1. Kɛkɔnge kɛnyɛ lɔɔko kɛnɛ ente ngandji kɛ l’anteyi k’ase nkfumbo kembɔhɔla?

BIBLE ewoyɛka ante l’etsho w’ekomo, anto wapangoyala la ngandji kɛ ‘l’anteyi kɛ ase nkfumbo.’ (2 Ti. 3:1, 3) Lɔɔko kɛnɛ tɛna djɛ prɔfɛsiya kɛsɔ kekotshama. Ndjɔmbɔmba, miliyɔ y’ankfumbo wambokapwanaka m’ɔtɛ w’oyakelo w’awala, nkambo djɛsɔ ntshindaka ambotshi djɛ ndjokana nkɛlɛ l’anteyi kɛwɔ, edjinge wana wawɔ ndaawokaka etengo wapawoke ngandji. Mbala imɔtshi kaanga nkfumbo isɛna lá mvulu kɛmɔ wapalekɔ la djokanelo djɛ wɔlɔ. Ndjɔmbɔmba, ondaki ɔmɔtshi w’ankfumbo atepelaka ante: “Papa, mama edjinge wana wawɔ, wapasawolaka l’anteyi kɛwɔ, onto l’onto mpetshɛka wina ngo la ordinatɛrɛ wɔnde, telefɔnɛ kɛnde, kana tovideo. Kaanga nkfumbo yɛso ɔsɛnawɔ mvulu kɛmɔ, iwɔ wapalembetelana wɔlɔ.”

2-3. a) Lá nkilika Ɔrɔma 12:10, te wa na oyɛso ladjɛ nyɛnyɛ ngandji kɛ m’anse k’oloko? b) Kɛkɔnge kɛnaso lɔ lá djamba djɛnɛ?

² Topakombola ndjala l’ikanyi y’andja wanɛ wapalekɔ la ngandji. (Ɔrɔ. 12:2) Koko, iso ladjɛ ndjala la ngandji kɛ m’anse k’oloko apengo le ase nkfumbo yɛso toko, koko edjinge te wanɛ walekɔ laso djawo mɔ. (Wala Ɔrɔma 12:10.) Ngandji kɛ m’anse k’oloko osakisalande nge? Oyɛnde nde itepela ikambema pekapeka djɛ nyɛnyɛ ngandji kɛ wolo kelekɔ l’anteyi k’ase nkfumbo wa entshupa entshupa. Ɔsɔ alekɔ yopo yɛ ngandji y’okokaso nyɛnyɛ l’anteyi kɛ nkfumbo kɛso kɛ nyuma, ntepela ente wananyɔ l’ankaana yɛso y’Akristo. Wina wɛnyɛso ngandji kɛ m’anse k’oloko, iso nkotshɛka djɛ nama osanga l’otshumano, djekeka nkina djɛnyɛ djɛ tolekɔ l’otshumano wɔ nsɔsɔlɔ.​—Mik. 2:12.

³ Djɛ ntokotshɛ dj’iso ndjala edjinge nyɛnyɛ ngandji kɛ m’anse  k’oloko kɛsɔ, nyotshɔ tokolenda olakanyelo w’okokaso mba má ndjɔmbɔmba yemá Bible.

4. Kɛkɔnge kɛ Djakɔbɔ 5:11 otoshimelande lá kɛnɛ kelendana la Yehova?

⁴ Bible ntoshimelaka wekeka wa wɔlɔ efula wa Yehova. Ndjɔmbɔmba, Bible ntepelaka ante: ‘Ndjambe nde ngandji.’ (1 Dj. 4:8) Djekeka djɛsɔ toko ntosepaka tende. Koko Bible ntepelaka lonkina ante: ‘Yehova alekɔ la ngandji k’efula kɛ m’anse k’oloko.’ (Wala Djakɔbɔ 5:11.) Ɔsɔngo yopo yɛ wɔlɔ efula y’ɛnyɛ wopo wɔ Yehova oyawokande lá nkambo djɛso!

