1. Eposelo wɛkɔnge weyalisa la djamba mɔtshi djenanghemisa lá 1935 te olangala ɔmɔtshi?

OLANGALA ɔmɔtshi ayalaki l’ɛnɔnyi 18 wina w’indalongola batisimo lá 1926. Ambotshi wande wayalaki Ambeki wa Bible, ntepela ente Ewakɛ wɛ Yehova, djiina dj’ewama lɔɔko kɛnɛ. Iwɔ wayalaki la wana w’apame asato edjinge wana w’amato ape w’iyalakanyɛ djɛ nkambela Yehova Ndjambe edjinge ndjokola Yeso Kristo. Etengo Ambeki wa Bible ankfumɔ woyalaki l’eleko kɛsɔ, olangala wɔ nkɔmano wɔsɔ alɛki mampa la vinyɔ ɔnɔnyi tshɛ wina wɔ Dambo djɛ nkɔlɔ djɛ Nkfumi. Koko, nkongi djɛnde djel’etsho weyaye djetshikitanaka mpeyi má djamba mɔtshi djɛ l’ɔkɔndɔ w’anto djeyalisa l’ɔtɛ wɔ djoyi ante: ‘Lemba l’ekekete.’ Djamba djɛsɔ djɛpɛyamaka lá 1935 mé wɔnanyɔ J. F. Rutherford lá losanghanyɛ l’ekekete lonanghemisa lá Washington, D.C., l’États-Unis. Kɛkɔnge k’iyotisola lá losanghanyɛ lɔsɔ?

2. Nsɔsɔlɔ kɛkɔnge kɛ djonyi efula kɛ wɔnanyɔ Rutherford ndalakanyɛ lá djamba djɛnde?

² Lá djamba djɛnde, wɔnanyɔ Rutherford apakisolaka wanɛ wangoyala l’eteyi kɛ ‘lemba l’ekekete l’anto’ (ekadjimwelo wɛ King James), kana ‘oloyi w’ekekete w’anto,’ wotepelawɔ lá Ndjiso 7:9. L’etena kɛsɔ, Ambeki wa Bible wakanelaki ambɔ oloyi w’ekekete alekɔ oloyi w’anto wangotshɔ t’olongo koko, wapalekɔ la nkɔmano etengo ankfutami w’avuta. Wɔnanyɔ Rutherford akambaka l’Afunelo djɛ mpakisola ante oloyi w’ekekete watasɔnama djɛ  ntɔsɛna l’olongo, koko walekɔ ɛnkɔkɔ * enkina w’Akristo wangoyɛ ma ‘ndjolo k’ekekete’ edjinge wangɔsɛna lotshinda lotshinda lá looko. (Ndj. 7:14) Yeso alakaka ante: ‘Lemi ndekɔ l’ɛnkɔkɔ enkina, wepalekɔ lá lopango lɔnɛ; lemi langaweta edjinge wangoka djoyi djɛmi, ko wangoyala oloyi ɔmɔ, onami ɔmɔ.’ (Dj. 10:16) Ɛnkɔkɔ enkina wɛsɔ oyɛwɔnde Ewakɛ wɛ Yehova welekɔ la nkongi djɛ nsɛna lotshinda lotshinda lá Paradiso kelá looko. (Mat. 25:31-33, 46) Nyontshɔ tokolenda wopo wɔ elembetshiyelo wɛ bango wɛsɔ, iyatshikitanyɛ mbiko yɛ efula kɛ enkambi wɛ Yehova ndjila edjinge wɔnanyɔ woyalaki l’ɛnɔnyi 18.​—Yee. 97:11; Woo. 4:18.

3-4. Lá losanghanyɛ lonanghemisa lá 1935, kɛkɔnge kɛ nunu dj’anto iyoke lá kɛnɛ kelendana la nkongi djɛwɔ, ko lamo?

³ Osasa woyalaka efula wina wɔ ontepedji ndashimela wanɛ wayalaki lá losanghanyɛ ante: “Anto ankfumɔ walekɔ la nkongi djɛ nsɛna lá looko lotshinda lotshinda w’emale?” Wɔnanyɔ ɔmɔtshi woyalisa lá losanganyɛ lɔɔkɔ ntepelaka ante, nde ɛnaka anto ndekana etatshi kɛ l’anteyi anteyi kɛ 20 000 dj’anto wemalaka. Masɔ wɔnanyɔ Rutherford atepelaka ante: “Nyolende! Lemba l’ekekete l’anto!” Masɔ onto onkfumɔ woyalisa lá losanghanyɛ lɔkɔ apomaka ankasa w’efula. Wanɛ wemalisa w’okoka djɛ watasɔnama djɛ ntɔsɛna l’olongo. Iwɔ wewaka ambɔ watakfutama avuta me nyuma kɛ Ndjambe. Lofu lonkina lɔ losanghanyɛ lɔsɔ, anto 840 walongolaka batisimo djɛ nkoma Ɛwakɛ wɛ bango, efula kɛwɔ wayalaka l’anteyi kɛ ɛnkɔkɔ enkina.

