1. Kɛkɔnge kɛ Yehova ndananghela ɔm’ɔmɔ wɔ l’anteyi kɛso?

YEHOVA asepaka ɔm’ɔmɔ wɔ l’anteyi kɛsɔ te nde. (Dj. 6:44) Kokanela kɛnɛ kesakisola nkambo djɛsɔ. Winá wɔ Yehova ndashishima la nkɔmɛ nkfumɔ, miliyara y’anto ankfumɔ wel’andja wanɛ, nde ɛnaka ekete kɛmɔtshi kɛ djonyi efula lewɛ, ntepela ente oloko wɔ wɔlɔ w’okoka ndowoka ngandji. (1 Ɛk. 28:9) Yehova nkewaka, nkolembetelaka, edjinge nkokaka ngandji. Ɔsɔ nsɔsɔlɔ alekɔ djoyi dj’ekembɛ!

2. Ndjɔmbɔmba kɛkɔnge kɛpɛyisa Yeso k’ɛnyɛ wopo wɔ Yehova oyakiyanyɛnde lá nkambo dj’ɔkɔkɔ wɔnde onkfumɔ?

² Yehova ndakiyanyɛka efula lá nkambo djɛko, edjinge nde ndakiyanyɛka lonkina nkambo djɛ wananyɔ l’ankaana yɛko y’Akristo. Djɛ mpɛyɛ ndjɔmbɔmba lá nkambo djɛsɔ, Yeso ɛdjɛka Yehova l’onami w’ɛnkɔkɔ. Ntsha ɔnkɔkɔ 1 l’anteyi k’ɛnkɔkɔ 100 ambotshɔ má lopango, onami ndongonangha mo? Nde ‘angotshika 99 l’onkoko ko nde ntshɔ ntohona wɔnɛ wombovungá.’ Winá wɔ onami isolande ɔnkɔkɔ wɔkɔ, nde apowomadjɛ m’ɔtɛ wɔ ndovungaki. Koko nde angoyala l’osasa. Olakanyelo w’ɔkɔnge w’owaso? Ɔnkɔkɔ onkfumɔ wolekɔ la ntshina le Yehova. Yeso atepelaka ante: ‘Papa kel’olongo apasasanga kaanga 1 wɔ l’anteyi k’anto wa daambi wanɛ mvunga.’​—Mat. 18:12-14.

3. Kɛkɔnge kɔkɔpaso nyɛna lá djamba djɛnɛ?

³ Iso nsɔsɔlɔ topakɔpɛ nkiyanyɛ wananyɔ l’ankaana yɛso. Wopo wɔkɔnge w’okokaso ndjewɔ djɛ ntakanyɛ anto ankina? Ko okokaso nangha nge ntsha onto ɔmɔtshi ambotokiyanyɛ? Tɔkɔpa nkadjimola weepó wɛsɔ lá djamba djɛnɛ. Koko ntondo  ntondo, tokoshishima akambo walendana la ‘anto wa daambi anɛ’ w’otepelawɔ la Mateo shapitrɛ 18.

4. Waana walekɔ ‘anto wa daambi wanɛ’?

⁴ ‘Anto wa daambi wanɛ’ walekɔ ambeki wa Yeso walekɔ l’ɛnɔnyi wetshikitanyi. Ayale ɛnɔnyi wɛkɔnge welekɔ lawɔ, iwɔ walekɔ ‘etengo dɛngɛ’ mande iwɔ ndjawolaka ndakanyema me Yeso. (Mat. 18:3) Kaanga okokawɔ ndjala lá ndjena djetshikitanyi, la nanghedji djetshikitanyi, la tokanyi edjinge la lonto lotshikitanyi, iyankfumɔ walekɔ la djawo le Kristo. L’onkoko wɔnde, Yeso ndaakɔpaka efula.​—Mat. 18:6; Dj. 1:12.

