DJAMBA DJƐ WEKELO 46
YEEMBO 49 Tosasangɛ oloko wɔ Yehova (lá Otetela)
Wananyɔ—nyokotshɛ akambo walɔmbama djɛ nkoma enkambi wekotshɛ́?
‘Osasa woyɛ má mpɛyɛ ndeka wɔ ndongola.’—ELE. 20:35.
IKANYI YƐ DJAMBA
Tokembɛ wananyɔ wambolongola djɛ nkotshɛ akambo walɔmbama dj’iwɔ nkoma enkambi wekotshɛ́.
1. Ɔpɔstɔlɔ Poolo ndokaka ngete mo lá nkambo djɛ enkambi wekotshɛ́?
ENKAMBI wekotshɛ́ wangokambake elemo wɛ djonyi efula lá ntshumano. Ɔpɔstɔlɔ Poolo akɔpaki ampame yɛ nkɔmano yɛsɔ efula. Ndjɔmbɔmba, winá wɔ ndafunela Akristo w’ase Filipɛ onkanda, emoyɛka pekapeka enkambi wekotshɛ́ la tokokolo.—Flp. 1:1.
2. Wɔnanyɔ Luis ndoke ngete mo winá wɔ ndakome onkambi wokotshɛ́?
2 Ayale nkokolo kana dɛngɛ, wananyɔ efula wambolongolá wangokake osasa má nkamba ete ngo enkambi wekotshɛ́. Ndjɔmbɔmba, Devan akomaka onkambi l’ɛnɔnyi 18. L’onkoko onkina, wɔnanyɔ Luis akomaka onkambi l’ɛnɔnyi 50 la ndjape. Nde atepela wopo wɔ anto efula yokaka, má ntepela ante: “Ndjokaka ente lambowa odjito w’ekekete efula wɔ nkamba ete ngo onkambi, pekapeka winá wɔ makanelaka wopo w’otshumano yanyɛnyɛka ngandji!”
3. Okadjimolaso lɔ weepó wɛkɔnge?
3 Ntsha olekɔ wɔnanyɔ ko otakome onkambi wokotshɛ́, okoka ndáwilela okoma? Kɛkɔnge kɛngɔkɔpɛyɛ mposɛ kɛ nangha nghɔsɔ? Iya akambo wakɔnge wa djonyi walɔmba Afunelo w’oyɛ ladjɛ nkotshɛ́? Lá djamba djɛnɛ, tongokadjimola weepó wɛsɔ. Koko ntondo ntondo, tokolenda elemo wekamba enkambi wekotshɛ́.
ENKAMBI WEKOTSHƐ́ OKAMBAKAWƆ ELEMO WƐKƆNGE?
4. Enkambi wekotshɛ́ okambakawɔ elemo wɛkɔnge? (Lenda edjinge ntshango.)
4 Nyuma k’ekina ndeke lɔsɔna wɔnanyɔ wombolongola ete ngo onkambi wokotshɛ́ djɛ nkotshɛ́ tokokolo má nkamba elemo wɛ djonyi lá otshumano. Enkambi ɛmɔtshi wangonanghake la wolo djɛ ansakodji mba enkanda la ntatshi djɛ looko djɛ mpoposanyɛ. Enkina wangokotshɛ́ke djɛ nsola la ndɔngɔsɔla Mvulu k’Onkfumi. Enkambi wangɔsɔnamake djɛ nkamba elemo enkina, la lá Audio/video winá wɔ losanghanyɛ l’otshumano. Enkambi yokambaka efula ngo elemo wɛnama. Koko, enkambi wekotshɛ́ walekɔ ntondo ntondo anto walekɔ́ la lonyuma lɔ wɔlɔ, wangɔkɔpake Yehova, la wangowikake má nkilika ɛlɛmbɛ wɛnde wɛ sii. Wangɔkɔpake wananyɔ l’ankaana yɛwɔ y’Akristo lombombe. (Mat. 22:37-39) Wopo wɔkɔnge wɔnanyɔ wombolongola okokande nkoma onkambi wokotshɛ́?