⁴ M’ɔkɔnge wɔ djamba djɛsɔ, olangala w’isotepelaki m’adjiko, edjinge nunu dj’anto ankina wa nkɔmano watshikaka ndɛ mampa edjinge nnɔ vinyɔ wina wɔ Dambo djɛ nkɔlɔ djɛ Nkfumi. Efula k’anto wayawokaka etengo wɔnanyɔ ɔmɔtshi w’okitshakitshɛ wotepelisa ante: “Bokfɔ dj’ɔnɔnyi wɔ 1935 ndeke mbala kɛmi k’ekomo kimale mampa la nnɔ vinyɔ. Ndjewaka djɛ Yehova atakamba la nyuma kɛnde k’ekina djɛ mpɛyɛ lemi nkongi djɛ ntɔsɛna l’olongo koko, ndekɔ la nkongi djɛ nsɛna lá looko edjinge djɛ nkotshɛ l’olemo wɔ nkadjimola looko paradiso.” (Ɔrɔ. 8:16, 17; 2 Kɔ. 1:21, 22) Ntateyɛ masɔ, wanɛ walekɔ l’oloyi w’ekekete w’anto watateyɛka nfula edjinge nkamba mpɛka la mpɛka iwɔ l’antshikadji w’ankfutami w’avuta. *

5. Wopo wɔkɔnge Yehova ɔsande wanɛ wambotshika ndɛ mampa la vinyɔ lá Bokfɔ?

⁵ Wopo wɔkɔnge Yehova ɔsande wanɛ watshikisa ndɛ mampa la vinyɔ lá Bokfɔ m’ɔkɔngɔ wɔ 1935? Iya ntsha lɔɔko kɛnɛ Owakɛ ɔmɔtshi wombolongola batisimo alɛki mampa la vinyɔ l’oloko ɔmɔ lá Dambo djɛ nkɔlɔ djɛ Nkfumi, koko m’ɔkɔngɔ ambosipisoyɛ djɛ nde atakfutama avuta má nyuma k’ekina? (1 Kɔ. 11:28) Amɔtshi walɛki mampa la vinyɔ ladjikɛnde watalembetelaki nkongi djɛwɔ. Koko ntsha wambawola ambɔ wananghaka ovunga, wambotshika ndɛ mampa la vinyɔ edjinge wambokindjɛ nkambela Yehova la nkɔmano, nde angawawola l’anteyi k’ɛnkɔkɔ enkina. Kaanga iyopangokindjɛ ndɛ mampa la vinyɔ, iwɔ wangokindjɛ nsanghana lá Bokfɔ ladjikɛnde walekɔ la djedjɛ dj’efula lá kɛnɛ kɛ Yehova nya Yeso iyananghela.

6. Kɛkɔnge kɛ Yeso ndashimela andjelo djɛ nangha?

⁶ Ladjikɛnde ndjolo k’ekekete ketaleke ndjala ngo entshupa, angoyala ekeketshelo leso  djɛ djeka kɛnɛ kɛ Ndjiso shapitrɛ 7 otepelande lá kɛnɛ kelendana l’Akristo w’ankfutami edjinge oloyi w’ekekete w’ɛnkɔkɔ enkina. Yeso ashimelaka andjelo dj’iwɔ nkindjɛ nkota mpopo inɛyi yɛ etshitelo. Iwɔ wapangotshika mpopo yɛsɔ tii wina wɔ iyongoshiyɛ ndjila Akristo w’ankfutami ilembetelo, ntepela ente, wina wɔ Yehova ndongawawola. (Ndj. 7:1-4) Má nkɔmano djɛwɔ, wananyɔ wa Kristo w’ankfutami wangoyala ankfumi edjinge ankfundji iwɔ lande l’olongo. (Ndj. 20:6) Anto ankfumɔ w’ɔsa opiko lá nkfumbo kɛ Ndjambe kel’olongo, wangoyala l’osasa efula djɛ nyɛna ankfutami 144 000 wambolongola lofuto lɔwɔ lɔ ntɔsɛna l’olongo.

