1. Lá ndjɔmbɔmba kɛ Nkfumi Davidɛ, woopó wɔkɔnge anto amɔtshi wa l’anteyi kɛso okokawɔ ndawopolá?

ISANKFUMƆ nkombolaka ndjala la lowiko lɔ vu. Lako onto wɔkɔpaka ndjala l’ekiyano. Koko, lá wina ɛmɔtshi, iso nkokaka mpomana l’akambo watokiyanyɛ. Djɛkondeke, enkambi ɛmɔtshi wɛ Yehova nkoka ndjopola woopó wopolisa Nkfumi Davidɛ ante: ‘Ilá kɛ ngetenge monghoyala la wayi w’okiyano, la djodjo l’oloko wɔmi nfu inkfumɔ?’​—Yee. 13:2.

2. Kɛkɔnge k’ɛnaso lɔ lá djamba djɛnɛ?

² Kaanga isopakoke ntshungɔ m’ekiyano enkfumɔ, akambo wamɔtshi walekɔ w’okokaso nangha djɛ nkitshakitshɛ ekiyano. Lá djamba djɛnɛ, tɔngɛna ntondo ntondo akambo amɔtshi wakoka ntotshinda djɛ ndjala l’ekiyano. M’asɔ tɔngɛna akambo asamalo w’okokaso nangha djɛ ntokotshɛ dj’iso ntshikala vu wina w’opomanaso l’ekakasano.

3. Akambo wakɔnge wakoka ntotshinda djɛ ndjala l’ekiyano, ko kɛkɔnge k’isopalekɔ l’akoka wa nangha?

³ Akambo efula nkoka ntotshinda dj’iso ndjala l’ekiyano, koko topalekɔ l’akoka wa nshimba akambo wakɔ dj’ipa ntokomela. Ndjɔmbɔmba, topakoke nshimba ohandelo w’eshinga w’osombaso nkete djɛ ndɛ, ntshendja edjinge w’ofutelaso amvulu. Edjinge topewe mbala imangha winaso wal’olemo kana welá nkalasa iyongohonaka djɛ ntotshinda dj’iso ntshita nkɔmano djɛso kana ndjala l’enanghedji kɛ mbindo. Edjinge  topalekɔ la nkfulu kɛ nshimba anto wel’owila wɔso dj’iwɔ ntshika nangha akambo wa pɔlɔ. Topomana l’ekakasano wɛsɔ, ladjikɛnde efula k’anto ndɔsaka ngo akano wap’ɛlɛma la tɔkfɔ telá Bible. Lonkina, Satana, ndjambe k’andja wanɛ, ndjewaka ante anto amɔtshi wangawola djɛ ‘ekakasano wel’andja wanɛ,’ ndapekala dj’iwɔ nkindjɛ nkambela Yehova. (Mat. 13:22; 1 Dj. 5:19) Djɛkondeke, topakamɔ djɛ nyɛna ente, andja wanɛ wambolola l’ekakasano wetshinda anto dj’iwɔ ndjala l’ekiyano!

4. Kɛkɔnge kekoka ntokomela ntsha tomboleka ndakinyanyɛ lá nkambo dj’ekakasano wɛso?

⁴ Ekiyano nkoka ntokomɛ djɛ nsamba kaanga wina wɔ nkanela akambo ankina wa djonyi. Ndjɔmbɔmba, iso nkoka ndakiyanyɛ ente topangowa nfalanga yɛ nsomba nkete dj’oyɛso la djonyi, kana tokoka ndɔkfɔ olando ko, topangowa wolo wɔ ntshɔ t’olemo, kana ente wakoka ndotimɛ m’olemo. Iso nkoka lonkina ndakiyanyɛ ente topangotshikala la nkɔmano wina w’isongopomana l’ehemba wetotshinda djɛ mpendola ɛlɛmbɛ wɛ Ndjambe. Lako ilá Satana angotshinda anto wande djɛ nanyɛ enkambi wɛ Ndjambe, djɛkondeke, tokoka ndakiyanyɛ lá wopo wɔ isongelola wina w’iyongoyɛ ndotonanyɛ. Iso nkoka ndawopola ente: ‘Alekɔ nyɛtshi ndakiyanyɛ lá nkambo djɛ wayi wasɔ?’

