1-2. Kɛkɔnge kɛpɛyɛka enkambi wɛ Ndjambe osasa? (Djakɔbɔ 1:​22-25)

 YEHOVA nya wɔnande wɔ ngandji nkɔpaka dj’iso ndjala l’osasa. Omfunyi wɔ Yeembo 119:2 atepela ante: ‘Osasa le anto walɛmɛyɛ mvungo yɛnde, wanɛ w’ohona l’oloko onkfumɔ.’ Yeso apɛyɛka eshikikelo kenkina ante: ‘Osasa le anto woka otepela wɔ Ndjambe la walɛmɛyɛ!’—Luka 11:28.

² Ete ngo oyɛso antɛmɔdji wa Yehova, tolekɔ anto w’osasa. Lamo? Mande tolekɔ la donga efula, koko elonga kɛ djonyi efula nde towala Otepela wɔ Ndjambe mbala la mbala la tonangha la wolo djɛ nkamba la kɛnɛ k’owalaso.—Wala Djakɔbɔ 1:​22-25.

3. Wapɔ wakɔnge sowaka winá w’okambaso la kɛnɛ k’owalaso m’Otepela wɔ Ndjambe?

³ Tongowake wapɔ má topo efula winá ‘w’oyalaso ananghi y’otepela.’ Ekete kɛ ntondo nde, tewa ente ɔnɛ alekɔ djina djɛ ntondo dj’otapolaso djɛ nsasangɛ Yehova. Ndjewa nghɔsɔ ntɔpɛyɛka osasa. (Los. 12:13) Winá w’okambaso la kɛnɛ k’owalaso má Otepela wɔ Ndjambe w’ofunamisá má nyuma k’ekina, tɔngɔlɔngɔsɔla lowiko lɔso lɔ nkfumbo la tongokembɛ djokanelo djɛso la winaso andjawodji. Nkambo djɛsɔ nkoka ndjala nsɔsɔlɔ lá lowiko lɔko. Lonkina, tongewɔke akambo wakomelaka anto wapalɛmɛyɛ ɛlɛmbɛ wɛ Yehova. Lá nsɔsɔlɔ, tosanga ikanyi la Nkfumi Davidɛ. M’ɔkɔngɔ wɔ nde ntepela djɛ ɛlɛmbɛ, akano la alombo wa Yehova, nde atepelaka l’ekomo ante: ‘Kanga lolama, mbaka lofuto l’ekekete.’—Yee. 19:​7-11.

4. Lamo oyɛwɔ wolo ndjala onanghi w’Otepela wɔ Ndjambe?

 ⁴ Lá nsɔsɔlɔ, apayalaka winá enkfumɔ wɔdju ndjala ananghi y’Otepela wɔ Ndjambe. Kaanga oyɛso l’elemo efula, iso ladjɛ mpona winá wɔ mbala la ndjeka Bible djɛ ndjewa kɛnɛ kɛ Yehova okombolande iso nangha. Tokolenda alako amɔtshi wangotokotshɛ́ djɛ mbala Bible mbala la mbala. Tongoshishima lonkina wayi wangotokotshɛ́ djɛ ntɔnɔla lá kɛnɛ k’ekaso la tɔnghɛna topo t’okokaso nkamba la kɛnɛ k’ekekaso lá mbiko yɛso.

TƆSHI WINÁ WƆ MBALA OTEPELA WƆ NDJAMBE

5. Elemo wɛkɔnge w’ɛtɔsɛlaka winá efula?

⁵ Enkambi wɛ Yehova efula walekɔ l’elemo wɛ nangha. Tongohetshɛke winá efula djɛ nkotshɛ edjito wɛtɔpɛyɛ Afunelo. Ndjɔmbɔmba, efula l’anteyi kɛso wangokambake elemo djɛ nshiyɛ ehomba wɛso ngole w‘ankfumbo yɛso. (1 Ti. 5:8) Akristo efula wangokotshɛ́ke boto djɛwɔ mbotshunda kana dekɔ́ l’elando. Ole isankfumɔ tolekɔ la djonyi djɛ ndɔsa bɔki, ko kɛsɔ ndɔsaka winá efula. Lá djiko dj’elemo wɛsɔ, tolekɔ l’edjito enkina l’otshumano. Odjito onkina wɔ djonyi nde ndɔsa opiko l’olemo w’ipoposanyɛ. Lá elemo enkfumɔ w’onanghɛ wɛsɔ, wopo wɔkɔnge w’okokɛ mba winá wɔ mbala Bible lofu la lofu, ntɔnɔla la nkamba la kɛnɛ k’owalɛ?

