DJAMBA DJƐ WEKELO 43
YEEMBO 90 Tokembɛnake (lá Otetela)
Wopo wɔkɔnge w’okokɛ nshiyɛ ehamo wɛko?
‘Nyoshishime akambo ankfumɔ.’—1 TE. 5:21.
IKANYI YƐ DJAMBA DJƐNƐ
Wopo wɔ nshiyɛ ehamo w’ekoka ndjala l’eposelo wɛ nyɛtshi lá wopo w’okambelɛ Yehova.
1-2. a) Enkambi ɛmɔtshi wɛ Yehova okokawɔ ndjala l’ehamo wɛkɔnge? b) Ɛnaso lɔ nge lá djamba djɛnɛ?
ISANKFUMƆ, ayale nkokolo kana dɛngɛ, tongoyalake l’ehamo a winá ɛmɔtshi. Ndjɔmbɔmba, ilɛngɛ ilekɔ Owakɛ alawopola ntsha nsɔsɔlɔ Yehova ndowilaka yimba. Nde nkoka nkakanyɛ djɛ ndongola batisimo. Tokokanela djɛ olangala ɔmɔtshi wɔsɔnisá djɛ mpetshɛ wapɔ w’Onkfumi lá ntondo l’edjena kɛ nkamba olemo w’andja wanɛ. Ko winá wɔ ndombokoma ekokolo, apalekɔ la mfalanga y’efula yɛ nkotshɛ ehomba wɛ nkfumbo kɛnde, akoka ndjila ehamo ante atɔsa nkano djɛ wɔlɔ m’ɔlɛngɛ. Nkaana kɛmɔtshi apalekɔ lonkina la wolo. Akoka ndɛmba mande apalekɔ la wolo wɔ nangha kɛnɛ kɛ ndananghaka. Omboyawopola weepó wɛnɛ: ‘Lá nsɔsɔlɔ Yehova angondjilake yimba? Yehova angɔsake la ntshina akambo wonanghelami? Ndekɔ la ntshina lá wiso wa Yehova?’
2 Ntsha tombotshika weepó wɛ nghɔnɛ ipa nkadjimola, wekoka ndjala l’eposelo wɛ nyɛtshi l’ɔtɛmwɛlɔ wɔso. Lá djamba djɛnɛ, tongoshishima wopo wɔ tɔkfɔ tɔ Bible okokawɔ ntokotshɛ́ ntsha tila ehamo ente 1) Yehova apotile yimba, 2) akano wasɔsi watayala wa wɔlɔ, kana 3) topalekɔ la ntshina lá wiso wa Yehova.
WOPO WƆ NSHIYƐ EHAMO WƐKO
3. Wopo ɔmɔtshi wɔkɔnge w’okokaso nshiyɛ ehamo wɛso?
3 Wopo ɔmɔtshi w’okokaso nshiyɛ ehamo nde má nkadjimɔ tá Otepela wɔ Ndjambe djɛ mba ndjɔndɔ lá weepó wɛso. Ntsha tombonangha nghɔsɔ, tongokemba, tongofula lá nyuma la tongoyala l’akoka wa ‘nshikimala lá djawo.’—1 Kɔ. 16:13.
4. Wopo wɔkɔnge w’okokaso ‘nshishima akambo ankfumɔ’? (1 Tesalɔnikɛ 5:21)
4 Wala 1 Tesalɔnikɛ 5:21. Tɛna lanɛ ente Bible ntokembɛka djɛ ‘nshishima akambo ankfumɔ.’ Wopo wɔkɔnge w’okokaso nangha nkambo djɛsɔ? Tokoka ndjala l’eshikikelo ente akambo w’awolaso walekɔ nsɔsɔlɔ má ndjɛdjɛ la kɛnɛ ketepela Bible. Ndjɔmbɔmba, tokolenda nkambo djɛ ilɛngɛ iyawopola ntsha alekɔ la ntshina lá wiso wa Ndjambe. Akoka ngo ndjawola ante ikanyi yɛsɔ ilekɔ nsɔsɔlɔ? Lako, nde ladjɛ ‘nshishima akambo ankfumɔ’ má ndjewa ikanyi yɛ Yehova lá nkambo djɛsɔ.
