DJAMBA DJƐ WEKELO 41
YEEMBO 13 Kristo alekɔ ndjɔmbɔmba kɛso (lá Otetela)
Elakanyelo w’owaso má etsho 40 wɛ Yeso w’ekomo lá looko
‘Iwɔ wɔwɛnaka l’ilá k’etsho 40, la nde atepelaki akambo walendana l’Onkfumi wɔ Ndjambe.’—ELE. 1:3.
IKANYI YƐ DJAMBA DJƐNƐ
Wopo wɔ ndjokola ndjɔmbɔmba kɛ Yeso ndatshike lá etsho 40 wɛnde w’ekomo lá looko.
1-2. Nkambo djɛkɔnge djehetisá winá w’ambeki ape yotatshɔka tá Emausɛ?
TOLEKƆ lá Nisana 16, 33 D.D. Ambeki wa Yeso wakfulunghana la yɛnyi ole wavɔ la wɔma. Ambeki ape wambongandjɔ má Jerusalɛmɛ, watatshu tá Emausɛ, tá kilɔmɛtrɛ 11 la Jerusalɛmɛ. Ampame yɛsɔ walɛmbaka efula mande wamboyaka Yeso, onto wɔ yalɔndaka. Watshutshɛka nkongi djɛ kɛnɛ kɛ Mesiya ndotankoka nangha. Koko nkambo mɔtshi djɛ nkamɔ nanghemaka.
2 Ongangɛnda ɔmɔtshi asɛmɛlaka la asambaka nya wɔ. Ambeki wasɔ watasawolaki kɛnɛ kekomelisá Yeso. Ongangɛnda wɔsɔ ambaka nyawɔ akambo wa yotakoká mvungɛ. Nde apakisolaka ‘Ntateyɛ me Mɔsɛ tii le aprɔfɛtɛ inkfumɔ,’ lamo Mesiya ndayale ladjɛ nyɛna ndjolo ole mvɔ. Winá w’ampame isato yɛsɔ yakome lá Emausɛ, ongangɛnda wɔsɔ ɛnyɛka oyɛnde na—Yeso imbokfundɔ! Tokokanela efula k’osasa w’oyalisá l’ambeki winá wɔ yewe ambɔ Mesiya alekɔ la lowiko!—Luka 24:13-35.
3-4. Kɛkɔnge kekomelisá ambeki wa Yeso, ko ɛnaso lɔ nge lá djamba djɛnɛ? (Elemo 1:3)
3 Yeso aposelaka le ambeki wande mbala efula l’ilá k’etsho 40 wɛnde w’ekomo lá looko. (Wala Elemo 1:3.) L’eleko kɛsɔ, ambeki wa Yeso wayalaki la yɛnyi ole la wɔma, wakomaka oloyi w’angala wombolola kfu l’osasa, l’eshikikelo ole l’oloko wolo wɔ mpoposanyɛ la ndakanyɛ Onkfumi. a
4 Tokoka mba wapɔ efula má ndjeka eleko kɛ wɔlɔ kɛ lowiko lɔ Yeso kɛsɔ. Lá djamba djɛnɛ, tɔnghɛna wopo wɔ ndakambe l’eleko kɛsɔ 1) djɛ nkembɛ ambeki wande, 2) djɛ ntshimola looka lɔwɔ lɔ Afunelo, la 3) djɛ ndakfumba dj’iwɔ mbɛmba edjito wɛ nkekete. Lá nkambo nkfumɔ, tɔnghɛna wopo w’okokaso ndjokola ndjɔmbɔmba kɛ Yeso.
NKEMBƐ ANTO ANKINA
5. Lamo ambeki wa Yeso yayalaka la djonyi djɛ lokembo?
5 Ambeki wa Yeso wayalaki la djonyi djɛ lokembo. Ladjikɛnge? Amɔtshi watshikaka amvulu, ankfumbo, epoto djɛ nkilika Yeso winá enkfumɔ. (Mat. 19:27) Anto wawɛngɛyɛki mande iwɔ wakomaka ambeki wande. (Dj. 9:22) Iwɔ wayasambɛka nkete djɛsɔ ladjikɛnde wawolaki ambɔ Yeso ndeke Mesiya kelakemisá. (Mat. 16:16) Koko winá w’iyayake Yeso, iwɔ watshutshɛka nkongi la eloko wɛwɔ watshatshɛka.
