Weepó w’antangi
Winá wɔ Yeso ndananghe Dambo djɛ Nkɔlɔ djɛ Nkfumi, ambeki 70 wa ndatome ntopoposanyɛ yayalaka lampe? Iwɔ w’okadjɛka?
Topakoke mfɛnyɛ ente mande iwɔ watayala winá wɔ Yeso ndananghe Dambo djɛ Nkɔlɔ djɛ Nkfumi, ete koko ambeki 70 watawolama me nde kana w’okadjɛka. Yeso ndakɔpɛ ngo ndjala nya apɔstɔlɔ wande lá mbamba kɛsɔ.
Nde akɔpaki apɔstɔlɔ 12 la ambeki 70. Má efula k’ambeki wande, Yeso asɔnaka ampame 12, wa ndete ante apɔstɔlɔ. (Luka 6:12-16) Nde ayalaki lá Ngalile winá wɔ ‘ndete apɔstɔlɔ wande 12’ la ‘ndátome djɛ ntopoposanyɛ Onkfumi wɔ Ndjambe la ntosadjɛ anto.’ (Luka 9:1-6) Makɔ, lá Judeya, Yeso ‘asɔnaka ambeki 70 ankina ko átomaka ape ape.’ (Luka 9:51; 10:1) Eposelo weyalisá nde, Yeso ayalaka l’ambeki lá djena ntshikitanyi djɛ losango lɔnde yapoposanyemaka.
Ase Juda wakomisá ambeki wa Yeso wananghaki Pasaka ɔnɔnyi onkfumɔ, akoka ndjala la ankfumbo yɛwɔ. (Epo. 12:6-11, 17-20) Winá wɔ nyɔyi kɛnde yasukana, Yeso atshɔka l’ambeki wande tá Jerusalɛmɛ. Koko nde atalɔmba djɛ ambeki wande ankfumɔ wimá Judeya, Ngalile, la Pereya djɛ ndjɛ ndɔfɛtɛ Pasaka esanga la nde. Okama papoo ente, Yeso ndakɔpɛ ngo ndjala nya apɔstɔlɔ wande lá mbamba kɛsɔ. Nde áshimelaka ante: ‘Lambokombolaka efula ndɛ Pasaka kɛnɛ lemi isa nyo lá ntondo kɛ lemi nyɛna ndjolo.’—Luka 22:15.
Ɔsɔ ayalaka elonga kɛ wɔlɔ lá nkambo djɛsɔ. Winá wosukanaka wɔ Yeso mvɔ ete ngo ‘Wɔna Ɔnkɔkɔ wɔ Ndjambe wimɛ mpekanto y’andja.’ (Dj. 1:29) Nde ayalaka ladjɛ mvɔ lá Jerusalɛmɛ, idjena yɛ yalambolaka elambo wɛ Ndjambe. Nyɔyi kɛ Yeso kɛpɛyɛka anto lotshungɔ l’ekekete ndeka lotshungɔ lowaki ankfumbo y’Isariyɛlɛ winá wɔ yalɛka wɔna ɔnkɔkɔ lá otsho wɔ yapose má Edjipito. (1 Kɔ. 5:7, 8) Mpeyi má olambo wɔ Yeso, apɔstɔlɔ 12 wakomaka mpikamelo djɛ otshumano w’Akristo. (Ɛfɛ. 2:20-22) Nkambo djɛ djonyi nde, Jerusalɛmɛ djɛ nyuma dekɔ la ‘awanga 12 wa mpikamelo’ ko l’eteyi wambofuna ‘wiina 12 wa apɔstɔlɔ 12 wa Wɔna Ɔnkɔkɔ.’ (Ndj. 21:10-14) Ee, apɔstɔlɔ wa nkɔmano wɔsaka opiko lá lɛdji l’efula lá ekotshamelo k’alaka wa Ndjambe. Okama papoo lamo Yeso ndakombola ndjala la wɔ lá Pasaka k’ekomo la lá nkambo djenanghemisá m’ɔkɔngɔ wɔ Pasaka—Dambo djɛ Nkɔlɔ djɛ Nkfumi.
Ambeki 70 l’ambeki ankina watayala la Yeso lá ndambo. Koko, ambeki ankfumɔ wa Yeso wa nkɔmano wawa wapɔ má kɛnɛ kɛ Yeso ndananghe: Dambo djɛ Nkɔlɔ djɛ Nkfumi. Lá etsho wɛsɔ ambeki ankfumɔ wakomisá ankfutami w’avuta w’ɔsaka opiko lá isambi y’onkfumi, yɛ Yeso ndáshimela apɔstɔlɔ la otsho wɔkɔ.—Luka 22:29, 30.
