1. Anto wa nkɔmano okokawɔ ndjeta Yehova ambɔ na?

NKFUMBO kɛ Yehova nkfumbama l’antɛmɔdji yɛnde, la doyidoyi dj’andjelo edjinge la Yeso, kanga lolekɔ ‘nkɔlɔma kɛ nkete nkfumɔ djetongamisa.’ (Kɔl. 1:15; Yee. 103:20) Winá wɔ Yeso ndayalaka lanɛ lá looko, nde ɛnyɛka ante anto wa nkɔmano nkoka ndɔsa Yehova etengo Papa kɛwɔ. Winá wɔ ndatepelaka l’ambeki wande, Yeso atepelaka nkambo djɛ Yehova ante nde alekɔ ‘Papa kɛmi edjinge Papa kɛnyo.’ (Dj. 20:17) Lonkina winá w’olambolaso lowiko lɔso te Yehova la w’olongolaso batisimo, iso ndjingelaka lá nkfumbo kɛ ngandji kɛ wananyɔ l’ankaana.​—Mar. 10:29, 30.

2. Kɛkɔnge kohonaso nyɛna lá djamba djɛnɛ?

² Anto amɔtshi ndjalaka l’okakasano wɔ ndɔsa Yehova etengo Papa kɛwɔ kɛ ngandji. Ankina nkoka ko wapewe wopo w’okokawɔ nyɛnyɛ wananyɔ l’ankana yɛwɔ ngandji kawokawɔ. Lá djamba djɛnɛ, tɔngɛna wopo wɔ Yeso ndatokotshɛ djɛ ndɔsa Yehova etengo Papa kɛso kɛ ngandji, k’okokaso ndjala entshupa lande. Tongeka lonkina topo t’okokaso ndjokola Yehova lá wopo w’onanghelaso wananyɔ l’ankaana yɛso akambo.

3. Wopo wɔkɔnge lɔlɔmbɔ lɔ ndjɔmbɔmba otosepawɔ te Yehova?

³ Yehova alekɔ Papa kɛ ngandji. Yeso nkɔpaka dj’iso ndɔsa Yehova etengo nde ɔwɔsande, ntepela ente etengo ombotshi w’osasalo la wɔ ngandji, w’okokaso nsɛmɛla tende ipa l’okakasano, koko ape etengo owandji wototshinda la wotoshimela ngo kɛnɛ k’oyɛso ladjɛ nangha toko. Nkambo djɛsɔ djɛnamaka papoo má kɛnɛ kɛ Yeso ndalakanyɛ ambeki wande djɛ ndɔmbaka. Nde awangaka lɔlɔmbɔ lɔ ndjɔmbɔmba má ntepela ante: ‘Papa kɛso.’ (Mat. 6:9) Yeso akokaka ntolakanyɛ djɛ ndjeta Yehova ente ‘Kanga nkfulu inkfumɔ,’ ‘Ontongi,’ kana ‘Nkfumi kɛ lotshinda,’ nkombo inkfumɔ yɛsɔ ndjɛlama lande edjinge mposa má Afunelo.  (Ewa. 49:25; Iza. 40:28; 1 Ti. 1:17) Koko, Yeso akambaka l’itepela yekota oloko ante ‘Papa kɛso.’

4. Wopo wɔkɔnge ewaso ente Yehova nkɔpaka dj’iso ndasukanyɛ tende?

⁴ Ongoyalake l’okakasano wɔ ndɔsa Yehova etengo Papa kɛko kɛ ngandji? Amɔtshi l’anteyi kɛso walekɔ l’okakasano wɔsɔ. Ntsha papa kɛso ketowotisa atatonanghelaki akambo la ngandji, mbɔ koko angoyala wolo leso djɛ nkanela ente papa kɛmɔtshi nkoka ntɔkɔpa. Alekɔ nsɔsɔlɔ nkambo djekembɛ djɛ djewa ente Yehova ndjewaka kɔɔ wopo edjinge lamo oyawokaso nghɔsɔ! Nde nkɔpaka ndjala entshupa laso. Djɛkondeke Otepela wɔnde otokembɛwɔ ante: ‘Nyosukane te Ndjambe ko nde angosukana te nyo.’ (Dja. 4:8) Yehova ntɔkɔpaka edjinge nde ntolakaka ante angoyala Papa keleka wɔlɔ kɛ sopakoke ndɔɔwɛdjɛ l’apapa inkina.