6. Wopo wɔkɔnge w’okokɛ mpetshɛ badji djɛ Bible l’edjena kɛ ntondo? (Lenda edjinge ntshango.)

⁶ Badji djɛ Bible dekɔ ‘nkambo deka djonyi’ leso Akristo, djɛko ndeke iso ladjɛ ndohetshɛ l’edjena kɛ ntondo. (Flp. 1:10) Yeembo yɛ ntondo itepela nghɔnɛ lá nkambo djɛ onto w’osasa: ‘Nde nsasangaka l’ɛlɛmbɛ wɛ Yehova, la nde mbalaka ɛlɛmbɛ wɛnde la djoyi dj’ɔkɔkɛ otsho mbile.’ (Yee. 1:​1, 2) Kɛsɔ kesakisola papoo ente iso ladjɛ ndɔsa winá wɔ mbalaka. Winá wɔkɔnge wolekɔ́ wɔlɔ mbala Bible? Onto l’onto nkoka ndjala l’ekadjimwelo kɛnde. Koko tewe ente, kɛnɛ keleka djonyi nde ndɔsa winá wɔ mbala mfu inkfumɔ. Wɔnanyɔ Victor atepela ante: “Lemi nkɔpaka mbala Bible lá nkɛsɛ. Kaanga mopalekaka mbetshɔ nkɛsɛ dj’efula, akambo wɛkɔla  yimba wapalekaka ndjala. Yimba yɛmi ipayalaka odjito la langoyapɛyɛke efula.” Nkambo djɛsɔ dekɔ nsɔsɔlɔ le wɛ? Koyawopola ante: ‘Winá wɔkɔnge woleka wɔlɔ mbala Bible le lemi?’

TƆNƆLA LÁ KƐNƐ K’OWALƐ

7-8. Kɛkɔnge kepatɔpɛyɛka mbamba kɛ mba wapɔ má kɛnɛ k’owalaso? Pɛyɛ ndjɔmbɔmba.

⁷ Nkambo djɛ nsɔsɔlɔ nde, tongowalake akambo efula mbala kɛmɔ ipa nkota. Ombowalaka ekete kɛmɔtshi ko winá emangha m’ɔkɔngɔ opovungɔka? Nkambo djɛsɔ mbotokomela isankfumɔ. Yɛnyi nde, akoka ndjala kaanga lá badji djɛ Bible. Mbala imɔtshi tombolawilela okoma wɔ mbala shapitrɛ imɔtshi yɛ Bible lofu lonkfumɔ. Ɔsɔ alekɔ nkambo djɛ wɔlɔ. Iso ladjɛ ndáwilela ekoma ole nangha la wolo djɛ nkotshɛ. (1 Kɔ. 9:26) Koko, badji djɛ Bible oyɛwɔ ngo ewangelo, ngo ewangelo toko, koko kɛ wɔlɔ efula. Iso ladjɛ nangha akambo efula ntsha tokombola mba wapɔ má badji dj’Otepela wɔ Ndjambe.

⁸ Tɔkɔsa ndjɔmbɔmba: Nkete dj’okonaso ndjalaka la djonyi djɛ washi dj’iwɔ mɔngha. Koko ntsha amvula yɛ nkekete efula imbɔtɔnga, looko lokoka nkoma washi washi. Ntsha nghɔsɔ, mbɔ koko amvula y’efula lako wɔlɔ. Mande angɔlɔmbama winá efula djɛ washi nyoma djɛ nkete ndjala la lowiko. Lá wopo wɔkɔ ɔmɔ, iso ladjɛ ndjewɔ ntanga nkete efula mbala kɛmɔ, ntepela ente, mbala lankeke lankeke dj’ipa ndoyala l’okakasano wɔ nkota, mvungɔ ole nkamba la kɛnɛ kɛ sombowala.—Dja. 1:24.