5. Kɛkɔnge kɛ Yeso ndakɔpɛ ntepela wina wɔ ndatepela ante: ‘Nyotshike ndakiyanyɛ’?

⁵ Iso ndjewaka ente Yeso ashimelaka ambeki wande ante: ‘Nyotshike ndakiyanyɛ.’ (Mat. 6:25) Ndakɔpɛ nde ntepela ante topakoke nkiyana l’ɔtɛ wɔ nkambo nkfumɔ? Ape nghɔsɔ! Kaanga l’etsho wɛ ntondo, enkambi wɛ Yehova ɛmɔtshi wɛ nkɔmano wananaki l’ekiyano, koko Yehova akindjɛka ngo ndakɔpa. * (1 Nk. 19:4; Yee. 6:3) Yeso atokeketshɛki. Nde atakɔpa iso ndakiyanyɛ amboleka nkambo dj’ekakasano wel’andja wanɛ dj’ipa iso ndovungɛ ente, nkambela Yehova ndeke nkambo djeleka djonyi lá lowiko lɔso. Iya kɛkɔnge k’okokaso ngangha wina woyɛso l’ekiyano?​—Lenda ipapango: “ Wopo w’okokaso nangha nkambo djɛsɔ.”

6. Lá nkilika Filipɛ 4:6, 7, kɛkɔnge kekoka ntokotshɛ djɛ nkitshakitshɛ ekiyano wɛso?

⁶ 1) Ndɔmbaka mbala la mbala. Akristo wapomana l’ekakasano nkoka mba okotshɔ wina woyawɛkɛwɔ te Yehova má alɔmbɛlɔ wawɔ wa l’oloko ɔmɔ. (1 Pɛ. 5:7) Nde nkoka nkandjimola alɔmbɛlɔ wako má nkɔpɛyɛ ‘vu djɛ Ndjambe djeleka tokanyi [t’onto] onkfumɔ.’ (Wala Filipɛ 4:6, 7.) Yehova angɔtɔpɛyɛ vu djɛsɔ má lotshimbo lɔ wolo wɔnde wɔ nyuma k’ekina.​—Nga. 5:22.

7. Akambo wakɔnge woyɛso ladjɛ mvungɔka wina wɔlɔmbaso Ndjambe?

⁷ Wina wɔlɔmbɛ Yehova, djipolande oloko wɔko. Shimelande akambo papo papoo. Shimelande okakasano wɔko, edjinge pakisolande wopo woyawokɛ lá nkambo dj’okakasano wɔkɔ. Ntsha nkambo mɔtshi dekɔ dj’okokɛ nangha djɛ nkandola okakasano wɔkɔ, lɔmbande balo djɛ wɛ ndjewa wopo w’okokɛ nangha nkambo djɛkɔ edjinge wolo wɔ nangha nkambo djɛkɔ. Ntsha opewe kɛnɛ k’okokɛ nangha djɛ wɛ nkandola okakasano wɔkɔ, lɔmba Yehova djɛ nde nkokotshɛ dj’ipa wɛ ndeka ndaakiyanyɛ. Wina w’otepelɛ papo papoo l’alɔmbɛlɔ wako, ongɛna papoo wopo wɔ Yehova ɔpɛyɛnde nsakiso l’alɔmbɛlɔ wakɔ. Ntsha opawisa nsakiso mbala kɛkɔ kɛmɔ m’ɔkɔngɔ wɔ dɔmbɛlɔ djɛko, tɔlɛmbake ndɔmba. Yehova apakombola ngo wɛ ndoshimelaka akambo papoo papoo toko, koko nde nkombolaka edjinge wɛ ndjala l’entete l’alɔmbɛlɔ wako.​—Luka 11:8-10.

