1. Lamo enkambi wɛ Yehova okokawɔ ndawoka olengedji lá winá ɛmɔtshi?

ISANKFUMƆ ndawokaka olengedji lá winá ɛmɔtshi. Amɔtshi wapoyawokaka olengedji ilá efula. Ankina, nkoka ndjala l’olengedji ilá efula. Tokoka ndawoka olengedji kaanga tolekɔ l’anteyi k’anto efula. Amɔtshi ndawokaka olengedji mande walekɔ bango l’otshumano. Ankina wayalaki lá ankfumbo y’onanghawɔ akambo ankfumɔ ngo esanga, ko wangoyawokake olengendji winá wokakitɔnawɔ la boto djewɔ. Amɔtshi ndawokaka olengedji mande alekɔ la yɛnyi y’onto wɔnde wɔ ngandji wombovɔ. Edjinge Akristo amɔtshi, pekapeka walekɔ bango l’akambo wa nsɔsɔlɔ, ndawokaka olengedji winá w’okakitwanande kana w’ɔwɛnyɛ ase nkfumbo kɛnde kepalekɔ Ewakɛ kana ntombe yɛwɔ y’ililá ndjolo.

2. Weepó wɛkɔnge w’ɔkɔpaso nkadjimola?

² Yehova ndjewaka edjinge nsipisoyɛka akambo ankfumo walendana laso. Winá w’oyalaso l’olengedji, nde nyɛnaka edjinge nkɔpaka ntokotshɛ djɛ ndongela tokanyi tɔsɔ. Wopo wɔkɔnge Yehova otokotshɛnde? Kɛkɔnge k’okokaso nangha dj’ipa ndawoka olengedji? Edjinge wopo wɔkɔnge okokaso nkotshɛ anto ankina wel’otshumano wɔso wayawoka olengedji? Nyontshɔ tokokadjimola lá weepó wɛsɔ.

3. Wopo wɔkɔnge Yehova ndɛnyɛ ante nde ndakiyanyɛka lá nkambo djɛ Elidja?

³ Yehova ndakiyanyɛka lombombe lá nkambo djɛ wɔlɔ w’enkambi wɛnde enkfumɔ. Nde alekɔ entshupa l’onto onkfumɔ wɔ l’anteyi kɛso, nde nyɛnaka winá w’ɔlɛmbaso. (Yee. 145:18, 19) Tokolenda wopo wɔ Yehova ndoyakiyanyɛ lá nkambo dj’ɔprɔfɛtɛ  wɔnde Elidja. Mpame kɛ nkɔmano kɛsɔ awikaki l’eleko kɛ wolo kɛ l’ɔkɔndɔ w’Isariyɛlɛ. L’eleko kɛsɔ, anto wayalisa la lowandji l’Isariyɛlɛ wɛnyɛki enkambi wɛ Yehova ndjolo edjinge wahonaka ndjaka Elidja. (1 Nk. 19:1, 2) Nkambo nkina djekokisa ntshimbɛ Elidja wɔɔngɔ nde, nde akanelaki ante ngo nde toko ndeke lombotshikala ɔprɔfɛtɛ wɔ Yehova. (1 Nk. 19:10) Mbala kɛkɔ kɛmɔ Ndjambe ɛnaka okiyano wɔ Elidja. Yehova atomaka ondjelo djɛ ntoshikikɛ ɔprɔfɛta ante nde apalekɔ nyɔmɛlɛ, anto efula woka Ndjambe wɔma walekɔ l’Isariyɛlɛ!​—1 Nk. 19:5, 18.

4. Wopo wɔkɔnge Marko 10:29, 30 ɛnyɛnde wopo wɔ Yehova oyakiyanyɛnde lá nkambo dj’enkambi wɛnde w’anto ankina iyombakadjɛ?