5. Wopo wɔkɔnge “w’okakaso” ndjɔndɔ kɛ Yehova lá weepó wopolakaso?
5 Winá w’owalaso Otepela wɔ Ndjambe, “toka” Yehova atoshimela. Koko djɛ ndjoka ikanyi yɛnde lá nkambo kɔɔ iso ladjɛ ndjila welo. Winá wekaso Bible, teke akambo walendana l’okiyano wɔso. Tokoka nangha ehonelo lá itɛ yɛ djoyi yɛsɔ, má nkamba la mpeko djɛ wekelo djɛtɔpɛyɛ olonghanyelo wɔ Yehova. (Woo. 2:3-6) Tokoka ndɔmba Yehova djɛ nde ndɔndjɛ ehonelo wɛso la ntokotshɛ́ dj’iso ntana tokanyi tɔnde lá woopó wɔso. Manyi tokoka mpona tɔkfɔ tɔ Bible l’alako ankina w’okokaso nkamba lá nkambo djɛso. Tokoka lonkina mba wapɔ má ndjeka ɛkɔndɔ wɛ Bible w’anto wapomanisá l’ekakasano ete ngo wɛso.
6. Nsanghanyɛ otokotshɛkawɔ lá wopo wɔkɔnge djɛ nshiyɛ ehamo wɛso?
6 “Tongokake” lonkina Yehova atoshimela lá nsanghanyɛ. Ntsha tingela nsanghanyɛ mbala la mbala, tokoka ndjoka lá djamba djɛ ntshandjawala kana lá kɔmantɛrɛ k’onto ɔmɔtshi kɛnɛ k’oyɛso la djonyi djɛ nshiyɛ ehamo wɛso. (Woo. 27:17) Nyontshɔ tokolenda wopo w’okokaso nshiyɛ ehamo ɛmɔtshi.
NTSHA OHAMA ENTE YEHOVA APOKILAKA YIMBA
7. Anto amɔtshi okokawɔ ndjopola weepó wɛkɔnge?
7 Wɛ ongolawopolake ente ‘lá nsɔsɔlɔ Yehova angondjilake yimba?’ Ntsha ɛna ente olekɔ intshitshi, ikanyi yɛ ente ombokoma ilongo yɛ Ontongi w’andja w’otondo nkoka nyɛnama ente ipalekɔ nsɔsɔlɔ, ileka looka lɔko otale. Kaanga Nkfumi Davidɛ ayalaka la ikanyi yɛ nghɔsɔ. Nde akamɔka ante Yehova nyɛnaka kaanga onto w‘ipa la ntshina, ko opolaka ante: ‘Ee Yehova, onto oyɛnde na djɛ wɛ ndɔwɛna, wɔna onto wovɔ oyɛnde na djɛ wɛ ndowila yimba?’ (Yee. 144:3) Lampe okokɛ ntana ekadjimwelo kɛ woopó wɔnɛ?
8. Lá nkilika 1 Samwɛlɛ 16:6, 7, 10-12, Yehova ɛnande nge le anto?
8 Teka lá Bible ente Yehova ndjilaka anto wɛnama ete ngo wapalekɔ la ntshina le anto ankina yimba. Ndjɔmbɔmba, Yehova atomaka Samwɛlɛ tá mvulu kɛ Jɛse djɛ ntokfuta wɔnande ɔmɔtshi avuta djɛ ndjala Nkfumi k’Isariyɛlɛ. Jɛse ayalaki la wana w’ampame enanɛyi, koko etaka ngo esambele djɛ ndɛnana la Samwɛlɛ, ko atshikaka Davidɛ, loyalaki ilɛngɛ. b Ntshende Yehova ndasɔnɛ nde Davidɛ. (Wala 1 Samwɛlɛ 16:6, 7, 10-12.) Lá nsɔsɔlɔ, Yehova ɛnaka kɛnɛ keyalaki l’eteyi kɛ Davidɛ—ilɛngɛ yɔsaki akambo wá nyuma la ntshina.