7. Etengo Ndjiso 7:9, 10 ɛnyɛnde, Djɔanɛ ndɛnyi nge, ko kɛkɔnge k’onanghawɔ? (Lenda ntshango djelá loposo.)

⁷ M’ɔkɔngeɔ wɔ nde ntepela kɛnɛ kelendana la ankfumi l’ankfundji 144 000, Djɔanɛ ɛnaka nkambo nkina dj’osasa, ‘oloyi w’ekekete’ wombowika ma Armagɛdɔnɛ. Oloyi w’epe wɔsɔ, ntshikitana l’oloyi wɔ ntondo ladjikɛnde wolekɔ ekekete efula edjinge wopewama mbala. (Wala Ndjiso 7:9, 10.) Iwɔ ‘wambɔlɔta ekutu wɛ mpɛmbɛ,’ kɛsɔ nyɛnyɛka dj’iwɔ wayalamaka ‘dj’ipa ndjala la badji’ dj’ima andja wa Satana edjinge watshikalaka la nkɔmano te Ndjambe la te Kristo. (Dja. 1:27) Iwɔ wapangɔpangɔ ambɔ ntsha wambowa lowiko nde, má kɛnɛ kɛ Yehova nya Yeso, Wɔna ɔnkɔkɔ wɔ Ndjambe, ndombananghela. Lonkina, iwɔ wambokota wanga w’atoko l’ɛwɔ, djɛ nyɛnyɛ ambɔ walekɔ l’osasa wɔ ndjawola Yeso etengo Nkfumi kembɔsɔnama mé Yehova.​—Ɛndjɛ la Djɔanɛ 12:12, 13.

8. Kɛkɔnge kɛ Ndjiso 7:11, 12 otoshimelande lá nkambo djɛ nkfumbo kɛ Yehova kel’olongo?

⁸ Wala Ndjiso 7:11, 12. Wanɛ walekɔ l’olongo iyelola ngetemo wina w’iyɛnyi oloyi w’ekekete w’anto? Djɔanɛ ɛnaka nkfumbo k’otondo kɛ Yehova kel’olongo, wambolola l’osasa wina wɔ wanɛ walekɔ l’oloyi w’ekekete w’anto iyɛnama edjinge iyalumɛka Ndjambe. Nkfumbo kɛ Yehova k’el’olongo wangoyala l’osasa efula djɛ nyɛna ekotshamelo kɛ ɛnɛlɔ kɛsɔ wina wɔ oloyi w’ekekete w’anto iyongoyɛ má ndjolo k’ekekete la lowiko.

9. Lá nkilika Ndjiso 7:13-15, kɛkɔnge kɛ oloyi w’ekekete onanghawɔ win’ɔsɔ?

⁹ Wala Ndjiso 7:13-15. Djɔanɛ afunaka ante oloyi w’ekekete ‘wasolaka ekutu wɛwɔ edjinge wɛdjɛka piyɔɔ l’ekila wɛ Wɔna ɔnkɔkɔ.’ Kɛsɔ nyɛnyɛka djɛ iwɔ walekɔ l’eloko wɛ piyɔɔ edjinge wɛdje djɛ nyemala lá ntondo kɛ Yehova. (Iza. 1:18) Iwɔ walekɔ Akristo wamboyalambola, la wambolongola batisimo, wɛnyɛ djawo djɛ wolo l’olambo wɔ Yeso edjinge walekɔ la djokanelo djɛ wɔlɔ iwɔ la Yehova. (Dj. 3:36; 1 Pɛ. 3:21) Djɛkondeke oyɛwɔ la lomo lɔ nyemala lá ntondo kɛ nkosa kɛ lowandji kɛ Ndjambe, djɛ ‘ndokambela olemo w’enkina otsho mbile’ lanɛ lá looko, lá tɛmpɛlɔ kɛnde kɛ nyuma. Kaanga win’ɔsɔ, iwɔ walekɔ l’entete l’olemo w’ipoposanyɛ edjinge wɔ nkfumba anto ambeki, ladjikɛnde iwɔ ndjilaka wapɔ w’Onkfumi wɔ Ndjambe lá ntondo kɛ wapɔ wɛwɔ.​—Mat. 6:33; 24:14; 28:19, 20.