⁴ Yehova ndjewaka djɛ winá w’ɔsɔnaso djɛ ndokambela, anto amɔtshi l’anteyi kɛso ndasambɛka nkete mɔtshi. L’anteyi kɛ kɛnɛ k’oyasambɛwɔ, ndeke olekɔ edjinge okotshɔ w’ime boto djɛwɔ djepalekɔ andjawodji edjinge ntombe yɛwɔ yɛ ntondo. Nkoka ndjala ɔpɔstɔlɔ Pɛtɛlɔ ayayakiyanyɛki ndeke nd’opola Yeso ante: ‘Iso totshikaka nkete djɛso nkfumɔ edjinge tokokilikaka, kɛkɔnge k’isongowa?’ (Mat. 19:27) Yeso akadjimolaka ambeki wande la ngandji kenkfumɔ ante, wangowa nkfumbo k’ekekete kelá nyuma. (Wala Marko 10:29, 30.) Edjinge Yehova, Owandji wɔ nkfumbo kɛso kelá nyuma, alakaka ante nde angokotshɛ wanɛ wakɔpa ndookambela. (Yee. 9:10) Tokolenda akambo amɔtshi w’okokɛ nangha djɛ mba okotshɔ wɔ Yehova winá w’onanɛ l’olengedji.

5. Wɛlɔ wɛkɔnge ngongowa ntsha wɛ nkanelaka wopo wɔ Yehova okokotshɛnde?

⁵ Kanelaka wopo wɔ Yehova okokotshɛnde. (Yee. 55:22) Nkambo djɛsɔ djengokokotshɛ djɛ wɛ ndjala l’ikanyi y’ɛdje lá nkambo djɛko. Nkaana kɛmɔtshi k’epolo ketawɔ Carol, * kanga nkfumbo kɛnde wapalekɔ Ewakɛ wɛ Yehova, ntepelaka ante: “Winá w’okanelami wopo wɔ Yehova ndankotshɛ djɛ nkfulumeyɛ lá deko djɛ wolo, kɛsɔ nkotshɛka lemi dj’ipa ndawoka olengedji. Edjinge nkambo djɛsɔ djengoshikikɛke ente Yehova angonkotshɛ kaanga l’etsho weyaye.”

6. Wopo wɔkɔnge 1 Pɛtɛlɔ 5:9, 10 okokawɔ nkembɛ wanɛ wanana la tokanyi tɔ ndawoka olengedji?

 ⁶ Tɔnɔlaka lá wopo wɔ Yehova okotshɛnde winako andjawodji wayawoka olengedji. (Wala 1 Pɛtɛlɔ 5:9, 10.) Hiroshi wɔnanyɔ loyalaki Owakɛ wɔ Yehova ngo nyɔmɛlɛ lá nkfumbo kɛwɔ l’ilá k’ɛnɔnyi efula, ntepelaka ante: “L’otshumano, alekɔ wɔdju nyɛna ente onto onkfumɔ alekɔ l’ekakasano. Ndjewa ente isankfumɔ ndjilaka welo djɛ nkambela Yehova nkembɛka wanɛ walekɔ iyɔmɛlɛ l’akambo wa nsɔsɔlɔ.”

7. Wopo wɔkɔnge lɔlɔmbɔ okokotshɛkawɔ?

⁷ Yala la nonghanyi kɛ wɔlɔ k’akambo welá nyuma. L’anteyi yɛ nonghanyi yɛsɔ ndeke lolekɔ edjinge ndjipolelaka Yehova oloko wɔko má ndoshimela wopo w’oyawokɛ. (1 Pɛ. 5:7) Massiel ntepelaka ante: “Nkambo mɔtshi djɛ djonyi djenkotshisa djɛ nyimɛ olengedjinde, ndɔmba Yehova l’entete.” Winá wɔ nkaana k’oseka kɛnɛ ndatateyɛ nkambela Yehova, nde ayawokaki olengedji mande ase nkfumbo kɛnde watakambelaki Yehova. Nkaana kɛkɔ ntepelaka ante: “Nde ayalaka Papa kɛ nsɔsɔlɔ le lemi, edjinge lemi ndɔɔlɔmbaka nfu inkfumɔ, mbala efula lá lofu, djɛ ndoshimela wopo w’oyawokami.”

