DJAMBA DJƐ WEKELO 39
YEEMBO 125 ‘Osasa le anto wokana nkɛtshi’ (lá Otetela)
Waka osasa má mpɛyɛ
‘Osasa w’oyɛ má mpɛyɛ ndeka wɔ ndongola.’—ELE. 20:35.
IKANYI YƐ DJAMBA DJƐNƐ
Topo tokokaso nkindjɛ ndjala edjinge mfudjɛ osasa w’owakaso má mpɛyɛ.
1-2. Wapɔ wɔkɔnge w’owaso má wopo wɔ Yehova ndatotonge la nkoka djɛ ndjala l’osasa má mpɛyɛ?
WINÁ wɔ Yehova ndatonge anto, nde ápɛyɛka nkoka djɛ mba osasa efula má mpɛyɛ koko ape má ndongola. (Ele. 20:35) Kɛsɔ osakisolawɔ nde ente topakoke ndjoka osasa ntsha onto ɔmɔtshi ambɔtɔpɛyɛ ekete? Lako. Isankfumɔ ndjalaka l’osasa winá w’ɔtɔpɛyɛwɔ opapɛyɛ. Koko, tongokake osasa efula winá wɔpɛyɛso. Lá nsɔsɔlɔ, Yehova atotongaka nghɔsɔ ngo la wɔlɔ wɔso. Lamo?
2 Má ntotonga lá lɛdji lɔsɔ, Yehova atɔpɛyɛka mbamba kɛ mfudjɛ osasa wɔso. Tokoka mfudjɛ osasa wɔso má mpona mbamba yɛ mpɛyɛ. Ape alekɔ nkambo djɛ wɔlɔ efula lá wopo wɔ Yehova ndatotonge lá lɛdji lɔsɔ?—Yee. 139:14.
3. Lamo etawɔ Yehova ‘Ndjambe k’osasa’?
3 Afunelo ntoshikikɛka ante mpɛyɛ ndjakalaka osasa, djɛko ndeke topakamɔ winá wɔ Bible otepelande ante Yehova alekɔ ‘Ndjambe k’osasa.’ (1 Ti. 1:11) Nde alekɔ onto wɔ ntondo wɔ mɔmɔlisá mpɛyɛ la wɔpɛyɛka lá lɛdji l’efula. Me nde ndeke ‘oyɛso la lowiko, ɔkɛndaso la oyɛso l’andja wanɛ,’ ete ngo ɔpɔstɔlɔ Poolo ndatepela. (Ele. 17:28) Lá nsɔsɔlɔ, ‘opapɛyɛ onkfumɔ wɔ wɔlɔ la olambo onkfumɔ wɔ djɔ,’ oyɛwɔ nde me Ndjambe.—Dja. 1:17.
4. Kɛkɔnge kengotokotshɛ́ djɛ ndjala l’osasa?
4 Isankfumɔ nkɔpaka ndjoka osasa w’efula w’oyɛka má mpɛyɛ. Tokoka nangha nghɔsɔ má ndjokola lokapo lɔ Yehova. (Ɛfɛ. 5:1) Winá wɔ soteke, nyontshɔ tokolenda kɛnɛ k’okokaso nangha ntsha ntɛna ente anto wapɛnyɛ djedjɛ lá epapɛyɛ wapɛyɛso. Mvungo yɛsɔ ingotokotshɛ́ djɛ nkindjɛ ole mfudjɛ osasa w’owaso má mpɛyɛ.
TOKOLE NKAPO DJƐ YEHOVA
5. Nkete djɛ demba djɛkɔnge djɛ Yehova ɔtɔpɛyɛnde?
5 Topo tɔmɔtshi tɔkɔnge tɔ Yehova ɛnyɛkande nkapo djɛnde? Tokolenda ndjɔmbɔmba imɔtshi. Yehova ntɔpɛyɛka nkete djɛ demba. Topakoke mba winá enkfumɔ nkete djɛ ntsho, koko mpeyi me Yehova, efula l’anteyi kɛso walekɔ la kɛnɛ k’oyɛwɔ la djonyi. Ndjɔmbɔmba, nde nanghaka dj’iso mba oleelo, esendja kana intaselo. (Yee. 4:8; Mat. 6:31-33; 1 Ti. 6:6-8) Wopo wɔ Yehova otoseyɛnde ehomba wɛso wɛ demba, oyɛwɔ ngo odjito wɔnde w’oyɛnde ladjɛ mbɛmba? Lako! Iya lamo Yehova otonanghelande nghɔsɔ?
