DJAMBA DJƐ WEKELO 42
YEEMBO 103 Elami w’ɛnkɔkɔ—Ampame ilekɔ́ epapɛyɛ (lá Otetela)
Tɛnyɛ djedjɛ djɛso te ‘ampame ilekɔ́ epapɛyɛ’
‘Winá wɔ ndahande tá djiko . . . , nde apɛyɛka ampame ilekɔ́ epapɛyɛ.’—ƐFƐ. 4:8.
IKANYI YƐ DJAMBA DJƐNƐ
Wopo wɔ enkambi wekotshɛ́, tokokolo, la elami wɛ djingadjinga otokotshɛ́wɔ, la wopo w’okokaso nyɛnyɛ djedjɛ djɛso lá kɛnɛ k’ampame yɛ nkɔmano yɛsɔ onanghawɔ.
1. Epapɛyɛ ɛmɔtshi wɛkɔnge wɛ Yeso ndatɔpɛyɛ?
LAKO kaanga onto ɔmɔ wolekɔ́ la lokapo ndaka Yeso. Winá wɔ ndayalaka lá looko, nde akambaki l’ɛkɔpa la nkfulu kɛnde kɛ nangha ansese djɛ nkotshɛ́ anto. (Luka 9:12-17) Nde apɛyɛka opapɛyɛ woleka epapɛyɛ enkfumɔ: Olambo wɔ lowiko lɔnde. (Dj. 15:13) Ngo má winá wɔ ndakfundɔ, Yeso ɛnyɛka lokapo lɔnde. Ete ngo ndalake, nde alɔmbaka Yehova djɛ ntɔpɛyɛ nyuma k’ekina djɛ ntolakanyɛ la tokembɛ. (Dj. 14:16, 17, nɔtɛ; 16:13) Má mbamba kɛ nsanghanyɛ y’otshumano, Yeso ntɔpɛyɛka kɛnɛ k’oyɛso la djonyi djɛ nkfumba ambeki lá looko l’otondo.—Mat. 28:18-20.
2. Oye ‘ampame ilekɔ́ epapɛyɛ’ yotepelawɔ lá Ɛfɛsɛ 4:7, 8 na?
2 Tokolenda opapɛyɛ onkina wɔ Yeso ndatɔpɛyɛ. Ɔpɔstɔlɔ Poolo afunaka ante m’ɔkɔngɔ wɔ Yeso mpanda t’olongo, ‘nde apɛyɛka ampame ilekɔ́ epapɛyɛ.’ (Wala Ɛfɛsɛ 4:7, 8.) Poolo apakisolaka ante Yeso apɛyɛka opapɛyɛ wɔsɔ djɛ nsuka otshumano lá topo totshikitanyi. (Ɛfɛ. 1:22, 23; 4:11-13) Lɔɔko kɛnɛ, ‘ampame ilekɔ́ epapɛyɛ’ yɛsɔ nde enkambi wekotshɛ́, tokokolo t’otshumano, l’elami wɛ djingadjinga. a Lá nsɔsɔlɔ, ampame yɛsɔ walekɔ ase ntshamba djɛ djɔ, djɛko ndeke yonanghaka evunga. (Dja. 3:2) Koko Nkfumi kɛso Yeso Kristo nkambaka lawɔ djɛ ntokotshɛ́, iwɔ walekɔ epapɛyɛ leso.
3. Kɔpɛyɛ ndjɔmbɔmba kɛnyɛ wopo w’okokaso nsuka olemo wɔ ‘ampame ilekɔ́ epapɛyɛ.’
3 Yeso apɛyɛka ampame yɛsɔ olemo wɔ nkembɛ otshumano. (Ɛfɛ. 4:12) Koko isankfumɔ nkoka ndakotshɛ́ djɛ mbɛmba odjito wɔ djonyi wɔsɔ. Ndjɔmbɔmba: Amɔtshi wakamba l’opikelo wɔ Amvulu y’Onkfumi. Ankina wasuka olemo wɔsɔ má mpɛyɛ eleelo, mbɛmba nkete, la má nkamba elemo enkina. Lá wopo wɔkɔ ɔmɔ, isankfumɔ nkoka nsuka welo wilá enkambi, tokokolo, l’elami wɛ djingadjinga má kɛnɛ k’otepelaso la k’onanghaso. Nyontshɔ tokolenda wopo w’owaso wapɔ m’olemo wɔwɔ wɔ wolo, la wopo w’okokaso ndawɛnyɛ ole nyɛnyɛ Yeso, kanga lɔtɔpɛyisá ‘ampame ilekɔ́ epapɛyɛ’ yɛsɔ ente tolekɔ la djedjɛ lá kɛnɛ k’onanghawɔ.
