1. Kɛkɔnge kekokamoyisa mbala imɔtshi winá w’ingawange nshimela anto losango lemá Bible?

OVUNGƆ winá wɔ ngasipisoyɛ ente ombisola akambo wa nsɔsɔlɔ? Ayalaki wɔdju efula lewɛ djɛ nsipisoyɛ akambo ankfumɔ w’ingekaka má Bible! Wɛ akanelaki ente onto onkfumɔ angawola akambo wekɛ. Wɛ ayalaki l’eshikikelo ente losango lɔ Bible longapɛyɛ lowiko l’osasa má winá wɔsɔ edjinge nkongi djɛ nsɔsɔlɔ l’etsho weyaye. (Yee. 119:105) Djɛkondeke, l’osasa onkfumɔ, otateyɛka nshimela tolongo tɔko edjinge boto djɛko akambo wa nsɔsɔlɔ wangisolá má Bible. Ko kɛkɔnge keposisa? Okamɔka djɛ nyɛna ente anto efula wapawola kɛnɛ k’ashimelɛ.

2-3. Wopo wɔkɔnge efula k’anto wal’etsho wɛ Yeso iyelolaká lá nkambo djɛnde?

² Topakoke nkamɔ winá wɔ anto otonawɔ losango lopoposanyɛso. Anto efula wal’etsho wɛ Yeso w’otonaka kaanga ndananghaka ansese wɛnyɛki ambɔ Ndjambe ndeke lotomisa. Ndjɔmbɔmba, Yeso akfundolaka Lazarɛ, ɔsɔ ayalaka nsese djɛ kaanga antonyi wande watakoka mpama. Kaanga oyɛwɔ nghɔsɔ, ewandji wɛ ntolo w’ase Juda watawola ambɔ Yeso alekɔ Mesiya. Koko, iwɔ wahonaka ndjaka ayale kaanga Yeso kana Lazarɛ!​—Dj. 11:47, 48, 53; 12:9-11.

³ Yeso ewaki ante anto efula wapangawola ambɔ nde alekɔ Mesiya. (Dj. 5:39-44) Nde ashimelaka ambeki wa Djɔanɛ Obatizanyi ante: ‘Osasa le onto wopawa elonga kɛ ntakana lá nkambo djɛmi.’ (Mat. 11:2, 3, 6) Iya ko lamo anto efula iyatone Yeso?

4. Kɛkɔnge kɔkɔpaso nyɛna lá djamba djɛnɛ?

⁴ Lá djamba djɛnɛ, edjinge djɛwɔlama, tɔngɛna donga mɔtshi djetshindisa efula k’anto dj’ipa ndjala la djawo te Yeso.  Tɔngɛna lonkina lamo efula k’anto wal’etsho wɛso wɛnɛ otonakawɔ losango lɔso. Nkambo deka djonyinde, tɔngɛna lamo okokaso ndjala la djawo te Yeso, dj’ipa iso ndotakana lá nkambo djɛnde.

5. Lamo anto amɔtshi iyafɛnyɛka ambɔ Yeso atakoka ndjala Mesiya kelakemisa?

⁵ Efula k’anto watakanaka lá nkambo djɛ Yeso m’ɔtɛ wɔ mbandja kɛ ndafule. Iwɔ wawolaki ambɔ Yeso alekɔ wetsha wɔ balo edjinge ananghaki ansese. Koko lewɔ, nde ayalaki ngo wɔna w’otshudji w’awaya w’opa ntshina. Edjinge nde ayalaki ose Nazarɛtɛ, ngando k’iyɔsaka mbala imɔtshi etengo lako la ntshina. Kaanga Natanayɛlɛ, loyisa ndoyala ombeki wɔ Yeso, atepelaka ntondo ante: ‘Nkambo mɔtshi djɛ wɔlɔ nkoka mposa má Nazarɛtɛ?’ (Dj. 1:46) Mbala imɔtshi Natanayɛlɛ atakɔpaki mbandja kɛ Yeso ndafule kɛsɔ. Kana koko nde akanelaki prɔfɛsi kelekɔ lá Mika 5:2, kewoyisa lá ntondo ante Mesiya angowotshɔ lá Betɛlɛhɛmɛ, koko ape lá Nazarɛtɛ.

