Wananyɔ wa Betɛlɛ wakambaka l’ilá k’ɔnɔnyi ɔmɔ la ndambo djɛ mpika radio WBBR lá Staten Island, lá New York. M’ɔkɔngɔ wɔ ndjɔmbɛla idjena, iwɔ wapikaka mvulu k’ekekete djɛ waakambaki olemo ndjala l’eteyi, ole mvulu kenkina djɛ ndjila mpeko. Winá w’olemo yashile, wananyɔ watateyɛka ntshumanyɛ mbolo iyalaki djonyi djɛ “radio mbanga ntepela.” Koko wayalaka ladjɛ ntamba enkeka lombombe.

Wananyɔ wɛnaka ambɔ ayalaki okakasano w’ekekete efula djɛ mpika nkodji djɛ radio. Radio wasɔ wayalaki otale wɔ mɛtrɛ 91 tá djiko la wayalaka ladjɛ ndɛndalɛnda l’anteyi k’esembe epe w’awaya wayalaki otale wɔ mɛtrɛ 61. Watalonga mbala kɛ ntondo kɛ yasɛsɛ. Ekomo ekomo, iwɔ walongaka má okotshɔ wɔ Yehova. Calvin Prosser, kanga lokambaki lá olemo wɔsɔ, atepela ante: “Isotalonga mbala kɛ ntondo kɛ sasɛsɛ, totayawandjɛ la totatepela ente, ‘Nyokolenda ekete kɛ somonangha!’” Wananyɔ wapɛyɛka Yehova lomo lá wopo wɔ yalonge, koko enkeka wetashila.

Mpika radio atayala nkambo djɛ wolo, ole atayalaki wɔdju mba mpeko nkfumɔ djalaki djonyi. Ko wananyɔ wawaka émetteur wɛ watɛ 500 wembokambema ntondo, lá idjena yɛ sayalaka. L’edjena kɛ mpona mikro, iwɔ wakambaka ngo la telefɔnɛ. Otsho ɔmɔtshi wɔ Ngɔndɔ k’ape, wananyɔ wɔsaka nkano djɛ nsɛsa nkete dj’ipa oshinga wolo djɛsɔ. Iwɔ wayalaka la djonyi dj’akambo wa ntotepela, ko watshɔka ntotshumba teembo t’Onkfumi. Ernest Lowe avungɔ nkambo mɔtshi dj’atɔla winá wɔ wananyɔ yatshumbaka, Isushi Rutherford b ekameyɛki teembo  tɔ yatshumbaka lá radio wande má Brooklyn, má kilɔmɛtrɛ 25, ko awetaka lá telefɔnɛ.

Wɔnanyɔ Rutherford atepelaka ante: “Nyovumbe, oyoko efula. Nyoposa ngo ngete otonga w’ambushi!” Wananyɔ wokaka ndambo kɛ nsɔnyi ko wadjimɛka émetteur, koko wayalaka l’eshikikelo ambɔ radio wangotepela la wayalaka entshupa djɛ nkalɔ ndɔsɛsa.

Lá Ngɔndɔ k’ape 24, 1924, mbala kɛ ntondo kɛ radio yatepela la yewamá, Wɔnanyɔ Rutherford alambolaka radio “lá wapɔ w’onkfumi wɔ Mesiya.” Nde atepelaka ante okoma wɔ radio wanɛ nde “dj’onto onkfumɔ, ayale ose ɛkɛlɛsiya kɛkɔnge, ndjala l’akoka wa ndjoka Bible la nyɛna djonyi dj’eleko k’owikaso.”

Mbala kɛ ntondo kɛ radio yatepela, ayalaka wɔlɔ efula. L’ilá k’ɛnɔnyi 33 wɛlɔndisá, WBBR ayalaka radio w’ekekete efula watshanghanyɛki nsango yɛ welo w’ilaki olonghanyelo.

