DJAMBA DJƐ WEKELO 37
YEEMBO 118 ‘Ɔtɔpɛyɛ djawo djɛ wolo’ (lá Otetela)
Onkanda w’okoka ntokotshɛ́ djɛ nkfulumeyɛ tii l’ekomo
‘Tokindjɛ mvunda tii l’ekomo eshikikelo keyalaki laso má ewangelo.’—HEB. 3:14.
IKANYI YƐ DJAMBA DJƐNƐ
Tɔnghɛna wopo wɔ elakanyelo wɛ djonyi w’onkanda wɔ Hebero okokawɔ ntokotshɛ́ djɛ nkfulumeyɛ la nkɔmano nkfumɔ tii l’ekomo kɛ nkfumbo dj’akambo djɛnɛ.
1-2. a) Ekakasano wɛkɔnge weyalaki lá Judeya winá wɔ Poolo ndafunela ase Hebero onkanda? b) Wopo wɔkɔnge onkanda w’ofunamisá má wolo wɔ nyuma wɔsɔ yaye lá winá wɛdje?
AKRISTO wa Hebero wawikaki lá Jerusalɛmɛ la lá Judeya wapomanaka la deko djɛ ndjolo efula lá ɛnɔnyi wɛlɔndisá nyɔyi kɛ Yeso. M’ɔkɔngɔ w’otshumano w’Akristo nkfumbama, iwɔ wapomanaka la lɔnyɔkɔ l’ekekete efula. (Ele. 8:1) M’ɔkɔngɔ wɔ ɛnɔnyi 20, ambeki wa Kristo wapomanaka la osambo wɔ nkete ole wɔ mfalanga, nkoka ndjala m’ɔtɛ wɔ ndjala kɛ nkasa keyalaki l’owila. (Ele. 11:27-30) Koko, l’ɔnɔnyi wɔ 61 D.D., Akristo wayalaka la ndambo kɛ vu lá ndjɛdjɛ la kɛnɛ kakongaki. Lá eleko kɛsɔ, walongolaka onkanda me Poolo lá winá wɛdje wofunamisá má wolo wɔ nyuma.
2 Onkanda wɔ Hebero woyɛka la winá wɛdje ladjikɛnde eleko kɛ vu kɛsɔ ketayala ilá. Poolo apɛyɛka alako wa djonyi wakokisá nkotshɛ́ Akristo djɛ nkfulumeyɛ ndjolo kakongaki lá ntondo. Otshitanelo wɔ nkfumbo dj’akambo dj’ase Juda, djɛ Yeso ndewoyɛ wolasukanaki. (Luka 21:20) Lá nsɔsɔlɔ, ayale Poolo kana Akristo wa Judeya watewaki winá kɔɔ w’otshitanelo wɔsɔ yakoke nanghema. Koko Akristo wakokaka nkamba la winá w’otshikalisá djɛ ndálɔngɔsɔla dj’iwɔ nkembɛ wekeka wanɛ: Djawo la okfulumedji.—Heb. 10:25; 12:1, 2.
3. Lamo onkanda wɔ Hebero oyɛwɔ la wapɔ efula le Akristo lɔɔko kɛnɛ?
3 Tɔkɔpa nkoma lá ndjolo k’ekekete keleka kepomanisá l’Akristo wa Hebero. (Mat. 24:21; Ndj. 16:14, 16) Djɛko ndeke nyontshɔ tokolenda alako amɔtshi wa djonyi wa Yehova ndapɛyɛ Akristo wakoka ntoyakala wapɔ ole iso.