5. Wopo wɔkɔnge Yehova oyawokande winá w’onto ɔmɔtshi otakanyɛnde kana okiyanyɛnde onkambi wɔnde ɔmɔtshi?

⁵ Yehova ndɔsaka ‘anto wa daambi wanɛ’ ankfumɔ la ntshina. Djɛ nsipisoyɛ wopo w’oyawokande, tokolenda wopo w’oyawokaso lá nkambo djɛ wana. Iso ndaawɔsaka la ntshina. Iso nkɔpaka ndaalama mande iwɔ wapalekɔ la wolo, la balo etengo nkokolo. Mande topakɔpɛ nyɛna wananghela wopo w’onto onkfumɔ nyɛtshi, iso nkiyanaka kana nyomalaka pekapeka winá wɛnaso onto ɔmɔtshi ananghela ilɛngɛ nyɛtshi. Wopo wɔk’ɔmɔ ndeke, Yehova nkɔpaka ntolama. Nde nkiyanaka kana nyomalaka winá w’onto ɔmɔtshi otakanyɛnde kana onanghelande onkambi wɔnde ɔmɔtshi nyɛtshi!​—Iza. 63:9; Mar. 9:42.

6. Lá nkilika 1 Kɔrɛntɔ 1:26-29, wopo wɔkɔnge andja wanɛ ɔsakawɔ ambeki wa Yeso?

⁶ Lá wopo onkina wɔkɔnge ambeki wa Yeso oyɛwɔ etengo ‘anto wa daambi’? Anto wakɔna andja wanɛ awɔsakawɔ etengo anto wa djonyi? Ase ekfudji, anto walekɔ la lomo edjinge walekɔ la nkfulu. Koko ambeki wa Yeso wapalekɔ nghɔsɔ, djɛkondeke anto ndaawɔsaka etengo ‘anto wa daambi’ wapalekɔ djonyi la wapalekɔ la ntshina. (Wala 1 Kɔrɛntɔ 1:26-29.) Koko Yehova apawɔshi nghɔsɔ.

7. Wopo wɔkɔnge Yehova ɔkɔpande iso ndawoka lá nkambo djɛ wananyɔ l’ankaana yɛso?

⁷ Yehova nkɔpaka enkambi wɛnde enkfumɔ, ayale kaanga waambokambela ɛnɔnyi efula kana wanɛ walekɔ bango l’akambo wa nsɔsɔlɔ. Yehova ndɔsaka wananyɔ l’ankaana yɛso inkfumɔ la ntshina, djɛkondeke iso ladjɛ ndaawɔsaka la ntshina. Iso ladjɛ ndjokaka ‘nkfumbo k’otondo kɛ wananyɔ ngandji,’ koko ape amɔtshi toko. (1 Pɛ. 2:17) Iso ladjɛ ndjala entshupa djɛ nangha k’enkfumɔ k’okokaso nangha djɛ ndaalama la ndaakotshɛ. Ntsha tombewa ente tombokiyanyɛ kana tombonanghela onto ɔmɔtshi ovunga, topakoke nyimɛ yimba lá nkambo ntshɔ ko ntepela ente nde koko amboleka yomal’omala, ngo nde nyimeyɛ. Lamo anto amɔtshi okokawɔ nkiyana? Nkoka ndjala má wopo w’iyafule, wananyɔ l’ankaana yɛso imɔtshi nkanelaka ambɔ wapalekɔ la ntshina. Ankina walekɔ bango l’akambo wa nsɔsɔlɔ, wapewe kɛnɛ k’okokawɔ nangha ntsha onto ɔmɔtshi ambaananghela ovunga. Ayale kaanga nkambo djɛkɔnge, iso ladjɛ nangha la wolo djɛ ndjila vu. Lonkina, onto w’omala lankeke ladjɛ ndjewa ante ɔsɔ alekɔ enanghedji kɛ pɔlɔ k’oyɛnde ladjɛ ntshika. Nde ladjɛ nangha nkambo djɛsɔ djɛ nde ndjala l’osasa edjinge la djokanelo djɛ wɔlɔ l’anto ankina.

8. Nkfumbo djɛkɔnge djeyalaki l’anto wal’etsho wɛ Yeso, djekfumbolaki ambeki wande?

⁸ Kɛkɔnge ketshindisa Yeso djɛ ntepela lá nkambo djɛ ‘anto wa daambi wanɛ’? Ambeki wande wowopolaka ambɔ: ‘Onto wɔkɔna woleka ekekete lá Onkfumi wɔ l’olongo?’ (Mat. 18:1) Efula k’ase Juda wel’etena kɛsɔ wɔsaki mpipo yɛwɔ la ntshina efula. Ondjewi wɔ  wayi ɔmɔtshi ntepelaka ante: “Mba nɛmɔ, nfudjɛ apɛka edjinge lomo ndeke lolekaki ndjala djonyi lá lowiko lɔwɔ.”