6. Kɛkɔnge keyalisa ladjɛ nkotshɛ anto wal’etsho wɛ Yeso djɛ ndembetela ambɔ Yeso ndeke Mesiya?

⁶ Kɛkɔnge ketepela Afunelo? Ɔprɔfɛtɛ Izaya ewoyɛka lá ntondo ante, antonyi wa Yeso ‘wapangoyakiyanyɛ lá ikakambo inkfumɔ yelendana la lɔsɔkɛ’ lɔ Mesiya. (Iza. 53:8) Akambo efula wa nghɔsɔ wewoyamaka lá ntondo. Ntsha anto wasɔ ɔtɔsawɔ winá djɛ nshishima akambo wasɔ, watakoka ndjewa ambɔ Yeso awotshɔka lá Betɛlɛhɛmɛ edjinge ayalaka inkanola yɛ Nkfumi Davidɛ. (Luka 2:4-7) Djɛkondeke Yeso awotshɔka ngo l’edjena kɛ prɔfɛsi kɛ Mika 5:2 iyewoyɛ. Ntsha oyɛwɔnde nghɔsɔ, nkambo iyayale lámpe? Anto w’ɔsaka akano wa lopopalopopa. Iwɔ watawa tolembetelo t’onkfumɔ. Má nkambo djɛsɔ iwɔ watakanaka ntepela ente watonaka Yeso.

7. Lamo anto efula otonakawɔ Ewakɛ wɛ Yehova lɔɔko kɛnɛ?

⁷ Tɛna wopo w’okakasano wɔ nghɔsɔ lɔɔko kɛnɛ? Ee. Enkambi wɛ Yehova efula wapalekɔ ase okfudji kana anto wa djonyi efula edjinge anto efula ndawɔsaka etengo ‘anto wapewe onkanda edjinge anto ng’anto.’ (Ele. 4:13) Anto efula nkanelaka ambɔ enkambi wɛ Ndjambe wapakoke ndakanyɛ anto akambo walendana la Bible mande iwɔ watanangha nkalasa yɛ teologi. Ankina ntepelaka ambɔ, Ewakɛ wɛ Yehova walekɔ “etolo k’ase Amɛrikɛ,” koko lá nsɔsɔlɔ, kaanga otepelawɔ nghɔsɔ, l’Ewakɛ wɛ Yehova 7, ngo 1 toko ndeke l’intansɛ l’États-Unis. Amɔtshi lonkina ntepelaka ambɔ Ewakɛ wɛ Yehova wapalekɔ la djawo te Yeso. L’ilá k’ɛnɔnyi efula, anto ndjɔka Ewakɛ wɛ Yehova nkombo ambɔ walekɔ “Wakɔministɛ,” “Tɔntɔmbi t’ase Amɛrikɛ,” edjinge “antɔmbɔki.” Ladjikɛnde anto wapakɔpɛ ndjala Ewakɛ wɛ Yehova l’ɔtɛ w’awolawɔ engolo wɛsɔ la w’iyopewe nsɔsɔlɔ lá nkambo dj’enkambi wɛ Yehova, iwɔ watakana.

8. Lá nkilika Elemo 17:11, kɛkɔnge kɛ anto oyɛwɔ ladjɛ nangha ntsha iwɔ nkɔpaka ndjewa wanɛ walekɔ enkambi wɛ Ndjambe lɔɔko kɛnɛ?

⁸ Wopo wɔkɔnge w’okoka anto ndjewɔ dj’ipa ntakana? Anto ladjɛ mpona djɛ ndjewa kɛnɛ kelekɔ nsɔsɔlɔ. Ɔsɔ ndeke nkano djɛ onfunyi w’Evanjeliyo wɔ Luka ndɔshi. Nde ‘akɔdjɛka akambo ankfumɔ wɔlɔwɔlɔ má bangabango.’ Nde akɔpaki djɛ antangi yɛnde ‘ndjewa nsɔsɔlɔ k’akambo’ w’iyoke lá nkambo djelendana la Yeso. (Luka 1:1-4) Ase Juda wayalaki lá Beroya w’okolaka Luka. Mbala kɛ ntondo k’iyoke losango lɔ wɔlɔ lá nkambo djelendana la Yeso, iwɔ washishimaka Afunelo w’ase Hebero djɛ ndenda kana akambo w’iyashimela walekɔ nsɔsɔlɔ. (Wala Elemo 17:11.) Wopo wɔk’ɔmɔ ndeke, lɔɔko kɛnɛ, anto ladjɛ nkɔdjɛka akambo djɛ ndjewa kɛnɛ kelekɔ nsɔsɔlɔ. Iwɔ  ladjɛ ndjɛdjɛka kɛnɛ k’enkambi wɛ Ndjambe olakanyɛwɔ la kɛnɛ kɛ Bible otepelande. Lonkina, iwɔ ladjɛ ndjekaka ɔkɔndɔ w’enkambi wɛ Yehova wɛ l’etsho wɛso. Ntsha iwɔ “nkɔdjɛ djɛ ndjewa kɛnɛ kelekɔ nsɔsɔlɔ,” mbɔ wapangawola djɛ nkakanyi kana w’ambɔ ante, ndaatakanyɛ.

