lako.​—Mat. 11:28.

10. Lamo anto efula otakanakawɔ m’olakanyelo wɔso?

¹⁰ Tɛna wopo w’okakasano wɔ nghɔsɔ lɔɔko kɛnɛ? Ee. Anto efula ntotonaka mande iso nkambaka la Bible djɛ nyɛnyɛ anto ente elakanyelo ɛmɔtshi welakanyɛ ase ntolo welekɔ engolo. Ewandji wɛ ntolo ndakanyɛka ase ntolo djɛwɔ ambɔ Ndjambe mpɛyɛka anto wa nyɛtshi dilanyɛ lá mpenkfu dj’iyɛ. Iwɔ nkambaka l’olakanyelo w’ongolo wɔsɔ djɛ ndjapamela anto ankina. Etengo oyɛso enkambi wɛ Yehova, wɛtɛmɔla Ndjambe kɛ ngandji, iso nkotshɛka anto dj’iwɔ nsipisoyɛ ambɔ elakanyelo wɛsɔ welekɔ engolo. Ewandji wɛ ntolo ndakanyɛka lonkina ambɔ anima apavu. Otayalawɔnde olakanyelo wɔsɔ wolekɔ nsɔsɔlɔ, ntshimi lak’onto wotakoka nkfundɔ. Koko iso nyɛnyɛka ente olakanyelo wɔsɔ wopalekɔ w’imá Bible. Edjinge kaanga ntolo efula olakamyɛwɔ ambɔ kenkfumɔ kenanghema l’andja oyɛwɔnde nkano dj’ɔsamisa me Ndjambe lá ntondo, iso ndakanyɛka ente anto walekɔ la lotshungɔ edjinge iwɔ nkoka nsɔna djɛ nkambela Ndjambe. Ewandji wɛ ntolo onanghakawɔ nge? Mbala efula, iwɔ nyomalaka!

11. Lá nkilika etepela wɛ Yeso welá Djɔanɛ 8:45-47, kɛkɔnge kɛ Ndjambe ɔlɔmbande anto wande?

 ¹¹ Wopo wɔkɔnge w’okokaso ndjewɔ dj’ipa ntakana? Ntsha iso nkɔpaka akambo wa nsɔsɔlɔ, iso ladjɛ ndjawola kɛnɛ ketepela Ndjambe. (Wala Djɔanɛ 8:45-47.) Lá lɛdji lotshikitanyi la Satana Djabolo, iso ndawɛkɛka l’akambo wa nsɔsɔlɔ. Topananghaka kaanga ekete k’epokana la djetawɔ djɛso. (Dj. 8:44) Ndjambe ndɔmbaka anto wande ante: ‘Nyotone kɛnɛ kelekɔ nyɛtshi’ edjinge ‘nyovunde kɛnɛ kelekɔ wɔlɔ mpidji,’ etengo Yeso ndananghe.​—Ɔrɔ. 12:9; Heb. 1:9.

12. Lamo wopo wɔ Yeso ndavu ndakomɛ ase Juda efula djɛ ntakana?

¹² Elonga kɛkɔnge kenkina ketshindisa ase Juda djɛ ntona Yeso? Poolo atepelaka ante: ‘Topoposanyɛ Kristo kanga lopanemisa l’otamba, djoyi djɛsɔ dekɔ otamba wotakanyɛ le ase Juda.’ (1 Kɔ. 1:23) Lamo ase Juda efula iyatakana má wopo wɔ Yeso ndavu? Lewɔ, wopo wɔ Yeso ndavu l’otamba ɛnyɛka djɛ nde alekɔ kanga nyɛtshi edjinge onanghi w’evunga koko ape Mesiya.​—Mvu. 21:22, 23.

13. Kɛkɔnge kɛ wanɛ watakanisa lá nkambo djɛ Yeso iyotasipisoyɛ?

¹³ Wanɛ wayalisa l’anteyi k’ase Juda watakanisa lá nkambo djɛ Yeso watasipisoyɛ ambɔ nde atayala la lowo, wotonghanyɛka edjinge wonanghelaka akambo la ntshamba djɛ sii. Wanɛ walomboyɛki Yeso watanangha akambo la yopo yɛ sii. Tominanyi teladjiko t’ase Juda watshumanaka lankeke lankeke, edjinge watakilika ɛlɛmbɛ welendana la dombo. (Luka 22:54; Dj. 18:24) L’edjena kɛ ndjekameyɛ emamanyɛ edjinge tolembetelo t’engolo t’iyapɛyɛ lá nkambo djɛ Yeso, tosushi iyɔmɛlɛ wapɛyɛka ‘ewakɛ w’engolo lá nkambo djɛ Yeso djɛ ndotshinda tá nyɔyi.’ Etengo iyotalonga, nkfundji k’ekekete ahonaka ntshinda Yeso djɛ nde ntepela itepela yɛ nyɛntshi djɛ nde ndɔwɛkɛ lowo. Nkambo djɛsɔ djetokana kaanga ndambo l’ɛlɛmbɛ welendana la dombo. (Mat. 26:59; Mar. 14:55-64) Edjinge m’ɔkɔngɔ wɔ Yeso mvɔ, tosushi tɔ ntshamba djɛ sii tɔsɔ wapɛyɛka angala w’ase Ɔrɔma walamaki nketa  ‘nfalanga efula yɛ kɛngɛlɛ’ djɛ ntshanghanyɛ losango l’ongolo l’ɛnyɛ lamo iyombotana nketa oholo.​—Mat. 28:11-15.