6. Olakanyelo wɔkɔnge w’owaso má Mateo 6:25, 26?
6 Yehova ntoseyɛka ehomba wɛso mande nde ntɔkɔpaka. Tokolenda kɛnɛ kɛ Yeso ndatepela lá Mateo 6:25, 26. (Wala.) Yeso akambaka la ndjɔmbɔmba k’etongelo. Nde atepelaka nghɔnɛ lá nkambo djɛ tofulu ante: ‘Topakonaka, topavukaka la topawombaka nkete lá lokala.’ Koko, tolende etepela wɛlɔnda wɛnɛ: ‘Papa kɛnyo kɛ l’olongo ndalesɛka.’ Yeso opolaka ante: ‘Ko nyo nyopaleke tofulu ntsho?’ Olakanyelo w’owaso nge? Yehova ndɔsaka enkambi wɛnde l’odjito w’efula ndeka tofulu tɔ ndatonge. Ntsha Yehova aseyɛ tofulu ehomba wɛwɔ, tolashikikɛ ente angotoseyɛ ehomba wɛso! Ete ngo ombotshi w’oshiyɛ ehomba wɛ nkfumbo kɛnde, Yehova nshiyɛka ehomba wɛ nkfumbo kɛnde la ngandji.—Yee. 145:16; Mat. 6:32.
7. Wopo ɔmɔtshi wɔkɔnge w’okokaso ndjokola nkapo djɛ Yehova? (Lenda edjinge ntshango.)
7 Ete ngo Yehova, ole iso tokoka nkapa nkete djɛ demba la ngandji. Ndjɔmbɔmba, ewa winako ondjawodji welokɔ́ la djonyi djɛ oleelo kana esendja? Yehova nkoka nkamba la wɛ djɛ ndɔpɛyɛ kɛnɛ k’oyɛnde la djonyi. Ewakɛ wɛ Yehova wangewamake pekapeka má wopo wɛnyɛwɔ lokapo lá winá wɔ mbalaka. Ndjɔmbɔmba, lá opela wɔ COVID-19, wananyɔ l’ankaana wapɛyɛka waayalaki la djonyi eleelo, ntshendja, la nkete nkina. Anto efula wapɛyɛka epapɛyɛ wɛ l’ɛkɔpa lá nkambo dj’olemo wɔ l’andja w’otondo. Kɛsɔ kekotshɛ́ka djɛ nsuka wananyɔ wa looko l’otondo. Iwɔ wakambaka l’etepela welekɔ́ lá Hebero 13:16: ‘Nyotavungɛke nangha wɔlɔ la nkotshɛ́ anto ankina la nkete dekɔ la nyo, mande Ndjambe sasangaka la wepo wɛ elambo wɛ nghɔsɔ.’
Isankfumɔ nkoka ndjokola ndjɔmbɔmba kɛ lokapo lɔ Yehova (Lenda itenyi 7)
8. Lá wopo wɔkɔnge w’owakaso wapɔ má nkfulu kɛ Yehova? (Filipɛ 2:13)
8 Yehova mpɛyɛka nkfulu. Yehova ndjalaka l’osasa wɔ mpɛyɛ enkambi wɛnde wɛ nkɔmano nkfulu kɛnde k’ipa l’ekomo. (Wala Filipɛ 2:13.) Ɔmbɔlɔmba lofu lɔmɔtshi wolo wɔ mpikama l’ohemba kana nkfulu kɛ nkfulumeyɛ okakasano ɔmɔtshi? Nkoka ndjala ɔmbɔlɔmba wolo wɔ nkamba elemo wɛ lofu la lofu. Winá wɔ lɔlɔmbɔ lɔko yakadjimwama, okokaka nsanga lolemi nya ɔpɔstɔlɔ Poolo, kanga lofunisá ante: ‘Lá akambo ankfumɔ lemi ndekɔ la wolo me kanga lɔmpɛyɛka nkfulu.’—Flp. 4:13.