6. Yeso ndananghe nge m’ɔkɔngɔ wɔ nde nkfundɔ?
6 Ape l’ehamo, Yeso atɛnaki yɛnyi y’ambeki wande ete ngo ilembetelo yɛ wɔdju wɔ nyuma, koko ete ngo yɛnyi yokakaso winá w’ovusɛso onto wɔ ngandji. Djɛko ndeke, ngo lofu lɔ ndakfundɔ nde atateyɛka nkembɛ tolongo tɔnde. Ndjɔmbɔmba, nde aposelaka le Mariya Madɛlɛnɛ winá wɔ ndalelaka lá nketa kɛnde. (Dj. 20:11, 16) Nde aposelaka lonkina le ambeki ape wa sotepelaki má bango djɛ djamba. Ole aposelaka le ɔpɔstɔlɔ Pɛtɛlɔ. (Luka 24:34) Elakanyelo wɛkɔnge w’owaso má ndjɔmbɔmba kɛ Yeso? Tokolenda kɛnɛ kehetisá mbala kɛ ntondo kɛ ndɛnama.
7. Ete ngo ɔkɔndɔlawɔ lá Djɔanɛ 20:11-16, Yeso ndɛnyi Mariya anangha nge l’inkɛnkɛsɛ yɛ Nisana 16, ko kɛsɔ yotshinde djɛ nangha nge? (Lenda edjinge ntshango.)
7 Wala Djɔanɛ 20:11-16. L’inkɛnkɛsɛ yɛ Nisana 16, iloyi y’amato wa nkɔmano itshɔka tá idjena yɛ yatshike odjo wɔ Yeso. (Luka 24:1, 10) Nyontshɔ tokolenda kɛnɛ kekomelisá omoto ɔmɔtshi, Mariya Madɛlɛnɛ. Winá wɔ Mariya ndakome lá nketa, nde atɛna onto. Nde alotaka djɛ ntoshimela Pɛtɛlɔ nya Djɔanɛ ole ákilikaka winá wɔ yotalotaka tá nketa. M’ɔkɔngɔ wɔ ndjawola ambɔ lako onto lá nketa, ampame yɛsɔ wakalɔka tá mbandja. Koko Mariya atakalɔ. Nde atshikalaka l’eteyi la ndela. Kaanga ndotewaki, Yeso ɔwɛnaki. Nde ɛnaki wisɔyi wa omoto wɔsɔ ko atshindamaka djɛ ndokembɛ. Ko nde aposelaka le Mariya la ananghaka ikakambo imɔtshi yokembisá efula. Nde atepelaka nya nde ko ɔpɛyɛka odjito w’ekekete efula—ntoshimela wananyɔ wande losango l’ekfundwelo kɛnde.—Dj. 20:17, 18.
Okola Yeso má nkɔmɛ la ndjoka waambɔlɛmba djandji (Lenda itenyi 7)
8. Wopo wɔkɔnge w’okokaso ndjokola Yeso?
8 Wopo wɔkɔnge w’okokaso ndjokola Yeso? Tokoka nangha akambo efula djɛ ntshinda wananyɔ l’ankaana djɛ nkambela Yehova ntsha, ete ngo Yeso, tewa ekakasano wɛwɔ la tawoka djandji winá w’osawolaso lawɔ. Tokolenda kɛnɛ kekomelisá nkaana Jocelyn, kanga ankfunɛnde ndavu l’aksida. Nde atepela ante: “L’ilá k’angɔndɔ efula, ndjalaki la yɛnyi efula winá enkfumɔ.” Koko wɔnanyɔ ɔmɔtshi la wadjɛnde wowetaka lá kawɔ, wowekameyɛka la djandji nkfumɔ, la w’oshikikɛka ambɔ Yehova ndɔwɔsaka l’odjito. Jocelyn atepela ante: “Ndjokaka ete ngo Yehova ambokamba lawɔ djɛ mposɛ lemi má ndjinga kɛ ndjale kɛ widjima ko amondjila lá wato. Iwɔ wankotshɛ́ka djɛ nkalɔ mpɛtshɛ mposɛ kɛmi kɛ nkambela Yehova.” Ole iso tokoka nkembɛ anto ankina má ndapɛyɛ lotoyi winá w’otodjipolawɔ eloko wɛwɔ, la má mposɛ etepela wɛ djandji, l’ikanyi yɛ ndakembɛ dj’iwɔ nkindjɛ nkambela Yehova.—Ɔrɔ. 12:15.
