1. Kɛkɔnge kekoka ntoyela lá wɔɔngɔ winá w’okanelaso lá nkambo dj’onto wokana nkɛtshi?

WINÁ w’okanelaso lá nkambo dj’onto wolekɔ la nkɛtshi, tokoka ntepela ente nde alekɔ onto w’oloko wɔlɔ, w’okanaka ngandji, w’okanaka djandji lá wɔ lokapo. Ɔkɔndɔ wɔ Yeso wolendana l’ose Samariya w’oloko wɔlɔ nkoka ntoyela lá wɔɔngɔ. Mpame k’ose owila onkina kɛsɔ ayalaka la ‘nkɛtshi’ te ose Juda wɔ ase wibi yakfuse nsuke la nyɔyi. Ose Samariya wɔsɔ ‘ayalaka la nkɛtshi’ te ose Juda w’iyakɔtɛ ampota wɔsɔ ko la ngandji kenkfumɔ nde ananghaka djɛ nde mba bɔki. (Luka 10:29-37) Ndjɔmbɔmba kɛsɔ kɛnyɛ djekeka mɔtshi djɛ wɔlɔ efula djɛ Ndjambe kɛso, nkɛtshi. Ndjambe ntokaka nkɛtshi mande nde ntɔkɔpaka, edjinge angɔtɛnyɛke djekeka djɛsɔ mfu inkfumɔ lá wopo w’otonanghelande akambo.

2. Yopo inkina yɛkɔnge y’onto okokande nyɛnyɛ nkɛtshi?

² Yopo inkina y’onto okokande nyɛnyɛ nkɛtshi ilekɔ. Yopo yɛkɔnde nyimeyɛ onto wokokisa mba dilanyɛ mɔtshi. Lá yopo yɛsɔ lonkina, Yehova angotokake djandji. Ontshumbi yeembo atepelaka ante: ‘Nde apatonanghela akambo lá nkilika evunga wɛso.’ (Yee. 103:10) Koko lá winá ɛmɔtshi, Yehova nkoka mpɛyɛ onto wombonangha ovunga ɔmɔtshi dilanyɛ djɛ wolo.

3. Weepó wɛkɔnge wɔkɔpaso nkadjimola?

³ Lá djamba djɛnɛ, tongokadjimola lá weepó esato wɛnɛ: Lamo Yehova okanakande nkɛtshi? Djokanelo mɔtshi deko l’antenyɛ dilanyɛ djɛ wolo la nkɛtshi? Ko kɛkɔnge kekoka ntokotshɛ djɛ ndjala la nkɛtshi? Nyontshɔ tokolenda wopo wɔ Otepela wɔ Ndjambe okadjimolande lá weepó wɛsɔ.

4. Lamo Yehova okanakande nkɛtshi?

⁴ Yehova nkɔpaka ndjokana nkɛtshi. Ɔpɔstɔlɔ Poolo afunaka ante Ndjambe alekɔ ‘okfudji lá nkɛtshi.’ Lanɛ, Poolo atepelaka ante  Ndjambe alekɔ la nkɛtshi mande nde apɛyɛka anto wa ntshamba djɛ djɔ, ntepela ente, enkambi wɛnde w’ankfutami nkongi djɛ lowiko lɔ t’olongo. (Ɛfɛ. 2:4-7) Koko, Yehova atayala la nkɛtshi ngo le ankfutami y’avuta toko. Ontshumbi yeembo Davidɛ afunaka ante: ‘Yehova alekɔ wɔlɔ te anto ankfumɔ, edjinge nkɛtshi kɛnde nyɛnamaka lá elemo wɛnde enkfumɔ.’ (Yee. 145:9) Mande Yehova nkɔpaka anto, nde ndaawokaka nkɛtshi winá enkfumɔ w’owande elonga kɛ nangha nkambo djɛsɔ.