9. Lamo okokɛ ndjala l’eshikikelo ente Yehova nkilaka yimba? (Lenda edjinge ntshango.)
9 Tɔnɔla lá wopo wɔ Yehova ndɔmbɔkɛnyɛ ante nde nkilaka yimba. Nde angɔkɔpɛyɛke alako wɛlama l’ehomba wɛko. (Yee. 32:8) Wopo wɔkɔnge w’okokande nangha nghɔsɔ ntsha nde apakewe wɔlɔ? (Yee. 139:1) Winá w’okambɛ l’alako wa Yehova la ɛnɛ wopo w’okokotshɛ́nde, ongolashikikɛ ente nde nkilaka yimba. (1 Ɛk. 28:9; Ele. 17:26, 27) Yehova ndɔsaka la ntshina welo wilɛ. Nde nyɛnaka wekeka wako la angɔkɔpake ndjala ilongo yɛko. (Jɛr. 17:10) Nde nkɔpaka wɛ ndjawola ndjala Ilongo yɛnde.—1 Dj. 4:19.
‘Ntsha wɛ mpona [Yehova], nde angɛnama lewɛ.’—1 Ɛk. 28:9 (Lenda itenyi 9) c
NTSHA OHAMA ENTE AKANO WA NGƆSHI WATAYALA WA BALO
10. Winá w’okanelaso lá nkambo djɛ akano wa sɔsi l’etsho wemboheta, weepó wɛkɔnge w’okokaso ndjopola?
10 M’ɔkɔngɔ w’ɛnɔnyi, anto amɔtshi wakoka nkanela kana ndáwopola ntsha wɔsaka akano wa wɔlɔ. Mbala imɔtshi wɔsaka nkano djɛ ntshika elemo wɛ mfalanga kana opoto, djɛ nkambela Yehova l’olemo wɔ winá enkfumɔ. Koko nkambo djɛsɔ mbohetá ɛnɔnyi efula. Wakoka nyɛna anto amɔtshi wasɔnisá nkamba elemo wɛ demba, ko winá wɔsɔ walekɔ la lowiko l’okfudji ole l’osasa. Eposelo wekoka ndjala nde, wakoka ndáwopola ambɔ: ‘Kenkfumɔ kɛ momoyapekala djɛ nkambela Yehova, kelekɔ la ntshina? Ndo koko kensambɛka mbamba inkina?’
11. Kɛkɔnge ketshimbɛki omfunyi wɔ Yeembo 73 yimba?
11 Ntsha olawopola weepó wɛ nghɔsɔ, shishima wopo wɔ omfunyi wɔ Yeembo 73 ndoke. Omfunyi wɔ Yeembo ɛnaki anto amɔtshi wayalaki la alemba wolo, lowiko l’okfudji, la lopalekɔ l’ekakasano. (Yee. 73:3-5, 12) Winá wɔ ndɛnaka anto walekɔ la mbiko yɛ wɔlɔ, ɛnaki ante welo wɛ ndile djɛ nkambela Yehova wepalekɔ la ntshina. Nde ‘atshimbaki yimba lofu lonkfumɔ’ la tokanyi tɔlɛmbɛ. (Yee. 73:13, 14) Wopo wɔkɔnge ndakfulumeyɛ tokanyi totshimbɛki yimba tɔsɔ?
12. Lá nkilika Yeembo 73:16-18, wopo wɔkɔnge omfunyi ndashiyɛ ekiyano wɛnde?
12 Wala Yeembo 73:16-18. Ondjombe atshɔka tá tɛmpɛlɔ k’ekina kɛ Yehova. Nde akokaka ntɔnɔla wɔlɔ wɔlɔ l’eteyi. Asipisoyɛka ante kaanga anto amɔtshi yɛnamaka ete ngo walekɔ la mbiko yɛ wɔlɔ, iwɔ watayalaki la nkongi dj’etsho weyaye. Ikanyi yɛ wɔlɔ yɛsɔ yɔpɛyɛka vu djɛ yimba, má ndjewa ente ohonelo wɔ nkete djɛ nyuma woyalaki nkano djɛ wɔlɔ efula. Eposelo weyalisá nde, akalɔka ndɔsa nkano djɛ nkindjɛ nkambela Yehova.—Yee. 73:23-28.