8. Akambo wkɔnge w’oyɛso ladjɛ ntepelaka l’alɔmbɛlɔ waso?

 ⁸ Wina wosodjɛ edjito wɛko le Yehova lá dɔmbɛlɔ, ilaka totepela tɔ ndokawoyɛ lokasa. Alekɔ wɔlɔ iso nkanelaka ɛtshɔkɔ w’owaso, kaanga lá wina w’oyɛso l’ekakasano efula. Iya kɛkɔnge k’okokɛ nangha ntsha lá wina ɛmɔtshi opayewaka nshimela Yehova wopo woyawokɛ? Vungɔ ente Yehova nkadjimolaka kaanga alɔmbɛlɔ watotenyi w’etengo ‘lambɔkɔwɔnda, onkotshɛ!’​—2 Ɛk. 18:31; Ɔrɔ. 8:26.

9. Kɛkɔnge k’okokaso nangha wina woyɛso la wɔma?

⁹ 2) Yaawɛkɛ lá balo djɛ Yehova, koko ape lá djɛko. L’eleko k’enanɛyi N.Ɛ.K., ase Asuriya wanaka ase Juda djɛ ndaananyɛ. Má wɔma wɔ ndjala l’anse kɛ lowandji lɔ ase Asuriya, ase Juda wayawɛkɛka te apanghano w’ase Edjipito djɛ mpona okotshɔ. (Iza. 30:1, 2) Yehova awewolaka ante mpendo kɛwɔ, kengaakomɛ tá etshitanelo. (Iza. 30:7, 12, 13) Má lotshimbo l’ɔprɔfɛta Izaya, Yehova ashimelaka wopo wiyakoke mba vu djɛ nsɔsɔlɔ. Nde ashimelaka ante: ‘Wolo wɔnyo wongoyala má ntshikala vu edjinge nyɛnyɛ wɛkamu wɔnyo’ te Yehova.​—Iza. 30:15b.

10. L’akambo amɔtshi wakɔnge w’okokaso nyɛnyɛ dj’iso ndjilelaka Yehova oloko?

¹⁰ Lá wina wɛkɔnge okokaso nyɛnyɛ ente iso ndawɛkɛka le Yehova? Tokolenda ndjɔmbɔmba imɔtshi. Kɔsa djɛ wambokɔpɛyɛ olemo wɔ iyongokofutaka wɔlɔ efula, koko wopangɔkɔpɛyɛ mbamba kɛ wɛ nkambela Yehova wopo w’okambelɛ win’ɔsɔ. Kana kokanela djɛ winako ɔmɔtshi wɔl’olemo ambotateyɛ nkɛnyɛ ngandji kɛ l’antenyɛ mpame la womoto, koko nde apalekɔ onkambi wɔ Ndjambe wombolongola batisimo. Ko, kɔsa djɛ ewoto kɛko kɛmɔtshi k’ɔkɔpɛ efula ambokoshimela ante: ‘Sɔna onto ɔmɔ, lemi kana Ndjambe kɛko,’ ngongonangha nge? L’akambo ankfumɔ wasɔ, ongoyala l’okakasano wɔ ndɔsa nkano, koko lá nkambo la nkambo, Yehova ntɔpɛyɛka ɛlɔndjɛlɔ koyɛso la djonyi. (Mat. 6:33; 10:37; 1 Kɔ. 7:39) Koko woopó wokinɛ: Ongoyawɛkɛ te Yehova edjinge nkilika ɛlɔndjɛlɔ k’ɔkɔpɛyɛnde l’akambo wasɔ?

11. Ɛkɔndɔ wɛkɔnge welá Bible w’okokaso ndjeka djɛ nama vu djɛso wina w’ɔtɛnyɛwɔ ndjolo?

