1. Ngandji kɛ Ndjambe ntotshindaka dj’iso ndaawoka ngete mo?

ƆPƆSTƆLƆ Djɔanɛ afunaka ante ‘Ndjambe nde ngandji.’ (1 Dj. 4:8) Totepela tɔ djonyi tɔsɔ, ntovungolaka nsɔsɔlɔ kɛ djonyi efula: Ndjambe ikɔkɔ yɛ lowiko, alekɔ lonkina ikɔkɔ yɛ ngandji. Yehova ntɔkɔpaka! Ngandji kɛnde ntokotshɛka dj’iso ndaawoka ente tolekɔ l’edjena kɛ vu, tolekɔ l’osasa edjinge ndaawoka etengo anto wapasambe kaanga ekete.

2. Lá nkilika Mateo 22:37-40, ɛlɛmbɛ wɛkɔnge weleka nkekete, iya ko lamo okokaso ndjala l’okakasano wɔ nɛmɛyɛ ɔlɛmbɛ w’ape?

² Le Akristo, nkɔpa anto ankina apalekɔ nkambo dj’okokawɔ nangha ngo ntsha wambɔkɔpa. Koko, alekɔ ɔlɛmbɛ w’oyɛso ladjɛ nangha. (Wala Mateo 22:37-40.) Ntsha tombewa Yehova wɔlɔ wɔlɔ, nkoka ndjala wɔndju leso djɛ nɛmɛyɛ ɔlɛmbɛ wɔ ntondo. Alekɔ nghɔsɔ, ladjikɛnde Yehova alekɔ djɔ, nde ndaakiyanyɛka nkambo djɛso, edjinge ntonanghelaka akambo la ngandji. Koko tokoka ndjala l’okakasano djɛ nɛmɛyɛ ɔlɛmbɛ w’ape. Lamo? Mande wananyɔ l’ankaana yɛso, yelekɔ l’anteyi kɛ winaso anto wa Bible otepelande lánɛ, walekɔ anto wa ntshamba djɛ djɔ. Lá wina ɛmɔtshi, iwɔ nkoka ntoshimela edjinge ntonanghela akambo wakoka ntotshinda dj’iso ndaawoka etengo wapayakiyanyɛ lá nkambo djɛso edjinge wapatɔkɔpɛ. Yehova ewaka ante tongoyala l’okakasano wɔsɔ, djɛkondeke ndakambe l’anto amɔtshi wafunisa Bible, dj’iwɔ ntolakanyɛ lamo alekɔ djonyi iso nkɔpana edjinge wopo w’okokaso nkɔpana l’anteyi kɛso. Djɔanɛ alekɔ ɔmɔtshi wɔ l’anteyi kɛ anto wasɔ.​—1 Dj. 3:11, 12.

3. Kɛkɔnge kɛ Djɔanɛ ndakɔkɔmɛ?

³ Lá efunelo wɛnde, Djɔanɛ akɔkɔmɛka ante Akristo ladjɛ ndjokana ngandji. Djɛkondeke, lá evanjilio wɔnde wɔ ndakɔndɔla lowiko  lɔ Yeso, Djɔanɛ akambaka la totepela ‘ngandji’ kana ‘ndjokana ngandji’ ndeka l’Evanjilio enkina. Djɔanɛ ayalaka l’ɛnɔnyi etengo lokama, wina wɔ ndafunaka Evanjilio wɔnde edjinge enkanda wɛnde esato. Enkanda welá Bible wɛsɔ ntolakanyɛka ambɔ Okristo ladjɛ ntshindama la ngandji djɛ nangha kɛnɛ k’ɔkɔpande nangha. (1 Dj. 4:10, 11) Koko, alɔmbamaka ndambo k’etsho djɛ Djɔanɛ ndewa olakanyelo wɔsɔ.

