1. Dombo djɛkɔnge nkɔpa nanghema lako ilá?

 TOWIKA l’eleko k’etshikitano wɛ nkekete efula! Lako ilá, Yeso olomboyɛ anto ankfumɔ wawiká lá looko. Yeso atepelaka djɛ eleko kɛtɔla tá dombo má mpɛyɛ ambeki wande prɔfɛsi kelekɔ́ la ‘ilembetelo’ yɛ enamelo kɛnde kɛ nyuma la yɛ ‘ekomo kɛ nkfumbo dj’akambo.’ (Mat. 24:3) Prɔfɛsi kɛsɔ kelekɔ lá Mateo shapitrɛ 24 la 25, Marko shapitrɛ 13, la lá Luka shapitrɛ 21.

2. Ɔkɔpaso nyɛna nge, ko lamo okokawɔ ntokotshɛ́?

² Yeso apɛyɛka ndjewo yɛ djonyi efula má ndjɔmbɔmba yɛsɔ. Ndjɔmbɔmba yɛkɔ nde yɛ ɛnkɔkɔ l’ambodji, eseka wetopɛ oyɛ wɛ nkɛsɔ la wɛ nkesa, ole talata. Ndjɔmbɔmba kenkfumɔ ketokotshɛ́ djɛ ndjoka wopo wɔ eyalelo k’onto yongoyala l’eposelo lá wopo wɔ ndongolomboyɛ. Winá wɔ soteke ndjɔmbɔmba yɛsɔ, nyontshɔ tokisola elakanyelo w’okokaso mba la tokolenda wopo w’okokaso nkamba la wɛkɔ. Ndjɔmbɔmba kɛ ntondo k’ɔkɔpaso nyɛna nde kɛ ɛnkɔkɔ l’ambodji.

ƐNKƆKƆ L’AMBODJI

3. Winá wɔkɔnge wɔ Yeso ndongolomboyɛ anto?

³ Lá ndjɔmbɔmba kɛ ɛnkɔkɔ l’ambodji, Yeso atepelaka djɛ dombo djɛ anto wangowa mbamba kɛ ndjelola lá losango lɔ wɔlɔ la kɛ nsuka wananyɔ wande w’ankfutami w’avuta. (Mat. 25:​31-46) Lá winá wɔ ‘ndjolo k’ekekete,’ nde angopa dombo djɛsɔ lá ntondo kɛ Armagɛdɔ. (Mat. 24:21) Ete ngo olami w’ɛnkɔkɔ okapolakande ɛnkɔkɔ l’ambodji, Yeso angokapola waangosuka  la nkɔmano nkfumɔ ambeki wande w’ankfutami w’avuta la anto ankina.

4. Lá nkilika Izaya 11:​3, 4, lamo oyɛso l’eshikikelo ente Yeso angolomboyɛ anto la sii? (Lenda edjinge djɛ loposo.)

⁴ Prɔfɛsi yɛ Bible yɛnyɛ ente, ete ngo oyɛnde isushi imbɔsɔnama me Yehova, Yeso angolomboyɛ la sii. (Wala Izaya 11:​3, 4.) Nde angɔkɔdjɛ djalelo, nanghedji, la etepela w’anto, ndjila ole wopo w’onanghelawɔ wananyɔ wande w’ankfutami w’avuta akambo. (Mat. 12:​36, 37; 25:40) Yeso angewa wasukaki ankfutami w’avuta la olemo wɔwɔ. a Yopo imɔtshi y’ɛnkɔkɔ osukawɔ wananyɔ wa Kristo nde má ndakotshɛ́ lá olemo w’ipoposanyɛ. Waasuka nghɔsɔ wangɔsama ete ngo ‘anto wa wɔlɔ’ ole wangowa nkongi djɛ ‘lowiko l’etshinda’ lá looko. (Mat. 25:46; Ndj. 7:​16, 17) Ɔsɔ ngo lofuto lɔ anto wa nkɔmano yongowa ndeke wɔlɔ! Má ndjala la nkɔmano lá winá la m’ɔkɔngɔ wɔ ndjolo k’ekekete, wiina wawɔ walamema lá ‘onkanda wɔ lowiko.’—Ndj. 20:15.

