Lendá lá ɔwɔmbɔ w'akambo

Lendá lá akambo lá yombasɛ́

DJAMBA DJƐ WEKELO 21

Yehova angɔkɔpɛyɛ lokembo

Yehova angɔkɔpɛyɛ lokembo

‘Winá woyɛmi wɔdju, ndeke oyɛmi la lokembo.’​—2 KƆ. 12:10.

YEEMBO 73 Ɔtɔpɛyɛ oloko wolo (lá Otetela)

LÁ YOPASƐ *

1-2. Ekakasano wɛkɔnge wepomana l’Ewakɛ wɛ Yehova efula?

ƆPƆSTƆLƆ Poolo akembɛka Timɔte, edjinge kaanga Akristo ankfumɔ dj’iwɔ nkotshɛ olemo wɔwɔ wɔlɔwɔlɔ. (2 Ti. 4:5) Djɛkondeke isankfumɔ nkilikaka dako djɛ Poolo edjinge nanghaka kenkfumɔ kokokaso nangha l’olemo wɔ Ndjambe. Koko, ɔsɔ alekɔ itondo y’okakasano. Le efula kɛ wananyɔ l’ankaana, ndɔmbamaka ndjala l’oloko wolo w’efula djɛ mposa t’olemo w’ipoposanyɛ. (2 Ti. 4:2) Ndjɔmbɔmba, kokanela wananyɔ wawika l’ewila w’iyomboshimba olemo wɔso. Iwɔ mpoposanyɛka kaanga ewawɔ ambɔ wakoka mvundama!

2 Ewakɛ wɛ Yehova wangopomanake l’ekakasano efula wekoka ndaalɛmbɛ. Ndjɔmbɔmba, efula kɛwɔ nkambaka la wolo efula ngo djɛ mba nkete djɛ ankfumbo yɛwɔ oyɛwɔ la djonyi. Iwɔ nkombolaka ndapɛyɛ efula l’olemo w’ipoposanyɛ, koko l’ekomo kɛ lobengo wangɔlɛmbake efula m’elemo wɛ wolo w’iyakambaka l’anteyi kɛ lobengo djɛ nkotshɛ ehomba w’ase nkfumbo yɛwɔ. Ankina m’ɔtɛ w’elando wepa kɔnɔ kana ekakasano welendana la lotshundo wapalekɔ l’akoka wandapɛyɛ efula l’olemo wɔ Yehova. Wangodjipamake kaanga l’amvulu. Amɔtshi lonkina wangoyawokake winá enkfumɔ etengo wapalekɔ la ntshina lá wiso wa Yehova. Mary, * nkaana kɛmɔtshi k’intansɛ lá Moyen-Orient, ntepelaka ante: “Ndɔmbamaka djɛ lemi ndjila welo efula djɛ nana la tokanyi tɔ nyɛtshi tɔ ndɛmbɛka lá wɔɔngɔ. M’ɔkɔngɔ lemi ndoyawokaka etengo lambowa lowo mande tokanyi tɔsɔ ntshutsheyɛka lemi winá edjinge wolo wɔ ndapɛyɛ l’olemo wɔmi w’ipoposanyɛ.”

3. Kɛkɔnge k’ɛnaso lɔ lá djamba djɛnɛ?

3 Ayale kaanga ekakasano wɛkɔnge welekɔ laso, Yehova nkoka ntɔpɛyɛ nkfulu k’oyɛso la djonyi djɛ ndongela ekakasano wɛso edjinge nkindjɛ ndokambela lá nkilika akoka walekɔ laso. Lá ntondo k’iso nyɛna wopo wɔ Yehova okokande ntokotshɛ, nyontshɔ tokolenda wopo w’indakotshɛ Poolo nya Timɔtɛ djɛ nkotshɛ olemo w’ɔwɔ kaanga l’anteyi k’ekakasano.