ENKAMBI WEKOTSHƐ́ NKAMBAKA ‘ELEMO WEKOTSHƐ́’
4. ‘Elemo wekotshɛ́’ ɛmɔtshi wɛkɔnge wekambaki enkambi wekotshɛ́ l’ɛtɛndɔ kɛ ntondo?
4 L’ɛtɛndɔ kɛ ntondo, wananyɔ amɔtshi wasɔnamaka ete ngo enkambi wekotshɛ́. (1 Ti. 3:8) Ɛnama ente iwɔ wakambaki ‘elemo wekotshɛ́’ wefunisá Poolo. (1 Kɔ. 12:28) Lá nsɔsɔlɔ, enkambi wekotshɛ́ nkambaka elemo wɛ djonyi efula djɛ tokokolo ndápɛyɛ l’olakanyelo la olamelo w’ɛnkɔkɔ. Ndjɔmbɔmba, enkambi wekotshɛ́ nkoka nangha akɔpi y’Afunelo, kana nkoka nsomba mpeko dekɔ djonyi djɛ nangha akɔpi.
5. ‘Elemo wekotshɛ́’ ɛmɔtshi wɛkɔnge wekamba enkambi wekotshɛ́ lɔɔko kɛnɛ?
5 Kolenda elemo ɛmɔtshi wɛ djonyi wekamba enkambi wekotshɛ́ l’otshumano wɔko. (1 Pɛ. 4:10) Amɔtshi wakamba lá owadji wɔ mfalanga, l’etatshi kɛ looko, l’olamelo w’enkanda djɛ ansakodji ndɔsaka winá enkfumɔ, lá audio/video, lá olongwelo ole owadji w’anto lá losanghanyɛ edjinge lá ɔlɔngɔswɛlɔ wɔ Mvulu k’Onkfumi. Elemo enkfumɔ wɛsɔ welekɔ djonyi djɛ otshumano nkɛnda lá wopo wɔ wɔlɔ. (1 Kɔ. 14:40) Lá djiko djɛ lasɔ, enkambi wekotshɛ́ ɛmɔtshi wangowake edjito lá Losanghanyɛ lɔ Lowiko l’Okristo la wangɔpɛyɛke wamba wa ntshandjawala. Onkambi wokotshɛ́ nkoka nsɔnama djɛ nsuka olami w’iloyi y’olemo w’ipoposanyɛ. Winá ɛmɔtshi, onkambi wokotshɛ akambo walɔmbama nkoka ntshindjeyɛ ikokolo lá mbembo k’ɛnkɔkɔ.
6. Donga mɔtshi djɛkɔnge dj’oyɛso la djedjɛ le enkambi wekotshɛ́?
6 Wopo wɔkɔnge w’otshumano owakawɔ wapɔ m’elemo wekamba enkambi wekotshɛ́? Nkaana Beberly, b má Bolivie atepela ante: “Enkambi wɛso wekotshɛ́ lokasa efula, longosasangake la nsanghanyɛ lombombe. Mpeyi má elemo wɛwɔ nkoka ntshumba, mpɛyɛ kɔmantɛrɛ, ndjekameyɛ djamba la mba elakanyelo w’avideo l’asango. Wangonanghake la wolo djɛ nama waalekɔ́ lá losanghanyɛ la wangilake waalekɔ lá zumɛ yimba. M’ɔkɔngɔ wɔ nsanghanyɛ wangɛnyɛke ndjɔmbɔmba má ndjɔmba, mbala mfalanga, ole ndáshikikɛka dj’iso mba enkanda w’oyɛso la djonyi. Ndekɔ la djedjɛ efula le wɔ!” Leslie, má Colombie, kanga womɛnde okambande ete ngo ikokolo, atepela ante: “Womɛmi okotshɛkande edjito wɛnde wɔlɔ wɔlɔ ngo m’okotshɔ w’enkambi wekotshɛ́. Otasambawɔ iwɔ, womɛmi atayala l’elemo efula, djɛko ndeke ndekɔ la djedjɛ efula lá osasalo l’ɛkɔpa kɛwɔ kɛ nkotshɛ́.” Ape l’ehamo, ongokake ngo wopo wɔkɔ ɔmɔ.—1 Ti. 3:13.