Lá 1924, Ngɔndɔ k’esambele, Ambeki wa Bible wasanghanaka lá losanghanyɛ l’ekekete lá Columbus, lá Ohio. Ambeki wa Bible wayɛka m’atshuku ankfumɔ wa looko, la wekameyɛki asawo lá Arabe, Anglais, Français, Allemand, Grec, Hongrois, Italien, Lituanien, Polonais, Russe, Scandinave et Ukrainien. Wilaki ntenyi mɔtshi djɛ nonghanyi lá radio, la akishi wa nonghanyi wananghemaka lá Ohio State Journal djɛ mpɛyɛka lɔpɔlɔ lɔ losanghanyɛ lofu lonkfumɔ.

Lofu l’anɛyi, Ngɔndɔ k’esambele 24, anto ndekana 5000 wingelisá lá losanghanyɛ, wapoposanyɛka lofu l’olemo. Wakapanyɛka enkanda ndekana 30000 la watateyɛka ndjeka Bible l’anto nunu la nunu. Etange k’Olami ketaka lofu lɔsɔ ante: “Etenyi k’osasa kɛ losanghanyɛ l’ekekete.”

Nkambo nkina djɛ djonyi djɛ losanghanyɛ lɔsɔ djalaka Lofu l’atano, Ngɔndɔ k’esambele 25, winá wɔ Wɔnanyɔ Rutherford ndawale onkanda wɔ yafune, wɛnyɛki papoo nanghedji dj’ewandji w’ɛtɛmwɛlɔ. Onkanda wɔsɔ w’ofunamaka ete ngo onkanda wɔ lɛɛta, ko wofunaki ewandji wɛ pɔlitikɛ, wɛ nkɛlɛsiya, la ananghi y’opoto ente iwɔ ndeke lonangha djɛ “anto ndjala lá ovunga wɔ nonghanyi yɛ Ndjambe dj’iwɔ nsakolama dj’iwɔ mba lowiko.” Onkanda wɔsɔ wɛnyɛki ente anto wasɔ “wawolaka Société des Nations la watepelaka ambɔ oyalawɔ nde ‘ilembetelo y’ɛlɔndjɛlɔ kɛ Ndjambe lanɛ lá looko.’” Ambeki wa Bible wayalaki la djonyi dj’oloko wolo djɛ mpoposanyɛ losango lɔsɔ.

Etange k’Olami ketepela lá yopasɛ eposelo wɛ losanghanyɛ lɔsɔ ante: “Iloyi y’angala wa Nkfumi wayisá lá Losanghanyɛ lɔ Columbus wakalɔka la djawo  djɛ wolo . . . , djɛ lako kaanga lowandji kana akfula wa tɔyɛ wa ontonyi wakoka ndaashimba dj’iwɔ mpoposanyɛ.” Leo Claus, kanga lingelisá lá losanghanyɛ lɔsɔ avungɔ ante: “M’ɔkɔngɔ wɔ losanghanyɛ l’ekekete, toyalaka l’osasalo efula wɔ mpoposanyɛ losango lɔsɔ.”

Lá Ngɔndɔ kɛ djomi, Ambeki wa Bible watateyɛka nkapanyɛ miliyɔ yɛ akɔpi yɛ Acte d’accusation contre le clergé, traktɛ kɛ Wɔnanyɔ Rutherford ndawale. Lá angando imɔtshi yɛ Cleveland, Oklahoma, lá États-Unis, Frank Johnson ashiyɛka nkapanyɛ traktɛ lá minitɛ 20 lá ntondo kɛ ansakodji ankina ndopomanyɛ. Nde atakoka ndakonga l’idjena y’anto yakoke ndɔwɛna, mande ase ngando w’ohonaki ladjikɛnde wayalaki la nkɛlɛ m’ɔtɛ wɔ losango lɔ yapoposanyɛ. Wɔnanyɔ Johnson isamaka lá mvulu kɛ ndjambe keyalaki entshupa. Winá wɔ ndɛnyi ante lako onto l’eteyi, nde atshikaka akɔpi yɛ Acte d’accusation contre le clergé lá Bible djɛ osambisha la lá ambeto inkfumɔ. Ko nde aposaka mbala kɛkɔ kɛmɔ. Nde ayalaka la ndambo kɛ winá, ko atshɔka ntonangha ngo wopo wɔkɔ ɔmɔ lá mvulu ipe yɛ ndjambe inkina.

