1. Kɛkɔnge kɛ Yehova ndakonanghela?

WOPO wɔkɔnge ngakome Owakɛ wɔ Yehova? Ntondontondo, wɛ ekameyɛka ‘losango lɔ wɔlɔ,’ mbala imɔtshi me ambotshi wako, winako wel’olemo kana welá nkalasa, kana koko m’olemo w’ipoposanyɛ wɔ mvulu la mvulu. (Mar. 13:10) Masɔ, onto ɔmɔtshi ɔsaka winá efula edjinge ilaka welo efula djɛ ndjeka nyape Bible. Má wekelo wɔsɔ, wɛ oyɛka ndɔkɔpa Yehova edjinge osipisoyɛka ente nde nkɔkɔpaka. Yehova akosepaka l’akambo wa nsɔsɔlɔ edjinge win’ɔsɔ, etengo oyɛ ombeki wɔ Yeso Kristo, olekɔ la nkongi djɛ ndowika lotshinda lotshinda. (Dj. 6:44) Ape l’ehamo, olekɔ la djedjɛ efula te Yehova lá wopo wɔ ndatshinde onto ɔmɔtshi djɛ nkolakanyɛ akambo wa nsɔsɔlɔ edjinge wɔ ndokawola djɛ wɛ ndjala onkambi wɔnde.

2. Kɛkɔnge k’ɛnaso lɔ lá djamba djɛnɛ?

² Winá w’isombewa akambo wa nsɔsɔlɔ, tolekɔ la mpeyi kɛ ndjekɛ anto ankina dj’iwɔ ndjingela laso tá mboka kɛ lowiko. Mbala imɔtshi iso nkɔpaka olemo w’ipoposanyɛ wɔ mvulu la mvulu, koko tokoka ndjala l’okakasano wɔ ndɔmba onto djɛ ndjeka lande Bible edjinge wɔ ndɔndjɛ wekelo wɔ Bible. Ongoyalake l’okakasano wɔsɔ? Ntsha nghɔsɔ, mbɔ alako amɔtshi wela djamba djɛnɛ wangokokotshɛ. Tɔngɛna kɛnɛ kekoka ntotshinda djɛ mpɛyɛ lɔwɔ l’olemo wɔ nkfumba ambeki. Tɔngɛna lonkina wopo w’okokaso ndongela ekakasano ɛmɔtshi wekoka ntoshimba djɛ ndjeka l’onto ɔmɔtshi Bible. Ntondontondo nyontshɔ tokolenda lamo oyɛso ladjɛ ndjala apengo ansakodji toko koko edjinge wetsha wɛ losango lɔ wɔlɔ.

3. Lamo opoposanyɛso?

³ Winá wɔ Yeso ndayalaka lanɛ lá looko, nde apɛyɛka ambeki wande olemo wolekɔ la ntenyi mpe. Kɛ ntondo, nde ashimelaka dj’iwɔ mpoposanyɛ losango lɔ wɔlɔ l’Onkfumi, edjinge nde awɛnyɛka  wopo w’iyakoke nangha. (Mat. 10:7; Luka 8:1) Ndjɔmbɔmba, Yeso ashimelaka ambeki wande kɛnɛ kiyakoke nangha ntsha anto wambotona losango l’Onkfumi kana wambawola. (Luka 9:2-5) Lonkina nde ashimelaka lá ntondo wopo wongotshanghana olemo w’ipoposanyɛ, má ndaashimela ante ambeki wande ‘wangopoposanyɛ l’ewila enkfumɔ.’ (Mat. 24:14; Ele. 1:8) Lá nkilika kɛnɛ kɛ anto iyongelola lá kɛnɛ kelendana l’olemo w’ipoposanyɛ, ambeki wayalaka ladjɛ nshimela anto akambo walendana l’Onkfumi wɔ Ndjambe edjinge kɛnɛ kɛ ndongonangha.