KANA YIMBA LAWƆ LÁ AFUNELO
9. Ambeki wa Yeso yapomana l’okakasano wɔkɔnge, ko Yeso ndakotshɛ́ ngete mo?
9 Ambeki wa Yeso wawolaka la wilaka welo djɛ nkamba l’Otepela wɔ Ndjambe lá mbiko yɛwɔ. (Dj. 17:6) Koko, iwɔ watasipisoyɛ lamo Yeso ndavu l’otamba wɔ ndjolo ete ngo ose wibi. Yeso ɛnaka ante wakalɔka ndjala l’ehamo, ape má oloko nyɛtshi, koko mande watasipisoyɛki Afunelo. (Luka 9:44, 45; Dj. 20:9) Ko nde akanaka yimba lawɔ l’Afunelo. Tokolenda wopo wɔ ndananghe nghɔsɔ winá wɔ ndaposela le ambeki ape lá mboka k’Emausɛ.
10. Wopo wɔkɔnge Yeso ndaawoyɛ ambeki wande ante nde ndeke Mesiya? (Luka 24:18-27)
10 Wala Luka 24:18-27. Tɛna ente Yeso átashimela mbala kɛkɔ kɛmɔ oyɛnde na. Koko nde awopolaka weepó. Ladjikɛnge? Nkoka ndjala akɔpaka iwɔ mposɛ kɛnɛ kelekɔ́ lá timba l’eloko wɛwɔ. Kɛsɔ ndeke yananghe. Woshimelaka ambɔ wakongelaki djɛ Yeso ntshungola Isariyɛlɛ má lɔnyɔkɔ l’ase Ɔrɔma. M’ɔkɔngɔ w’iwɔ ntepela ekiyano wɛwɔ, Yeso akambaka l’Afunelo djɛ ndakotshɛ́ dj’iwɔ nsipisoyɛ kɛnɛ kehetisá. b La nkɔlɔ djɛkɔ, Yeso ahetshɛka winá má nshikikɛ ambeki ankina nsɔsɔlɔ kɛsɔ. (Luka 24:33-48) Olakanyelo wɔkɔnge w’owaso m’ɔkɔndɔ wɔnɛ?
11-12. a) Elakanyelo wɛkɔnge w’okokaso mba má wopo wɔ Yeso ndalakanyɛ akambo wa nsɔsɔlɔ wa Bible? (Lenda edjinge asango.) b) Wopo wɔkɔnge wɔnanyɔ Nortey ndakotshɛ́ ombeki wɔnde wɔ Bible?
11 Wopo wɔkɔnge w’okokaso ndjokola Yeso? Ntondo ntondo, winá w’ekɛ ambeki Bible, opolawɔ weepó wɛ mayɛlɛ dj’iwɔ mposɛ kɛnɛ kelekɔ́ l’eloko la lá timba tɔwɔ. (Woo. 20:5) Winá w’osipisoyɛ wopo w’oyawokawɔ, ɛnyɛwɔ wopo wɔ ndjisola vɛrse dendaná la nkambo djɛwɔ. Ewɔ ikanyi yɛ ndashimela kɛnɛ k’oyɛwɔ ladjɛ nangha. Koko, kotshɛ́wɔ djɛ ntɔnɔla lá Afunelo la nsipisoyɛ wopo w’okokawɔ nkamba la tɔkfɔ tɔ Bible lá mbiko yɛwɔ. Tokolenda ndjɔmbɔmba kɛ wɔnanyɔ Nortey, lowika lá Ghana.