13. Wopo wɔkɔnge w’okokɛ mba vu lá yimba ntsha opalekɔ l’eshikikelo lá akano wa nghɔshi? (Lenda edjinge ntshango.)
13 Tokoka mba vu djɛ yimba djɛ nghɔsɔ má okotshɔ wɔ Otepela wɔ Ndjambe. Ngete mo? Shishima akambo wa wɔlɔ walekɔ́ le wɛ, la esako wɛ Yehova, má mvungɔ ente anto wapakambela Yehova wapalekɔ la esako wɛnde. Wakoka ndápɛyɛ lá lɛdji l’indeko lá kɛnɛ k’onanghawɔ winá wɔsɔ lá lowiko lɔwɔ, ladjikɛnde wapalekɔ la ekete kenkina kɛ nkongela lá etsho weyaye. Koko wɛ, Yehova akolaka esako weleka ekete kenkfumɔ k’okokɛ nkanela. (Yee. 145:16) Lonkina, tokolenda nkambo djɛnɛ: Tokoka ndjewa nsɔsɔlɔ wopo wɔ lowiko lɔso yotayala, isotasamba ndɔsa akano w’ete ngo w’isɔsi? Nkambo djɛ nsɔsɔlɔ nde: Anto wɔsa akano má ngandji kɛwɔ te Ndjambe la te winawɔ anto, wapasambaki kaanga ekete kɛmɔ kɛ wɔlɔ.
Pika wiso tá ntondo tá esako wɛ Yehova ndombolaka (Lenda itenyi 13) d
NTSHA OHAMA ENTE OPALEKƆ LA NTSHINA LÁ WISO WA YEHOVA
14. Lamo anto amɔtshi yopalekɔ l’eshikikelo, ko okokawɔ ndjopola woopó wɔkɔnge?
14 Enkambi ɛmɔtshi wɛ Yehova wanana la lotshundo, elando, kana la nkɔmɔ. Kɛsɔ ndatshindaka dj’iwɔ nyɛna ambɔ wapalekɔ la ntshina lá wiso wa Yehova. Wakoka ndáwopola ambɔ: ‘Tolekɔ ngo la ntshina lá wiso wa Yehova?’
15. Omfunyi wɔ Yeembo 71, ndayalaka l’eshikikelo kɛkɔnge?
15 Omfunyi wɔ Yeembo 71 ayalaka l’okiyano wɔ wopo wɔkɔ ɔmɔ. Nde alɔmbaka ante: ‘Tonkadjɛke winá wɔ wolo wɔmi yongoshila.’ (Yee. 71:9, 18) Kaanga yayale nghɔsɔ, ondjombe ayalaka l’eshikikelo ante, ntsha ambokindjɛ nkambela Yehova la nkɔmano, Yehova angɔɔlɔndjɛ la angoosuka. Ete ngo ondjombe ndoyɛka ndewa, Yehova nsasangaka l’anto wanangha la wolo djɛ ndokambela kaanga oyɛwɔ l’elelo.—Yee. 37:23-25.
16. Lá wopo wɔkɔnge nkokolo oyɛwɔ la ntshina lá wiso wa Yehova? (Yeembo 92:12-15)
16 Nkokolo, nyɛnɛ akambo ete ngo Yehova ɛnande. Nde nkoka nyokotshɛ́ djɛ ndjila welo efula lá akambo wa nyuma kaanga alemba wanyo yɔmbɔtɛka. (Wala Yeembo 92:12-15.) L’edjena kɛnyo mpika wiso lá kɛnɛ kɛ nyopakoke nangha, nyopike wiso lá kɛnɛ k’okokanyo nangha. Ndjɔmbɔmba, nyokoka nkembɛ anto ankina má ndjɔmbɔmba kɛnyo kɛ nkɔmano la ndawɛnyɛ ente nyo ndawilaka yimba. Nyokoka ndashimela wopo wɔ Yehova ndanyosuke l’ilá k’ɛnɔnyi la ndjamba nyawɔ akambo w’ekotshamelo k’alaka wande. Ole nyɔtɛnake ente ndɔmbɔ yɛnyo yɛ m’anse k’oloko yɔlɔmbɛlanyo anto ankina ipalekɔ la ntshina. (1 Pɛ. 3:12) Ayale akambo wakɔnge watokomela lá lowiko, isankfumɔ tolekɔ la ekete kɛmɔtshi kɛ mpɛyɛ Yehova l’anto ankina.
