Paul: Tokaka osasa ndaka mpɔnda! Iyayale nde lá Ngɔndɔ kɛ djomi l’ɔmɔ 1985, totatshɔki tá idjena yɛso yɛ ntondo yɛ yatotome ete ngo amisiɔnɛrɛ lá Liberia, lá owɛstɛ w’Afrique. Aviyɔ waso wemalaka lá Sénégal. Anne atepelaka ante: “Lá winá ɔmɔ wɔ ntango la ndambo tokoma lá Liberia!” Manyi towaka losango lɔnɛ: “Anto ankfumɔ watatshu tá Liberia nyokite má Aviyɔ. Coup d’état kenanghemaka l’eteyi, ko aviyɔ waso watawa wopo wɔ nkita.” L’ilá kɛ etsho djomi wɛlɔndisá, totshikalaka l’amisiɔnɛrɛ lá Sénégal, tekameyɛki nsango yɛ má Liberia, tokaki lá radio wopo wɔ etuka yasɛkɔlaka edjo la ewandji yashimbe anto dj’ipa mposa kaanga m’amvulu yɛwɔ m’ɔtɛ w’asase wawolamaki ngo mbolama.

Anne: Toyalaki anto w’okoso efula. Lá nsɔsɔlɔ, má ɔlɛngɛ wɔmi wandjetaki ambɔ Annie kanga ɔpɔdju. Lokaki wɔma efula djɛ ndjopa ontayimbo! Koko tɔsaka nkano djɛ ntshɔ tá idjena yɛ yatotome.

Paul: Ngo kilɔmɛtrɛ enanɛyi ndeke lokapolaki idjena iwotshisá Anne la yɛ mawotshɔ, lá owɛstɛ wɔ Angleterre. M’ɔkɔngɔ w’iso nshiyɛ imanite, totateyɛka olemo wɔ yat’ekalo, ambotshi wami la nyango Anne watokembɛka efula. Iwɔ watosukaka djɛ nkamba lá olemo wɔ winá enkfumɔ. Winá wɔ mawa ɛnɔnyi 19, mbaka mpeyi kɛ nkamba lá Betɛlɛ, makɔ Anne ankilikaka mɔkɔngɔ w’iso ntshukana lá 1982.

Anne: Takɔpaki Betɛlɛ efula, koko takombolaki ntokamba lá idjena ilekɔ la djonyi efula. Nkamba lá Betɛlɛ la waayalaki amisiɔnɛrɛ ntondo etedjɛka mposɛ kɛso. Talɔmbaki otsho onkfumɔ l’ila k’ɛnɔnyi esato djɛ nkambo djɛsɔ, ko lá 1985 tokaka wɔlɔ efula winá wɔ yatete djɛ ntingela lá nkalasa kɛ 79 kɛ Ngaladɛ! Watotomaka lá Liberia, lá owɛstɛ w’Afrique.

Paul: Toyɛka ndɔsa aviyɔ watatshɔki ntondo tá Liberia. Vu ntayalaki la couvre-feu kananghemaki. Otuka ɔmɔtshi wɔpɛtshɛka tɔyɛ t’ɔkɔngɔ la wolo efula, anto wokaka wɔma ko walotaka. Djɛ nshiyɛ wɔma, tawalaki avɛrse amɔtshi wa Yeembo esanga otsho onkfumɔ. Koko tɔkɔpaka idjena yɛso y’olemo efula. Anne ayalaki misiɔnɛrɛ, lemi lakambaki lá Betɛlɛ,  l’ompandju wɔ John Charuk. a Mbaka okfumbelo wɔ wɔlɔ efula má balo la looka lɔnde lɔ akambo wakomela wananyɔ la ankaana.

Anne: Ladjikɛnge sakɔpɛ Liberia lankeke nghɔsɔ? Ladjikɛnde takɔpaki wananyɔ l’ankana yɛso. Wayalaki l’osasango, la ngandji, ole la nkɔmano. Tokanaka efula lawɔ; ladjikɛnde wakomaka nkfumbo kɛso kɛ bango. Etepela wɛwɔ wɛ wɔlɔ wetokembɛka efula lá nyuma. Mpoposanyɛ lawɔ ayalaki wɔlɔ lombombe. Ase mvulu w’okaki yɛnyi efula ntsha tombatshika kaanga winá emangha toko! Anto wasawolaki akambo wa Bible lá ɛnsɛsɛ. Atayalaka nkambo djɛ wolo djɛ nsawola lawɔ. Tayalaki la okakasano wɔ ndjeka la ombeki onkfumɔ wɔ Bible mande wayalaki efula. Ɔsɔ ayalaka nkambo djɛ wɔlɔ efula!

