Ɛsɛ yayalaka nde edjena k’anto yahetaka djɛ ndjingela lá wiso wɔ Edjena k’Ekina kɛ tɛmpɛlɔ. Lá nkilika Bible—Ekadimwelo k’andja w’oyoyo keposisá lá ntondo kɛ ɔnɔnyi wɔ 2023, ‘ɛsɛ keyalaki má ntondo kɛ tɛmpɛlɔ kayalaki la antambo 20, kɛlamaki la nsasa kɛ mvulu, ole otale wɔnde wayalaki antambo 120.’ (2 Ɛk. 3:4) Nkadjimwelo mɔtshi djɛnyɛ djɛ ɛsɛ kayalaki otale wɔ “antambo 120” tá djiko, nkɔpa ntepela ente ayalaki mɛtrɛ 53!

Koko, Bible—Ekadimwelo k’andja w’oyoyo keposisá lá 2023 ketepela lá nkambo djɛ ɛsɛ kɛ tɛmpɛlɔ kɛ Salɔmɔ ante: ‘Otale wɔnde wayalaki wɔ antambo 20,’ nkɔpa ntepela ente otale wɔnde tá djiko w’oyalaki wɔ mɛtrɛ 9. a Tokolenda lamo otepelaso nghɔsɔ.

Otale wɔ ɛsɛ w’otafunama lá 1 Nkfumi yɛ Nkanga 6:3. Lá vɛrse djɛnɛ, omfunyi Jɛrɛmi afunaka nsasa la otale wɔ ɛsɛ, koko ape wema wɔnde. Manyi lá shapitrɛ kɛlɔnda, atepelaka ikakambo inkfumɔ yɛ nkete nkina dekɔ́ lá tɛmpɛlɔ, ndjila ole Ndjale kɛ mbolo ilɛlɔ, pusupusu djomi la akondji ape wa konga wayalaki lá bandja djɛ ɛsɛ. (1 Nk. 7:15-37) Ntsha ɛsɛ kayalaki la lema lɔ mɛtrɛ 50, la kalekaki nkete nkfumɔ djɛ tɛmpɛlɔ, ladjikɛnge Jɛrɛmi ndotawala otale wɔnde? Kaanga m’ɔkɔngɔ w’ɛnɔnyi nkama, amfunyi w’ase Juda watatepela ambɔ ɛsɛ kelekaki nkete nkfumɔ djalaki lá tɛmpɛlɔ kɛ Salɔmɔ otale.

Andjewi walawopola ntsha mpele djɛ tɛmpɛlɔ djayalaki la akoka wa mbɛmba ɛsɛ kɛ antambo 120. Kaanga ntange mɔtshi mpikamaki l’awanga ole la brikɛ l’etsho wɛ ntondo, ete ngo nkfuke yɛ tɛmpɛlɔ kɛ Edjipito, djalaki la mpele djetale efula la djasembɔki tɔɔ tá djiko. Koko djatshikitanaki la tɛmpɛlɔ kɛ Salɔmɔ. Andjewi watepela ambɔ mpele djɛwɔ ntalekanaki antambo 6, kana mɛtrɛ 2.7. Ondjewi wɔ wayi w’istwara Theodor Busink akomɛ nghɔnɛ: “Lá nkilika nkfunda kɛ epele kemá [bandja djɛ tɛmpɛlɔ], ɛsɛ ketakokaki ndjala l’otale wɔ antambo 120.”

Nkoka ndjala vɛrse djɛ 2 Ɛkɔndɔ 3:4 ntasangolama wɔlɔ. Kaanga afunelo amɔtshi wa l’akatshi w’etsho wɛ ntondo otepelawɔ djɛ ‘120’ lá vɛrse djɛnɛ, afunelo amɔtshi waleka ndjokamá, ete ngo Codex Alexandrinus w’ɛtɛndɔ k’atano, kana Codex Ambrosianus w’ɛtɛndɔ k’asamalo, watepela djɛ “antambo 20.” Lá wopo wɔkɔnge omfunyi ndakoke mfuna lá wopo wɔ nyɛtshi “120”? Totepela “nkama” la “antambo” tɔfɛna lá otepela wɔ Hebero. Djɛko ndeke, omfunyi akokaka mfuna “nkama” l’edjena kɛ “antambo.”

Lá nsɔsɔlɔ, winá w’onanghaso la wolo djɛ ndjoka ikakambo inkfumɔ la nyɛna tɛmpɛlɔ kɛ Salɔmɔ lá wopo wɔ nsɔsɔlɔ, topike wiso pekapeka lá kɛnɛ kɛkɔpa ntepela tɛmpɛlɔ kɛ djingingi—tɛmpɛlɔ k’ekekete kɛ nyuma. Ɔsɔ ngo oyɛso la djedjɛ le Yehova lá wopo wɔ ndombeta enkambi wɛnde enkfumɔ djɛ ndɔtɛmɔla lá tɛmpɛlɔ kɛ nghɔsɔ!—Heb. 9:11-14; Ndj. 3:12; 7:9-17.