YEHOVA NTƆPƐYƐKA LOKEMBO LƆ NKINDJƐ MPOPOSANYƐ

4. Ekakasano wɛkɔnge wepomanisa la Poolo?

4 Poolo apomanaka l’ekakasano efula. Nde ayalaki la djonyi dj’okotshɔ pekapeka winá w’iyokfusaka, iyovutaka abanga, edjinge iyokowaka ankando. (2 Kɔ. 11:23-25) Poolo awolaki ante lá winá ɛmɔtshi nde ananaki l’ɔlɛmbɛlɔ. (Ɔrɔ. 7:18, 19, 24) Nde ankfulumeyeki lonkina ‘ɔnsɛsɛ lá demba,’ wɔ ndakombolaka djɛ Ndjambe ndopikola.​—2 Kɔ. 12:7, 8.

Kɛkɔnge kekotshisa Poolo djɛ nkotshɛ olemo wɔnde? (Lenda etenyi 5-6) *

5. Kɛkɔnge kenanghisa Poolo kaanga ndapomanaka l’ekakasano?

5 Yehova apɛyɛka Poolo lokembo lɔ nde nkindjɛ l’olemo w’ipoposanyɛ kaanga l’anteyi k’ekakasano enkfumɔ wepomanaki lande. Tokolenda kɛnɛ kɛ Poolo ndananghe. Ndjɔmbɔmba, winá wɔ ndadjipama lá lokando l’Ɔrɔma, nde apoposanyɛki losango lɔ wɔlɔ l’entete le anto efula ndjila edjinge l’ewandji w’ase Juda, edjinge mbala imɔtshi le wa maashi. (Ele. 28:17; Flp. 4:21,22) Nde apoposanyɛka edjinge le Anami efula wolamaki, edjinge le anto ankfumɔ wayɛki ndowembola. (Ele. 28:30, 31; Flp. 1:13) L’etena kɛkɔ kɛmɔ, Poolo afunaki edjinge enkanda w’ekina wekotshɛ Akristo wa nsɔsɔlɔ lɔɔko kɛnɛ. Edjinge, ndjɔmbɔmba kɛ Poolo kekembɛka wananyɔ wayalaki l’otshumano w’Ɔrɔma, dj’iyankfumɔ ‘ndjala l’oloko wolo w’efula wɔ mpoposanyɛ Otepela wɔ Ndjambe ipa la ndjoka wɔma.’ (Flp. 1:14) Kaanga lá winá ɛmɔtshi Poolo ndotayalaka l’akoka wanangha k’enkfumɔ k’indakombolaka nangha, nde ananghaka kenkfumɔ k’indakoke nangha lá nkilika akoka wande, edjinge ‘akambo wasɔ wakadjimɔka lá wapɔ wɔ losango lɔ wɔlɔ djɛ lɔkɔ ntshɔ tá ntondo.’​—Flp. 1:12.

6. Lá nkilika 2 Kɔrɛntɔ 12:9, 10, kɛkɔnge kekotshisa Poolo djɛ nde nkotshɛ olemo wɔnde w’ipoposanyɛ wɔlɔwɔlɔ?

6 Poolo ewaki ante kenkfumɔ k’indananghaka l’olemo wɔ Yehova ndananghakande má nkfulu kɛ Ndjambe, koko ape má wolo wɔnde nyɔmɛlɛ. Nde atepelaka ante wolo wɔ Ndjambe ‘nkomaka djɔ winá woyɛnde wɔdju.’ (Wala 2 Kɔrɛntɔ 12:9, 10.) Má lotshimbo lɔ nyuma kɛnde k’ekina, Yehova apɛyɛka Poolo wolo wɔ nde nkotshɛ olemo wɔnde wɔlɔwɔlɔ, kaanga lanteyi kɛ lɔnyɔkɔ, k’ankando, edjinge k’ekakasano enkina wepomanaki lande.