5. Wopo wɔkɔnge Yehova ɛnyɛkande djandji djɛnde, edjinge wopo wɔkɔnge w’okokaso ndowokola?

⁵ Djakɔbɔ 5:11 nyɛnyɛka djɛ, ngandji kɛ m’anse k’oloko kɛ Yehova kelekɔ la djokanelo la djekeka nkina djetosepa tende, djandji djɛnde. (Epo. 34:6) Yopo imɔtshi yɛnyɛ djɛ Yehova ntokaka djandji nde má ntimeyɛ evunga wɛso. (Yee. 51:1) Lá Bible, djandji apasakisola ngo nyimeyɛ onto ovunga wɔ ndombotonanghela. Djandji nsakisolaka lonkina, wopo woyawokaso l’eteyi k’oloko wina wɛnaso onto ɔmɔtshi ɛna ndjolo edjinge ngototshindake djɛ nkotshɛ onto wɔkɔ. Yehova ntoshimelaka ante, mposɛ kelekɔ la nde djɛ ntokotshɛ, kelekɔ efula ndeka kaanga kelekɔ la nyɔ kɛlɔmɛ wɔna te wɔna wɔlɔmɛnde. (Iza. 49:15) Wina w’ɛnaso ndjolo, djandji djɛ Yehova ndotshindaka djɛ ntokotshɛ. (Yee. 37:39; 1 Kɔ. 10:13) Iso nyɛnyɛka djandji te wananyɔ l’ankaana yɛso má ndaawimeyɛ edjinge ipa ndaawombela enkomba wina w’otonanghelawɔ nyɛtshi. (Ɛfɛ. 4:32) Koko yopo inkina yɛnyɛso wananyɔ l’ankaana yɛso djandji nde, ndaakotshɛ wina w’opomanawɔ l’ekakasano. Wina wɔ ngandji ototshindande djɛ ndjoka anto ankina djandji, iso ndjokolaka Yehova kanga lolekaka ntɛnyɛ ngandji kɛ m’anse k’oloko ndeka anto ankfumɔ.​—Ɛfɛ. 5:1.

6. Wopo wɔkɔnge Jɔnata nya Davidɛ iyɛnyana ngandji kɛ m’anse k’oloko?

⁶ Bible kelekɔ la ɛkɔndɔ w’anto wa ntshamba djɛ djɔ wɛnyisa ngandji kɛ m’anse k’oloko. Tokolenda ndjɔmbɔmba kɛ Jɔnata nya Davidɛ.  Bible ntepelaka ante: ‘Jɔnata nya Davidɛ wakɔpɛka ilongo yɛ nsɔsɔlɔ, ko Jɔnata atateyɛka nd’ɔkɔpa etengo oyakɔpande nyɔmɛlɛ.’ (1 Sa. 18:1) Davidɛ akfutamaka avuta djɛ mpɛna Saolo etengo nkfumi. M’ɔkɔngɔ wɔ masɔ, Saolo atateyɛka ndjoka Davidɛ djewɔ edjinge ahonaka ndoyaka. Koko Jɔnata atasuka papa kɛnde lá welo wɛ ndilaka djɛ ndjaka Davidɛ. Jɔnata nya Davidɛ watshikelanaka elako kɛ ndjala ilongo lotshinda lotshinda edjinge kɛ onto l’onto nsuka winande kaanga lantondo nkambo djɛkɔnge.​—1 Sa. 20:42.

7. Nkambo djɛkɔnge mɔtshi djekokisa ntshinda Jɔnata nya Davidɛ djɛ ndjopa ilongo yɛwɔ?

⁷ Ngandji kɛ m’anse k’oloko keyalaki l’antenyɛ Jɔnata nya Davidɛ nyɛnamaka papoo wina wɛnaso efula k’akambo kekokisa ndaatshinda djɛ ndjopa ilongo yɛwɔ. Ndjɔmbɔmba, Jɔnata ayalaka ekokolo kɛ Davidɛ k’ɛnɔnyi etengo 30. Jɔnata akokaka ntepela ante mpakoke ndjala ilongo isa ilɛngɛ y’anyanya yepewe kaanga akambo efula welá lowiko. Koko Jɔnata atakanelaki nghɔsɔ, nde alɛmɛyɛki Davidɛ efula.

8. Lamo, Jɔnata ndayale ilongo yɛ wɔlɔ yɛ nghɔsɔ te Davidɛ?

⁸ Jɔnata akokaka ndjoka Davidɛ djewɔ. Etengo ndayalaka wɔna Nkfumi Saolo, Jɔnata akokaka ntepela ante, ngo nde ndeke l’okoka ndjala Nkfumi m’ɔkɔngɔ wɔ Saolo. (1 Sa. 20:31) Koko Jɔnata ayalaka l’okitshakitshɛ, edjinge la nkɔmano te Yehova. Djɛkondeke ndoyapɛyɛ tshɛ djɛ nsuka nkano djɛ Yehova, djɛ Davidɛ ndjala nkfumi k’epe m’ɔkɔngɔ wɔ Nkfumi Saolo. Nde ayalaka lonkina la nkɔmano te Davidɛ kaanga nkambo ntshɔ iyomadjɛ Saolo efula.​—1 Sa. 20:32-34.

