DJAMBA DJƐ WEKELO 40
YEEMBO 30 Papa kɛmi, Ndjambe kɛmi edjinge Ilongo yɛmi (lá Otetela)
Yehova ‘nsadjɛka eloko wembatshɛ’
‘Nde nsadjɛka oloko wombatshɛ; nde mbɔmbaka ampota yɛwɔ.’—YEE. 147:3.
IKANYI YƐ DJAMBA DJƐNƐ
Yehova ndjilaka anto walekɔ la eleko wembatshɛ yimba. Djamba djɛnɛ ngɔtɛnyɛ wopo w’okitshakitshɛnde yɛnyi yɛso la wotokotshɛ́nde djɛ nkembɛ anto ankina.
1. Yehova ndokaka ngete mo lá nkambo dj’enkambi wɛnde?
WINÁ wɔ Yehova olendande enkambi wɛnde lá looko, ɛnande nge? Nde nyɛnaka osasa la ndjolo yɛso. (Yee. 37:18) Winá wɔtɛnande tookambela la akoka waso kaanga oyɛso la ndjolo lá yimba, nde nsasangaka efula! Lá djiko djɛ lasɔ, nde nkɔpaka ntosuka la ntokembɛ.
2. Yehova onanghelakande anto walekɔ́ l’eloko wembatshɛ nge, ko wopo wɔkɔnge w’okokaso mba wapɔ má bɔki djɛnde?
2 Yeembo 147:3 itepela ante Yehova ‘mbɔmbaka ampota’ yɛ anto walekɔ́ la eleko wembatshɛ. Vɛrse djɛnɛ djɛnyɛ wopo wɔ Yehova owakelakande anto walekɔ́ la ndjolo lá yimba. Oyɛso ladjɛ nangha nge djɛ mba wapɔ má bɔki djɛ Yehova? Kolenda ndjɔmbɔmba kɛnɛ. Doktɛrɛ djɛ mɛlɛmɛlɛ nkoka nsakela onto wombohotala djɛ nde nkɔnɔ. Koko djɛ onto wɔkɔ nsala ngo nde ndɔnda alako wa dɔktɛrɛ. Lá djamba djɛnɛ, tɔngɛna kɛnɛ kɛ Yehova oshimelande anto walekɔ́ l’ampota lá yimba l’Otepela wɔnde la wopo w’okokaso nkamba la alako wande wa ngandji.
YEHOVA NTOSHIKIKƐKA ANTE TOLEKƆ LA NTSHINA
3. Lamo anto amɔtshi ɛnakawɔ ambɔ wapalekɔ la ntshina?
3 Towika l’andja wapalekɔ́ la ngandji, edjinge yɛnyi nde, anto efula wangɛnake ambɔ wapalekɔ la ntshina. Nkaana Helen a atepela ante: “Mfulaka lá nkfumbo kepakɔpana. Papa kɛmi ayalaki lopango efula ole akonaka lá timba tɔso ikanyi yɛ ente topalekɔ la ntshina.” Mbala imɔtshi, ete ngo Helen, wakɔnyɔkɔlaki, wakonanghaki mbala efula, kana wananghaki djɛ wɛ nyɛna ente opalekɔ la ntshina. Ntsha nghɔsɔ, okoka ndjala l’okakasano wɔ ndjawola ente onto ɔmɔtshi nkoka nkila yimba.
4. Lá nkilika Yeembo 34:18, eshikikelo kɛkɔnge kɛtɔpɛyɛ Yehova?
4 Kaanga anto ankina wakɔnyɔkɔlaka, okoka ndjala l’eshikikelo ente Yehova nkɔkɔpaka la nkɔsaka l’onkfunda. Nde ‘alekɔ entshupa l’anto walekɔ́ la eloko wembatshɛ.’ (Wala Yeembo 34:18.) Ntsha olekɔ la ‘yimba imbotshimba’ vungɔ ente Yehova ɛna akambo wa wɔlɔ walekɔ́ l’oloko wɔko la akosepaka nyɔmɛlɛ kɛnde le nde. (Dj. 6:44) Nde alekɔ entshupa djɛ nkokotshɛ́ ladjikɛnde olekɔ la ntshina lá wiso wande.