Onkambi wokotshɛ́ ndjokolaka Yeso má ndapɛyɛ l’ɛkɔpa djɛ nkambela anto ankina (Lenda itenyi 4)
5. Wɔnanyɔ oyɛnde ladjɛ nangha nge djɛ nkotshɛ okoma wɔ nkoma onkambi wokotshɛ́?
5 Bible djɛnyɛ papoo akambo walɔmbama djɛ onto nkoma onkambi wokotshɛ́. (1 Ti. 3:8-10, 12, 13) Okoka mba mpeyi kɛsɔ má ndjeka akambo walɔmba Afunelo wasɔ ko manyi nangha la wolo djɛ nkamba la wakɔ. Koko ntondo ntondo, wɛ ladjɛ nkɔdjɛ lamo oyɛ la mposɛ kɛ nkoma onkambi wokotshɛ́.
ƆKƆPƐ NKOMA ONKAMBI LAMO?
6. Kɛkɔnge kengokotshinda djɛ nkambela wananyɔ l’ankaana olemo wɔ wopo onkfumɔ? (Mateo 20:28; lenda edjinge ntshango.)
6 Ndjɔmbɔmba kɛso k’ekekete, Yeso Kristo, atshindamaka má ngandji—ngandji kɛnde te Isɛkɛnde la te anto. Ngandji kotshindaka djɛ nkamba elemo wɛ wolo la wɛ nsɔnyi. (Wala Mateo 20:28; Dj. 13:5, 14, 15) Ntsha ngandji kɛ nghɔsɔ kembokotshinda, Yehova angokosakola la angokokotshɛ́ djɛ nkotshɛ okoma wɔko wɔ nkoma onkambi.—1 Kɔ. 16:14; 1 Pɛ. 5:5.
Má ndjɔmbɔmba kɛnde, Yeso alakanyɛ apɔstɔlɔ djɛ nkambela anto ankina l’okitshakitshɛ l’edjena kɛ mpona mpipo kana lowandji (Lenda itenyi 6)
7. Lamo wɔnanyɔ oyɛnde ladjɛ ndjewɔ ekoma enkfumɔ wɛ lokaki?
7 L’andja wanɛ, anto efula wangɔkɔpake anto walekɔ́ la nkopo. Koko ape l’olonghanyelo wɔ Yehova. Wɔnanyɔ wotshindama má ngandji ete ngo Yeso, apahonaka lowandji, nkopo kana mpipo. Ntsha onto wɔ nghɔsɔ ambɔsɔnama l’otshumano, nde akoka ntona elemo w’anto ankina ɛnawɔ ambɔ nsɔnyi, koko wɛ djonyi mbakela ɛnkɔkɔ wɛ Yehova. Akoka nyɛna ante elemo ɛmɔtshi w’eshiyɛ onkfunda wɔnde. (Dj. 10:12) Yehova apasakolaki onto onkfumɔ wolekɔ́ l’ofuno kana l’ekoma wɛ lokaki.—1 Kɔ. 10:24, 33; 13:4, 5.
8. Dako djɛkɔnge Yeso ndalake apɔstɔlɔ wande?
8 Winá ɔmɔtshi, kaanga tolongo tɔ ma ma tɔ Yeso wahonaki edjito l’ekoma wɛ pɔlɔ. Tokolenda nkambo nanghisá ambeki ape wa Yeso—Djakɔbɔ nya Djɔanɛ. Iwɔ walɔmbaka Yeso djɛ ndapɛyɛ edjito wetshikitanyi lá Onkfumi wɔnde. Yeso atawandjɛ djɛ ikanyi yɛsɔ. Koko nde apakisolaka ambeki 12 ankfumɔ ante: ‘Onto onkfumɔ wɔkɔpa ndjala ekekete l’anteyi kɛnyo ayale ose olemo wɔnyo, lonkina onto wɔkɔpa ndjala l’edjena kɛ ntondo l’anteyi kɛnyo ayale ose olemo wɔnyo nyankfumɔ.’ (Mar. 10:35-37, 43, 44) Wananyɔ walekɔ́ la ikanyi yɛ wɔlɔ—ntepela ente, yɛ nkotshɛ́ anto ankina, wangoyala osako w’ekekete efula le otshumano.—1 Te. 2:8.