9. Wopo wɔkɔnge ewaso ente Jɔnata atayala la djewɔ te Davidɛ? Pakisola.

⁹ Ladjikɛnde Jɔnata ayalaka la ngandji kɛ m’anse k’oloko te Davidɛ, nde atowoka djewɔ kana ndɔwɔsa etengo ontonyi. Jɔnata ayalaki onfunyi w’akfula wɔ nsɔsɔlɔ edjinge onanyi wɔ mbandji w’oloko wolo. Anto watepelaki ambɔ, nde nya papa kɛnde Saolo, walekaki ‘mpongo lowango’ la ‘walekaki kimbwe wolo.’ (2 Sa. 1:22, 23) Djekondeke, Jɔnata akokaki ndaafuna lá kɛnɛ kelendana l’akambo wa nkekete wa ndananghe. Koko, Jɔnata atayala la yamano kana la djewɔ. Nde akɔpaki Davidɛ má oloko wolo wɔnde edjinge wopo wɔ ndaawɛkɛka te Yehova. Lá nsɔsɔlɔ, ngo m’ɔkɔngɔ wɔ Davidɛ ndjaka Goliatɛ, ndeke Jɔnata ndotateyɛka ndɔkɔpa ngete nyɔmɛlɛ. Wopo wɔkɔnge okokaso nyɛnyɛ ngandji kɛ m’anse k’oloko kɛ nghɔsɔ te wananyɔ l’ankaana yɛso?

10. Kɛkɔnge kesakisola ‘ndjokana ngandji k’efula kɛ m’anse k’oloko?’

¹⁰ Bible ntoshimelaka dj’iso ‘ndjokana ngandji k’efula kɛ m’anse k’oloko l’anteyi kɛso.’ (1 Pɛ. 1:22) Yehova alekɔ ndjɔmbɔmba kɛ wɔlɔ leso. Ngandji kɛnde kelekɔ efula lombombe, mande ntsha tombotshikala la nkɔmano tende, lako ekete kekoka ndoshimba djɛ nde nkindjɛ ntɔkɔpa. (Ɔrɔ. 8:38, 39) Itepela yɛ Grɛkɛ ikadjimola ‘efula’ mpɛyɛka ikanyi yɛ onto wonangha la welo djɛ nyɛnyɛ ngandji. Lá mbamba imɔtshi, apayalaka wɔndju djɛ nyɛnyɛ wananyɔ l’ankaana ngandji. Wina wɔ anto ankina otonanghelawɔ evunga, iso ladjɛ nkindjɛ ‘nkfulumeyana onto te winande la ngandji, tile welo wɛ l’oloko ɔmɔ djɛ nama osanga w’isawa m’okotshɛ wɔ nyuma k’ekina lá djokanelo djɛ vu.’ (Ɛfɛ. 4:1-3) Wina w’onanghaso la wolo djɛ ‘ndjala la djokanelo djɛ vu,’ topangilaka yimba ngo lá evunga wɛ wananyɔ waso. Koko tongonanghaka la wolo djɛ ndaawɛna etengo Yehova awɛnande.​—1 Sa. 16:7; Yee. 130:3.

11. Lamo okokawɔ ndjala okakasano wina ɔmɔtshi djɛ nyɛnyɛ ngandji kɛ m’anse k’oloko?

¹¹ Apayalaka wina enkfumɔ wɔdju djɛ nyɛnyɛ  wananyɔ l’ankaana ngandji kɛ m’anse k’oloko, peka peka wina w’ewaso evunga wɛwɔ. Nyɛnamaka etengo, kaanga Akristo amɔtshi wel’ɛtɛndɔ kɛ ntondo, wayalaki l’okakasano wɔsɔ. Ndjɔmbɔmba, mbala imɔtshi, Evodi nya Sutukɛ watayala l’okakasano wɔ nkamba ‘mpɛka la mpɛka [iwɔ la Poolo] nkambo djɛ losango lɔ wɔlɔ.’ Koko l’ɔtɛ w’elonga kɛmɔtshi, wayalaka l’okakasano wɔ ndjokana l’anteyi kɛwɔ. Djɛkondeke Poolo ndaakeketshɛ dj’iwɔ ‘ndjala ikanyi imɔ lá kɛnɛ kelendana la Nkfumi.’ ​—Flp. 4:2, 3.

