1. Ndjɔmbɔmba kɛkɔnge kɛ Yeso ndatshikela ambeki wande, edjinge wopo wɔkɔnge w’iyelola? (Lenda ntshango djelá loposo.)

YESO akindjɛka ndjala l’ikanyi yɛ wɔlɔ l’ilá kenkfumɔ k’olemo wɔnde lanɛ lá looko, edjinge nde nkɔpaka djɛ kaanga ambeki wande nkindjɛ ndjala l’ikanyi yɛ wɔlɔ lá nkambo dj’olemo w’ipoposanyɛ. (Dj. 4:35, 36) Winá wɔ Yeso ndayalaka esanga l’ambeki wande, iwɔ wayalaki l’osasa l’olemo w’ipoposanyɛ. (Luka 10:1, 5-11, 17) Koko winá wɔ Yeso ndoovundamaka, edjinge ndoovɔka, ambeki wande watshutshɛka osasa wɔwɔ wɔ mpoposanyɛ l’itenyi yɛ winá. (Dj. 16:32) M’ɔkɔngɔ w’ekfundwelo kɛnde, Yeso ákembɛka dj’iwɔ ndjila yimba l’olemo w’ipoposanyɛ. Edjinge m’ɔkɔngɔ wɔnde mpanda t’olongo, iwɔ wapoposanyɛka l’entete k’efula ketshindisa kaanga antonyi wawɔ dj’iwɔ ndotepela ambɔ: ‘Nyokolenda! nyo nyombolodjɛ Jerusalɛmɛ l’elakanyelo wɛnyo.’​—Ele. 5:28.

2. Wopo wɔkɔnge Yehova ndatshɔkɔla olemo w’ipoposanyɛ?

² Yeso alɔndjɛka olemo wonanghemaki me Akristo wel’ɛtɛndɔ kɛ ntondo, edjinge Yehova átshɔkɔlaka djɛkondeke anto efula wawolaka losango lɔwɔ. Ndjɔmbɔmba, lá Patɛkɔntɛ 33 Ɛ.K., anto etengo 3 000 walongolaka batisimo. (Ele. 2:41) Edjinge lofulo l’ambeki lotakindjɛki ngo nfula lá lɛdji l’efula. (Ele. 6:7) Lonkina, Yeso ewoyɛka ante olemo w’ipoposanyɛ w’ongoyala l’eposelo wɛ wɔlɔ efula l’etsho w’ekomo.​—Dj. 14:12; Ele. 1:8.

3-4. Lamo olemo w’ipoposanyɛ okokawɔ ndjala wolo lá ntena mɔtshi, edjinge kɛkɔnge kenaso lɔ lá djamba djɛnɛ?

³ Isankfumɔ mponaka djɛ ndjala l’ikanyi yɛ wɔlɔ lá kɛnɛ kelendana l’olemo w’ipoposanyɛ. L’ewila ɛmɔtshi, alekɔ wɔdju nangha nkambo djɛsɔ. Lamo? Mande anto efula ndapɛyɛka djɛ ndjeka Bible, edjinge amɔtshi ladjɛ nkonga tii winá w’okoka Owakɛ wɔ Yehova ɔmɔtshi ndowa mbamba kɛ ndjeka lawɔ! Koko l’ewila ɛmɔtshi ansakodji ndjalaka l’okakasano efula l’olemo  w’ipoposanyɛ, anto wapaleke ntanema lá mbandja edjinge wanɛ watanema lá mbandja, wapaleke ndapɛyɛ efula lá wayi welá Bible.

⁴ Ntsha owikɛnde l’owila w’oyɛwɔ l’okakasano l’olemo w’ipoposanyɛ, alako walekɔ lá djamba djɛnɛ wangokokotshɛ. Tɔngɛna kɛnɛ kenanghisa anto amɔtshi djɛ mba anto efula l’olemo w’ipoposanyɛ. Edjinge tongoshishima wopo w’okokaso ndjala l’ikanyi yɛ wɔlɔ kaanga ntsha anto wawola losango lɔso kana lako.

