DJAMBA DJƐ WEKELO 45
YEEMBO 138 Ɔtɛ wɔ ndjwe wolekɔ l’onkfunda (lá Otetela)
Elakanyelo w’owaso m’etepela w’alɛnɔ w’ampame yɛ nkɔmano
‘Balo ape ndjalaka le nkokolo dj’anto, la yimba ape ndjalaka le onto w’ombowika ilá?’—DJƆ. 12:12.
IKANYI YƐ DJAMBA
Ntshunamo le Yehova ndjakalaka esako má winá wɔsɔ, la ntɔlaka tá lowiko l’etshinda l’etsho weyaye.
1. Lamo oyɛso ladjɛ mba elakanyelo me nkokolo dj’anto?
ISANKFUMƆ tolekɔ la djonyi dj’ɛlɔndjɛlɔ djɛ ndɔsa akano wa djonyi lá lowiko. Tokoka mba ɛlɔndjɛlɔ kɛ nghɔsɔ me nkokolo la me Akristo wambotshunda lá nyuma. Kaanga ntsha wambotshunda efula, topakoke ntona alako wawɔ mbala kɛkɔ kɛmɔ ente wambohetá lohoye. Yehova nkɔpaka iso mba elakanyelo me nkokolo dj’anto. Mande wambowika ilá efula, wambewa akambo efula, walekɔ la balo ole la looka lɔ wɔlɔ.—Djɔ. 12:12.
2. Ɛnaso lá djamba djɛnɛ lɔ nge?
2 L’etsho w’efunamaki Bible, Yehova akambaki la nkokolo djɛ nkɔmano djɛ nkembɛ la ndɔndjɛ enkambi wɛnde. Tokolenda ndjɔmbɔmba kɛ Mɔsɛ, kɛ Davidɛ la kɛ ɔpɔstɔlɔ Djɔanɛ. Iwɔ wawikaka lá deko ntshikitanyi, la akambo wakomelisá watshikitana. T’ekomo kɛ mbiko yɛwɔ, wapɛyɛka elangala ɛmɔtshi alako w’awalo. Nkokolo nkfumɔ djɛsɔ wapikaka nghɔmɔ ɛnsɔsɔ la djonyi djɛ ndjala la ntshunamo le Ndjambe. Yehova atolamela etepela wɛwɔ wɛ balo tii lɔɔko. Kaanga oyɛso nde dɛngɛ kana nkokolo, tokoka mba wapɔ má nkɔdjɛ alako wawɔ. (Ɔrɔ. 15:4; 2 Ti. 3:16) Lá djamba djɛnɛ, tongoshishima etepela w’alɛnɔ w’ampame isato yɛsɔ la elakanyelo w’okokaso mba.
‘ONGOWIKA ILÁ EFULA’
3. Mɔsɛ ndayalaka l’edjito wɛkɔnge?
3 Mɔsɛ alapɛyɛka le Yehova lowiko lɔnde l’otondo. Akambaka ete ngo ɔprɔfɛtɛ, isushi, omfunyi w’ɛkɔndɔ la apɛyɛki ɛlɛmbɛ. Mɔsɛ ewaki akambo efula! Nde alɔndjɛka owila w’Isariyɛlɛ má lomfumbe l’Edjipito la ɛnaka ansese efula wa Yehova. Yehova akambaka la nde djɛ mfuna enkanda etano wɛ ntondo wɛ Bible, Yeembo 90, la mbala imɔtshi Yeembo 91. Nkoka ndjala nde ndeke lofunisá lonkina onkanda wɔ Djɔbɔ.