‘TONANGHE LA WOLO DJƐ NDJALA ANTO WAMBOTSHUNDA’
4. Ekakasano wɛkɔnge wepomanisá la Akristo w’ase Juda? (Lenda edjinge ntshango.)
4 Akristo w’ase Juda wapomanaka la okakasano wɔ wolo. Lá winá ɔmɔtshi, ase Juda wayalaka anto wasɔnamisá me Yehova. Jerusalɛmɛ djayalaki intaselo k’Onkfumi wɔ Ndjambe lá looko, la tɛmpɛlɔ kayalaki djwe dj’ɔtɛmwɛlɔ wɔ piyɔɔ. Ase Juda ankfumɔ wa nkɔmano wakilikaki Ɛlɛmbɛ wɛ Mɔsɛ la nkfumbo djɛ ewandji w’ɛtɛmwɛlɔ yalakanyɛka. Elakanyelo wɛsɔ walendanaki la eleelo wɛwɔ, ɛlɔkɔ kɛ ndjopa ntɛtɔ, ole kaanga wopo wɔ nsanghana l’ase engidji. Koko, Yehova atawolaki lonkina elambo w’ase Juda m’ɔkɔngɔ wɔ nyɔyi kɛ Yeso. Ɔsɔ ayalaka okakasano w’ekekete efula l’Akristo w’ase Juda, wayalaki la ekfumbo kɛ ndɔnda Ɛlɛmbɛ. (Heb. 10:1, 4, 10) Kaanga Akristo wambotshunda, ndjɔmbɔmba ɔpɔstɔlɔ Pɛtɛlɔ, ayalaka la okakasano wɔ ndjekela l’etshikitano wɛsɔ. (Ele. 10:9-14; Nga. 2:11-14) M’ɔtɛ wɔ djawo djɛwɔ djɛ bango, ewandji w’ɛtɛmwɛlɔ w’ase Juda wanyɔkɔlaki Akristo wasɔ.
Akristo wayalaki ladjɛ mpikama ndii lá nsɔsɔlɔ má ntona tokanyi tɔ nyɛtshi tɔ ewandji wɛ ntolo w’ase Juda (Lenda itenyi 4-5)
5. Lá nkambo djɛkɔnge Akristo yayale ladjɛ nkalɔ mbadjɛ?
5 Akristo w’ase Hebero wapomanaka la eloyi epe w’anto wananyɛki. Oloyi wɔ ntondo nde ewandji wɛ ntolo wɛ Juda wawɔsaki ete ngo wa apɔsta. Akristo amɔtshi w’engolo watepelaki ambɔ ambeki wa Kristo wakindjɛ nɛmɛyɛ nanghedji mɔtshi dj’Ɛlɛmbɛ wɛ Mɔsɛ, nkoka ndjala dj’ipa nyɔkwama. (Nga. 6:12) Kɛkɔnge kekokisá nkotshɛ́ Akristo wa nkɔmano djɛ mpikama lá nsɔsɔlɔ?
6. Kɛkɔnge kɛ Poolo ndakembɛ winande andjawodji djɛ nangha? (Hebero 5:14–6:1)
6 Lá onkanda wɔ Poolo ndafunela ase Hebero, nde akembɛka winande andjawodji dj’iwɔ ntshimola Otepela wɔ Ndjambe. (Wala Hebero 5:14–6:1.) Poolo akambaka l’Afunelo wa Hebero djɛ ntɔnɔla la wananyɔ wande, lá wopo w’ɔtɛmwɛlɔ wɔ Akristo olekawɔ ɔtɛmwɛlɔ w’ase Juda. a Poolo ewaki ante balo dj’efula djɛ Afunelo la looka lɔ wɔlɔ l’akambo wa nsɔsɔlɔ longokotshɛ́ Akristo djɛ ndjisola la ntona ekanedji la elakanyelo w’engolo dj’ipa iwɔ mvunga mboka.
7. Opomanaso la ekakasano wɛkɔnge lɔɔko kɛnɛ?
7 Ete ngo Akristo wa Hebero, topomana la nsango ole la tokanyi topokana l’ɛlɛmbɛ wɛ Yehova. Antonyi waso wangonanyɛke akambo wawolaso, wambɔsamá má Bible walendana la nanghedji, má ntepepla ambɔ iso tolekɔ anto nyɛtshi ole akambo wolo. Nanghedji la etepela w’andja wanɛ wembowangɔ otale efula l’ikanyi yɛ djɔ yɛ Ndjambe lá nkambo djɛsɔ. (Woo. 17:15) Djɛko ndeke iso ladjɛ nkembɛ akoka waso wa ndjisola, la ntona tokanyi tokamba la antonyi waso, wahona dj’iso nsamba oloko wolo la ntshika nkambela Yehova.—Heb. 13:9.
