1-2. Kɛkɔnge k’ɛnaso lɔ lá djamba djɛnɛ?

NGONGOYAWOKA ngetemo ntsha mpato kɛmɔtshi kelekɔ la nkete dj’oyɛ la djonyi efula l’eteyi kepakomisa lá winá wɔ ngakombola? Ongokiyana? Okoka ndawoka etengo Woongo 13:12 otepelande ante: ‘Nkongi djetakotshama ntatshɛka oloko olando.’ Ko ngongoyawoka ngete mo ntsha ombewa ente mpato kɛko ketayɛ lá winá wɔ ngakombola m’ɔtɛ wɔ donga djɛ wɔlɔ? Lá mbamba kɛsɔ, ongoyala la balentshitshi la ongawola nkonga.

² Lá djamba djɛnɛ, Tongoshishima tɔkfɔ tɔmɔtshi temá Bible tokoka ntokotshɛ dj’iso ‘ndjewa nkonga.’ (Mika 7:7) Masɔ, tongoshishima akambo ape woyɛso ladjɛ nkonga la balentshitshi nkfumɔ djɛ Yehova nangha. L’ekomo, tɔngɛna ɛtshɔkɔ wengowa wanɛ walekɔ entshupa djɛ nkongela Yehova.

3. Olakanyelo wɔkɔnge w’owaso má Woongo 13:11?

³ Woongo 13:11 ntolakanyɛka lamo oyɛso ladjɛ ndjala la balentshitshi. Djetepela ante: ‘Okfudji wowayema lankekelankeke wongokitakita, koko okfudji w’onto wohona ndambondambo wongohanda.’ Olakanyelo wɔkɔnge w’owaso má vɛrse djɛsɔ? Alekɔ nkambo djɛ balo nanghaka akambo la balentshitshi nkfumɔ edjinge la nkɔmɛ, djɛ mba eposelo wɛ wɔlɔ.

4. Woongo 4:18 otolakanyɛnde nge?

⁴ Woongo 4:18 ntoshimelaka ante ‘mboka k’anto wa wɔlɔ kelekɔ etengo ntshase djɛ winá djɛ nkɛsɛ djetakindjɛ mbala ngo mbala tii la yane yɛ tɛ.’ Etepela wɛsɔ nyɛnyɛka wopo  wɔ Yehova isolande enkambi wɛnde ikanyi yɛnde ndambondambo. Koko, vɛrse djɛnɛ ntɛnyɛka lonkina wopo w’Okristo onanghakande etshikitano lá lowiko lɔnde la oyasukanyɛnde nya Yehova. Ndɔmbaka ndambo kɛ winá djɛ onto ndoyasukanyɛ nya Yehova. Ntsha iso ndjekaka la nkɔmɛ nkfumɔ la nkambaka l’alako w’owaso m’Otepela wɔ Ndjambe edjinge m’olonghanyelo wɔnde, tongotayalaka la wekeka w’Okristo ndambondambo. Lonkina tongewa Ndjambe wɔlɔ wɔlɔ. Koko lenda wopo wɔ ndjɔmbɔmba kɛ Yeso iyɛnyɛ nsɔsɔlɔ kɛ nkambo djɛsɔ.

5. Ndjɔmbɔmba kɛkɔnge kɛ Yeso ndapɛyɛ k’ɛnyɛ ante ndɔmbamaka ndambo kɛ winá dj’onto ndonangha etshikitano?

⁵ Yeso akambaka la ndjɔmbɔmba kɛmɔtshi djɛ nyɛnyɛ wopo wɔ losango l’Onkfumi oyɛwɔ etengo lowambo lofulaka ndambondambo le wanɛ walekɔ l’eloko wɛ wɔlɔ. Nde atepelaka ante: ‘Nsɛkɛ mposaka edjinge ntafulaka wopo wɔ [onkonyi] ndopewe. Looko nyɔmɛlɛ mposɛka ekonakona ndambondambo, ntondontondo oloke, masɔ ko lɔlɛngɛ, ko l’ekomo wɛsɛ w’ombolola tɔɔ la nsɛkɛ.’ (Mar. 4:27, 28) Kɛkɔnge kɛ Yeso ndakɔpe ntepela? Nde akɔpaka nsakisola ante, ngo ngete ekonakona ofulande ndambondambo ndeke onto wawola losango l’Onkfumi ofulande lá nyuma ndambondambo. Ndjɔmbɔmba, ntsha ombeki wɔso wɔ Bible ambotateyɛ ndasukanyɛ nya Yehova, iso ntateyɛka nyɛna etshikitano efula wɛ wɔlɔ wonanghande. (Ɛfɛ. 4:22-24) Koko iso ladjɛ mvungɔka ente, Yehova ndeke lofudjɛ lɔsɛkɛ lɔ daambi lɔsɔ.​—1 Kɔ. 3:7.