4. Mɔsɛ ndakembɛ anto wakɔna, ko lamo?
4 Ndambo daambi lá ntondo kɛ nde mvɔ, winá wɔ ndayalaka l’ɛnɔnyi 120, Mɔsɛ atshumanyɛka wana w’Isariyɛlɛ djɛ ndavungola akambo w’iyɛnyi la wakomelisá. Má ɔlɛngɛ wɔwɔ, iwɔ wɛnaka tolembetelo l’ansese efula wa Yehova ndananghe, la wopo wɔ ndalomboyɛ Edjipito. (Epo. 7:3, 4) Iwɔ wakɛndaka l’ɛkɔngɔ kɛ Ndjale kɛ Nkola Nkola winá wɔ washi yakapwana la wɛnaka ovwelo w’angala wa Farawɔ. (Epo. 14:29-31) L’oswe wɔ lɔsɛkɛ, iwɔ wɛnaka wopo wɔ Yehova ndálame la ndáseyɛ ehomba wɛwɔ. (Mvu. 8:3, 4) Winá wɔ yayale entshupa djɛ ndjingila lá Looko lɔ Daka, Mɔsɛ akambaka la mbamba kɛsɔ djɛ ndakembɛ. a
5. Etepela w’alɛnɔ wɛ Mɔsɛ welekɔ́ lá Mvungo k’ɛlɛmbɛ 30:19, 20 yapɛyɛka ase Isariyɛlɛ eshikikelo kɛkɔnge?
5 Mɔsɛ ndatepela ante nge? (Wala Mvungo k’ɛlɛmbɛ 30:19, 20.) Wana w’Isariyɛlɛ wayalaki la nkongi djɛ lowiko lɔ wɔlɔ efula. L’esako wɛ Yehova, wana w’Isariyɛlɛ wakokaka mbika ilá efula lá looko lɔsɔ ete ngo ndaalake. Ɔsɔ ayalaka owila wɔ wɔlɔ la w’ɛtɛtɔ efula! Mɔsɛ apakisolaka ante: ‘Angando yɛ nkekete la yɛ wɔlɔ yɛ nyotapika, amvulu imbolola kfu la wepo enkfumɔ wɛ nkete djɛ wɔlɔ djɛ nyotakamba djɛ mba, apeku wa washi wa nyotatshimá, la awedji wa vinyɔ ole etamba wɛ olivɛ wɛ nyotakona.’—Mvu. 6:10, 11.
6. Lamo Ndjambe ndawola djɛ ewila enkina ndonga Isariyɛlɛ?
6 Mɔsɛ apɛyɛka lonkina wana w’Isariyɛlɛ ndjewo. Dj’iwɔ nkindjɛ mbika l’owila wɔ wɔlɔ wɔsɔ, ngo iwɔ nɛmɛyɛ ɛlɛmbɛ wɛ Yehova. Mɔsɛ ákembɛka djɛ ‘nsɔna lowiko’ má ndjekameyɛ Yehova la má ‘ndomalema.’ Koko, wana w’Isariyɛlɛ wakadjɛka Yehova. Djɛko ndeke l’ilá k’etsho, Ndjambe awolaka ase Asuriya, la m’ɔkɔngɔ ase Babilɔnɛ djɛ ndaalonga la djɛ ndaatɔla t’owila w’angangɛnda.—2 Nk. 17:6-8, 13, 14; 2 Ɛk. 36:15-17, 20.
7. Elakanyelo wɛkɔnge w’owaso má etepela wɛ Mɔsɛ? (Lenda edjinge ntshango.)
7 Olakanyelo wɔkɔnge leso? Ntshunamo ntɔlaka tá lowiko. Ete ngo wana w’Isariyɛlɛ yakɔpɛ ndjingela lá Looko lɔ Daka, iso koko tɔkɔpa ndjingela l’andja wa bango walakisá Ndjambe, lá sɔngɛna looko lotakadjimɔ paradiso. (Iza. 35:1; Luka 23:43) Djabolo l’ɛdjɛngɛ wɛnde wangima. (Ndj. 20:2, 3) Ntolo dj’engolo djewangoyɛ anto me Yehova mpangoyala lonkina. (Ndj. 17:16) Lako ilá enkfumi wɛ wana w’anto wɛngɔnyɔkɔla anto walɔndjɛwɔ. (Ndj. 19:19, 20) Antɔmbɔki wapangoyala lá paradiso. (Yee. 37:10, 11) Anto l’atshuku wa looko ankfumɔ wangɔlɛmɛyɛ ɛlɛmbɛ wɛ sii wɛ Yehova wenangha djɛ vu l’osanga mfula. Djɛko ndeke, anto ankfumɔ wangɔkɔpana la wangilelana oloko. (Iza. 11:9) Wole nkongi wɔlɔ! Lonkina, ntsha tombokindjɛ nɛmɛyɛ Yehova, tokoka mbika lá paradiso kɛ lá looko, ape ɛnɔnyi nkama, koko lotshinda lotshinda.—Yee. 37:29; Dj. 3:16.