5. Wopo wɔkɔnge Yeso ndeeke lá kɛnɛ kelendana la nkɛtshi kɛ Yehova?

⁵ Yeso ndjewaka tii lá lɛdji lɔkɔnge lɔ Yehova ndɔkɔpaka ndjokana nkɛtshi ndeka onto onkfumɔ. Yehova nya Wɔnande wayalaka esanga l’olongo l’ilá kɛ nunu dj’ɛnɔnyi djɛ l’ɔkɔndɔ w’anto. (Woo. 8:30, 31) Lá mbamba efula, Yeso ɛnaki wopo wɔ Papa kɛnde ndokaka anto w’evunga nkɛtshi. (Yee. 78:37-42) L’elakanyelo wɛnde, Yeso atepelaki mbala efula lá kɛnɛ kelendana la djekeka djɛ Papa kɛnde djɛ wɔlɔ efula djɛsɔ.

6. Wopo wɔkɔnge Yeso ndatokotshɛ djɛ nsipisoyɛ nkɛtshi kelekɔ la Papa kɛnde?

⁶ Etengo satepelá lá djamba djemboheta, Yeso akambaka la ndjɔmbɔmba kɛ wɔna wotshwisa djɛ ntokotshɛ dj’iso nsipisoyɛ wopo wɔ Yehova ɔkɔpakande ntoka nkɛtshi lá lɛdji l’efula. Wɔna wɔsɔ aposaka má lopango ko ‘atshɔka ntoshiyɛ nkete djɛnde má lowiko lɔ mbindo l’indawikaka.’ (Luka 15:13) M’ɔkɔngɔ, nde ayapɛlaka m’ovunga wɔnde, ayakitshakitshɛka, ko akalɔka tá lopango. Papa kɛnde ndananghe mo? Olangala wɔsɔ atakonga ilá djɛ ndjewa nsakiso lá nkambo djɛsɔ. Yeso ante: ‘Ngo winá wɔ papa kɛnde ndotangela m’otale nde owokaka nkɛtshi, alotaka tende, ovundaka lá demba ko asomanaka nyande.’ Papa kɛsɔ atapɛyɛ wɔnande nsɔnyi. Koko, nde imeyɛka wɔnande la djandji nkfumɔ ko olongolaka lá nkfumbo kɛnde. Wɔna wotshwisa wɔsɔ ananghaka ovunga w’ekekete, koko mande nde ayapɛlaka, papa kɛnde owimeyɛka. Papa kelekɔ la nkɛtshi k’otepelawɔ lá ndjɔmbɔmba kɛsɔ alekɔ djingingi djɛ Yehova. Má ndjɔmbɔmba k’ekota oloko kɛsɔ, Yeso atokotshɛka djɛ nsipisoyɛ wopo wɔ Papa kɛnde oyɛnde entshupa djɛ nyimeyɛ ananghi y’evunga wayapɛla lá lɛdji lɔ nsɔsɔlɔ.​—Luka 15:17-24.

7. Wopo wɔkɔnge balo djɛ Yehova okanawɔ la nkɛtshi k’okande anto?

⁷ Yehova ntokaka nkɛtshi m’ɔtɛ wɔ balo djɛnde dj’ipa wɔsɔdjɔmba. Yehova angɔsake winá enkfumɔ ngo akano walekɔ wɔlɔ te ntongami djɛnde. Bible ntepelaka ante, ‘balo dj’imolongo ndola kfu la nkɛtshi edjinge la mbambo yɛ wɔlɔ.’ (Dja. 3:17) Ngo ngete ombotshi wɔ ngandji, Yehova ndjewaka ante enkambi wɛnde ndjokaka wɔlɔ winá w’awokande djandji. (Yee. 103:13; Iza. 49:15)  Nkɛtshi kɛ Ndjambe ndapɛyɛka nkongi kaanga oyɛwɔ anto wa ntshamba djɛ djɔ. Djɛkondeke balo djɛ Yehova djepálékɔ l’ekomo ndotshindaka djɛ nyɛnyɛ nkɛtshi kɛnde lá winá onkfumɔ w’owande elonga kɛ nangha nkambo djɛsɔ. Koko nkɛtshi kɛ Yehova kelekɔ l’elelo. Mande nde alekɔ la balo, nde apayalaka la nkɛtshi winá wɔ nkambo djɛsɔ okokawɔ mpɛyɛ onanghi w’evunga mbamba kɛ nkindjɛ nangha ovunga.