6-7. Olakanyelo wɔkɔnge w’owaso má wopo wɔ Yehova ndatonge looko?

⁶ Lá kenkfumɔ konanghande, la balentshitshi nkfumɔ Yehova ndɔsaka winá efula djɛ nshiyɛ olemo wɔnde. Nde nanghaka nghɔsɔ djɛ mpɛyɛ djiina djɛnde lomo edjinge lá wapɔ w’anto ankina. Ndjɔmbɔmba, tokolenda wopo wɔ Yehova ndananghe looko ndambo ndambo lá nkambo dj’anto.

⁷ Winá wɔkɔndɔlande wopo wɔ Yehova ndatonge looko, Bible ntepelaka ante nde  ‘ashikikɛka elelo wɛnde,’ ‘asembolaka okɔdji wɔ lɛdji lɔnde,’ edjinge atshikaka ve djɛnde djɛ tshuku.’ (Djɔ. 38:5, 6) Nde ɔsaka edjinge winá djɛ nshishima elemo wɛnde. (Ewa. 1:10, 12) Kokanela wopo woyawokisa andjelo winá w’iyɛnyi kenkfumɔ kɛ Yehova ndatonge. Iwɔ wayalaka ladjɛ ndjala l’osasa efula! Djɛkondeke, iwɔ wawangaka ‘mfulá elolo l’osasa w’efula.’ (Djɔ. 38:7) Olakanyelo wɔkɔnge w’owaso? Elemo wɛ Yehova welendana l’etongelo w’ɔsaka nunu dj’ɛnɔnyi djɛ ndoshila. Koko winá wɔ Yehova ndalende nkete nkfumɔ djɛ ndatonge la nkɔmɛ nkfumɔ, nde atepelaka ante ‘dekɔ wɔlɔ efula.’​—Ewa. 1:31.

8. Kɛkɔnge k’ɔkɔpaso nyɛna win’ɔsɔ?

⁸ Etengo sɔmbɛna má ndjɔmbɔmba yemá djiko yenyi, tokoka mba tɔkfɔ efula m’Otepela wɔ Ndjambe tɔtɛnyɛ djonyi djɛ balentshitshi. Win’ɔsɔ tɔkɔpa nyɛna topo tope toyɛso ladjɛ nkonga Yehova.

9. Lá nkambo mɔtshi djɛkɔnge dj’oyɛso la djonyi djɛ nkongela Yehova?

⁹ Tokoka ndjala la djonyi djɛ nkonga Yehova nkadjimola alɔmbɛlɔ waso. Winá wɔlɔmbaso wolo wɔ nkandola okakasano ɔmɔtshi kana okotshɔ wɔ ndongela wɔdju ɔmɔtshi, tokoka nyɛna etengo alɔmbɛlɔ waso wapakadjimɔma lá winá w’okombolaso. Lamo Yehova ndopakadjimolaka alɔmbɛlɔ waso ankfumɔ mbala kɛkɔ kɛmɔ?

10. Lamo oyɛso ladjɛ nkonga la balentshitshi nkfumɔ djɛ Yehova nkadjimola alɔmbɛlɔ waso?

¹⁰ Yehova ndjekameyɛka alɔmbɛlɔ waso la nkɔmɛ nkfumɔ. (Yee. 65:2) Nde nyɛnaka ndɔmbɔ yɛso yɛ m’anse k’oloko etengo ilembetelo yɛ djawo djɛso tende. (Heb. 11:6) Lonkina Yehova nkɔpaka djɛ iso mbika lá yopo yokana l’alɔmbɛlɔ waso edjinge djɛ nangha ɛkɔpa kɛnde. (1 Dj 3:22) Djɛkondeke, winá w’ɔlɔmbaso Yehova djɛnde ntokotshɛ dj’iso ntshika nkambo mɔtshi djɛ ndopakɔpɛ, angoyala djonyi iso ndjala la balentshitshi edjinge nangha kenkfumɔ k’okokaso nangha djɛ nangha akambo lá yopo yokana la ndɔmbɔ yɛso edjinge nangha etshikitano. Yeso atokotshɛka djɛ ndjewa ante alɔmbɛlɔ waso amɔtshi wapangokadjimɔma mbala kɛkɔ kɛmɔ. Nde atepelaka ante: ‘Nyokindjɛ ndɔmba, ko wangɔnyɔpɛyɛ; nyokindjɛ mpona, ko nyongotana; nyokindjɛ nkɔkɔla ko wangonyodjipola; mande onto onkfumɔ wɔlɔmba wangɔpɛyɛ, onto onkfumɔ wohona angowa la onto onkfumɔ wɔkɔkɔla wangoodjipola.’ (Mat. 7:7, 8) Ntsha iso nkilika dako djɛsɔ la ‘nkindjɛ ndɔmba, tokoka ndashikikɛ ente Papa kɛso kel’olongo atekameyɛ edjinge nde angokadjimola alɔmbɛlɔ waso.​—Kɔl. 4:2.