5. Lá nkilika Luka 10:22, wopo wɔkɔnge Yeso okokande ntokotshɛ dj’iso ndeka ndjala entshupa la Yehova?

⁵ Yeso nkoka ntokotshɛ dj’iso ndeka ndjala entshupa la Yehova. Yeso ndjewaka Yehova wɔlɔ efula edjinge nde ndjokolaka wekeka wa Nde lá lɛdji lɔ djɔ, djɛkondeke ndatepela ante: ‘Onto wɔmɔnyɛna amɛna edjinge Papa.’ (Dj. 14:9) Etengo oyɛnde wɔna wɔ ntondo lá nkfumbo kɛso, Yeso atolakanyɛka wopo wɔ nɛmɛyɛ la ndjala la ntshunamo te Papa kɛso, wopo w’okokaso nangha dj’ipa ndookiyanyɛ, la wopo w’okokaso ndjawolama mende. Koko lowiko lɔ Yeso lɔ lanɛ lá looko lotokotshɛka pekapeka djɛ nsipisoyɛ ente Yehova alekɔ l’oloko wɔlɔ edjinge la ngandji. (Wala Luka 10:22.) Nyontshɔ tokoshishima ndjɔmbɔmba imɔtshi.

6. Pɛyɛ ndjɔmbɔmba yɛnyɛ wopo wɔ Yehova ndekameyɛka Yeso.

⁶ Yehova ndjekameyɛka wana wande. Tokolenda wopo wɔ Yehova ndekameyɛ Wɔnande wɔ ntondo. Yehova ekameyɛka nsɔsɔlɔ ndɔmbɔ efula yenanghaki Wɔnande winá wɔ ndayalaka lanɛ lá looko. (Luka 5:16) Nde ekameyɛka ndɔmbɔ yɛ Yeso ndananghaka lá ntondo kɛ ndɔsa akano wa djonyi, ndjɔmbɔmba, winá wɔ ndasɔnaka apɔstɔlɔ 12. (Luka 6:12, 13) Yehova ekameyɛka lonkina ndɔmbɔ yɛ Yeso ndananghaka winá wɔ ndayalaka l’ekiyano. Ndambo lá ntondo kɛnde nkapema, Yeso alɔmbaka Papa kɛnde l’entete kenkfumɔ lá kɛnɛ kelendana l’ohemba wɔ wolo  w’okongelaki. Yehova atekameyɛ ngo lɔlɔmbɔ lɔ Yeso toko, koko nde atomaka edjinge ondjelo djɛ ndokembɛ Wɔnande wɔ ngandji.​—Luka 22:41-44.

7. Wopo wɔkɔnge w’okokaso ndawoka winá w’ewaso ente Yehova nkadjimolaka ndɔmbɔ yɛso?

⁷ Lɔɔko kɛnɛ, Yehova akindjɛ ndjekameyɛ ndɔmbɔ y’enkambi wɛnde, edjinge nde ndaakadjimolaka lá winá wɛndje, la lá yopo yeleka wɔlɔ. (Yee. 116:1, 2) Kolenda wopo wɔ nkaana kɛmɔtshi kelá Inde ndɛnyi nsɔsɔlɔ kɛ nkambo djɛsɔ. Nde ɛnaki ndjolo l’ekiyano efula, ko alɔmbaka Yehova l’oloko ɔmɔ lá nkambo djɛsɔ. Nde afunaka ante: “Emisiɔ wɛ JW Televisiɔ^® wɛ Ngɔndɔ k’atano 2019 wetepelaki wopo w’okokaso nana l’ekiyano, ayalaka ngo kɛnɛ k’imayale la djonyi. Emisiɔ wɔsɔ ayalaka nsakiso kɛ ndɔmbɔ yɛmi.”