8. Wopo wɔkɔnge w’okokaso nkoma anto wambotshunda lá nyuma?
8 Angoyala wɔlɔ iso nkamba la dako djɛ Poolo ndapɛyɛ Akristo wa Hebero, djɛ nangha la wolo djɛ nkoma anto wambotshunda lá nyuma. Kɛsɔ nsakisolaka ndjala la balo dj’efula dj’akambo wa nsɔsɔlɔ la ndjala la ekanedji ete ngo kɛ Yehova. Akambo wasɔ wangokindjɛke kaanga m’ɔkɔngɔ wɔ ndálambola la ndongola batisimo. Ayale ilá kɛ ngete nge k’oyɛso lá nsɔsɔlɔ, isankfumɔ ladjɛ mbalaka la ndjekaka Otepela wɔ Ndjambe mbala la mbala. (Yee. 1:2) Ekfumbo kɛ wɔlɔ kɛ wekelo kengotokotshɛ́ djɛ nkembɛ djekeka djɛ Poolo ndapike nghɔmɔ ɛnsɔsɔ lá onkanda wɔnde wɔ Hebero: Djawo.—Heb. 11:1, 6.
‘TOYALE LA DJAWO DJƐ NAMA MBIKO YƐSO’
9. Lamo djawo djɛ wolo yakoke mbikɛ mbiko y’Akristo w’ase Hebero?
9 Akristo wa Hebero wayalaka la djonyi djɛ djawo djɛ wolo djɛ mbika lá ndjolo kakongaki lá Judeya. (Heb. 10:37-39) Yeso ewolaka ambeki wande ante winá wɔ yɔnghɛna angala wambodjinga Jerusalɛmɛ, wangolote tá enkókó. Akristo ankfumɔ wayalaka ladjɛ nkamba la dako djɛsɔ, ayale waawikaki lá ngando kana waawikaki lá ewila wadjingaki. (Luka 21:20-24) Anto welá mbalaka me angala wadjingi, wakokaki mpona isamelo lá ngando kɛ mpele djɛ nkekete ete ngo Jerusalɛmɛ. Ndota tá enkókó ɛnamaki ete ngo apalekɔ ikanyi yɛ wɔlɔ, djɛko ndeke kɛsɔ kalɔmbaki djawo djɛ wolo.
10. Djawo djɛ wolo otshindande Akristo djɛ nangha nge? (Hebero 13:17)
10 Akristo w’ase Hebero wayalaka ladjɛ ndjilela lonkina anto wa Yeso ndasɔnɛ djɛ ndɔndjɛ otshumano oloko. Waalɔndjɛki wapɛyɛki alako wa kɔɔ djɛ nkotshɛ́ onto onkfumɔ wɔ l’otshumano djɛ ndɔnda ɛlɔndjɛlɔ kɛ Yeso lá winá wɛdje ipa l’ovungusano. (Wala Hebero 13:17.) Itepela yɛ Hebero ‘nɛmɛyɛ’ ikambema lá Hebero 13:17 yɛnyɛ ente onto awolande nɛmɛyɛ nde mande ilela kanga lɔlɔndjɛ oloko. Kɛsɔ kesakisola akambo efula ape ngo ndɔlɛmɛyɛ ladjikɛnde alekɔ la lotshungɔ lɔ ndɔndjɛ. Djɛko ndeke Akristo wa Hebero wayalaki la djonyi djɛ nkembɛ wɛkamo wɔwɔ te anto walɔndjɛki lá ntondo kɛ ndjolo mbanga. Ntsha Akristo wambokilika alako w’anto walɔndjɛ lá eleko kɛ vu, angoyala wɔdju lewɔ djɛ nangha nghɔsɔ lá winá wɔ ndjolo.