5. Olakanyelo wɔkɔnge w’owaso má ndjɔmbɔmba k’ɛnkɔkɔ l’ambodji, olendanawɔ la na?

⁵ Ɛnyɛ ente olekɔ nkɔmano ole sii. Ndjɔmbɔmba kɛ Yeso k’ɛnkɔkɔ l’ambodji olendanawɔ ntondo ntondo nde la waalekɔ la nkongi djɛ mbika lá looko. Iwɔ nyɛnyɛka djawo djɛwɔ má mpoposanyɛ la lonkina má ndjawola la nkɔmano nkfumɔ ɛlɔndjɛlɔ k’iloyi yɛ wananyɔ w’ankfutami w’avuta wa Yeso ndasɔnɛ. (Mat. 24:45) Koko ole waalekɔ́ la nkongi djɛ ntowika l’olongo ladjɛ ndjoka ndjewo kelekɔ́ lá ndjɔmbɔmba. Ladjikɛnge? Ladjikɛnde Yeso akɔdjɛ djalelo, nanghedji, l’etepela wɛwɔ. Ole iwɔ ladjɛ nyɛnyɛ nkɔmano djɛwɔ. Lá nsɔsɔlɔ, Yeso apɛyɛka ndjɔmbɔmba ilekɔ́ la ndjewo ilendana l’ankfutami w’avuta. Ndjɔmbɔmba yɛsɔ ilekɔ lá Mateo 25. Nyontshɔ tokolenda ndjɔmbɔmba k’eseka wetopɛ oyɛ wɛ nkɛsɔ la wɛ nkesa.

ESEKA WETOPƐ OYƐ WƐ NKƐSƆ LA WƐ NKESA

6. Wopo wɔkɔnge eseka etano wɛnɛ yɛnyɛ ambɔ walekɔ nkɛsɔ? (Mateo 25:​6-10)

⁶ Lá ndjɔmbɔmba k’eseka wetopɛ oyɛ, Yeso atepelaka djɛ eseka djomi wetopɛ oyɛ wetshisá ntolongola wome. (Mat. 25:​1-4) Iwɔ wakongaki djɛ ntotshindjeyɛ wome lá fɛtɛ kɛnde kɛ bala. Yeso ɛnyɛka ante etano wayalaki ‘nkɛsɔ’ la etano ‘nkesa.’ Eseka wa nkɛsɔ wayalɔngɔsɔlaka la wawadjɛki. Iwɔ wayalaka entshupa djɛ nkonga wome tii winá onkfumɔ wɔ ndongoyɛ, kaanga nde koyɛka lá kati k’otsho. Djɛko ndeke wayakalaka tɔkɔkɔpɔ t’avuta djɛ mpɛtshɛ lá winá wɔ widjima. Wayakalaka ole avuta ankina ntsha wome ambiloyɛ. Iwɔ walalɔngɔsɔlaka dj’ipa atala wawɔ ndjima. (Wala Mateo 25:​6-10.) Winá wɔ wome ndaye, eseka wɛ nkɛsɔ wingelaka la nde lá fɛtɛ. Lá wopo wɔkɔ ɔmɔ, Akristo w’ankfutami w’avuta walekɔ́ entshupa, wawadjɛ́ la walekɔ́ la nkɔmano tii winá wɔ Yeso ndongoyɛ, wangowa lofuto lɔwɔ má ndjingela la wome, Yeso, lá Onkfumi wɔ l’olongo. b (Ndj. 7:​1-3) Iya otepelaso mo djɛ eseka etano wɛ nkesa?

7. Kɛkɔnge kekomelisá eseka wɛ nkesa, ko lamo?

⁷ Lá lɛdji lotshikitanyi l’eseka wɛ nkɛsɔ, eseka wɛ nkesa watayala entshupa winá wɔ wome ndaye. Tɔkɔkɔpɔ tɔwɔ t’avuta tɔkɔpaka ndjima, ole iwɔ watayakala avuta ankina. Winá wɔ yoke ambɔ wome akɔpa nkoma, watshɔka ntosomba avuta. Winá wɔ wome ndaye, iwɔ watayala. Koko, ‘eseka wetopɛ oyɛ weyalisá lahanyi wingelaka la nde lá fɛtɛ kɛ bala  ko lokfuke lodjipamaka.’ (Mat. 25:10) Winá w’eseka wɛ nkesa yoyɛka l’ɔkɔngɔ la yakɔpɛ ndjingela, wome ashimelaka ante: ‘Lemi mpanyewe.’ (Mat. 25:​11, 12) Eseka wɛsɔ watayalɔngɔsɔla djɛ nkonga wome tii winá wɔ ndotakoka ndjɛ. Olakanyelo wɔkɔnge w’owa ankfutami w’avuta?

