Mbotshɔka lá 1934, ambotshi wami oyɛwɔ nde ase Suisse wasɛkwisá tá Timmins, ngando kɛmɔtshi kɛ Ontario kelekɔ́ la mpaonyi efula. Tá 1939, nyɛnghɛmi awangaka mbala journalɛ dj’Etange k’Olami la ndjingela lá nsanghanyɛ y’Ewakɛ wɛ Yehova. Nde antɔlaki lemi, amama yɛmi ipe la wakfune wami anɛyi. Atayala ilá, akomaka Owakɛ wɔ Yehova.

Papa kɛmi atasasanga la nkano djɛnde, koko mama akɔpaka nsɔsɔlɔ efula ole ɔsaka nkano dj’ipa nyima m’eteyi. Nde ananghaka nghɔsɔ kaanga má bango djɛ ɔnɔnyi wɔ 1940, winá wɔ yashimbe olemo w’Ewakɛ wɛ Yehova lá Canada. Nde ananghelaki Papa winá enkfumɔ akambo wa wɔlɔ ole la ngandji, kaanga ndoposeyɛka etepela wɛ nyɛtshi la ndosolaka ampɔsɔ. Ndjɔmbɔmba kɛnde kɛ wɔlɔ kenkotshɛka lemi, amama la wakfune wami djɛ nkambela Yehova. Mpeyi nde, eyalelo kɛ papa kekitakitaka edjinge awangaka nanghela nkfumbo kɛso akambo la ngandji.

Lá ɔhɔ wɔ 1950, ndjingelaka lá losanghanyɛ l’ekekete lɔ teokrasi lá New York City. Ndjalaka la mposɛ kɛ nangha akambo efula l’olemo wɔ Yehova m’ɔkɔngɔ wɔ mpomana la wananyɔ la ankaana wimá atshuku ankfumɔ wa looko, la m’ɔkɔngɔ wɔ ndjekameyɛ waasiyisá má Nkalasa kɛ Ngaladɛ! Ndɔsaka nkano djɛ wolo efula djɛ ndjingela l’olemo wɔ winá enkfumɔ. Ngo makalɔ lá mbandja, ndodjɛka fɔrmilɛrɛ djɛ ndjala yat’ekalo yɛ lotshinda. Filiyalɛ kɛ Canada kenkadjimolaka, wanyɛnyɛka ambɔ ngo lemi ndongola batisimo ntondo. Manyi ndongolaka Ngɔndɔ kɛ djomi 1, 1950. M’ɔkɔngɔ wɔ ngɔndɔ kɛmɔ, nkomaka yat’ekalo yɛ lotshinda ko idjena yɛ ntondo yɛ yantome nde tá Kapuskasing. Ngando kɛsɔ kayalaki otale efula la idjena yɛ mintasɛka l’etsho wɛsɔ.

 Lá okoko wɔ 1951, biro djɛ filiyalɛ djɛlɔmbaka Ewakɛ wetepelaki Falase djɛ ndenda ntsha wakoka nsɛkɔ tá prɔvɛnsɛ kɛ Quebec ketepelaka Falase. Djonyi djayalaki efula l’eteyi. Lemi ntepelaki Falase la anglɛ ko ndjawolaka leeta, manyi wantomaka tá Rouyn. Ntewaki onto l’eteyi. Mewaka ngo edjena kɛ ntoyala, ete ngo mɔkɔndɔlisá má djiko. Koko akambo wahetaka ngo wɔlɔ. Isa Marcel tokomaka tolongo tɔ wɔlɔ efula, edjinge tosasangaki l’olemo lá Quebec l’ila k’ɛnɔnyi ɛnɛyi wɛlɔndisá, ekomo ekomo nkomaka yat’ekalo itshikitanyi.

Winá wɔ makome lá Quebec, ndjalaka l’osasa efula má leeta lɔ mawa djɛ ntingela lá nkalasa kɛ 26 kɛ Ngaladɛ, lá South Lansing, lá New York. Watɔpɛyɛka apɔlɔmɛ Ngɔndɔ k’ape 12, 1956, ko wantomaka tá owila w’etawɔ winá wɔsɔ ambɔ Ghana, b lá owɛstɛ wɔ Afrique. Koko lá ntondo kɛ ntshɔ, ndjalaka la djɛ nkalɔ tá Canada “l’ilá kɛ mbengo imangha” tii monghowa enkanda wɛmi wɛ lɔkɛndɔ.