12. Wopo wɔkɔnge okokaso nyɛnyɛ ente iso nkɔpaka wananyɔ l’ankaana yɛso?

¹² Wopo wɔkɔnge okokaso nyɛnyɛ ngandji kɛ m’anse k’oloko te wananyɔ l’ankaana yɛso lɔɔko kɛnɛ? Ntsha tombewa winaso Akristo wɔlɔ, nkoka ndjala wɔdju leso djɛ ndjewa wopo w’oyawokawɔ edjinge ndaawɛnyɛ ngandji kɛ m’anse k’oloko. Iso nkoka ndjala tolongo lawɔ, kanga ɛnɔnyi wɛkɔnge w’okotshɛwɔ kana ntena djɛkonge dj’iyomboyɛ. Vungɔ ente Jɔnata ayalaka ekokolo kɛ Davidɛ k’etengo ɛnɔnyi 30. Koko nde ayalaka ilongo yɛ nsɔsɔlɔ tende. Okokamba onto ɔmɔtshi l’otshumano wɔnyo, wolekɔ ilɛngɛ kana ekokolo nkoleka w’okokɛ ndjala ilongo yɛnde? Má nanghanghɔsɔ ndeke okokɛ nyɛnyɛ ente, wɛ ‘ndjokaka nkfumbo k’otondo kɛ wananyɔ ngandji.’​—1 Pɛ. 2:17.

13. Lamo isopakoke ndjala ilongo yɛ ma ma l’anto ankfumɔ wa l’otshumano?

¹³ Ndjala la ngandji kɛ m’anse k’oloko te wananyɔ l’ankaana, nkɔpaka nsakisola ante tongoyala ilongo yɛ ma ma l’onto onkfumɔ wɔ l’otshumano? Lako, nkambo ntshɔ mpalekɔ wɔdju. Lako nyɛtshi ndjala imama l’onto ɔmɔtshi ndeka anto ankina, ladjikɛnde tolekɔ lande okoma ɔmɔ. Yeso ɔsaki apɔstɔlɔ wande ankfumɔ etengo ‘tolongo,’ koko nde alekaki ndjala imama nya Djɔanɛ. (Dj. 13:23; 15:15; 20:2) Koko, Yeso atalekaki nanghela ngo Djɔanɛ akambo wa wɔlɔ ndeka anto ankina. Ndjɔmbɔmba, wina wɔ Djɔanɛ nya wɔnanyɛnghɛnde Djakɔbɔ iyɔlɔmbɛ djɛnde ndaapɛyɛ mpimpo kɛ djonyi efula lá Onkfumi wɔ Ndjambe, Yeso ashimelaka ante: ‘Ape lemi ndeke lɔpɛyɛ anto lotshungɔ lɔ onto nyintasɛ lá wadjɛ lɔwɔ kana lá womɛ lɔwɔ lɔmi.’ (Mar. 10:35-40) Etengo Yeso, topakoke nanghela tolongo tɔso  tɔ ma ma akambo wa wɔlɔ, ndeka anto ankina kana ntepela ente ndjala l’isɔnɔdi. (Dja. 2:3, 4) Ntsha iso nangha nghɔsɔ, tongokona ikanyi yɛ djatɔnelo, nkambo djepakoke nanghema l’otshumano w’Akristo.​—Yuda 17-19.

14. Lá nkilika Filipɛ 2:3, kɛkɔnge kekoka ntokotshɛ djɛ ndota ikanyi yɛ yamano?

¹⁴ Wina wɛnyanaso ngandji kɛ m’anse k’oloko l’anteyi kɛso, tongolama otshumano má ikanyi yɛ yamano. Vungɔ ente Jɔnata atahamana nya Davidɛ lá ndɔwɔsa etengo ontonyi nkambo djɛ nkɔsa kɛ lowandji. Isankfumɔ nkoka ndjokola ndjɔmbɔmba kɛ Jɔnata. Nyɔtɔsake winanyo Akristo etengo antonyi kana ndjala la djewɔ tewɔ l’akoka w’okotshɛwɔ, ‘koko l’okitshakitshɛ onkfumɔ, nyɔshi djɛ anto ankina nyoleka.’ (Wala Filipɛ 2:3.) Nyolame lá wɔɔngɔ ente onto onkfumɔ wɔ l’anteyi kɛso nkoka nangha nkambo mɔtshi djɛ nkotshɛ otshumano. Má ndjala l’okitshakitshɛ, tongɛna wekeka wa wɔlɔ walekɔ la wananyɔ l’ankaana yɛso edjinge tongoyala l’akoka wa mba wapɔ má ndjɔmbɔmba yɛwɔ yɛ wɔlɔ.​—1 Kɔ. 12:21-25.

