1-2. Wopo wɔkɔnge etepela wɛ Yehova welá Izaya 65:16, 17 otokembɛwɔ dj’ipa mpekɔ?

‘TOTAPEKƆKE!’ Ɔsɔ ndeke oyalisa ɔtɛ wɔ djoyi wɔ losanghanyɛ lɔ rɛjɔ lɔ 2017. Nonghanyi kɛ losanghanyɛ lɔsɔ kɛtɛnyɛka wopo w’okokaso nkfulumeyɛ ekakasano wetokomela. M’eteyi ɛnɔnyi ɛnɛyi wemboheta edjinge win’ɔsɔ, tokindjɛ ngo nkfulumeyɛ lowiko lɔ nkfumbo dj’akambo djɛnɛ.

² Akambo wakɔnge wangombopomana atahete ilá? Nyɔyi kɛ ose nkfumbo kɛko kana kɛ ilongo yɛko yɛ ngandji? Olando wopakɔnɔ? Okakasano wolendana la lotshundo? Mbalaka yeyɛ má nkete djetongamisa, akambo wa lopango, kana ndjolo? Eposelo ɛmɔtshi wimá olondo ɔmɔtshi, ndjɔmbɔmba opela wɔ COVID-19? Ɔsɔngo okombolaso lofu lɔ akambo ankfumɔ wasɔ iyongoshila la iyongovungɛma edjinge iyopangokalɔ l’oloko lonkina!—Wala Izaya 65:16, 17.

3. Kɛkɔnge k’oyɛso ladjɛ nangha winá wɔsɔ, edjinge lamo?

³ Lowiko lelá nkfumbo dj’akambo djɛnɛ, lomboyala nkenya efula edjinge tokoka mpomana l’ekakasano enkina weleka wolo l’etsho weyaye. (Mat. 24:21) Ndjokamaka ente, iso ladjɛ nkindjɛ nkembɛ okfulumeyelo wɔso. Lamo? Mande Yeso atepelaka ante: ‘Má okfulumeyelo wɔnyo ndeke nyongowikɛ mbiko yɛnyo.’ (Luka 21:19) Kanela wopo wɔ anto ankina iyalonge nkfulumeyɛ ekakasano w’etengo wɛso nkoka nkembɛ okfulumeyelo wɔso.

4. Lamo okokaso ntepela ente Yehova alekɔ ndjɔmbɔmba keleka wɔlɔ k’okfulumeyelo?

⁴ Onto wɔkɔna wolekɔ ndjɔmbɔmba keleka wɔlɔ kelendana l’okfulumeyelo? Yehova Ndjambe. Nsakiso kɛsɔ kembokokamoyɛ? Okoka nkanela nghɔsɔ. Andja wanɛ walekɔ l’ɛlɔndjɛlɔ kɛ Djabolo, edjinge wambolola l’ekakasano. Yehova alekɔ la nkfulu kɛ nkomɛ ekakasano wɛkɔ mbala kɛkɔ kɛmɔ, koko nde akonga djɛ ndonangha nkambo djɛsɔ l’etsho weyaye. (Ɔrɔ. 9:22)  Lá ntondo kɛ nangha nkambo djɛsɔ, Ndjambe kɛso akindjɛ nkfulumeyɛ tii etena keshikikamisa nkoka. Nyontshɔ tokolenda akambo djuwa wa Yehova onkfulumeyɛnde.

5. Wopo wɔkɔnge iyɔnyɔla djiina djɛ Ndjambe, ko wopo wɔkɔnge oyawokɛ lá nkambo djɛsɔ?

⁵ Wopo w’ɔnyɔlawɔ djiina djɛnde. Yehova nkɔpaka ndjiina djɛnde edjinge nde nkɔpaka dj’onto onkfumɔ ndɔsa ndjiina djɛkɔ l’odjito. (Iza. 42:8) Koko ambolekana etengo ɛnɔnyi nunu ntshamalo, dj’ɔnyɔlawɔ djiina djɛ wɔlɔ djɛ Ndjambe. (Yee. 74:10, 18, 23) Nkambo djɛsɔ djewangaka lá bedji dj’Ɛdɛna winá wɔ Djabolo (nsakiso ante: “Kanga omamanyɛ”) ndamame Ndjambe ante apekala Adama nya Eva ekete kɛmɔtshi kiyayale la djonyi djɛ ndjala l’osasa. (Ewa. 3:1-5) Ntateyɛ masɔ, watonghanyɛ Yehova ambɔ nde mpekalaka anto kɛnɛ k’oyɛwɔ nsɔsɔlɔ la djonyi. Yeso ayakinyɛki lá wopo w’ɔnyɔlawɔ djiina djɛ Papa kɛnde. Lá donga djɛsɔ ndeke, ndalakanyɛ ambeki wande dj’iwɔ ndɔmbaka ante: ‘Papa kɛso kel’olongo, djiina djɛko djale ekina.’—Mat. 6:9.