5. Ekakasano wɛkɔnge wepomana l’Ewakɛ efula?

⁵ Ewakɛ wɛ Yehova efula djalaka l’okakasano lombombe djɛ ntana anto lá djena djɛwɔ. Ansakodji amɔtshi, w’intansɛ l’ewila wɛ amvulu efula imbodjingamaka lá mpango yɛ nkekete. Mpango yɛsɔ ikoka ndjala l’anami wakoka nshimba onto onkfumɔ wotalongola leeta me ankanga wa lopango djɛ ndjingela. Lá djena nkina, ansakodji nkoka ntshɔ topoposanyɛ lá mvulu la mvulu ipa l’okakasano, koko wangotanake ngo anto daambi lá mbandja. Lonkina ansakodji ndjitansɛka lá djena djepalekɔ l’anto efula, etengo lá tonkenda. Ansakodji nkoka ntshɔ lɔkɛndɔ l’otale ngo djɛ tolenda ase inkenda imɔtshi, ko mbala imɔtshi wapangotana anto lá mbandja! Ntsha opoposanyɛsonde lá ntatshi djɛ looko djɛ nghɔsɔ, mbɔ totapekɔke! Kɛkɔnge k’okokaso nangha djɛ ndongela ekakasano wɛ nghɔsɔ, edjinge ndjala l’eposelo wɛ wɔlɔ l’olemo wɔso?

6. Wopo wɔkɔnge ansakodji oyɛwɔ etengo ansaki ndjale?

⁶ Yeso ɛdjɛka olemo w’ipoposanyɛ l’olemo w’onsaki ndjale. (Mar. 1:17) Ansaki ndjale amɔtshi nkoka nkamba nfu efula ipa la mba kaanga isese imɔ. Koko iwɔ wapapekɔ, iwɔ ntshikitanyɛka topo tokambakawɔ la tɔkɔ. Iwɔ ntshikitanyɛka winá, edjena, kana yopo yɛwɔ yɛ nsaka. Iso nkoka nangha etshikitano wɛkɔ ɛmɔ l’olemo wɔso. Tokolenda akambo amɔtshi w’okokaso nangha.

7. Eposelo wɛkɔnge wekoka mposa ntsha wɛ mpoposanyɛka lá winá wetshikitanyi?

⁷ Hona djɛ ntana anto lá winá wetshikitanyi. Tokoka mba anto efula wa nsawola lawɔ ntsha iso mpoposanyɛka lá winá w’okokawɔ ntanema lá mbandja. Kɛnɛ kelekɔ nsɔsɔlɔ nde, onto onkfumɔ nkalɔka ngo lá mbandja lá winá ɔmɔtshi! Wananyɔ l’ankaana efula wangɛnake ambɔ alekɔ wɔlɔ mpoposanyɛ m’ɔkɔngɔ wɔ midi kana la nkɔlɔ mande wangotanake anto efula lá mbandja. Lonkina, nkoka ndjala la winá wɛsɔ ase lopango wambohomola ndambo edjinge wamboyala entshupa djɛ nsawola l’anto. Kana okoka nyɛna wɔlɔ nkamba l’ikanyi yɛ wɔnanyɔ ɔmɔtshi w’ikokolo wetawɔ Davidɛ. Nde atepelaka djɛ m’ɔkɔngɔ wɔ mpoposanyɛ ndambo l’etatshi kɛmɔtshi kɛ looko, nde nya winande wangokalɔke lonkina tolenda anto wapayalisa lá mbandja winá w’iyohetaki mbala kɛ ntondo. Nde ante: “Langokamɔke efula djɛ nyɛna wopo w’ase lopango oyalawɔ efula lá mbandja winá w’okalɔso ntalenda mbala k’epe.” *

8. Wopo wɔkɔnge w’okokaso nkamba la Losanghanyɛ 11:6 l’olemo wɔso w’ipoposanyɛ?

⁸ Topakoke mpekɔ. Vɛrse djɛso dj’ɔsamisa ɔtɛ wɔ djamba djɛnɛ ntovungolaka eyalelo k’oyɛso ladjɛ ndjala la kɛkɔ. (Wala Losanghanyɛ 11:6.) Davidɛ, wɔnanyɔ w’isotepelaki má djiko, atapekɔ. Lá lopango lɔmɔtshi, nde ayɛka ndotana kanga lopango ngo m’ɔkɔngɔ wɔnde ndjɛ mbala la mbala. Mpame kɛsɔ ɛnyɛka mposɛ lá djamba dj’imá Bible djɛsɔ edjinge atepelaka ante: “Lambintansɛ lanɛ etengo ɛnɔnyi enanɛyi, koko ntɛnaka kaanga Owakɛ wɔ Yehova ɔmɔ lá lopango lɔmi lɔnɛ.” Davidɛ ntepelaka ante: “Lambisola ente ekom’ekomo winá w’oyɛ ndotana anto lá lopango, wangawolake mbala efula losango l’opoposanyɛso.”