9. Kɛkɔnge kɛ ambeki wa Yeso iyayale ladjɛ nangha?

⁹ Yeso ewaki djɛ ambeki wande wayalaka ladjɛ nangha la wolo djɛ nyimɛ m’eloko wɛwɔ yimba yɛ yamano yekonamisa lá nkfumbo dj’ase Juda. Nde ashimelaka ante: ‘Kanga loleka ekekete l’anteyi kɛnyo ayale etengo kanga lolekɔ ilɛngɛ edjinge kanga lolekɔ etengo owandji ayale etengo os’olemo.’ (Luka 22:26) Iso ndjalaka etengo ‘kanga lolekɔ ilɛngɛ tshɛ’ winá ‘w’ɔsaso djɛ anto ankina ntoleka.’ (Flp. 2:3) Ntsha iso ndeka ndjala l’enanghedji kɛsɔ, topangolekaka ntakanyɛ anto ankina.

10. Dako djɛkɔnge Poolo ndapɛyɛ dj’oyɛsɔ ladjɛ nkamba?

¹⁰ Wananyɔ l’ankaana inkfumɔ ntoleka lá lɛdji l’ɔmɔtshi. Apalekɔ wolo nyɛna nkambo djɛsɔ ntsha iso mpikaka wiso waso lá wekeka wawɔ wa wɔlɔ. Iso ladjɛ nkamba la ndako djɛ Poolo ndapɛyɛ ase Kɔrɛtɔ djɛnɛ ante: ‘Kɛkɔnge kekotshikitanyɛ l’anto onkina? Ee, kɛkɔnge k’okotshɛ kɛ iyotakɔpɛyɛ? Ko ntsha nsɔsɔlɔ iyakɔpɛyɛka nde nkɔpɛyɛ, lamo ofudjɛ apɛka etengo watakɔpɛyɛ?’ (1 Kɔ. 4:7) Iso ladjɛ nsipisoyɛ ntsha tombohembama djɛ nsepa tokanyi t’anto teso kana ndɔsa dj’iso ndeka anto ankina. Ntsha wɔnanyɔ ɔmɔtshi mpɛyɛka wamba wa wɔlɔ kana nkaana kɛsɔ kɛmɔtshi alekɔ l’opapɛyɛ wɔ ndjeka wɔlɔ l’ambeki, nde ladjɛ mpɛyɛ Yehova lomo ipa la ntshatshimba.

11. Olakanyelo wɔkɔnge w’owaso má ndjɔmbɔmba kɛ Yeso ndapɛyɛ kɛ nkfumi kɛmɔtshi ny’os’olemo wɔnde?

¹¹ Ndambo daambi m’ɔkɔngɔ wɔ Yeso ndjewola ambeki wande dj’ipa ntakanyɛ anto ankina, nde apɛyɛka ndjɔmbɔmba kɛ nkfumi kɛmɔtshi nya os’olemo wɔnde. Nkfumi kɛsɔ imeyɛka os’olemo wɔnde basa dj’ekekete djɛ ndotayala l’akoka wa nfuta. M’ɔkɔngɔ, os’olemo wɔkɔ atakɔpa nyimeyɛ winande os’olemo onkina basa djɛ daambi. Ekomo ekomo, nkfumi ilaka os’olemo wotokanaki djandji ɔsɔ lá lokando. Olakanyelo wɔkɔnge w’owaso? Yeso atepelaka ante: ‘Nghɔsɔ ndeke Papa kɛmi kel’olongo ndongonyonanghela ntsha onto l’onto apimeyɛ winande l’oloko ɔmɔ.’​—Mat. 18:21-35.

12. Lá wopo wɔkɔnge isongotshutshumadjɛ anto ankina ntsha topakɔpɛ nyimeyɛ?

¹² Nkambo djenanghisa os’olemo wɔsɔ djetonanghela nde nyɔmɛlɛ nyɛtshi, koko djenanghelaka edjinge anto ankina. Ntondontondo, nde ananghelaka winande os’olemo nyɛtshi má ‘ndokowa lá lokando tii winá wɔ ndongofuta basa djɛnde.’ Dj’epe, nde akiyanyɛka ase olemo ankina wɛnisa kɛnɛ kɛ ndananghe. ‘Winá wɔ winande as’olemo ankina iyɛnyi kɛnɛ kehetisa, iwɔ wayalaka la yɛnyi efula.’ Wopo wɔk’ɔmɔ ndeke, nanghedji djɛso ndjalaka l’eposelo ɛmɔtshi te anto ankina. Iya ntsha onto ɔmɔtshi ambotonanghela nyɛtshi ko tombotona ndoowimeyɛ, eposelo wɛkɔnge wekoka mposa? Ntondontondo, iso ndookiyanyɛka má ntona ndoosasangɛ, ndowila yimba, la ndɔwɛnyɛ ngandji. Dj’epe, iso ntshutshumadjɛka anto ankina wel’otshumano winá w’ɛnawɔ djɛ vu mpalekɔ l’antenyɛ iso l’onto wɔkɔ.