8. Wopo wɔkɔnge mbala Otepela wɔ Ndjambe edjinge ntɔnɔlaka l’eteyi okokotshɛwɔ?

⁸ Walaka Otepela wɔ Ndjambe mbala la mbala, tɔnɔlaka lá ɛkɔndɔ ɛmɔtshi ntshikaa w’ɛnyɛ wopo wɔ Yehova okookande ngandji. Bianca, nkaana kɛmɔtshi kekfulumeyɛki etepela wɛ lɔlɛngɔ me ase nkfumbo kɛnde, ntepelaka ante: “Mbalaka edjinge ntɔnɔlaka ɛkɔndɔ wimá Bible edjinge ɛkɔndɔ wɛ mbiko y’enkambi wɛ Yehova wepomanaki l’ekakasano etengo wɛmi nkotshɛka lemi nsɔsɔlɔ.” Akristo amɔtshi nkotaka avɛrse l’ɔtɛ, ndjɔmbɔmba Yeembo 27:10 edjinge Izaya 41:10. Ankina nyɛnaka ambɔ ndjekameyɛ aranjistrɛma w’onkanda ɔmɔtshi wekama winá w’ɔlɔngɔsɔlawɔ nsanghanyɛ kana w’owalawɔ Bible ndaakotshɛka djɛ nyimɛ olengedji.

9. Wopo wɔkɔnge wingelo wɔ nsanghanyɛ okokotshɛwɔ?

⁹ Nangha la wolo djɛ ndjingelaka nsanghanyɛ mbala la mbala. Nsanghanyɛ yɛsɔ yengokokembɛka, edjinge yengokokotshɛ lonkina djɛ ndjewa wananyɔ l’ankaana yɛko wɔlɔ wɔlɔ. (Heb. 10:24, 25) Massiel, kanga l’isotepelaki má djiko, ntepelaka ante: “Kaanga mayalaka ɔsɔnyi, ndɔsaka nkano djɛ ndjingelaka nsanghanyɛ inkfumɔ yel’otshumano edjinge djɛ mpɛyɛka kɔmantɛrɛ. Kɛsɔ kenkotshɛka djɛ ndawoka ente ndɔsa opiko l’otshumano.”

10. Lamo oyɛwɔ djonyi ndjala ilongo l’Akristo wa nkɔmano?

¹⁰ Kɔpɛ ilongo nya Akristo wa nkɔmano. Hona tolongo tokokɛ ndjeka akambo efula mewɔ l’otshumano, ayale kaanga wɛ ndaaleka ɛnɔnyi kana iwɔ nkoleka, kana nkfumbo djenyo ntshikitana. Bible ntovungolaka ante: ‘Balo ntanemaka le nkokolo dj’anto.’ (Djɔ. 12:12) Kaanga  nkokolo dj’anto nkoka ndjeka akambo efula me dangala djelekɔ la nkɔmano. Davidɛ ayalaka ilɛngɛ yɛ daambi efula le Jɔnata, koko kɛsɔ ketapekala djɛ ndjala tolongo tɔ ma ma. (1 Sa. 18:1) Davidɛ nya Jɔnata wakotshanaki djɛ nkambela Yehova kaanga l’anteyi k’ekakasano. (1 Sa. 23:16-18) Irina, nkaana kɛso kelekɔ win’ɔsɔ Owakɛ wɔ Yehova nyɔmɛlɛ lá nkfumbo kɛwɔ, ntepela ante: “Wananyɔ l’ankaana nkoka nsɔsɔlɔ ndjala ambotshi edjinge boto djɛso djelá nyuma. Yehova nkoka nkamba lawɔ djɛ ntokotsheyɛ ehomba wɛso.”

