1. Wopo wɔkɔnge anto oyawokakawɔ winá wɔ ose nkfumbo ɔmɔtshi oposande m’otshumano?

ONTO ɔmɔtshi w’okɛ ngandji ambóposá m’otshumano? Kɛsɔ nkoka mpɛyɛ paa l’oloko! Nkaana kɛso k’etawɔ Hilda atepelaka ante: “Winá wɔ womɛmi wɔ nkɔmano ndavu m’ɔkɔngɔ w’ɛnɔnyi 41 wɛ bala djɛso, ndjokaka entengo ɔsɔ ndeke nkambo djelekisa mpɛyɛ paa lá lowiko. * Koko winá wɔ wɔnami wɔ mpame, wadjɛnde la wana wawɔ yapose m’otshumano, ɔsɔ ayalaka nyangho kambo djelekisa tshɛ nyɛtshi le lemi.”

2-3. Lá nkilika Yeembo 78:40, 41, wopo wɔkɔnge Yehova oyawokakande winá wɔwɛkɔ enkambi wɛnde ɛmɔtshi?

² Kokanela wopo wɔ Yehova ndayale la paa l’oloko winá wɔ ondjelo ɔmɔtshi welá nkfumbo kɛnde ndɔtɔmbɔkwɛla! (Yuda 6) Kokanela lonkina yɛnyi yeyalisa lande, winá wɔ ndɛɛnaká owila wɔnde w’Isariyɛlɛ wɔ ndakɔpaka efula, wɔtɔmbɔkwɛla mbala la mbala. (Wala Yeembo 78:40, 41.) Yashikikɛ ente Papa kɛso kel’olongo ndjalaka lonkina la yɛnyi efula winá w’onto ɔmɔtshi w’okɛ ngandji ambɔwɛkɔ. Nde nsipisoyɛka paa kookɛ. La djandji nkfumɔ, nde angokokembɛ la angɔkɔpɛyɛ osukɔ w’oyɛ la djonyi.

³ Lá djamba djɛnɛ, tɔngɛna kɛnɛ k’okokaso nangha djɛ mba okotshɔ wɔ Yehova winá w’onto ɔmɔtshi w’ɔkɔpaso otshikande ndookambela. Tɔngɛna lonkina wopo w’okokaso nkotshɛ anto ankina wel’otshumano wapomana l’okakasano wɔsɔ. Koko ntondontondo, nyontshɔ tokolenda ikanyi imɔtshi yɛ nyɛtshi y’oyɛso ladjɛ ndjewɔ.

4. Wopo wɔkɔnge efula kɛ ambotshi oyawokakawɔ winá wɔ wɔnawɔ ɔmɔtshi ɛkɔnde Yehova?

⁴ Winá wɔ wɔnawɔ ɔmɔtshi wɔ ngandji ɛkɔnde Yehova, ambotshi efula wangoyalake l’ekfumbo kɛ nkanela ambɔ wayalaka ladjɛ  nangha nkambo mɔtshi djɛ nkotshɛ wɔnawɔ djɛ nde ntshikala lá nsɔsɔlɔ. M’ɔkɔngɔ wɔ wɔnande mposa m’otshumano, wɔnanyɔ wetawɔ Luke atepelaka ante: “Nkanelaka ente ɛkɔmɔ oyɛwɔnde le lemi. Nyɛnaka kaanga alɔ wa nyɛtshi lá nkambo djɛsɔ. Mbala efula lalelaki edjinge oloko wɔmi watshɛki.” Elizabeth, nkaana kepomanisa la wopo wɔ nkambo djɛkɔ mɔ ayawopolaki mbala efula ante: “Ovunga wɔkɔnge wɔ mananghe etengo nyɔ? Ndawokaki etengo, ntewa nkɔkɔmɛ akambo wa nsɔsɔlɔ l’oloko wɔ wɔnami.”