Kɛkɔnge kekotshisa Timɔte djɛ nkotshɛ olemo wɔnde? (Lenda etenyi 7) *

7. Ekakasano wɛkɔnge wɛ Timɔte ndakfulumeyɛ djɛ nkotshɛ olemo wɔnde?

7 Edjinge Timɔte, ilongo y’olangala yɛ Poolo, ayawɛkɛka lá nkfulu kɛ Ndjambe djɛ nkotshɛ olemo wɔnde. Timɔte atshindjeyɛki Poolo tá nkɛndɔ y’olemo wɔ misiɔnɛrɛ. Lonkina, Poolo otomaki tá nkɛndɔ inkina djɛ nde towembola edjinge tokeketshɛ ntshumano. (1 Kɔ. 4:17) Timɔte akokaka ndawoka etengo apalekɔ l’akoka. Djɛkondeke Poolo ndokembɛ ante: ‘Onto atakɔnyɔlake lá wopo w’oyɛ olangala.’ (1 Ti. 4:12) Edjinge l’etena kɛsɔ, Timɔte ayalaki l’ɔnsɛsɛ wɔnde welá demba, ntepela ente ‘tolalando.’ (1 Ti. 5:23) Koko Timɔte ewaki ante nkfulu kɛ nyuma k’ekina kɛ Yehova, kɛngɔpɛyɛ wolo woyɛnde la djonyi djɛ nkindjɛ mpoposanyɛ losango lɔ wɔlɔ edjinge nkambela wananyɔ wande.​—2 Ti. 1:7.

YEHOVA NTƆPƐYƐKA LOKEMBO LƆ NTSHIKALA LA NKƆMANO KAANGA L’ANTEYI K’EKAKASANO

8. Wopo wɔkɔnge Yehova okembɛnde enkambi wɛnde lɔɔko kɛnɛ?

8 Lɔɔko kɛnɛ, Yehova mpɛyɛka enkambi wɛnde ‘nkfulu keleka kɛnɛ keyalaka l’onto’ dj’iwɔ nkindjɛ ndokambela la nkɔmano. (2 Kɔ. 4:7) Nyontshɔ tokolenda akambo anɛyi wa Yehova ndalonganyɛ djɛ ntokembɛ edjinge ntokotshɛ djɛ ntshikala la nkɔmano te nde: dɔmbɛlɔ, Bible, oloyi w’Akristo, edjinge olemo wɔso w’ipoposanyɛ.

Yehova ntokembɛka má lotshimbo lɔ lɔlɔmbɔ (Lenda etenyi 9)

9. Wopo wɔkɔnge dɔmbɛlɔ okokawɔ ntokotshɛ?

9 Iso mbaka lokembo m’okotshɔ wɔ lɔlɔmbɔ. Etengo Ɛfɛsɛ 6:18, Poolo ntokembɛka dj’iso ndɔmba Ndjambe ‘lá mbamba inkfumɔ.’ Ndjambe, angokadjimola alɔmbɛlɔ waso má ntokembɛ. Jonnie, kanga l’intansɛ lá Bolivie, ɛnaka okotshɔ wɔsɔ winá wɔ ndapomana l’ɔnɔnghɔ w’ehemba. Wadjɛnde edjinge ambotshi wande akɔ ape wankfɔka olando wɔ wolo mbala kɛkɔ kɛmɔ. Jonnie ɛnaka ndjolo djɛ ndakotsheyɛ iyasato kɛkɔ mposɛ yɛwɔ. Nyɔ kɛnde avɔka, edjinge ayalaka ilá efula djɛ papa nya wadjɛnde ndɔkɔnɔ. Winá w’okanelande akambo wahetisa wasɔ, Jonnie ntepelaka ante: “Winá wɔ mayalaka l’anteyi kɛ ndjolo y’efula yɛsɔ, nkambo djenkotshɛkinde ntepela papoo l’alɔmbɛlɔ wami.” Yehova apɛyɛka Jonnie wolo wɔ ndayalaka la djonyi djɛ nkfulumeyɛ. Ronald, ikokolo imɔtshi yelá Bolivie, ewaka ante nyɔ kɛnde alekɔ la kansɛrɛ. Nde avɔka m’ɔkɔngɔ wɔ ngɔndɔ kɛmɔ. Kɛkɔnge k’okotshisa djɛ nkfulumeyɛ? Nde ntepelaka ante: “Winá w’ɔlɔmbami Yehova lemi ndodjipolaka oloko edjinge ndoshimelaka wopo w’oyawokami. Lemi ndjewaka ente nde ndjewaka lemi wɔlɔ, ndeka kaanga onto onkfumɔ edjinge ndeka kaanga lemi mɔmɛlɛ.” Lá winá ɛmɔtshi, iso nkoka ndawoka etengo topangokoka nkfulumeyɛ ekakasano welekɔ laso edjinge topewe kɛnɛ k’okokaso ndɔmba. Koko, Yehova ntɔlɔmbaka dj’iso ndɔlɔmba kaanga ntsha alekɔ wolo leso djɛ ndosipisoyɛ wopo w’oyawokaso.​—Ɔrɔ. 8:26, 27.