5. Olakanyelo wɔkɔnge w’owaso me Yeso lá wopo wɔ ndananghelaka anto watɔsamaki la ntshina akambo?
5 Tokoka ndjewa wopo wɔ Yehova ndokaka má nshishima ndjɔmbɔmba kɛ Yeso. L’ila k’olemo wɔnde lanɛ lá looko, Yeso ɛnaki anto watɔsamaki la ntshina la ananghelaki akambo la nkɛtshi. (Mat. 9:9-12) Winá wɔ omoto w’otataki olando w’ekekete ndakote esendja kɛ Yeso, la nkongi djɛ nde nsala, nde okembɛka la owedjɛka djɛ djawo djɛnde. (Mar. 5:25-34) Yeso okolaka la lɛdji lɔdjɔ lonto lɔ Papa kɛnde. (Dj. 14:9) Djɛko ndeke, yashikikɛ ente Yehova nkɔsaka la ntshina la ɛna wekeka wako wa wɔlɔ ndjila ole djawo la ngandji kɛko te nde.
6. Onto wɛna ante apalekɔ la ntshina, okokande nangha nge?
6 Okokɛ nangha nge ntsha olekɔ l’okakasano wɔ ndjawola ente olekɔ la ntshina? Wala la tɔnɔla lá avɛrse wa Bible wakoshikikɛ ente Yehova nkɔsaka la ntshina. b (Yee. 94:19) Ntsha otakotshɛ okoma ɔmɔtshi kana ɔmbɔlɛmba mande opakoke nangha akambo efula ete ngo anto ankina, tolekake ndaapɛla. Yehova ewa elelo wɛko. (Yee. 103:13, 14) Ntsha wambokokesolá, tolapɛlake lá kɛnɛ k’onto wokokesolisá ndananghe. Ɛkɔmɔ kepalekɔ me wɛ! Vungɔ ente Yehova angolomboyɛ kanga lɔnyɔkɔla anto, koko ape kanga lɔnyɔkɔlama. (1 Pɛ. 3:12) Sandra, kanga yanyɔkɔla winá wɔ ndayalaka ilɛngɛ atepela ante: “Ndɔmbaki Yehova mbala la mbala djɛ nde nkotshɛ́, djɛ lemi nyɛna ente ndekɔ la ntshina ete ngo ɔnyɛnande.”
7. Wopo wɔkɔnge w’okokaso nkamba l’akambo watokomelisá lá lowiko lá wopo wɔ wɔlɔ l’olemo wɔ Yehova?
7 Tohamake ente Yehova apakoke nkamba nyape djɛ nkotshɛ́ anto ankina. Nde ambokilá onkfunda má wɛ nkoma winande onkambi l’olemo w’Okristo. (1 Kɔ. 3:9) Kɛnɛ kekokomelisá lá lowiko kembokokotshɛ́ djɛ ndjoka anto ankina djandji ole ndjoka wopo w’olawokawɔ. Okoka nangha akambo efula djɛ ndakotshɛ́. Helen, kanga sotepelisa má djiko, awaka okotshɔ la alekɔ l’akoka wa nkotshɛ́ anto ankina. Nde atepela ante: “Yehova amonkotshɛ́ djɛ lemi ndáwoka ente nkɔpama la ndekɔ la ntshina.” Helen alekɔ l’osasa wɔ nkamba ete ngo yat’ekalo yɛ lotshinda.
YEHOVA NKƆPAKA ISO NDJAWOLA IMEYELO KƐNDE
8. Eshikikelo kɛkɔnge kɛnaso lá Izaya 1:18?
8 Enkambi ɛmɔtshi wɛ Yehova watshimba yimba m’ɔtɛ wɔ nanghedji djɛwɔ djɛ yananghe lá ntondo kana m’ɔkɔngɔ wɔ batisimo. Alekɔ wɔlɔ iso mvungɔ ente Yehova apɛyɛka oshinga wɔ mbendo m’ɔtɛ wɔ ngandji kɛnde k’efula leso. Lá nsɔsɔlɔ, nde nkɔpaka iso ndjawola opapɛyɛ wɔnde. Yehova ntoshikikɛka ante m’ɔkɔngɔ w’iso ‘ndjila akambo l’ɔnɔnghɔ’ c la nde, apilaka mpekanto yɛso lonkina yimba. (Wala Izaya 1:18.) Ɔsɔ ngo oyɛso la djedjɛ le Yehova lá wopo wɔ ndopawopɔka mpekanto yɛ sananghe l’etsho wemboheta! Lá winá wɔkɔ ɔmɔ, nde apavungɛka wɛlɔ wɛ sananghe.—Yee. 103:9, 12; Heb. 6:10.
9. Lamo oyɛso ladjɛ mpika wiso lá akambo w’onanghaso winá wɔsɔ la wa songonangha l’etsho weyaye l’edjena kɛ mpika wiso lá akambo wamboheta?