6. Lamo Yehova ndawola ntshika winá efula lá ntondo kɛ nkandola okakasano wolendana la lotshungɔ lɔnde lɔ ndɔndjɛ?

⁶ Wopo w’onanyɛwɔ lowandji lɔnde. Yehova alekɔ la lotshungɔ lonkfumɔ lɔ ndɔndjɛ olongo la looko, edjinge lɛdji lɔnde lɔ ndɔndjɛ ndeke loleka wɔlɔ. (Ndj. 4:11) Koko Djabolo adjimbolaka andjelo edjinge anto dj’iwɔ nkanela ambɔ Ndjambe apalekɔ la lotshungɔ lɔso. Yehova akokaka nyɛnyɛ mbala kɛkɔ kɛmɔ djɛ nde ndeke la lotshungɔ lonkfumɔ lɔ ndɔndjɛ. La balo nkfumɔ, Ndjambe awolaka ntshika winá efula dj’anto nyɛna ambɔ, winá w’ohonawɔ dalɔndjɛ iyɔmɛlɛ ipa l’okotshɔ w’Ontongi, iwɔ wangɔkfɔ balakata. (Jɛr. 10:23) Má balentshitshi djɛ Ndjambe, nkando kɛ nkambo djɛsɔ kengowayema mbala kɛkɔ kɛmɔ lotshinda lotshinda. Nde angosela lowandji lɔnde ma nyɛnyɛ ante ngo Onkfumi wɔnde toko ndeke longoyakala vu djɛ nsɔsɔlɔ lá looko.

7. Anto wakɔna watɔmbɔkwɛlisa Yehova, edjinge kɛkɔnge kɛ ndongananghela?

⁷ Ɔtɔmbɔkwelo wɔ wana wande amɔtshi. Yehova atongaka wana wande welá nyuma edjinge anto lá lɛdji lɔ djɔ, ipa la badji. Koko l’ɔkɔngɔ wɔnande w’ondjelo w’ɔntɔmbɔki Satana (nsakiso ante: “Kanga lonanyɛ”) atshindaka Adama nya Eva anto wa ndjɔ djɛ ntɔmbɔkwɛla Yehova. Andjelo ankina edjinge anto w’ingelaka l’ɔtɔmbɔkwɛlɔ wɔsɔ. (Yuda 6) M’ɔkɔngɔ kaanga owila w’Isariyɛlɛ anto wa Ndjambe ndasɔnɛ w’otonaka, edjinge wawangaka ntɛmɔla ntondjadjambi t’engolo. (Iza. 63:8, 10) Nsɔsɔlɔ Yehova akokaka ndawoka djɛ wambokadjɛ. Koko nde ankfulumeyɛka edjinge akindjɛ nkfulumeyɛ tii winá wɔ ndongoyaka antɔmbɔki ankfumɔ wasɔ iyongokoka. Kɛsɔ kengoyakala anto wande wa nkɔmano wankfulumeyɛki esanga lande nkfumbo dj’akambo djɛ nyɛtshi djɛnɛ ɛtshɔkɔ!

8-9. Engolo wɛkɔnge w’otepelawɔ lá nkambo djɛ Yehova, edjinge wopo wɔkɔnge w’okokaso ndjelola?

⁸ Engolo wɛ winá enkfumɔ wɛ Satana. Satana atonghanyɛka Djɔbɔ, edjinge enkambi wɛ Yehova enkfumɔ wɛ nkɔmano ante iwɔ ndokambelaka ngo la wapɔ ɔmɔtshi wɔ lokaki. (Djɔ. 1:8-11; 2:3-5) Djabolo akindjɛ l’emamanyɛ wɛnde tii lɔɔko kɛnɛ. (Ndj. 12:10) L’onkoko wɔso iso nkoka nyɛnyɛ ente Satana alekɔ kanga ongolo má nkfulumeyɛ ehemba enkfumɔ edjinge ntshikala la nkɔmano te Yehova má ngandji kɛso te Nde. Etengo iyayale lá nkambo djɛ Djɔbɔ, tongotshɔkwama m’onkfulumeyelo wɔso.—Dja. 5:11.