5. Winá wɔ onto otshikakande nkambela Yehova, ɛkɔmɔ oyɛwɔ le na?

⁵ Iso ladjɛ mvungɔka ente Yehova atɔpɛyɛka sankfumɔ lotshungɔ lɔ nsɔna. Kɛsɔ nsakisolaka ante iso nkoka nsɔna djɛ ndɔlɛmɛyɛ kana lako. Wana amɔtshi watawa ambotshi waapɛyɛ ndjɔmbɔmba kɛ wɔlɔ, koko wɔsaka nkano djɛ nkambela Yehova la wakindjɛ ntshikala la nkɔmano tende. Ankina wawaka ambotshi wananghisa la wolo djɛ ndaalakanyɛ dj’iwɔ mbika lá topo tokana la tɔkfɔ telá Bible, koko wayɛka ndotshika akambo wa nsɔsɔlɔ winá wɔ yafule. Ekomo ekomo, iso ladjɛ nsɔna isɔmɛlɛ ntsha tongokambela Yehova. (Yos. 24:15) Djɛkondeke, nyo ambotshi wayalaka la nyɛnyi winá wɔ wɔna ɔmɔtshi otshikande nkambela Yehova, nyɔkɔmbɛ nkanela ente ɛkɔmɔ nde lenyo!

6. Wopo wɔkɔnge wɔna okokande ndawoka winá wɔ ombotshi wɔnde ɔmɔtshi ɛkɔnde Ndjambe?

⁶ Lá mbamba imɔtshi, ombotshi nkoka ntshika nkambela Yehova edjinge nkadjɛ kaanga nkfumbo kɛnde. (Yee. 27:10) Nkambo djɛsɔ nkoka ndjala paa efula le wana wakilikaka ndjɔmbɔmba y’ambotshi wawɔ. Esther, kanga papa kɛnde keposisa m’otshumano, ntepelaka ante: “Lalelaki mbala efula mande nsipisoyɛka ente nde atakoma ngo lá ntshika akambo wa nsɔsɔlɔ toko. Nde ɔsaka nkano djɛ ndjɛkɔ Yehova lotshinda. Lemi nkɔpaka papa kɛmi efula, djɛkondeke winá wɔ ndapose m’otshumano, lakiyanaki winá enkfumɔ nkambo djɛ wɔlɔ wɔnde. Latshimbaki kaanga wɔɔngɔ.”

7. Wopo wɔkɔnge Yehova ndokaka lá nkambo djɛ wɔna ɔmɔtshi wɔ ombotshi wɔnde amboposa m’otshumano?

⁷ Wana, ntsha ambotshi wanyo amɔtshi wamboposa m’otshumano, mbɔ nyewe ente tokiyana esanga lanyo! Tɔmbɔnyɔwɔnda djɛ nyo ndashikikɛ ente edjinge Yehova nsipisoyɛka paa kelekɔ lanyo. Nde nyɔkɔpaka edjinge nsasangaka lombombe winá wolamanyo nkɔmano djɛnyo, nghɔsɔ ndeke oyɛwɔ kaanga leso wananyɔ l’ankaana yɛnyo. Nyovungɔ ente, apalekɔ nyo ndeke lotshindisa ambotshi wanyo djɛ ndɔsa nkano djɛsɔ. Etengo sotepelaki má djiko, Yehova apɛyɛka onto onkfumɔ lotshungɔ lɔ nsɔna. Lasɔ, onto onkfumɔ w’oyalambola la wolongola batisimo ‘la djɛ mbɛmba odjito wɔnde nyɔmɛlɛ.’​—Nga. 6:5, nɔtɛ.

8. Kɛkɔnge kɛ ase nkfumbo wa nkɔmano okokawɔ nangha winá w’okongawɔ djɛ onto wɔwɔ wɔ ngandji wɔmbɛkɔ Yehova nkalɔ tende? (Lenda lonkina ipapango “ Kalɔ te Yehova.”)