9. Kɛkɔnge k’oyɛ ladjɛ nangha ntsha olekɔ l’ekfumbo kɛ mbala Bible lankeke lankeke?

⁹ Ovungɔ mbala kɛmɔtshi kɛ ngawale Bible lankeke lankeke? Kɛkɔnge k’oyɛ ladjɛ nangha? Wala ɔkɔkɛ. Nangha la wolo djɛ ntɔnɔla lá kɛnɛ k’owalɛ kana kɛ ngombowala. Nangha nghɔsɔ nkoka ndjala wolo. Ntsha ɛna ente dako dj’ɔpɛyɛwɔ djɛ ntɔnɔla ndeke ngonanghaka, ɔnghɛna ente alekɔ wɔdju efula ntɔnɔla lá kɛnɛ k’owalɛ. Ntsha nghɔsɔ, okoka ntaloyɛ winá wɔko wɔ wekelo djɛ ndjeka kana ntɔnɔla. L’onkoko onkina, okoka nsɔna djɛ mbala ngo avɛrse amangha toko, ko ndɔsa  winá w’otshikala djɛ ntɔnɔla. Victor, kanga sotepelaki atepela ante: “Mpalekaka mbala akambo efula, winá ɛmɔtshi ngo shapitrɛ kɛmɔ. Ladjikɛnde langowalake lá nkɛsɛ, nkoka ntɔnɔla lofu l’otondo lá kɛnɛ kɛ mowalaki.” Ayale winá kana wopo wɔkɔnge w’owalɛ, wala kɛnɛ kelekɔ́ djonyi kengokokotshɛ́ djɛ mba wapɔ.—Yee. 119:97; lenda ipapango “ Weepó wɛ nshishima.”

10. Pɛyɛ ndjɔmbɔmba kɛnyɛ wopo wɔ nkamba la kɛnɛ k’ekɛ. (1 Tesalɔnikɛ 5:​17, 18)

¹⁰ Ayale winá wɔkɔnge w’owalɛ Bible la winá emangha owalɛ, yashikikɛ djɛ mpona topo tɔ nkamba la kɛnɛ k’owalɛ. Winá w’owalɛ avɛrse amɔtshi w’Otepela wɔ Ndjambe, lokawopole ente: ‘Wopo wɔkɔnge w’okokami nkamba l’alako wasɔ winá wɔsɔ kana l’etsho weyaye?’ Ndjɔmbɔmba, badji djɛko djɛ Bible oyɛwɔ nde lá 1 Tesalɔnikɛ 5:​17, 18. (Wala.) M’ɔkɔngɔ wɔ mbala avɛrse ape wanɛ, okoka nyemɛ, ko ntɔnɔla mbala imangha ngɔlɔmbaka, la ntsha ɔngɔlɔmbake m’anse k’oloko. Okoka lonkina ntɔnɔla l’akambo w’oyɛ la djedjɛ. Okoka mpona akambo asato wa nkawoyɛ Yehova lokasa. Kaanga ngombohetshɛ nde minitɛ imangha toko djɛ ntɔnɔla lá elakanyelo wɛ ngombowa má Bible, okoka nkoma ondjoki la onanghi w’Otepela wɔ Ndjambe. Kokanela efula kɛ wapɔ wa ngongowa má nanghaka nghɔsɔ lofu lonkfumɔ la avɛrse ankina wa Bible wa ngongowalaka! Ɛwo, wɛ ongokoma onanghi w’Otepela wɔ Ndjambe. Iya ntsha ɛna ente olekɔ l’akambo efula w’oyɛ ladjɛ nangha etshikitano?

YAWILELA EKOMA WEKOKA LA WƐ

11. Ladjikɛnge okokɛ ntshimba yimba winá ɛmɔtshi? Pɛyɛ ndjɔmbɔmba.

¹¹ Winá w’owalɛ Bible la w’ohonɛ topo tɔ nkamba l’alako wande, okoka nyɛna ente olekɔ l’akambo efula wa ntshikitanyɛ. Tɔkɔtɔnɔla lá nkambo djɛnɛ: Lɔɔko ombowala lá Bible alako wakɛnyɛ dj’ipa ndjala l’isɔnɔdji. (Dja. 2:​1-8) Ko ɔmbɔsa nkano djɛ nangha etshikitano ɛmɔtshi lá wopo w’ɔsɛ anto. Ɔsɔ alekɔ nkambo djɛ wɔlɔ! Ko lomi ombokalɔ mbala vɛrse djɛnyɛ djonyi djɛ nama lolemi lɔko. (Dja. 3:​1-12) Ɔmɛna ente winá ɛmɔtshi ongoposɛke etepela wɛ nyɛtshi. Manyi ɔmbɔsa nkano djɛ mposɛka etepela wɛ wɔlɔ la w’ekembɛ. Badji djɛko djɛ Bible djɛ mvusɛ lomi dendana la avɛrse wakewola dj’ipa ndjala ilongo l’andja wanɛ. (Dja. 4:​4-12) Ɔmɛna ente olekɔ la djonyi djɛ ndjewa nsɔna etombo. Lofu l’anɛyi, okoka ntshimba yimba l’etshikitano enkfumɔ wɛsɔ w’oyɛ ladjɛ nangha.

12. Lamo ngopakoke ndɛmba ntsha ɔmɛna ente olekɔ l’etshikitano efula wɛ nangha má wekelo wɔko wɔ Bible? (Lenda edjinge nɔtɛ.)