4. Oyɛwɔ mo, Djɔanɛ ɛnyɛki anto ankina ngandji wina enkfumɔ?

⁴ Wina wɔ Djɔanɛ ndayalaka ilɛngɛ, nde ayalaki l’okakasano wɔ nyɛnyɛ anto ankina ngandji. Djɔmbɔmba, mbala kɛmɔtshi Yeso nya ambeki wande wananghaka lɔkɛndɔ má Ngalile tá Samariya. Ase mbandja kɛmɔtshi kelá Samariya watonaka ndangola. Iyako Djɔanɛ ndananghe nge? Nde alɔmbaka Yeso djɛ nkitshɛ iyɛ m’olongo djɛ ntshumba anto ankfɔmɔ welá mbandja kɛsɔ! (Luka 9:52-56) Lá mbamba kenkina, Djɔanɛ atɛnyɛ winande apɔstɔlɔ ngandji. Nde nya wɔnanyɛnghɛnde washimelaka nyɛnghɛwɔ mbala imɔtshi, djɛnde ntɔlɔmba Yeso djɛ ndaapɛyɛ mpipo kɛ djonyi lá Onkfumi wɔnde. Wina wɔ apɔstɔlɔ ankina iyaye ndisola nkambo djenanghisa Djakɔbɔ nya Djɔanɛ ntshɔ, iwɔ womalaka efula! (Mat. 20:20, 21, 24) Koko kaanga Djɔanɛ ndananghe evunga enkfumɔ wɛsɔ, Yeso akindjɛka ngo ndɔɔkɔpa.​—Dj. 21:7.

5. Kɛkɔnge k’ɔkɔpaso nyɛna lá djamba djɛnɛ?

⁵ Lá djamba djɛnɛ, tongoshishima lɔ ndjɔmbɔmba kɛ Djɔanɛ, edjinge akambo amɔtshi windafune walendana la ngandji. Wina w’isotananghe nkambo djɛsɔ, tongeka wopo w’okokaso nkɔpa wananyɔ l’ankaana yɛso. Tɔngɛna lonkina yopo imɔtshi yɛ djonyi efula yɛ owandji wɔ nkfumbo okokande nangha djɛ nyɛnyɛ djɛ nde nkɔpaka nkfumbo kɛnde.

6. Wopo wɔkɔnge Yehova ndɛnyɛ djɛ nde ntɔkɔpaka?

⁶ Mbala efula tongokanelake ente djɛ nyɛnyɛ anto ankina ngandji aleko djonyi ngo ndjala l’ikanyi yɛ wɔlɔ te wɔ edjinge ndashimelaka etepela wɛ wɔlɔ. Koko dj’iso nyɛnyɛ ente ngandji kɛso kelekɔ kɛ nsɔsɔlɔ, iso ladjɛ nyɛnyɛ má nanghedji djɛso. (Ɛdjɛ la Djakɔbɔ 2:17, 26.) Ndjɔmbɔmba, Yehova ntɔkɔpaka. (1 Dj. 4:19) Edjinge nde ntɛnyɛka ngandji kɛnde má etepela wɛ wɔlɔ welekɔ lá Bible. (Yee. 25:10; Ɔrɔ. 8:38, 39) Koko, iso ndashikikɛka ente Ndjambe ntɔkɔpaka, apengo má kɛnɛ k’otoshimelande toko, koko edjinge má kɛnɛ k’otonanghelande. Djɔanɛ afunaka ante: ‘Má nkambo djɛnɛ ndeke ngandji kɛ Ndjambe iyɛnama leso, mande Ndjambe atomaka ɛtɔyi kɛnde kɛ Wɔna kewotshwisa l’andja, dj’iso mba lowiko má lotshimbo lɔnde.’ (1 Dj. 4:9) Yehova awolaka djɛ Wɔnande wɔ ngandji nyɛna ndjolo edjinge mvɔ ngo lá nkambo djɛso. (Dj. 3:16) Nkambo djɛsɔ djepatoshikikɛ ente Yehova ntɔkɔpaka?

7. Kɛkɔnge kenanghisa Yeso djɛ nyɛnyɛ ante nde ntɔkɔpaka?

 ⁷ Yeso ashimeleka ambeki wande ante nde ndaakɔpaka. (Dj. 13:1; 15:15) Nde ɛnyɛka djɛ nde ndaakɔpaka edjinge ntɔkɔpaka iso apengo má kɛnɛ kɛ ndatepelaka toko, koko edjinge má kɛnɛ kɛ ndananghaka. Yeso atepelaka ante: ‘Lako onto wolekɔ la ngandji keleka kɛnɛ, kɛ onto mpɛyɛ anima wande lá nkambo djɛ tolongo tɔnde.’ (Dj. 15:13) Wina w’okanelaso lá kɛnɛ kɛ Yehova nya Yeso iyatonanghela, kɛkɔnge k’otshindamaso djɛ nangha?