⁹ Satana nkambaka l’ewandji wɛ ntolo dj’engolo djɛ ntepela ambɔ Yehova alekɔ kanga nyɛtshi edjinge nde ndeke ikɔkɔ yɛ ndjolo  y’anto. Amɔtshi nkomaka tii djɛ ntepela ambɔ winá wovɔ wana, Ndjambe ndeke l’awɔsa mande nde alekɔ la djonyi djɛ ndjala l’andjelo efula l’olongo. Ɔsɔngo ntoyi! Iso ndjewaka ente Yehova alekɔ Papa kɛso kɛ ngandji. Winá w’ɛnaso ndjolo l’olando ɔmɔtshi kana wovɔ onto wɔso ɔmɔtshi wɔ ngandji, topamamaka Ndjambe kɛso lowo kaanga ndambo daambi. Koko iso ndjalaka la djawo ente lofu lɔmɔtshi, nde angosembola akambo. Iso nkɔpaka nsawola la wopo w’onto onkfumɔ wɔkɔpa ndjekameyɛ ngandji kelekɔ la Yehova Ndjambe. Kɛsɔ kɛngɔpɛyɛ mpɔndɔ kɛ wɔlɔ kɛ nkawoyɛ onto wɔwɔnyɔlaka.—Woo. 27:11.

10. Kɛkɔnge kɛ Yeembo 22:23, 24 ɛnyɛnde lá nkambo djɛ Yehova?

¹⁰ Ndjolo yɛna enkambi wɛnde wɛ ngandji. Yehova alekɔ Ndjambe k’okana djandji. Nde apakɔpɛ nyɛna wopo w’olelaso m’ɔtɛ wɔ ndjolo y’okfulumeyɛso, ɛhɛnyɔhɛnyɔ, elando kana ntshamba djɛso djɛ djɔ. (Wala Yeembo 22:23, 24.) Yehova ndjokaka paa yɛso y’okaso, nde nkɔpaka nkomɛ ndjolo yɛkɔ edjinge angokomɛ. (Ɛdjɛ la Eposelo 3:7, 8; Izaya 63:9.) Lofu lɔmɔtshi ‘nde angodjola wisɔyi má wiso [waso], edjinge nyɔyi kepangoyala lonkina, ntshaka djepangoyala lonkina, delo djepangoyala lonkina, kaanga olando wopangoyala lonkina.’—Ndj. 21:4.

11. Kɛkɔnge kɛ Yehova okanelande lá nkambo dj’enkambi wɛnde wɛ nkɔmano wembovɔ?

¹¹ Nyɔyi kɛ tolongo tɔnde. Wopo wɔkɔnge Yehova oyawokande lá nkambo dj’ampame l’amato wa nkɔmano wambovɔ? Nde oka oloko lukuluku djɛ ndawɛna lonkina! (Djɔ. 14:15) Okoka nkanela efula kɛ Yehova okanelakande ilongo yɛnde Abarahama? (Dja. 2:23) Kana Mɔsɛ, kanga lotepalaki iyape ‘elongi l’elongi’? (Epo. 33:11) Edjinge wopo w’okombolande ndjekameyɛ Davidɛ nya antshumbi teembo ankina wolumɛki la teembo tɔ wɔlɔ efula!  (Yee. 104:33) Kaanga tolongo tɔ Ndjambe tɔsɔ iyombetama ilɔ lá nyɔyi, Yehova apavungɛka. (Iza. 49:15) Nde mvungɔka ikakambo inkfumɔ yelendana la lonto lɔwɔ. Lá lɛdji lɔmɔtshi, ‘iyankfumɔ walekɔ la lowiko lende.’ (Luka 20:38, lenda nɔtɛ.) Lofu lɔmɔtshi, nde angakfundola dj’iwɔ ndoyala la lowiko, edjinge nde angekameyɛ ndɔmbɔ yɛwɔ yɛ manse k’oloko lonkina, edjinge angawola etolo kɛwɔ. Ntsha wɛ ombovusɛ onto wɔko wɔ ngandji, tokanyi tɔsɔ nkoka nkokeketshɛ edjinge nkokembɛ.

12. Kɛkɔnge keleka nkiyanyɛ Yehova l’etsho wekomo wɛ nyɛtshi wɛnɛs?

¹² Ndjolo yɛna anto me anto wa nyɛtshi. Winá w’ɔtɔmbɔkwɛlɔ iyawange lá Ɛdɛna, Yehova ewaka ante akambo wangoleka ntshitana lá ntondo k’iwɔ ndɔwɔnga. Yehova ntonaka akambo wa nyɛtshi, wa ntshamba djɛ sii edjinge wa lopango wananghema l’andja wa lɔɔko wanɛ. Nde angoyalake la djandji pekapeka te wanɛ w’olekawɔ nyɛnyɛ ndjolo, anto walekɔ wɔdju, edjinge wadji w’edjo la wana wa ntshike wapalekɔ l’anto wasela. (Zak. 7:9, 10) Yehova ndakiyanyɛka efula pekapeka winá wɛnande wɛnyɛ enkambi wɛnde wɛ nkɔmano ndjolo edjinge wawila lá ankando. Yala l’eshikikelo ente, nde nyɔkɔpaka nyankfumɔ wanɛ wankfulumeyɛ esanga lande.