Ntsha tɔmbɔlɛmɛyɛ Yehova, tokoka mbika lá paradiso kɛ lá looko, ape ɛnɔnyi nkama, koko etshinda etshinda (Lenda itenyi 7)
8. Wopo wɔkɔnge nkongi djɛ lowiko l’etshinda yakotshɛ́ misiɔnɛrɛ kɛmɔtshi kekambisá ilá efula? (Yuda 20, 21)
8 Ntsha tombokota daka djɛ Ndjambe djɛ lowiko l’etshinda lá wɔngɔ, tongoomalema ayale ekakasano wepomana laso. (Wala Yuda 20, 21.) Daka djɛsɔ nkoka ntɔpɛyɛ nkfulu kɛ nana la wɛdju wɛso. Misiɔnɛrɛ kɛmɔtshi kekambisá ilá efula lá Afrikɛ kenanaki la wɛdju wɛ demba wetashilaki atepela ante: “Nsipisoyɛ ente nkoka ntshutshɛ́ nkongi djɛ lowiko l’etshinda, ampɛyɛka nkfulu k’efula kɛ nana l’akambo wami la kɛ ndɔmba Yehova l’entete. L’okotshɔ wɔnde, ndjalaka l’akoka wa ndonga.”
‘WƐ ONGOLONGA’
9. Davidɛ ndapomana lá ekakasano wɛkɔnge lá lowiko lɔnde?
9 Davidɛ ayalaki nkfumi k’ekekete efula. Ayalaki lonkina ondjombe, omfunyi w’apoɛmɛ, nanyi mbandji, la ɔprɔfɛtɛ. Nde apomanaka l’ekakasano efula. L’ilá k’ɛnɔnyi ɛmɔtshi, nde alotalotaki djɛ ndjisamela Saolo, Nkfumi kɛ djewɔ. M’ɔkɔngɔ wɔnde nkoma nkfumi, Davidɛ alotaka djɛ mbomba lowiko lɔnde winá wɔ wɔnande Abisalɔmɔ ndahone ndokita nkfumi. Kaanga Davidɛ ndapomana l’ekakasano la ndananghe evunga, nde ɛnyɛka nkɔmano djɛnde le Ndjambe l’ekomo kɛ lowiko lɔnde. Yehova atepelaka djɛ Davidɛ ante ‘mpame k’esasangɛ oloko’ wɔnde. Alako wa Davidɛ wɛdje ndjekameyɛ!—Ele. 13:22; 1 Nk. 15:5.
10. Lamo Davidɛ ndapɛyɛ wɔnande Salɔmɔ, kanga lokitisá dako?
10 Tokolenda dako djɛ Davidɛ ndapɛyɛ wɔnande Salɔmɔ, kanga lookitisá. Yehova asɔnaka olangala wɔsɔ djɛ nde nkindjɛ mfudjɛ ɔtɛmwɛlɔ wɔ piyɔɔ la mpika tɛmpɛlɔ djɛ lomo lɔnde. (1 Ɛk. 22:5) Salɔmɔ akokaka mpomana l’ekakasano. Davidɛ ndoshimela ante mo? Nyontshɔ tokolenda.
11. Lá nkilika 1 Nkfumi yɛ Nkanga 2:2, 3, Davidɛ ndashikikɛ Salɔmɔ ante mo, lamo etepela wɛsɔ oyɛwɔ nsɔsɔlɔ? (Lenda edjinge ntshango.)
11 Davidɛ ndatepela ante mo? (Wala 1 Nkfumi yɛ Nkanga 2:2, 3.) Davidɛ ashimelaka wɔnande ante ntsha ambɔlɛmɛyɛ Yehova, angolonga lá lowiko. L’ilá k’ɛnɔnyi efula, Salɔmɔ alongaka l’akambo efula. (1 Ɛk. 29:23-25) Nde apikaka tɛmpɛlɔ kɛ wɔlɔ efula, afunaka la akotshɛ́ka djɛ enkanda enkina wɛ Bible mfunama. Nde ewamaka má djaana l’okfudji wɔnde. (1 Nk. 4:34) Koko ete ngo Davidɛ ndapakisola, Salɔmɔ ndotalonga tii l’ekomo ngo ntsha nde nɛmɛyɛ Yehova Ndjambe. Yɛnyi nde, t’ekomo kɛ lowiko lɔnde, Salɔmɔ awangaka ntɛmɔla tondjandjambe. Ko Yehova atowawola lonkina, ole atshutshɛka balo djɛ ndɔndjɛ la sii.—1 Nk. 11:9, 10; 12:4.