8. Lá topo tɔkɔnge Yehova ndɛnyɛ ante nde nkɔpaka Yeso?

⁸ Yehova ntɔkɔpaka edjinge ndakiyanyɛka lá nkambo djɛso etengo ndakɔpaka la ndayakiyanyɛka lá nkambo djɛ Yeso, l’ilá kɛ lowiko lɔnde lanɛ lá looko. (Dj. 5:20) Nde akotsheyɛki Yeso ehoba wɛnde enkfumɔ wɛ nyuma, wɛ ngandji, la welá demba. Lonkina, Yehova ashimelaki Wɔnande djɛ nde ndɔɔkɔpaka la nsasangaka nyande. (Mat. 3:16, 17) Mande Yeso ayawɛkɛki te Papa kɛnde kɛ ngandji kel’olongo, nde atayawokaki olengedji kaanga ndambo daambi.​—Dj. 8:16.

9. Kɛkɔnge ketoshikikɛ ente Yehova ntɔkɔpaka?

⁹ Ngo ngete Yeso, isankfumɔ tɛna ngandji kɛ Yehova lá topo efula. Kokanela ndambo: Yehova atosepaka tende, atɔpɛyɛka wananyɔ l’ankaana yɛ ngandji lombombe yetokotshɛ djɛ ndjala l’osasa la yetokembɛka winá w’oyɛso l’ekiyano. (Dj. 6:44) Yehova ntɔpɛyɛka lonkina nkete djɛ ndɛ djelá nyuma djetokotshɛka djɛ nkindjɛ nama djawo djɛso wolo. Nde ntokotsheyɛka lonkina ehomba wɛso welá demba wɛ lofu la lofu. (Mat. 6:31, 32) Ntsha iso ntɔnɔlaka lá ngandji kelekɔ la Yehova teso, ngandji kɛso tende kengofula.

10. Olakanyelo wɔkɔnge w’okokaso mba má wopo wɔ Yehova onanghelande wananyɔ l’ankaana yɛso akambo?

¹⁰ Yehova nkɔpaka wananyɔ l’ankaana yɛso. Koko apangoyalaka winá enkfumɔ wɔdju leso djɛ nkɔpa ase nkfumbo kɛso kelá nyuma. Mádjiko djɛ masɔ, tolekɔ la nkfumbo dj’etshikitanyi edjinge tofulaka lá ndjena djetshikitanyi. Lonkina isankfumɔ nanghaka evunga wekoka nkiyanyɛ anto ankina. Koko, kaanga oyɛwɔ nghɔsɔ, iso nkoka nangha la wolo djɛ ngandji ndjala lá nkfumbo kɛso kelá nyuma. Lá wopo wɔkɔnge? Má ndjokola Papa kɛso la má nkɔpa wananyɔ l’ankaana yɛso. (Ɛfɛ. 5:1, 2; 1 Dj. 4:19) Nyotshɔ tokolenda kɛnɛ k’okokaso ndjeka má ndjɔmbɔmba kɛ Yehova.

11. Wopo wɔkɔnge Yeso ndɛnyɛ ante Yehova alekɔ lokana ‘djandji dj’efula’?

¹¹ Yehova alekɔ lokana ‘djandji dj’efula.’ (Luka 1:78) Onto w’okanaka djandji, ndakiyanyɛka winá wɛnande anto ankina wɛna ndjolo, nde mponaka topo tɔ ndaakotshɛ la ndaasuka. Má wopo wɔ ndananghelaka anto akambo, Yeso ɛnyɛka ante Yehova ndakiyanyɛka lá nkambo djɛwɔ. (Dj. 5:19) Lá mbamba kɛmɔtshi winá wɔ ndɛnyi oloyi w’anto, Yeso ‘awokaka djandji, mande iwɔ wɛnaki ndjolo la watayalaki l’onto wakotshɛ etengo ɛnkɔkɔ wepalekɔ l’onami.’ (Mat. 9:36) Yeso atakoma ngo la ndaawoka djandji toko, koko nde ananghaka nkambo mɔtshi djɛ ndaakotshɛ. Nde akɔnɔlaka ase elando la akembɛka wanɛ wayalaki ‘la ndjolo edjinge l’edjito.’​—Mat. 11:28-30; 14:14.