KƐKƆNGE KENGOKEMBƐ MPOSƐ KƐKO KƐ NKOTSHƐ AKAMBO WALƆMBAMA?
9. Wopo wɔkɔnge w’okokɛ nkembɛ mposɛ kɛko kɛ nkotshɛ akambo walɔmbama?
9 Ape l’ehamo, wɛ nkɔpaka Yehova la nkɔpaka nkambela anto ankina. Kaanga oyɛwɔ nghɔsɔ, okoka nsamba mposɛ kɛ nkamba elemo enkina wɔlɔmbawɔ enkambi wekotshɛ́. Wopo wɔkɔnge w’okokɛ nkembɛ mposɛ kɛko kɛ nkamba? Lamo nghopakanela osasa w’oyɛka má nkambela wananyɔ l’ankaana? Yeso atepelaka ante: ‘Osasa w’oyɛ má mpɛyɛ ndeka wɔ ndongola.’ (Ele. 20:35) Nde awikaka lá nkilika ikfɔ yɛsɔ. Okaki osasa efula má nkambela anto ankina, okoka ndjoka ole wɛ.
10. Yeso ndɛnyɛ ante alekɔ l’osasa wɔ nkambela anto ankina ngete mo? (Mar. 6:31-34)
10 Tokolenda ndjɔmbɔmba kɛmɔtshi kɛnyɛ ente Yeso ayalaki la osasa wɔ nkambela anto ankina. (Wala Marko 6:31-34.) Lá mbamba kɛmɔtshi, Yeso nya ambeki wande wanyɔnghaka efula. Iwɔ watatshɔki tá ntɛkɛ mɔtshi djɛ ntohomola. Koko oloyi w’anto wawopanyɛka ntondo, l’ikanyi yɛ Yeso ndalakanyɛ. Nde atakoka ntona. Mande nde nya ambeki wande ‘watawaki kaanga winá wɔ ndɛ mma.’ Kana Yeso atakoka nkawoyɛ anto m’ɔkɔngɔ wɔ ndashimela nkambo mɔ kana ape wa nsɔsɔlɔ. Koko mande ngandji kotshindaki, nde ‘awangaka ndalakanyɛ akambo efula.’ Ko akindjɛka ndalakanyɛ ‘tii nkɔlɔ.’ (Mar. 6:35) Nde anangaka nghɔsɔ, ape mande ayalaka ladjɛ nangha, koko ladjikɛnde ‘nde awokaka nkɛtshi.’ Akɔpaka ndalakanyɛ mande ákɔpaki. Yeso okaki osasa má nkambela anto ankina.
11. Wopo wɔkɔnge Yeso ndakambela anto wowekameyɛki lá wopo wɛnama? (Lenda edjinge ntshango.)
11 Winá wɔ Yeso ndalakanyɛka anto wasɔ, ananghelaka akambo ankina ape ngo ndalakanyɛ toko. Aseyɛka lonkina ehomba wɛwɔ wɛ demba. Yeso afudjɛka oleelo má nsese la apɛyɛka ambeki wande djɛ ndakapanyɛ. (Mar. 6:41) Má nangha nghɔsɔ, alakanyɛka ambeki wande wopo wɔ nkambela anto ankina. Awɛnyɛka lonkina ante nkamba elemo w’ɛnama, ete ngo wekamba enkambi wekotshɛ́, alekɔ djonyi efula. Kokanela osasa wɔ ambeki yoke má ndɔsa opiko lá nsese djɛ Yeso djɛ nkapanyɛ oleelo wɔ ‘anto ankfumɔ yale la yalote’! (Mar. 6:42) Lá nsɔsɔlɔ, ape ngo mbala kɛsɔ toko ndeke Yeso ndahetshɛ ehomba w’anto lá ntondo kɛ wɛnde. Nde akambelaka anto lowiko lɔnde l’otondo. (Mat. 4:23; 8:16) Yeso okaki wɔlɔ la osasa má ndakanyɛ anto ankina la má nshiyɛ ehomba wɛwɔ la okitshakitshɛ onkfumɔ. Ape l’ehamo, ongoka osasa wɔ nghɔsɔ winá wɔ nghongokambela anto ankina ete ngo onkambi wokotshɛ́ ntsha opayalisa la ekoma wɛ lokaki.