7. Wopo wɔkɔnge w’okokaso nyɛnyɛ enkambi wekotshɛ́ djedjɛ? (Lenda edjinge ntshango.)
7 Kaanga oyɛso lá djedjɛ l’enkambi wekotshɛ́, Bible ntokembɛka ante: ‘Nyɛnyɛ djɛ nyolekɔ la djedjɛ.’ (Kɔl. 3:15) Krzysztof, ikokolo imɔtshi yɛ Finlande, ɛnyɛ djedjɛ djɛnde má ntepela ante: “Langotomake kartɛ kana mesajɛ ko l’eteyi langofunake vɛrse kana yopo imɔtshi kɔɔ y’onkambi wokotshɛ́ ndakembɛ kana elonga k’oyɛmi la djedjɛ l’olomo wɔnde.” Pascal nya Jael, waawika lá Nouvelle-Calédonie, wangɔlɔmbɛlake enkambi wekotshɛ́ mbala efula. Pascal atepela ante: “Atahete ilá, tɔwɔndaka la tɔlɔmbaka lá nkambo djɛ wananyɔ wambɔsɔnama l’otshumano wasɔ djɛ nyɛnyɛ djedjɛ djɛso.” Yehova nyɛnaka ndɔmbɔ yɛ nghɔsɔ, la otshumano wonkfumɔ mbaka wapɔ.—2 Kɔ. 1:11.
TOKOKOLO T’OTSHUMANO ‘WAKAMBA OLEMO WƆ WOLO L’ANTEYI KƐNYO’
8. Lamo Poolo ndafune ante tokokolo t’ɛtɛndɔ kɛ ntondo wakambaki ‘elemo wɛ wolo efula’? (1 Tesalɔnikɛ 5:12, 13)
8 Tokokolo t’ɛtɛndɔ kɛ ntondo wakambaki la wolo l’otshumano. (Wala 1 Tesalɔnikɛ 5:12, 13; 1 Ti. 5:17) Iwɔ ‘walɔndjɛki’ otshumano, walɔndjɛki nsanghanyɛ la wɔsaki ankano ete ngo iloyi yɛ tokokolo. Iwɔ ‘walakaki’ wananyɔ l’ankaana má ndapɛyɛ alako kɔɔ koko la ngandji djɛ nama otshumano. (1 Te. 2:11, 12; 2 Ti. 4:2) Lá nsɔsɔlɔ, ampame yɛsɔ wangokambake la wolo efula djɛ nshiyɛ ehomba w’ankfumbo yɛwɔ la dj’iwɔ ndjala la lonyuma lɔ wolo.—1 Ti. 3:2, 4; Tito 1:6-9.
9. Edjito ɛmɔtshi wɛkɔnge wekotshɛ tokokolo lɔɔko kɛnɛ?
9 Lɔɔko kɛnɛ tokokolo wambolola kfu l’elemo. Walekɔ ansakodji. (2 Ti. 4:5) Wangopoposanyɛke l’osasalo onkfumɔ, wangolonghanyɛke olemo w’ipoposanyɛ l’etatshi kɛwɔ kɛ looko, wangotokfumbake djɛ ndakanyɛ la mpoposanyɛ wɔlɔ wɔlɔ. Wangokambake lonkina ete ngo tosushi tɔ djandji la topasɔnɛ dongi. Winá w’Okristo onanghande mpekanto k’ekekete, tokokolo wangonanghake djɛ ndokotshɛ́ djɛ ndɔngɔsɔla djokanelo djɛnde nya Yehova. Lá winá wɔkɔ ɔmɔ, wangowadjɛke djɛ nama piyɔɔ k’otshumano. (1 Kɔ. 5:12, 13; Nga. 6:1) Odjito wɔ ntondo wɔ tokokolo nde nama ɛnkɔkɔ. (1 Pɛ. 5:1-3) Wangɔpɛyɛke wamba wa wɔlɔ wambɔlɔngɔsɔlama m’Afunelo, wangonanghake la wolo djɛ ndjewa onto onkfumɔ w’otshumano la wangetake ɛnkɔkɔ lá telefɔnɛ. Tokokolo tɔmɔtshi wangokambake lá elemo w’opikelo la w’ɔlɔngɔswɛlɔ wɔ Amvulu y’Onkfumi, lá olonghanyelo wɔ nsanghanyɛ yɛ nkekete, lá Kɔmite kɛ Djokanelo l’Opitalo, lá Iloyi Yewembola ase Elando, ngole l’elemo enkina. Tokokolo watokambela elemo efula!