12 Nortey atateyɛka ndjeka Bible, winá wɔ ndayalaka l’ɛnɔnyi 16. Koko atayala ilá, ase nkfumbo kɛnde watonaka. Kɛkɔnge k’okotshisá djɛ mpikama ndii? Wetsha wɔnde wɔ Bible akambaka la Mateo 10 djɛ ndopakisola ante Akristo wa nsɔsɔlɔ wangɔnyɔkɔlama. Nortey atepela ante: “Djɛko ndeke winá w’owangisá lɔnyɔkɔ, ndashikikɛka ente lambisola nsɔsɔlɔ.” Wetsha wɔnde wɔ Bible okotshɛ́ka lonkina djɛ nde nkana yimba la Mateo 10:16 djɛ nde ndjala okoso ole la dilɛmɛlɔ winá w’osawolawɔ akambo w’ɔtɛmwɛlɔ lá kawɔ. M’ɔkɔngɔ wɔ ndongola batisimo, Nortey akɔpaka nkoma yat’ekalo, koko isɛkɛnde akongelaki djɛ nde nangha inivɛrsite. L’edjena kɛ nshimela Nortey kɛnɛ k’oyɛnde ladjɛ nangha, wetsha wɔnde owopolaka weepó la okotshɛ́ka djɛ ntɔnɔla lá tɔkfɔ t’Afunelo. Eposelo weyalisá nge? Nortey ɔsaka nkano djɛ ndɔsa olemo wɔ winá enkfumɔ. Isɛkɛnde okilikaka má mvulu. Nortey ndoke ngete mo? Atepela ante: “Ndjalaka l’eshikikelo ente lambɔsa nkano djɛ wɔlɔ.” Ntsha tɔmbɔsa ole iso winá wɔ nkotshɛ́ anto ankina dj’iwɔ nkana yimba l’Afunelo, tongakotshɛ́ dj’iwɔ nkoma Akristo wambotshunda.—Ɛfɛ. 3:16-19.
Okola Yeso má nkotshɛ́ anto ankina dj’iwɔ nkana yimba lá Afunelo (Lenda itenyi 11) e
KOTSHƐ́ WANANYƆ DJ’IWƆ NKOMA ‘AMPAME ILEKƆ́ EPAPƐYƐ’
13. Yeso ndananghe nge djɛ ndáshikikɛ ante olemo wɔ Papa kɛnde wongokindjɛ nkambema? (Ɛfɛsɛ 4:8)
13 Winá wɔ ndayalaka lá looko, Yeso akotshɛki odjito wɔ Papa kɛnde ndɔpɛyɛ. (Dj. 17:4) Koko Yeso atayalaki l’ikanyi yɛnɛ: ‘Ntsha nyɔkɔpa djɛ nkambo nanghema wɔlɔ, nyo ladjɛ nangha nyɔmɛlɛ kɛnyo.’ L’ilá k’ɛnɔnyi esato l’etenyi w’olemo wɔnde, nde akfumbaka anto ankina dj’iwɔ nkamba olemo wɔsɔ. Lá ntondo kɛ nkalɔ t’olongo, Yeso apɛyɛka ambeki—nkoka amɔtshi wayalaki l’ɛnɔnyi 20 la ndjape—odjito wɔ nama ɛnkɔkɔ wɛ ntsho wɛ Yehova la ndɔndjɛ olemo w’olakanyelo ole w’ipoposanyɛ. (Wala Ɛfɛsɛ 4:8.) Wopo wɔkɔngɔ Yeso ndakambe l’etsho 40 wɛnde w’ekomo djɛ nkotshɛ́ ampame yɛ nkɔmano, ilalambolisá la yɛ ankambi yɛsɔ dj’iwɔ nkoma ‘ampame ilekɔ́ epapɛyɛ’?