12. Kɔpɛyɛ ndjɔmbɔmba kɛnyɛ wopo w’okokaso nyɛnyɛ ente iso ndjokaka wananyɔ l’ankana yɛso djandji.

¹² Ntsha iso nsipisoyɛ ntondo ekakasano wepomana la wananyɔ l’ankaana yɛso, tongokoka ndaawoka djandji. Ndjɔmbɔmba, nkaana kɛso kɛmɔtshi nkoka ndjala l’okakasano ɔmɔtshi wɔ wolo lá demba. Lako lofu l’indayakiyanyɛ lá nkambo dj’okakasano wɔsɔ, koko nde  nkoka ndjala l’osasa ntsha onto ɔmɔtshi ambookotshɛ. Onanghakande mo djɛ nkotsheyɛ ase nkfumbo kɛnde ehomba wɛwɔ welá demba? Nde apangosasanga ntsha iso ndookotshɛ djɛ nkatshɛ kana ndɔɔwɔmbɛla mvulu? Mbala imɔtshi wɔnanyɔ ɔmɔtshi ambotshutshɛ olemo wɔnde. Ntsha iso ndɔpɛyɛ opapɛyɛ ɔmɔtshi kana ndambo kɛ nkfuta, ipa la ndooshimela ente iso ndeke lɔmbɔpɛyɛ, ape nkambo djɛsɔ nkoka ndookotshɛ tii winá wɔ ndongowa olemo onkina?

13-14. Wopo wɔkɔnge w’okokaso ndjala la lokapo etengo Yehova?

¹³ Yehova alekɔ la lokapo. (Mat. 5:45) Topakoke nkonga ngo tii wananyɔ l’ankaana yɛso wabɔɔtɔlɔmba okotshɔ k’iso ndaawoka djandji. Ngo ngete Yehova, iso nkoka ndɔsa nkano djɛ ndaakotshɛ lá ntondo k’iwɔ ndɔtɔlɔmba okotshɔ. Nde ntɔkɛsɔyɛka winá ipa la iso ndɔɔlɔmba djɛ nde nangha nkambo djɛsɔ! Edjinge onto onkfumɔ mbaka wapɔ má winá, koko apengo wanɛ walekɔ la djedjɛ tende toko. Opawola ente má ntokotsheyɛ ehomba wɛso, Yehova nyɛnyɛka ante nde ntɔkɔpaka? Ɔsɔngo ɔkɔpaso Yehova má ngandji lá lokapo lɔnde!

¹⁴ Djɛ ndjokola Papa kɛwɔ kel’olongo, wananyɔ l’ankaana efula ndɔsaka nkano djɛ nyɛnyɛ anto ankina lokapo lɔwɔ. Ndjɔmbɔmba, lá 2013, Mvula kɛ lompopo l’ekekete l’iyete ambɔ Typhoon Haiyan lotshitaka owila wɔ Philippines lá lɛdji lɔ nyɛtshi efula. Nkete l’amvulu yɛ wananyɔ l’ankaana yɛso efula yetshitanaka. Koko nkfumbo kɛwɔ kelá nyuma kel’andja w’otondo kasukaka. Wananyɔ l’ankaana yɛso efula wapɛyɛka nfalanga kana wayɛka ndokotshɛ l’olemo w’ekete w’opikelo, eposelo weyalisande, iwɔ walɔngɔsɔlaka la wapikaka amvulu nsuke la 750 ngo l’etenyi k’ɔnɔnyi! L’etsho w’opela wɔ COVID-19 wɔnɛ, Ewakɛ wɛ Yehova wananghaka la wolo efula djɛ nsuka wananyɔ l’ankaana yɛwɔ. Winá w’oyɛso entshupa djɛ nsuka ase nkfumbo kɛso kelá nyuma, iso ndaawɛnyɛka ente iso ndaakɔpaka.