10. Donga mɔtshi djɛkɔnge dj’oyɛso la djedjɛ le tokokolo tɔso?
10 Yehova ewoyɛka ante tokokolo wangotolama wɔlɔ, ko iso ‘topangoka wɔma la topangodjidjima lokomba.’ (Jɛr. 23:4) Nkaana Johanna, kewiká lá Finlande, ɛnaka nsɔsɔlɔ k’etepela wɛsɔ winá wɔ nyɛnghɛnde ndatate olando w’ekekete. Nde akɔndɔla ante: “Kaanga mayalaka l’okakasano wɔ nshimela anto wopo wɔ mokaka, ikokolo imɔtshi yɛ motewaka wɔlɔ anyɛnyɛka bale ntshitshi, alɔmbaka nya lemi la anshikikɛka ante Yehova nkɔkɔpa. Mpovungɔka etepela kɔɔ wɛ ndatepela, koko ndjokaka ente ndekɔ l’elamelo. Nsuyɛ ente Yehova ndeke lotomisá djɛ ndonkotshɛ́ lá winá wɛdje.” Lá wopo wɔkɔnge tokokolo t’otshumano wɔko yombokokotshɛ́?
11. Wopo wɔkɔnge w’okokaso nyɛnyɛ tokokolo djedjɛ? (Lenda edjinge ntshango.)
11 Yehova nkɔpaka iso ndjala la djedjɛ efula le tokokolo ‘m’ɔtɛ w’olemo wɔwɔ.’ (1 Te. 5:12, 13) Henrietta, má Finlande, atepela ante: “Tokokolo nkotshɛ́ka anto l’ɛkɔpa, koko kɛsɔ kepasakisola ente walekɔ la wolo kana la winá efula, kana ente wapalekɔ l’ekakasano lá mbiko yɛwɔ. Winá ɛmɔtshi lemi ndashimelaka ente: ‘Wɛ ongewake anɛ? Olekɔ ikokolo yɛ wɔlɔ efula. Lambɔkɔpaka ngo wɛ ndjewa nghɔsɔ.’” Nkaana Sera, kanga lowika lá Turquie, c atepela ante: “Tokokolo walekɔ la djonyi djɛ lokembo dj’iwɔ nkindjɛ nkamba elemo wɛwɔ. Lasɔ, tokoka ndatomela kartɛ, ndaweta djɛ ndosanga lɔwɔ, kana ndatshindjeyɛ l’olemo w’ipoposanyɛ.” Olekɔ l’ikokolo imɔtshi y’oyɛ la djedjɛ efula m’ɔtɛ w’olemo wɔnde? Hona wopo wɔ ndoshimela ente olekɔ la djedjɛ le nde.—1 Kɔ. 16:18.
Okoka “nkembɛ” tokokolo dj’iwɔ nkindjɛ mbɛmba edjito wɛwɔ (Lenda itenyi 7, 11, 15)
ELAMI WƐ DJINGADJINGA NTOKEMBƐKA
12. Nonghanyi kɛkɔnge kekembɛki ntshumano l’ɛtɛndɔ kɛ ntondo? (1 Tesalɔnikɛ 2:7, 8)
12 Kristo Yeso apɛyɛka otshumano ‘ampame ilekɔ́ epapɛyɛ’ dj’iwɔ nkamba elemo lá wopo onkina. La ɛlɔndjɛlɔ kɛnde, tokokolo tɔ Jerusalɛmɛ watomaka Poolo, Barnabasɛ, l’ampame inkina ete ngo elami wɛ djingadjinga. (Ele. 11:22) Ladjikɛnge? Ngo lá elonga kɛkɔ kɛmɔ kɛ yasɔnɛ enkambi wekotshɛ́ la tokokolo: Nkembɛ otshumano. (Ele. 15:40, 41) Ampame yɛsɔ wangolasambɛke nkete efula, ndjilaka kaanga mbiko yɛwɔ l’ambalaka djɛ ndakanyɛ la nkembɛ anto ankina.—Wala 1 Tesalɔnikɛ 2:7, 8.