Ngandji k’okɛ Yehova la mposɛ kɛko kɛ nkambela anto ankina, kengokotshinda djɛ nkambela otshumano lá nkilika akoka wako (Lenda itenyi 11) a
12. Lamo sopalekɔ l’elonga kɛ nkanela ente nkambela otshumano ntoshiyɛka onkfunda?
12 Ntsha ɔmɛna ente opalekɔ l’akoka w’efula, tɔlɛmbake. Ape l’ehamo olekɔ la wekeka wanangha djɛ wɛ ndjala djonyi l’otshumano. Tɔnɔla lá kɛnɛ kɛ Poolo ndafune lá 1 Kɔrɛtɔ 12:12-30, manyi lɔmba Yehova akokotshɛ́ djɛ nkamba l’akambo wakɔ. Etepela wɛ Poolo wekopakisola papoo ente, ete ngo enkambi enkfumɔ wɛ Yehova, olekɔ la olemo wɔ djonyi la wɔ ntshina wɔ nkamba l’otshumano. Ntsha opalekɔ l’akoka wa nkotshɛ akambo walɔmbama djɛ nkoma onkambi wokotshɛ́ winá wɔsɔ, totshutshɛke nkongi. Ko lamo nghopakoke nangha kenkfumɔ k’okokɛ nangha djɛ ndjala la ntshina le Yehova la le wananyɔ wako? Yashikikɛ ente tokokolo wewa akoka wako winá wɔkɔpɛyɛwɔ odjito onkfumɔ.—Ɔrɔ. 12:4-8.
13. Lá kɛnɛ kelendana la akambo walɔmbama, kɛkɔnge kelekɔ nsɔsɔlɔ le ampame imbɔsɔnama?
13 Tokolenda donga mɔtshi dj’oyɛ ladjɛ nkotshɛ akambo walɔmbama djɛ nkoma onkambi wokotshɛ́: Akambo ankfumɔ wasɔ walendana la Akristo ankfumɔ. Lá nsɔsɔlɔ, Okristo onkfumɔ ladjɛ nsukana la Yehova, ndjoka osasa má mpɛyɛ, la mbika la wopo w’osasangɛ Ndjambe. Ko akambo wakɔnge kɔɔ wakoka wɔnanyɔ nangha?
WOPO WƆ NKOTSHƐ AKAMBO WALƆMBAMA
14. ‘Ndjala onto woyalɛmɛyɛ’ osakisolawɔ nge? (1 Timɔte 3:8-10, 12)
14 Nyontshɔ winá wɔsɔ tokoshishima akambo walɔmbama w’owalawɔ lá 1 Timɔte 3:8-10, 12. (Wala.) Onkambi wokotshɛ́ ladjɛ ‘ndjala onto woyalɛmɛyɛ.’ Itepela yɛsɔ ikoka nkadjimwama lonkina ndjala “onto wilawɔ onkfunda,” “wɔlɛmɛyɛwɔ,” “wɔsawɔ la odjito” kana “wokotshɛ edjito.” Kɛsɔ kepasakisola ente opakoke ndjɔla kana mposɛ akambo w’atɔla. (Los. 3:1, 4) Koko, osakisolawɔ nde wɛ ladjɛ nangha la wolo djɛ nkotshɛ edjito wɛko enkfumɔ. Ntsha ongokambake la ongoshiyɛke edjito wɔkɔpɛyɛwɔ, wananyɔ w’otshumano wangɔkɔlɛmɛyɛ.