¹¹ 3) Eka djɛ mba olakanyelo má ndjɔmbɔmba yɛ wɔlɔ la yɛ nyɛtshi. Bible dekɔ l’ɛkɔndɔ efula wɛnyɛ djɛ alekɔ djonyi ntshikala vu edjinge ndjilela Yehova oloko. Wina wowalɛ ɛkɔndɔ wɛsɔ, lenda kɛnɛ kekotshisa enkambi wɛ Ndjambe djɛ ntshikala vu wina w’iyawɛnyɛka ndjolo. Ndjɔmbɔmba, wina wɔ tominanyi tel’adjiko tɔ ase Juda iyashimbe apɔstɔlɔ dj’ipa iwɔ mpoposanyɛ, iwɔ watoka wɔma. Koko, l’oloko wolo onkfumɔ iwɔ watepelaka ambɔ: ‘Iso ladjɛ nɛmɛyɛ Ndjambe etengo oyɛnde nkfumi l’edjena kɛ nɛmɛyɛ anto.’ (Ele. 5:29) Kaanga m’ɔkɔngɔ wɔ iwɔ ndaakfusá, apɔstɔlɔ watoka wɔma. Lamo? Mande iwɔ w’ewaki ambɔ Yehova alekɔ l’onkoko wɔwɔ. Nde ayalaki l’osasa lá nkambo djɛwɔ. Djɛkondeke, iyakindjɛ mpoposanyɛ losango lɔ wɔlɔ. (Ele. 5:40-42) Wopo wɔk’ɔmɔ ndeke, wina wɔ ombeki Stɛfano ndayale lá ntondo kɛ nyɔyi, nde atshikalaka vu ipa ndjoka wɔma ko elongi kɛnde kɛnamaka ‘etengo kɛ ondjelo.’ (Ele. 6:12-15) Lamo? Mande nde ayalaki la ndashikikɛ ante Yehova alekɔ l’osasa lá nkambo djɛnde.

12. Lá nkilika 1 Pɛtɛlɔ 3:14 edjinge 4:14, lamo okokaso ndjala l’osasa ntsha watɛnyɛ ndjolo?

¹² Apɔstɔlɔ wayalaki l’ilembetelo yawɛnyɛki papoo djɛ Yehova ayalaki lawɔ. Nde apɛyɛka nkfulu kɛ nangha ansese. (Ele. 5:12-16; 6:8) Iso topalekɔ la nkfulu kɛsɔ lɔɔko kɛnɛ. Koko, kaanga oyɛwɔ nghɔsɔ, má lotshimbo l’Otepela wɔnde, Yehova ntoshikikɛka la ngandji k’ekfumɔ ante wina wɛnaso ndjolo l’ɔtɛ wɔ wayi wa wɔlɔ, nde nsasangaka lá nkambo djɛso edjinge nyuma kɛnde kelekɔ laso. (Wala 1 Pɛtɛlɔ 3:14; 4:14.) Djɛkondeke,  l’edjena k’iso ndakiyanyɛ amboleka l’ɔtɛ wɔ kɛnɛ k’isongonangha wina w’isongopomana l’ekakasano l’etsho weyaye, alekɔ djonyi iso ndjila yimba lá kɛnɛ k’okokaso nangha win’ɔsɔ djɛ nkembɛ djawo djɛso lá nkfulu kelekɔ la Yehova djɛ ntosuka la ntowikɛ má ndjolo. Ngo ngete ambeki wa l’ɛtɛndɔ kɛ ntondo iyananghe, iso ladjɛ ndawɛkɛ lá daka djɛ Yeso djɛnɛ: ‘Langonyɔpɛyɛ balo edjinge langonyokotshɛ djɛ nyo ndjewa kɛnɛ k’okokanyo ntepela edjinge antonyi wanyo wangosamba kɛnɛ k’okokawɔ nyokandjimola.’ Yeso atolakaka ante: ‘Má okfulumeyelo wɔnyo ndeke nyongowikɛ mbiko yɛnyo.’ (Luka 21:12-19) Edjinge totavungɛke kaanga ndambo daambi ente Yehova mbombaka lá wɔngɔ wɔnde kaanga tokakambo tɔ daambi tolendena l’enkambi wɛnde wɛ nkɔmano. Mpeyi má balo djɛnde djɛsɔ, nde angakfundola.

