1-2. Wopo wɔkɔnge isankfumɔ okokaso mpomana l’akambo wa lɛngɛyɛ?

 YESO akɔndɔlɔka lá ndjɔmbɔmba ɔkɔndɔ wɔ wadjɛ odjo w’okindjɛki ndɔmba isushi djɛ ndokotshɛ́ djɛ nkambo djɛnde nsembɔ. Ape l’ehamo, ambeki wa Yeso efula watɔnɔlaka lá ɔkɔndɔ wɔsɔ ladjikɛnde l’etsho wɛsɔ, anto efula wɛngɛyɛki anto watayaki lá ntshina. (Luka 18:1-5) Ɔkɔndɔ wɔsɔ wolekɔ la ntshina leso lɔɔko kɛnɛ, ladjikɛnde wangɔtɛngɛyɛke mbala efula.

² L’andja wa lɔɔko wanɛ, wɛnɛla anto efula, wawɛngɛyɛ, la wanyɔkɔla, djɛko ndeke sopakamɔ winá w’ɔtɛngɛyɛwɔ. (Los. 5:8) Koko nkambo djɛ sopakongela nde, djɛ wɔnanyɔ kana nkaana ntonanghela nkambo l’isɔnɔdji; koko, kɛsɔ nkoka nanghema. Lá nsɔsɔlɔ, wananyɔ l’ankaana wapalekɔ antonyi w’akambo wa nsɔsɔlɔ. Oyɛwɔ ngo ase ntshamba djɛ djɔ. Tokoka mba elakanyelo efula lá wopo wɔ Yeso ndelola winá wɔ antonyi wa lopango yɔwɛngɛyɛka. Ntsha topalekɔ la bale ntshitshi te antonyi watɛngɛyɛ, angoyala nsɔsɔlɔ okakasano dj’iso ndjala la bale ntshitshi te winaso andjawodji! Yehova ndokaka ngete mo winá w’anto walekɔ́ l’eteyi kana lá bandja dj’otshumano ɔtɛngɛyɛwɔ? Angokiyanake?

3. Yehova nkiyanaka winá w’ɔtɛngɛyɛwɔ, ko lamo?

³ Yehova nkiyanaka efula winá w’ɔtɛngɛyɛwɔ. ‘Yehova nkɔpaka sii.’ (Yee. 37:28) Yeso atoshikikɛ ante Yehova  ‘angonangha djɛ alombo nsambolama la sii . . . lankeke lankeke’ lá winá w’ɛdje. (Luka 18:7, 8) Ole lako ilá, nde angoshiyɛ ndjolo inkfumɔ y’ɛnaso, la nkopo inkfumɔ y’akambo wa lɛngɛyɛ.—Yee. 72:1, 2.

4. Okotshɔ wɔkɔnge Yehova ɔtɔpɛyɛnde lɔɔko kɛnɛ?

⁴ Lokongaso winá wɔ sii yongolola lá looko, Yehova atokotshɛ́ djɛ nkfulumeyɛ lɛngɛyɛ. (2 Pɛ. 3:13) Nde atolakanyɛ wopo wɔ nsamba nangha akambo la ntshamba djɛ balo winá w’ɔtɛngɛyɛwɔ. Má mbamba kɛ Wɔnande, Yehova atɔpɛyɛ ndjɔmbɔmba kɛ djɔ kɛ wopo w’okokaso nkfulumeyɛ lɛngɛyɛ. Ole atɔpɛyɛ alako wa wɔlɔ w’okokaso nkamba la wakɔ winá w’ɔtɛngɛyɛwɔ.

TOWADJƐ LÁ WOPO W’ELOLASO WINÁ W’ƆTƐNGƐYƐWƆ

5. Lamo oyɛso ladjɛ mbadjɛ winá w’ɔtɛngɛyɛwɔ?

⁵ Tokoka ntshimba yimba la ndjoka yɛnyi winá w’ɔtɛngɛyɛwɔ. (Los. 7:7) Enkambi wɛ nkɔmano, ete ngo Djɔbɔ la Abakuka wokaka nghɔsɔ. (Djɔ. 6:2, 3; Aba. 1:1-3) Kaanga ndáwoka nghɔsɔ yopalekɔ́ nyɛtshi, iso ladjɛ mbadjɛ dj’ipa ndonangha nkambo djɛ nyɛtshi.