13. Nanghedji djɛkɔnge djɛ mbindo djɛ Ndjambe ɛnande le anto, ko ndonghonangha nge lá nkambo djɛsɔ?

¹³ Otshitanelo wɔ nanghedji djɛ wana w’anto. Satana nkɔpaka ntshita nanghedji dj’anto watonghamisa lɛfɔ kɛ Ndjambe. Winá wɔ Ndjambe ‘ndɛnyi akambo apɔlɔ wamboleka efula lá looko’ l’etsho wɛ Noe, ‘Yehova ayakiyanyɛka l’ɔtɛ wɔ ndatonge anto lá looko, edjinge nde atshutshumalaka l’oloko wɔnde.’ (Ewa. 6:5, 6, lenda nɔtɛ, 11) Ntateyɛ m’etena kɛsɔ akambo wawɔngaka? Lako! Ɔsɔngo osasa woleko la Djabolo winá w’ɛnande ofulelo w’akambo wa nyɛtshi wa nsanga mbeto lá wepo enkfumɔ, ndjila edjinge nanghedji djɛ mbindo l’antenyɛ mpame l’omoto, mpame la mpame, kana omoto l’omoto! (Ɛfɛ. 4:18, 19) Satana ndjalaka l’osasa pekapeka winá w’ɔkfɛyɛnde enkambi wɛ Yehova l’ovunga. Winá wɔ bale ntshintshi djɛ Yehova iyongokoma, nde angɛnyɛ lotono lɔnde tá nanghedji djɛ mbindo nkfumɔ djɛsɔ winá wɔ ndongotshita anto wanangha ankambo wakɔ ko wapakɔpɛ ntshikitana.

14. Kɛkɔnge k’anto onanghelawɔ looko edjinge anyama yɛ Ndjambe?

¹⁴ Wopo w’anto otshitawɔ etongelo kɛnde. Onto apakome ngo lá ndɔndjɛ winande onto ‘djɛ ndonanghela nyɛtshi’ toko, koko edjinge apawombe looko l’anyama yɛ Yehova ndɔpɛyɛ djɛ nama. (Los. 8:9; Ewa. 1:28) Andjewi amɔtshi wa wayi ntepelaka ambɔ lá ɛnɔnyi emangha weyaye, nanghedji dj’anto djekoka ntshutshɛ ndekana miliɔ kɛmɔ kɛ nkete djetshikitanyi djelá looko. Topakamɔ winá w’otepelawɔ ambɔ nkete djetongamisa djɛna ndjolo! Nkambo dj’osasa nde, Yehova alakaka djɛ ‘ntshita wanɛ watshita looko’ edjinge nkadjimola looko l’otondo paradiso.—Ndj. 11:18; Iza. 35:1.

15-16. Kɛkɔnge ketotshinda djɛ nkfulumeyɛ esanga la Yehova? Pɛyɛ ndjɔmbɔmba.

¹⁵ Kokanela akambo ankfumɔ wa yɛnyi wa Papa kɛso kel’olongo ndombokfulumeyɛ l’ilá kɛ nunu dj’ɛnɔnyi. (Lenda ipapango “ Akambo wa Yehova okfulumeyɛnde.”) Yehova akokaka nkomɛ nkfumbo dj’akambo wa nyɛtshi wanɛ lá winá onkfumɔ w’ɔkɔpande. Koko balentshintshi djɛnde djemboyala la wapɔ leso! Tokoka nkanela nkambo djɛsɔ lá lɛdji lɔnɛ. Kɔsa djɛ wamboshimela wadji la wome ɔmɔtshi ambɔ wɔna wɔwɔ welá nkfundu, alekɔ l’olando w’ekekete edjinge apayalaki la lowiko lɔ wɔlɔ la angovɔ lankeke. Ayale kaanga nkambo djɛsɔ  ngoyala okakasano w’ekekete lewɔ, ambotshi wangokongela botshɔ djɛ wɔnawɔ l’osasa onkfumɔ. Ngandji kewɔ te wɔnawɔ, kengatshinda dj’iwɔ nkfulumeyɛ ndjolo inkfumɔ, l’ikanyi yɛ nama wɔnawɔ djɛnde ndjala la lowiko lɔ wɔlɔ.