11. Wopo wɔkɔnge Hebero 4:16 otokotshɛwɔ winá wɛnaso entengo nsakiso kɛ ndɔmbɔ yɛso yetshatshimba?

¹¹ Kaanga nsakiso yɛ ndɔmbɔ yɛso okokawɔ nyɛnama etengo yetshimbatshimba, Yehova ndakaka djɛ nkadjimola ndɔmbɔ yɛso lá ‘winá wɛdje.’ (Wala Hebero 4:16.) Djɛkondeke, topakoke mpɛla Yehova kana ndoowomadjɛ ntsha nkambo mɔtshi mpananghemisa la nkeke lá winá wokombolaso nde ntonangela. Djɔmbɔmba, efula k’anto wámbɔlɔmbá l’ilá k’ɛnɔnyi efula djɛ Onkfumi wɔ Ndjambe ndjakala ekomo kɛ nkfumbo dj’akambo wanɛ. Kaanga Yeso atoshimelaka dj’iso ndɔmbaka lá nkambo djɛsɔ. (Mat. 6:10) Koko ɔsɔngo yongoyala nkambo dj’enkesa ntsha onto ɔmɔtshi ndjawola djɛ djawo djɛnde te Ndjambe nkitakita mande ekomo kepaye lá winá w’isakanelaka! (Aba. 2:3; Mat. 24:44) Angoyala nkambo djɛ balo dj’iso nkindjɛ nkongela Yehova edjinge nkindjɛ ndɔɔlɔmba la djawo nkfumɔ ente angotosakisola. Ekomo kengoyɛ ngo lá winá wɛdje, mande Yehova ambóshiyɛká nshikikɛ  ‘lofu la winá’ wɔ yongoyɛ. Ko, ɔsɔ angoyala winá woleki wɔlɔ le anto ankfumɔ.​—Mat. 24:36; 2 Pɛ. 3:15.

12. Lá nkambo djɛkɔnge dj’okokaso ndjala l’okakasano wɔ ndjala la balentshitshi?

¹² Tokoka ndjala la djonyi djɛ balentshitshi winá w’okfulumeyɛso akambo wa ntshamba djɛ djɔ. Mbala efula anto wel’andja wanɛ nyɛnyɛka anto watshikitanyi lawɔ mposo, tɔkɔlɛ, kana ewila, ndjolo. Ankina wawɛnyɛ ndjolo m’ɔtɛ w’oyɛwɔ la nkɔmɔ l’alemba kana lá wɔɔngɔ. Enkambi wɛ Yehova efula wakfulumeyɛ akambo wananghelawɔ wa ntshamba djɛ sii m’ɔtɛ w’awolawɔ akambo wemá Bible. Winá w’ɛnaso ndjolo, iso ladjɛ mvungɔ etepela wɛ Yeso. Nde atepelaka ante: ‘Onto wongonkfulumeyɛ tii l’ekomo ndeke longowika.’ (Mat. 24:13) Ko okokɛ nangha mo ntsha ombisola ente onto ɔmɔtshi wɔ l’otshumano ambonangha ovunga w’ekekete? M’ɔkɔngɔ wɔ tokokolo ndjewa nkambo djɛsɔ, wɛ ladjɛ ndjala la balentshitshi edjinge ndashikike ente wangonangha akambo lá nkilika kɛnɛ kɛ Yehova ɔlɔmbande. Kɛsɔ okokawɔ nsakisola nge?