8. Kɛkɔnge ketepala 1 Djɔanɛ 3:18 k’oyɛso ladjɛ nangha?

⁸ Iso nyɛnyɛka ente iso nkɔpaka Yehova nya Yeso má wopo w’alɛmɛyɛso. (Dj. 14:15; 1 Dj. 5:3) Edjinge, Yeso atilelaka ɔlɛmbɛ w’iso nkɔpa anto ankina. (Dj. 13:34, 35) Iso ladjɛ nyɛnyɛ ngandji kɛso te wananyɔ l’ankaana yɛso apengo má etepela toko, koko iso ladjɛ nyɛnyɛ edjinge má nanghedji djɛso ente, iso ndaakɔpaka. (Wala 1 Djɔanɛ 3:18.) Akambo amɔtshi wakɔnge wa kɔɔ w’okokaso nangha djɛ nyɛnyɛ ente iso ndaakɔpaka?

9.Ngandji iyatshinde Djɔanɛ djɛ nangha nge?

⁹ Djɔanɛ akokaka ntshikala nya papa kɛnde, ko mbaka nfalanga m’olemo wɔ nkfumbo kɛwɔ wɔ nsaka ndjale. Koko l’edjena kɛ nde nangha nghɔsɔ, nde alambolaka lowiko lɔnde djɛ nkotshɛka anto ankina dj’iwɔ ndjewa akambo wa nsɔsɔlɔ walendana la Yehova nya Yeso. Yopo yɛ lowiko lɔ Djɔanɛ ndasɔnɛ lɔsɔ, lotayala wɔdju. Nde ɛnaka ndjolo edjinge t’ekomo kɛ eleko kɛ ntondo, wina wɔ ndakome ekokolo, wɔtɔlaka tá lokando. (Ele. 3:1; 4:1-3; 5:18; Ndj. 1:9) Kaanga ndadjipama lá lokando m’ɔtɛ w’olemo w’ipoposanyɛ wolendana la Yeso, Djɔanɛ akindjɛka nyɛnyɛ ante nde ndaakiyanyɛka nkambo dj’anto ankina. Djɔmbɔmba, wina windayalaka lá ntshanga djɛ Patɛmosɛ, nde afunaka wɛnɛlɔ wɛ ndɛnyi edjinge atomelaka ntshumano dj’iwɔ ndjewa ‘akambo wayalisa ladjɛ nanghema lako ilá.’ (Ndj. 1:1) Mbala imɔtshi, m’ɔkɔngɔ wɔnde ntshungɔ má Patɛmosɛ, Djɔanɛ afunaka Evanjilio wɛkɔndɔla lowiko edjinge olemo wɔ Yeso. Nde afunaka enkanda esato lonkina djɛ nsuka la nkembɛ wananyɔ wande. Wopo wɔkɔnge okokɛ ndjokola lowiko lɔ ndaapekala lɔ Djɔanɛ lɔsɔ?

10. Wopo wɔkɔnge okokɛ nyɛnyɛ ente wɛ nkɔpaka anto?

¹⁰ Wɛ nkokaka nyɛnyɛ ente wɛ nkɔpaka anto ankina má kɛnɛ k’ɔsɔnɛ djɛ nangha lá lowiko lɔɔko. Andja wa Satana ɔkɔpawɔnde wɛ mpetshɛ wina wɛko enkfumo edjinge wolo wɔko onkfumo ngo lá nkambo djɛko nghɔmɛlɛ, djɛ mpona djɛ ndjala la nfalanga efula kana ndjala onto wɔ lomo efula. Koko l’edjena kɛ nangha nghɔsɔ, ansakodji y’Onkfumi yel’andja w’otondo, ndaapekalaka edjinge mpetshɛka wina wɛwɔ djɛ nangha kenkfumɔ k’okokawɔ nangha djɛ mpoposanyɛ losango lɔ wɔlɔ edjinge nkotshɛ anto ankina dj’iwɔ malema Yehova. Amɔtshi mpoposanyɛka edjinge ndakanyɛka etengo ansakodji yɛ wina enkfumɔ.