Frank akalɔka l’idjena yɛ yakoke ndopomana. Nde isamaka m’ɔkɔngɔ wɔ mvulu kɛmɔtshi kɛ yasadjɛka esansɛ, ko álengelaki ampame y’ohonaki. Ampame wahetaka l’otuka, koko watɔwɛna. Winá wɔ yatshu, Frank ayɛka le ansakodji ipoposanyɛki entshupa la nde, iyisá ndɔwɔsa, ko watshɔka l’otuka.

Wɔnanyɔ ɔmɔtshi avungɔ ante: “Winá wɔ sotimaka má ngando, tohetaka má mvulu yɛ ndjambe isato. Anto ndekana 50 wemalaki lá ntondo kɛ mvulu kɛ ndjambe kenkfumɔ. Amɔtshi wawalaki traktɛ, ankina wasangɛki djɛ ansakodji nyɛna. Wɔlɔ nde, iso timaka la winá dj’ipa mpona lowo. Koko, tokawoyɛka Yehova Ndjambe kɛso lokasa lá wopo wɔ ndatolame la ndatɔpɛyɛ djaana djɛ mpengɔ antonyi wa Onkfumi.”

Lá engidji enkina, Ambeki wa Bible wokolaka ndjɔmbɔmba k’oloko wolo kɛ wopo wɔkɔ ɔmɔ. Józef Krett apoposanyɛka ase Pologne wayisá ndotshima mbɔkɔ yɛ ntsho lá aminɛ lá nɔrɔ kɛ France. Nde ɔsaka nonghanyi kɛ mpɛyɛ djamba: “Ekfundwelo k’anto wambovɔ́ kembosukana.” Winá wɔ yakapanyɛka anto akishi wa leeta, abe amɔtshi ashimelaka anto wintasɛki lá parwasɛ dj’ipa iwɔ ntshɔ. Koko, watila yimba lá ndjewo kɛ ndapɛyɛ. Anto ndekana 5 000 wayɛka ndekameyɛ djamba djɛsɔ, edjinge abe! Wɔnanyɔ Krett alɔmbaka abe djɛ nde nseela djawo djɛnde, koko atonaka. Wɔnanyɔ Krett apɛyɛka anto enkanda enkfumɔ wɛ ndafune, mande iwɔ wayalaki la mposɛ k’efula kɛ ndjewa Otepela wɔ Ndjambe.—Amɔ. 8:11.

Lá Afrique, Claude Brown atɔlaka losango lɔ wɔlɔ tá Côte-de-l’Or, ketawɔ winá wɔsɔ Ghana. Asawo wa ndapɛyɛka lá ntshandjawala l’enkanda wɛ ndakapanyɛka wekotshɛ́ka djɛ nsɔsɔlɔ ntshanghana lankeke lankeke l’owila. John Blankson, kanga l’ingelaki nkalasa k’ifulume, ekameyɛka djamba mɔtshi djɛ Wɔnanyɔ Brown. Nde asipisoyɛka mbala kɛkɔ kɛmɔ ante ambisola nsɔsɔlɔ. John avungɔ ante: “Nsɔsɔlɔ kɛmpɛyɛka osasa lombombe, ko nsawolaki l’anto ipa l’okakaso lá nkalasa djɛ akambo wa nsɔsɔlɔ.”

Lofu lɔmɔtshi, John atshɔka tá mvulu kɛ ndjambe k’ase Anglikanɛ djɛ ntopola abe weepó dj’olakanyelo wɔ ndjambe kɛmɔ etondo esato, wɔ John ndolewaka ante wopalekɔ olakanyelo wɔ Bible. Abe owitaka, opangolaka ante: “Wɛ opalekɔ Okristo; oyɛ nde ose Djabolo. Ima manɛ!”