⁸ Winá w’onto ɔmɔtshi w’okɛ ngandji ɛkɔnde Yehova, alekɔ wɔlɔ wɛ ndjala la nkongi ente lofu lɔmɔtshi nde angokalɔ te Nde. Kɛkɔnge k’okokɛ nangha lá ntondo kɛnde nangha nkambo djɛsɔ? Nangha la wolo djɛ ndjala la lonyuma lɔ wolo. Má nangha nghɔsɔ, wɛ ɔngɔpɛyɛ ndjɔmbɔmba kɛ wɔlɔ te ase nkfumbo ankina kaanga te onto wɔkɔ womboposa m’otshumano. Lonkina, ongowa wolo wolekɔ lawɛ djonyi djɛ nkfulumeyɛ yɛnyi yɛko. Nyotshɔ tokolenda akambo amɔtshi wa kɔɔ w’okokɛ nangha.

9. Lá topo tɔkɔnge tokokɛ mba lokembo me Yehova? (Lenda lonkina ipapango “ Avɛrse amɔtshi wakoka nkokembɛ ntsha onto wɔko ɔmɔtshi wɔ ngandji ambɛkɔ Yehova.”)

⁹ Kindjɛ ndjala la nonghanyi kɛ wɔlɔ k’akambo wa nyuma. Alekɔ djonyi efula wɛ nkindjɛ ndakembɛ nghɔmɛlɛ la nkembɛ ase nkfumbo ankina. Wopo wɔkɔnge w’okokɛ nangha nkambo djɛsɔ? Waka lokembo me Yehova má nkindjɛ ndjala la nonghanyi kɛ wɔlɔ kɛ mbalaka Otepela wɔ Ndjambe, ntɔnɔlaka m’eteyi la nsanghanaka lá nsanghanyɛ y’Akristo. Joanna, kanga nyɔ kɛnde la papa kɛnde watshikaka akambo wa nsɔsɔlɔ, ntepelaka ante: “Lemi ndjalaka la vu winá w’owalami akambo walendana l’anto wotepelawɔ lá Bible, ndjɔmbɔmba Abigayɛlɛ, Ɛstɛrɛ, Djɔbɔ, Yosɛfu, la Yeso. Ndjɔmbɔmba yɛwɔ yelodjɛka oloko la wɔɔngɔ wɔmi la tokanyi tɔ wɔlɔ tonkotshɛki djɛ nkitshakitshɛ yɛnyi yɛmi. Lonkina, teembo totshikitanyi tonkembɛka efula.”

10. Kɛkɔnge kɛ Yeembo 32:6-8 otoshimelande lá wopo w’okokaso ndongela yɛnyi yɛso?

¹⁰ Shimela Yehova ekiyano wɛko enkfumɔ. Ntsha opayawoke wɔlɔ, totshikake ndɔɔlɔmba. Wɔnda Ndjambe kɛso kɛ ngandji ‘djɛnde nkokotshɛ djɛ wɛ nyɛna okakasano wɔko etengo nde ɛnande la djɛ nde nkɔpɛyɛ ntɔnɔ la nkɛnyɛ mboka koyɛ ladjɛ ntshɔ.’ (Wala Yeembo 32:6-8.) Lá nsɔsɔlɔ, nkoka ndjala paa efula djɛ nshimela Yehova wopo w’oyawokɛ. Koko Yehova nsipisoyɛka yɛnyi yelekɔ lawɛ l’oloko. Nde nkɔkɔpaka efula la nkɔlɔmbaka djɛ wɛ ndodjipola oloko wɔko.​—Epo. 34:6; Yee. 62:7, 8.

11. Lá nkilika Hebero 12:11, lamo oyɛso ladjɛ nsuka dilanyɛ djɛ Yehova djɛ la ngandji? (Lenda edjinge ipapango “ Oposelo w’onto m’otshumano nyɛnyɛka ngandji kɛ Yehova teso.”)