13. Wɛlɔ wɛkɔnge w’owaso má ndjeka kɛnɛ kekomelisa wanɛ watakindjɛ ntshikala vu edjinge ndawɛkɛ te Yehova?

¹³ Iso nkoka lonkina ndjeka akambo wakomelisa wanɛ watalama vu edjinge nkɔmano djɛwɔ te Yehova. Ndjeka ndjɔmbɔmba yɛ nyɛtshi yɛsɔ, angotokotshɛ dj’ipa iso nangha wepo w’evunga w’iyananghe. Ndjɔmbɔmba, wina wɔ Nkfumi Asa ndakome Nkfumi lá Juda, nde ayawɛkɛka te Yehova wina wɔ oloyi w’angala iyaye ndoonanyɛ, edjinge Yehova okotshɛka djɛ nde ndjila otshumba. (2 Ɛk. 14:9-12) M’ɔkɔngɔ, wina wɔ Nkfumi Baasha k’Isariyɛlɛ ndaye djɛ ndoonanyɛ, Asa atayawɛkɛ lonkina te Yehova etengo ndananghe ntondo, koko nde asombaka angala w’ase Asuriya djɛ ndookotshɛ. (2 Ɛk. 16:1-3) Edjinge l’ekomo kɛ lowiko lɔnde, wina w’indakfu olando w’ekekete nde atayawɛkɛ te Yehova djɛ mpona okotshɔ.​—2 Ɛk. 16:12.

14. Elakanyelo wɛkɔnge w’okokaso mba má evunga wenanghisa Asa?

¹⁴ Má bango, Asa ahonaka Yehova wina w’indapomana l’ekakasano. Koko m’ɔkɔngɔ nde atakindjɛ ndawɛkɛ te Ndjambe djɛ mpona okotshɔ, nde ahonaka ngo nshiyɛ ekakasano wɛnde nyɔmɛlɛ. Ɛnamaki etengo nonghanyi kɛ Asa k’indɔshi djɛ mpona okotshɔ wɔ ase Asuriya, djɛ nanyɛ ase Isariyɛlɛ kekokaka ndjala wɔlɔ. Koko eposelo wɛ wɔlɔ w’indawa má nonghanyi kɛsɔ weyalaka ngo itetenyi. Yehova oshimelaka má lotshimbo lɔ ɔprɔfɛtɛ ɔmɔtshi ante: ‘Mande oyawɛkɛka te nkfumi k’Asuriya ko otayawɛkɛ te Yehova Ndjambe kɛko, angala wa nkfumi k’Asuriya wambima má lɔwɔ lɔko.’ (2 Ɛk. 16:7) Iso la djɛ mbadjɛ dj’ipa nkanela ente, iso nkoka nshiyɛ ekakasano wɛso isɔmɛlɛ ipa la mpona ɛlɔndjɛlɔ kɛ Otepela wɔ Yehova. Kaanga wina wɔlɔmbama djɛ ndɔsa nkano lankeke lankeke, iso ladjɛ ndawɛkɛ te Yehova, ko nde angotokotshɛ dj’iso mba eposelo wɛ wɔlɔ.

15. Kɛkɔnge k’oyɛso ladjɛ nangha wina w’owalaso Bible?

¹⁵ 4) Kota avɛrse welá Bible l’ɔtɛ. Wina wowɛ avɛrse amɔtshi welá Bible wɛnyɛ djɛ alekɔ djonyi ntshikala vu edjinge ndawɛkɛ te Yehova, hona djɛ wɛ ndakota l’ɔtɛ. Djɛ ndakota, wɛ nkokaka ndawalaka la djoyi djɛ wolo kana ndafuna l’edjena kɛmɔtshi ko ndawalaka mbala la mbala. Yehova ashimelaka Yoshua djɛ mbalaka buku dj’ɛlɛmbɛ mbala la mbala djɛ nde ndjewa nangha akambo la balo. Kɛnɛ k’indawalaka má buku dj’ɛlɛmbɛ kekokaki ndokotshɛ dj’ipa nde ndjoka wɔma koko, ndjala l’oloko wolo djɛ nde ndjewa ndɔndjɛ owila wɔ Ndjambe. (Yos. 1:8, 9) Avɛrse efula walekɔ l’Otepela wɔ Ndjambe nkoka ntɔpɛyɛ vu lá wɔɔngɔ edjinge l’oloko, wina w’opomanaso l’akambo watotshinda dj’iso ndjala l’ekiyano kana la wɔma.​—Yee. 27:1-3; Woo. 3:25, 26.