11. Kɛkɔnge k’oyɛ ladjɛ nangha djɛ ndjala la tolongo tɔ nsɔsɔlɔ?

¹¹ Nkɔpɛ tolongo tɔ bango, apayalaka wɔdju peka peka ntsha olekɔ ɔnsɔnyi. Ratna, nkaana kɛso kelekɔ l’ɔnsɔnyi efula k’ekisa akambo wa nsɔsɔlɔ l’anteyi kɛ lɔnyɔkɔ, ntepelaka ante: “Ndjalaka la djɛ ndjawola ente ndekɔ la djonyi dj’okotshɔ edjinge dj’osukɔ wɔ wananyɔ l’ankaana yel’otshumano.” Nkoka ndjala itondo y’okakasano djɛ nshimela anto ankina wopo w’oyawokaso, koko nsawola l’onto má ndoodjipolɛ oloko wɔso alekɔ ikɔkɔ yɛ ilongo yɛ wolo. Tolongo tɔko nkɔpaka nkokembɛ edjinge nkosuka, koko iwɔ nkɔpaka wɛ ndaashimela wopo w’okokawɔ nangha nkambo djɛsɔ.

12. Wopo wɔkɔnge olemo w’ipoposanyɛ okokawɔ ntokotshɛ djɛ mba tolongo tɔ wɔlɔ?

¹² Yopo imɔtshi yɛ wɔlɔ efula yɛ mba tolongonde má mposaka isa winaso Akristo ankina t’olemo w’ipoposanyɛ. Carol, kanga l’isotepelaki má djiko, ntepelaka ante: “Mbaka tolongo tɔ wɔlɔ efula má mposaka l’ankaana efula t’olemo w’ipoposanyɛ edjinge t’eIemo enkina wɛ teokrasi. L’ilá k’ɛnɔnyi efula, Yehova angonkotshɛka má lotshimbo lɔ tolongo tɔsɔ.” Nkɔpɛ ilongo l’Akristo wa nkɔmano angoyalake winá enkfumɔ l’eposelo wɛ wɔlɔ. Yehova nkambaka la tolongo tɔ nghɔsɔ djɛ nkokotshɛ djɛ wɛ nana l’ekiyano, ndjɔmbɔmba olengedji.​—Woo. 17:17.

13. Odjito w’ɔkɔnge w’olekɔ l’onto onkfumɔ wɔ l’otshumano?

¹³ Onto onkfumɔ wɔ l’otshumano alekɔ l’odjito wɔ ndjila lɔwɔ djɛ ngandji edjinge vu ndjala l’otshumano edjinge dj’ipa kaanga onto ɔmɔ ndawoka olengedji. (Dj. 13:35) Kɛnɛ k’onanghaso edjinge k’otepelaso nkoka nsɔsɔlɔ nkembɛ anto ankina efula. Nkaana kɛso kɛmɔtshi atepelaka ante: “Winá wɔ mekaka akambo wa nsɔsɔlɔ, otshumano w’okomaka nkfumbo kɛmi. Otayalawɔ iwɔ lako nkotshɛ lemi, ntasamba ndjala Owakɛ wɔ Yehova.” Kɛkɔnge k’okokɛ nangha djɛ nkotshɛ wanɛ walekɔ iyɔmɛlɛ l’akambo wa nsɔsɔlɔ dj’iwɔ ndawoka ambɔ w’ɔsa opiko l’otshumano?

14. Kɛkɔnge k’okokɛ nangha djɛ nkɔpɛ ilongo l’anto ankina wa bango?

¹⁴ Nangha la wolo djɛ nkɔpɛ ilongo l’anto wa bango. Tokoka nangha nkambo ntshɔ má ndongolaka l’osasalo anto wa bango wayɛ l’otshumano. (Ɔrɔ. 15:7) Koko, topakoke nyemala ngo lá ndaapɛyɛ djemo djɛ l’osasa toko. Iso nkɔpaka nkɔpɛ lawɔ ilongo yengotshikala lotshinda. Djɛkondeke nanghelawɔ akambo wa wɔlɔ edjinge ɛnyɛ ente wɛ ndakiyanyɛka lá nkambo djɛwɔ. Kaanga ngopakoke ndjingela l’akambo wawɔ, hona djɛ ndjewa ekakasano wepomana lawɔ. Anto amɔtshi nkoka ndjala l’okakasano wɔ nshimela anto wopo w’oyawokawɔ, lasɔ, wadjɛ dj’ipa ndaatshinda djɛ ntepela. Koko la nkɔmɛ nkfumɔ, opolawɔ weepó wɛ balo, edjinge ekameyɛ nsakiso kɛwɔ la balentshintshi nkfumɔ. Ndjɔmbɔmba, okoka ndaawopola ente wopo wɔkɔnge nyewe akambo wa nsɔsɔlɔ.