9. Wopo wɔkɔnge Ewakɛ ɛmɔtshi owakawɔ mbamba kɛ nsawola l’anto walekɔ wolo ndatana l’amvulu yɛwɔ?

 ⁹ Sɛsa djɛ mpoposanyɛ lá ndjena djetshikitanyi. Djɛ mpomana l’anto walekɔ wolo ndatana l’amvulu yɛwɔ, ansakodji amɔtshi wangotshikitanyɛke djena dj’opoposanyɛwɔ. Ndjɔmbɔmba, mpoposanyɛ l’ontayimbo edjinge nkamba la prezantuarɛ alekɔ topo tɔmɔtshi tokotshɛ djɛ mpomana l’anto w’intansɛka l’amvulu yembodjingama la mpango yɛ nkekete y’isopakoke ndjingela winá w’opoposanyɛso mvulu la mvulu. Kɛsɔ nkotshɛka Ewakɛ djɛ nsawola elongi l’elongi l’anto wa mbala imɔtshi topakoke ndjingela lá djena djɛwɔ. Lonkina, ansakodji efula w’isolaka ambɔ anto ndekaka nsawola wɔlɔ kana ndjawola enkanda wɛso winá w’oyalawɔ lá wa parkɛ, lá mbengo, kana lá djena nkina dj’onanghawɔ opoto. Floiran, onami ɔmɔtshi w’edjingadjinga welá Bolivie, atepelaka ante: “Tongotshɔke tá mbengo edjinge tá ndjena djokambawɔ elemo m’oshidji 1:00 tá eshidji 3:00 winá wɔ wasadjɛ nkete wapalekɔ l’olemo efula mande wa kliya wambokitakita. Mbala efula tongosawolake lawɔ wɔlɔ edjinge tongowangake kaanga wekelo wɔ Bible lawɔ.”

10. Topo tɔkɔnge tonkina t’okokɛ nkamba la tɔkɔ?

¹⁰ Sɛsa djɛ nkamba la topo totshikitanyi. Kɔsa djɛ mbala la mbala onangha la wolo djɛ nyɛnana ny’onto ɔmɔtshi elongi l’elongi. Owembola lá winá wetshikitanyi koko opotane lákande. Topo tɔmɔtshi tonkina tolekɔ tɔ mbasɛ onto wɔ nghɔsɔ? Nkaana kɛso k’etawɔ Katarína, ntepelaka ante: “Lemi nfunelaka anto w’imopatanaka kaanga mbala kɛkɔ kɛmɔ l’amvulu yɛwɔ enkanda, lemi ndashimelaka kɛnɛ kotakokami ndashimela ntsha lambopomana isawɔ elongi l’elongi.” Olakanyelo wɔkɔnge w’owaso? Nangha  la wolo djɛ mbasɛ onto onkfumɔ wel’etatshi kɛko kɛ looko etengo okokɛ nangha l’olemo wɔko nghɔmɛlɛ.

11. Lamo anto amɔtshi iyopawolaka losango lɔso?

¹¹ Anto amɔtshi wapakɔpaka ndjawola losango lɔso. Wapɛnaka ambɔ alekɔ djonyi lewɔ djɛ ndjewa akambo wa Ndjambe kana wa Bible. Iwɔ wapalekɔ la djawo te Ndjambe mande wangɛnake ndjolo efula l’andja wanɛ. Wangotonake Bible ladjikɛnde wangɛnake ewandji wɛwɔ wɛ ntolo wetepelaká ambɔ wangɔlɛmɛyɛke Bible wanangha akambo wa nyɛtshi. Ankina ndakiyanyɛka dj’elemo wɛwɔ, ankfumbo yɛwɔ, kana ekakasano wɛwɔ enkina, edjinge wapafɛnyɛka ambɔ Bible nkoka ndaakotshɛ. Wopo wɔkɔnge okokaso nama osasa wɔso ntsha anto w’opoposanyɛso nyɛnaka ambɔ losango lɔso lopalekɔ la djonyi?