15. ‘Wapalekɔ la nemi ipe’ la ‘wapalule djɛ mba nkete má nkamba la lokeso’ osakisolawɔ nge?
15 ‘Wapalekɔ la nemi ipe’ nsakisolaka ente olekɔ onto wotepela nsɔsɔlɔ, wonangha akambo la sii, la wɛdje ndjilela oloko. Ongokotshɛke otepela wɔko, la opadjimbaka anto ankina. (Woo. 3:32) ‘Wapalule djɛ mba nkete má nkamba la lokeso’ nsakisola ente, olekɔ sii lá onanghelo wɔ opoto la olamelo wɔ mfalanga. Wɛ opakambaka la djokanelo djɛ wɔlɔ dj’oyɛso la wananyɔ l’ankaana djɛ ndaalɛla mfalanga.
16. a) Anto ‘wapalapɛyɛ efula lá waná’ osakisolawɔ nge? b) Kɛkɔnge kesakisola ‘nkfum’oloko kɛ pipɔɔ’?
16 ‘Wapalapɛyɛ́ efula lá waná’ nsakisolaka ente opanɔka waná efula la anto wapakewaka ete ngo nɔyi kɛ waná. Ndjala la ‘nkfum’oloko kɛ piyɔɔ’ nsakisolaka ente owika lá nkilika ɛlɛmbɛ wɛ Yehova. Kaanga ngopalekɔ́ djɔ, olekɔ la vu djeyɛka má djokanelo djɛ wɔlɔ la Ndjambe.
17. Wopo wɔkɔnge wɔnanyɔ ɛnyɛnde ante ɛdje ndjilela oloko winá ‘wowilawɔ lá ehemba’? (1 Timɔte 3:10; lenda edjinge ntshango.)
17 Iwɔ ladjɛ ‘ndjilama l’ehemba’ nsakisolaka ente, wɛ omboshiyɛka nyɛnyɛ ente anto wakoka nkɔpɛyɛ edjito. Djɛko ndeke, winá wɔ tokokolo ɔkɔpɛyɛwɔ edjito, kilika alako wawɔ, la ɛlɔndjɛlɔ k’otshumano la nkɔmɛ nkfumɔ. Yala l’eshikikelo ente oka wɔlɔ wɔlɔ wopo wɔ nkotshɛ edjito wɛkɔ la winá wɔ nghongoshiyɛ. Winá wokotshɛ odjito la nkɔmɛ nkfumɔ, anto ankina w’otshumano wangɔkɛna la wangɔkɔpa ofulelo wɔko. Tokokolo, nyowadjɛ winá w’okfumbanyo wananyɔ wambolongola. (Wala 1 Timɔte 3:10.) Wananyɔ amɔtshi wambolongola walekɔ l’otshumano wɔnyo walekɔ́ l’ɛnɔnyi djomi la ndjape kana elangala? Wɛnyɛ ndjɔmbɔmba kɛ wɔlɔ lá ekfumbo kɛwɔ kɛ ndjeka Bible? Wangɔpɛyɛke kɔmantɛrɛ la wangopoposanyɛke mbala la mbala? Ntsha nghɔsɔ, nyapɛyɛ edjito wɛlama l’ɛnɔnyi ole l’akoka wawɔ. Lá lɛdji lɔsɔ, wananyɔ w’elengala ‘wangilama lá ehemba.’ Winá wɔ yongokoma elangala, wakoka nkotshɛ akambo walɔmbama djɛ nkoma enkambi wekotshɛ́.