6. Ndjɔmbɔmba kɛ Abisalɔmɔ otolakanyɛwɔ nge? (Lenda edjinge ntshango.)

⁶ Tokoka ndjelola lá lɛngɛyɛ má nangha akambo lá wopo wɔso. Koko ndjelola lá lɛdji lɔsɔ, nkoka ndolekoyɛ nkambo. Tokolenda ndjɔmbɔmba kɛ Abisalɔmɔ wa wɔna Nkfumi Davidɛ. Nde okaka nkɛlɛ efula winá wɔ wɔna isɛkɛnde Aminɔnɛ ndakesola ankfunɛnde Tamara. Lá nkilika Ɛlɛmbɛ wɛ Mɔsɛ, Aminɔnɛ akokaka ndjakema má kɛnɛ kɛ ndananghe. (Lew. 20:17) Kaanga Abisalɔmɔ ndayale l’elonga kɛ nyomala, atayalaki la lotshungɔ lɔ nangha nyɔmɛlɛ kɛnɛ kɛ ndananghe.—2 Sa. 13:20-23, 28, 29.

7. Eposelo wɛkɔnge weyalisá la lɛngɛyɛ le ondjombe lá winá ɛmɔtshi?

⁷ Winá w’ɛnaso ente anto wananghá akambo wa lɛngɛyɛ wapawa iluku, tokoka mfɛnyɛ ente lako djonyi nangha kɛnɛ kelekɔ́ sii. Tokolenda ondjombe w’ɛnisá ante anto wa pɔlɔ wayalaki la lowiko lɔ wɔlɔ, ko ase sii w’ɛnaki ndjolo. Nde atepelaka ante: ‘Nghɔsɔ ndeke anto wa nyɛtshi, iwɔ wangɛnake wɔlɔ winá enkfumɔ.’ (Yee. 73:12) Atshimbaki yimba efula má lɛngɛyɛ lɔ ndɛnaka,  lookomisá djɛ nyɛna ante nkambela Yehova lako ntshina, nde atepelaka ante: ‘Winá wɔ mahonaka djɛ ndjewa, nkambo djɛsɔ djantshimbɛki yimba.’ (Yee. 73:14, 16) Lá nsɔsɔlɔ, ayɛka ndotepela ante: ‘Ekolo wɛmi weyalaka entshupa la mvunga mboka; akaka wami wayalaka entshupa la nsɛlɛmɔ.’ (Yee. 73:2) Nkambo djɛ nghɔsɔ nkomelaka wɔnanyɔ Alberto.

8. Eposelo wɛkɔnge weyalisá la lɛngɛyɛ lopomanisá la wɔnanyɔ ɔmɔtshi?

⁸ Wawandaka Alberto ambɔ amɔngɔla mfalanga y’otshumano. Eposelo weyalisá nde, atshutshɛka edjito wɛnde la ase otshumano wewisá nkambo djɛsɔ watɔwɔsaki l’odjito lonkina. Avungɔ ante: “Layalaki la nkɛlɛ, la yɛnyi ole latshimbaki yimba.” Nde atshikaka yɛnyi yɛsɔ mpɔdjɛ lonyuma lɔnde, la ahɔlaka l’ila k’ɛnɔnyi etano. Nkambo djɛsɔ djɛnyɛ kɛnɛ kekoka ntokomela ntsha tombopomana l’akambo wa lɛngɛyɛ.

TOKOLE WOPO WƆ YESO NDAKFULUMEYƐ LƐNGƐYƐ

9. Akambo wa lɛngɛyɛ wakɔnge wa Yeso ndakfulumeyɛ? (Lenda edjinge ntshango.)

⁹ Yeso atshikaka ndjɔmbɔmba kɛ djɔ kɛ wopo wɔ nkfulumeyɛ lɛngɛyɛ. Tokolenda  wopo wɔ ndakfulumeyɛ lɛngɛyɛ lɔ ase nkfumbo kɛnde la lɔ anto ankina. Boto djɛnde djetayalaki la djawo le nde wowandaka ambɔ ambototɔ okadji, ewandji wɛ ntolo wowandaki ambɔ akamba esanga l’ɛdjɛngɛ, ole angala w’Ɔrɔma wɔsɔkaka, wokfusaka, ekomo ekomo w’oyakaka. (Mar. 3:21, 22; 14: 55; 15:16-20, 35-37) Koko, Yeso akfulumeyɛka akambo ankfumɔ wa lɛngɛyɛ wasɔ la ankina ipa la nsɔmbɔla. Owaso olakanyelo wɔkɔnge má ndjɔmbɔmba kɛnde?

10. Yeso ndakfulumeyɛ lɛngɛyɛ ngete mo? (1 Pɛtɛlɔ 2:21-23)

¹⁰ Wala 1 Pɛtɛlɔ 2:​21-23. a Yeso atshikaka ndjɔmbɔmba kɛ djɔ kɛ nkilika winá w’okfulumeyɛso lɛngɛyɛ. Nde ewaki winá wɔ mvumba la wɔ ntepela. (Mat. 26:62-64) Nde atakadjimolaki lá akambo w’engolo wa yowandaka. (Mat. 11:19) Winá wɔ ndatepelaka, nde atatolaki kana atanaki anto wɔnyɔkɔlaki. Yeso ayalaki la ndákota ladjikɛnde ‘alapɛyɛka le Kanga lolomboyɛ la sii.’ Yeso ewaki ante wopo w’elolaso wolekɔ la ntshina le Yehova. Nde ilelaki Yehova oloko ante angoshiyɛ akambo wa lɛngɛyɛ lá winá wɛdje.