14. Wopo wɔkɔnge wɔ Yeso ndakotshɛ́ ambeki wande l’ilá k’etsho 40 wɛnde w’ekomo lá looko? (Lenda edjinge ntshango.)
14 Yeso apɛyɛka ambeki wande alako wa wolo koko wa ngandji. Ndjɔmbɔmba, ɛnaka ante amɔtshi wayalaki l’ehamo, ko alakaka. (Luka 24:25-27; Dj. 20:27) Nde akɔkɔmɛka djonyi djɛ ndápɛyɛ efula l’olemo wɔ nama ɛnkɔkɔ koko ape l’elemo wɛ demba. (Dj. 21:15) Nde avungolaka dj’ipa iwɔ nkiyana lá lɛdji l’indeko djɛ edjito w’okokawɔ mbɛmba l’olemo wɔ Yehova. (Dj. 21:20-22) Edjinge asembolaka ikanyi yɛwɔ yɛ nyɛtshi lá nkambo dj’Onkfumi la akotshɛ́ka dj’iwɔ ndápɛyɛ l’olemo w’ipoposanyɛ. (Ele. 1:6-8) Wopo wɔkɔnge tokokolo okokawɔ ndjokola Yeso?
Okola Yeso má nkotshɛ́ wananyɔ dj’iwɔ ndjala l’akoka wa mbɛmba edjito (Lenda itenyi 14)
15-16. a) Wopo wɔkɔnge tokokolo okokawɔ ndjokola Yeso? Pakisola. b) Wopo wɔkɔnge Patrick ndawa wapɔ má dako?
15 Wopo wɔkɔnge tokokolo okokawɔ ndjokola Yeso? Iwɔ nkoka nkfumba la nkotshɛ́ wananyɔ, ndjila ole dɛngɛ, dj’iwɔ nkotshɛ kɛnɛ kɛlɔmbama djɛ mbɛmba edjito wɛ nkekete. c Tokokolo wapakongela djɛ anto w’okfumbawɔ ndjala djɔ. Iwɔ ladjɛ ndapɛyɛ alako la ngandji djɛ wananyɔ wa dɛngɛ ndjewa akambo efula la nyɛna djonyi djɛ ndjala nkɔmano, okitshakitshɛ, ole entshupa djɛ nkambela anto ankina.—1 Ti. 3:1; 2 Ti. 2:2; 1 Pɛ. 5:5.
16 Tokolenda wopo wɔ wɔnanyɔ Patrick ndawa wapɔ má dako. Ete ngo ndayalaka ilɛngɛ, nde aposɛki etepela wɛ nyɛtshi la ananghelaki anto, ole ankaana, akambo ipa la ngandji. Ikokolo imɔtshi ɛnaka wɔdju wɔ Patrick ko ɔpɛyɛka dako djɛ wolo koko la ngandji. Patrick atepela ante: “Ndekɔ l’osasa efula lá wopo wɔ nandake. Ndɛmbaka efula winá wɔ mɛnaka wananyɔ ankina wawa edjito wɛ makombolaka. Koko dako dj’ikokolo nkotshɛ́ka djɛ lemi nyɛna djonyi djɛ nkambela wananyɔ l’ankaana l’okitshakitshɛ l’edjena kɛ mpona mpipo kana edjito l’otshumano.” Eposelo weyalisá nde, wasɔnaka Patrick ete ngo ikokolo winá wɔ ndawa ɛnɔnyi 23.—Woo. 27:9.
17. Wopo wɔkɔnge Yeso ndɛnyɛ ante ilelaki ambeki wande oloko?
17 Yeso atapɛyɛ ambeki ngo odjito wɔ mpoposanyɛ toko, koko ole wɔ ndakanyɛ. (Lenda nɔtɛ kɛ wekelo: “leur enseignant” lá Mateo 28:20 lá Bible djɛ Falase.) Ambeki wakokaka nyɛna ambɔ wapalekɔ l’akoka wa nkotshɛ odjito wɔsɔ. Koko Yeso ewaki ante iwɔ wangokotshɛ, ole áshimelaka nghɔsɔ. L’eshikikelo kenkfumɔ, Yeso áshimelaka ante: ‘Ete ngo Papa ndantome, lemi koko lamonyotoma.’—Dj. 20:21.