Yehova ntokembɛka má lotshimbo lɔ Bible (Lenda etenyi 10)

10. Etengo Hebero 4:12 ɛnyɛnde, lamo mbalaka Bible edjinge ntɔnɔlaka lá kɛnɛ k’owalaso oyɛwɔ djonyi efula?

10 Iso mbaka lokembo m’okotshɔ wɔ Bible. Ngo ngete Poolo ndoyawɛkɛ t’Afunelo djɛ mba lokembo edjinge osukɔ, edjinge iso nkoka ndawɛkɛ t’eteyi. (Ɔrɔ. 15:4) Ntsha iso mbalaka Otepela wɔ Ndjambe edjinge ntɔnɔlaka l’eteyi, Yehova angotokotshɛ la nyuma kɛnde dj’iso nsipisoyɛ wɔlɔwɔlɔ wopo wɔ Afunelo okokawɔ ntokotshɛ. (Wala Hebero 4:12.) Ronald, kanga isotepelaki má djiko, ntepelaka ante: “Ndekɔ l’osasa efula wopo wɔ mananghe la wolo djɛ ndjala l’ekfumbo kɛ mbalaka Bible nkɔlɔ nkfumɔ. Lemi ntɔnɔlaka efula lá wekeka wa Yehova edjinge lá wopo w’onanghelande enkambi wɛnde akambo la ngandji. Kɛsɔ kengonkotshɛke djɛ mba lokembo.”

11. Wopo wɔkɔnge Bible ndakembɛ nkaana keyalaki la yɛnyi?

11 Iso nkoka ndjala l’ikanyi yɛ wɔlɔ l’ekakasano wɛso má ntɔnɔlaka l’Otepela wɔ Ndjambe. Kolenda wopo wɔ Bible ndakotshɛ wadj’odjo woyalaki la yɛnyi efula. Ikokolo imɔtshi oshimelaka ante nde nkoka mba elakanyelo wɛ wɔlɔ efula má mbala onkanda wɔ Djɔbɔ. Winá wɔ ndawale, nde atateyɛka nyɔnyɔla Djɔbɔ m’ɔtɛ wɔ tokanyi tɔnde tɔ nyɛtshi. Winá ndatɔnɔlaka nde ɔpɛyɛka ndjewo ante: “Djɔbɔ! Kɔmba nyɛna akambo ngo lá yopo yɛ nyɛtshi toko!” Koko l’ɔkɔngɔ, nde ayɛka ndosipisoyɛ ante ekanedji kɛnde keyalaka etengo kɛ Djɔbɔ. Kɛsɔ k’okotshɛka djɛ nde ntshikitanyɛ ikanyi yɛnde edjinge kokembɛka djɛ nde nkfulumeyɛ yɛnyi yɛ nyɔyi kɛ womɛnde.