11. Lamo Akristo oyɛwɔ la djonyi djɛ djawo djɛ wolo lɔɔko kɛnɛ?
11 Lɔɔko kɛnɛ tolekɔ la djonyi djɛ djawo djɛ wolo ete ngo waalongolisá onkanda wɔ Poolo ntondo. Towika lá eleko k’anto efula otonawɔ la ɔnyɔlawɔ ndjewo yɛ Bible ilendana l’ekomo kɛ nkfumbo dj’akambo. (2 Pɛ. 3:3, 4) Lá djiko djɛ lasɔ, kaanga Bible ɛnyɛnde akambo efula walendana la wopo wɔ ndjolo k’ekekete yongonanghema, akambo ankina wa sopewe walekɔ efula. Iso ladjɛ ndjala la djawo djɛ wolo ente ekomo kɛ nkfumbo dj’akambo djɛnɛ kengoyɛ lá winá wɛdje la Yehova angotowakanyɛ.—Aba. 2:3.
12. Kɛkɔnge kengotokotshɛ́ djɛ mbika lá ndjolo k’ekekete?
12 Iso ladjɛ nkembɛ djawo djɛso lonkina le epeko kekamba la Yehova lɔɔko kɛnɛ djɛ ntɔlɔndjɛ, ‘mfumbe kɛ nkɔmano la nkɛsɔ.’ (Mat. 24:45) Winá wɔ ndjolo k’ekekete yongowanga, tokoka ndolongola alako wawikɛ mbiko ete ngo Akristo wa Hebero yakoke ndongola winá wɔ angala w’ase Ɔrɔma yaye. Ɔnɛ ndeke winá wɔso ndashikikɛ la nkembɛ wɛkamo wɔso lá ɛlɔndjɛlɔ k’owaso me anto walɔndjɛ olonghanyelo wɔ Yehova. Topakoke nkongela ente tɔngɔlɔnda ɛlɔndjɛlɔ kɛwɔ lá winá wɔ ndjolo k’ekekete la wɛkamo onkfumɔ ntsha tolekɔ l’okakasano wɔ ndɔnda winá wɔsɔ.
13. Lamo dako dekɔ lá Hebero 13:5 oyɛwɔ dako djɛ wɔlɔ efula?
13 Winá wɔ yakongaka imbeka yɛ ndota, Akristo w’ase Hebero wayalaki la djonyi djɛ ndjala la lowiko l’onghanghunya, nsamba ndjala la ‘ngandji kɛ mfalanga.’ (Wala Hebero 13:5.) Amɔtshi l’anteyi kɛwɔ wayalaki ɛmvɔ ole wapomanaki la deko djɛ ndjala. (Heb. 10:32-34) Kaanga yayalaka entshupa djɛ nkfulumeyɛ ekakasano lá nkambo djɛ losango lɔ wɔlɔ, amɔtshi watateyɛka nyɛna ambɔ okfudji wolekɔ djonyi efula djɛ mba elamelo. Koko mfalanga itasamba ndalama má etshitanelo kakongaki. (Dja. 5:3) Lá nsɔsɔlɔ, onto onkfumɔ wɔkɔpa nkete djɛ demba efula angoyalake l’okakasano efula wɔ ndota la ntshika mvulu edjinge nkete djɛnde.
14. Wopo wɔkɔnge djawo djɛ wolo okokawɔ ndjala l’eposelo lá akano wɔsaso lá kɛnɛ kelendana la nkete djɛ demba?
14 Topangoyala la ngandji kɛ mfalanga ntsha tolekɔ la djawo djɛ wolo ente ekomo kɛ nkfumbo dj’akambo djɛnɛ kembosukana. Lá nsɔsɔlɔ, anto wangɔhɔnyɔla ‘mfɛsa yɛwɔ lá elolo wɛ mbandja’ ladjikɛnde wangosipisoyɛ ambɔ ‘ayale mfɛsa yɛwɔ kana mpaonyi yɛwɔ lako ekete kekoka ndawikɛ lá lofu lɔ nkɛlɛ kɛ Yehova.’ (Ezk. 7:19) L’edjena kɛ ndápɛyɛ djɛ ntshumanyɛ mfalanga, iso ladjɛ ndɔsa akano wakoka ntokotshɛ́ djɛ ndjala la lowiko l’onghanghunya la lɔ wɛdjimo. Kɛsɔ nsakisolaka mpikama lá ikanyi yɛ ndɔsa awasa ɔsɔsa kana nangha la wolo djɛ mba looto l’efula. Iso ladjɛ mbadjɛ lonkina dj’ipa nkɔpa lá lɛdji l’indeko nkete dj’okotshɛso. (Mat. 6:19, 24) Djawo djɛso nkoka ndjingela l’ohemba m’ɔtɛ wɔ looto la nkete nkina dj’okotshɛso winá w’okongaso ekomo kɛ nkfumbo dj’akambo djɛnɛ.