10. Kɛkɔnge kɛ oloyi w’ekekete iyomboyashikikɛ, edjinge daka djɛkɔnge dj’iyɔngɛna ekotshamelo?

¹⁰ Oloyi w’ekekete w’anto womboyɛ ma ndjolo k’ekekete wamboyashikikɛ ambɔ Ndjambe angokindjɛ ndakotsheyɛka ehomba wɛwɔ, ladjikɛnde ‘Kanga l’intansɛ lá nkosa kɛ lowandji angokamba l’ihombo yɛnde djɛ ndalama.’ Daka dj’ɛnkɔkɔ enkina iyombokongela ila efula djɛ nyɛna ekotshamelo djɛnɛ djengokotshama: ‘[Ndjambe] angodjola wisɔyi ankfumɔ má wiso wawɔ, edjinge nyɔnyi kepangoyala lonkina, kaanga delo, kaanga tɛndjɛ, kaanga elando wepangoyala lonkina.’​—Ndj. 21:3, 4.

11-12. a) Etengo Ndjiso 7:16, 17 ɛnyɛwɔ, ɛtshɔkɔ wɛkɔnge wengowa oloyi w’ekekete w’anto? b) Kɛkɔnge kɛ ɛnkɔkɔ enkina okokawɔ nangha wina wɔ Bokfɔ, ko lamo?

¹¹ Wala Ndjiso 7:16, 17. Nsɔsɔlɔ lɔɔko kɛnɛ, enkambi wɛ Yehova ɛmɔtshi wɛna  ndjolo la ndjala m’ɔtɛ w’iyopalekɔ la nfalanga yɛ nsomba nkete djɛ ndɛ dj’oyɛwɔ la djonyi kana m’ɔtɛ wɔ ekakasano weyɛ m’ambandji. Ankina wambovundamaka l’ankando m’ɔtɛ wɔ djawo djɛwɔ. Koko, oloyi w’ekekete walekɔ l’osasa ladjikɛnde iwɔ ndjewaka ambɔ m’ɔkɔngɔ wɔ etshitanelo k’andja wa nyɛtshi wanɛ, wangoyala la nkete djɛ ndɛ, djɛ nyuma edjinge djelá demba ndakapɔnda. Wina wɔ Yehova ndongotshita andja wa nyɛtshi wa Satana, nde angolama oloyi w’ekekete w’anto dj’ipa iwɔ ntɔngɛla ‘yane yɛ wolo’ yelekɔ djingingi djɛ nkɛlɛ kɛnde k’ekekete. M’ɔkɔngɔ wɔ ekomo kɛ ndjolo k’ekekete Yeso angɔlɔndjɛ wanɛ wangowika lá looko, tá ‘ntɛkɔ djɛ washi wa lowiko [l’etshinda].’ Kokanela ndambo: L’anteyi kɛ miliyɔ y’anto yeyala la lowiko lanɛ lá looko, oloyi w’ekekete wapavɔki lotshinda lotshinda. Iwɔ walekɔ nsɔsɔlɔ la nkongi djɛ wɔlɔ efula!​—Dj. 11:26.

¹² Ɛnkɔkɔ enkina walekɔ la nkongi djɛ wɔlɔ efula djokawoyɛwɔ Yehova nya Yeso lokasa! Kaanga Yehova ndotaasɔna dj’iwɔ ntɔsɛna l’olongo, koko nde ndaakɔpaka efula ngo ngete ɔkɔpande ankfutami w’avuta. Eloyi wɛkɔ epe wɛsɔ nkoka numɛ Ndjambe nya Kristo. Yopo imɔtshi yɛ nangha nkambo ntshɔ nde, má ndjingelaka lá Dambo djɛ nkɔlɔ djɛ Nkfumi.

13-14. Lamo antshikadji w’Akristo w’ankfutami l’ɛnkɔkɔ enkina oyɛwɔ la djɛ nsanghanaka lá Bokfɔ djɛ nyɔyi kɛ Yeso?