4. Lá nkilika Mateo 28:18-20, ladjiko djɛ mpoposanyɛ kɛnɛ kelendana l’Onkfumi, kɛkɔnge k’oyɛso ladjɛ nangha?

⁴ Iya olekɔ etenyi k’ape kɛ lotomo lɔ Yeso? Nde ashimelaka ambeki wande djɛ ndakanyɛ anto ankina wangoyɛ ndoyala ambeki dj’iwɔ nɛmɛyɛ akambo ankfumɔ wa ndawilela ɔlɛmbɛ. Olemo w’ipoposanyɛ edjinge wɔ ndakanyɛ wɔsɔ woyalaka ladjɛ nkoma ngo l’ɛtɛndɔ kɛ ntondo, etengo anto amɔtshi okanelawɔ? Lako, Yeso ɛnyɛka ante olemo wowikɛ mbiko wɔsɔ wongokindjɛ tii l’etsho wɛso, ‘tii l’etena k’ekomo k’andja.’ (Wala Mateo 28:18-20.) Nyɛnamaka djɛ Yeso apɛyɛka lotomo lɔsɔ winá w’indɛma le ambeki wande ndekana 500. (1 Kɔ. 15:6) Edjinge lá wɛnɛlɔ wa ndɛnyɛka Djɔanɛ, Yeso ɛnyɛka papoo ante nde ndɔmbaka ambeki wande ankfumɔ dj’iwɔ nkotshɛ anto ankina djɛ ndjeka akambo walendana la Yehova.—Ndj. 22:17.

5. Ndjɔmbɔmba kɛkɔnge kekambisa la Poolo lá 1 Kɔrɛtɔ 3:6-9 djɛ nyɛnyɛ djokanelo djelekɔ lantenyɛ olemo w’ipoposanyɛ la wɔ ndakanyɛ?

⁵ Ɔpɔstɔlɔ Poolo ɛdjɛka olemo wɔ nkfumba ambeki, l’olemo w’awedji, má nyɛnyɛ ante iso ladjɛ nangha akambo ankina efula ladjiko djɛ nkona. Nde avungolaka ase Kɔrɛtɔ ante: ‘Lemi nkonaka, Apolo avutelaka washi . . . Nyo nyolekɔ bedji djɛ Ndjambe djekambema.’ (Wala 1 Kɔrɛtɔ 3:6-9.) Etengo oyɛso enkambi welá ‘bedji djɛ Ndjambe,’ topakoke nkoma ngo lá nkona toko koko iso ladjɛ mvutelaka washi edjinge mbala la mbala ndendaka wopo wotafule nkete dj’okonaso. (Dj. 4:35) Koko, iso ndjewaka ente Ndjambe ndeke loposɛ nkete dj’okonaso.

6. Kɛkɔnge kɛlɔmbama l’olemo wɔso wɔ ndakanyɛ?

⁶ Tohona anto walekɔ ‘entshupa djɛ ndjawola akambo wa nsɔsɔlɔ watɔla tá lowiko l’etshinda.’ (Ele. 13:48) Djɛ nkotshɛ anto wa nghɔsɔ dj’iwɔ nkoma ambeki, iso ladjɛ ndakotshɛ dj’iwɔ 1) ndjoka, 2) ndjawola, edjinge 3) nkamba l’akambo w’ekawɔ má Bible. (Dj. 17:3; Kɔl. 2:6, 7; 1 Te. 2:13) Onto onkfumɔ wɔ l’otshumano nkoka nkotshɛ ambeki wa Bible wasɔ má mpɛyɛ ndjɔmbɔmba kɛ nyɛnyɛ anto wa bango wasɔ ngandji edjinge má ndakotshɛ dj’iwɔ ndawoka etengo walekɔ lá wakawɔ winá w’otateyɛwɔ ndjɛ lá nsanghanyɛ. (Dj. 13:35) Kangeka l’ombeki nkoka ndɔsa winá efula edjinge nangha la wolo djɛ ndookotshɛ djɛ mvuta nkfumbo kana nanghedji ‘djembopikama wolo.’ (2 Kɔ. 10:4, 5) Akoka ndɔsa ngɔndɔ efula djɛ nkotshɛ ombeki djɛ ntapola wina wasɔ edjinge djɛnde ndokotshɛ okoma wɔ nde ndolongola batisimo. Koko má ndjila welo tongowa eposelo wɛ wɔlɔ.

