Lá nsɔsɔlɔ Yehova nkɔpaka djɛ anto ape wambotshukana ndjala l’osasa edjinge ndjala la djokanelo djɛ ma ma l’anteyi kɛwɔ edjinge bala djɛwɔ ntshikala lotshinda. (Mat. 19:4-6) Ntsha okombola ntshukana, wopo wɔkɔnge okokɛ ntana wadji kana wome wɔ wɔlɔ? Etengo oyɛnde Ontongi wɔsɔ, Yehova ndjewaka kɛnɛ kekokaso nangha djɛ ndjala la bala dj’osasa. Djɛkondeke, ntsha wɛ nkamba la tɔkfɔ tɔtɔpɛyɛnde, ongowa eposelo wɛ wɔlɔ. Tokolenda tɔkfɔ tɔmɔtshi.

Ntondotondo, isɔmɛlɛ ladjɛ nsipisoyɛ nkambo djɛnɛ: ‘Oloko ndeka nkete nkina nkfumɔ lokeso edjinge wolekɔ nyɛsthi efula.’ (Jɛr. 17:9) Winá w’anto ape ɔkɔpawɔ ntshukana, ko ntsha iwɔ nyɛnana edjinge ntateyɛ membɔna, ngandji kɛwɔ nkoka nfula mbala kɛkɔ kɛmɔ, ko ntsha nkambo djɛsɔ nanghema nghɔsɔ, iwɔ nkoka ndjala l’okakasano wɔ ndɔsa akano wa wɔlɔ. Ntsha anto ndɔsa nkano djɛ ntshukana lá nkilika ntondotondo mposɛ yɛwɔ, iwɔ nkoka ndokiyana l’ɔkɔngɔ. (Woo. 28:26) Djɛkondeke lako nkambo djɛ balo djɛ anto ape nyɛnyana ngandji kɛ amboleka efula má bango kana ndɔsa akano wa bala lá ntondo k’iwɔ ndjewana wɔlɔ.

Woongo 22:3 ntepelaka ante: ‘Kanga nkɛsɔ angɛnake mbalaka m’otale ko angisamake, koko kanga lopalekɔ la balo angokindjɛke ngo ntshɔ ko angɛnake ndjolo l’eposelo wɛ nyɛtshi.’ Mbalaka kɛkɔnge kekoka mposa má nkamba la wa sitɛ y’Ɛntɛrnɛtɛ djɛ mpona wadji kana wome? Yɛnyi nde, anto amɔtshi wasawolaki l’anto amɔtshi w’iyopewe wɔlɔ akambo wa bala m’Ɛntɛrnɛtɛ ko l’ɔkɔngɔ wayɛka ndewa djɛ wapalekɔ wopo w’anto w’iyakanelaka. Lonkina anto wapalekɔ la nkɔmano wambodjipolaka wa kɔntɛ djɛ ndɛlaka anto wapalekɔ la balo nfalanga. Mbala efula anto wasɔ wangotepelake ambɔ walekɔ Ewakɛ.

Tolende mbalaka kenkina. Sitɛ imɔtshi nkambaka la nonghanyi imɔtshi yel’ɔrdinatɛrɛ y’ɛnyɛ ntsha onto wɔnɛ la wɔnɛ nkoka ntshukana. Koko lá nsɔsɔlɔ, lako ekete k’ɛnyɛ djɛ nonghanyi yɛsɔ yelekɔ nsɔsɔlɔ wɔlɔ. Angoyala nkambo djɛ balo djɛ iso ndawɛkɛ lá nonghanyi yenanghisa wana w’anto ntsha iso nkɔpaka ndonga lá nkambo mɔtshi djɛ djonyi dj’etengo bala? Totayawɛkɛke kaanga ndambo daambi ta nonghanyi y’ɔdinatɛrɛ yɛ nghɔsɔ mande nonghanyi yɛsɔ ipakoke pondjo ndjɛlama la tɔkfɔ tɔ Bible—Woo. 1:7; 3:5-7.

Ikfɔ imɔtshi y’otanaso lá Woongo 14:15 ntepelaka ante: ‘Kanga enkesa angawolake etepela enkfumɔ, koko kanga balo angokanake yimba lá  djina nkfumɔ dj’otapolande.’ Lá ntondo kɛ wɛ ntshikikɛ ente onto wɔnɛ angoyala wadji kana wome wɔ wɔlɔ, wɛ ladjɛ ndowewa ntondo wɔlɔ wɔlɔ. Koko alekɔ wolo nkotshɛ nkambo djɛsɔ ntsha osawolanyo nde ngo l’Ɛntɛrnɛtɛ. Ayale kaanga onto l’onto ndjewaka akambo amɔtshi walendana la winande, kana nyondɔsaka winá efula djɛ ntomanelana wa mesajɛ, okoka ntepela ente wɛ ndjewaka onto wɔsɔ nsɔsɔlɔ? Anto amɔtshi wakanelaki ambɔ wambowa onto w’owoka ngandji kɛ nsɔsɔlɔ, wayɛka ndokiyana má kɛnɛ k’iyɛnaka winá w’iyɛnanaka l’onto wɔkɔ elongi l’elongi.