9. Kɛkɔnge keposisa winá wɔ Yeso ndatone ndawɛnyɛ ilembetelo yem’olongo?

⁹ Anto amɔtshi wal’etsho wɛ Yeso watawola elakanyelo wɛnde wɛ nsɔsɔlɔ. Iwɔ wahonaka akambo ankina efula. Iwɔ walɔmbaka djɛ nde ndawɛnyɛ ‘ilembetelo yem’olongo’ djɛ ndawɛnyɛ ante nde alekɔ Mesiya. (Mat. 16:1) Mbala imɔtshi iwɔ wakɔpaka djɛ nde nangha nghɔsɔ m’ɔtɛ w’iyotayala la looka lɔ wɔlɔ lɔ Danyɛlɛ 7:13, 14. Koko, ɔsɔ atayala winá wɔ Yehova ndalonganyɛ djɛ prɔfɛsi kɛsɔ nkotshama. Kɛnɛ kɛ Yeso ndalakanyɛka kekokaki ndashikikɛ djɛ Yeso ayalaki Mesiya. Koko winá wɔ ndatone ndawɛnyɛ ilembetelo y’iyahonaka, iwɔ watakanaka lá nkambo djɛnde.​—Mat. 16:4.

10. Wopo wɔkɔnge Yeso ndakotshɛ kɛnɛ kɛ Izaya ndafune lá nkambo djɛ Mesiya?

¹⁰ Kɛkɔnge ketepela Afunelo? Ɔprɔfɛtɛ Izaya afunaka lá nkambo djɛ Mesiya ante: ‘Nde apangofulá tɛɛndjɛ kana mpandjɛ djoyi djɛnde, edjinge djoyi djɛnde mpangokɛma l’ɛnsɛsɛ.’ (Iza. 42:1, 2) Yeso ananghaka olemo wɔnde w’ipoposanyɛ ipa la nsepa ikanyi y’anto tende. Edjinge nde atapika wa tɛmpɛlɔ yɛ nkekete edjinge atalɔta ɔlɔtɔ wotshikitanyi w’ewandji wɛ ntolo, kana mpona djɛ anto ndoweta lá wiina wa nkopo djɛ ntolo. Lá winá wɔ ohemba wɔnde w’ekomo, Yeso atonaka nkamoyɛ Nkfumi Herodɛ má ndonanghela nsese kaanga lowiko lɔnde iyayalaka lá mbalaka. (Luka 23:8-11) Yeso ananghaka ansese amɔtshi, koko mpoposanyɛ losango lɔ wɔlɔ ndeke loyalisa olemo woleka djonyi lende. Nde ashimelaka ambeki wande ante: ‘L’okoma wɔsɔ ndeke maye lá looko.’​—Mar. 1:38.