7. Kɛkɔnge ketotshinda djɛ ndapɛyɛ l’olemo w’ipoposanyɛ edjinge wɔ nkfumbo ambeki?

⁷ Lamo oyapɛyɛso l’olemo w’ipoposanyɛ la wɔ nkfumba anto ambeki? Ntondontondo, mande iso nkɔpaka Yehova. Winá w’onanghɛ kenkfumo k’okokɛ nangha djɛ nɛmɛyɛ lotomo lɔ Yeso lɔ mpoposanyɛ edjinge lɔ nkfumba ambeki, wɛ nyɛnyɛka djɛ wɛ nkɔpaka Ndjambe. (1 Dj. 5:3) Kɔtɔnɔla lá nkambo djɛnɛ: Ngandji kɛko te Yehova kekotshindaka djɛ wɛ mpoposanyɛ lá mvulu la mvulu. Lotomo  lɔsɔ loyalaka wɔdju nɛmɛyɛ? Lako. Winá wɔ ngayale entshupa djɛ mpoposanyɛ lá lopango lɔ ntondo, ape wɛ okaka wɔma? Ape lehamo oyalaka la wɔma! Koko wɛ ewaka ente onyi ndeke olemo wɔ Yeso ɔkɔpande wɛ nangha, edjinge ɔlɛmɛyɛka lotomo lɔkɔ. Edjinge mbala imɔtshi m’ɔkɔngɔ w’etsho ɛmɔtshi, olemo w’ipoposanyɛ woyɛka ndoyala wɔdju lewɛ. Iya kɛkɔnge k’okaso ntepela lá kɛnɛ kelendana la ndjeka l’onto ɔmɔtshi Bible? Nkambo djɛsɔ djɛngɔkɔpɛyɛke wɔma? Mbala imɔtshi. Koko, ntsha wɛ ndɔmba Yehova djɛ nde nkokotshɛ djɛ wɛ nyimɛ wɔma edjinge ndjala l’oloko wolo djɛ ndɔmba onto ɔmɔtshi djɛ wɛ ndjeka nyande Bible, Yehova nkoka nkokotshɛ djɛ wɛ nfudjɛ mposɛ kɛko kɛ nkfumba ambeki.

8. Lá nkilika Marko 6:34, kɛkɔnge kekoka ntotshinda djɛ ndakanyɛ anto ankina?

⁸ Dj’epe, ngandji kɛso te winaso anto ntotshindaka dj’iso ndaalakanyɛ akambo wa nsɔsɔlɔ. Lá mbamba kɛmɔtshi, Yeso ny’ambeki wande walɛmbaka m’olemo w’ipoposanyɛ. Iwɔ watshɔka t’edjena kɛmɔtshi dj’iwɔ ntohomola ngo iyɔmɛlɛ, koko oloyi w’ekekete w’anto wakilikaka. Má djandji djɛ ndaawoke, Yeso atateyɛka ndakanyɛ anto wasɔ ‘akambo efula.’ (Wala Marko 6:34.) Nde akambaka olemo efula kaanga ndalɛmbɛ. Lamo? Yeso nyɔmɛlɛ ayawilaka l’edjena k’oloyi w’anto wɔsɔ. Nde ɛnaka wopo w‘iyɛnaka ndjolo efula, wopo w’iyayale la djonyi djɛ nkongi, djɛkondeke ndakɔpɛ ndaakotshɛ. Lɔɔko kɛnɛ anto walekɔ l’ekakasano wɛkɔ ɛmɔ. Totadjimbamake m’ɔtɛ wɔ ɛnamelo kɛwɔ. Iwɔ walekɔ etengo ɛnkɔkɔ wembovunga wepalekɔ l’onami wɔ ndaalɔndjɛ. Ɔpɔstɔlɔ Poolo atepelaka ante anto wa nghɔsɔ walekɔ etengo anto wapalekɔ la Ndjambe edjinge wapalekɔ la nkongi. (Ɛfɛ. 2:12) Iwɔ walekɔ lá ‘mboka kɛtɔla tá etshitanelo’! (Mat. 7:13) Ntsha iso nkanela osambo w’akambo wa nyuma wolekɔ l’anto wel’etatshi kɛso kɛ looko, ngandji edjinge djandji angototshinda djɛ ndaakotshɛ. Edjinge yopo yeleka wɔlɔ yɛ ndaakotshɛ nde, ndaalɔmba djɛ ndjeka lawɔ Bible.