9. Wopo wɔkɔnge w’okokaso ndjokola Yehova má mpɛyɛ anto ankina nkfulu? (Lenda edjinge ntshango.)
9 Kaanga oyɛso anto wa ntshamba djɛ djɔ, tokoka ndjokola nkapo djɛ Yehova lá wopo w’ɔtɔpɛyɛnde nkfulu l’ɛkɔpa. Topakoke nsambeyɛ anto ankina wolo kana lokembo. Koko tokoka nkamba la wolo wɔso djɛ ndakotshɛ́. Ndjɔmbɔmba, tokoka ntshela Akristo wa nkokolo kana walekɔ́ la nkɔmɔ antomo kana ndakambela elemo. Ntsha nkokaka, lokapɛyɛ l’ɛkɔpa djɛ nsola kana ndɔngɔsɔla Mvulu k’Onkfumi. Nkamba la wolo wɔso lá lɛdji lɔsɔ, nkotshɛ́ka anto ankina djɛ ntɛmɔla Yehova.
Tokoka nkamba la wolo wɔso djɛ nkotshɛ́ anto ankina (Lenda itenyi 9)
10. Wopo wɔkɔnge w’okokaso nkamba la nkfulu k’etepela djɛ nkotshɛ́ anto ankina?
10 Tovungɛke lonkina ente etepela welekɔ la nkfulu. Okoka mvungɔ onto ɔmɔtshi w’owisá lokembo má wopo wɔ ngowedjɛ l’oloko ɔmɔ? Ewa onto wolekɔ́ la djonyi djɛ lokembo? Lamo ngopakoke ndɔsa nonghanyi kɛ nsawola l’onto wɔkɔ? Wɛ nkokaka ndowembola, ndoweta lá telefɔnɛ, ndotomela kartɛ, onkanda kana mesajɛ. Tokiyanake lá kɛnɛ k’okokɛ ntepela. Totepela tomangha tɔ daambi t’imá anse oloko nkoka ndjala kɛnɛ kɛ winako ondjawodji, oyɛnde la djonyi djɛ nkfulumɛyɛ kana djɛ ndjala l’ikanyi yɛ wɔlɔ, lá nkambo dj’okakasano wɔnde.—Woo. 12:25; Ɛfɛ. 4:29.
11. Yehova okambakande la balo djɛnde ngete mo?
11 Yehova mpɛyɛka balo. Ombeki Djakɔbɔ afunaka ante: ‘Ntsha onto ɔmɔtshi wɔ l’anteyi kɛnyo alekɔ la lonyi lɔ balo, nde akindjɛ ndɔmba Ndjambe ko nde angɔpɛyɛ, ladjikɛnde la nkapo nkfumɔ nde mpɛyɛka onto onkfumɔ ipa la mvunda ɛkɔmɔ.’ (Dja. 1:5; nɔtɛ.) Ete ngo etepela wɛnɛ ɛnyɛwɔ, Yehova apalamaka balo djɛnde ngo le nde nyɔmɛlɛ. Nde angɔpɛyɛke anto ankina la lokapo lonkfumɔ. Djakɔbɔ atepelaka lonkina ante Yehova mpɛyɛka balo djɛ nde ‘ipa la mpangola’ kana ‘ipa la mvunda ɛkɔmɔ.’ Nde apakɔpaka iso ndjala la yɛnyi winá w’osuyɛso ente tolekɔ la djonyi dj’ɛlɔndjɛlɔ kɛnde. Lá nsɔsɔlɔ, nde ntokembɛka dj’iso mpona balo djɛnde.—Woo. 2:1-6.