Yehova ntokembɛka má lotshimbo lɔ winaso Akristo (Lenda etenyi 12)

12. Wopo wɔkɔnge Yehova otokembɛnde má lotshimbo lɔ winaso w’Akristo?

12 Iso mbaka lokembo má lotshimbo lɔ winaso Akristo. Yopo inkina yɛ Yehova okembɛnde Akristo nde má lotshimbo lɔ winawɔ w’Akristo. Poolo afunaka ante ‘nde alekɔ lamposɛ k’efula kɛ nkeketshana’ nya wananyɔ l’ankaana yɛnde yelá nyuma. (Ɔrɔ. 1:11, 12) Mary, kanga isotepelaki má djiko, akɔpaki ndjala esango nya wananyɔ l’ankaana yɛnde. Nde ntepelaka ante: “Yehova akambaka la wananyɔ l’ankaana yetewaki kaanga ekakasano wenanaki la lemi. Wanshimelaki mbala imɔthi itepela imɔtshi yenkembɛ, kana nfunela inkankanda, ko ayalaki ngo kɛnɛ k’imayalaka la djonyi. Nkambo djɛsɔ djenkotshɛka lonkina djɛ lemi nshimela ankaana yeyalisa l’ekakasano w’etengo wɛmi edjinge ndjewa wopo w’iyananghe djɛ ndonga. Edjinge tokokolo wankotshɛki mbala efula djɛ lemi ndawoka ente ndekɔ la mpipo l’otshumano.”

13. Wopo wɔkɔnge okokaso nkeketshana l’anteyi kɛso má nsanghanyɛ y’otshumano?

13 Edjena kɛmɔtshi keleka wɔlɔ nkeketshana l’anteyi kɛso nde, lá nsanghanyɛ y’otshumano. Winá w’ingelɛ lá nsanghanyɛ y’otshumano, lamo ngɔpɔsaka winá djɛ wɛ nkembɛ anto ankina má ndashimelaka ente wɛ ndakɔpaka edjinge má ndawɛnyɛka djedjɛ djɛko lá kɛnɛ k’onanghawɔ? Ndjɔmbɔmba, lá ntondo kɛ losanghanyɛ lɔmɔtshi ikokolo imɔtshi yetawɔ Peter ashimelaka nkaana kɛmɔtshi kelekɔ la wome w’opalekɔ Okristo ante: “Ongotokembɛke efula winá wɔkɛnaso lá losanganyɛ. Ongoyalake winá enkfumɔ entshupa nya wana wako asamalo edjinge nyongoyalɔngɔsɔlake djɛ mpɛyɛ wa kɔmantɛrɛ.” Wiso wa nkaana kɛso walolaka la wisɔyi w’osasa edjinge okadjimolaka ante: “Etepela wɛ nghɔsɔ ndeke moyalaki nsɔsɔlɔ la djonyi djɛ ndjoka lɔɔko.”

Yehova ntokembɛka má lotshimbo lɔ olemo w’ipoposanyɛ (Lenda etenyi 14)