8. Nkambo djɛkɔnge djelekɔ djonyi lá winá ɛmɔtshi, ko lamo?

⁸ Kɔsa djɛ onkambi wɔ Ndjambe ɔmɔtshi amboyala l’enkfumbo kɛ nangha ovunga l’ɛkɔpa kɛnde. Onanghaso mo? Ɔpɔstɔlɔ Poolo atshindamaka me Ndjambe djɛ mfuna ante: ‘Nyotshike ndjekesanela’ lande. (1 Kɔ. 5:11) Ananghi y’evunga wapayapɛlɛ ladjɛ mposa m’otshumano. Nkambo djɛsɔ dekɔ djonyi djɛ nama wananyɔ l’ankaana yɛso yɛ nkɔmano la djɛ ndjokola mboka yɛ Yehova y’ekina. Koko, anto amɔtshi, nkoka ndjala l’okakasano wɔ ndɔsa oposelo w’onto m’otshumano etengo ilembetelo yɛ nkɛtshi kɛ Ndjambe. Oyɛwɔnde nghɔsɔ? Nyontshɔ tokolenda.

9-10. Lá nkilika onkanda wɔ Hebero 12:5, 6, lamo okokaso ntepela ente mposɛ onto wopayapɛlɛ m’otshumano alekɔ ilembetelo yɛ nkɛtshi? Pɛyɛ ndjɔmbɔmba.

⁹ Winá w’okaso ndjewo ente onto ɔmɔtshi w’ewaso, la w’ɔkɔpaso ‘apalekɔ lonkina Owakɛ wɔ Yehova,’ tongoyalake la yɛnyi efula. Tokoka ndawopola kana ayalaka djonyi dj’onto wɔso w’ɔkɔpaso mposa m’otshumano. Oposelo w’onto m’otshumano oyɛwɔnde nsɔsɔlɔ ilembetelo yɛ nkɛtshi? Ee. Ntshika mpɛyɛ dilanyɛ le onto wɔlɔmbama djɛ mba dilanyɛ, apalekɔ nkambo djɛ balo, djɛ nkɛtshi kana djɛ ngandji. (Woo. 13:24) Mposɛ onto m’otshumano, nkoka nkotshɛ onanghi w’ovunga djɛnde ntshikitanyɛ ikanyi yɛnde? Ee, nkokaka. Anto efula wananghisa evunga wɛ nkekete, wawolaka ambɔ wopo w’iyaposɛ m’otshumano, akotshɛka djɛ nsipisoyɛ ambɔ wananghaka nyɛtshi, djɛ ndapɛla la djɛ ntshikitanyɛ enanghedji kɛwɔ edjinge djɛ nkalɔ te Yehova.​—Wala Hebero 12:5, 6.

¹⁰ Tokolenda ndjɔmbɔmba kɛnɛ. Onami w’ɛnkɔkɔ ɔmɔtshi ambisola djɛ ɔnkɔkɔ wɔnde ɔmɔtshi alekɔ l’olando. Nde ndjewaka ante djɛ nde nsakela olando wɔsɔ, ndɔmbamaka djɛ nkakitola ɔnkɔkɔ wɔsɔ l’ɛnkɔkɔ enkina. Koko, ɛnkɔkɔ walekɔ ntongami djewikaka l’oloyi. Iwɔ nkɔpaka ndjala l’osanga edjinge iwɔ nkoka ndjangɔ ntsha wambakakitola. Kɛsɔ nyɛnyɛka djɛ, onami w’ɛnkɔkɔ wɔsɔ alekɔ wayi wolo kana kanga lopango ntsha nde ambokakitola ɔnkɔkɔ wɔsɔ l’enkina? Lako. Nde ndjewaka ante, ntsha nde ntshika ɔnkɔkɔ wolekɔ l’olando esanga l’ɛnkɔkɔ enkina, wangosambela olando. Má ndakakitola l’ɔnkɔkɔ wolekɔ l’olando, nde angolama oloyi w’ɛnkɔkɔ wombotshikala.​—Ɛdjɛ la Ase lewi 13:3, 4.