12. Mbamba yɛkɔnge y’okotshɛso yɛ nkapana balo djɛso?
12 Iya iso? Tokoka ndjokola Yehova má nkapana balo djɛso? (Yee. 32:8) Enkambi wɛ Yehova walekɔ la mbamba efula yɛ nkapana kɛnɛ kɛ yombeka. Ndjɔmbɔmba, tongokfumbake ansakodji yɛ bango l’olemo w’ipoposanyɛ. Tokokolo nkotshɛ́ka la bale ntshitshi nkfumɔ enkambi wekotshɛ́ la wananyɔ wambolongola djɛ ndjeka wopo wɔ mbɛmba edjito wɛwɔ l’otshumano. Wananyɔ l’ankaana ilekɔ́ l’akoka efula lá opikelo la ɔlɔngɔswɛlɔ w’amvulu, nkfumbaka waapalekɔ́ l’akoka dj’iwɔ mpika amvulu yɛ teokrasi.
13. Winá w’okfumbaso anto ankina, okokaso ndjokola wopo wɔ Yehova akapakande balo djɛnde ngete mo?
13 Angoyala wɔlɔ waakfumba ndjokola wopo wɔ Yehova okapande balo djɛnde. Tovungɔ ente Yehova mpɛyɛka balo djɛnde l’ɛkɔpa. Lá wopo wɔkɔ ɔmɔ, tongokombolake nkapana l’ɛkɔpa balo djɛso l’anto ankina weka. Topakoke ndáshimba djɛ nkfumba anto ankina má ndjoka wɔma ente ekomo ekomo kanga okfumbaso angotokita. Topakoke lonkina ndjala l’ikanyi yɛnɛ: Lako onto wonkfumbisá lemi! Nde koko ayakfumbe lá wopo wɔnde.’ Ikanyi yɛsɔ ipakoke ndjala l’anteyi k’Ewakɛ wɛ Yehova. Koko tolekɔ l’osasa wɔ mpɛyɛ onto w’okfumbaso ape ngo balo djɛso toko ‘koko ole etondo wɛso.’ (1 Te. 2:8) Tolekɔ la nkongi ente ‘ole iwɔ wangoyala l’akoka ankfumɔ walɔmbama djɛ ndakanyɛ anto ankina.’ (2 Ti. 2:1, 2) Lá lɛdji lɔsɔ, ntsha isankfumɔ tokapana balo djɛso l’ɛkɔpa, isankfumɔ tongoyala l’osasa ole la balo.
NTSHA ANTO WAPALEKƆ LA DJEDJƐ LÁ NKAPO DJƐSO
14. Anto efula yelolaka ngete mo lá lokapo lɔso?
14 Winá wɛnyɛso nkapo pekapeka te wananyɔ l’ankaana, mbala efula wangoyalake la djedjɛ. Iwɔ nkoka ntokawoyɛ lokasa má ntotomela onkanda kana má nyɛnyɛ djedjɛ djɛwɔ lá yopo imɔtshi. (Kɔl. 3:15) Ndongola etepela wɛ djedjɛ wɛ nghɔsɔ ntakfeyɛka lonkina osasa.
15. Kɛkɔnge k’oyɛso ladjɛ mvungɔ ntsha anto wapɛnyɛ djedjɛ?
15 Koko lá nsɔsɔlɔ, anto amɔtshi wapɛnyɛka djedjɛ kana wapakawoyɛka lokasa. Lá mbamba kɛmɔtshi, tokoka mpɛyɛ onto winá wɔso, wolo wɔso kana nkete djɛso koko tokoka ndáwopola ntsha ambosasangaka la kɛnɛ kɛ sombonanghela. Ntsha nkambo djɛ nghɔsɔ mbonanghema, wopo wɔkɔnge w’okokaso ndjewɔ dj’ipa ntshutshɛ osasa wɔso kana ndjala l’ikanyi yɛ nyɛtshi? Tovungɔ etepela wɛ vɛrse djɛso dj’ɔtɛ wɔ djoyi: Elemo 20:35. Owaso osasa nde má mpɛyɛ koko ape má wopo w’anto elolawɔ. Tokoka ndjala l’osasa wɔ mpɛyɛ kaanga ntsha anto wapɛnyɛ djedjɛ. Ngete mo? Tokolenda topo tomangha tɔnɛ.