¹² Ntsha olekɔ la djonyi djɛ nangha etshikitano efula, tɔlɛmbake. Kɛsɔ kɛnyɛ ente olekɔ  l’okitshakitshɛ ole l’ekoma wɛ wɔlɔ. Onto wolekɔ́ l’okitshakitshɛ ole l’oloko wɔ wɔlɔ angowalake Afunelo la ikanyi yɛ nangha etshikitano w’oyɛnde la djonyi. a Tovungɔ lonkina ente iso ladjɛ nkindjɛ ndɔta ‘lonto lɔ bango.’ (Kɔl. 3:10) Kɛkɔnge kengokokotshɛ́ djɛ nkindjɛ ndjala onanghi w’Otepela wɔ Ndjambe?

13. Wopo wɔkɔnge w’okokɛ ndáwilela ekoma l’okitshakitshɛ? (Lenda edjinge ntshango.)

¹³ L’edjena kɛ nangha etshikitano l’akambo ankfumɔ w’owalɛ, yawilela ekoma w’okokɛ nkotshɛ́. (Woo. 11:2) Okoka nangha nghɔnɛ: Funa akambo w’oyɛ la djonyi djɛ nangha etshikitano lá nkishi, ko sɔna nkete mpe kana ntshato dj’okokɛ nangha ntondo, tshika nkina l’ɔkɔngɔ. Oyɛ ladjɛ ntateyɛ mampe?

14. Okokɛ ntateyɛ má nkambo djɛkɔnge?

¹⁴ Okoka ntateyɛ la nkambo dj’ɛnɛ ente dekɔ wɔdju nangha. Kana okoka nsɔna djɛ nangha otshikitano w’ɛnɛ djonyi efula. Winá w’ɔsɔnɛ otshikitano w’oyɛ ladjɛ nangha, nangha ehonelo lá enkanda wɛso, ndjɔmbɔmba Index des publications des Témoins de Jéhovah kana Dibuku dieyangelo dia Ɛmɛnyi wa Jehowa. Lɔmba Yehova lá nkambo dj’okoma wɔko djɛ nde nkɔpɛyɛ ‘mposɛ la wolo wɔ nangha akambo.’ (Flp 2:13) Makɔ, nkamba la kɛnɛ kɛ ngombeka. Ntsha ombonangha etshikitano lá okoma wɔko wɔ ntondo, ongoyala la mposɛ efula kɛ nangha otshikitano onkina. Lá nsɔsɔlɔ, winá w’onanghɛ etshikitano lá lowiko lɔko kana djekeka mɔtshi dj’Okristo, ɔnghɛna ente alekɔ wɔdju nangha l’akambo ankina.

NYOTSHIKE OTEPELA WƆ NDJAMBE ‘WOYALE LA NDJIMBO KƐ WOLO LE NYO’

15. Wopo wɔkɔnge Ewakɛ wɛ Yehova otshikitanawɔ l’anto efula wawalaka Bible? (1 Tesalɔnikɛ 2:13)

¹⁵ Anto amɔtshi wangofunake ambɔ wambowalá Bible mbala efula. Ko nsɔsɔlɔ wangawolake  Bible? Wangokambake kana wangawolake kɛnɛ k’owalawɔ ndjala la ndjimbo lá mbiko yɛwɔ? Yɛnyi nde, mbala efula lako. Ɔsɔ ngo otshikitanawɔ l’enkambi wɛ Yehova! Ngo ngete Akristo w’ɛtɛndɔ kɛ ntondo, iso ndjawolaka Bible ‘ete ngo oyɛnde nsɔsɔlɔ, ete ngo otepela wɔ Ndjambe.’ Lonkina, tongonanghake la wolo djɛ nkamba l’alako wa Bible lá lowiko lɔso.—Wala 1 Tesalɔnikɛ 2:13.

16. Kɛkɔnge kengotokotshɛ́ djɛ ndjala ananghi y’Otepela?

¹⁶ Apayalaka winá enkfumɔ wɔdju mbala la nkamba l’Otepela wɔ Ndjambe. Iso ladjɛ nangha la wolo djɛ mba winá wɔ mbala. Kana tokoka mbala lankeke lankeke, ko topangowa winá wɔ ntɔnɔla. Kana tokoka ntshimba yimba má efula k’etshikitano w’oyɛso ladjɛ nangha. Kaanga oyɛwɔ wolo, okoka ntamba enkeka wɛsɔ. La okotshɔ wɔ Yehova, okoka ndonga. Nyontshɔ tawole okotshɔ wɔnde la toyale, ape andjoki ivungɛ, koko ananghi y’Otepela. Ape l’ehamo, winá wɔ sotaleke mbala la nkamba l’Otepela wɔ Ndjambe lá mbiko yɛso, ndeke songoleka ndjala l’osasa.—Dja. 1:25.