11. Tokanyi tɔ nyɛtshi tɔkɔnge tolekɔ l’anto lɔɔko kɛnɛ?

¹¹ Tɛna wopo w’okakasano wɔ nghɔsɔ lɔɔko kɛnɛ? Ee. Lɔɔko kɛnɛ anto wakamɔ m’ɔtɛ wɔ  mvulu yɛ ntolo yɛ nkekete nkekete yelekɔ la dɛngalɛnga djɛ ntshó efula, m’ɔtɛ w’ewandji wɛ ntolo welekɔ la nkopo djɛ lomo, edjinge m’ɔtɛ wɔ selemɔni yembovungɛka anto efula ikɔkɔ edjinge nsakiso yɛwɔ. Koko anto w’ingelaká lá amvulu yɛ ntolo yɛsɔ wapekaka akambo efula lá nkambo djɛ Ndjambe edjinge djɛ alaka wande. Wanɛ w’ingela nsanghanyɛ y’Akristo ndjekaka kɛnɛ kɛ Yehova ɔtɔlɔmbande edjinge wopo wɔ mbikaka lá yopo y’ɛdje l’ɛkɔpa kɛnde. Amvulu yɛso y’Onkfumi yelekɔ piyɔɔ edjinge yekambema olemo, koko yepalekɔ la dengalɛnga dj’ipa wɔs’ɔdjɔmba. Wanɛ walɔndjɛ wapalɔtɛ ɔlɔtɔ watshikitanyɛ l’anto ankina edjinge wapalekɔ la nkopo djɛ lomo. Otepela wɔ Ndjambe ndeke ikɔkɔ y’elakanyelo wɛso edjinge yɛ wayi wawolaso. Kaanga oyɛwɔ nghɔsɔ, anto efula lɔɔko kɛnɛ wapawola losango lɔso mande iso topananghe wa selemɔni yekamoyɛ edjinge kɛnɛ kolakanyɛso kepafɛnɛ la kɛnɛ kokombolawɔ ndjoka.

12. Etengo Hebero 11:1, 6 osipisoyɛwɔ, lá nkambo djɛkɔnge djawo djɛso oyɛwɔ ladjɛ mpikama?

¹² Wopo wɔkɔnge w’okokaso ndjewɔ dj’ipa ntakana? Ɔpɔstɔlɔ Poolo ashimelaka Akristo wawikaki l’Ɔrɔma ante: ‘Djawo ndjɛka má kɛnɛ kɛ onto okande. Ko kɛnɛ kɛ onto okande ndjɛka má otepela wolendana la Kristo.’ (Ɔrɔ. 10:17) Djɛkondeke, iso nkembɛka djawo djɛso má ndjekaka Bible, koko ape má ndjingelaka lá waselemɔni y’ɔtɛmwɛlɔ yepalekɔ l’Afunelo, ayale kaanga selemɔni yɛkɔ nyɛnamaka wɔlɔ lá wiso kana nsasangɛka. Iso ladjɛ ndjala la djawo djɛ wolo djembopikama lá balo djɛ djɔ ladjikɛnde ‘onto wopalekɔ la djawo apakoke nsasangɛ Ndjambe.’ (Wala Hebero 11:1, 6.) Djɛkondeke, topalekɔ la djonyi djɛ nyɛna ilembetelo yem’olongo djɛ ntawoyɛ ente tombotana nsɔsɔlɔ. Ntsha iso ndjeka la nkɔmɛ nkfumɔ elakanyelo welá Bible wekembɛ djawo, nkambo djɛsɔ toko akokaka ntokotshɛ djɛ ndjawola ente tombotana akambo wa nsɔsɔlɔ edjinge nyimɛ ehamo enkfumɔ.

13. Kɛkɔnge k’etshindisa anto efula djɛ ntona Yeso?

¹³ L’etsho wɛ Yeso, ambeki wa Djɔanɛ Obatizanyi wakamɔka mande ambeki wa Yeso watakinaki nkete djɛ ndɛ. Yeso asipisoyɛka ante  iwɔ wapalekɔ l’elonga kɛ nkina nkete djɛ ndɛ winá woyɛnde la lowiko. (Mat. 9:14-17) Kaanga oyɛwɔ nghɔsɔ, Afarisɛ edjinge antonyi ankina wa Yeso wohamɛka mande nde atakilikaki nkfumbo djɛwɔ. Iwɔ womalaka winá w’indakɔnɔla onto ɔmɔtshi woyalaki l’olando lofu lɔ Saba. (Mar. 3:1-6; Dj. 9:16) L’onkoko ɔmɔtshi iwɔ watepelaki ambɔ iwɔ nɛmɛyɛka lofu lɔ Saba, koko l’onkoko onkina iwɔ watɛnaki djɛ alekɔ nyɛtshi nangha opoto lá tɛmpɛlɔ. Iwɔ w’okaka nkɛlɛ winá wɔ Yeso ndaahamɛ lá nkambo djɛsɔ. (Mat. 21:12, 13, 15) Edjinge anto wa Yeso ndasambishɛka lá shinangɔnga kelá Nazarɛtɛ womalaka efula winá wɔ Yeso ndakambe la ndjɔmbɔmba y’ima ɔkɔndɔ w’ase Isariyɛlɛ, djɛ ndawɛnyɛ ante walekɔ la lolemba edjinge wapakotshi djawo. (Luka 4:16, 25-30) Anto efula watonaka Yeso mande atanangha akambo w’iyakombolaka nde nangha.​—Mat. 11:16-19.