16. Kɛkɔnge kengotokotshɛ́ djɛ nkindjɛ mpɛyɛ l’osasa?
16 Winá w’okapaso okolaso nde Yehova. Nde mpɛyɛka anto nkete djɛ wɔlɔ efula ayale walekɔ la djedjɛ kana lako. (Mat. 5:43-48) Yehova alaka ante winá w’ɔpɛyɛnyo onto ekete, nyɔpɛyɛ ‘ipa l’ikanyi yɛ nyokawoyɛ,’ ko tongowa ‘lofuto l’ekekete.’ (Luka 6:35) Djɛko ndeke topekɔke ntsha anto wapakokawoyɛ lokasa winá enkfumɔ. Vungɔ ente Yehova angokofuta lá wɔlɔ w’onanghelɛ anto ankina, ladjikɛnde olekɔ ‘onto wɔpɛyɛ l’osasa.’—Woo. 19:17; 2 Kɔ. 9:7.
17. Wopo wɔkɔnge w’okokaso ndjala l’ikanyi yɛ wɔlɔ? (Luka 14:12-14)
17 Má nkindjɛ ndjala l’ikanyi yɛ wɔlɔ winá w’ɔpɛyɛso, tokamba l’ikfɔ yɛ djonyi efula ilekɔ́ lá Luka 14:12-14. (Wala.) Lako nyɛtshi nyɛnyɛ lokapo kana ndongola anto wakoka ntokawoyɛ. Ko iya ntsha tɔmɛna ente tɔngɔpɛyɛke mande tongoyalake l’ikanyi y’iwɔ ntokawoyɛ? Angoyala wɔlɔ iso nsɛsa djɛ nangha kɛnɛ kɛ Yeso ndalake. Tokoka mpɛyɛ kana ndongola onto w’ewaso ente apalekɔ l’akoka wa ntokawoyɛ. Ko tongoyala l’osasa ladjikɛnde tokola Yehova. Ikanyi yɛ nghɔsɔ ingotokotshɛ́ djɛ nama osasa wɔso winá w’anto yopatokawoyɛ lokasa.
18. Kɛkɔnge kengotokotshɛ́ djɛ mpɛyɛ anto ankina okotshɔ?
18 Totayalake l’ikanyi yɛ nyɛtshi te anto ankina. (1 Kɔ. 13:7) Ntsha anto wapɛnyɛ djedjɛ tokoka ndáwopola ente: ‘Lá nsɔsɔlɔ iwɔ wapalekɔ la djedjɛ ndo koko ovungɛwɔ ngo nkawoyɛ lokasa?’ Nkoka ndjala walekɔ la donga djɛ yopelola ete ngo okongelaso. Amɔtshi nkoka ndjala l’osasa w’efula koko walekɔ l’okakasano wɔ mpɛyɛ lokasa. Iwɔ wakoka ndjala la nsɔnyi djɛ ndongola okotshɔ, pekapeka ntsha iwɔ ndeke lokotshɛ́ki anto l’etsho wemboheta. Ayale wopo wɔkɔnge w’anto okokawɔ ndjelola, ngandji k’okaso winaso Akristo ntotshindaka djɛ ndaakotshɛ́ la nkindjɛ mba osasa má mpɛyɛ.—Ɛfɛ. 4:2.
19-20. Lamo bale ntshitshi oyɛwɔ djonyi efula winá wɔpɛyɛso anto nkete? (Lenda edjinge ntshango.)
19 Yala la bale ntshitshi. Lá nkambo djɛ lokapo, Nkfumi kɛ balo Salɔmɔ afunaka ante: ‘Hɔnyɔla mampa kɛko lá washi, ladjikɛnde m’ɔkɔngɔ w’etsho efula wɛ ɔngɛna lonkina.’ (Los. 11:1) Ete ngo etepela wɛsɔ ɛnyɛwɔ, anto amɔtshi nkoka ndelola lá wɔlɔ w’isananghela ‘m’ɔkɔngɔ w’etsho efula.’ Tokolenda nkambo mɔtshi mpika nghɔmɔ ɛnsɔsɔ lá nsɔsɔlɔ kɛsɔ.