8-9. Ankfutami w’avuta owawɔ olakanyelo wɔkɔnge má ndjɔmbɔmba k’eseka wetopɛ oyɛ? (Lenda edjinge ntshango.)

⁸ Ɛnyɛ ente owadjɛ la olekɔ entshupa. Yeso atewoyɛ ante ankfutami wangoyala eloyi epe, oloyi ɔmɔtshi wongoyalɔngɔsɔla djɛ nkonga tii l’ekomo kɛ nkfumbo dj’akambo, ko onkina lako. Koko, ndapakisolaka nde kɛnɛ kengokomela ankfutami w’avuta ntsha wapalɔngɔswamisa djɛ nkfulumeyɛ tii l’ekomo. Ntsha lako, wapangowa lofuto lɔwɔ. (Dj. 14:​3, 4) Kɛsɔ ketotshinda djɛ ntɔnɔla! Ayale oyɛso nde la nkongi djɛ mbika lá looko kana l’olongo, isankfumɔ ladjɛ ntɔnɔla lá ndjɔmbɔmba k’eseka wetopɛ oyɛ. Isankfumɔ ladjɛ nkindjɛ mbadjɛ, ndjala entshupa djɛ nkfulumeyɛ tii l’ekomo.—Mat. 24:13.

⁹ M’ɔkɔngɔ wɔ nde mpɛyɛ ndjɔmbɔmba k’eseka wetopɛ oyɛ kepika nghɔmɔ ɛnsɔsɔ lá djonyi djɛ mbadjɛ la ndjala entshupa, Yeso apɛyɛka ndjɔmbɔmba kɛ talata. Ndjɔmbɔmba kɛnɛ kɛnyɛ djonyi djɛ ndjala nkambi.

TALATA

10. Wopo wɔkɔnge ase elemo ape yɛnyɛ ambɔ walekɔ nkɔmano? (Mateo 25:​19-23)

¹⁰ Lá ndjɔmbɔmba kɛ talata, Yeso atepelaka djɛ ase elemo ape wayalaki la nkɔmano te owandji wɔwɔ la ose olemo w’ipa la nkɔmano. (Mat. 25:​14-18) Ase elemo ape wɛnyɛka ambɔ walekɔ la nkɔmano má nkamba la wolo djɛ mbotshotshɛ lá wapɔ w’owandji wɔwɔ. Lá ntondo kɛ nde ntshɔ tá ongidji w’angangɛnda, nde ápɛyɛka talata—mfalanga y’efula. Ase elemo ape wa nkɔmano wakambaka la mfalanga yɛsɔ la balo nkfumɔ. Eposelo w’eyalisá nge? Winá w’owandji wɔwɔ ndakalɔ, iwɔ wafudjɛka mfalanga yɛ ndapɛyɛ mbala ipe. Owandji awedjɛka—iwɔ w’ingelaka ‘lá osasa w’owandji wɔwɔ.’ (Wala Mateo 25:​19-23.) Iya  ose olemo w’asato? Ndananghe nge la mfalanga y’owandji wɔnde ndɔpɛyɛ?

11. Kɛkɔnge kekomelisá ose olemo ‘w’ɛndɛndɛ’, ko lamo?

¹¹ Ose olemo w’asato awaka talata kɛmɔ koko ayalaka ‘ɛndɛndɛ.’ Owandji wɔnde akongelaki djɛ nde mbotshotshɛ talata la djaana nkfumɔ. Koko nde akfundjɛka lá looko. Winá wɔ owandji ndakalɔ, ose olemo wɔnɛ atawa mfalanga inkina lá djiko má kɛ ndɔpɛyɛ. Ose olemo atayala l’ikanyi yɛ wɔlɔ. L’edjena kɛnde ndɔmba imeyelo lá wopo wɔ ndasambe mbotshotshɛ mfalanga y’owandji wɔnde, ose olemo owetaka ante ‘kanga wayi wolo.’ Ose olemo wɔsɔ atawolama lonkina me owandji wɔnde. Lá djiko djɛ lasɔ, owandji opapolaka talata la okilikaka má kande.—Mat. 25:​24, 26-30.