¹¹ Suka nkano djɛ tokokolo. Oposelo w’onto m’otshumano, alekɔ l’anteyi kɛ nonghanyi yɛ Yehova. Dilanyɛ djɛnde djɛ la ngandji djelekɔ lá wapɔ w’onto onkfumɔ ndjila edjinge kanga lonanghisa ovunga.  (Wala Hebero 12:11.) Anto amɔtshi wel’otshumano, nkoka ntepela djɛ tokokolo wapɔsisa nkano djɛ wɔlɔ, koko vungɔ ente wepo w’anto wa nghɔsɔ wapakɔpaka ntepela akambo wa nyɛtshi walendana l’onto wonanghisa ovunga. Iso topewe ikakambo inkfumɔ. Djɛkondeke, alekɔ nkambo djɛ balo iso ndashikikɛ ente tokokolo tolomboyisa onto wananghaka la wolo djɛ nkilika tɔkfɔ tɔ m’Afunelo la ndomboyɛ lá nkambo ‘djɛ Yehova.’​—2 Ɛk. 19:6.

12. Wapɔ wɔkɔnge wowisa anto amɔtshi m’ɔtɛ w’iyasuke nonghanyi kɛ Yehova kelendana la dilanyɛ?

¹² Ntsha wɛ nsuka nkano djɛ tokokolo djɛ mposɛ onto wɔko wɔ ngandji m’otshumano, wɛ nkoka ndookotshɛ djɛnde nkalɔ te Yehova. Elizabeth kanga sotepelaki má djiko ntepelaka ante: “Okakitɔnelo wɔ la wɔnaso w’ekokolo ayalaka okakasano w’efula leso. Koko m’ɔkɔngɔ wɔnde nkalɔ le Yehova, nde awolaka ante nde akokaka mposa m’otshumano. M’ɔkɔngɔ, nde ayɛka ndɛnyɛ djedjɛ djɛnde lá elakanyelo w’indawa. Nde ntepelaka ante: Dilanyɛ djɛpɛyɛ Yehova djengoyalake winá enkfumɔ ngo wɔlɔ.” Womɛnde Mark, akfɛka ante: “Ilá efula m’ɔkɔngɔ, wɔnaso atoshimelaka ante, ntsha nde awolaka nkalɔ l’otshumano nde, iso totayapɛyɛki tende l’akambo ankfumɔ. Ndekɔ l’osasa efula wopo wɔ Yehova ndatokotshɛ dj’iso ndjala la ntshunamo.”

13. Kɛkɔnge kekoka nkokotshɛ djɛ wɛ nana la yɛnyi yɛko?

¹³ Sawola la tolongo tosipisoyɛ wopo w’oyawokɛ. Yapɛyɛ te Akristo wambotshunda wakoka nkokotshɛ djɛ wɛ nama ikanyi yɛ wɔlɔ. (Woo. 12:25; 17:17) Joanna, kanga sotepelaki má djiko, ntepelaka ante: “Ndawokaki olengedji. Koko nsawola la tolongo tɛkɛmi oloko, ankotshɛka efula.” Ko okokɛ nangha mo ntsha anto amɔtshi wa l’otshumano watepela akambo wakoka nkokiyanyɛ?

14. Lamo oyɛso ladjɛ ‘nkindjɛ nkfulumeyana la nyimeyana l’anteyi kɛso l’oloko ɔmɔ’?

¹⁴ Yala la balentshitshi te wananyɔ l’ankaana yɛko. Lá nsɔsɔlɔ, apalekɔ onto onkfumɔ ndeke longokoshimela akambo wa wɔlɔ. (Dja. 3:2) Isankfumɔ tolekɔ anto wa ntshamba djɛ djɔ, djɛkondeke tokamɔke ntsha anto amɔtshi wapewe kɛnɛ k’okokawɔ ntepela kana wambotepela nkambo mɔtshi djembokokiyanyɛ ipa la iwɔ ndjewa. Vungɔ dako dj’ɔpɔstɔlɔ Poolo djɛnɛ: ‘Nyokindjɛ nkfulumeyana evunga edjinge nyimeyanake l’oloko ɔmɔ l’anteyi kɛnyo ayale kaanga onto alekɔ la nkambo djɛ nkiyanela winande.” (Kɔl. 3:13) Nkaana kɛmɔtshi kɛ ewoto kɛnde ndapose m’otshumano, atepelaka ante: “Yehova ankotshɛka djɛ lemi nyimeyɛ wananyɔ wahonaki nkembɛ lemi, koko wánkiyanyɛki má yopo y’iyankembɛka.” Kɛkɔnge k’otshumano okokawɔ nangha djɛ nkotshɛ ase nkfumbo wambotshikala la nkɔmano?

