DJAMBA DJƐ WEKELO 47
YEEMBO 103 Elami w’ɛnkɔkɔ—Ampame ilekɔ́ epapɛyɛ (lá Otetela)
Wananyɔ—nyokotshɛ akambo walɔmbama djɛ nkoma tokokolo?
‘Ntsha onto akombola ndjala olami, nde akombola olemo wɔ wɔlɔ.’—1 TI. 3:1.
IKANYI YƐ DJAMBA
Tɔngɛna lá djamba djɛnɛ, akambo wa Bible ɛnyɛnde wa wɔnanyɔ oyɛnde ladjɛ nkotshɛ djɛ nkoma ikokolo.
1-2. ‘Olemo wɔ wɔlɔ’ wokamba tokokolo osakisolawɔ nge?
NTSHA ombokamba ndambo ilá ete ngo onkambi wokotshɛ́, mbɔ koko olekɔ lá mboka kɛ wɔlɔ djɛ nkotshɛ akambo walɔmbama djɛ nkoma ikokolo. Okoka nkotshɛ akambo walɔmbama djɛ nkamba ‘olemo wɔ wɔlɔ’ wɔsɔ?—1 Ti. 3:1.
2 Elemo wɛkɔnge wekamba tokokolo? Iwɔ wangɛnyɛke ndjɔmbɔmba l’olemo w’ipoposanyɛ, wangonanghake la wolo djɛ ndakanyɛ la nama ɛnkɔkɔ, wangokembɛke otshumano m’etepela la má ndjɔmbɔmba yɛwɔ. Bible alekɔ l’elonga kɛ ndjeta tokokolo tokamba la wolo ante, ‘ampame ilekɔ epapɛyɛ.’—Ɛfɛ. 4:8.
3. Wopo wɔkɔnge wɔnanyɔ okokande nkotshɛ akambo walɔmbama djɛ nkoma ikokolo? (1 Timɔte 3:1-7; Tito 1:5-9)
3 Wopo wɔkɔnge w’okokɛ nkotshɛ akambo walɔmbama djɛ nkoma ikokolo? Nkotshɛ akambo walɔmbama djɛ nkoma ikokolo, atshikitana la nkotshɛ akambo walɔmbama djɛ mba olemo wɔ demba. Mbala efula l’andja wanɛ, ntsha olekɔ l’akoka amɔtshi wahona owandji w’olemo, okoka mba olemo. Lá lɛdji lotshikitanyi, ntsha okombola nkoma ikokolo, alɔmbama akambo efula ape ngo ndjala la nkoka djɛ mpoposanyɛ la djɛ ndakanyɛ. Djɛ nkoma ikokolo, wɛ ladjɛ nkotshɛ akambo walɔmbama walekɔ́ lá 1 Timɔte 3:1-7 la Tito 1:5-9. (Wala.) Lá djamba djɛnɛ, tɔnghɛna akambo asato waleka djonyi: Ndjala la lokumu lɔ wɔlɔ l’eteyi kana la bandja dj’otshumano, ndjala la ndjɔmbɔmba kɛ wɔlɔ ete ngo owandji wɔ nkfumbo, la ndjala l’ɛkɔpa kɛ nkambela otshumano.
NDJALA LA LOKUMU LƆ WƆLƆ
4. ‘Onto wopalekɔ la nkambo’ osakisolawɔ nge?
4 Djɛ nkoma ikokolo, wɛ ladjɛ ndjala ‘onto wopalekɔ la nkambo,’ ntepela ente ndjala la lokumu lɔ wɔlɔ l’otshumano, la wapakomame akambo ladjikɛnde olekɔ l’ɛkɔmɔ kɛ wɔlɔ. Lá djiko djɛ lasɔ, wɛ ladjɛ ‘ndjala la lokumu lɔ wɔlɔ ole le anto wa lá bandja.’ Anto wapalekɔ́ andjawodji nkoka nyɔnyɔla djawo djɛso dj’Akristo, koko wapakoke ndáwopola ntsha olekɔ la eyalelo kɛ wɔlɔ, la ntsha ongonanghake akambo la sii. (Dan. 6:4, 5) Kolawopola ente, ‘ndekɔ la lokumu lɔ wɔlɔ l’eteyi la lá bandja dj’otshumano?’