14. Lamo Yeso ndahamɛ nkfumbo dj’anto dj’etayalaki la djokanelo l’Afunelo?

¹⁴ Kɛkɔnge ketepela Afunelo? Yehova atepelaka má lotshimbo lɔ prɔfɛtɛ Izaya ante: ‘Anto wanɛ nsukanaka le lemi ngo m’ɛlɔmɔ wɛwɔ edjinge iwɔ nɛmɛyɛka lemi ngo má ntɔmbɔ, koko eloko wɛwɔ mbangɔ otale la lemi, edjinge iwɔ ndjokaka lemi wɔma ngo m’ɔtɛ w’ɛlɛmbɛ w’anto w’iyalakanyema.’ (Iza. 29:13) Yeso ayalaka l’elonga kɛ mpamɛ nkfumbo dj’anto djetayalaki la djokanelo l’Afunelo. Wanɛ wakanelaka ambɔ ɛlɛmbɛ edjinge nkfumbo dj’anto ndeka Afunelo djonyi watonaka Yehova edjinge onto wɔ ndatome etengo Mesiya.

15. Lamo anto efula lɔɔko kɛnɛ iyopakɔpɛ Ewakɛ wɛ Yehova?

¹⁵ Tɛna wopo w’okakasano wɔ nghɔsɔ lɔɔko kɛnɛ? Ee. Efula k’anto lɔɔko kɛnɛ nyomalaka winá wɛnawɔ Ewakɛ wɛ Yehova wapakɔpɛ nangha lawɔ wafɛtɛ yepokana l’Afunelo, ndjɔmbɔmba nɔɛlɛ edjinge Bokfɔ djɛ lofu lɔ botshɔ. Ankina nyomalaka winá wɔ Ewakɛ wɛ Yehova iyopakɔpɛ nangha lawɔ fɛtɛ yelendana la wayi w’ewila kana nkilika nkfumbo djepokana l’Otepela wɔ Ndjambe djelendana l’asaka. Wanɛ wakiyanelá Ewakɛ wɛ Yehova l’ɔtɛ wɔ donga djɛsɔ, nkokaka ndjawola l’oloko ɔmɔ ambɔ, Ndjambe nsasangaka la yopo yɛwɔ yɛ ntɛmɔla. Koko wapakoke nsasangɛ Ndjambe ntsha iwɔ nkɔpaka nkfumbo dj’andja wanɛ, ndeka elakanyelo wɛ nsɔsɔlɔ welekɔ lá Bible.​—Mar. 7:7-9.

16. Lá nkilika Yeembo 119:97, 113, 163-165, kɛkɔnge koyɛso ladjɛ nangha edjinge kɛkɔnge koyɛso ladjɛ ntona?

¹⁶ Wopo wɔkɔnge w’okokaso ndjewɔ dj’ipa ntakana? Iso ladjɛ ndjala la ngandji kɛ wolo tá ɛlɛmbɛ edjinge tɔkfɔ tɔ Ndjambe. (Wala Yeembo 119:97, 113, 163-165.) Ntsha iso nkɔpaka Yehova, tongotona nkfumbo nkfumɔ djeposasangɛ. Topangawola kaanga ekete kɛmɔ nkitshakitshɛ ngandji kɛso te Yehova.

17. Akambo wakɔnge wakongelaki efula k’anto wal’etsho wɛ Yeso watshindisa dj’iwɔ ntakana lá nkambo djɛnde?

¹⁷ Anto amɔtshi wal’etsho wɛ Yeso wakɔpaki djɛ otshikitano nanghema mbala kɛkɔ kɛmɔ lá wayi wa pɔlitikɛ. Iwɔ wakongelaki djɛ Mesiya ndatshungola má ɛlɔndjɛlɔ kɛ lɔnyɔkɔ k’ase Ɔrɔma. Koko winá w’iyahone ndjila Yeso owandji nde atonaka. (Dj. 6:14, 15) Wamɔtshi, ndjila edjinge ankfundji wokaki wɔma ambɔ, Yeso nkoka ndotshikitanyɛ onkfumi edjinge nkambo djɛsɔ nkoka ndomandjɛ as’Ɔrɔma ko iwɔ ndapapola ndambo kɛ lowandji edjinge nkfulu k’iyapɛyɛ l’adjiko djɛ ntolo. Mande wayalaki la wɔma lá wayi wa pɔlitikɛ, ase Juda efula watonaka Yeso.

