ONGOYALAKE l’okakasano wɔ nsasanga la wɔ nangha wekelo wɔko wɔ Bible mbala la mbala? Tongosasangake isankfumɔ winá ɛmɔtshi. Koko tokokanela nkete mɔtshi dj’onanghakaso lofu la lofu, ete ngo ndjɔka washi. Ndjɔka ndɔmbaka winá la welo, koko ntokembɛka la ntotshitshimɛka efula! ‘Washi w’otepela wɔ Ndjambe’ nkoka ntotshitshimɛ má mbamba kɛ wekelo wɔ Bible. (Ɛfɛ. 5:26) Kolenda alako amɔtshi wakoka nkokotshɛ́:

• Nangha nonghanyi. Wekelo wɔ Bible w’onto nyɔmɛlɛ wolekɔ l’anteyi kɛ ‘akambo waleka djonyi’ wa Okristo oyɛnde ladjɛ ndɔsa l’odjito. (Flp. 1:10) Djɛ nkokotshɛ́ djɛ nɛmɛyɛ nonghanyi kɛko, lamo ngopatshike l’idjena y’okokɛ nyɛnaka winá enkfumɔ, ete ngo mpanyɛ lá lokfuke lɔ frigo? Kana okoka nyɛna ente alekɔ djonyi djɛ telefɔnɛ kɛko nsɔnɛka minitɛ imangha lá ntondo kɛ winá wɔ wekelo.

• Sɔna winá la wopo wɔ ndjeka wolekɔ́ wɔlɔ le wɛ. Angoyala wɔdju ndɔsa winá efula djɛ ndápɛyɛ lá wekelo kana ngo winá emangha toko? Wɛ ndeke lewa akambo w’onanghɛ. Tɔlɔnghanyɛ wekelo l’akambo wako. Ntsha okakanyɛ winá wɔ ndjeka, lamo ngopakoke ndɔsa kaanga minitɛ djomi djɛ ndjeka? Má ndjeka ndambo ndambo, okoka ndjeka akambo efula. Ole winá w’otateyɛ, ongoyala la mposɛ kɛ nkindjɛ.—Flp. 2:13.

• Sɔna akambo wa ndjeka ntondo. Ntsha ombintasɛ ko m’ɔkɔngɔ olopola ekɛ lɔ nge, ‘opangokamba la winá wɔko la wopo wɔ wɔlɔ.’ (Ɛfɛ. 5:16) Ladjikɛnge ngopasɔnɛ wamba la ɛtɛ wɛ wayi wɔkɔpɛ ndjeka? Winá onkfumɔ wɔ woopó ɔmɔtshi okoyelawɔ l’ɔtɛ, funa. Ole l’ekomo kɛ wekelo, kalɔ mfuna wayi ankina wɔkɔpɛ ndjeka.

• Nangha etshikitano ntsha nkokaka. Nangha la wolo djɛ ndjila lá nonghanyi kɛko winá w’ohetshɛ́ lá wekelo la ɛtɛ wɛ wayi wɔsɔnɛ. Ekete keleka djonyi nde—ape winá, ilá, kana kɛnɛ k’ekɛ—koko mbala imangha ekɛ.

Lá nsɔsɔlɔ tongowake wapɔ má ndjala l’ekfumbo kɛ ndjeka. Tongosukanake la Yehova, tongekake wopo wɔ ndɔsa akano wa balo, la tongowake lokembo.—Yos. 1:8.