15-16. Lá nkilika Luka 6:36, yopo imɔtshi yɛkɔnge yɛ djonyi y’okokaso ndjokola Papa kɛso kel’olongo?

¹⁵ Yehova alekɔ lokana nkɛtshi la entshupa djɛ nyimeyɛ. (Wala Luka 6:36.) Mfu inkfumɔ Papa kɛso kel’olongo nyimeyɛka ɔmɔmɔ wɔ l’anteyi kɛso. (Yee. 103:10-14) Ambeki wa Yeso wayalaki anto wa ntshamba djɛ djɔ, koko nde awokaki nkɛtshi la awimeyɛki. Nde ayalaka  lonkina entshupa kaanga djɛ ndambola lowiko lɔnde dj’evunga wɛso nyimeyama. (1 Dj. 2:1, 2) Wopo wɔ Yehova nya Yeso otokawɔ djandji edjinge oyɛwɔ entshupa djɛ ntimeyɛ, apakosepe tewɔ?

¹⁶ Iso nkembɛka djokanelo djɛso djɛ ngandji lá nkfumbo kɛso kelá nyuma ‘winá w’imeyanaso l’oloko ɔmɔ.’ (Ɛfɛ. 4:32) Lá nsɔsɔlɔ, nyimeyɛ anto ankina, nkoka ndjala nkambo djɛ wolo efula lá winá ɛmɔtshi, djɛkondek’oyɛso ladjɛ ndjila welo lá nkambo djɛsɔ. Nkaana kɛmɔtshi ntepelaka ante djamba mɔtshi djɛ l’Etange k’Olami djeyalisa l’ɔtɛ wɔ djoyi ante “Todimanyiyane lam’asaso l’otema ɔtɔi,” dj’okotshɛka efula. * Nde afunaka ante: “Djamba djɛsɔ djenkotshɛka djɛ nyɛna akambo la ntsho djɛ wɔlɔ edjinge lá yopo yetshikitanyi. Djesipisoyɛka ante, ndjawola djɛ nyimeyɛ anto ankina apasakisola ante wɛ ndjawolaka enanghedji kɛwɔ kɛ nyɛtshi kana nyimɛka yimba má eposelo wɛ nyɛtshi welekɔ la nanghedji djɛwɔ. Koko nyimeyɛ nsakisolaka nsamba nama onkomba lá kɛnɛ k’iyokonanghelaki la nkindjɛ nama vu djɛko.” Winá w’imeyɛso wananyɔ l’ankaana yɛso l’oloko ɔmɔ, iso nyɛnyɛka ente iso ndaakɔpaka la ndjokolaka Papa kɛso, Yehova.

17. Lá nkilika Mateo 5:16, wopo wɔkɔnge w’okokaso mpɛyɛ Papa kɛso kel’olongo lomo?

¹⁷ Alekɔ mpeyi k’ekekete efula djɛ ndjala l’anteyi kɛ nkfumbo kɛ l’andja w’otondo kɛ wananyɔ l’ankaana yɛkɔpana. Iso nkɔpaka djɛ anto efula ndjɛ ndɔtɛmɔla Ndjambe kɛso esanga laso. Djɛkondeke, iso ladjɛ mbadjɛ dj’ipa nangha kaanga nkambo mɔ djekoka ntshita lokumu l’enkambi wɛ Yehova kana lɔ Papa kɛso kel’olongo. Iso nanghaka la wolo djɛ ndjala la nanghedji djɛ wɔlɔ djekoka ntshinda anto djɛ ndjawola losango lɔso lɔ wɔlɔ.​—Wala Mateo 5:16.

