‘Loshi lɔmɔtshi, wɔna isomoto kɛmi ndombonsola wange. Ko isombotateyɛ ntepela lɔpɔsɔ, ko mɔmɔmɔnya lá mpowo. Nkɔpaka ndoyaka.’​—Paul.

‘Lá mvulu, l’omalaki ngo lako djoyi. Ntsha lambomala nghɔsɔ lántshitaki n’kete nkfumɔ dj’etombo, ankɔsa, la mɛsa iyalaki lá mvulu, tshɛ kema vundaka lɛwɔ.’​—Marko.

Ɔsɔ alekɔ ndjɔmbɔmba yɛ nyɛtshi. Mbala imɔtshi, isankfumɔ ndjalaka l’okakasano djɛ ndaakota, ladjikɛnde iso tombosambela ovunga wɔ ndoyi kɛso, Adama. (Ɔrɔma 5:12) Wamɔtshi ndjalaka l’okakasano wɔ nsamba ndaakota má nkɛlɛ yɛwɔ ngete Paul la Marco. Ankina ndjalaka l’okakasano wɔ nsamba ndaakota lá tokanyi, iwɔ ntshimbaka wɔngɔ la wɔma edjinge la tokanyi tɔ nyɛtshi. Ankina koko, ladjɛ nana la mposɛ yɛ nyɛtshi yɛ nsanga mbeto, nnɔ wana wa ndekola kana nnɔ ikaya.

Ntsha onto apewe nkota tokanyi tɔnde, mposɛ yɛnde edjinge kfumbo djɛnde, nde nkoka ntshita lowiko lɔnde. Koko iso nkoka ndjapemela kfumbo djɛso. Wopo wɔkɔnge? Laa ekaso djɛ ndaakota. Djɛ ntokotshɛ, tokokadjimola lá weepó wɛnɛ: 1) Ndaakota osakisolande nge? 2) Ladjikɛnge oyɛwɔ djonyi? 3) Wopo wɔkɔnge wokokaso nkamba la djekeka djɛnɛ djelekɔ l’eteyi kɛ ‘lowambo lɔ nyuma’? (Ngalatiya 5:22, 23) Meteyi tɔngɛna kɛnɛ koyɛso la djɛ nangha ntsha tombosamba ndaakota.

Onto wewa ndaakota apelolaka akambo ipa nde nkanela ntondo. Nde ndaakotaka djɛ ntepela kana nangha n’kambo mɔtshi djepasasangɛ Ndjambe.

Yeso atɛnyɛ kɛnɛ kɛ ndaakota osakisolande. Bible ante: ‘Wina wɔ iyotolaka, nde ataatolaki. Wina wɔ iyɔwɛnyɛka ndjolo, nde lako nyana as’ɔwɛnyɛki ndjolo, koko nde ayatshikaka ngo le onto wosambolaka la sii.’ (1 Pɛ. 2:23) Nde ayakotaka wina wɔ antonyi wande iyɔwɔlaka lasɔ ko nde ambopanema l’otamba wɔ ndjolo. (Mat. 27:39-44) Nde ɛnyɛka ndaakota kɛnde lonkina wina wɔ ewandji wɛ n’kɛlɛsiya iyowopolaka weepó wɛ ndowila l’ilonga. (Mat. 22:15-22) Nde atshikaka ndjɔmbɔmba kɛ wɔlɔ kɛ ndoowokola wina wɔ ase juda iyahone ndoovuta abanga. Nde ataasɔmbɔla, koko ‘ayaawisaka ko aposaka ma tɛmpɛlɔ.’​—Dj. 8:57-59.

Iso nkoka ndjokola Yeso? Ee, la lɛdji lɔmɔtshi, ɔpɔstɔlɔ Pɛtɛlɔ afunaka ante: ‘Kristo anyɛnɛlaka ndjolo ko anyotshikelaka ndjɔmbɔmba djɛ nyo nkilika wɔlɔ wɔlɔ wina wande.’ (1 Pɛ. 2:21) Omboka ente, kaanga oyɛso anto wa evunga iso nkoka nkilika wɔlɔ wɔlɔ ndjɔmbɔmba kɛnde. Ladjikɛnge oyɛwɔ djonyi?