Winá wɔ ndakome lá kande, John afunelaka abe onkanda, ɔlɔmbaka djɛ nseela olakanyelo wɔsɔ lá ntondo k’anto. Abe akadjimolaka John la owetaka djɛ nde ndosamba lá biro djɛ prefɛ, l’edjena kɛ kanga  lolendaki akambo wa wamba wa ntshandjawala ndowopola, ntsha lá nsɔsɔlɔ, nde afunelaka abe onkanda.

John akadjimolaka ante: “Ee, nanghaka, Owandji.”

Owandji wɔsɔ alɔmbaka John djɛ nde mfunela abe onkanda djɛ ndɔlɔmba imeyelo. Ko John afunaka ante:

“Owandji, wetsha wɔso amɔndɔmba djɛ lemi nkofunela onkanda djɛ nkɔlɔmba imeyelo, ko lamboyalɔngɔsɔla djɛ nkɔlɔmba imeyelo, koko ngo ntsha ombosuyɛ ente olakanyɛ elakanyelo w’engolo.”

Owandji akamɔka efula ko owopolaka ante: “Blankson, ɔnɛ ndeke akambo wa ngombofuna?”

“Ee, Owandji. Kenkfumɔ k’okokami mfuna ngo kɛnɛ.”

“Ongima má nkalasa. Opakoke nkindjɛ ndjingela nkalasa ntsha otepela nyɛtshi djɛ ɔtɛmwɛlɔ wɔ ewandji wɛ nkalasa osukawɔ.”

“Koko Owandji, . . . winá w’otolakanyɛ ko lemi mpoke nkambo mɔtshi, mpangokopola?”

“Lá nsɔsɔlɔ ongopola.”

“Ee, Owandji, nkambo tshɛ nkisɔ. Nde atekɛki Bible ko momowopola woopó. Ntsha apalekɔ l’akoka wa nkadjimola, lamo oyɛmi ladjɛ mfuna onkanda djɛ ndɔlɔmba imeyelo?”

Watimɛ Blankson má nkalasa. Atatoma koko onkanda wɔ imeyelo.

Etange k’Olami katepelaki lá yopasɛ djɛ ɔnɔnyi w’olemo: “Tokoka ntepela l’eshikikelo kenkfumɔ, la Davidɛ ente: ‘Wɛ ɔngɔpɛyɛ wolo wɔ nana mbandji.’ (Yee. 18:39) Ɔnɔnyi wɔsɔ w’oyalaka ɔnɔnyi wɔ lokembo efula, mande tɛnaka lɔwɔ lɔ Nkfumi . . . Enkambi wɛnde wɛ nsɔsɔlɔ . . . wapoposanyɛki l’osasa.”

T’ekomo k’ɔnɔnyi, wananyɔ wɔsɔka nonghanyi kɛ ntshanghanyɛ radio w’olemo w’ipoposanyɛ. Wawangaka mpika radio onkina entshupa la Chicago. Wetaka radio wa bango wasɔ ambɔ WORD. La émetteur wɛ 5000 watɛ, WORD atshanghanyɛki losango l’Onkfumi tii lá kilɔmɛtrɛ nunu la nunu, kaanga tii lá nɔrɔ kɛ Canada.

Ɔnɔnyi wɔ 1925 woyɛka la osase wɔ nyuma wɔ wɔlɔ efula, má mpakisola looka lɔ Ambeki wa Bible lɔ Ndjiso shapitrɛ 12. Ɔsɔ akokaka ndjala otamba wɔ ntakanyɛ le amɔtshi. Koko, efula wayalaka l’osasa wɔ ndjoka akambo waheta l’olongo la wopo woyɛwɔ l’eposelo l’enkambi wɛ Ndjambe lá looko.