9 Ntsha otshimba yimba la akambo wamboheta, pika wiso lá akambo wa winá wɔsɔ, l’akambo w’etsho weyaye, l’edjena kɛ mpika wiso lá akambo wamboheta. Tokolenda ndjɔmbɔmba kɛ ɔpɔstɔlɔ Poolo. Nde akiyanaki lá wopo wɔ ndanyɔkɔlaka Akristo, koko nde ewaki ante Yehova ambowimeyɛ. (1 Ti. 1:12-15) Akindjɛki nkanela mpekanto yɛ ndananghe lá etsho wemboheta? Ape l’ehamo, nde atakɔpaka nkanela, ngo ngete ndatonaka nkanela akambo wa ndananghe lá ɔtɛmwɛlɔ w’ase Juda. (Flp. 3:4-8, 13-15) Koko l’osasalo onkfumɔ, Poolo akindjɛki mpoposanyɛ la ndenda tá ntondo. Ete ngo Poolo, opakoke ntshikitanyɛ akambo wamboheta. Koko okoka mpɛyɛ Yehova lomo lá akambo wakokomela winá wɔsɔ, la ndenda tá etsho weyaye wɛ wɔlɔ efula w’okolakande.
10. Kɛkɔnge k’oyɛso ladjɛ nangha ntsha akambo wasananghe l’etsho wemboheta wakiyanyɛka anto?
10 Okoka ntshimba yimba má akambo wanghananghe wakɔtisá anto ankina. Kɛkɔnge kekoka nkokotshɛ́? Nangha kenkfumɔ k’okokɛ nangha djɛ ndɔngɔsɔla nyɛtshi kɛ nghananghe, edjinge lɔmba imeyelo la oloko ɔmɔ. (2 Kɔ. 7:11) Lɔmba Yehova akotshɛ́ anto wakiyanisá má nanghedji djɛko. Nde angokokotshɛ́ la angokotshɛ́ waangananghela nyɛtshi djɛ nyo nkalɔ mba vu.
11. Elakanyelo wɛkɔnge wɛ sombowa má ndjɔmbɔmba kɛ ɔprɔfɛtɛ Yɔna? (Lenda edjinge ntshango djɛ loposo.)
11 Waka elakanyelo má evunga wɛko wemboheta, la awola Yehova akambe nyape lá lɛdji lɔkɔpande. Tokolenda ndjɔmbɔmba kɛ ɔprɔfɛtɛ Yɔna. L’edjena kɛnde ntshɔ tá Ninivɛ, t’edjena kɛ Ndjambe ndotome, Yɔna alotaka tá djeke nkina. Yehova apɛyɛka Yɔna iluku, la nde awaka olakanyelo má ovunga wɔnde. (Yɔna 1:1-4, 15-17; 2:7-10) Yehova atakadjɛ Yɔna. Ndjambe ɔpɛyɛka mbamba kenkina kɛ nde ntshɔ tá Ninivɛ, ko mbala kɛsɔ Yɔna awolaka l’oloko ɔmɔ. Nde atatshika okiyano wimá ovunga wɔ ndananghe ndoshimba djɛ nde ndjawola odjito wɔ Yehova ndɔpɛyɛ.—Yɔna 3:1-3.
M’ɔkɔngɔ wɔ Yɔna mpanda má nkfundu djɛ nse k’ekekete, Yehova ɔlɔmbaka lonkina djɛ nde ntshɔ tá Ninivɛ djɛ ntopoposanyɛ losango lɔnde (Lenda itenyi 11)
YEHOVA NTOKEMBƐKA MÁ MBAMBA KƐ NYUMA K’EKINA
12. Wopo wɔkɔnge Yehova ɔtɔpɛyɛnde vu ntsha tombopomana la nkambo ntotshimbɛ́ yimba kana tombovusɛ? (Filipɛ 4:6, 7)
12 Má mbamba kɛ nyuma k’ekina, Yehova ntokembɛka winá w’otshimbaso yimba kana w’ovusɛso. Tokolenda kɛnɛ kekomelisá Ron nya Carol. Nkambo djɛ yɛnyi efula djakomelaka, wɔnawɔ wɔ mpame ayayakaka. Iwɔ watepela ambɔ: “Tayalaki l’ekakasano wɛ nkekete efula ntondo, koko wɔsɔ wolekaka. Totawaki ilɔ etsho efula ko talɔmbaki Yehova, ole tokaki vu dj’otepelawɔ lá Filipɛ 4:6, 7.” (Wala.) Ntsha olekɔ la okakasano ɔmɔtshi wɔkɔpɛyɛ djodjo l’oloko, okoka ndjipola Yehova oloko wɔko lá lɔlɔmbɔ mbala inkfumɔ yɔkɔpɛ. (Yee. 86:3; 88:1) Lɔmba Yehova mbala la mbala djɛ nde nkɔpɛyɛ nyuma kɛnde k’ekina. Nde apavungɛki ndɔmbɔ yɛko.—Luka 11:9-13.