Ontshumbi yeembo ntepelaka ante: ‘Lemi mpekesanelaka isa as’engolo, edjinge lemi ndjewɔka wanɛ w’isaka wopo w’oyɛwɔ.’ (Yee. 26:4) Anto efula wangɛnake djɛ apalekɔ nyɛtshi ntepela ongolo winá wofundawɔ wayi walendana lawɔ w’ilawɔ lá wa kɔntɛ yɛwɔ djɛ ndaposɛ onto wɔ wɔlɔ. Iwɔ nkoka ndjisa nanghedji djɛwɔ djɛ nsɔsɔlɔ, kana nanghedji djɛsɔ nkoka ndjala ko djepɛnama winá wotomanelawɔ wa mesajɛ l’Ɛntɛrnɛtɛ. Anto amɔtshi nkoka ntepela ambɔ walekɔ Ewakɛ wɛ Yehova, oyɛwɔnde nsɔsɔlɔ Akristo wambolongola batisimo? Walekɔ anto wambotshunda lá nyuma? Walekɔ la djokanelo djɛ wɔlɔ la Yehova? Wangɔlɛmɛyamake me as’otshumano wɔwɔ? Ndoo, oyɛwɔnde anto wapɛyɛ ndjɔmbɔmba yɛ nyɛtshi kana ‘ntombe yɛ nyɛtshi’? (1 Kɔ. 15:33; 2 Ti. 2:20, 21) Lonkina, lá nkilika Afunelo, iwɔ walekɔ la lotshungɔ lɔ ntshukana? Wɛ ladjɛ ndjewa akambo ankfumɔ wasɔ, koko angoyala wolo djɛ ndjewa ntsha opasawolisa l’Owakɛ ɔmɔtshi w’owewa wɔlɔ wɔlɔ. (Woo. 15:22) Edjinge, lá nsɔsɔlɔ, onkambi wɔ Yehova wɔ nkɔmano apangoyala kaanga l’ikanyi yɛ ‘ntshukana’ l’onto wopalekɔ odjawodji edjinge ‘ndjala la djokanelo’ djɛ ma ma lande.—2 Kɔ. 6:14; 1 Kɔ. 7:39.

Mande mbalaka ilekɔ efula lá nkamba la sitɛ y’Ɛntɛrnɛtɛ djɛ mpona wadji kana wome, topo tɔ wɔlɔ tɔ mpona edjinge ndjewa wadji kana wome wɔkɔ wɔlɔ tolekɔ. Iya ndjena djɛkɔnge dj’okokɛ mpomana l’onto wɔ wɔlɔ w’okokɛ ndo ntshukana nyande? Winá wonanghemaki nsanghanyɛ yelá ntshandjawala, Ewakɛ wɛ Yehova nkoka ndjewa anto ankina winá w’osanghanawɔ lá nsanghanyɛ y’otshumano, nsanghanyɛ y’edjinga djinga, nsanghanyɛ yɛ rɛjɔ edjinge nsanghanyɛ inkina.

Winá wɔ nsanghanyɛ yɛ nkekete yɛsɔ iyopakoke nanghema, ndjɔmbɔmba etengo l’eleko k’opela wɔ COVID-19 wɔnɛ, iso nkambaka la telefɔnɛ, tablɛtɛ kana ɔrdinatɛrɛ djɛ ndjingela nsanghanyɛ y’otshumano. Ɔsɔ alekɔ mbamba kɛmɔtshi kɛ ndjewa wananyɔ ankina wa mpolo walekɔ Ewakɛ. Wɛ nkoka ndenda wopo w’ɔpɛyɛwɔ wa kɔmantɛrɛ l’otshumano edjinge wɔpɛyɛwɔ wamba lá nsanghanyɛ. (1 Ti. 6:11, 12) Wɛ nkoka lonkina nsawola má zoom m’ɔkɔngɔ wɔ nsanghanyɛ. Lá nsanghanyɛ y’ingela Ewakɛ wɛ Yehova lá zoom, wɛ nkoka nyɛna wopo w’onto w’oyapɛyɛ lende onanghelande anto ankina akambo edjinge kɛsɔ nkoka ndjisola nanghedji djɛnde djɛ nsɔsɔlɔ. (1 Pɛ. 3:4) M’ɔkɔngɔ, ntsha ombewa onto wɔkɔ wɔlɔ, okoka ndɛna ntsha nyolekɔ l’ekoma wɛkɔ ɛmɔ edjinge kana nyo nkoka ntshukana.

Ntsha wanɛ walekɔ mpolo mpona onto w’okoka ntshukana nyande lá wopo w’okana la tɔkfɔ telá Bible, mbala imɔtshi iwɔ nkoka mba mpeyi kɛ nyɛna nsɔsɔlɔ k’etepela wɛ Woongo wɛnɛ: ‘Onto wowa wadji wɔ wɔlɔ [kana wome wɔ wɔlɔ] ambowa ekete kɛ wɔlɔ, edjinge nde nkɔpamaka me Yehova.’—Woo. 18:22.