11. a) Lá topo tɔkɔnge onto womboposa m’otshumano ɛlamande l’ɔnkɔkɔ wolekɔ l’olando? b) Kɛkɔnge kɛ anto wamboposa m’otshumano okokawɔ nangha, ko okotshɔ wɔkɔnge w’okokawɔ mba?

¹¹ Iso nkoka ndjɛdjɛ Okristo w’omboposa m’otshumano, l’ɔnkɔkɔ wolekɔ l’olando. Nde alekɔ l’olando lá nyuma. (Dja. 5:14) Ngo ngete elando ɛmɔtshi welá demba, elando welá nyuma nsambeyanaka. Djɛkondeke alekɔ djonyi lá mbamba imɔtshi mposɛ onto wolekɔ l’olando lá nyuma m’otshumano. Dilanyɛ djɛsɔ, alekɔ ilembetelo yɛ ngandji kɛ Yehova te ase otshumano wɔ Nde walekɔ la nkɔmano, edjinge djekoka nkotshɛ onanghi w’ovunga djɛ nsipisoyɛ ante ananghaka ovunga la ndootshinda djɛ nde ndapɛla. Kaanga amboposa m’otshumano, onto nkoka ndjingelaka lá nsanghanyɛ djɛ nde mbaka elakanyelo wimá Bible wekoka ndokotshɛ djɛ nkembɛ djawo djɛnde lonkina. Nde alekɔ lonkina la lotshungɔ lɔ mba enkanda djɛ nde nkambaka la wɛkɔ nyɔmɛlɛ edjinge ndenda wa emisiɔ wɛ JW Televisiɔ^®. Edjinge winá wɔ tokokolo ɛnawɔ ambɔ nde anangha etshikitano, iwɔ nkoka ndɔpɛyɛ alako la ɛlɔndjɛlɔ winá la winá djɛ ndokotshɛ djɛ nde ndjala  lonkina la lonyuma lɔ wɔlɔ la nkalɔ l’otshumano etengo Owakɛ wɔ Yehova. *

12. Nkambo djɛkɔnge djɛ ngandji la djɛ nkɛtshi tokokolo okokawɔ nanghela onanghi w’ovunga wopayapɛlɛ?

¹² Alekɔ djonyi mvungɔka ente ngo onanghi w’ovunga wopayapɛlɛ ndeke loposaka m’otshumano. Tokokolo ndjewaka ambɔ iwɔ ladjɛ ntɔnɔla efula la nkɔmɛ nkfumɔ lá ntondo kɛ ndɔsa nkano djɛ mposɛ onto m’otshumano. Iwɔ ndjewaka ambɔ Yehova mpɛyɛka dilanyɛ ‘lá lɛdji l’ɛdje.’ (Jɛr. 30:11) Iwɔ nkɔpaka wananyɔ wawɔ, edjinge iwɔ wapakɔpɛ nangha nkambo nkfumɔ djekoka ndananghela nyɛtshi lá nyuma. Koko lá winá ɛmɔtshi, nkambo djɛ ngandji edjinge djɛ nkɛtshi djokokawɔ nanghande, mposɛ onto m’otshumano l’ilá k’etsho ɛmɔtshi.