15. Wopo wɔkɔnge Akristo wambotshunda lá nyuma okokawɔ nkotshɛ anto ankina wel’otshumano?

¹⁵ Ase otshumano onkfumɔ wangofula lá nyuma, ntsha Akristo wambotshunda lá nyuma, pekapeka tokokolo nyɛnyɛ dj’iwɔ ndakiyanyɛka lá  nkambo djɛwɔ. Melissa, kanga l’iyawongola l’akambo wa nsɔsɔlɔ me nyɔ kɛnde ntepelaka ante: “Ndekɔ la djedjɛ efula te wananyɔ wayalisa etengo wa papa yɛmi yɛ nyuma, la wayakiyanyɛki lá nkambo djɛmi l’ilá k’ɛnɔnyi. Winá enkfumɔ w’imayalaka la djoyi djɛ ntepela, onto ɔmɔtshi ayalaki entshupa djɛ ndjekameyɛmi.” Mauricio, wɔnanyɔ ɔmɔtshi w’olangala loyawokisa olengedji winá wɔ wetsha wɔnde wɔ Bible ndatshike akambo wa nsɔsɔlɔ, ntepelaka ante: “Tokokolo wɛnyɛka dj’iwɔ ndakiyanyɛka lá nkambo djɛmi, ko wankotshɛka efula. Iwɔ wasawolaki la lemi mbala la mbala. Waposaki la lemi t’olemo w’ipoposanyɛ, wanshimelaki elakanyelo wɛ djonyi w’iyawaka má wekelo wɛwɔ w’onto nyɔmɛlɛ edjinge wataki kaanga bale la lemi.” Melissa nya Mauricio walekɔ lo nkambela Yehova l’olemo wɔ winá enkfumɔ.

16-17. Lá topo tɔkɔnge tɔ kɔɔ tokokaso nkotshɛ anto ankina?

¹⁶ Kotshɛ anto ankina lá topo tɔ kɔɔ. (Nga. 6:10) Leo, misiɔnɛrɛ kɛmɔtshi kelekɔ l’owila w’otale efula la nkfumbɔ kɛnde ntepelaka ante: “Mbala efula k’enkfumɔ k’oyalakaso la djonyi nde, onto nkonanghela ikakambo imɔtshi yɛ wɔlɔ lá winá w’ɛdje. Mvungɔ lofu lɔmɔtshi l’imananghe aksida l’otuka. Winá wɔ makome lá mbandja ndjalaka la yɛnyi efula. Koko m’asɔ, antshukanyi amɔtshi wandjetaka lá mvulu kɛwɔ ntɔlɛ. Mpoovungɔka kɛnɛ k’isale, koko mvungɔ ente wandjekameyɛka la wɔlɔ onkfumɔ. L’ekomo, ndjɛka ndoyawoka wɔlɔ efula!”

¹⁷ Isankfumɔ nsasangaka la nsanghanyɛ yɛso yelá nyuma, ndjɔmbɔmba nsanghanyɛ yɛ djingadjinga edjinge yɛ rɛjɔ, mande tongowake mbamba kɛ nsanghana la winaso ankina edjinge ndjamba lawɔ lá kɛnɛ k’isekaki. Koko, Carol, kanga sotepelaki m’adjiko ntepelaka ante: “Winá woyalaso lá nsanghanyɛ yɛ djingadjinga kana yɛ rɛjɔ, lemi ndekaka ndaawoka olengedji efula.” Lamo? Nde ntepelaka ante: “Kaanga momodjingama la nkama kana nunu djɛ wananyɔ l’ankaana, mbala efula wangintansɛke ngo l’ase nkfumbo yɛwɔ. Ko winá wawɛnami lemi ndekaka ndawoka olengedji.” Wamɔtshi ndjalaka l’okakasano wɔ ndjingela nsanghanyɛ yɛ djingadjinga kana yɛ rɛjɔ mbala kɛ ntondo m’ɔkɔngɔ wɔ mvusɛ wadji kana womi. Wɛ ndjewaka onto ɔmɔtshi wombopomana l’okakasano wɔ nghɔsɔ? Lamo ngopowete djɛ nde ndj’intansɛ esanga la nkfumbo kɛko lá losanghanyɛ l’ekeke l’oyaye?