¹³ L’ɛnɔnyi emangha wemboheta wɛnɛ, m’anto 1 000 wasanghana lá Bokfɔ, nsuke l’onto 1 ndeke l’ɔlɛka mampa la vinyɔ. Ntshumano efula wapalekɔ l’onto wɔlɛka mampa la vinyɔ wina wɔ Bokfɔ. Efula k’anto wasanghanaka lá Bokfɔ walekɔ la nkongi djɛ nsɛna lá looko. Ntsha oyɛwɔ nde nghɔsɔ, iya lamo osanghanakawɔ lá Dambo djɛ nkɔlɔ djɛ Nkfumi? Elonga k’atshinda djɛ nsanghana, kelekɔ etengo kɛ onto wotshɔ tá fɛtɛ kɛ bala djɛ ilongo yɛnde. Tolongo ntshɔka tá fɛtɛ kɛ bala, djɛ nyɛnyɛ ngandji kɛwɔ edjinge osukɔ wɔwɔ te antshukanyi. Wopo wɔk’ɔmɔ ndeke, ɛnkɔkɔ enkina nsanghanaka lá Bokfɔ ladjinkɛnde iwɔ nkɔpaka nyɛnyɛ ngandji kɛwɔ edjinge osukɔ wɔwɔ te Kristo edjinge te ankfutami w’avuta. Elonga kenkina k’ɛnkɔkɔ enkina osanghanawɔ lá Bokfɔ nde, djɛ nyɛnyɛ djedjɛ djɛwɔ l’olambo wɔ Yeso wapɛyɛ mbamba k’iwɔ nsɛna lotshinda lotshinda lá looko.

¹⁴ Elonga kenkina kɛ djonyi kɛ ɛnkɔkɔ enkina osanghanawɔ lá Bokfɔ nde, djɛ nyɛnyɛ ntshunamo djɛwɔ l’ɔlɛmbɛ wɔ Yeso. Wina wɔ  Yeso ndananghe Dambo djɛ nkɔlɔ djɛ Nkfumi djɛ ntondo ntondo nya apɔstɔlɔ wande wa nkɔmano, nde ashimelaka ante: ‘Nyongonanghake nkɔkɔnɛ djɛ mvungɔka lemi.’ (1 Kɔ. 11:23-26) Djɛkondeke, ɛnkɔkɔ enkina wangokindjɛka nsanghana lá Dambo djɛ nkɔlɔ djɛ Nkfumi, l’ilá k’enkfumɔ kɛ ankfutami w’avuta iyongoyalaka la lowiko lanɛ lá looko. Edjinge ɛnkɔkɔ enkina, ndjetaka onto onkfumɔ wɔkɔpa djɛ ndosanghana lawɔ lá Bokfɔ.

15. Wopo wɔkɔnge okokaso numɛ Ndjambe nya Kristo lá wina wɔ Bokfɔ?

¹⁵ Lá Bokfɔ, tolekɔ la mbamba kɛ numɛ Ndjambe nya Kristo wina wotshumbaso teembo la wɔlɔmbaso esanga. Djamba djengɔpɛyama lá Bokfɔ dj’ɔnɔnyi wɔnɛ djengoyala l’ɔtɛ wɔ djoyi ante: “Yala la djedjɛ te Ndjambe la te Kristo lá kɛnɛ k’iyombokonanghela!” Djamba djɛsɔ ngofudjɛ djedjɛ djɛso te Yehova la té Kristo. Djɛkondeke wina w’iyotaheetshɛ mampa la vinyɔ, iso mvungɔka kɛnɛ k’osakisolawɔ: Demba l’ekila wɛ Yeso. Edjinge iso vungɔka ngandji k’efula kɛ Yehova ndɔtɛnyɛ má ndjawola djɛ Wɔnade mvɔ lá nkambo djɛso dj’iso mba lowiko. (Mat. 20:28) Onto onkfumɔ wɔkɔpa Papa kɛso kel’olongo edjinge Wɔnande angɔkɔpa nsanghana lá Bokfɔ.

16. Lá wopo wɔkɔnge ankfutami l’ɛnkɔkɔ enkina oyɛwɔ wopo ɔmɔ?

¹⁶ Lá yopo imɔtshi, ankfutami w’avuta l’ɛnkɔkɔ enkina walekɔ wopo ɔmɔ. Ndjambe apakɔpɛ oloyi ɔmɔtshi ndeka onkina. Ngandji kɛnde te eloyi wɛkɔ epe kelekɔ ngo wopo ɔmɔ. Eloyi wɛkɔ epe welekɔ la djonyi efula lende. Ewaso nghɔsɔ nde, Yehova afutaka ngo otshinga ɔmɔ, lowiko lɔ Wɔnande wɔ ngandji, djɛ nsomba eloyi wɛkɔ epe, ankfutami w’avuta edjinge ɛnkɔkɔ enkina. Otshikitano ɔmɔ wolekɔ l’atenyɛ eloyi epe wɛsɔ nde, walekɔ la nkongi djotshikitanyi. Koko eloyi wɛkɔ epe ladjɛ ntshikala la nkɔmano te Ndjambe la te Kristo. (Yee. 31:23) Edjinge vungɔ ente, nyuma kɛ Ndjambe nkambaka leso ngo wopo wɔk’ɔmɔ. Yehova mpɛyɛka nyuma kɛnde k’ekina le onto onkfumɔ ngo lá nkilika kɛnɛ koyɛnde la djonyi.