13. Lamo Okristo ɔmɔtshi welá Kɔrɛtɔ ndayale ladjɛ mposa m’otshumano?

¹³ Tɔkɔtɔnɔla lá wopo w’ɔpɔstɔlɔ Poolo ndananghela onanghi w’ovunga ɔmɔtshi wɔ l’ɛtɛndɔ kɛ ntondo wotayapɛla akambo. Okristo ɔmɔtshi wɔ lá Kɔrɛtɔ ananghaki akambo wa pɔlɔ wa ntshɛngi nya wadjɛ papa kɛnde. Ɔsɔngo nkambo djɛsɔ wɛnyɛnyɛ! Poolo ewaki ante, Yehova ashimelaka ase Isariyɛlɛ w’etsho wɛ ntondo ante: ‘Mpame kesanga mbeto nya wadjɛ papa kɛnde, ambɔpɛyɛ papa kɛnde nsɔnyi. Yape kɛkɔ ladjɛ ndjakema ipa l’ehamo.’ (Lew. 20:11) Lá nsɔsɔlɔ, Poolo atatepela djɛ mpɛyɛ onto wɔsɔ dilanyɛ djɛ nyɔyi. Koko nde ashimelaka ase Kɔrɛtɔ djɛ ndoposɛ m’otshumano. Enanghedji kɛ nyɛtshi kɛ mpame kɛsɔ kayalaki l’eposelo wɛ nyɛtshi te anto ankina wel’otshumano, amɔtshi l’anteyi kɛwɔ watakanelaki kaanga ambɔ ɔsɔ alekɔ ovunga w’ekekete!​—1 Kɔ. 5:1, 2, 13.

14. Wopo wɔkɔnge Poolo ndɛnyɛ nkɛtshi kɛnde te mpame keposisa m’otshumano k’ose Kɔrɛtɔ, ko lamo? (2 Kɔrɛtɔ 2:5-8, 11)

¹⁴ M’ɔkɔngɔ, Poolo ayɛka ndoka djɛ etshikitano ɛmɔtshi wɛ wɔlɔ wenanghemaka. Onanghi w’ovunga wɔsɔ ayapɛlaka lá lɛdji lɔ nsɔsɔlɔ! Kaanga mpame kɛsɔ ndapɛyɛ otshumano nsɔnyi, Poolo ashimelaka tokokolo dj’ipa iwɔ ndjala ‘wayi wolo amboleka.’ Nde ashimelaka ante: ‘Nyo ladjɛ ndjala entshupa djɛ ndowimeyɛ la djɛ ndokembɛ.’ Kolenda lamo Poolo ndatepela dj’iwɔ nangha nghɔsɔ: ‘Dj’ipa yɛnyi y’efula yelekɔ lande ndonanghela nyɛtshi.’ Poolo okaka mpame keyapɛlisa kɛsɔ nkɛtshi. Ɔpɔstɔlɔ atakɔpa mpame kɛsɔ ndakiyanyɛ amboleka, ko ndoyananghela nyɛtshi m’ɔtɛ wɔ kɛnɛ kindananghe la ndotshika mpona imeyelo.​—Wala 2 Kɔrɛtɔ 2:5-8, 11.

15. Wopo wɔkɔnge tokokolo ɔpɛyɛwɔ dilanyɛ djɛ wolo la oyalawɔ la nkɛtshi lá winá wɔk’ɔmɔ?

 ¹⁵ Lá ndjɔmbɔmba kɛ Yehova, tokokolo nkɔpaka ndjala la nkɛtshi. Iwɔ mpɛyɛka dilanyɛ djɛ wolo winá wolekɔ djonyi koko ndjalaka la nkɛtshi ntsha elonga kɛ nangha nkambo djɛsɔ kelekɔ. Ntsha lako, mbɔ apangoyala nkɛtshi lonkina koko yongoyalande ndjipa wiso lá nyɛtshi. Lasɔ ngo tokokolo toko, ndeke lolekɔ la djonyi djɛ ndjala la nkɛtshi?