9. Lá nkilika Filipɛ 2:13, wopo wɔkɔnge Yehova okokande nkokotshɛ?

⁹ Mbala imɔtshi okakanda djɛ ndɔmba onto ɔmɔtshi djɛ ndjeka lande Bible mande wɛ ndjewaka efula kɛ winá kɛlɔmbama djɛ ndjeka l’onto. Ntsha oyɛwɔnde nghɔsɔ, shimela Yehova wopo w’oyawokɛ. Lɔmbande djɛ nde nkokotshɛ djɛ wɛ ndjala la mposɛ kɛ mba onto edjinge kɛ ndjekaka nyande Bible. (Wala Filipɛ 2:13.) Ɔpɔstɔlɔ Djɔanɛ atoshikikɛka ante Ndjambe nkadjimolaka alɔmbɛlɔ wokana l’ɛkɔpa kɛ Nde. (1 Dj. 5:14, 15) Djɛkondeke wɛ nkoka ndashikikɛ ente Yehova angokokotshɛ djɛ wɛ mpɛyɛ lɔwɔ l’olemo wɔ nkfumba ambeki.

10-11. Kɛkɔnge kekoka ntopekala djɛ ndjeka l’onto ɔmɔtshi Bible?

¹⁰ Iso ndɔsaka olemo wɔso wɔ ndakanyɛ anto Bible la ntshina efula kaanga opomanaso l’ekakasano wekoka ntoshimba djɛ ndapɛyɛ l’olemo wɔ nkfumba ambeki lá lɛdji l’okombolaso. Nyontshɔ tokolenda ekakasano ɛmɔtshi edjinge wopo w’okokaso nangha djɛ ndaakandola.

¹¹ Nkoka ndjala ko tolekɔ l’elelo ɛmɔtshi m’ɔtɛ wɔ wayi watokomela. Ndjɔmbɔmba, ansakodji amɔtshi wamboyala nkokolo kana wapalekɔ l’alemba wa wolo. Okakasano wɔsɔ ndenanaka la wɛ? Ntsha oyɛwɔnde nghɔsɔ, kolenda olakanyelo ɔmɔtshi w’isombowa m’opela wɔ COVID-19 wɔnɛ. Tombisola ente iso nkoka ndjeka l’onto Bible kaanga má w’aparɛyi, ndjɔmbɔmba telefɔnɛ kana ɔrdinatɛrɛ! Djɛkondeke, okoka mbanga edjinge ndjeka l’onto Bible ngo má mvulu kɛko. Wapɔ onkina wolekɔ. Anto amɔtshi nkɔpaka ndjeka Bible, koko wapawaka mbamba kɛ ndjeka winá wɔ wananyɔ oposawɔ t’olemo w’ipoposanyɛ. Koko iwɔ  nkoka mba winá la nkɛsɛ dj’efula kana la nkɔlɔ dj’efula. Opakoke ntshungola winá djɛ nkotshɛ mposɛ k’onto wɔsɔ? Yeso alakanyɛka Nikɔdɛmɛ l’otsho, ɔsɔ ndeke loyalisa winá wɔ wɔlɔ le Nikɔdɛmɛ.—Dj. 3:1, 2.