11. Wopo wɔkɔnge efula k’ansakodji yɛ nkɔmano ɛnyɛwɔ ambɔ iwɔ nkɔpaka Yehova la wananyɔ l’ankaana yɛwɔ?

¹¹ Efula k’Akristo wa nkɔmano ladjɛ ndaapɛyɛ djɛ nkamba elemo welá demba djɛ ndaakotshɛ iyɔmɛlɛ la nkotshɛ ankfumbo yɛwɔ. Koko, kaanga oyɛwɔ nghɔsɔ, ansakodji yɛ nkɔmano yɛso nanghaka kenkfumɔ k’okokawɔ nangha djɛ nsuka olonghanyelo wɔ Ndjambe. Ndjɔmbɔmba, amɔtshi ndaapɛyɛka djɛ nsuka wina woposa mbalaka, ankina nkotshɛka l’olemo w’opikelo, edjinge onto onkfumɔ mbaka mbamba kɛ mpɛyɛ epapɛyɛ wɛ l’ɛkɔpa djɛ nsuka olemo wel’andja w’otondo. Iwɔ nanghaka akambo ankfumo wasɔ, ladjikɛnde iwɔ nkɔpaka Ndjambe edjinge winawɔ anto. Lobengo tshɛ, iso nyɛnyɛka ambɔ iso nkɔpaka wananyɔ l’ankaana má ndjingelaka lá nsanghanyɛ yelá otshumano edjinge mpɛyɛka wa kɔmantɛrɛ. Kaanga tɔmbɔlɛmba,  iso nanghaka la wolo djɛ ntanema lá nsanghanyɛ yɛsɔ. Kaanga isombotshimba yimba lá wopo wɔkɔnge, iso mpɛyɛka kɔmantɛrɛ. Edjinge kaanga isankfumɔ oyɛso l’ekakasano wɛso isɔmɛlɛ, iso nkeketshɛka anto ankina lá ntondo kana l’ɔkɔngɔ wɔ losanghanyɛ. (Heb. 10:24, 25) Tolekɔ la djedjɛ efula le wananyɔ l’ankaana yɛso yɛ ngandji efula l’elemo wɛwɔ w’onanghawɔ wɛsɔ!

12. Yopo inkina yɛkɔnge yɛ Djɔanɛ ndɛnyɛka ngandji te wananyɔ l’ankaana yɛnde?

¹² Djɔanɛ ɛnyɛka ngandji te wananyɔ l’ankaana yɛnde, ape ngo má ndaawandola toko koko edjinge má ndaapɛyɛ alako. Ndjɔmbɔmba, lá enkanda wɛnde, Djɔanɛ awandolaka wananyɔ l’ankaana má djawo djɛwɔ edjinge má elemo wɛwɔ wɛ wɔlɔ, koko lonkina nde apɛyɛka alako wa nsɔsɔlɔ lá nkambo dj’evunga wɛwɔ. (1 Dj. 1:8–2:1, 13, 14) Wopo wɔk’ɔmɔ ndeke, iso ladjɛ mbandolaka wananyɔ l’ankaana l’akambo wa wɔlɔ w’onanghawɔ. Koko ntsha ɔmɔtshi ambotateyɛ ndjala l’enkfumbo kɛ nyɛtshi, kana nangha nkambo mɔtshi djekoka ntshita djokanelo djɛnde nya Yehova, iso nkoka ndɔpɛyɛ ndako la ngandji kenkfumɔ djɛ nde ntshikitanyɛ enanghedji kɛnde. Ngo ndjala l’oloko wolo djɛ mpɛyɛ ilongo dako, koko Bible ntepelaka ante tolongo tɔ nsɔsɔlɔ ndjilanaka mpɛ iyɔmɛlɛ iyɔmɛlɛ ntepela ante, mpɛyanaka alako l’anteyi kɛwɔ.​—Woo. 27:17.