16. Lá nkilika Woongo 21:13, kɛkɔnge kɛ Yehova onanghelande wanɛ wapoke anto ankina nkɛtshi?

¹⁶ Okristo onkfumɔ ladjɛ mpona ndjokola nkɛtshi kɛ Yehova. Lamo? Elonga kɛmɔtshinde, Yehova apangekameyɛ anto anfkumɔ wapalekɔ la nkɛtshi te anto ankina. (Wala Woongo 21:13.) Sankfumɔ topangɔkɔpa djɛ Yehova ntona ndjoka ndɔmbɔ yɛso, djɛkondeke iso ladjɛ mbadjɛ dj’ipa ndjala l’oloko wolo. L’edjena kɛ ndjipa atoyi lá ndjolo yɛ winaso Okristo, iso ladjɛ ndjalaka entshupa winá enkfumɔ djɛ ndjekameyɛ ‘delo djɛ intantemba.’ Wopo wɔk’ɔmɔ ndeke, iso nanghaka la wolo djɛ ndjila yimba lá dako djemá Afunelo djɛnɛ: ‘Onto wopokana nkɛtshi apangolomboyama la nkɛtshi.’ (Dja. 2:13) Ntsha l’okitshakitshɛ onkfumɔ iso mvungɔka wopo woyɛso la djonyi dj’iwɔ ntoka nkɛtshi, tongoleka ndjala entshupa djɛ ndjoka anto ankina nkɛtshi. Iso nkɔpaka nyɛnyɛ nkɛtshi kɛso pekapeka winá wɔ onanghi w’ovunga amboyapɛla ko ambokalɔ l’otshumano.

17. Wopo wɔkɔnge Nkfumi Davidɛ ndɛnyɛ ante nde okanaki nkɛtshi kɛ m’anse oloko?

¹⁷ Ndjɔmbɔmba y’otanaso lá Bible nkoka ntokotshɛ dj’iso ndjokana nkɛtshi la ndjewɔ ndjala l’oloko wolo. Tɔkɔtɔnɔla lá ndjɔmbɔmba kɛ Nkfumi Davidɛ. Mbala la mbala nde okanaki nkɛtshi kɛm’anse oloko. Kaanga Saolo ndakɔpaka ndoyaka, Davidɛ ayalaka la nkɛtshi te nkfumi kɛsɔnamisa me Ndjambe, nde atahona ndɔsɔmbɔla kana ndonanghela nyɛtshi kaanga ndambo daambi.​—1 Sa. 24:9-12, 18, 19.

18-19. Lá mbamba ipe yɛkɔnge yɛ Davidɛ ndotayala la nkɛtshi?

¹⁸ Koko, Davidɛ atayalaki la nkɛtshi winá enkfumɔ. Ndjɔmbɔmba, winá wɔ Nabala, mpame kɛ wayi wolo ndatepela l’ɔsɛndji onkfumɔ la ndatone mpɛyɛ Davidɛ nya anto wande nkete ndjɛ ndɛ, Davidɛ omalaka ko ɔsaka nkano djɛ ntoyaka mpame kɛsɔ nya anto ankfumɔ welá mvulu kɛnde. Mpeyi la nkambo djɛ wɔlɔ djenanghisa Abigayɛlɛ wadjɛ Nabala ipa la ntshatshimba, ndeke Davidɛ ndotawɛmba odjito w’ekila.​—1 Sa. 25:9-22, 32-35.

¹⁹ Lá mbamba kenkina, ɔprɔfɛtɛ Natana akɔndɔlaka Davidɛ ɔkɔndɔ wɔ mpame kɛmɔtshi k’okfudji kepapolisa kanga ɔmvɔ ɔnkɔkɔ wɔnde ɔmɔ wɔ ndakɔpaka efula. La nkɛlɛ kenkfumɔ, Davidɛ akadjimolaka ante: ‘Etengo Yehova oyɛnde la lowiko, mpame kenanghisa nkambo djɛsɔ ɛdje djɛ ndjakema!’ (2 Sa. 12:1-6) Davidɛ ewaki Ɛlɛmbɛ wɛ Mɔsɛ. Onto wɔngɔlaki ɔnkɔkɔ ɔmɔ, ayalaki la djɛ nsɔmbɔla ɛnkɔkɔ ɛnɛyi. (Epo. 22:1) Koko nde ayalaki ladjɛ ndjakema? Etepela wɛsɔ wɛnyɛka djɛ nde ayalaka l’oloko wolo. Lá nsɔsɔlɔ, Natana akambaka l’ɔkɔndɔ wɔsɔ djɛ nkotshɛ Davidɛ djɛ nde nsipisoyɛ evunga wɛ nkekete wɛ ndananghe! Ko Yehova ayalaka la nkɛtshi efula te Davidɛ, nkɛtshi kelekisa kaanga kɛ Davidɛ ndakokɛ ndjala  la kɛkɔ te wibi w’ɔnkɔkɔ welá ndjɔmbɔmba kɛ Natana!​—2 Sa. 12:7-13.