Paul: M’ɔkɔngɔ w’ɛnɔnyi ɛnɛyi wɛ ndambo kɛ vu, otshikitano w’ekekete efula wonanghemaka lá 1989, mbandji k’ekekete efula ketateyɛka. Lá Ngɔndɔ k’esambele 2, 1990, eloyi w’antɔmbɔki wɔsaka djena djalaki entshupa la Betɛlɛ. L’ilá kɛ ngɔndɔ isato totasawolaki l’anto wimá bandja, ndjila ole ase Nkfumbo la wananyɔ wa biro dj’ekekete. Evungusano la ndjala keyalaka efula la wakesolaki amato lako wopo. Evungusano wɛsɔ wenanghemaka l’ilá k’ɛnɔnyi 14 la wetshanghanaka l’owila w’otondo.

Anne: Ase tɔkɔlɛ tɔmɔtshi wananaki la wayakaki ase tɔkɔlɛ tonkina. Antɔmbɔki amɔtshi walɔtaki ntshendja djɛ mbindo, wayalaki l’eta wɛ wolo efula wahetaki l’entayimbo la wasandjaki amvulu. Le amɔtshi ndjaka onto ayalaki ete ngo “ndjaka nkɔkɔ.” Watshumanyɛki edjo lá djena djɛ yashimbolaka anto la ɛmɔtshi entshupa la Betɛlɛ. Wayakaka Ewakɛ ɛmɔtshi wɛ nkɔmano, edjinge amisiɔnɛrɛ yɛso ipe yɛ Ngandji.

Ewakɛ ɛmɔtshi wilaki mbiko yɛwɔ lá mbalaka má ndjisa wananyɔ w’ase tɔkɔlɛ tɔ yahonaka la yayakaka. Amisiɔnɛrɛ la wananyɔ wa Betɛlɛ wananghaki ngo wopo wɔkɔ ɔmɔ. Lá Betɛlɛ, Ewakɛ ɛmɔtshi wɛsɛkwisá wetamaki l’anse kɛ mbeto la tintasɛki la ankina lá etajɛ. Tintatasɛka lá mvulu kɛso la nkfumbo k’anto esambele.

Paul: Lofu lonkfumɔ antɔmbɔki wasɛsaki ndjingela djɛ ndolenda ntsha tisaki anto. Tasɔnaki anto anɛyi djɛ mpolama: Ape walengelaki má dindishi la ape wapolamaki lá lokfuke lɔ lopango. Ntsha ape welá bandja wambɔkɔma ɛwɔ lá ntondo kɛwɔ,  ete koko lako djoyi. Koko ntsha wambotshimbɛ ɛwɔ m’ɔkɔngɔ, mbɔ koko antɔmbɔki wambokoma lopango efula, ko waalengelaki má dindishi walotaki mbala kɛkɔ kɛmɔ djɛ ntisá tolongo tɔso.

Anne: M’ɔkɔngɔ wɔ mbengo imangha, oloyi ɔmɔtshi w’antɔmbɔki woyalaki la nkɛlɛ efula watshindaka wananyɔ ko wingelaka. Ndádjipaka la nkaana kɛmɔtshi lá mvulu kɛ sɔkaka washi, ko l’eteyi, madimadi kɛmɔtshi kayalaki la idjena imɔtshi yɛ ndjisama. Nkaana afumbɔka ntisama l’eteyi. Antɔmbɔki wankilikaka lá etajɛ l’eta w’asase. Wapomelaka lá lokfuke la wolo. Paul akadjimolaka ante: “Wadjɛmi ɔka.” Winá wɔ madjipe idjena yɛ nkaana ndisama, oyoko woyalaka. Nkalɔka ndɔnga nkete lá madimadi ko kɛsɔ kɔsaka ndambo kɛ winá. Nyɛnaka ente antɔmbɔki wangondjopola kɛnɛ k’onanghami, ko ntateyɛka ndjita lokomba lako wopo. Iya wopo wɔkɔnge makoke ndjombola lokfuke? Ndɔmbaka lá limimi, mbɔndaka Yehova djɛ nkotshɛ́. Makɔ ndjombolaka lokfuke la ndawemoyɛka ipa ndjita lokomba. Ɔmɔtshi antshindaka, atshɔka tá madimadi, adjipolaka la awangaka nsandjasandja. Nde atawolaka ante apɔnghɛna onto l’eteyi. Nde nya winande wahɛndjaka lá amvulu inkina la lá lokala. Koko watɛna kaanga ekete.