Nkongaka enkanda wɛsɔ l’ila kɛ ngɔndɔ esambele lá Toronto. Lá etsho wɛsɔ, nkfumbo kɛ Cripps ndeke londongolisá, ko ndjɛka ndewana la Sheila, wɔnawɔ w’omoto. Tɔkɔpanaka. Winá wɔ makɔpɛ ndowopola dj’iso ntshukana, enkanda wɛmi wɛ lɔkɛndɔ yomboyɛ. Lemi isa Sheila tɔlɔmbaka la tɔsaka nkano ente lemi ladjɛ ntshɔ tá idjena yɛ yantome. Koko takindjɛki mfunelana enkanda djɛ ndenda ntsha tokoka ndotshukana l’etsho weyaye. Ɔsɔ atayala nkano djɛ wɔdju ndɔsa, koko toyɛka ndɛna ente ayalaka nkano djɛ wɔlɔ efula.

M’ɔkɔngɔ wɔ nangha lɔkɛndɔ lɔ ngɔndɔ kɛmɔ, lá wasuwa la lá aviyɔ, nkomaka lá Accra, lá Ghana. L’eteyi wansɔnaka ete ngo olami wɔ distrikɛ. Kɛsɔ nsakisolaka mpeeta lá Ghana, lá Côte d’Ivoire la lá Togo. Mbala efula laheetaki mɔmɛlɛ l’otuka wɔ filiyalɛ yampɛyɛ. Lasasangaki la minitɛ kenkfumɔ kɛ winá wɛsɔ!

Lobengo lonkfumɔ layalaki l’edjito lá losanghanyɛ l’edjingadjinga. Totayalaki la Mvulu kɛ  Losanghanyɛ l’Ekekete. Ko wananyɔ wapikaki etshumba la ɛlɛngɛ mputu, wadjipaki wanga djɛ mba ntshitshi. Ladjikɛnde totayalaki la frigo lá kafɛtaria, walamaki anyama iwika djɛ ndayaka ngo ntsha wamboyala la djonyi djɛ ndesɛ anto wingelaki lá Losanghanyɛ l’Ekekete.

Akambo amɔtshi w’atɔla wahetaki lá nsanghanyɛ yɛ nkekete yɛsɔ. Mbala kɛmɔtshi winá wɔ Herb Jennings, c winami misiɔnɛrɛ, ndapɛyɛka djamba, ngɔmbɛ k’opaka ɛkɔdji má kafɛtaria. Ketalotaki l’antenyɛ estradɛ la ambeto y’anto yintasɛka. Herb emɛka djamba ko nyama ketewa lonkina idjena yɛ ndota. Koko wananyɔ anɛyi wa nkfulu w’ovundaka ko wokawoyɛka tá kafɛtaria, ko anto wapomaka ankasa lako wopo.

L’anteyi kɛ lobengo, lawɛnyɛki filmɛ kɛso La société du Monde Nouveau en action lá mbandja itosukanaki. Nkowaki mpɛma kɛ mpɛmbɛ, l’antenyɛ etamba kana akondji ape ko tɛnyɛki filmɛ l’eteyi. Ase mbandja wakɔpaki efula! Le anto efula, ayalaka mbala kɛ ntondo k’iwɔ nyɛna video. Wapomaki ankasa wa wolo efula winá wɔ yɛnaka anto walongola batisimo. Filmɛ kɛsɔ kekotshɛ́ka waalendaki dj’iwɔ nyɛna nsɔsɔlɔ ambɔ tolekɔ olonghanyelo w’andja w’otondo wolekɔ́ l’osanga.

M’ɔkɔngɔ w’ɛnɔnyi epe lá Afrique, ndjalaka l’osasa efula wɔ ntingela lá losanghanyɛ l’ekekete l’andja w’otondo lá 1958 lá New York City. Ndjalaka l’osasa efula wɔ mpomana la Sheila, kanga loyisá má Quebec, lá ndakambaka ete ngo yat’ekalo yetshikitanyi. Tasawolaki má enkanda, koko winá wɔsɔ tɔmɛnana lonkina, ndowopolaka dj’iso ntshukana ko nde awolaka. Mfunelaka Wɔnanyɔ Knorr d djɛ ndowopola ntsha Sheila akoka ndjingela nkalasa kɛ Ngaladɛ ko nkilika lemi lá Afrique. Nde awolaka. Ekomo ekomo, Sheila akomaka lá Ghana. Totshukanaka lá Accra, Ngɔndɔ kɛ djomi 3, 1959. Tɛnaka ente Yehova nsɔsɔlɔ atosakolaka má wopo wɔ sowilaka lá edjena kɛ ntondo.

Lá 1961 watotomaka tá Cameroun. Wandɔmbaka djɛ nkfumba filiyalɛ kɛ bango, layalaki l’elemo efula. Ete ngo mayalaka ose kɔmite kɛ filiyalɛ kɛ bango, layalaki la akambo efula wa ndjeka. Manyi lá 1965 tewaka ente Sheila alekɔ la djemi. Nsuyɛ ente tɔsaka winá efula djɛ ndjawola ente tɔkɔpa  nkoma ambotshi. Koko ngo isasasangaka la losango lɔ odjito wɔ bango wɔ sombowa wɔsɔ, la isɔsaka nonghanyi kɛ nkalɔ tá Canada, djoyi djɛ yɛnyi efula ntokomelaka.