13. Olakanyelo wɔkɔnge ngombowa má kɛnɛ kekomelisa yat’ekalo imɔtshi?

¹³ Winá w’imeyɛso wananyɔ l’ankaana yɛso, isɔmɛlɛ mbaka wapɔ edjinge anto ankina. Kɛsɔ ndeke kekomelisa yat’ekalo imɔtshi yetawɔ Crystal. Nkaana kɛmɔtshi kel’otshumano okiyanyɛka. Crystal mvungɔka ante: “Etepela wɛnde w’ipa la ngandji wampotadjɛki etengo lokfula winá ɛmɔtshi. Ntakɔpaki kaanga mposa isande t’olemo w’ipoposanyɛ. Ntateyɛka ntshutshɛ entete edjinge osasa wɔmi.” Crystal akanelaki ante nde alekɔ la donga djɛ wɔlɔ djɛ ndoowomadjɛ. Koko nde atoowombela onkomba  kana ndeka ndakiyanyɛ ngo lá nkambo djɛnde nyɔmɛlɛ. L’okitshakitshɛ onkfumɔ, nde akambaka la dako dj’Anfunelo djelá djamba djelekɔ l’ɔtɛ wɔ djoyi ante: “Timeyanake m’ase k’oloko” djel’Etange k’Olami kɛ Ngɔndɔ kɛ djomi 15, 1999 (lá Otetela). Nde imeyɛka nkaana kɛnde. Crystal ntepelaka ante: “Winá wɔsɔ lambosipisoyɛ ente, isankfumɔ tonangha la wolo djɛ ndɔta lonto lɔ bango, lonkina, Yehova ntimeyɛka ipa l’okakasano edjinge nfu inkfumɔ. Ndawoka etengo wambonsodjɛ odjito m’apɛka wami. Lambokalɔ ndjala lonkina l’osasa.”

14. Lá nkilika Mateo 18:21, 22, okakasano wɔkɔnge wɛnama etengo ɔpɔstɔlɔ Pɛtɛlɔ ayalaki la wɔkɔ, edjinge olakanyelo wɔkɔnge w’owɛ má ndjelo kɛ Yeso?

¹⁴ Iso ndjewaka ente iso la djɛ nyimeyana; ɔsɔ ndeke nkambo djɛ wɔlɔ dj’oyɛso ladjɛ nangha. Koko tokoka ndjala l’okakasano lá nkambo djɛsɔ. Mbala imɔtshi ɔpɔstɔlɔ Pɛtɛlɔ ayalaki l’okakasano wɔk’ɔmɔ lá winá ɛmɔtshi. (Wala Mateo 18:21, 22.) Kɛkɔnge kekoka nkokotshɛ? Ntondotondo, kanela lá wopo wɔ Yehova okimeyɛnde mbala efula. (Mat. 18:32, 33) Iso tɔpɛlama djɛ nde ntimeyɛ, koko nde ntimeyɛka ipa l’okakasano. (Yee. 103:8-10) Lá winá wɔk’ɔmɔ, ‘edjinge iso ladjɛ ndjokana ngandji l’anteyi kɛso.’ Djɛkondeke nyimeyɛ apalekɔ ente ntsha onto akɔpa. Iso ladjɛ nyimeyɛ wananyɔ l’ankaana yɛso. (1 Dj. 4:11) Dj’epe, kanela eposelo wengoyala winá w’imeyɛso anto ankina. Iso nkoka nkotshɛ onto wotonanghela nyɛtshi, otshumano wongoyala l’osanga, tongolama djokanelo djɛso la Yehova, edjinge tongimɛ odjito wolekɔ l’apɛka waso. (2 Kɔ. 2:7; Kɔl. 3:14) L’ekomo, lɔmba Onto wotilela ɔlɛmbɛ djɛ nyimeyɛ. Tawolake djɛ Satana nkotshutsheyɛ vu djelekɔ l’anteyi kɛ wɛ la winako Akristo. (Ɛfɛ. 4:26, 27) Tolekɔ la djonyi dj’okotshɔ wɔ Yehova ntsha topakɔpɛ nkfɔ l’ilonga yɛ Satana.