Etepela w’ekomo wɛ Davidɛ te wɔnande Salɔmɔ wetokotshɛ́ djɛ nyɛna ente ntsha tɔmbɔlɛmɛyɛ Yehova, nde angɔtɔpɛyɛ djaana djɛ ndɔsa akano wa wɔlɔ (Lenda itenyi 11-12) b
12. Elakanyelo wɛkɔnge w’owaso má etepela wɛ Davidɛ?
12 Olakanyelo wɔkɔnge w’owaso? Tongolonga má nɛmɛyɛ. (Yee. 1:1-3) Lá nsɔsɔlɔ, Yehova atalaka ante angɔtɔpɛyɛ lomo la okfudji ete ngo Salɔmɔ. Koko ntsha tɔmbɔlɛmɛyɛ Ndjambe kɛso, angɔtɔpɛyɛ balo djɛ ndɔsa akano wa wɔlɔ. (Woo. 2:6, 7; Dja. 1:5) Tɔkfɔ tɔnde nkoka ntɔlɔndjɛ l’akambo wa djonyi ete ngo olemo, nkalasa, etombo la mfalanga. Má nkamba la djaana djɛ Ndjambe, tongowomba djokanelo djɛso la nde la tongowa lowiko l’etshinda. (Woo. 2:10, 11) Tongowa tolongo tɔ wɔlɔ. Edjinge tongowa ɛlɔndjɛlɔ k’oyɛso la djonyi djɛ mba lowiko lɔ nkfumbo l’osasa.
13. Carmen ndawa wopo wɔ ndonga lá lowiko ngete mo?
13 Carmen, kanga lowika lá Mozambique, afɛnyɛki ante nkalasa kɛ inivɛrsite ndeke iseke yɛ ndonga la lowiko. Nde ingelaka inivɛrsite, ko ananghaka nkalasa kɛ mpika amvulu. Nde afunaka ante: “Nkɔpaka lombombe kɛnɛ kɛ mekaka. Koko, kandɔsɛlaki winá la welo efula. Latshɔki tá nkalasa má eshidji 7:30 wɛ nkɛsɛ tii eshidji 6:00 wɛ nkɔlɔ. Ayalaki wolo efula ndjingela nsanghanyɛ la mpɔlaka lá nyuma. L’eteyi kɛmi, nyɛnaki ente nkambela ewandji epe.” (Mat. 6:24) Alɔmbaka djɛ nkambo djɛsɔ la ananghaka ehonelo l’enkanda wɛso. Akfɛ ante: “M’ɔkɔngɔ wɔ wananyɔ wambotshunda lá nyuma la nyɔ kɛmi mpɛyɛ alako wokama papoo, ndɔsaka nkano djɛ nyima má inivɛrsite ko nkambela Yehova winá enkfumɔ. Kɛsɔ kenkotshɛ́ka djɛ ndɔsa nkano djɛ wɔlɔ lá lowiko lɔmi, edjinge mpakiyanaka.”
14. Nkambo djɛkɔnge djɛ ntshina djɛ Mɔsɛ la Davidɛ yatepela?
14 Mɔsɛ nya Davidɛ wakɔpaki Yehova la wɛnaki djonyi djɛ ndɔlɛmɛyɛ. Lá etepela wɛwɔ w’ekomo, iwɔ wakembɛka waawekameyɛki djɛ ndɔnda ndjɔmbɔmba yɛwɔ má malema Yehova Ndjambe kɛwɔ. Yape kɛkɔ wewoyɛka ambɔ Yehova angokadjɛ onto onkfumɔ wɔngɔwɛkɔ la angotshutshɛ esako wɛ ndombolaka. Alako wawɔ walekɔ djonyi tii lɔɔko kɛnɛ. Koko nkama y’ɛnɔnyi m’ɔkɔngɔ, onkambi onkina wɔ Yehova ɛnyɛka djonyi djɛ ndjala la nkɔmano le Ndjambe.
