ISANKFUMƆ ndjawolaka ente Yehova ndeke lɔlɔndjɛ owila wɔnde, edjinge kanga lapɛyɛ kɛnɛ koyɛwɔ la djonyi dj’iwɔ ntshikala entshupa lande lá ‘etsho w’ekomo.’ (2 Ti. 3:1) Nsɔsɔlɔ, iso ndeke ladjɛ nkilika mboka kotɛnyɛnde. Iso nkoka ndjɛdjɛ wopo woyɛso lɔɔko kɛnɛ la wopo woyalaki as’Isariyɛlɛ l’osowe. Wina wiyokaka nkfundji ambofula n’tsheke, iwɔ wayalaki ladjɛ nangha n’kambo mɔtshi.

Yehova alɔmbaka Mɔsɛ djɛ nde ntshula aseke ape wa kɛngɛlɛ ‘djɛ ntshumanyɛka la mbetsholaka anto dj’iwɔ nkɛnda.’ (Ewadji 10:2) Nkfundji afulaki aseke lá toopo totshikitanyi djɛ nkotshɛ anto dj’iwɔ ndjewa kɛnɛ koyɛwɔ ladjɛ nangha. (Ew. 10:3-8) Wopo wɔkɔ ɔmɔ ndeke, lɔko kɛnɛ ankambi wɛ Ndjambe walekɔ ndɔndjɛma má toopo totshikitanyi. Toshishima lɔɔ toopo tosato tofulamaki aseke lá ɛtɛndɔ kofundamaki Bible, nsanghanyɛ yɛso yɛ n’kekete, onkfumbelo wɔ tokokolo edjinge ɛlɔndjɛlɔ kɛ bango kɔpɛyɛwɔ ntshumano.

Wina wɔ Yehova ndakɔpaka djɛ ‘oloyi onkfumɔ’ ntshumana la ntondo kɛ wiso wɔ tabɛrnaklɛ, keyalaki l’onkoko wɔ ɛstɛ, nkfundji afulaki aseke wakɔ ape. (Ew. 10:3) Tɔkɔlɛ t’onkumɔ todjingaki tabernaklɛ l’eloyi ɛnɛyi, wókaki oyoko wɔ aseke watshikitanyi wasɔ. Wanɛ wintatshɛki entshupa la wiso wɔ tabɛrnaklɛ wakomaki lá minitɛ imangha toko. Koko wanɛ wayalaki otale wayalaki la djonyi djɛ wina djudji edjinge wayalaki ladjɛ ndjila welo efula djɛ nkoma l’eteyi. Kaanga oyɛwɔ nghɔsɔ, Yehova akɔpaki djɛ anto ankfumɔ watshumane dj’iwɔ ndjoka olakanyelo wiyakɔpaka ndapɛyɛ.

Lɔɔkɔ kɛnɛ, t’opotshumana la ntondo kɛ tabɛrnaklɛ. Koko iso nkindjɛka ndjetama wina tshɛ djɛ nsanghana, ndjɔmbɔmba lá sanganya yɛ rɛjɔ, kana nsanghanyɛ inkina itshikitanyi. L’eteyi iso mbaka olakanyelo wɔ djonyi efula. L’andja w’otondo, iso mbaka nonghanyi kɛkɔ kɛmɔ. Waawola leeta lɔsɔ ndjalaka l’osasa dj’iwɔ ntanema lánteyi kɛ ankambi wɛ Yehova ikina. Wamɔtshi ladjɛ nanghaka nkɛndɔ y’etale ndeka winawɔ ankina. Kaanga oyɛwɔ nghɔsɔ, iyankfumɔ walekɔ l’osasa wɔ nangha la wolo djɛ ntanema la nsanghanyɛ yɛkɔ.

