Wɛ nkɔpaka mba wapɔ má wekelo wɔ Bible w’onto nyɔmɛlɛ? Alako wanɛ wakoka nkokotshɛ́ djɛ ndjala lá edjena kɛ wɔlɔ winá w’ekɛ:

• Sɔna edjena kɛ wɔlɔ. Ntsha nkokaka, hona edjena kɛ wɔlɔ la kɛ hwemi k’okokɛ nyɛna wɔlɔ. Okoka ndjintasɛ lá nkosa kana lá iba, la okoka mpona edjena kɛ wɔlɔ lá bandja.

• Hona edjena k’okokɛ ndjala nghɔmɛlɛ. Yeso asɔnaka djɛ ndɔmba ‘l’inkɛnkɛsɛ’ ‘lá ntɛkɛ.’ (Mar. 1:35) Ntsha opalekɔ la edjena kɛ ndjala nghɔmɛlɛ, shimela ase nkfumbo kana anto w’intasɛ la wɛ lá mvulu ntondo ntsha ɔkɔpa ndjeka, la shimelawɔ dj’ipa iwɔ nkofutanyɛ winá w’ekɛ.

• Ila yimba lá wekelo. Imɛ ekete kenkfumɔ kekoka ndjɛkɔla yimba yɛko. Ntsha okambɛ nde la telefɔnɛ kana la tablɛtɛ djɛ ndjeka, nangha dj’ipa telefɔnɛ nsɔnɛ kana ila modɛ aviyɔ dj’ipa nkofutanyɛ. Ntsha owopɔ nkambo mɔtshi dj’okokɛ nangha, funa lá nkishi dj’ipa mvungɛ djɛ ndonangha m’ɔkɔngɔ wɔ wekelo. Ntsha akambo wakɛkɔla yimba walekɔ, emala ndambo djɛ nangha enano kana sembola ekolo.