Djemi djɛ Sheila vukɔka. Doktɛrɛ atoshimelaka ante yayale nde wɔna mpame. Nkambo djɛsɔ mboheta ɛnɔnyi 50, koko topavungɛka. Kaanga isayale la yɛnyi má nkambo djɛsɔ, totshikalaka lá olemo wɔso lá owila wɔ angangɛnda wɔ sakɔpaka efula.

Lá Cameroun wananyɔ wanyɔkɔlamaki efula m’ɔtɛ wɔ yasambaka ndɔsa opiko lá wayi wa pɔlitikɛ. Lɔnyɔkɔ lɔsɔ letelaka efula pekapeka lá winá wɔ vɔtɛ djɛ prezida. Wɔma wɔso wetelaka lá ngɔndɔ k’atano 13, 1970, winá wɔ sewe ente ewandji wɛ lɛɛta wambotona Ewakɛ wɛ Yehova. Iwɔ watopapolaka amvulu yɛ filiyalɛ, yɛ bango la yɛ wɔlɔ yɛ sasɛkɔ l’eteyi la yɛ sananghe l’eteyi ngo ngɔndɔ itano toko. Lá lobengo lɔmɔ wakilikaka misiɔnɛrɛ kenkfumɔ má owila, ndjila ole Sheila la lemi. Ayalaka wolo efula ntshika wananyɔ l’ankaana ladjikɛnde takɔpaki lombombe la takiyanaki lá wopo wɔ yongopikama lá kɛnɛ kakongaki.

Tohetshɛka ngɔndɔ isamalo ilɔndisá lá filiyalɛ kɛ France. Nkindjɛki nangha l’eteyi kenkfumɔ kɛ makokaka nangha djɛ nshiyɛ ehomba wɛ wananyɔ wa Cameroun. Lá ngɔndɔ kɛ djomi l’ape k’ɔnɔnyi wɔkɔ, watotomaka tá filiyalɛ kɛ Nigéria kewangaki nshiyɛ ehomba wɛ wananyɔ wa Cameroun. Wananyɔ l’ankaana welá filiyalɛ kɛ Nigéria watolongolaka l’osasango onkfumɔ, ole tosasangaka nkamba l’eteyi l’ilá k’ɛnɔnyi efula.

Toyalaka ladjɛ ndɔsa nkano djɛ wolo efula lá 1973. Sheila ayalaka l’elando wɛ wolo efula. Winá wɔ sayalaka lá losanghanyɛ lɔ rɛjɔ lá New York, nde atakoka nkfulumeyɛ lonkina ko anshimelaka ante: “Lemi mpangotshɔ lonkina! Lambɔtɛka la ndekɔ l’elando wɛ wolo efula winá wɔsɔ.” Nde akambaka la lemi lá owɛstɛ w’Afrique l’ilá k’ɛnɔnyi 14. Ndjalaki la ofuno efula lá nkambo djɛ olemo wɔnde wɔ nkɔmano, koko toyalaka ladjɛ nangha etshikitano ɛmɔtshi. M’ɔkɔngɔ w’iso nsawola akambo wasɔ la ndɔmba l’entete, tɔsaka nkano djɛ nkalɔ tá Canada, lá ndakoke ntɔsa bɔki djɛ wɔlɔ. Nyima misiɔnɛrɛ la m’olemo wɔ winá enkfumɔ, ayalaka nkano djɛ wolo la djɛ yɛnyi efula isɔsi.

M’ɔkɔngɔ wɔ nkalɔ lá Canada, mbaka olemo lá sosiete kɛ ilongo yɛmi imɔtshi yɛ ntondo isadjɛki etuka lá nɔrɔ kɛ Toronto. Tofutelaka mvulu, tosombaka nkete mbokotama ntondo, la toyalaka l’akoka wa nsɛkɔ ipa ndjingela awasa. Takɔpaki ndjala la lowiko longhanghunya má nkongela ente winá ɔmɔtshi tokoka nkalɔ l’olemo wɔ winá enkfumɔ. Atayala ilá, tokamɔka efula winá wɔ nkongi djɛso yakotshama lá winá wɔ sotakanelaki.

Mbangaka nkamba ete ngo onto wolapɛyɛ l’ɛkɔpa lofu lɔ mpɔsɔ lonkfumɔ lá opikelo wɔ Mvulu kɛ Nsanghanyɛ yɛ Nkekete lá Norval, lá Ontario. Lá etsho wɛsɔ, wandɔmbaka djɛ nkamba ete ngo olami wɔ Mvulu kɛ Nsanghanyɛ yɛ Nkekete. Sheila okaka ndambo wɔlɔ ko akokaki nkotshɛ odjito wɔ bango wɔsɔ. Ko manyi tɔsɛkɔka tá mvulu kɛ yatɔpɛyɛ lá Mvulu kɛ Nsanghanyɛ yɛ  Nkekete, lá Ngɔndɔ k’asamalo 1974. Toyalaka l’osasa efula wɔ nkalɔ l’olemo wɔ winá enkfumɔ!