14. Wopo wɔkɔnge olemo w’ipoposanyɛ oyɛwɔ l’eposelo wɛ wɔlɔ leso?

14 Iso mbaka lokembo má lotshimbo l’olemo w’ipoposanyɛ. Winá w’oshimelaso anto ankina akambo wimá Bible, iso nkembaka edjinge ndawokaka wɔlɔ ayale kaanga wawola kana lako. (Woo. 11:25) Nkaana kɛso kɛmɔtshi ketawɔ Stacy asipisoyɛka wopo w’olemo w’ipoposanyɛ ɔpɛyɛwɔ lokembo. Winá wɔ ewoto kɛnde kɛmɔtshi ndapose m’otshumano, nde akiyanaka efula edjinge nde akindjɛki ndawopola ante, ‘Nkambo mɔtshi ndjalaka dj’imákoke nangha djɛ ndokotshɛ?’ Ayalaka wolo le Stacy djɛ ntshika nkanela lá kɛnɛ kelendana l’okakasano wɔsɔ. Kɛkɔnge k’okotshisa djɛ ndongela nkambo djɛ yɛnyi djɛsɔ? Olemo w’ipoposanyɛ! Winá wɔ ndayapɛyɛ l’olemo w’ipoposanyɛ, nde atateyɛka nkanela lá nkambo dj’anto wa l’etatshi kɛnde kɛ looko wayalaki la djonyi dj’okotshɔ wɔnde. Nde atepelaka ante: “Ngo lá winá wɔkɔ ɔmɔ, Yehova ampɛyɛka ombeki ɔmɔtshi wɔ Bible wotananghaki etshikitano lankeke lankeke. Kɛsɔ kenkembɛka efula. Ekete kelekisa nkotshɛ lemi efula nde olemo w’ipoposanyɛ.”

15. Olakanyelo wɔkɔnge ngombowa ma kɔmantɛrɛ kɛ Mary?

15 M’ɔtɛ w’akambo wakomela, anto amɔtshi nkoka ndawoka etengo wapalekɔ l’akoka wa ndapɛyɛ efula l’olemo w’ipoposanyɛ. Ntsha nghɔsɔ ndeke oyawokɛ, vungo ente Yehova nsasangaka ntsha wɛ nanghaka kɛnɛ k’oyɛ l’akoka wa nangha. Kolenda lonkina ndjɔmbɔmba kɛ Mary. Winá wɔ ndasɛkɔ t’etatshi kɛ looko k’otepelawɔ otepela onkina, nde ayawokaki etengo apalekɔ la ntshina. Nde ntepelaka ante: “Lá winá ɛmɔtshi, kenkfumɔ k’imakokaka nangha ngo mpɛyɛ kɔmantɛrɛ k’itenyi, mbala vɛrse djɛ Bible, kana nkapela onto traktɛ l’olemo w’ipoposanyɛ.” La ndawɛdjɛ l’anto ankina wewa otepela wɔlɔ, nde ayawokaki etengo apananghe kaanga djoyi mɔ. Koko, nde atshikitanyɛka ekanedji kɛnde. Nde atateyɛka nsipisoyɛ ante Yehova nkoka nkamba lande kaanga ndopewe otepela wɔlɔ. Nde atepelaka ante: “Akambo wa nsɔsɔlɔ wapɛyɛ lowiko wapalekɔ wolo, edjinge akambo wasɔ nkoka ntshikitanyɛ mbiko y’anto.”

16. Kɛkɔnge kekoka nkotshɛ wanɛ wapokokaka mposa ma lopango djɛ mba lokembo?

16 Yehova nyɛnaka edjinge nsasangaka, mposɛ kelekɔ laso kɛ mpoposanyɛ kaanga ntsha topokokaka mposa ma lopango. Nde nkokaka ntɔpɛyɛ mbamba k’iso mpoposanyɛ le wanɛ watolama kana le tofulumɛ totosakela. Ntsha iso ndjɛdjɛ olemo wonanghaso lɔɔko kɛnɛ la w’isananghaka ntondo, tokoka ndɛmba. Koko ntsha iso nsipisoyɛ wopo wɔ Yehova otokotshɛnde winá wɔsɔ, tongowa wolo woyɛso la djonyi djɛ nkfulumeyɛ ekakasano enkfumɔ l’osasa.

17. Lá nkilika Losanghanyɛ 11:6, lamo oyɛso ladjɛ nkindjɛ l’olemo w’ipoposanyɛ kaanga ntsha tɔpɛnyi eposelo wɛ wɔlɔ mbala kɛkɔ kɛmɔ?