18. Kɛkɔnge kekoka ntokotshɛ djɛ mpoposanyɛ ipa la ndjoka wɔma?

¹⁸ Lá winá ɛmɔtshi, anto nkoka ntɔnyɔla kana ntɛnyɛ ndjolo mande tɔlɛmɛyɛ Papa kɛso kel’olongo. Okokaso nangha mo ntsha tongoyalake la wɔma djɛ nshimela anto akambo walendana la djawo djɛso? Iso nkoka ndashikikɛ ente Yehova nya Wɔnande wangotokotshɛ. Yeso  ashimelaka ambeki wande ante watakiyanake lá wopo w’okokawɔ ntepela kana lá kɛnɛ k’okokawɔ ntepela. Lamo? ‘Yeso asipisoyɛka ante mande: ‘Wangonyoshimela kɛnɛ k’okokanyo ntepela ngo winá wɔkɔ; ladjikɛnde ape nyo ndeke longotepela koko nyuma kɛ Papa kɛnyo ndeke longotepela má lotshimbo lɔnyo.’​—Mat. 10:19, 20.

19. Kɔpɛyɛ ndjɔmbɔmba k’onto ɔmɔtshi wopoposanyisa l’oloko wolo onkfumɔ.

¹⁹ Tokolenda ndjɔmbɔmba kɛ Robert. Ndambo daambi m’ɔkɔngɔ wɔ nde mbanga ndjeka Bible, lasɔ ko atawa balo dj’efula, wowilaka lá dombo djelendana la wayi w’angala lá Afrikɛ wa Sidɛ. L’oloko wolo onkfumɔ nde asipisoyɛka tosushi ante nde apakɔpɛ ndjingela l’olemo w’angala mande nde nkɔpaka wananyɔ l’ankaana yɛnde y’Akristo. Nde ɔsaki mpipo keyalaki lande lá nkfumbo kelá nyuma l’odjito efula! Isushi imɔtshi owopolaka l’isasimoyɛ ante, “Waalekɔ wananyɔ wako?” Robert atakanelaki ante wangowopola woopó wɔsɔ, koko mbalakɛkɔ kɛmɔ, nde avungɔka vɛrse djɛ lofu dj’iyashishima lofu lɔsɔ. Vɛrse djɛkɔ nde Mateo 12:50 djetepela ante: ‘Onto onkfumɔ wonangha ɛkɔpa kɛ Papa kel’olongo, ndeke wɔnanyɔ, nkaana la nyɔ kɛmi.’ Kaanga Robert ndayalaka ombeki wɔ Bible wɔ bango, nyuma kɛ Yehova k’okotshɛka djɛ nkadjimola lá woopó wɔsɔ la lá weepó enkina efula wɛ ndotakanelaki. Yehova ayalaka nsɔsɔlɔ l’ofuno lá nkambo djɛ Robert! Yehova alekɔ lonkina l’onfuno lá nkambo djɛso winá wɛnande topoposanyɛ l’oloko wolo ayale kaanga ekakasano wekɔnge w’epomana laso.

20. Nkano djɛkɔnge dj’oyɛso ladjɛ ndɔsa? (Djɔanɛ 17:11, 15)

²⁰ Nyontshɔ tokindjɛ ndɔsa mpeyi k’okotshɛso kɛ ndjala lá nkfumbo kɛso kɛ ngandji kelá nyuma la ntshina efula. Tolekɔ la Papa keleka wa papa inkfumɔ wɔlɔ edjinge wananyɔ l’ankaana efula yɛtɔkɔpa. Iso ladjɛ ndjalaka mfu inkfumɔ la djedjɛ m’ɔtɛ w’epapɛyɛ wɛsɔ. Satana nya anto wande wokilika mponaka ntotshinda dj’iso ndjila ehamo lá ngandji kɛtɔkɔpa Papa kɛso kel’olongo la dj’iso ntshita osanga wolekɔ l’anteyi kɛso. Koko, Yeso, atɔlɔmbɛlaka lá nkambo djɛsɔ, nde alɔmbaka Papa kɛso djɛnde ntolama djɛ nkfumbo kɛso nkindjɛ ndjala l’osanga. (Wala Djɔanɛ 17:11, 15.) Yehova akadjimola lɔlɔmbɔ lɔsɔ. Ngo ngete Yeso, totilake kaanga ndambo k’ehamo lá ngandji edjinge l’osukɔ wɔtɔpɛyɛ Papa kɛso kel’olongo. Nyontshɔ tɔshi nkano djɛ ndjalaka winá enkfumɔ entshupa la nkfumbo kɛso kelá nyuma.