5. Wopo wɔkɔnge w’okokɛ nyɛnyɛ ente olekɔ ‘onto wɔkɔpa akambo wa wɔlɔ’?
5 Ntsha olekɔ ‘onto wɔkɔpa akambo wa wɔlɔ,’ ongohona kɛnɛ kelekɔ wɔlɔ le anto ankina la ongaawandjɛ djɛ wekeka wawɔ wa wɔlɔ. Olekɔ l’osasa wɔ nanghela anto ankina wɔlɔ, ndeka kaanga kɛnɛ kɛ lɔmbama. (1 Te. 2:8) Lamo oyɛwɔ djekeka djɛ djonyi efula le tokokolo? Mande wangokambake la winá wɛwɔ djɛ nama otshumano la nkotshɛ edjito wɛwɔ. (1 Pɛ. 5:1-3) Kaanga oyɛwɔ nghɔsɔ, osasa woyɛ má nkambela anto ankina ndeka welo wilaso otale.—Ele. 20:35.
6. Topo tɔmɔtshi tɔkɔnge t’okokɛ ndjala ‘onto wolongola angangɛnda’? (Hebero 13:2, 16; lenda edjinge ntshango.)
6 Wɛ nyɛnyɛka ente olekɔ ‘onto wolongola angangɛnda’ winá wonanghelɛ anto ankina akambo wa wɔlɔ, ndjila ole anto wapalekɔ ntombe yɛko. (1 Pɛ. 4:9) Onkanda ɔmɔtshi wotepela djɛ onto wolongola angangɛnda nghɔnɛ: “Lokfuke lɔ mvulu, la l’oloko wɔnde ladjɛ ndjala oholo le angangɛnda.” Kolawopola ente: ‘Langewamake ete ngo onto wolongola angangɛnda?’ (Wala Hebero 13:2, 16.) Onto wolongola angangɛnda nkapanaka lawɔ kɛnɛ kokotshɛnde, ndjila ole anto wapalekɔ́ la ntshina, wapalekɔ́ la mfalanga, wakamba elemo wɛ wolo ete ngo elami wɛ djingadjinga, la antɛndji y’angangɛnda.—Ewa. 18:2-8; Woo. 3:27; Luka 14:13, 14; Ele. 16:15; Ɔrɔ. 12:13.
Antshukami w’Akristo wambolongola olami w’edjingadjinga la wadjɛnde lá kawɔ (Lenda itenyi 6)
7. Wopo wɔkɔnge ikokolo okokande nyɛnyɛ ante apalekɔ ‘kanga lɔkɔpa mfalanga’?
7 ‘Ape kanga lɔkɔpa mfalanga.’ Kɛsɔ nsakisolaka ente opangopika wiso lá nkete djɛ demba. Ayale olekɔ ɔmvɔ kana l’okfudji, wɛ ladjɛ ndjila wapɔ w’Onkfumi l’edjena kɛ ntondo l’ikakambo inkfumɔ yɛ lowiko lɔko. (Mat. 6:33) Ongokambake lá winá, wolo, la nkete nkina djɛ ntɛmɔla Yehova, djɛ nkotshɛ ehomba wɛ nkfumbo kɛko la nkambela otshumano. (Mat. 6:24; 1 Dj. 2:15-17) Lokawopole ente: ‘Mɔsaka mfalanga ngete mo? Langosasangake lá nkete dekɔ la lemi lá lowiko? Kana langolapɛyɛke djɛ mba mfalanga efula djɛ nsomba nkete?’—1 Ti. 6:6, 17-19.
8. Topo tɔmɔtshi tɔkɔnge t’okokɛ nyɛnyɛ ente ‘ongonanghake akambo la wɛdjimo’ ngo le olekɔ la ‘ndákota’?
8 Ntsha ‘ongonanghake akambo la wɛdjimo’ la ‘olekɔ la ndákota,’ mbɔ koko olekɔ la wɛdjimo l’akambo ankfumɔ wa lowiko lɔɔko. Kɛsɔ nsakisolaka ndjewɔ ndɛ la nnɔ lá lɛdji l’efula, ndjala la wɛdjimo lá ɔlɔtɔ, oshingelo kana wimelo w’afo, kana lá etombo. Opakoke ndjokola tokanyi tɔ mbindo tɔ andja wanɛ. (Luka 21:34; Dja. 4:4) Wɛ ladjɛ ndjala vu kaanga lá winá wɔ anto okosolawɔ. Opakoke ndjala ‘ivɔyi yɛ wana’ kana ndjewama ete ngo nɔyi. Kolawopola ente: ‘Wopo wowikami wɛnyɛ ente ndekɔ la ndákota edjinge la wɛdjimo lá nanghedji djɛmi?’