Má mpɛyɛ wananyɔ wambolongola edjito, tokokolo wakoka ‘ndawila la ehemba’ (Lenda itenyi 17)
18. Onto wɔ ‘yopamame nkambo’ osakisolawɔ nge?
18 Onto wɔ ‘yopamame nkambo’ nsakisolaka ente, wapakoke nkowanda nkambo dj’ekekete djelekɔ́ nsɔsɔlɔ. Lá nsɔsɔlɔ, wakoka mbanda Okristo nkambo dj’ongolo. Wawandaka Yeso akambo w’engolo la ewoyɛka ante wangowanda ole ambeki wande. (Dj. 15:20) Koko, ntsha ombolama eyalelo kɛko piyɔɔ, ete ngo Yeso, ongoyala la lokumɔ lɔ wɔlɔ l’otshumano.—Mat. 11:19.
19. ‘Anto walekɔ́ la wadji ɔmɔ’ osakisolawɔ nge?
19 ‘Anto walekɔ́ la wadji ɔmɔ.’ Ntsha ombotshukana, wɛ ladjɛ nɛmɛyɛ ɔlɛmbɛ wɔ Yehova wɔ má banga banga wolendana la bala, mpame kɛmɔ omoto ɔmɔ, wome ɔmɔ wadji ɔmɔ. (Mat. 19:3-9) Okristo apakoke nangha wayi wa mbindo wa ntshɛngi. (Heb. 13:4) Apakoke kaanga ndɔsa opiko. Wɛ ladjɛ ndjala la nkɔmano te wadjɛko, opakoke ndenda omoto onkina lá wopo wɔ nyɛtshi.—Djɔ 31:1.
20. Wopo wɔkɔnge ampame ɔlɔndjɛwɔ ‘wana la anto walekɔ́ lá amvulu yɛwɔ lá wopo wɔ wɔlɔ’?
20 ‘Walɔndjɛ wana la anto walekɔ́ lá amvulu yɛwɔ lá wopo wɔ wɔlɔ.’ Ntsha oyɛ nde owandji wɔ nkfumbo, wɛ ladjɛ nkotshɛ edjito wɛko lá wopo wɔ wɔlɔ. Lɔndjɛ ɔtɛmwɛlɔ wɔ nkfumbo mbala la mbala. Poposanyɛ mbala la mbala la ose nkfumbo kɛko onkfumɔ la lɛdji l’okokɛ. Kotshɛ́ wana wako djɛ ndjala la djokanelo djɛ wɔlɔ djɛ ma ma la Yehova. (Ɛfɛ. 6:4) Onto wewa ndɔndjɛ nkfumbo kɛnde ɛnyɛ ante angewa ndɔndjɛ otshumano.—Ɛdjɛ la 1 Timɔte 3:5.
21. Ntsha opalekɔ onkambi wokotshɛ́, oyɛ ladjɛ nangha nge?
21 Wananyɔ, ntsha nyopakambe winá wɔsɔ ete ngo enkambi wekotshɛ́, tɔmɔnyɔwɔnda djɛ nyo nshishima alako walekɔ lá djamba djɛnɛ. Nyeke akambo walɔmbɔma djɛ nkoma enkambi wekotshɛ́ la nyonanghe la wolo djɛ nkotshɛ. Nyɔtɔnɔlɛ lá ngandji k’efula k’okanyo Yehova la wananyɔ l’ankaana. Nyofudjɛ mposɛ kɛnyo kɛ ndakambela. (1 Pɛ. 4:8, 10) Ko nyongowa osasa w’oyɛka má nkambela nkfumbo kɛnyo kɛ nyuma. Yehova asakole welo wilanyo djɛ nkoma enkambi wekotshɛ́!—Flp. 2:13.
YEEMBO 17 ‘Lemi nkɔpaka’ (lá Otetela)
a NSAKISO K’ASANGO: Lá wadjɛ lɔwɔ, Yeso akambela apɔstɔlɔ la okitshakitshɛ onkfumɔ; lá womɛ lɔwɔ, onkambi wokotshɛ́ akotshɛ́ wɔnanyɔ w’ekokolo l’otshumano.