12. Wopo wɔkɔnge okambelo wɔ l’etepela welá Filipɛ 2:4 okokawɔ ntokotshɛ l’olemo w’ipoposanyɛ?

¹² Ɛnyɛ djɛ wɛ ndakiyanyɛka lá nkambo djɛwɔ. Efula k’anto ketonaki losango lɔso lɔ wɔlɔ má bango wayɛka ndawola winá w’iyɛnyi ambɔ nsakodji kɛmɔtshi ayakiyanyɛka lá nkambo djɛwɔ. (Wala Filipɛ 2:4.) Ndjɔmbɔmba, Davidɛ, kanga sotepelaki má djiko, ntepelaka ante: “Ntsha onto ɔmɔtshi ambotoshimela ante mpakɔpɛ, tɔngɔsake Bible djɛso edjinge enkanda wɛso ndjila lá mpata ko ndoshimela ente: ‘Lemi nkɔpaka ndjewa lamo otepelɛ nghɔsɔ.’” Onto nkoka nyɛna winá w’onto oyakiyanyɛnde lá nkambo djɛnde. Iwɔ nkoka mvungɛ mbala kɛkɔ kɛmɔ akambo wa nsɔsɔlɔ w’isashimelaki koko mbala imɔtshi wangokindjɛka mvungɔ wopo w’isoyakiyanyɛki lá nkambo djɛwɔ. Kaanga ntsha kanga lopango apawolisa iso ndoshimela losango lɔ wɔlɔ, iso nkoka nyɛnyɛ m’eyalelo kɛso edjinge m’elongi kɛso ente toyakiyanyɛ lá nkambo djɛnde.

13. Wopo wɔkɔnge okokaso ndjokanyɛ losango lɔso la ehomba enkfumɔ w’onto wotanaso lá lopango?

¹³ Iso nyɛnyɛka djɛ toyakiyanyɛ lá nkambo djɛ kanga lopango winá w’okanyɛso losango lɔso la ehomba wɛnde edjinge la mposɛ yɛnde. Ndjɔmbɔmba, tɛna ekete kɛmɔtshi kɛnyɛ ente kanga lopango alekɔ la wana? Ntsha nghɔsɔ ambotshi nkoka ndapɛyɛ l’alako wimá Bible walendana l’owongwelo wɔ wana kana alako wɛnyɛ wopo wɔ ndjala la lowiko l’osasa lá nkfumbo. Tɛna anfungola efula lá nkfuke yɛwɔ? Ntsha nghɔsɔ iso nkoka ntepela lá nkambo djɛ wayi wa lopango edjinge akambo wa wɔma wambolola l’andja wanɛ, m’ɔkɔngɔ kanga mvulu nkoka ndoyala l’osasa djɛ ndjoka ante akambo wasɔ wangoyala l’ekomo. Ayale kaanga wopo wɔkɔnge wɔ nkambo, hona djɛ nkotshɛ wakekameyɛ dj’iwɔ nyɛna wopo wɔ alako welá Bible okokawɔ ndakotshɛ. Katarína,  nkaana k’isotepalaki má djiko, atepela ante: “Mvungɔ mɔmɛlɛ wopo wɔ akambo wa nsɔsɔlɔ iyawɔngɛ lowiko lɔmi.” Eposelo welekɔ la nkambo djɛsɔ nde, Katarína ntepelaka la ndashikikɛ kenkfumɔ, edjinge wanɛ wasawola lande nkoka nyɛna nkambo djɛsɔ.