13. Wopo wɔkɔnge nyuma k’ekina otokotshɛ́nde djɛ nkindjɛ nkambela Yehova la nkɔmano? (Ɛfɛsɛ 3:16)
13 Olekɔ la okakasano ɔmɔtshi wɔkɔtɛkɛ? Nyuma k’ekina nkoka nkɔpɛyɛ nkfulu kɛ nkindjɛ nkambela Yehova la nkɔmano. (Wala Ɛfɛsɛ 3:16.) Tokolenda kɛnɛ kekomelisá nkaana Flora. Nde nya womɛnde wakambaki ete ngo amisiɔnɛrɛ winá wɔ womɛnde ndananghe loseka la iyayake bala. Nde atepela ante: “Yɛnyi yɛ moke lá wopo wɔ ndandjimbe intɛkɛka. Ndɔmbaka Yehova nyuma kɛnde k’ekina djɛ nkfulumeyɛ. Yehova ampɛyɛka kɛnɛ kɛ mayalaka la djonyi djɛ mpikama lá nkambo djɛ mɛnaka ente mpangolonga.” Flora ɛnaka ante Ndjambe okotshɛ́ka djɛ mfudjɛ wɛkamo wɔnde la angosuka lá ehemba enkfumɔ. Nde akfɛ ante: “Etepela wɛ Yeembo 119:32 wekotshamaka le lemi: ‘Lemi langokilikaka la osasalo onkfumɔ mboka y’ɛlɛmbɛ wɛko ladjikɛnde wɛ ndalɔngɔsɔlaka edjena lá oloko wɔmi.’”
14. Wopo wɔkɔnge w’okokaso mpɛyɛ nyuma kɛ Ndjambe mbamba kɛ nkamba le so?
14 Wopo wɔkɔnge w’okokɛ ntɔlɔnghanyɛ ndɔmbɔ la kɛnɛ k’onanghɛ djɛ mba nyuma k’ekina? Nangha akambo wangɔpɛyɛ nyuma k’ekina kɛ Ndjambe mbamba kɛ nkamba le wɛ. Akambo amɔtshi nde ndjingela nsanghanyɛ la mpoposanyɛ anto ankina. Lodjɛ yimba yɛko la tokanyi tɔ Yehova má mbalaka Otepela wɔnde lofu lonkfumɔ. (Flp. 4:8, 9) Winá w’owalɛ, funa anto wa Bible wapomanisá la ekakasano ole tɔnɔla lá wopo wɔ Yehova ndaakotshɛ́ djɛ nkfulumeyɛ. Sandra, kanga sotepelisa, ɛnaka ndjolo la ekakasano wɛ nkekete efula. Nde atepela ante: “Lá nsɔsɔlɔ ɔkɔndɔ wɔ Yosefu wonkembɛka lombombe. Nde atatshika ekakasano la isɔnɔdji ntɛkɛ djokanelo djɛnde nya Yehova.”—Ewa. 39:21-23.
YEHOVA NTOKEMBƐKA MÁ MBAMBA KƐ WINASO ANDJAWODJI
15. Okokaso mba lokembo me na, ko wopo wɔkɔnge w’okokawɔ ntokotshɛ́? (Lenda edjinge ntshango.)
15 Winá wɛnaso ndjolo, winaso andjawodji nkoka ndjala ‘ikɔkɔ yɛ lokembo l’efula.’ (Kɔl. 4:11) Lá nsɔsɔlɔ wananyɔ l’ankaana walekɔ ilembetelo yɛ ngandji kɛ Yehova leso. Winaso andjawodji nkoka ntokembɛ má ntekameyɛ la djandji nkfumɔ, kana ntosuka má ndjala esanga laso. Wakoka ntowalela vɛrse djɛ Bible ntokembɛ la ndɔmba esanga laso. d (Ɔrɔ. 15:4) Winá ɔmɔtshi, wɔnanyɔ kana nkaana nkoka ntovungola ikanyi yɛ Yehova la ntokotshɛ́ dj’ipa ntshimba yimba. Winaso Akristo nkoka ntɔpɛyɛ okotshɔ wɛnama, ndjɔmbɔmba oleelo, winá w’oyɛso lá ndjolo.