18. Prɔfɛsi yɛkɔnge yelá Bible yelendana la Mesiya yɛ anto efula yotakɔpaki?

¹⁸ Kɛkɔnge ketepela Afunelo? Kaanga prɔfɛsi efula iyewoyɛ ambɔ Mesiya angoyala Okowo  wongolongaka l’ambandji, prɔfɛsi inkina y’ɛnyɛka djɛ nde ayalaka ntondontondo ladjɛ mvɔ m’ɔtɛ w’evunga wɛso. (Iza. 53:9, 12) Iya ko lamo iyayale la tokanyi tɔ nyɛtshi lá nkambo djɛ Mesiya? Anto efula wal’etsho wɛ Yeso watakɔpaki kaanga prɔfɛsi kɛmɔ kɛnyɛki ante nde apangoyakala nkando l’ekakasano wɛwɔ mbala kɛkɔ kɛmɔ.​—Dj. 6:26, 27.

19. Tokanyi tɔkɔnge tɔ nyɛtshi tolekɔ l’anto efula lɔɔko kɛnɛ tatshinda djɛ ntona losango lɔso?

¹⁹ Tɛna wopo w’okakasano wɔ nghɔsɔ lɔɔko kɛnɛ? Ee. Efula lɔɔko kɛnɛ ntotonaka mande iso ntonaka ndjingela lá wayi wa pɔlitikɛ. Iwɔ nkombolaka dj’iso nsɔna onto ɔmɔ winá wonanghema vɔtɛ. Koko iso nsipisoyɛka ente, lá nkilika ikanyi yɛ Yehova, ntsha iso nsɔna owandji wɔ wɔn’onto djɛ ntɔlɔndjɛ, mbɔ koko isombotonande Nde. (1 Sa. 8:4-7) Lonkina anto amɔtshi nkoka nkanela ambɔ iso ladjɛ mpika ankalasa, epitalo edjinge nkete nkina djɛ nkotshɛka anto. Iwɔ ntotonaka mande iso ndjilaka yimba la welo wɛso ngo l’olemo w’ipoposanyɛ koko ape lá mpona nkando kɛ mbala kɛkɔ kɛmɔ l’ekakasano wel’andja wanɛ.

20. Etengo etepela wɛ Yeso welekɔ lá Mateo 7:21-23 ɛnyɛwɔ, okoma wɔso wɔ ntondo oyɛwɔ ladjɛ ndjala nge?

²⁰ Wopo wɔkɔnge w’okokaso ndjewɔ dj’ipa ntakana? (Wala Mateo 7:21-23.) Okoma wɔso wɔ ntondo nde, nangha olemo wɔ Yeso ndatotome djɛ nangha. (Mat. 28:19, 20) Tɔtɛkɔlake yimba yɛso kaanga ndambo daambi tá wayi wa pɔlitikɛ edjinge t’elemo wehona ndjakala nkando kɛ mbala kɛkɔ kɛmɔ l’ekakasano wel’andja. Iso nkɔpaka anto edjinge ndakinyanyɛka lá nkambo dj’ekakasano wɛwɔ, koko iso ndjewaka ente yopo yeleka wɔlɔ yɛ nkotshɛ winaso anto nde, ndalakanyɛka wayi walendana l’Onkfumi wɔ Ndjambe edjinge ndakotshɛka dj’iwɔ ndjala la djokanelo djɛ wɔlɔ la Yehova.

21. Nkano djɛkɔnge dj’oyɛso ladjɛ ndɔsa?

²¹ Lá djamba djɛnɛ tɔmbɛna akambo anɛyi watakanyɛ watshindisa anto efula wa l’ɛtɛndɔ kɛ ntondo dj’iwɔ ntakana lá nkambo djɛ Yeso edjinge wakoka ntshinda anto efula lɔɔko kɛnɛ dj’iwɔ ntona ambeki wa Yeso. Ngo akambo wasɔ toko ndeke oyɛso ladjɛ ndjewɔ? Lako. Lá djamba djɛwɔlama tɔngɛna akambo ankina anɛyi watakanyɛ. Nyontshɔ tɔshi nkano djɛ ndjewɔ ntakana edjinge tokindjɛ nama ndjawo djɛso wolo!