13. Edjito ɛmɔtshi wɛkɔnge w’olami w’edjingadjinga okotshɛkande?
13 Elami wɛ djingadjinga wangoyalake winá enkfumɔ ngo lá nkɛndɔ. Amɔtshi nanghaka kilɔmɛtrɛ nkama djɛ ntokoma l’otshumano. Lobengo lonkfumɔ, olami w’edjingadjinga nanghaka wamba efula, nanghaka mbembo y’ɛnkɔkɔ, ndɔndjɛka losanghanyɛ lɔ tat’ekalo, lɔ tokokolo la l’olemo w’ipoposanyɛ. Nde ndɔngɔsɔlaka wamba la nonghanyɛka nsanghanyɛ yɛ nkekete y’edjingadjinga. Nde ndakanyɛka lá nkalasa yɛ tat’ekalo, nonghanyɛka losanghanyɛ lotshikitanyi la tat’ekalo t’edjingadjinga, winá ɛmɔtshi, nde nkambaka elemo wɛ losadjɛ losadjɛ wɔpɛyɛ biro djɛ filiyalɛ.
14. Donga mɔtshi djɛkɔnge dj’oyɛso la djedjɛ l’elami wɛ djingadjinga?
14 Otshumano owakawɔ wapɔ me olami w’edjingadjinga ngete mo? Wɔnanyɔ ɔmɔtshi wemá Turquie atepela djɛ mbembo k’elami wɛ djingadjinga ante: “Lá mbembo yɛwɔ inkfumɔ wangontshindake djɛ mpetshɛ winá la wananyɔ l’ankaana djɛ ndakotshɛ́. Lamɛna elami wɛ djingadjinga efula, koko lako kaanga ɔmɔ wombontshinda djɛ lemi nyɛna ente walekɔ l’elemo efula la wapilaka anto lá demba.” Johanna, kanga sɛnaki, apoposanyɛka l’olami w’edjingadjinga, koko watɛna kaanga onto ɔmɔ. Nde atepela ante: “Mpavungɛka lofu lɔsɔ. Wankfune wami w’amato waposaka, ntɛna kaanga ɔmɔ. Olami w’edjingadjinga ankotshɛ́ka djɛ lemi nyɛna ente l’olemo wɔ Yehova, topangoyala l’akoka wa ndjintasɛ idjena imɔ l’ankfumbo yɛso, koko l’andja wa bango tongowa mbamba efula yɛ mpetshɛ winá lawɔ esanga.” Efula l’anteyi kɛso wangovungɔke akambo wananghelisá elami wɛ djingadjinga.—Ele. 20:37–21:1.
15. a) Lá nkilika 3 Djɔanɛ 5-8, Wopo wɔkɔnge w’okokaso nyɛnyɛ elami wɛ djingadjinga djedjɛ? (Lenda edjinge ntshango.) b) Lamo oyɛso ladjɛ nyɛnyɛ wadji w’ampame imbɔsɔnama yɛsɔ djedjɛ, ko lá wopo wɔkɔnge? (Lenda ipapango “ Tovungɔ wadji wawɔ.”)
15 Ɔpɔstɔlɔ Djɔanɛ akembɛka Gayusɛ djɛ ndongola wananyɔ wayɛ djɛ ndowembola otshumano la djɛ ‘ndakɛndjɛ lá wopo w’osasangɛ Ndjambe.’ (Wala 3 Djɔanɛ 5-8.) Wopo ɔmɔtshi wɔ nangha nkambo djɛsɔ nde má ndjeta olami w’edjingadjinga djɛ ndɔlɛ lá kaso. Wopo onkina nde má nsuka olemo w’ipoposanyɛ lá mbembo. Leslie, kanga sotepelisa, ɛnyɛ djedjɛ djɛnde má wopo onkina. Nde atepela ante: “Langɔlɔmbake djɛ Yehova nshiyɛ ehomba wɛwɔ. Lemi isa womɛmi tongafunelake enkanda djɛ ndashimela wopo wɔ mbembo yɛwɔ otokotshɛ́kawɔ.” Tovungɔ ente elami wɛ djingadjinga oyɛwɔ nde anto ete ngo iso. Winá ɛmɔtshi, wangokake elando, wangoyalake l’ekiyano, ole wakoka ndɛmba. Etepela wɛ wɔlɔ l’epapɛyɛ wɛko wɛ l’ɛkɔpa nkoka ndjala ekadjimwelo lá ndɔmbɔ yɛ olami wɔko w’edjingadjinga djɛ nde mba okotshɔ!—Woo. 12:25.