9. Ndjala ‘l’ekanedji kɛ wɔlɔ’ la ‘ndjila akambo l’ɔnɔngɔ’ osakisolawɔ nge?
9 Ntsha olekɔ ‘l’ekanedji kɛ wɔlɔ,’ wɛ ɔngɔkɔmɛ akambo lá nkilika kɛnɛ ketepela Bible. Wɛ ɔngɔtɔnɔla efula lá tɔkfɔ tɔsɔ, ko kɛsɔ kɛngɔkɔpɛyɛ djewo la looka lɔ wɔlɔ. Tɔsake nkano lankeke lankeke lá nkambo nkfumɔ dj’okɛ. Koko, wɛ ladjɛ ndashikikɛ ente ewa ɔtɛ l’ekelo wɛ nkambo djɛkɔ. (Woo. 18:13) Eposelo wengoyala nde, ɔngɔsa akano wa wɔlɔ wɛnyɛ ekanedji kɛ Yehova. Ntsha olekɔ ‘onto wila akambo l’ɔnɔnghɔ,’ ongoyalonghanyɛke la ɔngɔlɛmɛyɛke winá. Anto wangɔkɔsake ambɔ olekɔ onto wɛdje ndjilela oloko la wokilika ɛlɔndjɛlɔ. Wekeka wasɔ wangokokotshɛ́ djɛ ndjala la lokumu lɔ wɔlɔ. Nyontshɔ tokolenda winá wɔsɔ wopo wɔ nkotshɛ akambo walɔmbama má afunelo djɛ ndjala ndjɔmbɔmba kɛ wɔlɔ ete ngo owandji wɔ nkfumbo.
YALA LA NDJƆMBƆMBA KƐ WƆLƆ ETE NGO OWANDJI WƆ NKFUMBO
10. Wopo wɔkɔnge onto okokande ‘ndɔndjɛ wana la anto wa mvulu kɛnde lá lɛdji lɔ wɔlɔ’?
10 Ntsha olekɔ wome la okombola nkoma ikokolo, lokumu lɔ nkfumbo kɛko nkoka ndjala l’eposelo ɛmɔtshi lá edjito wɛko. Djɛko ndeke, wɛ ladjɛ ‘ndɔndjɛ wana l’anto wa mvulu [kɛko] lá lɛdji lɔ wɔlɔ.’ Wɛ ladjɛ ndjewama ete ngo papa kɛ ngandji la owandji wokotshɛ ehomba wɛ nkfumbo kɛnde. Kɛsɔ nsakisolaka ndjala ndjɔmbɔmba kɛ wɔlɔ l’akambo ankfumɔ w’ɔtɛmwɛlɔ wɔso. Lamo oyɛwɔ djonyi? Ɔpɔstɔlɔ Poolo atɔnɔlaka ante: ‘Ntsha onto apewe ndɔndjɛ nkfumbo kɛnde, wopo wɔkɔnge wokokande nama otshumano wɔ Ndjambe?’—1 Ti. 3:5.
11-12. Wopo wɔkɔnge eyalelo k’ase nkfumbo okokawɔ ndjala l’eposelo lá edjito w’owandji wɔ nkfumbo? (Lenda edjinge ntshango.)
11 Ntsha olekɔ ombotshi, wana wako wa dɛngɛ ‘ladjɛ ndjala la ntshunamo la lomo lonkfumɔ.’ Wɛ ladjɛ ndalakanyɛ la ndakfumba la ngandji kenkfumɔ. Lá nsɔsɔlɔ, wɛ nkɔpaka wana wako ndjala l’osasa, ndjɔla atɔla ole ntomba ete ngo dɛngɛ nkfumɔ. Koko mande ombakfumba wɔlɔ, iwɔ wangoyala la dilɛmɛlɔ edjinge la nkɔmɔ djɛ wɔlɔ. Lonkina, wɛ ladjɛ nangha la wolo djɛ nkotshɛ́ wana wako dj’iwɔ ndjala la djokanelo djɛ wɔlɔ la Yehova, mbika lá nkilika tɔkfɔ tɔ Bible, la nangha efulelo tii lá batisimo.