13. Kɛkɔnge kesakisola nkandola okakasano lá nkilika ikanyi yɛ Yehova?

¹³ Winá wɔ tokokolo isolawɔ ambɔ onto ɔmɔtshi wɔ l’otshumano amonangha ovunga w’ekekete, iwɔ nanghaka ndɔmbɔ djɛ mba ‘balo djɛ m’olongo,’ dj’iwɔ ndjewa ikanyi yɛ Yehova lá nkambo djɛkɔ. (Dja. 3:17) Okoma wɔwɔnde, ‘nkotshɛ onto womonangha ovunga djɛ nde nkalɔ ‘má mboka kɛnde kɛ nyɛtshi’ ntsha nkokaka. (Dja. 5:19, 20) Lonkina iwɔ nkɔpaka nangha kenkfumɔ k’okokawɔ nangha djɛ nama otshumano la nsuka wanɛ w’iyananghela nyɛtshi. (2 Kɔ. 1:3, 4) Winá w’okandolawɔ nkambo djelendena l’ovunga w’ekekete, tokokolo ladjɛ mpona djɛ ndjewa ntondontondo, kɛnɛ kehetisa nsɔsɔlɔ, kɛsɔ nkoka ndɔsa ndambo kɛ winá. Masɔ, iwɔ ndɔmbaka la mpɛyɛka alako wim’Afunelo la nkɔmɛ nkfumɔ edjinge ‘nsembolaka onto wɔkɔ lá lɛdji lɛdje.’ (Jɛr. 30:11) Kaanga tokokolo yopakoke ntshatshimbɛ nkambo, iwɔ wapakoke ndɔsa nkano lankekelankeke. Ntsha tokokolo nkilika ɛlɔndjɛlɔ kɛ me Yehova, otshumano w’otondo w’ongowa wapɔ. Koko kaanga ntsha akambo nanghema lá yopo yɛsɔ, onto wɔ yananghela nyɛtshi nkoka ndjala la ndambo k’okiyano. Ntsha oyɛwɔnde nghɔsɔ lewɛ, kɛkɔnge k’okokɛ nangha djɛ nyimɛ yɛnyi yɛsɔ?

14. Ndjɔmbɔmba kɛkɔnge kemá Bible kekoka nkokotshɛ ntsha Okristo ɔmɔtshi ambokonanghela ovunga w’ekekete?

 ¹⁴ Onto ɔmɔtshi ayale kaanga winako Okristo, ambókokiyanyɛ? Okoka ndjisola ndjɔmbɔmba yɛ wɔlɔ má Bible yekoka ntolakanyɛ wopo wɔ nkonga Yehova djɛ ntɔlɔngɔsɔla akambo. Ndjɔmbɔmba, kaanga Yɔsɛfu ndɛnaka ndjolo m’ɔtɛ w’akambo wa ntshamba djɛ sii wonanghelisa wananyɔ wande, nde atawola djɛ evunga wɛwɔ nkomɛ lowiko lɔnde ololo. Koko, nde ilaka yimba ngo l’olemo wɔ Yehova, kanga lofutisa m’okfulumelo wɔnde wɔ la balentshitshi. (Ewa. 39:21) L’ekomo, Yosɛfu avungɛka akambo wa nyɛtshi w’iyonanghela edjinge ɛnaka wopo wɔ Yehova ndɔɔtshɔkɔla. (Ewa. 45:5) Etengo Yosɛfu, iso mbaka lokembo winá w’okongelaso Yehova djɛ nde ntɔlɔngɔsɔlɛ akambo lá wina wɛdje.​—Yee. 7:17; 73:28.