14. Kɛkɔnge kewoyisa Afunelo lá nkambo djɛ Mesiya?

¹⁴ Kɛkɔnge ketepela Afunelo? Kaanga efula k’ase Juda wal’etsho wɛ Yeso iyotewaki ambɔ Mesiya ayalaka ladjɛ mvɔ, kolenda kɛnɛ kɛ Afunelo iyewoyɛ lá ntondo: ‘Nde alambolaka lowiko lɔnde tii tá nyɔyi, edjinge awalemaka l’anteyi k’anto wa pɔlɔ, nde awɛmbaka mpekanto y’anto efula, edjinge alɔmbaka lá wapɔ wɔ ananghi yɛ wayi wa pɔlɔ.’ (Iza. 53:12) Djɛkondeke, ase Juda watayala kaanga l’elonga kɛ wɔlɔ kɛ ntakana winá wɔ Yeso ndayakema etengo onanghi w’evunga.

15. Akambo amɔtshi wakɔnge w’iyamame Ewakɛ wɛ Yehova watshinda anto amɔtshi djɛ ntakana?

¹⁵ Tɛna wopo w’okakasano wɔ nghɔsɔ lɔɔko kɛnɛ? Ee! Watonghanyeyɛka Yeso akambo edjinge womamaka lowo. Kaanga lɔɔko kɛnɛ, wananghela Ewakɛ wɛ Yehova akambo wa ntshamba djɛ djɔ wa nghɔsɔ. Tokolenda ndjɔmbɔmba imɔtshi. L’États-Unis l’antenyɛ 1930 la 1940, tingelaki lá dombo winá la winá l’ɔtɛ wɔ nseela lotshungɔ lɔsɔ lɔ ntɛmɔla Ndjambe. Tosushi tɔmɔtshi wɛnyɛki papoo djɛ wayalaki la tokanyi tɔ nyɛtshi leso. Lá Quebec, l’owila wɔ Canada, ase ntolo edjinge Ewandji wɛ lɛɛta wakambaka esanga djɛ nyemɛ olemo wɔso. Ansakodji efula wakowamaka l’ankando ngo l’ɔtɛ wɔ nshimela winawɔ akambo walendana l’Onkfumi wɔ Ndjambe. L’Allemagne, l’ɛlɔndjɛlɔ k’ase Nazi, wayakaka wananyɔ w’elangala efula walekɔ la nkɔmano. L’ɛnɔnyi emangha wemboheta wɛnɛ, wamamaka efula kɛ wananyɔ waso welá Russie lowo edjinge waakowaka l’ankando ngo l’ɔtɛ w’iyashimelaka anto akambo walendana la Bible, edjinge wetaka olemo wɔsɔ ambɔ “olemo w’antɔmbɔki.” Washimbaka kaanga Bible—Ekadimwelo k’andja w’oyoyo l’otepela wɔ Russie edjinge watepelaka ambɔ oyɛwɔnde “epeko kekamba l’antɔmbɔki” ngo mande kekamba la djiina Yehova.

16. Etengo 1 Djɔanɛ 4:1 ɛnyɛwɔ, lamo isopakoke ndjimbɔ m’engolo w’otshanghanyɛwɔ lá nkambo dj’enkambi wɛ Yehova?

¹⁶ Wopo wɔkɔnge w’okokaso ndjewɔ dj’ipa ntakana? Kɔndjɛ nkambo djɛkɔ djɛ ndjisola nsɔsɔlɔ. Lá Djamba djɛnde djɛ l’onkoko, Yeso ewoyɛka anto wowekameyɛki ante, anto amɔtshi ‘wangaatonghanyɛ wepo enkfumɔ w’akambo wa nyɛtshi.’ (Mat. 5:11) Ikɔkɔ y’engolo wɛsɔ nde Satana. Nde ntshindaka antonyi waso djɛ ntshanghanyɛ sango y’engolo lá nkambo dj’anto wakɔpa nsɔsɔlɔ. (Ndj. 12:9, 10) Iso ladjɛ ntona engolo wetepela antonyi waso. Totawolake kaanga ndambo daambi djɛ engolo wɛ nghɔsɔ ntɔpɛyɛ wɔma kana nkitshakitshɛ djawo djɛso.​—Wala 1 Djɔanɛ 4:1.