Paul: Tosambaka nkete djɛ ndɛ angɔndɔ efula. Koko tayalaki la eleelo efula wɛ nyuma. Ɛtɔyi kɛ mma kɛ salɛka ngo “ɔtɛmwɛlɔ wɔ nkɛsɛ” wɔ Betɛlɛ, lakɔpaki efula winá wɔ yatɔpɛyɛka wolo wɔ l’eteyi.

Osambo wɔ nkete djɛ ndɛ la wɔ washi watotshindaki djɛ mposa má Betɛlɛ, koko teewaki ente ntsha tomboposa wakoka ndoyaka anto wa sisaka. Winá ɔmɔtshi, wopo la winá wɔ Yehova ndatɔpɛyɛka nkete ayalaki ngo ngete lá nsese. Yehova ashiyɛki ehomba wɛso la atokotshɛki djɛ nshiyɛ wɔma.

Winá w’andja yotalekaka ndjala widjima, ndeke osase wɔ nsɔsɔlɔ yotalekaka mpɛta. Mbala efula wananyɔ l’ankaana walotaki djɛ mbikɛ mbiko yɛwɔ, koko wayalaki la djawo ole wayalaki vu kaanga l’anteyi kɛ ekakasano. Amɔtshi watepelaki ambɔ mbandji kapɛyɛka okfumbelo wɔ ‘ndowika lá ndjolo k’ekekete.’ Tokokolo tɔ oloko wolo la wananyɔ w’elangala wananghaki la wolo djɛ nkotshɛ́ wananyɔ l’ankaana. Wananyɔ l’ankaana watshikalaka iwoke imɔ, wadjipolaka ntatshi djɛ looko djɛ bango djɛ mpoposanyɛ la wananghaki nsanghanyɛ lá Amvulu y’Onkfumi yɛ yapikaka l’okonda. Nsanghanyɛ iyalaki idjena yɛ lokembo lá winá w’ipa nkongi, la mpoposanyɛ akotshɛ́ka Ewakɛ wɛ Yehova djɛ nkfulumeyɛ. Winá wɔ sakapanyɛka nkete djɛ okotshɔ, tokaka l’oloko efula winá wɔ yalɔmbaka ampata yɛ mpoposɛnyɛ l’edjena kɛ ndɔmba ntshendja. Anto wayalaki la yɛnyi la watshimbisá yimba wakɔpaka ndjekameyɛ losango lɔ wɔlɔ. Wakamɔki efula winá wɔ yɛnaka Ewakɛ walekɔ l’osasa ole la ikanyi yɛ wɔlɔ; iwɔ wanghayinghaki ete ngo esase lá widjima pɔtɔ. (Mat. 5:14-16) Osasalo wɔ wananyɔ l’ankaana wonanghaka  djɛ antɔmbɔki amɔtshi nkoma wananyɔ waso.

Paul: Winá ɛmɔtshi tayalaki ladjɛ nyima má owila, mbala ipe kana isato lá ɔnɔnyi. Nkaana kɛmɔtshi kɛ misiɔnɛrɛ atepelaka lá yopasɛ kɛnɛ kɛ sokaka isankfumɔ ante: “Lá Ngaladɛ, watolakanyɛka djɛ nkɔpa wananyɔ la ankaana lá idjena yototomawɔ. Ko ndatshika lá winá w’ekakasano wɛ nghɔnɛ atɔkɔtaki efula l’oloko!” Mpeyi nde takokaki nkotshɛ́ wananyɔ l’ankaana yɛ Liberia má ewila wɛwɔlɔma wɛ sotoyala.

Anne: Lá Ngɔndɔ k’atano 1996, timaka anto anɛyi la otuka wɔ filialɛ la tɔsaka enkanda weyalaki djonyi. Takombolaki nangha kilɔmɔtrɛ 16 djɛ ndjopa ngando djɛ ntokoma lá idjena yɛ vu. Lá winá wɔsɔ, wananaki l’idjena yɛ sayalaka. Antɔmbɔki wayalaki la nkɛlɛ wawolaka asase lá djiko, wemɛka otuka wɔso, watokitshɛka isasato ko watshɔka la Paul l’eteyi kɛ otuka. Temalaka lanyi la yɛnyi y’efula. Lako ilá, tɛnaka Paul alakalɔ leso l’oloyi w’anto, ko alɔyi w’ekila walakɛlɛ l’elongi. Má ntato, tɔfɛnyɛka ente wambowola asase, koko tɛnaka ente ntsha nghɔsɔ, atasamba nkɛnda! Ɔntɔmbɔki ɔmɔtshi ɔtɔka nkete winá wɔ ndolondolaka djɛ ndoposɛ má otuka. Mpeyi nde yayale ngo ipopota yɛ daambi.