18. Wopo wɔkɔnge tokokolo okokawɔ ndjokola Yeso?
18 Wopo wɔkɔnge tokokolo okokawɔ ndjokola Yeso? Tokokolo tɔ mɛlɛmɛlɛ nkfumbaka anto dj’iwɔ mbɛmba edjito. (Flp. 2:19-22) Ndjɔmbɔmba, wakoka ndɔmba dɛngɛ djɛ nsola la ndɔngɔsɔla Mvulu k’Onkfumi. M’ɔkɔngɔ wɔ mpɛyɛ edjito, iwɔ nkoka nshimela waayɔmbɔsɔna wopo w’awilelawɔ oloko, ndaakfumba la ndatshika dj’iwɔ nkamba olemo wɔkɔ. Matthew, ikokolo yɛ bango, atepela ante alekɔ la djedjɛ efula le tokokolo t’awalo tokfumbisá djɛ mbɛmba edjito la towilelisá oloko ente nde angokotshɛ edjito wɛkɔ. Nde atepela ante: “Winá wɔ mananghaka evunga, wankotshɛ́ka djɛ nyɛna wopo w’okokami ndjeka m’evunga wɛmi, la w’okokami ndɔngɔsɔla.” d
19. Sɔmbɔsa nkano djɛ nangha nge?
19 Yeso akambaka l’etsho 40 wɛnde w’ekomo lá looko djɛ nkembɛ, ndakanyɛ, la nkfumba anto ankina. Nyontshɔ tokilike ndjɔmbɔmba kɛnde. (1 Pɛ. 2:21) Nde angotokotshɛ́ djɛ nangha nghɔsɔ. Nde alakaka ante: ‘Lemi ndekɔ isanyo etsho enkfumɔ tii l’ekomo kɛ nkfumbo dj’akambo.’—Mat. 28:20.
YEEMBO 15 Tolumɛ wɔna Ndjambe wɔ ntondo! (lá Otetela)
a Evanjiliyo la enkanda enkina wɛ Bible wɛnyɛ mbamba efula yɛ Yeso ikfundwisá ndaposela le anto ankina ete ngo: Mariya Madɛlɛnɛ (Dj. 20:11-18); amato ankina (Mat. 28:8-10; Luka 24:8-11); ambeki 2 (Luka 24:13-15); Pɛtɛlɔ (Luka 24:34); apɔstɔlɔ nyimɛ ngo Tɔma (Dj. 20:19-24); apɔstɔlɔ, edjinge Tɔma (Dj. 20:26); ambeki 7 (Dj. 21:1, 2); ambeki ndekana 500 (Mat. 28:16; 1 Kɔ. 15:6); ankfunɛnde Djakɔbɔ (1 Kɔ. 15:7); apɔstɔlɔ ankfumɔ (Ele. 1:4); apastɔlɔ entshupa la Betani. (Luka 24:50-52) Mbamba imɔtshi yɛ ndaposela le wɔ itafunama.—Dj. 21:25.
b Djɛ nyɛna ɔnɔnghɔ w’aprɔfɛsi ilendana la Mesiya, lenda lá jw.org djamba “Prɔfɛsi yelendana la Mesiya nyɛnyɛka nsɔsɔlɔ ente Yeso áyalaki Mesiya?”
c Winá ɛmɔtshi, wɔnanyɔ wokotshɛ akambo walɔmbama wolekɔ́ l’ɛnɔnyi 20 la ndjape nkoka nsɔnama ete ngo olami w’edjingadjinga. Koko, wɔnanyɔ wɔ nghɔsɔ ladjɛ ntondo ntondo nkamba ete ngo ikokolo.
d Djɛ mba alako lá wopo wɔ nkotshɛ́ wananyɔ wa dɛngɛ dj’iwɔ nkotshɛ akambo walɔmbama djɛ mbɛmba edjito, lenda Etange k’Olami kɛ Ngɔndɔ k’enanɛyi 2018 nki. 11-12, ite. 15-17, la kɛ Ngɔndɔ k’anɛyi 15, 2015, nki. 3-7, 8-13.
e NSAKISO KƐ NTSHANGO: M’ɔkɔngɔ wɔ ndokotshɛ́ djɛ nkana yimba l’Afunelo, ombeki wɔ Bible ambɔsa nkano djɛ ntambɛ dɛngalɛnga djɛ Nɔɛlɛ