17. Lamo oyɛso ladjɛ mpikama lá ikanyi yɛ ndáwɛdjɛ la anto ankina?
17 Ntsha okiyana mande opakoke nangha akambo efula lá olemo wɔ Yehova, yala l’eshikikelo ente nde ndɔsaka la ntshina kenkfumɔ k’okokɛ nangha. Okoka ndjala l’ikanyi yɛ ndjɛdjɛ kɛnɛ k’onanghɛ la kenangha anto ankina. Tonanghake nkambo djɛsɔ! Lamo? Ladjikɛnde Yehova apɔtɛdjɛ la anto ankina. (Nga. 6:4) Ndjɔmbɔmba, Mariya apɛyɛka Yeso avuta w’oshinga wolo. (Dj. 12:3-5) Lá lɛdji lotshikitanyi, wadjɛ odjo ilaka lá tɛmpɛlɔ mfalanga ipe yɛ kɛngɛlɛ itayala la ntsho dj’efula. (Luka 21:1-4) Koko, Yeso ɛnyɛka ante epapɛyɛ epe wɛsɔ oyɛwɔ nde ilembetelo yɛ djawo. Papa kɛnde, Yehova, ndɔsaka la ntshina ekete kenkfumɔ k’onanghelɛ l’ɛkɔpa ole la ngandji kaanga oyɛwɔ daambi.
18. Kɛkɔnge kengotokotshɛ́ djɛ nshiyɛ ehamo? (Lenda edjinge ipapango “ Otepela wɔ Yehova nkoka ntokotshɛ́ djɛ nshiyɛ ehamo.”)
18 Isankfumɔ ndjalaka l’ehamo winá ɛmɔtshi. Koko ete ngo sɔmɛna, Otepela wɔ nsɔsɔlɔ wɔ Ndjambe wɛdje ndjilela oloko, Bible, nkoka ntokotshɛ́ djɛ nshiyɛ ehamo. Djɛko ndeke nangha la wolo djɛ nshiyɛ ehamo, la tshika wɛkamo wɔko wɔpɛnɛ ekiyano. Yehova nkewaka wɔlɔ wɔlɔ. Nde ndjalaka la djedjɛ lá akano ankfumɔ wa ngɔshi djɛ ndowila lá edjena kɛ ntondo lá lowiko lɔko la nde angokosakola. Yala l’eshikikelo ente Yehova nkɔpaka la ndjilaka onkambi wɔnde onkfumɔ wɔ nkɔmano yimba.
YEEMBO 111 Donga djɛ ndjala l’osasa (lá Otetela)
a DJƐ NDJOKA WƆLƆ: Lá djamba djɛnɛ, ehamo w’otepelaso nde w’ekoka ntotshinda dj’ipa iso nsamba ndjala l’eshikikelo ente Yehova ntɔkɔpaka kana ente tɔtɔsa akano wa balo. Koko ape ehamo welendana la elakanyelo wɛ Bible w’ekoka ndjala ilembetelo yɛ ntshamba djɛ djawo le Yehova la l’alaka wande.
b Kaanga Bible ndopatepala ɛnɔnyi wɛ Davidɛ kɔɔ winá wɔ Yehova ndɔsɔnɛ, nkoka ndjala nde ayalaki l’ɛnɔnyi djomi la ndjape.—Lenda Etange k’Olami kɛ Ngɔndɔ kɛ djomi 1, 2011, nki. 29, ite. 2.