12. Akambo wakɔnge wakoka ntoshikikɛ ente iso nkoka ndjala l’akoka wa ndjeka l’anto Bible?

¹² Mbala imɔtshi iso nyɛnaka etengo topalekɔ l’akoka wa ndjeka l’anto Bible. Tokoka nkanela ente ngo ntsha tombowa balo efula kana tomboyala l’akoka efula ko iso ndowanga ndjeka l’onto Bible. Ntsha okanelɛnde nghɔsɔ, mbɔ kolenda akambo asato wakoka nkokotshɛ. Djɛ ntondo, Yehova nkɔsaka djɛ wɛ olekɔ l’akoka wa ndakanyɛ anto ankina. (2 Kɔ. 3:5) Dj’ape, Yeso kanga lowisa lowandji lonkfumɔ l’olongo edjinge lá looko ndeke lɔmbɔkɔpɛyɛ ɔlɔmɔ djɛ wɛ ndakanyɛ. (Mat. 28:18) Edjinge dj’asato, okoka ndawɛkɛ te anto ankina dj’iwɔ nkokotshɛ. Yeso ayawɛkɛka lá kɛnɛ kɛ Papa kɛnde ndolakanyɛ djɛ nshima la ntepela, edjinge wɛ nkoka nangha nghɔsɔ. (Dj. 8:28; 12:49) Lonkina, wɛ nkoka ndɔmba ilɔndjɛ y’olemo w’ipoposanyɛ yel’oloyi wɔnyo, yat’ekalo yelekɔ l’akoka wa ndakanyɛ kana nsakodji kenkina kɛ balo djɛ nkokotshɛ djɛ banga ndɔndjɛ wekelo wɔ Bible. Yopo imɔtshi yekoka nkokotshɛ nde, ntshindjeyɛka ansakodji yɛsɔ djɛ nteka l’ambeki wawɔ.

13. Lamo oyɛso la djonyi djɛ ndjekesanela la topo tɔ bango?

¹³ Iso nkoka ndjala l’okakasano wɔ ndjekela la topo tɔ bango edjinge mpeko djɛ bango. Wopo w’isekaka l’anto Bible ntondo wombotshikitana. Onkanda wɔso wɔ ndjeka l’anto Bible, Yala la lowiko l’osasa lotshinda lotshinda!, ndɔmbaka dj’iso ndɔngɔsɔla wekelo edjinge ndɔndjɛ lá yopo yetshikitanyi la y’isananghaka ntondo. Iso mbalaka totenyi daambi edjinge nsawolaka efula l’ombeki. Winá w’ekaso l’ombeki, iso nkambaka efula la wavideo edjinge la nkete nkina djelá Ɛntɛrnɛtɛ, etengo JW Library^®. Ntsha ongokake wolo djɛ nkamba la mpeko djɛsɔ, sawola l’onto ɔmɔtshi w’okoka nkokotshɛ djɛ wɛ ndjewa nkamba la mpeko djɛkɔ. Iso anto tolekɔ l’enkfumbo kɛ ndjɛkesanela l’akambo w’isananghaka ntondo efula. Apalekɔ wɔdju leso djɛ ndjekela topo tɔ bango tɔnangha akambo. Koko m’okotshɔ wɔ Yehova edjinge w’anto ankina, ɔngɛna ente alekɔ wɔdju nangha etshikitano edjinge ongosasanga efula djɛ ndjeka l’anto Bible. Etengo yat’ekalo imɔtshi ndatepela, yopo yɛ wekelo yɛsɔ “nsasangɛka apengo ombeki toko koko edjinge wetsha.”

14. Kɛkɔnge k’oyɛso ladjɛ mvungɔka winá w’okambaso l’etatshi kɛ looko k’anto iyopaleke ndjawola losango lɔso, ko wopo wɔkɔnge 1 Kɔrɛtɔ 3:6, 7 otokembɛnde?

¹⁴ Mbala imɔtshi oyalɛnde l’etatshi kɛ looko kelekɔ wolo djɛ ndjeka l’anto Bible. Mbala imɔtshi nyɛnamaka etengo anto ntonaka kana wapakɔpɛ ndjawola losango lɔso. Kɛkɔnge kekoka ntokotshɛ djɛ ndjala l’ikanyi yɛ wɔlɔ l’etatshi kɛ looko kɛ nghɔsɔ? Vungɔka ente akambo wakomela anto nkoka ntshikitana mbala kɛkɔ kɛmɔ lá andja wa tshikitshiki wanɛ, edjinge wanɛ watawolaki losango lɔso ntondo nkoka ndosipisoyɛ ambɔ walekɔ la djonyi dj’akambo wa nyuma. (Mat. 5:3) Anto amɔtshi watonaki ndɔsa enkanda wɛso winá enkfumɔ ntondo, wayɛka ndawola ndjeka Bible l’ɔkɔngɔ. Lonkina iso ndjewaka ente Yehova ndeke Owandji wɔ vukelo. (Mat. 9:38) Nde nkɔpala dj’iso nkidjɛ nkona la mvutela washi koko nde ndeke kanga loposɛka. (1 Kɔ. 3:6, 7) Edjinge ɔsɔngo ekembelo djɛ mvungɔ ente kaanga topolekɔ l’akoka wa ndɔndjɛ wekelo wɔ Bible win’ɔsɔ, Yehova angɔtɔtshɔkɔla ape má eposelo w’owaso, koko má welo wilaso! *