15. Lá nkilika Kɔlɔsɛ 3:13, kɛkɔnge k’okokaso nangha ntsha wɔnanyɔ kana nkaana kɛmɔtshi ambotokiyanyɛ?

¹⁵ Iya, okokaso ntepela nge ntsha winako  Okristo ɔmɔtshi anangha akambo lá yopo yekokiyanyɛ efula? Okokɛ nangha nge? Nangha la wolo djɛ ndjila vu. Lɔmba Yehova l’oloko ɔmɔ. Lɔmbande djɛ nde ntshɔkɔla onto wokokiyanyɛ edjinge djɛ nkokotshɛ djɛ wɛ nyɛna wekeka wa wɔlɔ walekɔ le onto wɔkɔ, wekeka wa Yehova olekande nkɔpa lende. (Luka 6:28) Ntsha opakoke mvungɛ kɛnɛ kɛ wɔnanyɔ ndombokonanghela, mbɔ kanela wopo wokokɛ nsawola nyape. Alekɔ wɔlɔ efula ndjewaka winá enkfumɔ ente wɔnanyɔ apakoke nkonanghela nyɛtshi l’onkonda. (Mat. 5:23, 24; 1 Kɔ. 13:7) Winá wosawolɛ nyande, ewa ente nde alekɔ la tokanyi tɔ wɔlɔ. Iya okokaso ntepela nge ntsha nde apakɔpɛ ndjila vu? Kindjɛ nkfulumeyɛ. Topekɔke wɔnanyɔ. (Wala Kɔlɔsɛ 3:13.) Nkambo deka djonyi nde, tawolake nama onkomba, mande kɛsɔ kekoka ntshita djokanelo djɛko nya Yehova. Tawolake djɛ kaanga ekete kɛmɔ nkotakanyɛ. Má nangha nghɔsɔ, ɔngɛnyɛ ente wɛ nkɔpaka Yehova ndeka nkete nkina nkfumɔ.​—Yee. 119:165.

16. Odjito wɔkɔnge wolekɔ l’onto onkfumɔ wɔ l’anteyi kɛso?

¹⁶ Iso ndɔsaka odjito wolekɔ laso wɔ nkambela Yehova l’osanga etengo ‘oloyi ɔmɔ’ l’ɛlɔndjɛlɔ ‘k’onami ɔmɔ’ la ntshina efula! (Dj. 10:16) Onkanda Tamboyakongɛ dia nsala lolango la Jehowa, nkishi 165, ntepelaka ante: “Etengo ngongowa wapɔ m’osanga wɔsɔ, wɛ ladjɛ ndjila lɔwɔ djɛ nama osanga wɔkɔ.” Djɛkondeke, iso ladjɛ “nangha la wolo djɛ ndɔsa wananyɔ l’ankaana etengo Yehova awɔsande.” Le Yehova, isankfumɔ tolekɔ ‘wana wa dɛngɛ’ walekɔ la ntshina lá wiso wande. Nghɔsɔ ndeke ɔsakɛ wananyɔ l’ankaana yɛko? Yehova nyɛnaka edjinge ndɔsaka la ntshina k’enkfumɔ k’onanghɛ djɛ ndaakotshɛ edjinge ndaalama.​—Mat. 10:42.

17. Kɛkɔnge k’isombokana djɛ nangha?

¹⁷ Iso nkɔpaka winaso Akristo. Djɛkondeke ‘tɔshi nkano dj’ipa ntshika otamba wotakanyɛ kana wɛɛkɔ ɔmɔtshi lá ntondo kɛ wɔnanyɔ.’ (Ɔrɔ. 14:13) Tɔshi djɛ wananyɔ l’ankaana yɛso ntoleka, edjinge tawimeyɛke l’oloko ɔmɔ. Nyontshɔ towadjɛ dj’ipa iso ntakana má kɛnɛ kenangha anto ankina. L’edjena kɛ nangha nghɔsɔ, nyontshɔ ‘tokilike akambo wakotshɛ djɛ vu ndjala l’anteyi kɛso edjinge watokembɛ.’​—Ɔrɔ. 14:19.