12 ‘Ndjala la wana walekɔ́ andjawodji la wa yopafune ambɔ walekɔ la nkɔmɔ djɛ mbindo kana antɔmbɔki.’ Ntsha wɔna ɔmɔtshi wolekɔ́ Okristo ambonangha mpekanto k’ekekete, eposelo wɛkɔnge welekɔ́ le papa? Ntsha ombotshi atila yimba djɛ ndakfumba la ndakakola, nde akoka nsamba nkotshɛ akambo walɔmbama djɛ nkoma ikokolo.—Lenda Etange k’olami, Ngɔngɔ kɛ Djomi 15, 1996, nki. 21, ite. 6-7.
Owandji wɔ nkfumbo akfumba wana wande má ndashimela djɛ nkamba lá topo totshikitanyi t’olemo w’ekina (Lenda itenyi 11)
KAMBELA OTSHUMANO
13. Wopo wɔkɔnge w’okokɛ nyɛnyɛ ente olekɔ ‘l’ekanedji kɛ wɔlɔ’ la ‘opalekɔ ɔtɛ wolo’?
13 Wananyɔ wɛnyɛ́ wekeka w’Akristo walekɔ okotshɔ w’ekekete efula l’otshumano. Onto wolekɔ l‘ekanedji kɛ wɔlɔ’ nanghaka djɛ vu mfula. Ntsha ɔkɔpa dj’anto nkewa ambɔ olekɔ l’ekanedji kɛ wɔlɔ, ekameyɛwɔ la awola tokanyi tɔwɔ. Lá losanghanyɛ, wɛ ongoyala entshupa djɛ nsuka nkano mbɔsá anto efula ntsha ikfɔ la ɔlɛmbɛ wɔ Bible wotatshitana? ‘Onto w’opalekɔ́ ɔtɛ wolo’ nsakisolaka ente opilaka ekaka djɛ nangha akambo ngo lá wopo w’ɔkɔpɛ. Ewa ente alekɔ djonyi ndjekameyɛ alako w’anto ankina. (Ewa. 13:8, 9; Woo. 15:22) Wɛ ‘opalekɔ kanga mpɔsɔ’ kana ‘kanga ankɛlɛ.’ L’edjena kɛ ndjala akambo wolo kana ɔsɛndji, wɛ ladjɛ ndjala onto wɔlɔ ole la mayɛlɛ. Ete ngo oyɛ onto wɔ vu, wɛ ndɔsaka nonghanyi kɛ ndjila vu kaanga lá winá w’ekakasano. (Dja. 3:17, 18) Etepela wɛko wɛ wɔlɔ nkoka nkitshakitshɛ eyalelo k’anto ankina, ndjila ole antonyi w’akambo wa nsɔsɔlɔ.—Tos. 8:1-3; Woo. 20:3; 25:15; Mat. 5:23, 24.
14. ‘Ape . . . onto wombokoma ondjawodji ntato’ la ‘nkɔmano’ osakisolawɔ nge?
14 Wɔnanyɔ wokotshɛ akambo walɔmbama djɛ nkoma ikokolo ‘atayalake onto wombokoma ondjawodji ntato.’ Kaanga ntsha ombolongolá batisimo ilá efula, olekɔ la djonyi djɛ nkoma Okristo wombotshunda lá nyuma. Lá ntondo kɛ wɛ nsɔnama ete ngo ikokolo, wɛ ɔmɛnyɛ ete ngo Yeso ente, olekɔ l’okitshakitshɛ la okonga djɛ Yehova nkɔpɛyɛ odjito onkfumɔ. (Mat. 20:23; Flp. 2:5-8) Okoka nyɛnyɛ ente olekɔ ‘nkɔmano’ má malema Yehova l’ɛlɛmbɛ wɛnde wɛ sii la má nkilika ɛlɔndjɛlɔ kɔpɛyɛnde má olonghanyelo wɔnde.—1 Ti. 4:15.
15. Ikokolo ladjɛ mpɛyɛ wamba wa wɔlɔ efula? Pakisola.
15 Bible nyɛnyɛka papoo ente elami ladjɛ ndjala ‘l’akoka wa ndakanyɛ.’ Kɛsɔ nsakisolaka ente wɛ ladjɛ ndjewa mpɛyɛ wamba wa ntshandjawala wɔlɔ efula? Lako. Kaanga yopapɛyɛka wamba wa wɔlɔ efula, tokokolo efula tolekɔ l’akoka wa ndakanyɛ lá olemo w’ipoposanyɛ la lá mbembo kɛ ɛnkɔkɔ. Kaanga nghɔsɔ, wɛ ladjɛ ndɔngɔsɔla nkoka djɛko djɛ ndakanyɛ. Lá wopo wɔkɔnge w’okokɛ nkoma wetsha wɔ mɛlɛmɛlɛ?