15. Kɛkɔnge k’okokaso nangha djɛ nkotshɛ ase nkfumbo wa onto wɔwɔ ɔmɔtshi wɔ ngandji amboposa m’otshumano?

¹⁵ Yala l’oloko wɔlɔ edjinge nanghela ase nkfumbo wambotshikala la nkɔmano akambo etengo tolongo. Nkaana kɛmɔtshi ketawɔ Miriam nshikikɛka ante m’ɔkɔngɔ wɔ nkaana kɛnde kɛ mpame mposa m’otshumano, nde ayalaki la yɛnyi djɛ ntshɔ tá nsanghanyɛ. Nde ntepelaka ante: “Layalaki la wɔma lá kɛnɛ  k’anto yongotepela. Koko tolongo tɔmɔtshi toyalaka, tokapanisa la lemi yɛnyi yɛsɔ ipantepela nyɛtshi lá nkambo djɛ nkaana kɛmi. Mpeyi mewɔ, lemi ntayawoka olengedji kaanga mayalaka la yɛnyi.” Nkaana kenkina ntepelaka ante: “M’ɔkɔngɔ wɔ wɔnaso wɔ mpame mposa m’otshumano, tolongo tɔ ngandji watosukaka. Amɔtshi watoshimelaka ambɔ wapewe kaanga kɛnɛ k’okokawɔ ntoshimela. Amɔtshi walelaki la lemi edjinge ankina wanfunelaki enkanda wekembɛ. Kɛnɛ kɛ yananghe kenkotshɛka efula!”

16. Wopo wɔkɔnge otshumano okokawɔ nkindjɛ nsuka la nkotshɛ nkfumbo k’onto womboposa m’otshumano?

¹⁶ Kindjɛ nsuka ase nkfumbo wambotshikala la nkɔmano. Iwɔ walekɔ la djonyi djɛ ngandji kɛko la djɛ ekembelo kɛko pekapeka winá wɔsɔ. (Heb. 10:24, 25) Lá mbamba imɔtshi, nkfumbo k’onto womboposa m’otshumano, ndawokaka etengo edjinge iwɔ ndeke yomboposɛ m’otshumano, mande anto amɔtshi wapasawola lawɔ etengo yananghaka ntondo. Topakɔpɛ dj’iwɔ ndawoka nghɔsɔ! Iso ladjɛ mbandola la nkembɛka dangala djɛ ambotshi wawɔ wambotshika nkambela Yehova. Maria, nkaana kɛ womɛnde aposaka m’otshumano ko akadjɛka edjinge nkfumbo kɛnde, ntepelaka ante: “Tolongo tɔmi tɔmɔtshi wayɛki lá mbandja ndotokotshɛ djɛ nkatshɛ la ntokotshɛ djɛ nangha wekelo wɔ nkfumbo. Iwɔ wasipisoyɛka yɛnyi yeyalaki la lemi edjinge walelaka esanga la lemi. Iwɔ wa nseelaka winá wɔ anto iyatatɛ ntshanghanyɛ akambo w’engolo. Iwɔ wankembɛka nsɔsɔlɔ efula!”​—Ɔrɔ. 12:13, 15.