16. Wopo wɔkonge Yehova okambande l’otshumano djɛ ntokotshɛ djɛ ntshikala vu edjinge ndawɛkɛ tende?

¹⁶ 5) Yalaka wina enkfumɔ esanga l’enkambi wɛ Ndjambe. Yehova nkambaka la wananyɔ l’ankaana yɛso dj’iwɔ ntokotshɛ dj’iso nama vu edjinge ndawɛka tende. Lá nsanghanyɛ  yɛso Iso nkeketshamaka má wamba wananyɔ ɔpɛyɛwɔ, kɔmantɛrɛ yɛso Iso edjinge wamba wakembɛ wambakaso isawɔ. (Heb. 10:24, 25) Iso nkoka nkeketshamaka efula lonkina wina woshimelaso tolongo tɔso t’ilelaso oloko to l’otshumano ekiyano wɛso. ‘Itepela yɛ wɔlɔ’ yime ilongo yɛ nsɔsɔlɔ nkoka ntokotshɛ djɛ nkitishakitshɛ ekiyano wɛso.​—Woo. 12:25.

17. Lá nkilika Hebero 6:19, wopo wɔkɔnge nkongi djɛso dj’Onkfumi otokotshɛwɔ djɛ nshikimala kaanga lá ntondo k’ekakasano wɛkɔnge?

¹⁷ 6) Kembɛ nkongi djɛko. Nkongi djɛso dj’Onkfumi alekɔ etengo ‘longo lɔ masuwa,’ ntokotshɛka djɛ nshikimala kaanga lá ntondo k’ekakasano kana ekiyano wɛkɔnge. (Wala Hebero 6:19.) Tɔnɔlaka lá kɛnɛ kelendana la lowiko lɔ wɔlɔ lɔ Yehova ndombotolaka l’etsho weyaye, lopangoyalá l’ekiyano. (Iza. 65:17) Kanelaka lá wopo wɔ ngongotoyala l’andja wa vu, l’edjena kɛ akambo wa nyɛtshi wapangotokomela. (Mik. 4:4) Lonkina wɛ nkoka nkembɛ nkongi djɛko wina woshimelɛ anto ankina akambo walendana l’andja wa bango. Nangha k’enkfumɔ k’okokɛ nangha djɛ ndaapɛyɛ efula l’olemo w’ipoposanyɛ la wɔ nkfumba anto ambeki. Ntsha wɛ nangha nghɔsɔ, ‘ongoyala l’eshikikelo k’efula lá kɛnɛ kelendana la nkongi tii t’ekomo.’​—Heb. 6:11.

18. Ekakasano wɛkɔnge wekoka ntokomela l’etsho weyaye, ko kɛkɔnge k’okokaso nangha djɛ ndalongela?

¹⁸ Ladjikɛnde tomboyala entshupa l’ekomo k’andja wanɛ, tongopomana l’ekakasano efula wengotokiyanyɛ efula. Vɛrse djɛso dj’ɔnɔnyi wɔ 2021 ngotokotshɛ djɛ nana l’ekakasano edjinge ntshikala vu ape má wolo wɔso isɔmɛlɛ, koko má ndawɛkɛ te Yehova. L’ilá k’ɔnɔnyi wɔnɛ, nyontshɔ tɛnyɛ má nanghedji djɛso ente tolekɔ la djawo lá daka djɛ Yehova djɛnɛ: ‘Nkfulu kɛnyo kengoyala má ntshikala vu edjinge má nyɛnyɛ wɛkamu wɔnyo.’​—Iza. 30:15.