Iya otepelaso mo n’kambo djɛ anto walekɔ otale edjinge waapalekɔ la mbamba kɛ ndjɛ la nsanghanyɛ yɛso yɛ n’kekete? Mpeyi má wayi wa ntshulatshula, efula kɛ l’anteyi kɛwɔ mbaka mbamba kɛ nkilika nonghanyi yɛ nsanghanyɛ yɛkɔ edjinge ndawokaka ngete walekɔ esanga laso lá nsanghanyɛ yɛkɔ. Ndjɔmbɔmba, lá wina woyisa mpɛna kɛ biro dj’ekekete djɛ lɔndjɛ olimo wɔso l’andja w’otondo, filialɛ ke lá Bénin iyombɔlɔngɔsɔla losanghanyɛ lotshikitanyi lɔ wɔlɔ efula ko yombotomela ase Arlit kelá Niger, iwadja yɛ daambi yele lá osowe we lá ngando kɛ Sahara, nonghanyi yɛsɔ lá etshinga.  Ewakɛ l’anto wakɔpa akambo wa nsɔsɔlɔ 21 wakokaka nkilika nonghanyi kɛ losanghanyɛ lɔsɔ. Kaanga iya yalaka má otale l’anto 44 131 watshumanisa lá Bénin, wayawokaka djɛ walekɔ esanga lawɔ. Wɔnanyɔ ɔmɔtshi afunaka ante: “Tombonyokawoyɛ lokasa efula wopo wɔ nyalɔngɔsɔla djiso nkilika losanghanyɛ lɔnɛ má eshinga. Kɛsɔ nyɛnyɛka djɛ nyo ntokaka ngandji.”

Wina wɔ ankfundji iya fulaka ngo n’tsheke mɔ, ‘ngo ewandji [. . .] wɛ wa nkama wele l’Isariyɛlɛ toko’ ndeke iyetaka la ntondo kɛ tabɛrnaklɛ. (Ew. 10:4) Mɔsɛ apɛyɛki ɛlɔndjɛlɔ dj’iwɔ ndjewa nkotshɛ edjito weyalaki lawɔ lá tɔkɔlɛ tɔwɔ. Otayalɛ owandji ɔmɔtshi l’anteyi k’ewandji wɛsɔ, otasambaka nangha la wolo djɛ wɛ ntanemaka mbala inkfumɔ lá sanghanyɛ yɛsɔ, djɛ wɛ mbaka okfumbelo wɔsɔ?

Lɔɔkɔ kɛnɛ, tokokolo te lá ntshumano wapalekɔ ‘ewandji’, iwɔ wapápemela ɛnkɔkɔ wɛ Ndjambe windaapɛyɛ. (1 Pɛ. 5:1-3) Iwɔ nanghaka k’enkfumɔ kokokawɔ ladjɛ nangha djɛ ndaalama. Djɛko ndeke iwɔ ndjawolaka l’osasa ekfumbelo enkfumɔ wakfumbawɔ, etengo Nkalasa k’olemo w’Onkfumi. Nkalasa kɛsɔ ndaalakanyɛka woopo wiwɔ mbɛmba edjito wɛwɔ wɔlɔ. N’kambo n’tshɔ mpɛyɛka eposelo wɛkɔnge? Lonyuma l’ase otshumano onkfumɔ ndjalaka wolo. Kaanga otingelaka nkalasa kɛsɔ kaanga loshi, ongowake ipa la ehamo wɛlɔ má okfumbelo wówá tokokolo tɔnyo.

Ankfundji watshikitanyɛki mbala efula lóndjo lɔ aseke wiyafulaka. Lóndjo lɔsɔ enyɛki djɛ Yehova akɔpaki djɛ anto tshɛ wátateyɛ lɔkɛndɔ. (Ew. 10:5, 6) Lɔkɛndɔ lɔsɔ laananghemaki l’ɔnɔnghɔ, koko le nkfumbo la nkfumbo, ɔsɔ ayalaki olemo efula. Epa la ehamo wamɔtshi watayalaki l’osasa djɛ ndjoka djɛ wambofula n’tsheke djɛ lɔkɛndɔ. Ladjikɛnge?