13. Kɛkɔnge kɛ isopakoke nanghaka?

¹³ Mbala imɔtshi, iso nyɛnyɛka ngandji kɛso te wananyɔ l’ankaana yɛso má kɛnɛ kisopananghaka. Ndjɔmbɔmba, topakoke ndjokaka nkɛlɛ lankeke lá kɛnɛ k’otepelawɔ. Kokanela lá kɛnɛ keposisa lá ekomo kɛ lowiko lɔ Yeso lanɛ lá looko. Nde ashimelaka ambeki wande ante dj’iwɔ mba lowiko, ngo iwɔ ndɛ demba djɛnde la nnɔ ekila wɛnde. (Dj. 6:53-57) Etepela wɛsɔ waakiyanyɛka efula ko ambeki efula wolotaka, koko tolongo tɔnde tɔ nsɔsɔlɔ ndjila edjinge Djɔanɛ watolotá. Ambeki wande wa nkɔmano wamalemaka ngo lande. Iwɔ watasipisoyɛ kɛnɛ kɛ Yeso ndakɔpɛ ntepela, edjinge mbala imɔtshi iwɔ wakamɔka nkambo djɛsɔ. Koko tolongo tɔ nkɔmano tɔsɔ, watɔsa djɛ kɛnɛ kɛ Yeso ndatepela kelekɔ nyɛtshi edjinge watomala l’ɔtɛ wɔ nkambo djɛsɔ, iwɔ wayawɛkɛka tende ladjikɛnde iwɔ ndjewaka ambɔ nde ntepelaka nsɔsɔlɔ. (Dj. 6:60, 66-69) Nsɔsɔlɔ, angoyala djonyi efula dj’ipa iso nyomalaka lankeke lá kɛnɛ kɛ tolongo tɔso otepelawɔ! Koko, tongapɛyɛ mbamba kɛ nsipisoyɛ kɛnɛ k’ɔkɔpawɔ ntepela.​—Woo. 18:13; Los. 7:9.

14. Lamo isopakoke ndjawola djɛ lotono mpikama lá eloko wɛso?

¹⁴ Djɔanɛ atokembɛka lonkina dj’ipa iso  ndjala la lotono te wananyɔ l’ankaana. Ntsha topakambe la dako djɛsɔ, tongotshikela Satana mboka djɛnde ntɔlɔndjɛ. (1 Dj. 2:11; 3:15) Kɛsɔndeke kɛnɛ kekomelisa anto amɔtshi wasɛnaki t’ekomo kɛ eleko kɛ ntondo lá Ɛ.K. Satana ananghaka la wolo djɛ ndjila lotono djɛ nkapola enkambi wɛ Ndjambe. Wina wɔ Djɔanɛ ndafunaka enkanda wɛnde, ampame imɔtshi wayalaki la tokanyi t’etengo tɔ Satana, wingelaka l’otshumano. Ndjɔmbɔmba, Diotrɛfɛ kanga l’ilisa djatanelo l’otshumanelo ɔmɔtshi. (3 Dj. 9, 10) Nde atalɛmɛyɛki iloyi yɛ lɔndjɛ. Nde ahonaka mposɛ kaanga wanɛ w’ɔsaki iloyi yɛ londjɛ la nɛmɔ m’otshumano. Ɔsɔ ng’otako! Edjinge lɔɔko kɛnɛ, Satana anangha la wolo djɛ ndjatola enkambi wɛ Ndjambe. Djɛkondeke, totawolake djɛ lotono ntokapola.

15. Kɛkɔnge kɛ ewandji wɛ nkfumbo oyɛwɔ ladjɛ mvungɔka?

¹⁵ Yopo imɔtshi yɛ djonyi yɛ owandji wɔ nkfumbo ɛnyɛnde djɛ nde nkɔpaka nkfumbo kɛnde nde, ndaakotshɛ ehomba wɛwɔ welá demba. (1 Ti. 5:8) Koko nde ladjɛ mvungɔka ante alekɔ djonyi efula nkotshɛ nkfumbo kɛnde djɛ ndjala la djokanelo djɛ wɔlɔ lá Yehova. (Mat. 5:3) Kokanela ndjɔmbɔmba kɛ wɔlɔ kɛ Yeso ndatshikela ewandji wɛ nkfumbo. Lá nkilika Evanjilio wɛ Djɔanɛ, kaanga wina wɔ Yeso ndayalaka l’otamba wɔ ndjolo, nde akanelaka nkfumbo kɛnde. Djɔanɛ emalaka entshupa nya Mariya nyangho Yeso, l’edjena kɛ iyayakaka Yeso. Kaanga Yeso ndayale entshupa la nkitsheyɛ, nde alɔmbaka Djɔanɛ djɛ nde nama Mariya. (Dj. 19:26, 27) Yeso ayalaki la wananyɔ l’ankaana yekokaki nangha la wolo djɛ Mariya mba kenkfumɔ kɛ ndayalaka la djonyi, koko nyɛnamaka etengo l’etena kɛsɔ, lako kaanga ɔmɔtshi l’anteyi kɛwɔ loyalisa ombeki wɔnde. Djɛkondeke, Yeso akɔpaki ndashikikɛ ante onto ɔmɔtshi angoyala djɛ nkotsheyɛka Mariya ehomba wɛnde wɛ demba edjinge welá nyuma.