‘LAKO NKAMBO DEKA MPƐYƐ OSASA’
15. Akambo wakɔnge w’ɔpɔstɔlɔ Djɔanɛ ndɛnyi lá lowiko lɔnde?
15 Djɔanɛ ayalaki ombeki wɔ Yeso Kristo ndakɔpaka efula. (Mat. 10:2; Dj. 19:26) Djɔanɛ aheetaka nya Yeso l’olemo wɔnde onkfumɔ, ɛnaka ansese la ayalaka la nkɔmano le nde lá winá w’ekakasano. Nde ɛnaka winá wɔ yapanyɛ Yeso l’otamba la ɔwɛnaka winá wɔ ndakfundɔ. Nde ɛnaka winá wɔ otshumano w’Akristo yotafulaká l’ɛtɛndɔ kɛ ntondo, la wopo wɔ losango lɔ wɔlɔ ‘yapoposanyema le ntongami nkfumɔ djɛ l’anse k’olongo.’—Kɔl. 1:23.
16. Anto wakɔna wawa wapɔ má enkanda wɛ Djɔanɛ?
16 T’ekomo kɛ lowiko lɔnde, Djɔanɛ awaka mpeyi kɛ mfuna Otepela wɔ Ndjambe má nyuma k’ekina. Nde afunaka ‘wɛnɛlɔ wɛ nkamɔ wa ndjiso kɛ Yeso Kristo.’ (Ndj. 1:1) Djɔanɛ afunaka evanjiliyo wetama lá djiina djɛnde. Nde akalɔka mfuna enkanda esato má wolo wɔ nyuma k’ekina. Onkanda wɔnde w’asato ndafunela nde Okristo ɔmɔtshi wɔ nkɔmano w’etawɔ Gayusɛ, kanga ndɔwɔsaka ete ngo wɔnande wɔ ngandji wɔ nyuma. (3 Dj. 1) Manyi, Djɔanɛ ɔsaki lonkina anto efula ete ngo wana wande wa ngandji wa nyuma. Kɛnɛ kɛ mpame kɛ nkɔmano k’ekokolo kɛsɔ ndafune, kekembɛ ambeki ankfumɔ wa Yeso tii lɔɔko kɛnɛ.
17. Lá nkilika 3 Djɔanɛ 4, ekete kɛkɔnge keyakalaka osasa efula?
17 Djɔanɛ ndafune nge? (Wala 3 Djɔanɛ 4.) Djɔanɛ afunaka djɛ osasa woyɛka má nɛmɛyɛ Ndjambe. Winá wɔ Djɔanɛ ndafunaka onkanda wɔnde w’asato, anto amɔtshi watshanghanyɛki elakanyelo w’engolo la waaposɛki djatɔnelo. Koko, ankina wakindjɛki ‘nkɛnda lá nsɔsɔlɔ.’ Iwɔ walɛmɛyɛki Yehova la ‘waakɛndaki lá nkilika ɛlɛmbɛ wɛnde.’ (2 Dj. 4, 6) Akristo wa nkɔmano wasɔ wasasangɛka Djɔanɛ ole Yehova.—Woo. 27:11.
18. Elakanyelo wɛkɔnge w’okokaso mba má etepela wɛ Djɔanɛ?
18 Olakanyelo wɔkɔnge w’owaso? Nkɔmano ntɔlaka tá osasa. (1 Dj. 5:3) Ndjɔmbɔmba, tolekɔ l’osasa má ndjewa ente tosasangɛ Yehova. Nde nsasangaka winá w’ɔtɛnande totona ehemba w’andja wanɛ la tawola nsɔsɔlɔ. (Woo. 23:15) Anto ankina koko wasasanga l’olongo. (Luka 15:10) Edjinge iso tongokake osasa winá w’ɛnaso djɛ onto ɔmɔtshi alekɔ la nkɔmano, pekapeka lá ntondo k’ekakasano l’ehemba. (2 Te. 1:4) Winá wɔ andja wanɛ yotahete, tongoyala l’osasa má ndjewa ente tɛnyɛka Yehova nkɔmano djɛso kaanga Satana ndalɔndjɛka andja.