15. Kɛkɔnge kekotshisa nkaana kɛmɔtshi djɛ nkfulumeyɛ la balentshitshi nkfumɔ akambo wa ntshamba djɛ sii?

¹⁵ Lá nsɔsɔlɔ, ape nkambo nkfumɔ djɛ ntshamba djɛ sii ndeke lolekɔ ekekete etengo djepomanisa la Yɔsɛfu, koko ayale lá lɛdji lɔkɔnge, winá w’otonanghelawɔ nyɛtshi tongokake paa efula l’oloko. Winá w’oyɛso l’okakasano l’onto ɔmɔtshi, ayale kaanga onto wopatɛmɔla Yehova, tongowa wapɔ ntsha iso nkilika tɔkfɔ telá Bible. (Flp. 2:3, 4) Tokolenda ndjɔmbɔmba kɛmɔtshi. Nkaana kɛmɔtshi akiyanaka efula winá wɔ ndeewe ante winande wɔ l’olemo ashimelaki anto akambo wa nyɛtshi la w’ongolo lá nkambo djɛnde. L’edjena kɛnde nangha akambo lopalopa, nkaana kɛso ɔsaka winá djɛ ntɔnɔla lá ndjɔmbɔmba kɛ Yeso. Winá wɔ yootolaka, nde atatolaki. (1 Pɛ. 2:21, 23) La nkambo djɛsɔ lá wɔɔngɔ, nde ɔsaka nkano djɛ nyimɛ yimba má nkambo djɛkɔ. M’ɔkɔngɔ, nde ayɛka ndewa djɛ winande wɔkɔ ayɛka ndoyala l’olando w’ekekete efula edjinge l’okiyano efula. Nkaana kɛso asipisoyɛka ante mbala imɔtshi, winande wɔ l’olemo wɔsɔ atasipisoyɛki kɛnɛ kɛ ndatepelaka. Ko nkaana kɛso ayalaka l’osasa lá wopo wɔ ndakfulumeyɛ la balentshitshi akambo w’iyonanghela, edjinge ayɛka ndoyala la vu.

16. Kɛkɔnge kekoka nkokembɛ ntsha okfulumeyɛ akambo wa ntshamba djɛ sii? (1 Pɛtɛlɔ 3:12)

¹⁶ Ntsha okfulumeyɛ akambo wa ntshamba djɛ sii kana akambo ankina wakokiyanyɛ, vungɔ ente Yehova alekɔ entshupa la ‘wanɛ walekɔ l’eloko wembatshɛ.’ (Yee. 34:18) Nde  nkɔkɔpaka má balentshitshi djɛko la má wopo w’owokelɛ edjito wɛko tende. (Yee. 55:22) Nde alekɔ Isushi yɛ looko l’otondo. Nde nyɛnaka kenkfumɔ keheta. (Wala 1 Pɛtɛlɔ 3:12.) Djɛkondeke, winá w’opomanɛ l’ekakasano wɛ ngopalekɔ l’akoka wa mba nkando, vungɔ ente alekɔ djonyi wɛ nkonga Yehova djɛ nde nkɔlɔngɔsɔla akambo.

17. Lá nkilika Izaya 30:18, kɛkɔnge kɛ Yehova otolakande djɛ ntonanghela?

¹⁷ Lako ilá, Papa kɛso ke l’olongo angɔtɔtshɔkɔla má lotshimbo l’Onkfumi wɔnde. Izaya 30:18 ntepelaka ante: ‘Yehova akonga la balentshitshi djɛ nyonanghela wɔlɔ, edjinge nde angemala djɛ nyoka djandji. Mande Yehova alekɔ Ndjambe kɛ sii. Osasa le anto wakindjɛ nkongela mende.’ Wanɛ wakonga Yehova wangowa ɛtshɔkɔ efula ayale má win’ɔsɔ kana l’andja wa bango w’etsho weyaye.

18. Ɛtshɔkɔ wɛkɔnge wetokongela?

¹⁸ Winá wɔ enkambi wɛ Ndjambe yongingela l’andja wa bango, iwɔ wapangɛna ndjolo lonkina l’ekiyano kana l’ekakasano wepomaná lawɔ lɔɔko kɛnɛ. Akambo wa ntshamba djɛ sii wangima, ekiyano wepangoyala lonkina. (Ndj. 21:4) Topangoyakiyanyɛ djɛ mba nkete dj’oyɛso la djonyi mande djengoyala tshangatshanga. (Yee. 72:16; Iza. 54:13) Ɔsɔngo ɛtshɔkɔ wetokongelá!

19. Kɛkɔnge kɛ Yehova ɔtɔlɔngɔsɔlɛnde ndambondambo má winá wɔsɔ?

¹⁹ Yehova, atɔlɔngɔsɔla má win’ɔsɔ dj’iso ndɔsɛna l’anse k’ɛlɔndjɛlɔ kɛnde má ntokotshɛ dj’iso ndongela nanghedji djɛso djɛ nyɛtshi, la ndjala la wekeka w’osasangɛ. Tɔlɛmbake edjinge totshikake nkambela Yehova. Akambo wa wɔlɔ efula watokongela! Winá w’okongelaso winá wɔ wɔlɔ efula wɔsɔ, nyontshɔ toyale l’osasa djɛ nkindjɛ nkongela Yehova la balentshitshi nkfumɔ djɛnde ntonanghela kɛnɛ kɛ ndatolake!