16. Edjito wɛkɔnge weyalisa la Djɔanɛ?

¹⁶ Djɔanɛ ayalaki l’edjito efula. Etengo ndayalaka ɔpɔstɔlɔ, nde ayalaki ladjɛ ndaapɛyɛ efula l’olemo w’ipoposanyɛ. Lonkina, nde akokaka ndjala la wadji, lasɔ, nde ayalaka ladjɛ nkotshɛ ehomba welá demba la welá nyuma wɛ nkfumbo kɛnde. (1 Kɔ. 9:5) Olakanyelo wɔkɔnge wowa ewandji wɛ nkfumbo lɔɔko kɛnɛ?

17. Lamo oyɛwɔ djonyi owandji wɔ nkfumbo nkotshɛ ehomba wɛ nyuma wɛ nkfumbo kɛnde?

¹⁷ Wɔnanyɔ wolekɔ owandji wɔ nkfumbo nkoka ndjala l’edjito efula wɛ djonyi. Ndjɔmbɔmba,  nde ladjɛ ndjala l’entete l’olemo wɔnde welá demba djɛ nanghedji djɛnde numɛ Yehova. (Ɛfɛ. 6:5, 6; Tito 2:9, 10) Edjinge nde nkoka ndjala la edjito enkina lá otshumano etengo ikokolo, la mpɛyɛ ndjɔmbɔmba l’olemo w’ipoposanyɛ. Lonkina, nde la djɛ ndjekaka Bible mbala la mbala nya wadjɛnde la wana wande. Ntsha nde nangha nghɔsɔ, ase nkfumbo kɛnde wangoyala la djedjɛ dj’efula lá welo w’ilande dj’iwɔ ndjala la demba djɛ wɔlɔ edjinge l’osasa. Wangoyala edjinge l’osasa lá wopo wakotshɛnde dj’iwɔ ndjala la lonyuma lɔ wɔlɔ.​—Ɛfɛ. 5:28, 29; 6:4.

18. Kɛkɔnge kɛ Djɔanɛ ndoyashikikɛ?

¹⁸ Djɔanɛ asɛnaka ɛnɔnyi efula. Edjinge apomanaka l’akambo efula wakokisa mpɔdjɛ djawo djɛnde. Koko nde ananghaka la wolo efula djɛ nɛmɛyɛ ɛlɛmbɛ wɛ Yeso, ndjila edjinge ɔlɛmbɛ wɔ nkɔpa wananyɔ l’ankaana. Eposelo weyalisa la nkambo djɛsɔ nde, Djɔanɛ ayashikikɛka ante Yehova nya Yeso wangɔpɛyɛ wolo wɔ nde nkfulumeyɛ ekakasano enkfumɔ. (Dj. 14:15-17; 15:10; 1 Dj. 4:16) Lako ekete kekokisa Satana kana andja wande nangha djɛ nshimba Djɔanɛ djɛ nyɛnyɛ ngandji kɛnde m’etepela la má nanghedji.

19. Kɛkɔnge kɛ 1 Djɔanɛ 4:7 otokembɛnde djɛ nangha, edjinge lamo?

¹⁹ Etengo Djɔanɛ, towika l’andja walɔndjɛma me Satana, ndjambe kɛ lotono kɛ nkfumbo dj’akambo djɛnɛ. (1 Dj. 3:1, 10) Nde nkɔpaka ntoshimba dj’ipa iso nkɔpa wananyɔ l’ankaana, koko nde apangoyala l’akoka wanangha nghɔsɔ ntsha iso tɔpɔpɛyisa mbamba. Djɛkonde nyontshɔ tɔshi nkano djɛ nkɔpaka wananyɔ l’ankaana yɛso, djɛ ndaawɛnyɛka ngandji kɛso má kɛnɛ k’onanghaso edjinge má kɛnɛ k’otepelaso. Wina wɔ isongawɛnyɛka ngandji kɛso, iwɔ wangoyala l’osasa wɔ ndjala l’anteyi kɛ nkfumbo kɛ Yehova edjinge nsɔsɔlɔ lowiko longoyala la ntshina efula.​—Wala 1 Djɔanɛ 4:7.