11. Wepo ɛmɔtshi wɛkɔnge w’okokaso ndenda kɛnɛ k’otepelaso? (Lenda edjinge asango.)

¹¹ Tokoka ndjokola Yeso má nshishima kɛnɛ k’otepelaso winá w’ɔtɛngɛyɛwɔ. Tokoka nyimɛ yimba má tokakambo tɔ tɛkɛtɛkɛ tɔ lɛngɛyɛ totonanghelawɔ. Kana tokoka mvumba dj’ipa ndotepela ekete kekoka ndetedjɛ nkambo. (Los. 3:7; Dja. 1:19,  20) Winá ɛmɔtshi, iso ladjɛ ntepela winá w’ɔtɛngɛyɛwɔ kana w’oyɛso ladjɛ nseela akambo wa nsɔsɔlɔ. (Ele. 6:1, 2) Ntsha totepela, iso ladjɛ nangha la wolo djɛ ntepela ɔkɔkɛ ole la dilɛmɛlɔ.—1 Pɛ. 3:15. b

12. Wopo wɔkɔnge w’okokaso ndátshika le ‘Kanga lolomboyɛ la sii’?

¹² Tokoka ndjokola Yeso má ndátshika le ‘Kanga lolomboyɛ la sii.’ Winá w’otonanghelawɔ akambo wa lɛngɛyɛ la w’isɔnɔdji, iso ndjilelaka Yehova oloko ente nde ewa nsɔsɔlɔ. Eshikikelo kɛ nghɔsɔ nkoka ntokotshɛ́ djɛ nkfulumeyɛ lɛngɛyɛ ladjikɛnde, tewa ente ekomo ekomo Yehova angosembola akambo. Má ntshika akambo le Yehova, topapɛyɛ nkɛlɛ la onkomba mbamba kɛ nkonama l’eloko wɛso. Mbomba nkɛlɛ la onkomba nkoka ntotshinda djɛ nsɔmbɔla, mpɔdjɛ osasa wɔso la ntshita djokanelo djɛso la Yehova.—Yee. 37:8.

13. Kɛkɔnge kekoka ntokotshɛ́ djɛ nkfulumeyɛ lɛngɛyɛ la bale ntshitshi?

¹³ Lá nsɔsɔlɔ, topakoke nkilika ndjɔmbɔmba kɛ Yeso lá lɛdji lɔ djɔ. Winá ɛmɔtshi, tokoka nangha kana ntepela nkambo dj’okokaso ndokiyana. (Dja. 3:2) La koko, anto amɔtshi nkoka ntonanghela akambo wakoka ntotshika la nkɔmɔ, l’ampota lá yimba yɛ sopakoke nkfulumeyɛ. Ntsha nkambo djɛ nghɔsɔ mbokokomela, yashikikɛ ente Yehova ndjewaka kɛnɛ kelekɔ́ la wɛ. Kaanga Yeso, kanga lokfulumeyisá lɛngɛyɛ, akoka ndjoka wopo w’okɛ. (Heb. 4:15, 16) Má djiko djɛ ntɔpɛyɛ ndjɔmbɔmba kɛ djɔ kɛ Yeso, Yehova atɔpɛyɛ alako wa djɔ wakoka ntokotshɛ́ djɛ nkfulumeyɛ. Tokolenda avɛrse ape w’onkanda w’Ɔrɔma wakoka ntokotshɛ́.

‘NYOTSHIKELE NKƐLƐ KƐ NDJAMBE EDJENA’

14. ‘Nyotshikele nkɛlɛ kɛ Ndjambe edjena,’ osakisolawɔ nge? (Ɔrɔma 12:19)

¹⁴ Wala Ɔrɔma 12:19. Ɔpɔstɔlɔ Poolo akembɛka Akristo djɛ ‘ntshikela nkɛlɛ kɛ Ndjambe edjena.’ Iso ntshikelaka Yehova edjena má ndotshika djɛ ndomboyɛ la sii lá winá la wopo wɔkɔpande. M’ɔkɔngɔ wɔ ndɔɔwɛngɛyɛ, wɔnanyɔ John atepela ante: “Nanaki l’ikanyi yɛ ndɔngɔsɔla nkambo djɛ nyɛtshi djɛsɔ lá wopo wɔmi. Ɔrɔma 12:19 ankotshɛ́ka djɛ nkonga Yehova.”