Otuka ɔmɔtshi w’angala wotahetaki l’anto kfu l’eteyi. Mande idjena itayalaki lonkina l’eteyi dj’iso ndjapema, tɔlɛndamaka l’emamo w’otuka. Kanga lotakɛndjɛki alotshɛka la wolo efula, ko isankfumɔ tɔkɔpaka nkfɔ. Tɔɔwɔndaka djɛ nde nyemɛ, koko ayalaki la wɔma efula, ko atatoka. Tonanghaka ngo djɛ mvunda otuka la wolo, koko winá wɔ sakome esisa l’ankfunda yangaka efula ko totateyɛka ndjoka wɔma.

Paul: Tombotshikala ngo ɛwɛwɔ, la ntshendja mbatshɛ́ l’ɔkɔngɔ, tolendanaka la topolanaka wopo w’okokaso mbika. Tetamaka lá elikɔptɛrɛ wɛ yawole asase, weyalaki lá bedji mɔtshi, w’isapema lomi tá Sierra Leone. Toyalaka la djedjɛ efula mande toyalaki la lowiko koko tokiyanaki efula lá nkambo djɛ wananyɔ l’ankaana yɛso y’Akristo.

Anne: Winá wɔ sakome lá Freetown, lá Betɛlɛ djɛ Sierra Leone, wananyɔ watowakelaka wɔlɔ efula. Koko nkambo mɔtshi djɛ wɔma efula nkomelaka. Lofu l’otondo layalaki la wɔma ente nkambo mɔtshi dj’ekekete djonkomela la ntakokaki ntɔnɔla wɔlɔ. Mfɛnyɛki ete ngo ekete kenkfumɔ kɛ mɛnaka kepalekɔ kɛ nsɔsɔlɔ. Lá lotsho, lawetshɔki mbala efula, ndjokaki wɔma ente nkambo mɔtshi dj’ekekete dj’onanghema. Ndjalaki la okakasano wɔ nteka. Paul ankotaka, ko alɔmbɔka nya lemi. Totshumbaka teembo t’Onkfumi tii winá wɔ moovumbaka. Ndjokaka ente nkɔpa ntotɔ okadji la mpangokamba lonkina ete ngo misiɔnɛrɛ.

Mpavungɛki nkambo nanghemisá masɔ. M’ɔkɔngɔ wɔ mbengo imangha, tolongolaka ajournalɛ ape. Journalɛ mɔtshi yayale nde Wetshɔ! kɛ Ngɔndɔ k’asamalo 8, 1996. Keyalaki la djamba “Comment venir à bout des crises de panique.” Winá wɔkɔ wɔsɔ ndeke meewaka kɛnɛ kenkomelisá. Dj’ape yayale nde Etange k’Olami kɛ Ngɔndɔ k’atano 15, 1996, keyalaki la djamba “Où puisent-ils leur force?” Etange k’Olami kɛkɔ keyalaki la lowombodji lombatshɛ mpafu. Etange kɛkɔ kapakisolaki ante ngo ngete lowombodji okokande nkindjɛ ndɛ la mfumbɔ, kaanga mpafu djɛnde yombatshɛ, tokoka nkindjɛ nkotshɛ́ anto ankina má nyuma kɛ Yehova kaanga ntsha tolekɔ la mpota lá yimba. Ɔsɔ ayalaka nsɔsɔlɔ oleelo wɔpɛyɛ lokembo wime Yehova lá winá wɛdje. (Mat. 24:45) Mpɛndja ɔtɛ wɔ nkambo la ntshumanyɛ wamba wa nghɔsɔ ankotshɛki efula. M’ɔkɔngɔ wɔ etsho, ntatshimba yimba lonkina lá akambo wa wɔma wa mokaka.

Paul: Winá onkfumɔ wɔ sakɔpaka nkalɔ lá kaso lá Liberia, toyalaki la osasa efula. Tá ekomo k’ɔnɔnyi 2004, tonanghaka ɛnɔnyi entshupa la 20 lá idjena yɛso yɛ olemo. Winá wɔ mbandji yashile, wɔsaka nonghanyi kɛ mpika filialɛ. Koko lako ndjalá ilá watɔlɔmbaka djɛ ndɔsa odjito wɔ bango.