Iwɔ wɛnaki djɛ mbala imɔtshi wafulaki n’tsheke entshupa entshupa edjinge l’isasimoyɛ. Bible ante: ‘Wina wɔ bonde oyalawɔ ladjiko djɛ tabɛrnaklɛ, ase isariyɛlɛ watshikalaki ngo la mvulu.’ Koko ‘mbala imɔtshi bonde iyatshikalaka ngo má n’kɔlɔ ntokoma nkɛsɛ.’ Ko mbala inkina bonde djatshikalaki ‘nshi ipe, ngɔndɔ kana ndekana.’ (Ew. 9:21, 22) Iya ko mbala imangha iyasɛkɔsɛkɔka? Ewadji shapitrɛ 33 nyɛnyɛka ntena 40 djɛ wana w’Isariyɛlɛ iyasɛkɔsɛkɔ.

Amɔtshi wakokaki ntana idjena yɛ ntshitshi kɛ wɔlɔ. Idjena yɛ nghɔsɔ yeyalaka wɔlɔ efula lá ‘osowe wekekete edjingi wɔ wɔma!’ wɔsɔ. (Mvu. 1:19) Ndjokamaka djɛ etshikitano wɛsɔ wetakokaki ndjala wɔdju te wɔ.

Wina wɔ tɔkɔlɛ iyawangaka la lɔkɛndɔ, wamɔtshi wɛnaki ila efula nkonga mbala kɛwɔ. Iyankfumɔ wokaki lóndjo lɔ ntsheke, koko watakokaki ntshɔ mbala kɛmɔ iyankfumɔ. Lóndjo lɔ ntsheke djɛ ntondo lotshikitanyi, ewoyɛki djɛ tɔkɔlɛ tintatshɛki má ɛstɛ, (Juda, Isakara edjinge Zebuluna) wayalaki ladjɛ ntateyɛ lɔkɛndɔ. (Ew. 2:3-7; 10:5, 6) M’ɔkɔngɔ wɔ lɔkɛndɔ lɔwɔ, ankfundji wáfulaki n’tsheke mbala kape djɛ nshimela, tɔkɔlɛ tosato tintatshɛki lá sidɛ dj’iwɔ ntateyɛ lɔkɛndɔ lá mbala kɛwɔ. Iwɔ wananghaki nghɔsɔ tii edjinge eloyi enkfumɔ wemboshiyɛ ntshɔ.

Ombowaka ekakasano djɛ wɛ ndjawola etshikitano ɛmɔtshi welá ɔlɔngɔswɛlɔ wɔso? Nkoka ndjala, oyalaka la okiyano efula ladjikɛnde, otafɛnyɛki djɛ etshikitano wɛsɔ nkokaka mposa edjinge ndjala efula nghɔsɔ. Kana koko ɔkɔpaka nonghanyi yɛ ntondo efula, ko otakombola djɛ nonghanyi yɛkɔ ntshikitana. Kaanga donga djɛkɔ n’tshɔ, nkoka ndjala wɛ oyalaka l’okakasano efula edjinge oyalaka la djonyi djɛ wina efula djɛ wɛ ndjekela etshikitano wɛsɔ. Kaanga oyɛwɔ nghɔsɔ, ntsha iso nangha la wolo djɛ ndjawola etshikitano w’akambo amɔtshi, tɔngɛna ipa la ehamo ente Ndjambe atɔtshɔkɔla.

Lá etsho wɛ Mɔsɛ, Yehova alɔndjɛka wa miliyo y’ampame la yɛ w’amato edjinge wana lá osowe. Otasambawɔ ɛlɔndjɛlɔ kɛ la ngandji kɛsɔ, ntshimi lako kaanga onto wotakoka mbika. Lɔɔko kɛnɛ, alako wa Yehova ntokotshɛka apengo djɛ ntshikala la lowiko lá lonyuma toko lá etsho w’ikoto wɛnɛ, koko edjinge dj’iso ndjala lá lonyuma lɔ wɔlɔ, kana ntepela ente ndjala la djokanelo djɛ wɔlɔ lande. Djɛko ndeke, nyontshɔ isankfumɔ tonanghe la wolo djɛ ndjokola ase Isariyɛlɛ, wanɛ wokaki ankfundji wafula aseke ko iwɔ nangha mbalakɛkɔ kɛmɔ etshikitano!