12. Ase elemo ape wa nkɔmano oyɛwɔ lɔɔko kɛnɛ djingingi djɛ na?

¹² Ase elemo ape wa nkɔmano oyɛwɔ nde djingingi djɛ ankfutami w’avuta. Owandji, Yeso, aweta djɛ ‘ndjingela lá osasa w’owandji’ wɔwɔ. Iwɔ wawa lofuto lɔwɔ lɔ ntshɔ t’olongo, ekfundwelo kɛ ntondo. (Mat. 25:​21, 23; Ndj. 20:5b) L’onkoko onkina, ndjɔmbɔmba kɛ ose olemo w’ɛndɛndɛ kelekɔ ndjewo le ankfutami w’avuta. Lá ngete mo?

13-14. Olakanyelo wɔkɔnge w’owa ankfutami w’avuta má ndjɔmbɔmba kɛ talata? (Lenda edjinge ntshango.)

¹³ Ɛnyɛ ente olekɔ nkambi ole nkɔmɛ. Lá ndjɔmbɔmba kɛ talata la k’eseka wetopɛ oyɛ, Yeso atakɔpa ntepela ante ankfutami w’avuta wangoyala ndɛndɛ. Koko ndɛnyɛka nde kɛnɛ kekoka ndakomela ntsha wambotshutshɛ osasalo wɔwɔ. Ntsha lako, wapangowa mpeyi kɛ ‘yetama la kɛ yasɔnama,’ la wapangowa lotshungɔ lɔ ndjingela l’Onkfumi wɔ l’olongo.—2 Pɛ. 1:10.

¹⁴ Ndjɔmbɔmba kɛ Yeso k’eseka wetopɛ oyɛ la kɛ talata, kɛnyɛ papoo ente ankfutami w’avuta ankfumɔ ladjɛ ndálɔngɔsɔla, mbadjɛ, ndjala ankambi ole nkɔmɛ. Yeso atepelaka ekete kenkina kɛpɛyɛ ankfutami w’avuta ndjewo? Ee, atepelaka! Etepela wɛ Yeso welekɔ́ lá Mateo 24:​40, 41 welendana lonkina la dombo dj’ekomo dj’ankfutami.

 KANGA ‘YƆNGƆSA’ NA?

15-16. Lá wopo wɔkɔnge Mateo 24:​40, 41 ɛnyɛnde djonyi djɛ ankfutami w’avuta mbadjɛ?

¹⁵ Lá ntondo kɛ ntepela ndjɔmbɔmba isato yɛnɛ, Yeso atepelaka djɛ dombo dj’ekomo djɛ ankfutami w’avuta djɛngɛnyɛ waangawolama. Atepelaka djɛ mpame ipe iyalaki lá bedji la amato ape watɔki lá ngolo. Lá akambo ape wakɔ, anto wananghaki ngo olemo ɔmɔ, koko Yeso atepelaka ante ‘wangɔsa ɔmɔtshi ko wangotshika onkina.’ (Wala Mateo 24:​40, 41.) Nde akembɛka ambeki wande ante: ‘Djɛko ndeke, nyowadjɛ ladjikɛnde nyopewe lofu longoyɛ Nkfumi kɛnyo.’ (Mat. 24:42) Yeso atepelaka nghɔsɔ m’ɔkɔngɔ wɔ nde ntepela ndjɔmbɔmba k’eseka wetopɛ oyɛ. (Mat. 25:13) Etepela wɛnde wɛsɔ wɛfɛna? Ee. Ngo ankfutami wa nsɔsɔlɔ, wa nkɔmano ndeke ‘lɔngɔsama,’ longolongolama me Yeso lá Onkfumi wɔ l’olongo.—Dj. 14:3.

¹⁶ Ɛnyɛ ente owadjɛ. Onkfutami onkfumɔ wopangowadjɛ lá nyuma apangosanghana la ‘waasɔnamisa.’ (Mat. 24:31) Kɛsɔ kelendana l’enkambi wɛ Yehova enkfumɔ, ayale waalekɔ́ la nkongi djɛ ntowika l’olongo kana lá looko, iwɔ ladjɛ ndɔsa etepela wɛ Yeso ete ngo ndjewo kɛ nkindjɛ mbadjɛ la ndjala la nkɔmano.