¹⁶ Wopo wɔk’ɔmɔ ndeke, tonkana la tonkanola tɔ Adama la Eva wangowotshɔke la ntshamba djɛ djɔ. Kaanga oyɛwɔ nghɔsɔ, Yehova ndaakɔpaka edjinge ndaalamaka. (1 Dj. 4:19) Lá wopo wotshikitana l’ambotshi wisotepelaki lá ndjɔmbɔmba kɛso, Yehova alekɔ l’akoka wa nangha nkambo mɔtshi lá kɛnɛ kelendana la nkambo djɛsɔ. Nde amboshikikɛ lofu lɔ ndongokomɛ elando enkfumɔ wɛnyɛ wana w’anto ndjolo. (Mat. 24:36) Ngandji kɛnde kepatotshinde dj’iso nkfulumeyɛ esanga lande l’ilá kenkfumɔ kɛ nkambo djɛsɔ oyɛwɔ djonyi?

17. Wopo wɔkɔnge kɛnɛ k’otepelawɔ lá Hebero 12:2, 3 otokembɛwɔ djɛ nkfulumeyɛ?

¹⁷ Yehova atɔpɛyɛ ndjɔmbɔmba kɛ djɔ k’okfulumelo. Yeso alongaka ndjokola okfulumeyelo wɔ Ise kɛnde. Yeso akfulumeyɛka atoyi, nsɔnyi edjinge otamba wɔ ndjolo m’ɔtɛ wɔso. (Wala Hebero 12:2, 3.) Ape l’ehamo, ndjɔmbɔmba k’okfulumeyelo kɛ Yehova kɛpɛyɛka Yeso lokembo lɔ nkfulumeyɛ. Ndjɔmbɔmba kɛsɔ kekoka ntokembɛ edjinge iso.

18. Wopo wɔkɔnge 2 Pɛtɛlɔ 3:9 otokotshɛnde djɛ ndjoka eposelo wemboposa mpeyi la balentshintshi djɛ Yehova?

¹⁸ Wala 2 Pɛtɛlɔ 3:9. Yehova ndjewaka winá wɔ wɔlɔ wɔ nkomɛ andja wa nyɛtshi wanɛ. Balentshintshi djɛnde djɛpɛyɛka mbamba kɛ otshumano w’oloyi w’ekekete, miliɔ y’anto w’ɔtɛmɔla, w’olumɛ edjinge wamboyalambola tende. Iyankfumɔ walekɔ l’osasa wɔ Yehova nkfulumeyɛ tii iwɔ ndowotshɔ, ndeeka djɛ ndɔɔkɔpa edjinge ndoyalambola tende. Nkano dj’ɔsisa Yehova djɛ nkfulumeyɛ ngoleka nyɛnama wɔlɔ, winá wɔ ndongofuta miliɔ y’anto wal’anteyi kɛso wakfulumeyisa tii t’ekomo!

19. Nkano djɛkɔnge dj’oyɛso ladjɛ ndɔsa edjinge lofuto lɔkɔnge lɔ isongowa?

¹⁹ Má ndjɔmbɔmba kɛ Yehova tombeka wopo wɔ nkfulumeyɛ l’osasa. Ayale kaanga efula kɛ ndjolo edjinge k’okiyano kemboposɛ Satana, Yehova akindjɛ ngo ndjala ‘Ndjambe k’osasa.’ (1 Ti. 1:11) Edjinge iso tokoka ntshikala l’osasa winá w’okongaso la balentshintshi nkfumɔ djɛ Yehova nkinyɛ djiina djɛnde, nsela lotshungɔ lɔnde lɔ ndɔndjɛ, nkomɛ akambo wa nyɛtshi ankfumɔ edjinge ekakasano wɛso wɛ lɔɔko kɛnɛ. Nyontshɔ tɔshi nkano djɛ nkfulumeyɛ edjinge djɛ mba lokembo má ndjewaka ente Papa kɛso kel’olongo akfulumeyɛ. Ntsha iso nangha nghɔsɔ, etepela wɛnɛ wengoyala nsɔsɔlɔ le ɔm’ɔmɔ wɔ l’anteyi kɛso: ‘Osasa le onto wokindjɛ nkfulumeyɛ ehemba mande winá wɔ ndongawolama me Ndjambe, nde angowa imbandjo yɛ nkoso yɛ Yehova ndalake anto wakindjɛ ndoowoka ngandji.’—Dja. 1:12.