14. Lá nkilika Woongo 27:17, wopo wɔkɔnge ansankodji watápoposanyɛ esanga okokawɔ nkotshana l’anteyi kɛwɔ?

¹⁴ Waka okɔtshɔ me anto ankina. L’ɛtɛndɔ kɛ ntondo, Poolo akapanyɛka topo tɔnde tɔ mpoposanyɛ edjinge tɔ ndakanyɛ nya Timɔte, edjinge nde akeketshɛka Timɔte djɛ nkamba la topo tɔsɔ djɛ nkotshɛ anto ankina. (1 Kɔ. 4:17) Etengo Timɔte, iso nkoka ndjeka akambo efula me wananyɔ wel’otshumano walekɔ la balo. (Wala Woongo 27:17.) Tɔkɔsa ndjɔmbɔmba kɛ wɔnanyɔ wetawɔ Shawn. L’ilá k’etsho ɛmɔtshi, nde ayalaka yat’ekalo l’inkenda imɔtshi yɛ anto efula wakɔpaki etolo kɛwɔ efula. Iya wopo wɔkɔnge ndalame osasa wɔnde? Nde ntepelaka ante: “Mbala la mbala, laposaki la nsakodji kɛmɔtshi. Takambaki la winá w’isakɛndaka má mvulu kɛnɛ tá mvulu kenkina dj’iso nkotshana djɛ ndɔngɔsɔla akoka waso wa ndakanyɛ. Ndjɔmbɔmba, totasawolaki lá kɛnɛ kelendana l’etepela wɛ kanga lopango ndotoshimelaki edjinge wopo w’isokadjimolaki. Masɔ tasawolaki wopo w’okokaso nangha lonkina ntsha tombopomana la nkambo djɛkɔ mɔ.”

15. Lamo lɔlɔmbɔ oyɛwɔ djonyi l’olemo wɔso w’ipoposanyɛ?

¹⁵ Lɔmba Yehova djɛ nkokotshɛ. Lɔmba ɛlɔndjɛlɔ kɛ Yehova winá enkfumɔ w’oposɛ t’olemo w’ipoposanyɛ. Lako kaanga onto wokoka nangha kambo mɔ, ipa l’okotshɔ wɔ nkfulu kɛ nyuma kɛnde k’ekina. (Yee. 127:1; Luka 11:13) Winá wɔlɔmbɛ Yehova okotshɔ má dɔmbɛlɔ, djipolande akambo papo papo. Ndjɔmbɔmba, lɔmbande djɛ nde nkɔlɔndjɛ te anto walekɔ la mposɛ kɛ ndjewa akambo walendana lande edjinge walekɔ entshupa djɛ nkekameyɛ. Masɔ kamba la dɔmbɛlɔ djɛkɔ má mpoposanyɛ onto onkfumɔ wopomana nyape.

16. Lamo oyɛso ladjɛ nanghaka wekelo w’onto nyɔmɛlɛ djɛ ndjala l’eposelo wɛ wɔlɔ l’olemo w’ipoposanyɛ?

¹⁶ Tshungolaka winá djɛ nanghaka wekelo w’onto nyɔmɛlɛ. Otepela wɔ Ndjambe ntepelaka ante: ‘Nyewe nyɔmɛlɛ ɛkɔpa kɛ ndjambe kɛ wɔlɔ kawolama edjinge kɛ djɔ.’ (Ɔrɔ. 12:2) Winá wekaso iso ndekaka ndjewa Ndjambe wɔlɔwɔlɔ, masɔ winá w’oshimelaso anto ankina akambo walendana lande, iwɔ wangɛna ambɔ tolekɔ nsɔsɔlɔ la djawo lá kɛnɛ k’ashimelaso. Katarína, nkaana k’isotepelaki má djiko, ntepelaka ante: “Atahete ilá, nsipisoyɛka djɛ ndekɔ la djonyi djɛ nkembɛ djawo djɛmi lá kɛnɛ kelendana l’elakanyelo ɛmɔtshi wɛ ntondo welá Bible. Djɛkondeke ndjekaka la ntɔnɔ nkfumɔ donga djɛnyɛ ente Ontongi alekɔ, dekɔ nsɔsɔlɔ l’Otepela wɔ Ndjambe, edjinge Ndjambe alekɔ lɔɔko kɛnɛ l’olonghanyelo wɔlɔndjɛma mende.” Katarína ntepelaka ante wekelo wɔnde w’onto nyɔmɛlɛ w’okembɛka djawo djɛnde edjinge wofudjɛka osasa wɔnde t’olemo w’ipoposanyɛ.

17. Lamo Yeso ndakindjɛ ndjala l’ikanyi yɛ wɔlɔ l’olemo wɔnde?

¹⁷ Yeso akindjɛka ndjala l’ikanyi yɛ wɔlɔ edjinge akindjɛka mpoposanyɛ kaanga anto amɔtshi iyotakɔpa ndjawola losango lɔnde. Lamo? Nde ewaki ante anto walekɔ la djonyi efula djɛ ndjewa akambo wa nsɔsɔlɔ edjinge akɔpaki nangha kenkfumɔ k’okokande nangha djɛ ndakotshɛ dj’iwɔ mba mbamba kɛ ndjawola losango l’Onkfumi. Nde ewaki ante anto amɔtshi nkoka ntona losango lɔso mbala kɛ ntondo ko ndaawola l’ɔkɔngɔ. Kolenda kɛnɛ kehetisa lá nkfumbo kɛnde nyɔmɛlɛ. L’ilá k’ɛnɔnyi esato l’etenyi w’olemo wɔ Yeso lanɛ lá looko, lako kaanga ankfunɛnde ɔmɔ woyalisa ombeki wɔnde. (Dj. 7:5) Koko, m’ɔkɔngɔ w’ekfundwelo kɛnde, wayɛka ndoyala Akristo.​—Ele. 1:14.