18. oWopo wɔkɔnge w’okokaso nkamba la 2 Kɔrɛntɔ 6:11-13 winá wolongolaso anto ankina lá wakaso?

 ¹⁸ Hetshɛka winá esanga l’anto ankina. L’asɛkelɔ wako, hona djɛ ndjetaka wananyɔ l’ankaana yetshikitanyi, pekapeka wanɛ wakoka ndawoka olengedji. Iso nkɔpaka ‘ndjipola eloko wɛso enkfumɔ,’ pekapeka te anto wa nghɔsɔ. (Wala 2 Kɔrɛntɔ 6:11-13.) Melissa, kanga l’isotepelaki má djiko, ntepelaka ante: “Tongoyalake winá enkfumɔ l’osasa winá wɔ wananyɔ otetawɔ tá wakawɔ djɛ ntohetshɛ winá esanga kana djɛ peeta lawɔ.” Onto ɔmɔtshi wɔ nghɔsɔ alekɔ l’otshumano wɔko w’okokɛ ndjeta tákɛɛ?

19. Lá winá wɛkɔnge wekoka ndeka ndjala djonyi iso mpetshɛ winá esanga la winaso Akristo?

¹⁹ Winá ɛmɔtshi efula welekɔ w’Akristo ankina okokawɔ ndeka ndjala l’osasa ntsha iso mpetshɛ winá esanga lawɔ. Wamɔtshi nkoka ndjala l’okakasano djɛ ndjala esanga l’ase nkfumbo yɛwɔ yepatɛmɔla Yehova lá winá wonanghawɔ wa fɛtɛ yɛwɔ yɛ ntolo kana yɛnyɛ ngandji k’owila. Ankina ndjalaka la paa efula winá wokoka adatɛ amɔtshi, ndjɔmbɔmba datɛ djɛ lofu lovwisa onto wɔnde wɔ ngandji. Winá wɔsɔnaso djɛ mpetshɛka winá la wananyɔ l’ankaana yepomana l’ekakasano wɛ nghɔsɔ, iso ndawɛnyɛka ente iso ‘ndakiyanyɛka l’oloko ɔmɔ lá nkambo djɛwɔ.’​—Flp. 2:20.

20. Wopo wɔkɔnge etepela wɛ Yeso welá Mateo 12:48-50 otokotshɛwɔ winá woyawokaso olengedji?

²⁰ Donga dekɔ efula djekoka ntshinda Okristo djɛ ndawoka olengedji lá winá ɛmɔtshi. Koko, totavungɛke kaanga dambo daambi ente Yehova ndjewaka k’enkfumɔ ketokomela. Nde ntɔpɛyɛka kɛnɛ koyɛso la djonyi mbala efula má lotshimbo lɔ winaso Akristo. (Wala Mateo 12:48-50.) L’onkoko onkina, iso nyɛnyɛka djedjɛ djɛso te Yehova tá nonghanyi kɛ ngandji k’indɔshi kɛsɔ, winá wonanghaso k’enkfumɔ k’okokaso nangha djɛ nsuka wananyɔ l’ankaana yɛso. Ayale wopo wɔkɔnge wokokaso ndawoka lá winá ɛmɔtshi, tewe ente topalekɔ isɔmɛlɛ mande Yehova alekɔ winá enkfumɔ l’ompandju wɔso!