19. Nkaana Rachel otepelande ante mo lá kɛnɛ kelendana la ndakanyɛ anto akambo wa nsɔsɔlɔ? (Lenda edjinge ntshango.)
19 Tolekɔ l’osasa pekapeka winá w’opoposanyɛso nsɔsɔlɔ. Rachel, lowika lá République Dominicaine, ɛnyɛ ante ndakanyɛ anto akambo wa Ndjambe kɛso k’okambelaso, alekɔ mpeyi kɛ ndopewaka kaanga wopo wɔ ntepela. Winá w’okanelande djɛ wana wande wa nyuma, nde atepela ante: “Langokake osasa efula winá w’ɛnami dj’anto wolakanyɛmi wambofula, wakɔpa Yehova la walawɛkɛ le nde l’akambo ankfumɔ, ole watshikitanyɛ mbiko yɛwɔ djɛ ndosasangɛ. Osasa wɔsɔ woleka welo la ekete kenkfumɔ kɛ molasambɛ djɛ ndalakanyɛ.”
Tongokake lonkina osasa djɛ ndakanyɛ anto ankina dj’iwɔ nkɔpa la nɛmɛyɛ Yehova ete ngo iso (Lenda itenyi 19)
WAPƆ W’OWASO MÁ NKAMBA L’ETEPELA W’AMPAME YƐ NKƆMANO
20. Akambo wakɔnge wosangaso la Mɔsɛ, Davidɛ ole Djɔanɛ?
20 Mɔsɛ, Davidɛ, la Djɔanɛ wawikaka lá deko ntshikitanyi la wapomanaka l’akambo watshikitanyi la waso. Koko tosanga akambo efula lawɔ. Tokambela Ndjambe kɛ nsɔsɔlɔ ete ngo iwɔ. Tɔngɔlɔmbake Yehova, tongolawɛkɛke le nde ete ngo iwɔ, la tongohonake ɛlɔndjɛlɔ kɛnde ete ngo iwɔ. La koko, ete ngo ampame yɛ nkokolo yɛsɔ, tolekɔ l’eshikikelo ente Yehova angosakola wɔɔlɛmɛyɛ.
21. Esako wɛkɔnge wekonga anto woka alako w’ampame yɛ nkɔmano yɛnɛ Mɔsɛ, Davidɛ, la Djɔanɛ?
21 Djɛko ndeke, nyontshɔ tekameyɛ etepela w’alɛnɔ w’ampame yɛ nkokolo yɛsɔ má nɛmɛyɛ ɛlɛmbɛ wɛ Yehova. Ko tongolonga lá lɛdji lɔ nsɔsɔlɔ l’akambo ankfumɔ w’onanghaso. Tongoyala la lowiko la ‘tongowika ilá efula,’ ɛwo, etshinda etshinda! (Mvu. 30:20) Edjinge tongowa osasa wɔ nsasangɛ Papa kɛso kɛ ngandji kɛ l’olongo, kanga lokotshɛ alaka wande ankfumɔ lá lɛdji lɔ sopakoke nkanela.—Ɛfɛ. 3:20.
YEEMBO 129 Tokindjɛ nkfulumeyɛ (lá Otetela)
a Wana w’Isariyɛlɛ efula wɛnisá ansese wa Yehova lá Ndjale kɛ Nkola Nkola watingela lá Looko lɔ Daka. (Ewa. 14:22, 23) Yehova apɛyɛka ɔlɛmbɛ ante onto wolekɔ́ l’ɛnɔnyi 20 la wɔ djiina djɛnde yafunama lá buku, angovɔ l’osowe wɔ lɔsɛkɛ. (Ew. 14:29) Koko, Yosua, Kalɛbɛ, l’efula kɛ elangala kɛ lɔsɔkɛ lɔ bango ole ikɔlɛ yɛ Lewi wangowika dj’iwɔ ntɛna ekotshamelo kɛ alaka wa Yehova winá w’ase Isariyɛlɛ yongopa Ndjale kɛ Jɔrdanɛ la yongingela lá Kanana.—Mvu. 1:24-40.
b NSAKISO KƐ NTSHANGO: Lá wadjɛ lɔwɔ: Davidɛ alaka wɔnande Salɔmɔ dako dj’ekomo djɛ balo. Lá womɛ lɔwɔ: Ambeki wa Nkalasa kɛ Tat’ekalo wawa okfumbelo wɔ teokrasi.