15. Olakanyelo wɔkɔnge w’owɛ má kɛnɛ kekomelisa Tanya nya nkfumbo kɛnde?

¹⁵ Wina wɔ nkambo mɔtshi djɛ nyɛtshi otokomelawɔ lá lowiko lɔso, Yehova ntosukaka m’ɔtɛ wɔ ngandji kɛ m’anse k’oloko edjinge okotshɔ wɛnama papoo w’owaso me wananyɔ l’ankaana yɛso. Tɔkɔsa ndjɔmbɔmba kɛ kɛnɛ kekomelisa nkfumbo kɛmɔtshi, m’ɔkɔngɔ w’iwɔ nkilika nonghanyi kɛ loshi lɔ mpɔsɔ lɔ losanghanyɛ l’ekekete l’ewila efula lonanghemisa lá 2019 “Ngandji kepashilaki lotshinda lotshinda!” Tanya, mama kelekɔ lá wana asato, akɔndɔla ante: “Wina wɔ isotakalɔka tá ɔtɛlɛ w’isayalaka, otuka ɔmɔtshi wovungusanyɛka lɔwɔ lɔnde ko ndombohela otuka wɔso, isankfumɔ totahotala koko toposaka m’otuka, temalaka l’ontayimbo edjinge toyalaka la wɔma efula.  Onto ɔmɔtshi atoshimelaka dj’iso nyima m’ontayimbo, ko ndjingela l’otuka wɔnde dj’iso mbombama. Iyayale nde wɔnanyɛnghɛso ɔmɔtshi woyayɛki má losanghanyɛ lɔkɔ, koko ape ngo nde toko ndeke l’emalisa. Ewakɛ enkina etano weyisa m’owila wɔ Suède lá losanghanyɛ lɔkɔ, wemalaka edjinge iwɔ. Wankaana watovundaka l’alemba lemi la wana wami l’osasalo onkfumɔ, kɛsɔ ketokotshɛka dj’iso ndaawoka wɔlɔ! Nshimelaka wananyɔ l’ankaana yɛsɔ ente tolekɔ vu lako djoyi, koko watakɔpa ntotshika isɔmɛlɛ. Iwɔ watshikalaka laso tii wina wɔ otuka wɔ tofulumɛ tokotshɛka anto iyakome, ko wayashikikɛka djɛ tolekɔ la k’enkfumɔ kisayalaka la djonyi. Wina wɔ isapomana l’okakasano wɔsɔ, tɛnaka ngandji kɛ Yehova. Nkambo djetokomelisa djɛsɔ, djekembɛka ngandji kɛso te wananyɔ l’ankaana yɛso, edjinge djefudjɛka ngandji kɛso la djedjɛ djɛso te Yehova.” Ovungɔ etena kɛ ngayale la djonyi dj’okotshɔ, kɛ winako Okristo ɔmɔtshi ndɔkɛnyɛ ngandji kɛ m’anse k’oloko?

16. Donga djɛkɔnge djelekɔ laso djɛ nyɛnyana ngandji kɛ m’anse k’oloko l’anteyi kɛso?

¹⁶ Kolenda efula k’eposelo wɛ wɔlɔ wengoyala wina wɛnyɛso anto ankina ngandji kɛso kɛ m’anse k’oloko. Iso nsukaka wananyɔ l’ankaana yɛso wina w’opomanawɔ l’ekakasano. Iso nkembɛka osanga wolekɔ l’anteyi kɛ enkambi wɛ Ndjambe. Iso nyɛnyɛka djɛ tolekɔ ambeki wa nsɔsɔlɔ wa Yeso, edjinge kɛsɔ nsepaka wanɛ wakɔpa nkambela Yehova l’ɔtɛmwɛlɔ wɔ nsɔsɔlɔ. Nkambo deka djonyi nde, iso numɛka ‘Papa kɛso kɛ djandji efula edjinge Ndjambe kɛso ketosuka l’akambo ankfumɔ,’ Yehova. (2 Kɔ. 1:3) Nyotshɔ isankfumɔ tokindjɛ nyɛnyɛ edjinge nfudjɛ ngandji kɛso kɛ m’anse k’oloko!