16. Wopo wɔkɔnge w’okokɛ ndjewa ndakanyɛ? (Lenda edjinge ntshango.)
16 ‘Onto wovunda otepela wɔ nkɔmano mpidji.’ Djɛ ndjala wetsha wɔ mɛlɛmɛlɛ, pika elakanyelo wɛko wɛ lá ntshandjawala la alako wako wɔpɛyɛ anto l’Otepela wɔ Ndjambe. Yala ombeki wɔ mɛlɛmɛlɛ wɔ Bible la w’enkanda wɛso. (Woo. 15:28; 16:23) Winá w’ekɛ, kɔmɛ wopo wɔ enkanda wɛso opakisolawɔ avɛrse wa Bible la wopo w’okokɛ nkamba. La winá w’olakanyɛ, nangha la wolo djɛ mvunda eloko w’anto wakekameyɛ. Okoka nkoma wetsha wɔ wɔlɔ ntsha ɔlɔmba la okamba l’alako wa tokokolo tolekɔ́ l’awalo. (1 Ti. 5:17) Tokokolo ladjɛ ndjala ‘l’akoka . . . wa nkembɛ’ wananyɔ l’ankaana; koko winá ɔmɔtshi iwɔ ladjɛ ndalaka la ‘ndaapangola.’ L’akambo ape wakɔ, tokokolo ladjɛ ndjala winá enkfumɔ anto wɔlɔ. Ntsha olekɔ onto wɔlɔ ole la ngandji, ongokambake la Otepela wɔ Ndjambe, ongoyala wetsha wɔ mɛlɛmɛlɛ ladjikɛnde ongokola Wetsha w’Ekekete, Yeso.—Mat. 11:28-30; 2 Ti. 2:24.
Onkambi wokotshɛ́ akamba la mbamba k’oyɛwɔ la ikokolo yewa akambo efula djɛ ndjeka wopo wɔ ndakanyɛ má nkamba la Bible. Ngo onkambi wɔkɔ avungola djamba djɛnde djɔkɔpande ntɔpɛyɛ l’otshumano lá ntondo kɛ ilendjeyɛ (Lenda itenyi 16)
KINDJƐ NKOTSHƐ AKAMBO WALƆMBAMA
17. a) Kɛkɔnge kengokotshɛ́ enkambi djɛ nkindjɛ nkotshɛ akambo walɔmbama? b) Tokokolo oyɛwɔ ladjɛ nkota lá yimba nkambo djɛkɔnge winá wɔpɛyɛwɔ wananyɔ edjito? (Lenda ipapango “ Yala la wɛdjimo winá w’oshishimɛ anto ankina.”)
17 M’ɔkɔngɔ w’iwɔ nshishima akambo walɔmbama djɛ nkoma tokokolo, enkambi ɛmɔtshi wakoka nyɛna ambɔ wapakotshɛki akambo wakɔ. Koko vungɔ ente Yehova la olonganyelo wɔnde wapakonge djɛ wɛ nyɛnyɛ wekeka wasɔ lá lɛdji lɔ djɔ. (1 Pɛ. 2:21) Nyuma k’ekina kɛ nkfulu kɛ Yehova kengokokotshɛ́ djɛ nkona wekeka wasɔ. (Flp. 2:13) Djekeka mɔtshi dekɔ dj’ɔkɔpɛ ndálɔngɔsɔla? Lɔmba Yehova akokotshɛ́. Nangha ehonelo l’itɛ yɛ djoyi yɛkɔ la opola ikokolo imɔtshi akɔpɛyɛ alako lá wopo w’okokɛ ndálɔngɔsɔla.
18. Enkambi enkfumɔ oyɛwɔ ladjɛ nangha nge?
18 Isankfumɔ, ayale kaanga waambokamba ete ngo tokokolo, tokindjɛ nkona wekeka watepelama la djamba djɛnɛ. (Flp. 3:16) Oyɛ nde onkambi wokotshɛ́? Kindjɛ nkotshɛ akambo walɔmbama! Lɔmba Yehova akokfumbe la akokenge djɛ wɛ ndjala djonyi efula l’olemo wɔnde la l’otshumano. (Iza. 64:8) Yehova asakole welo w’ilɛ djɛ wɛ nkotshɛ akambo walɔmbama djɛ wɛ nkoma ikokolo.
YEEMBO 101 Tokambe lá osanga (lá Otetela)