17 Topewe lokopo lɔkɔnge l’akambo wa nsɔsɔlɔ lokonaso lokoka mpika edjo edjinge mposa. (Wala Losanghanyɛ 11:6.) Ndjɔmbɔmba, Barbara, nkaana kɛmɔtshi kelekɔ l’ɛnɔnyi 80 la ndambo, mpoposanyɛka mbala la mbala má telefɔnɛ edjinge má nfunanela enkanda. L’onkanda ɔmɔtshi wɔ ndafune, nde asokaka Etange k’Olami kɛ Ngɔndɔ k’asato 1, 2014 (lá Otetela), keyalisa la djamba mɔtshi djelekɔ l’ɔtɛ wɔ djoyi ante: “Kɛnɛ kakakosalɛ Nzambi.” Ipa la ndjewa, nde atomaka onkanda wɔsɔ te antshukanyi amɔtshi wamboposaka m’otshumano. Iwɔ wawalaka periyodikɛ kɛsɔ mbala la mbala. Mpame ayawokaka etengo Yehova nyɔmɛlɛ ndeke l’oshimela elongi l’elongi. Antshukami wasɔ watateyɛka ndjingela lá nsanghanyɛ edjinge ekomo ekomo, m’ɔkɔngɔ w’ɛnɔnyi ndekana 27, wakalɔka ndoyala Ewakɛ wɛ Yehova welekɔ l’entente. Kokanela wopo wɔ Barbara ndakoke nkeketshama edjinge mba nkelembo má nyɛna eposelo wɛ wɔlɔ wɛ nghɔsɔ má onkanda wɔ ndafune!

Yehova ntokembɛka má lotshimbo lɔ 1) lɔlɔmbɔ, 2) Bible, 3) winaso Akristo, edjinge 4) olemo w’ipoposanyɛ (Lenda etenyi 9-10, 12, 14)

18. Kɛkɔnge k’okokaso nangha djɛ mba wapɔ má nkfulu kɛ Ndjambe?

18 Yehova ntɔpɛyɛka mbamba y’etshikitanyi yɛ wɔlɔ yɛ mba nkfulu kɛnde k’efula. Ntsha iso nkamba la nkete dj’ɔtɔpɛyɛnde, ndjɔmbɔmba, lɔlɔmbɔ, Bible, winaso w’Akristo edjinge olemo w’ipoposanyɛ, tɔngɛnyɛ ente iso ndawɛkɛka t’akoka edjinge mposɛ kelekɔ la Yehova kɛ ntokotshɛ. Nyontshɔ toyawɛkɛke nfu inkfumɔ te Papa kɛso kel’olongo, kelekɔ l’osasa ‘wɔ nyɛnyɛ nkfulu kɛnde lá wapɔ wɔ wanɛ w’eloko wɛwɔ enkfumɔ welekɔ te nde.’​—2 Ɛk. 16:9.

YEEMBO 61 Nyo Ewakɛ, nyotshu tá ntondo! (lá Otetela)

^ par. 5 Towika lá deko dj’ekakasano, koko Yehova ntɔpɛyɛka okotshɔ w’oyɛso la djonyi djɛ nkfulumeyɛ ekakasano. Lá djamba djɛnɛ, tɔngɛna wopo wɔ Yehova ndakotshɛ ɔpɔstɔlɔ Poolo edjinge Timɔte dj’iwɔ nkindjɛ ndokambela kaanga l’anteyi k’ekakasano wɛwɔ. Tongoshishima akambo anɛyi watɔpɛyisa Yehova djɛ ntokotshɛ dj’iso nkindjɛ ndokambela.

^ par. 2 Nkombo itshikitanaka.

^ par. 53 NSAKISO Y’ASANGO: Winá woyɛnde lá mvulu kɛ lokando lá Ɔrɔma, Poolo afunela ntshumano enkanda efula edjinge apoposanyɛ losango lɔ wɔlɔ le anto wayɛ ndowembola.

^ par. 55 NSAKISO Y’ASANGO: Timɔte akembɛ wananyɔ winá woyɛnde lá mbembo yɛ ntshumano.