20. Olakanyelo wɔkɔnge w’okokaso mba má ndjɔmbɔmba kɛ Davidɛ?

²⁰ Ɔmbɛna ente winá wɔ Davidɛ ndayale la nkɛlɛ, nde ɔsaka nkano djɛ ndjaka Nabala nya anto welá mvulu kɛnde. Edjinge m’ɔkɔngɔ, Davidɛ ayalaka entshupa djɛ ntepela ante mpame k’okfudji kelá ndjɔmbɔmba kɛ Natana ɛdje djɛ ndjakema. Lá nkambo dj’ape djɛnɛ, tokoka ndawopola lamo mpame k’oloko wɔlɔ kɛsɔ ndakoke ndjala wayi wolo nghɔsɔ. Tɔkɔtɔnɔla lá kɛnɛ kekomelisa Davidɛ ntondo kɛ lasɔ. Lá mbamba kɛsɔ, nkfum’oloko kɛ Davidɛ kɔwɛmbɛki lowo. Ntsha onto ɔmɔtshi ndomboyɛka anto la wayi wolo nghɔsɔ, ɔsɔ alekɔ ilembetelo y’ɛnyɛ djɛ nde apalekɔ la lonyuma lɔ wɔlɔ. Nangha akambo lá yopo yetshikitanyi ndeke wɔlɔ. Yeso ewolaka ambeki wande ante: ‘Nyɔkɔmbɛ ndomboyɛ dj’ipa iwɔ nyolomboyɛ, mande wopo wolomboyɛnyo anto ankina, ndeke yongonyolomboyɛ edjinge nyo.’ (Mat. 7:1, 2) Djɛkondeke iso ladjɛ nangha la wolo dj’ipa ndjala l’oloko wolo koko ndjala ‘okfudji lá nkɛtshi’ etengo Ndjambe kɛso.

21-22. Lá akambo amɔtshi wakɔnge w’okokaso nyɛnyɛ ente iso ndjokanaka nkɛtshi?

²¹ Ntsha tolekɔ la nkɛtshi topangokoma ngo la ndjoka anto ankina djandji toko. Lá nsɔsɔlɔ, onto wolekɔ la nkɛtshi ‘nkotshɛka anto ankina.’ Lasɔ isankfumɔ nkoka mpona la nkɔmɛ nkfumɔ wanɛ walekɔ la djonyi dj’okotshɔ lá nkfumbo kɛso, l’otshumano wɔso, edjinge lá toloyi tɔso. Ee tongotana mbamba efula yɛ nyɛnyɛ nkɛtshi kɛso! Onto ɔmɔtshi alekɔ la djonyi dj’osukɔ? Ape tokoka ndɔpɛyɛ okotshɔ wɛnama, ma ndɔpɛyɛ nkete djɛ ndɛ kana ndonanghela nkambo mɔtshi djengokotshɛ? Okristo ɔmɔtshi wombokalɔ l’otshumano, alekɔ la djonyi djokotshɔ wɔ ndjala la tolongo tɔ wɔlɔ tongokembɛka? Topakoke mpoposanyɛ losango lɔ wɔlɔ lokembɛ le anto ankina? Ɔsɔ alekɔ topo tɔmɔtshi tɔ wɔlɔ tokokaso nyɛnyɛ nkɛtshi kɛso te onto onkfumɔ wopomana laso.​—Djɔ. 29:12, 13; Ɔrɔ. 10:14, 15; Dja. 1:27.

²² Ntsha tombewa ente anto amɔtshi walekɔ la djonyi dj’okotshɔ, tongosipisoyɛ ente mbamba yɛ nyɛnyɛ nkɛtshi kɛso te anto ankfumɔ watodjingi yelekɔ. Ɔsɔngo sɔngɔpɛyɛ Papa kɛso kel’olongo, Ndjambe kelekɔ ‘okfudji lá nkɛtshi’ osasa winá wɔ sɔngɛnyɛka nkɛtshi kɛso te anto ankina!