15. Wopo w’ɔkɔnge Yehova oyawokakande winá w’onto ɔmɔtshi awolande ndjeka Bible ko akamba la kɛnɛ k’ekande?

¹⁵ Yehova nsasangaka winá w’onto awolande akambo wa nsɔsɔlɔ wimá Bible edjinge oshimelande anto ankina akambo wakɔ. (Woo. 23:15, 16) Ɔsɔngo efula k’osasa Yehova ndokaka winá wɛnande kɛnɛ keheta lɔɔko kɛnɛ! Ndjɔmbɔmba, ayale kaanga opela w’ekekete woyalisa l’ɔnɔnyi w’olemo wɔ 2020 wɔnɛ, tɔlɔndjɛka wekelo wɛ Bible, 7 705 765, edjinge anto 241 994 wayalambolaka te Yehova edjinge walongolaka batisimo. Ambeki wa bango wasɔ l’onkoko wɔwɔ, wangeka l’anto ankina Bible edjinge wangokfumba anto efula ambeki. (Luka 6:40) Ape l’ehamo, iso nsasangɛka Yehova efula winá w’oyapɛyɛso l’olemo wɔ nkfumba anto ambeki.

16. Okoma wɔkɔnge wɔ wɔlɔ w’okokaso ndawilela?

¹⁶ Nkfumba anto ambeki alekɔ olemo wɔ wolo, koko m’okotshɔ wɔ Yehova iso nkoka ndjila lɔwɔ djɛ ndakanyɛ anto wa bango djɛ nkɔpa Papa kɛso kel’olongo. Tokoka ndawilela okoma wɔ mbanga ndjeka kaanga l’onto ɔmɔ Bible. Mbala imɔtshi tongokamɔ má nyɛna eposelo wengoyala ntsha iso nkamba la mbamba inkfumɔ yɛ wɔlɔ y’owaso djɛ ndɔmba wanɛ wapomana laso, djɛ ndjeka lawɔ. Toyale l’eshikikelo ente Yehova angɔtshɔkɔla welo w’ilaso.

17. Kɛkɔnge kɛ isongowa ntsha tombowa mbamba kɛ ndjeka l’anto Bible?

¹⁷ Ɔsɔngo mpeyi kelekɔ laso kɛ mpoposanyɛ edjinge kɛ ndakanyɛ anto ankina akambo wa nsɔsɔlɔ! Olemo wɔsɔ ntɔpɛyɛka osasa wɔ nsɔsɔlɔ. Ɔpɔstɔlɔ Poolo, kanga lokotshisa ase Tesalɔnika efula dj’iwɔ nkoma ambeki, ntepelaka wopo w’indoyawoke lá wopo wɔnɛ ante: ‘Olekɔ nkongi djɛso kana osasa wɔso, kana imbandjo yɛ nkoso y’oyawandolaso lá ntondo kɛ Nkfumi kɛso Yeso lá ɛnamelo kɛnde? Ape nsɔsɔlɔ nyo? Nyo nsɔsɔlɔ ndeke olekɔ lomo lɔso edjinge osasa wɔso.’ (1 Te. 2:19, 20; Ele. 17:1-4) Lɔɔko kɛnɛ anto efula wamboyawokaka nghɔsɔ. Nkaana kɛmɔtshi k’etawɔ Stéphanie kanga lokotshisa anto efula nya womɛnde djɛ ndongola batisimo ntepelaka ante: “Lako osasa woleka wɔ nkotshɛ anto dj’iwɔ ndalambola te Yehova.”