Wɛ ongewake?
Teembo tayalaki djonyi efula lá Isariyɛlɛ yɛ ntondo?
TEEMBO tayalaki l’anteyi kɛ nkfumbo dj’Isariyɛlɛ. Bible djɛnyɛ mbala efula ante anto wapomaki anghɔmɔ la watshumbaki teembo. Lá nsɔsɔlɔ, etenyi k’ekekete kɛ Bible kelekɔ la teembo, ndjɔmbɔmba onkanda wɔ Teembo, Yeembo yɛ Salɔmɔ, la Delo djɛ Jɛrɛmi. Lá wopo wɔkɔ ɔmɔ, onkanda Music in Biblical Life w’otepela ante Bible djɛnyɛ ante “ase Isariyɛlɛ watshumbaki teembo efula lá lowiko lɔwɔ lɔ lofu la lofu kaanga lá elemo wepalendana la teembo.”
Anghɔmɔ la teembo lá lowiko lɔ lofu la lofu. Ase Isariyɛlɛ waminaki anghɔmɔ djɛ nyɛnyɛ osasa wɔwɔ. (Iza. 30:29) Amato waminaki nghɔmɔ l’osasa onkfumɔ winá wɔ yawekadjɛka nkfumi, wɔ fɛtɛ, la wɔ yalongaka mbandji. (Tos. 11:34; 1 Sa. 18:6, 7; 1 Nk. 1:39, 40) Ase Isariyɛlɛ watshumbaki lonkina teembo tɔ yɛnyi winá w’onto ovɔnde. (2 Ɛk. 35:25) Encyclopédie wa McClintock nya Strong watepela ambɔ: “Ase Hebero watshumbaki teembo la waminaki anghɔmɔ efula.”
Ankfumi y’Isariyɛlɛ watshumbaki teembo. Ankfumi y’Isariyɛlɛ wasasangaki la teembo. Nkfumi Saolo etaka Davidɛ djɛ ndokamba ete ngo ondjombe. (1 Sa. 16:18, 23) Winá wɔ Davidɛ ndakome nkfumi, nde ananghaka mpeko djɛ teembo, aposɛka teembo tɔ wɔlɔ efula, la alonghanyɛka oloyi w’endjombe l’aminyi dj’iwɔ nkambaka lá tɛmpɛlɔ. (2 Ɛk. 7:6; Amɔ. 6:5) Nkfumi Salɔmɔ ayalaki l’endjombe w’ampame l’amato lá kande.—Los. 2:8.
Anghɔmɔ la teembo lá ɔtɛmwɛlɔ. Kɛnɛ keleka djonyi nde, ase Isariyɛlɛ wapomaki anghɔmɔ djɛ ntɛmɔla Ndjambe. Lá nsɔsɔlɔ, endjombe 4 000 wakambaki lá tɛmpɛlɔ kɛ Jerusalɛmɛ. (1 Ɛk. 23:5) Iwɔ wapomaki sɛmbalɛ, mpomapoma dj’eshinga, ngɔmbi, la kilɔlɔ. (2 Ɛk. 5:12) Ape ngo endjombe wa mɛlɛmɛlɛ wɛsɔ ndeke lɔtɛmɔlaki Ndjambe l’ankombe l’anghɔmɔ. Winá wɔ yatshɔka tá Jerusalɛmɛ tá afɛtɛ inanghemaki l’ɔnɔnyi, ase Isariyɛlɛ watshumbaki Teembo tɔ Wapamelo. (Yee. 120-134) Edjinge lá nkilika afunelo w’ase Juda, ase Isariyɛlɛ watshumbaki Teembo tɔ Halɛlɛ a lá winá wɔ Dambo djɛ Pasaka.
Tii lɔɔko kɛnɛ teembo tolekɔ djonyi efula l’enkambi wɛ Ndjambe. (Dja. 5:13) Teembo tolekɔ etenyi k’ɔtɛmwɛlɔ wɔso. (Ɛfɛ. 5:19) Teembo ntilaka iwoke imɔ la winaso andjawodji. (Kɔl. 3:16) La tongotokembɛke winá w’oyɛso lá ndjolo. (Ele. 16:25) Teembo tolekɔ yopo imɔtshi yɛ nyɛnyɛ ngandji la djawo djɛso te Yehova.
a Ase Isariyɛlɛ watshumbaki Yeembo 113 tii 118 ete ngo Teembo tɔ Halɛlɛ tɔ yatshumbaka djɛ numɛ Yehova.