 Ɔsɔ ayalaka ohemba w’ekekete efula. Tokanaki efula la nkfumbo kɛso kɛ nyuma, songokfulumeyɛ ngete mo? Totshikaka ankfumbo yɛso yɛ ngandji djɛ ntshɔ tá Ngaladɛ, tɛnaka wopo wɔ ndátshika lá akatshi wa Yehova oyakalawɔ esako ko tawolaka. Odjito wɔ bango wɔso yayale nde lá Ghana, owila wɔtɔwɔlamaki.

Anne: Tɔkɛdjɛka wisɔyi efula winá wɔ sime má Liberia. Tokamɔka efula winá wɔ Frank, wɔnanyɔ ɔmɔtshi w’ekokolo, wɔ balo efula ndatoshimela ante: “Nyo ladjɛ ntovungɛ!” Ko nde apakisolaka ante: “Tewa ente nyopakoke ntovungɛ, koko nyo ladjɛ nkɔpa wananyɔ l’ankaana yɛ Ghana l’oloko wɔnyo onkfumɔ. Yehova ndeke lomonyotoma, djɛko ndeke nyɔkɔpɛ wananyɔ l’ankaana yɛ lanyi.” Kɛsɔ ketokembɛka djɛ ntshɔ tá idjina yɛ bango yɛsɔ y’anto efula yopotewe la yɛ sopewe wɔlɔ wɔlɔ.

Paul: Koko, lako ndjala ilá tɔkɔpaka nkfumbo kɛso kɛ bango kɛ nyuma kɛ Ghana. Ewakɛ efula wayalaki l’eteyi! Towaka elakanyelo efula má nkɔmano la má djawo djɛ wolo djɛ tolongo tɔso tɔ bango. Manyi, m’ɔkɔngɔ wɔ nkamba ɛnɔnyi 13 lá Ghana, towaka odjito onkina wɔ bango. Watɔlɔmbaka djɛ ntokamba lá filialɛ kɛ Kenya, lá ɛstɛ kɛ Afrique. Kaanga satshike tolongo tɔso tɔ ntondo lá wengo, atayala ilá towaka tolongo tonkina tɔ bango lá Kenya. Tokambaki lá etatshi kɛ looko k’ekekete efula keyalaki la djonyi djɛ ansakodji.

Anne: L’ilá kɛ ɛnɔnyi, mpomanaka l’akambo wa wɔma ole wa lokomba. Akambo wa wɔma la wa yɛnyi nkoka ndjala la eposelo lá demba la lá wɔngɔ. Topakoke nkongela ente Yehova angokamba l’ansese djɛ ntolama má akambo wasɔ. Winá w’okami wawola eta langokake djodjo efula la bale tii winá wɔsɔ. Koko langokongake ngo Yehova ntɔpɛyɛ okotshɔ djɛ ntokembɛ, ole okotshɔ wɔ wananyɔ l’ankaana. La koko lamɛna ente má ndjala la nkfumbo djɛ wɔlɔ djɛ nyuma, Yehova nkoka ntokotshɛ́ djɛ ntshikala lá olemo wɔso.

Paul: Amɔtshi nkoka ndjopola ambɔ: “Nyɔkɔpa idjena yɛnyo yɛ olemo?” Ewila nkoka ndjala wɔlɔ, koko wekoka ndjala lonkina l’evungusano ole la mbalaka. Ko kɛkɔnge kɛ salekaka nkɔpa ndeka owila? Wananyɔ l’ankaana wa ntsho, nkfumbo kɛso. Kaanga oyɛso má nkfumbo ntshikitanyi, lá nsɔsɔlɔ tosanga tokanyi. Takanelaki ente wambototoma djɛ ntaakembɛ, koko lá nsɔsɔlɔ iwɔ ndeke lotokembisá.

Winá onkfumɔ wɔ sasɛkɔka, Yehova atonanghelaki nsese mɔtshi: Atɔpɛyɛki nkfumbo kɛ wananyɔ. Winá onkfumɔ wɔ sayalaka lá otshumano ɔmɔtshi, tayalaki la nkfumbo ole la mvulu. Tolekɔ l’eshikikelo ente ntsha tombokindjɛ ndáwɛkɛ le Yehova, angotokembɛ lá nkilika kɛnɛ k’oyɛso la djonyi.—Flp. 4:13.