20 Ɛnɔnyi efula lá ntondo, wadjɛ olami w’edjingadjinga ɔmɔtshi atomelaka nkaana kɛmɔtshi kelongolisá batisimo onkanda djɛ ndokembɛ, djɛ nde ndjala la nkɔmano. M’ɔkɔngɔ wɔ ɛnɔnyi enanɛyi, nkaana okawoyɛka onkanda, ko afunaka ante: “Lambɔkɔpaka ngo nkofunela la nkoshimela ente olekɔ okotshɔ w’ekekete efula le lemi, kaanga ngopewaka.” Nde akindjɛ ante: “[Onkanda wɔko] wonkembɛka efula ole vɛrse djalisá l’eteyi vundaka oloko wɔmi efula, lemi mpavungɛki lotshinda.” a M’ɔkɔngɔ wɔ nde ndopakisola ekakasano ɛmɔtshi wɛ ndakfulumeyɛka, nkaana afunaka ante: “Lá winá ɛmɔtshi nkɔpaka mpekɔ, mpekɔ nsɔsɔlɔ la nyima Owakɛ wɔ Yehova. Koko vɛrse djɛ ngamfunela mpikamaka l’oloko wɔmi, ole nkotshɛ́ka . . . djɛ nkindjɛ.” Nde akfɛ ante: “L’ilá k’ɛnɔnyi enanɛyi wɛnɛ lako ekete kemboleka nkembɛ ete ngo onkanda wɔko.” Kokanela osasa w’oyalisá la wadjɛ olami w’edjingadjinga wɔsɔ winá wɔ ndalongola onkanda ‘m’ɔkɔngɔ w’etsho efula’! Anto wakoka ndotokawoyɛ ole iso lokasa m’ɔkɔngɔ w’ɛnɔnyi efula.
Onto nkoka ndotokawoyɛ lokasa ilá efula m’ɔkɔngɔ w’iso ndɔpɛyɛ ekete (Lenda itenyi 20) b
21. Lamo ngɔmbɔsa nkano djɛ nkindjɛ ndjokola lokapo lɔ Yehova?
21 Ete ngo sɛnaki, Yehova atotongaka la nkoka ntshikitanyi. Kaanga sosasangaka winá w’olongolaso ekete, tokoka ndjala l’osasa w’efula má mpɛyɛ. Tongokake wɔlɔ winá w’oyɛso l’akoka wa nkotshɛ́ winaso andjawodji. Ole iso tongokake osasa winá w’otokawoyɛwɔ lokasa. Koko, kaanga wambotokawoyɛ lokasa kana lako, tokoka ndjoka osasa mande tombonangha nkambo djɛ wɔlɔ. Ewa ente ekete kenkfumɔ k’ɔpɛyɛ, ‘Yehova alekɔ l’akoka wa nkɔpɛyɛ kɛnɛ keleka kɛsɔ.’ (2 Ɛk. 25:9) Iso topakoke mpɛyɛ ko ndjɛlama la Yehova! La koko, lako osasa woleka mfutama me Yehova. Djɛko ndeke, nyontshɔ tɔshi nkano djɛ ndjokola Papa kɛso kɛ lokapo kɛ l’olongo.
YEEMBO 17 ‘Lemi nkɔpaka’ (lá Otetela)
a Vɛrse djɛ wadjɛ olami w’edjingadjinga ndafunela nkaana nde 2 Djɔanɛ 8, djetepelá ante: ‘Nyoyalame dj’ipa nyo ntshutshɛ kɛnɛ kɛ sananghe la wolo djɛ nyo mba, koko djɛ nyo mba lofuto lɔnyo l’otondo.’
b NSAKISO KƐ NTSHANGO: Asango wambomamaná: Wadjɛ olami w’edjingadjinga afunela nkaana onkanda w’okembɛ. M’ɔkɔngɔ w’ɛnɔnyi efula, ambolongola onkanda wɔ nkaana ndombokawoyɛ lokasa.