17. Lá wopo wɔkɔnge akambo waposisa tá nyɔyi kɛ Yeso iyakoke ntakanyɛ anto amɔtshi?

¹⁷ Ngo ndambo daambi lá ntondo kɛnde mvɔ, Yeso akapemaka me ɔpɔstɔlɔ wɔnde ɔmɔtshi l’anteyi kɛ apɔstɔlɔ wande 12. Ɔpɔstɔlɔ onkina anghanaka Yeso mbala isato, edjinge apɔstɔlɔ ankfumɔ wokadjɛka la nkɔlɔ djɛ nyɔyi kɛnde. (Mat. 26:14-16, 47, 56, 75) Yeso atakamɔ lá nkambo djɛsɔ. Nde ewaka ante nkambo djɛsɔ djengokomela. (Dj. 6:64; 13:21, 26, 38; 16:32) Má nyɛna nkambo djɛsɔ, anto amɔtshi wakokaka ntakana, lá nkanela ambɔ, ‘ntsha eyalelo kɛ nghɔnɛ ndeke lolekɔ l’apɔstɔlɔ wa Yeso, mbɔ koko mpangoyala l’oloyi wɔwɔ!’

18. Prɔfɛsi yɛkɔnge yekotshamisa m’akambo wananghemisa ndambo daambi lá ntondo kɛ nyɔyi kɛ Yeso?

¹⁸ Kɛkɔnge ketepela Afunelo? Ɛnɔnyi nkama lá ntondo, Yehova ewoyɛka l’Otepela wɔnde ante, Mesiya angokapema la nfalanga yɛ kɛngɛlɛ  30. (Zak. 11:12, 13) Onkapi angoyala ɔmɔtshi l’anteyi kɛ tolongo tɔ Yeso tɔ ma ma. (Yee. 41:9) Ɔprɔfɛtɛ Zakari afunaka lonkina ante: ‘Yaka olami w’ɛnkɔkɔ ndeke ɛnkɔkɔ watshanghane.’ (Zak. 13:7) L’edjena k’iwɔ ntakana m’akambo wasɔ, anto walekɔ l’eloko wɛ wɔlɔ wakokaka mba lokembo má nyɛna prɔfɛsi yɛsɔ ikotshama le Yeso.

19. Kɛkɔnge kɛ anto walekɔ l’eloko wɛ wɔlɔ osipisoyɛwɔ?

¹⁹ Tɛna wopo w’okakasano wɔ nghɔsɔ lɔɔko kɛnɛ? Ee. L’etsho wɛso wɛnɛ, Ewakɛ ɛmɔtshi watshikaka akambo wa nsɔsɔlɔ, wakomaka w’apɔsta, ko wahonaka edjinge ndjimbola anto amɔtshi. Iwɔ watshanghanyɛka nsango yɛ nyɛtshi, nsɔsɔlɔ yɛ totenyi, edjinge akambo w’engolo lá wa ɛnfɔrmasiɔ, edjinge l’Ɛntɛrnɛtɛ lá nkambo djɛ Ewakɛ wɛ Yehova. Koko anto walekɔ l’eloko wɛ wɔlɔ, wapatakana. Iwɔ nsipisoyɛka ambɔ, Bible ewoyɛka lá ntondo ante akambo wa nghɔsɔ wangonanghema.​—Mat. 24:24; 2 Pɛ. 2:18-22.

20. Wopo wɔkɔnge okokaso ndjewɔ dj’ipa ntakana me wanɛ wambotshikaka akambo wa nsɔsɔlɔ? (2 Timɔte 4:4, 5)

²⁰ Wopo wɔkɔnge w‘okokaso ndjewɔ dj’ipa ntakana? Iso ladjɛ nkindjɛ namaka djawo djɛso wolo, má ndjekaka Bible mbala la mbala, nkindjɛka ndɔmba, edjinge nkindjɛ ndapɛyɛ l’olemo wɔ Yehova ndatɔpɛyɛ. (Wala 2 Timɔte 4:4, 5.) Ntsha iso ndjala la djawo, topangoyakiyanyɛ winá w’okaso nsango yɛ nyɛtshi. (Iza. 28:16) Ngandji kɛso te Yehova, t’Otepela wɔnde, edjinge te wananyɔ waso kengotokotshɛ dj’ipa ntakana me wanɛ wambotshikaka akambo wa nsɔsɔlɔ.

21. Kaanga anto efula lɔɔko kɛnɛ otonawɔ losango lɔso, kɛkɔnge k’oyɛso ladjɛ ndashikikɛ?

²¹ L’ɛtɛndɔ kɛ ntondo, anto efula watakanaka edjinge watonaka Yeso. Koko, anto ankina efula w’owawolaka. Anto amɔtshi w’ase tominanyi t’ase Juda edjinge kaanga ‘oloyi w’ankfundji’ wayalaka l’anteyi k’anto w’owawolisa wasɔ. (Ele. 6:7; Mat. 27:57-60; Mar. 15:43) Wopo wɔk’ɔmɔ ndeke, kaanga lɔɔko kɛnɛ miliyɔ y’anto wapatakana. Lamo? Mande iwɔ nkɔpaka akambo wa nsɔsɔlɔ walekɔ l’Afunelo. Otepela wɔ Ndjambe ntepelaka ante: ‘Vu dj’efula dekɔ le wanɛ wakɔpa ɛlɛmbɛ wɛko, lako ekete kekoka ndaatakanyɛ.’​—Yee. 119:165.