Mpeyi nde, Sheila akindjɛka ndjoka wɔlɔ. M’ɔkɔngɔ w’ɛnɔnyi epe, tawolaka odjito w’olami w’edjingadjinga. Edjingadjinga kɛsɔ kayalaki lá Manitoba, prɔvɛnsɛ kɛ Canada kɛ ntshitshi efula. L’eteyi tayalaki la djokanelo djɛ wɔlɔ efula la wananyɔ l’ankaana. Towaka olakanyelo ente ape idjena ndeke lolekɔ́ djonyi, koko nkindjɛ nkambela Yehova ayale idjena yɛkɔnge y’oyɛso ndeke lolekɔ́ djonyi.

M’ɔkɔngɔ wɔ nkamba lá olemo w’edjingadjinga l’ilá k’ɛnɔnyi efula, watetaka lá 1978 djɛ ntokamba lá Betɛlɛ djɛ Canada. Lako ndjala ilá, mbaka olakanyelo wɔ yɛnyi, koko wɔ djonyi efula. Mbaka odjito wɔ mpɛyɛ djamba djɛ winá ɔmɔ wɔ ntango l’etenyi lá Falase lá losanghanyɛ lɔmɔtshi l’otshikitanyi lá Montreal. Yɛnyi nde, anto watila yimba efula lá djamba djɛmi ko wɔnanyɔ ɔmɔtshi w’okambaki lá Departɛma djɛ Olemo ampɛyɛka dako. Lá nsɔsɔlɔ, lá winá wɔsɔ, ntewaki ente mpalekɔ ntɛndji kɛ mɛlɛmɛlɛ ete ngo momosipisoyɛ winá wɔsɔ. Koko lemi ntɔsa dako djɛsɔ lá wopo wɔ wɔlɔ. Lemi lande totasawola lá lɛdji lɔ wɔlɔ, ko nyɛnaka ente ɔkɔpande ngo nangha lemi koko ape mpɛyɛ dako. Lemi nanghaka ovunga wɔ mpika wiso lá wopo wɔ ndampɛyɛ dako la wopo w’onto wɔmpɛyisá dako.

M’ɔkɔngɔ w’etsho emangha, ose kɔmite kɛ filiyalɛ ɔmɔtshi anshimelaka nkambo djɛkɔ. Nsuyɛka ente ntelola wɔlɔ lá dako ole ndɔlɔmbaka imeyelo. Manyi nsawolaka la wɔnanyɔ w’ondakisá, la nde awolaka imeyelo kɛmi. Nkambo djɛsɔ mbokomá olakanyelo w’ekekete efula w’okitshakitshɛ wɔ mopakoke mvungɛ lotshinda. (Woo. 16:18) Ndɔmbaka Yehova mbala efula lá nkambo djɛsɔ ole lambɔsá nkano dj’ipa ndjelola nyɛtshi winá w’ɔmpɛyɛwɔ dako.

Winá wɔsɔ lamonangha ɛnɔnyi 40 lá Betɛlɛ djɛ Canada, la ngo má 1985, nkamba ete ngo ose Kɔmite kɛ Filiyalɛ. Wadjɛmi wɔ ngandji Sheila, etamaka lá nyɔyi Ngɔndɔ k’ape 2021. Lá djiko djɛ nkfulumeyɛ yɛnyi yɛ nyɔyi kɛnde, nkfulumeyɛ lonkina elando wɛmi. Koko ndekɔ l’akambo efula wa nangha lá olemo wɔ Yehova, la ndekɔ l’osasa ndaka mpɔnda, djɛko ndeke ndekɔ ‘l’okakasano wɔ nyɛna wopo wɔ mfu yotahete.’ (Los. 5:20) Kaanga lowiko lɔmi oyɛwɔ l’ekakasano, ndekɔ l’osasa woleká ekakasano. Ndjila Yehova l’edjena kɛ ntondo lá lowiko lɔmi la nsasanga la ɛnɔnyi 70 l’olemo wɔ winá enkfumɔ, alekɔ lofuto lɔ nsɔsɔlɔ efula. Langɔlɔmbake lá nkambo djɛ wananyɔ l’ankaana w’elangala l’eseka djɛ nkindjɛ mpetshɛ Yehova l’edjena kɛ ntondo, mande ndekɔ l’eshikikelo ente ole iwɔ wangowa lowiko l’osasa la lokfudji loyɛka má nkambela Yehova.