17. Kɛkɔnge kɛ antshikadji w’ankfutami okongelawɔ l’eloko lukuluku?

¹⁷ Akristo w’ankfutami wapawotshɔka la nkongi djɛ ntɔsɛna l’olongo. Ndjambe ndeke l’ilaka nkongi djɛsɔ l’eloko wɛwɔ. Iwɔ ntɔnɔlaka, ndɔmbaka lá nkambo djɛ nkongi djɛkɔ, edjinge ndjalaka l’eloko lukuluku djɛ mba lofuto lɔwɔ lɔ t’olongo. Iwɔ wapeweka wopo wɔ demba djɛwɔ iyongotoyala l’olongo. (Flp. 3:20, 21; 1 Dj. 3:2) Koko, wakongela l’eloko lukuluku djɛ ntɛnana la Yehova, la Yeso, l’andjelo, edjinge l’ankfutami w’avuta ankina. Wakongela mba esanga la wɔ mpipo yɛwɔ yel’Onkfumi wel’olongo.

18. Kɛkɔnge kɛ ɛnkɔkɔ enkina okongelawɔ l’eloko lukuluku?

 ¹⁸ Ɛnkɔkɔ enkina nsasangaka la nkongi djɛwɔ djekombolaka anto ankfɔmɔ, ntepela ente ndɔsɛna lotshinda lotshinda lá looko. (Los. 3:11) Wakongela l’eloko lukuluku lofu lɔ iyongokoka ndokotshɛ djɛ nkadjimola looko l’otondo paradiso. Wakongela l’eloko lukuluku lofu lɔ iyongopika amvulu yɛwɔ, nangha tojardɛ tɔwɔ edjinge mbongola wana wawɔ l’alemba wa djɔ. (Iza. 65:21-23) Wakongela lonkina l’eloko lukuluku djɛ mpeeta lá todjena efula lá looko djɛ nyɛna enkoko, ekonda, l’andjale, edjinge ndjeka nkete nkfumɔ djɛ Yehova ndatonge. Koko, nkambo djeleka ndapɛyɛ osasa efula nde djɛ ndjewa ente djokanelo djɛwɔ la Yehova djengotalekaka nkemba ngo nkemba.

19. Mbamba kɛkɔnge kɛ onto onkfumɔ wɔ l’anteyi kɛso owande wina wɔ Bokfɔ, ko Bokfɔ dj’ɔnɔnyi wɔnɛ iyongonanghema wina wɔkɔnge?

¹⁹ Yehova apɛyɛka enkambi wɛnde enkfumɔ wemboyalambola tende nkongi djɛ wɔlɔ efula l’etsho weyaya. (Jɛr. 29:11) Bokfɔ djɛ nyɔyi kɛ Kristo mpɛyɛka ɔmɔmɔ l’anteyi kɛso mbamba k’ekekete kɛ numɛ Ndjambe nya Kristo lá kɛnɛ k’iyombotonanghela dj’iso mba lowiko l’ipa l’ekomo. Bokfɔ alekɔ nsɔsɔlɔ losanghanyɛ loleka djonyi efula lɔ Akristo wa nsɔsɔlɔ onanghakawɔ ɔnɔnyi l’ɔnɔnyi. Bokfɔ dj’ɔnɔnyi wɔnɛ ngonanghema la nkɔlɔ djɛ Lofu lɔ mpɔsɔ, Ngɔndɔ k’asato 27, 2021. Ɔnɔnyi wɔnɛ anto efula wangowa mbamba kɛ nsanghana lá losanghanyɛ lɔ djonyi lɔsɔ lá vu. Ankina wangosanghana l’anteyi kɛ ndjolo y’awɛnyɛwɔ. Ankina lonkina wangonangha l’ankando. Wina wɔ Yehova, Yeso, edjinge nkfumbo kɛ Ndjambe kel’olongo iyongolendaka nkambo ntshɔ, nyotshɔ tonanghe Bokfɔ l’osasa onkfumɔ kaanga isongoyala l’otshumano, l’iloyi yɛ daambi kana onto ɔmɔ!