Ndaakota alekɔ djonyi djɛ iso ndjawolama me Ndjambe. Kaanga isombookambela  ɛnɔnyi efula kana koko nshi imangha toko, tokoka ntshutshɛ djokanelo djɛso lande ntsha topewe ndaakota má etepela la kfumbo djɛso.

Tokotepela n’kambo djɛ Mɔsɛ. Nde ayalaka ‘onto wolekisa anto ankfumɔ wela looko okitshakitshɛ.’ (Ewadji 12:3) Koko, kaanga ndakfumɛyɛ ekawo w’ase Isariyɛlɛ l’ila k’ɛnɔnyi akumi, nde ayɛka ndosamba ndaakota loshi lɔmɔtshi. Wina w’iyakawe lonkina la n’kambo djɛ washi, nde omalaka ko ndombotateyɛ ndaapangola. Ndombashimela ante: ‘Nyo antɔmbɔki yɛnɛ nyekameyɛ! Oyɛwɔ mo tonyoposeyɛ washi má mve djɛnɛ?’​—Ew. 20:2-11.

Mɔsɛ atewa ndaakota l’etena kɛnɛ. Nde atapɛyɛ Ndjambe lumo: Nde atɛnyɛ ase Isariyɛlɛ ante nde ndeke lɔkɔpa ndaaposeyɛ washi má ntshese. (Yee. 106:32, 33) Djɛko ndeke Yehova ndoopekala djepande ndjingela lá Looko lɔ daka. (Ew. 20:12) Mɔsɛ ayalaka l’okiyano polo l’ekomo kɛ lowiko lɔnde lá wopo wɔ ndasambe ndaakota.​—Mvu. 3:23-27.

Olakanyelo wɔkɔnge wowaso? Kaanga tombokambelá Ndjambe ɛnɔnyi efula, topakoke samba ndaakitshakitshɛ te anto watomadjɛ kana koko wakoka mba ikako. (Ɛfɛsɛ 4:32; Kɔlɔsɛ 3:12) Nsɔsɔlɔ, lotshundo nkoka komɛ onto djɛ nsamba ndjala la ndaakota. Koko, totavungɛke kɛnɛ kekomelisa Mɔsɛ. Topa kombola dj’olemo wisombokambelá Yehova l’ilá k’ɛnɔnyi efula ndjala anyanya m’ɔtɛ wɔ nsamba ndaakota. Iya ko kɛkɔnge k’oyɛso ladjɛ nangha dj’iso ndjewa ndaakota?

Lɔmba djɛ wɛ mba nyuma k’ekina. Ladjikɛnde, ndaakota alekɔ l’eteyi kɛ wekekeka wɛ lowambo lɔ nyuma, edjinge Yehova mpɛyɛka nyuma kɛnde le anto wɔɔlɔmba. (Luka 11:13) Nde akoka ntɔpɛyɛ wolo woyɛso la djonyi. (Filipɛ 4:13) Nde nkoka ntokotshɛ dj’iso nkamba la toopo tonkina tɔ lowambo lɔ nyuma kɛnde entengo ngandji, dj’iso ndjewa ndaakota wɔlɔ.​—1 Kɔ. 13:5.

Tona ekete k’enkfumɔ kekoka nkoshimba djɛ wɛ ndaakota. Iso ladjɛ ntona wa sitɛ y’Ɛntɛrnɛtɛ la etombo we ntshinda anto djɛ ndjala la nkfumbo djɛ nyɛtshi. (Ɛfɛ. 5:3, 4) Lekomo, mpombaka iso ndota ekete kenkfumɔ kekoka ntotshinda djɛ nangha nyɛtshi. (Woongo 22:3; 1 Kɔ. 6:12) Ndjɔmbɔmba, onto wonana  mbadji la mposɛ yɛnde yɛ mbindo yɛ nsanga mbeto nkoka ladjɛ ndaashimba djepa ntanga enkanda la ndenda wa filimɛ iwetshola nsaki yɛ demba yɛ osangelo wɔ mbeto.