TOLEKƆ LÁ DJONYI DJƐ ‘AMPAME ILEKƆ́ EPAPƐYƐ’
16. Lá nkilika Woongo 3:27, wananyɔ okokawɔ ndáwopola weepó wɛkɔnge?
16 L’andja w’otondo, tolekɔ la djonyi djɛ wananyɔ dj’iwɔ nkamba ete ngo ‘ampame ilekɔ epapɛyɛ.’ Ntsha olekɔ wɔnanyɔ wombolongola batisimo, ‘olekɔ la akoka wa nkotshɛ́’? (Wala Woongo 3:27.) Olekɔ entshupa djɛ nkotshɛ akambo walɔmbama djɛ nkamba ete ngo onkambi wokotshɛ́? Ntsha oyɛ nde onkambi wokotshɛ́, olekɔ l’akoka wa nkotshɛ okoma wɔko wɔ nkoma ikokolo? d Olekɔ l’akoka wa nangha etshikitano lá lowiko lɔko djɛ nkotshɛ akambo walɔmbama djɛ ndjingela Nkalasa k’Ansakodji y’Onkfumi? Nkalasa kɛsɔ nkoka nkokfumba la nkokotshɛ́ djɛ Yeso nkamba nyape winá enkfumɔ. Ntsha ɛna ente opakotshɛ akambo walɔmbama, lɔmba Yehova. Lɔmbande okotshɔ wɔ nyuma kɛnde djɛ nkotshɛ edjito enkfumɔ wɔkɔpɛyɛnde.—Luka 11:13; Ele. 20:28.
17. ‘Ampame ilekɔ epapɛyɛ’ ɛnyɛwɔ nge lá nkambo djɛ Nkfumi kɛso Kristo Yeso?
17 Wananyɔ wa Yeso ndasɔnɛ ete ngo ‘ampame ilekɔ́ epapɛyɛ’ oyɛwɔ nde ilembetelo yɛnyɛ ente atɔlɔndjɛ l’etsho w’ekomo wɛnɛ. (Mat. 28:20) Opalekɔ la djedjɛ djɛ mba Nkfumi kelekɔ́ la ngandji, la lokapo, ketila yimba, kɛtɔpɛyɛ ampame ilekɔ́ l’akoka wa nshiyɛ ehomba wɛso? Djɛko ndeke hona mbamba yɛ nyɛnyɛ ampame ikamba la wolo yɛsɔ djedjɛ djɛko. Ole tovungɛke nkawoyɛ Yehova, Ikɔkɔ yɛ ‘opapɛyɛ onkfumɔ wɔ wɔlɔ la wɔ djɔ’ lokasa.—Dja. 1:17.
YEEMBO 99 Nunu la nunu djɛ wananyɔ (lá Otetela)
a Tokokolo tokambá ete ngo ase Iloyi yɛ lɔndjɛ, wananyɔ wakotshɛ́ Iloyɛ yɛ lɔndjɛ, ase Kɔmite kɛ Filiyalɛ, la ankina walekɔ́ l’edjito l’olonghanyelo, walekɔ ole iwɔ ‘ampame ilekɔ́ epapɛyɛ.’
b Nkombo imɔtshi itshikitanyemaka.
c Yetaká owila wɔsɔ ntondo nde Türkiye.
d Djɛ ndjewa akambo ankina lá wopo w’okokɛ nkotshɛ akambo walɔmbama djɛ nkamba ete ngo onkambi wokotshɛ́ kana ikokolo, lenda djamba “Wananyɔ—nyokotshɛ akambo walɔmbama djɛ nkoma enkambi wekotshɛ́?” edjinge “Wananyɔ—nyokotshɛ akambo walɔmbama djɛ nkoma tokokolo?” lá Etange k’Olami kɛ Ngɔndɔ kɛ djomi l’ɔmɔ 2024.