18. Lamo okindjɛso mpoposanyɛ?

 ¹⁸ Topewe onto wɔkɔnge w’okoka ndawola akambo wa nsɔsɔlɔ w’imá Bible w’olakanyɛso. Anto amɔtshi ndɔsaka winá efula ndeka ankina djɛ ndawola losango lɔso. Kaanga wanɛ wapakɔpɛ ndjawola losango lɔso nyɛnaka nanghedji djɛso djɛ wɔlɔ, edjinge ekom’ekomo iwɔ nkoka ‘ndolumɛ Ndjambe.’​—1 Pɛ. 2:12.

19. Lá nkilika 1 Kɔrɛntɔ 3:6, 7, kɛkɔnge k’oyɛso ládjɛ mvungɔka?

¹⁹ Kaanga okonaso la ovutelaso washi, iso ladjɛ mvungɔka ente Ndjambe ndeke loposɛ. (Wala 1 Kɔrɛntɔ 3:6, 7.) Getahun, wɔnanyɔ wokamba l’Ethiopie, ntepelaka ante: “L’ilá k’ɛnɔnyi ndekana 20, ngo lemi mɔmɛlɛ toko ndeke l’oyalaki Owakɛ wɔ Yehova lá mbandja kɛso. Koko winá wɔsɔ tombokoma ansakodji 14. L’anteyi kɛwɔ djomi l’asato wambolongola batisimo, ndjila edjinge wadjɛmi la wana wami asato. Tongokomake anto 32 lá nsanghanyɛ.” Getahun alekɔ l’osasa lá wopo wɔ ndakindjɛ mpoposanyɛ la balentshitshi nkfumɔ winá wɔ ndakongaka Yehova nsepa anto w’eloko wɔlɔ l’olonghanyelo wɔnde!​—Dj. 6:44.

20. Lá wopo wɔkɔnge oyɛso etengo anto wawikɛ mbiko?

²⁰ Yehova ndɔsaka lowiko l’onto onkfumɔ la ntshina. Nde atɔpɛyɛka mpeyi kɛ nkamba esanga la Wɔnande djɛ ntshumanyɛ anto w’imá ewila enkfumɔ lá ntondo k’ekomo kɛ nkfumbo dj’akambo wanɛ ndjɛ. (Ang. 2:7) Olemo wɔso w’ipoposanyɛ wɔnɛ nkoka ndjɛlama l’olemo wɔ mbikɛ mbiko y’anto. Edjinge iso tolekɔ etengo anto w’iyombotoma djɛ ntowikɛ anto wambokitela lá mpekfu dj’otshimawɔ adiama. Ayale kaanga atshimi y’adiama amangha toko ndeke longotanema la lowiko, olemo wonangha anto wawikɛ mbiko inkfumɔ yɛsɔ wolekɔ ngo la djonyi. Nghɔsɔ ndeke oyɛwɔ edjinge l’olemo wɔso w’ipoposanyɛ. Topewe anto amangha wangowika má andja wa Satana wanɛ. Koko Yehova nkoka nkamba l’ɔmɔmɔ l’antenyi kɛso djɛ ndakotshɛ. Andreas, kanga l’intansɛ lá Bolivie, ntepelaka ante: “Lemi nyɛnaka onto onkfumɔ weka akambo wa nsɔsɔlɔ w’imá Bible edjinge wolongola batisimo etengo eposelo wimá welo wenanghisa oloyi w’anto.” Nyontshɔ tolame ekanedji kɛ wɔlɔ kɛ nghɔsɔ lá nkambo dj’olemo wɔso. Ntsha iso nangha nghɔsɔ, Yehova angotosakola, edjinge olemo wɔso w’ipoposanyɛ wongoyala ikɔkɔ y’osasa wɔ nsɔsɔlɔ.