17. Wopo wɔkɔnge tokokolo oyɛwɔ ladjɛ nsuka wanɛ walekɔ l’ekiyano?

¹⁷ Tokokolo, nyokambe la mbamba kenkfumɔ k’owanyo djɛ nkembɛ ase nkfumbo wambotshikala la nkɔmano. Nyo nyolekɔ l’odjito wɔ djonyi wɔ nsuka Akristo wa onto wɔwɔ ɔmɔtshi wɔ ngandji ambɛkɔ Yehova. (1 Te. 5:14) Nyɔshi nonghanyi kɛ nsawolaka lawɔ lá ntondo kana m’ɔkɔngɔ wɔ nsanghanyɛ y’Akristo djɛ ndaakembɛ. Nyawembolake edjinge nyɔlɔmbake esanga nyawɔ. Nyoposake nyawɔ t’olemo w’ipoposanyɛ, kana nyawetake lá mbamba imɔtshi lá wekelo wɔnyo wɔ nkfumbo. Tokokolo ladjɛ nyɛnyɛ ambɔ iwɔ ndakiyanyɛka lá nkambo djɛ wanɛ walekɔ la yɛnyi edjinge ndaawokaka djandji la ngandji k’oyɛwɔ la djonyi.​—1 Te. 2:7, 8.

18. Lá nkilika 2 Pɛtɛlɔ 3:9, kɛkɔnge kɛ Ndjambe okombolande djɛ wanɛ wambotshika ndookambela nangha?

¹⁸ Yehova ‘apakɔpɛ kaanga onto ɔmɔ ndjakema koko nde nkɔpaka djɛ anto ankfumɔ wawa mbamba kɛ ndapɛla.’ (Wala 2 Pɛtɛlɔ 3:9.) Kaanga winá wɔ onto onanghande ovunga w’ekekete, lowiko lɔnde lolekɔ ngo la ntshina le Ndjambe. Tovungɔ ente Yehova afutaka oshinga wɔ wolo efula, ntepela ente lowiko lɔ Wɔnande wɔ ngandji l’ɔtɛ wɔ mbiko y’ananghi y’evunga. La djandji nkfumɔ, Yehova nanghaka la wolo djɛ nkotshɛ anto wambɔwɛkɔ dj’iwɔ nkalɔ tende. Nde alekɔ la nkongi ante, wangɔsa nkano djɛsɔ, etengo ndjɔmbɔmba kɛ Yeso kɛ wɔna wotshwisa ɛnyɛwɔ. (Luka 15:11-32) Efula k’anto watshikisa akambo wa nsɔsɔlɔ wayɛka ndokalɔ te Papa kɛwɔ kɛ ngandji kel’olongo. Edjinge otshumano wasangelaka l’oloko ɔmɔ. Elizabeth, kanga sotepelaki má djiko, okaka osasa woyalaka winá wɔ wɔna okalɔnde l’otshumano. Winá w’okanelande nkambo djɛsɔ, nde ntepelaka ante, “ndekɔ nsɔsɔlɔ la djedjɛ efula te anto ankfumɔ watokembɛki dj’ipa iso ntshutshɛ nkongi.”

19. Lamo okokaso nkindjɛ ndawɛkɛ te Yehova?

¹⁹ Toyawɛkɛke winá enkfumɔ te Yehova. Nde apatɔpɛyɛka ɛlɔndjɛlɔ kekoka ntonanghela nyɛtshi. Nde alekɔ Papa kɛ lokapo k’okana djandji la kelekɔ la ngandji k’efula te anto ankfumɔ wɔɔkɔpa edjinge wɔɔtɛmɔla. Yashikikɛ ente Yehova apangokokadjɛ l’etsho wɛko wɛ ndjolo. (Heb. 13:5, 6) Mark, kanga sotepelaki má djiko atepelaka ante: “Yehova apatokadjɛki kaanga ndambo daambi, nde apayalaka kaanga ndambo daambi otale laso winá w’opomanaso l’ekakasano.” Yehova angokindjɛ nkɔpɛyɛ ‘nkfulu keleka kɛnɛ keyalaka l’onto.’ (2 Kɔ. 4:7) Ee, wɛ nkoka nkindjɛ ndjala la nkɔmano edjinge la nkongi kaanga ntsha onto wɔkɔpɛ ambowangɔ Yehova.