‘NYOLEKƆ LA DJONYI DJƐ OKFULUMEDJI’
15. Lamo Akristo wa Hebero yayale la djonyi djɛ okfulumedji?
15 Akristo wa Hebero wayalaki la djonyi djɛ okfulumedji mande evungusano wakongaki lá Judeya. (Heb. 10:36) Kaanga Akristo efula w’ase Hebero yapomana la lɔnyɔkɔ, efula wakomaka Akristo lá eleko kɛ ndambo vu. Poolo afunaka ante kaanga yakfulumeyɛ ehemba wɛ nkekete, iwɔ watɛna ndjolo efula ete ngo Yeso ndɛnyi, ntepela ente tii tá nyɔyi. (Heb. 12:4) Koko winá w’anto efula yakomaka Akristo, antonyi wawɔ w’ase Juda wetelaka ndjala la nkɛlɛ ole la lopango. Ɛnɔnyi emangha lá ntondo kɛ lasɔ, oloyi w’anto wovundaka Poolo winá wɔ ndapoposanyɛka lá Jerusalɛmɛ. Ase Juda ndekana 40 ‘watshɔka djiinga ole watshibaka ambɔ topangɔlɛ la topangɔnɔ ntsha totayake Poolo.’ (Ele. 22:22; 23:12-14) Kaanga iyaanyɔkɔlaka la iyaatonaka, Akristo wayalaka ladjɛ ntshumana djɛ ntɛmɔla, mpoposanyɛ losango lɔ wɔlɔ, la nkindjɛ nkembɛ djawo djɛwɔ.
16. Wopo wɔkɔnge onkanda wɔ Hebero okokawɔ ntokotshɛ́ djɛ ndjala l’ikanyi yɛ wɔlɔ lá nkambo djɛ lɔnyɔkɔ? (Hebero 12:7)
16 Kɛkɔnge kekotshisá Akristo wa Hebero djɛ nkfulumeyɛ onanyelo? Poolo ewaki ante iwɔ wayalaki la lonyi lɔ ndjala l’ikanyi yɛ wɔlɔ lá nkambo djɛ ekakasano wɛwɔ. Ndjambe nkoka ndjawola dj’iso ndjala l’ohemba ɔmɔtshi djɛ mba okfumbelo. (Wala Hebero 12:7.) Okfumbelo wɔ nghɔsɔ wokoka ntokotshɛ́ dj’iso nkona wekeka w’Okristo wakoka ntowikɛ. Otapikawɔ wiso lá akambo wa wɔlɔ wayɛka má ehemba, Akristo wa Hebero watɛna ambɔ alekɔ wɔdju lewɔ djɛ nkfulumeyɛ.—Heb. 12:11.
17. Kɛkɔnge kɛ Poolo ndewaka lá nkambo djɛ nkfulumeyɛ lɔnyɔkɔ?
17 Poolo akembɛka Akristo wa Hebero djɛ nkfulumeyɛ ehemba l’oloko wolo. Nde ayalaki onto wɛdje djɛ mpɛyɛ alako walendana la lɔnyɔkɔ. Ladjikɛnde anyɔkɔlaka Akristo ntondo, nde ewaki ekakasano wakongaki. Ewaki lonkina wopo wɔ nkfulumeyɛ lɔnyɔkɔ. Mande anyɔkɔlamaka lá topo efula m’ɔkɔngɔ wɔ nde nkoma Okristo. (2 Kɔ. 11:23-25) Djɛko ndeke Poolo akokaka ntepela l’eshikikelo kenkfumɔ kɛnɛ kɛlɔmbama djɛ nkfulumeyɛ. Nde avungolaka Akristo wasɔ ante winá w’okfulumeyɛwɔ ohemba, iwɔ ladjɛ ndáwɛkɛ le Yehova koko ape lewɔ yɔmɛlɛ. Poolo akoka ntepela l’oloko wolo onkfumɔ ante: ‘Yehova ndeke okotshɔ wɔmi; lemi mpangoka wɔma.’—Heb. 13:6.