Tolongo tombotshunda lá nyuma, tɛdje ndjilela oloko, nkoka ntokembɛ la ntokotshɛ́ (Lenda itenyi 15)
16. Oyɛso ladjɛ nangha nge djɛ anto ankina ntokotshɛ́?
16 Djɛ mba okotshɔ me anto ankina, iso ladjɛ mpona. Wananyɔ la ankaana yɛso ntɔkɔpaka ole nkombolaka ntokotshɛ́. (Woo. 17:17) Koko wapewe wopo w’olawokaso la wapewe kɛnɛ k’oyɛso la djonyi. (Woo. 14:10) Ntsha olekɔ la nkambo nkotshimbɛ yimba, shimela tolongo tɔko tombotshunda lá nyuma. Nangha djɛ iwɔ ndjewa kɛnɛ kekoka nkokotshɛ́. Okoka nshimela ikokolo imɔ kana tope tokokɛ ndjamba nyawɔ ipa la okakasano. Ankaana imɔtshi wangowake lokembo má nshimela ankaana inkina imbotshunda lá nyuma.
17. Ekakasano wɛkɔnge wekoka ntoshimba djɛ mba lokembo, ko wopo wɔkɔnge w’okokaso ndalonga?
17 Hetshɛ winá esanga nya wananyɔ l’ankaana. Winá ɔmɔtshi m’ɔtɛ wɔ yɛnyi ilekɔ́ la wɛ, opangoyala la mposɛ kɛ nsawola la anto. Lá winá ɔmɔtshi, wananyɔ l’ankaana wangoyala l’okakasano djɛ ndjoka wopo w’olawokɛ kana wapangewa nsɔna etepela wɛ wɔlɔ. (Dja. 3:2) Tɔpɛyɛke ekakasano mbamba kɛ nkoshimba djɛ mba lokembo l’oyɛ la djonyi. Ikokolo imɔtshi yetawɔ Gavin, itatisá olando wɔ ntshimba yimba, atepela ante: “Mbala efula ntakɔpaka nsawola kana ndjala esanga isa tolongo tɔmi.” Kaanga yayale nghɔsɔ, Gavin ataleka ndápɛyɛ efula lá wopo wɔ ndoyawokaka, ole awaka wapɔ má ndjala esanga nya anto ankina. Nkaana ketawɔ Amy atepela ante: “M’ɔtɛ wɔ kɛnɛ kenkomelisá, layalaki la okakasano wɔ ndjilela anto oloko. Lambeka djɛ nkɔpa la ndjilela wananyɔ l’ankaana oloko ete ngo Yehova. Ndjewa ente kɛsɔ nsasangɛka Yehova, la nsasangɛka ole lemi.”
WAKA LOKEMBO MÁ ALAKA WA YEHOVA
18. Okokaso ndenda t’etsho weyaye nge, ko okokaso nangha winá wɔsɔ nge?
18 Tokoka ndenda t’etsho weyaye l’eshikikelo, má ndjewa ente lako ilá Yehova ɔkɔnɔla ampota yɛso yɛ demba la yɛ yimba. (Ndj. 21:3, 4) Lá winá wɔkɔ wɔsɔ, akambo watɛnyɛ ndjolo ‘wapangoyɛ lonkina lá oloko.’ (Iza. 65:17) Ete ngo sɔmɛna, Yehova awɔmba ampota yɛso winá wɔsɔ. Waka wapɔ má nonghanyi yɛ ngandji yɔsa Yehova djɛ nkɔpɛyɛ lokembo la okotshɔ. Tovungɛke kaanga ndambo daambi ente ‘nde nkiyanaka lá nkambo djɛnyo.’—1 Pɛ. 5:7.
YEEMBO 7 Yehova ndeke wolo wɔso (lá Otetela)
a Nkombo imɔtshi itshikitanyemaka.
b Lenda ipapango “ Yehova nkɔsaka la ntshina.”
c Djɛ ‘ndjila akambo l’ɔnɔnghɔ’ la Yehova, iso ladjɛ nyɛnyɛ ente tombolapɛla má ndɔmba Yehova imeyelo kɛ mpekanto yɛso la má ntshikitanyɛ eyalelo kɛso. Ntsha tombonanghá mpekanto k’ekekete, iso ladjɛ mpona lonkina okotshɔ wɔ tokokolo t’otshumano.—Dja. 5:14, 15.