Mbala imɔtshi iso nkokaka nyɛna djɛ alekɔ wolo nkamba la alako wasɔ. Koko, ntsha iso ndjila weelo, Yehova angɔtɔpɛyɛ wolo woyɛso la djonyi. (2 Pɛ. 1:5-8) Nde angotokotshɛ dj’iso nkota tokanyi, etepela edjinge nanghedji djɛso. Paul la Marco, wiso mbotepelaka ma djiko, iwɔ wambolonga djɛ ndjapemela nkɛlɛ yɛ wɔ yɛ nyɛtshi mpeyi la okotshɔ wɔ Yehova. Tɔshi ndjɔmbɔmba kenkina kɛ wɔnanyɔ ɔmɔtshi wotewaki ndaakota wina w’indakɛndjɛka otuka, nde atepelaki ampɔsɔ nya toshofɛrɛ tonkina. Ndananghe nge djɛnde ndjewa ndaakota? ‘Ante lemi lálɔmbaki loshi tshɛ.’ ‘Ndjekaka wamba watepelá n’kambo djɛ ndaakota, ndjekaka lonkina djɛ lemi nkota l’ɔtɛ avɛrse wa nkotshɛki djɛ lemi ndaakota. Kaanga momonangha la wolo ɛnɔnyi efula djɛ lemi nkamba la djekeka djɛsɔ, nkɛsɛ tshɛ lemi mvungɔka ente okoma wɔmi nde djɛ ndaakota. Ntsha ndekɔ la nonghanyi kɛmposa etena kɛmɔtshi, lemi ntshɔka ntondo djepa lemi ntoka nkɛlɛ l’ɔtɛ wɔ wema wela mboka.’

Nkoka nkoma ko tombosamba ndaakota. Iso nkoka edjinge ndjoka wɔma kana nsɔnyi ndɔmba Yehova. Koko, lá wina wɔ nghɔsɔ ndeke oyɛso la djonyi djɛ okotshɛ. Djɛko ndeke ntsha tombosamba ndaakota lá n’kambo mɔtshi, tɔlɔmbɛ Yehova ngo wina wɔkɔ. Lɔmbande l’oloko ɔmɔ djɛnde nkimeyɛ la nkokotshɛ dj’ipa wɛ nkalɔ nangha ovunga wɔkɔ lonkina. (Yee. 51:9-11) Nde apangotona lɔlɔmbɔ lɔko. (Yee. 102:17) Ɔpɔstɔlɔ Djɔanɛ atovungola ante ekilá wɛ Yeso ‘ntɛɛdjɛka piyɔɔ má evunga enkfumɔ.’ (1 Dj. 1:7; 2:1; Yee. 86:5) Edjinge totavungɛke djɛ Yehova ndɔmbaka ankambi yɛnde djɛ nyimeyɛka winawɔ anto mbala la mbala, lasɔ awola ente nde angokonanghela ngo wopo wɔkɔ.​—Mat. 18:21, 22; Kɔl. 3:13.

Nsɔsɔlɔ wina wɔ Mɔsɛ ndasambe ndaakota, Yehova akiyanaka. Koko nde owimeyɛka ovunga wɔnde. Iso ndjawolaka n’kambo djɛsɔ ladjikɛnde Bible ɛnyɛ djɛ Mɔsɛ alekɔ ndjɔmbɔmba kɛ wɔlɔ kɛ djawo. (Mvu. 34:10; Heb. 11:24-28) Kaanga Yehova ndapekala Mɔsɛ djɛ nde ndjingela la Nkɛtɛ yɛ daka, nde angawola djɛnde ndowika la paradiso. Ntokoka ndowika lande ntsha tongokindjɛ ndjala la ndaakota, djekeka djɛ djonyi djɛsɔ.​—1 Kɔ. 9:25.