15. Lamo oyɛwɔ wɔlɔ ntshikela Yehova edjena djɛ nsembola nkambo?

¹⁵ Tongowake wapɔ efula winá w’okongaso djɛ Yehova nsembola akambo. Ntsha tombonangha nghɔsɔ, tongolawomba dj’ipa mbɛmba odjito wɔ yɛnyi la nkɛlɛ má nsɛsa nkandola nkambo isɔmɛlɛ. Yehova nkɔpaka ntokotshɛ́. Ngo ngete otepelande nde ante: ‘Nyotshike akambo wa lɛngɛyɛ le lemi; lemi mɔmɛlɛ loshiyɛ.’ Ntsha tombawola daka djɛ Yehova djɛnɛ: ‘Lemi ndeke lɔngɔsɔmbɔla,’ tokoka ntshika akambo l’akatshi wande l’eshikikelo ente nde angokandola lá yopo yeleka wɔlɔ. Kɛsɔ ndeke lokotshisá John, kaanga sotepelaki. Nde atepela ante, “Ntsha lambotshikela Yehova, angokandola lá lɛdji loleka wɔlɔ.”

‘KINDJƐ NDONGA AKAMBO WA NYƐTSHI MÁ NANGHA WƆLƆ’

16-17. Wopo wɔkɔnge lɔlɔmbɔ otokotshɛ́wɔ djɛ ‘nkindjɛ ndonga akambo wa nyɛtshi má nangha wɔlɔ’? (Ɔrɔma 12:21)

¹⁶ Wala Ɔrɔma 12:21. Poolo akembɛka Akristo djɛ ‘nkindjɛ ndonga akambo wa nyɛtshi má nangha wɔlɔ.’ Yeso atepelaka lá Djamba djɛ l’Onkókó ante: ‘Nyokindjɛ nkɔpa antonyi wanyo edjinge nyokindjɛ  ndɔmbɛla anto wanyɔnyɔkɔla.’ (Mat. 5:44) Nde ananghaka ngo nghɔsɔ. Tokokanela ndjolo yɛ Yeso ndakfulumeyɛ winá wɔ angala w’Ɔrɔma yɔkɔkɔmɛ l’otamba. Má bango tokoka nkanela ngo ndjolo la nsɔnyi kɛ ndoke la lɔnyɔkɔ lɔ ndakfulumeyɛ.

¹⁷ Yeso atatshika djɛ akambo wa lɛngɛyɛ wasɔ ndoolonga. L’edjena kɛ ndɔka angala, nde alɔmbaka ante: ‘Papa, imeyɛwɔ ladjikɛnde wapewe kɛnɛ k’onanghawɔ.’ (Luka 23:34) Winá w’ɔlɔmbɛlaso anto watɔnyɔkɔla, tokoka nkitshakitshɛ yɛnyi la nkɛlɛ, kaanga ntshikitanyɛ wopo w’ɔsaso anto wakɔ.

18. Wopo wɔkɔnge lɔlɔmbɔ yakotshɛ́ Alberto nya John djɛ nkfulumeyɛ lɛngɛyɛ?

¹⁸ Lɔlɔmbɔ lokotshɛ́ka wananyɔ ape wa sotepelisa lá djamba djɛnɛ djɛ nkfulumeyɛ akambo wa lɛngɛyɛ wa yapomana. Alberto atepela ante: “Ndɔmbɛlaka wananyɔ wandjɛngɛyisá. Ndɔmbaka Yehova mbala efula djɛ nde nkotshɛ́ lemi djɛ ndjila nkambo djenkomelisá l’ɔkɔngɔ.” Nkambo dj’osasa nde, Alberto akambela Yehova la nkɔmano. John atepela ante: “Ndɔmbɛlaka wɔnanyɔ wonkiyanyisá mbala efula, ndɔmbɔ yɛsɔ inkotshɛ́ka djɛ ndjala l’ikanyi yɛ wɔlɔ le nde ipa ndoolomboyɛ. La impɛyɛka lonkina vu djɛ yimba.”

19. Oyɛso ladjɛ nangha nge tii l’ekomo kɛ nkfumbo dj’akambo djɛnɛ? (1 Pɛtɛlɔ 3:8, 9)

¹⁹ Topewe akambo wa lɛngɛyɛ wa ngete mo songopomana lá ntondo kɛ nkfumbo dj’akambo djɛnɛ. Kaanga ntsha tomboponama l’akambo wasɔ, totatshikake ndɔmba okotshɔ wɔ Yehova. Lonkina, tokole wopo wɔ Yeso ndelola lá lɛngɛyɛ la tokindjɛ nkamba la tɔkfɔ tɔ Bible. Ntsha tombonangha nghɔsɔ, tokoka ndjala l’eshikikelo ente tongokita esako wɛ Yehova.—Wala 1 Pɛtɛlɔ 3:​8, 9.