18. Ndjewa kɛnɛ kengonanghemá l’etsho weyaye nkoka ntokotshɛ́ djɛ nkfulumeyɛ lɔnyɔkɔ?
18 Wananyɔ waso amɔtshi wakfulumeyɛ lɔnyɔkɔ winá wɔsɔ. Tokoka ndasuka la nkɔmano nkfumɔ má ndɔmbɔ yɛso ole mbala imɔtshi má topo tɛnama. (Heb. 10:33) Koko Bible ntepela papoo ante: ‘Anto ankfumɔ wakombola mbika má malema Ndjambe esanga la Kristo Yeso ole iwɔ wangɔnyɔkɔlama.’ (2 Ti. 3:12) M’ɔtɛ wɔ elonga kɛsɔ, isankfumɔ ladjɛ ndálɔngɔsɔla djɛ kɛnɛ ketokonga lá ntondo. Nyontshɔ tokindjɛ ndawɛkɛ le Yehova, l’eshikikelo ente angotokotshɛ́ djɛ nkfulumeyɛ ehemba enkfumɔ wengopomana laso. Lá winá wɛdje, nde angokotshɛ́ enkambi wɛnde enkfumɔ wɛ nkɔmano.—2 Te. 1:7, 8.
19. Wina wakɔnge wa djonyi wangotokotshɛ́ djɛ ndálɔngɔsɔla lá nkambo djɛ ndjolo k’ekekete? (Lenda edjinge ntshango.)
19 Ape l’ehamo onkanda wɔ Poolo ndatomela ase Hebero wokotshɛ́ka Akristo w’ɛtɛndɔ kɛ ntondo djɛ ndálɔngɔsɔla lá ndjolo kakongaki. Poolo akembɛka wananyɔ wande dj’iwɔ ndjala la balo dj’efula ole la looka lɔ wɔlɔ l’Afunelo. Nangha nghɔsɔ atakoka ndakotshɛ́ dj’iwɔ ndjewa la ntona elakanyelo wekokisá mpɔdjɛ djawo djɛwɔ. Nde ávungolaka dj’iwɔ nkembɛ djawo djɛwɔ djɛ ndjala entshupa djɛ ndɔnda ɛlɔndjɛlɔ kɛ Yeso la k’anto walɔndjɛki otshumano. Edjinge akotshɛ́ka Akristo djɛ nkembɛ okfulumedji wɔwɔ la dj’iwɔ ndjala la ikanyi yɛ wɔlɔ lá nkambo djɛ ehemba wɛwɔ, má nyɛna ehemba ete ngo mbamba kekamba la Papa kɛwɔ kɛ ngandji djɛ ndaakfumba. Nyontshɔ tokambe l’alako wa Bible wasɔ. Ko manyi tongoyala l’akoka wa nkfulumeyɛ la nkɔmano nkfumɔ.—Heb. 3:14.
Akristo wa nkɔmano wasakolamaka má okfulumedji wɔwɔ. M’ɔkɔngɔ wɔ ndota má Judeya, iwɔ wakindjɛka ntshumana esanga. Olakanyelo wɔkɔnge w’owaso? (Lenda itenyi 19)
YEEMBO 126 Towadjɛ, topikame ndii, toyale la wolo (lá Otetela)
a Ngo lá shapitrɛ kɛ ntondo, Poolo awalaka Afunelo wa Hebero mbala esambele djɛ nyɛnyɛ ente ɔtɛmwɛlɔ w’Akristo woleka ɔtɛmwɛlɔ w’ase Juda.—Heb. 1:5-13.