17. Lamo sopakoke nkiyana lá nkambo djɛ winá wɔ Yehova ɔsɔnande djɛ nkfuta onto avuta la nyuma kɛnde k’ekina?

¹⁷ Iso tewa Yehova wɔlɔ efula, ko tilela dombo djɛnde oloko. Topakiyana ntsha Yehova ambɔsɔna djɛ nkfuta anto amɔtshi wa nkɔmano avuta l’etsho wɛnɛ. c Tovungɔ kɛnɛ ketepelisá Yeso lá nkambo djɛ ase elemo wayisá l’esidji 11 lá ndjɔmbɔmba kɛ bedji djɛ vinyɔ. (Mat. 20:​1-16) Waalokambisá l’ɔkɔngɔ wawaka lofuto lɔkɔ lɔmɔ la waakambisá má nkɛsɛ. Wopo wɔkɔ ɔmɔ, ayale winá w’onkfutami w’avuta ndásɔnama, wangowa iyankfɔmɔ lofuto lɔ ntowika l’olongo ntsha wambotshikala la nkɔmano.

TOKE NDJEWO

18-19. Elakanyelo la ndjewo yɛkɔnge sɔmɛna?

¹⁸ Sɔmɛna nge? Le waalekɔ́ la nkongi djɛ mbika lá looko, ndjɔmbɔmba k’ɛnkɔkɔ l’ambodji kɛnyɛ djonyi djɛ ndjala la nkɔmano ole la sii le Yehova, winá wɔsɔ ole lá ndjolo k’ekekete keyaye. L’etsho weyaye wɛsɔ, Yeso angɛnyɛ ante anto wa nkɔmano wɛdje mba ‘lowiko l’etshinda.’—Mat. 25:46.

¹⁹ Tɔmɛna lonkina ndjɔmbɔmba ipe ipɛyɛ ankfutami w’avuta ndjewo. Lá ndjɔmbɔmba kɛ Yeso k’eseka wetopɛ oyɛ, etano w’ɛnyɛka ambɔ walekɔ la nkɛsɔ. Iwɔ walalɔngɔsɔlaka la wawadjɛka, wayalaka entshupa djɛ nkonga wome winá onkfumɔ wɔ ndongoyɛ. Koko eseka wɛ nkesa watayalɔngɔsɔla. Ko wome atakɔpa iwɔ ndjingela lá fɛtɛ. Ole iso ladjɛ ndálɔngɔsɔla djɛ nkonga tii lofu lɔ Yeso ndongila ekomo lá nkfumbo dj’akambo djɛnɛ. Lonkina lá ndjɔmbɔmba kɛ Yeso kɛ talata, tɔmbɛna ente ase elemo ape wayalaki ankambi ole nkɔmɛ. Iwɔ wakambaka la wolo lá wapɔ wɔ owandji wɔwɔ ko nde afutaka. Koko, akilikaka ose olemo w’ɛndɛndɛ. Olakanyelo wɔkɔnge? Iso ladjɛ nkindjɛ ndápɛyɛ l’olemo wɔ Yehova tii l’ekomo. L’ekomo, tɔmɛna ente ankfutami w’avuta ladjɛ nkindjɛ mbadjɛ djɛ Yeso ‘ndaawɔsa’ t’olongo. Iwɔ wakonga l’oloko pakipaki djɛ ‘ntosanghana’ la Yeso l’olongo. M’ɔkɔngɔ wɔ mbandji k’Armagɛdɔ, iwɔ wangɔsa opiko ete ngo wadjɛ Yeso lá fɛtɛ kɛ bala kɛ Wɔna Ɔnkɔkɔ.—2 Te. 2:1; Ndj. 19:9.

20. Yehova ndongonanghela anto woká ndjewo yɛnde nge?

 ²⁰ Kaanga dombo yombetela nsukana, topalekɔ l’elonga kɛ ndjoka wɔma. Ntsha tomboyala la nkɔmano, Papa kɛsɔ kɛ ngandji kɛ l’olongo angɔtɔpɛyɛ ‘wolo woleká wolo woyalaka l’onto’ dj’iso ‘ndopanda . . . la ndemala lá ntondo kɛ Wɔna onto.’ (2 Kɔ. 4:7; Luka 21:36) Ayale oyɛso nde la nkongi djɛ ntowika l’olongo kana lá looko, tongosasangɛ Papa kɛso ntsha tomboka ndjewɔ ilekɔ́ lá ndjɔmbɔmba yɛ Yeso. Mpeyi la wɔlɔ w’ipa wɔsɔdjɔmba wɔ Yehova, wiina waso ‘wangofunama lá onkanda’ wɔ lowiko.—Dan. 12:1; Ndj. 3:5.