DJAMBA DJƐ WEKELO 30
YEEMBO 36 Tolame eloko wɛso (lá Otetela)
Elakanyelo wɛ djonyi w’owaso me ankfumi y’Isariyɛlɛ
‘Nyo nyɔnghɛna lonkina otshikitano w’olekɔ́ l’antenyɛ onto wɔ wɔlɔ la wɔ nyɛtshi, l’antenyɛ onto wokambela Ndjambe la wopokambela.’—MAL. 3:18.
IKANYI YƐ DJAMBA DJƐNƐ
Tɔnghɛna wopo wɔ Yehova ndɔsaká ankfumi y’Isariyɛlɛ, ko kɛsɔ kengotokotshɛ́ djɛ nsipisoyɛ kɛnɛ k’ɔkɔpande enkambi wɛnde nangha lɔɔko kɛnɛ.
1-2. Kɛkɔnge kɛ Bible ɛnyɛnde lá nkambo dj’ankfumi imɔtshi y’Isariyɛlɛ?
BIBLE djewala ampame ndekana 40 ilɔndjisá ete ngo ankfumi y’Isariyɛlɛ. a Djetoshimela papoo akambo wananghisá amɔtshi l’anteyi kɛwɔ. Ndjɔmbɔmba, kaanga ankfumi imɔtshi yɛ wɔlɔ, wananghaka akambo amɔtshi wa pɔlɔ. Tokolenda ndjɔmbɔmba kɛ Davidɛ, loyalaki Nkfumi kɛ wɔlɔ. Yehova atepelaka ante: ‘Onkambi wɔmi Davidɛ . . . ankilikaki la oloko wɔnde onkfumɔ, má nangha ngo kɛnɛ keyalaki wɔlɔ lá wiso wami.’ (1 Nk. 14:8) Koko, mpame kɛsɔ ananghaka loseka la omoto woyalaki lá mvulu kɛ bala edjinge atshwelaka womɛnde djiinga djɛ nde ntovɔ lá mbandji.—2 Sa. 11:4, 14, 15.
2 L’onkoko onkina, ankfumi efula yɛ nyɛtshi, wananghaka akambo amɔtshi wa wɔlɔ. Tokolenda ndjɔmbɔmba kɛ Rɛhɔboama. Nde ‘ananghaka kɛnɛ kelekɔ́ ohanela’ lá wiso wa Yehova. (2 Ɛk. 12:14) Koko, Rɛhɔboama alɛmɛyɛka otepela wɔ Yehova winá wɔ ndoshimela dj’ipa nana la tɔkɔlɛ djomi tɔ Isariyɛlɛ la djɛ ndatshika dj’iwɔ nsɔna nkfumi kɛwɔ kenkina. Nde akomɛka lonkina angando y’onkfumi wɔnde wolo efula djɛ nama enkambi wɛ Ndjambe m’antonyi wawɔ.—1 Nk. 12:21-24; 2 Ɛk. 11:5-12.
3. Okokaso ndjopola woopó wɔkɔnge, ko ɛnaso lá djamba djɛnɛ lɔ nge?
3 Woopó ɔmɔtshi wɔ djonyi wokikinɛ. Ntsha nkfumi kɛmɔtshi ananghaka akambo wa wɔlɔ la wa nyɛtshi, wopo wɔkɔnge Yehova ndashikikɛka ante nkfumi kapanda alekɔ la nkɔmano lá wiso wande? Ekadjimwelo kɛ woopó wɔsɔ kengotokotshɛ́ djɛ nsipisoyɛ kɛnɛ kɛ Yehova okongande meso. Tɔnghɛna akambo asato wayalaki la ntshina lá wiso wa Yehova winá wɔ ndakɔmɛka ankfumi y’Isariyɛlɛ: eloko wɛwɔ, ndápɛla kɛwɔ, la wopo w’iyoyapɛyɛká lá ɔtɛmwɛlɔ wɔ nsɔsɔlɔ.
IWƆ WAKAMBELAKI YEHOVA L’OLOKO ONKFUMƆ
4. Otshikitano ɔmɔtshi wɔkɔnge woyalaki l’antenyɛ ankfumi yɛ wɔlɔ la yɛ nyɛtshi?
4 Ankfumi isasangɛki Yehova w’ɔtɛmɔlaki l’eloko b wɛwɔ enkfumɔ. Yɛhɔshafata, kanga loyalaki nkfumi kɛ wɔlɔ efula, ‘ahonaka Yehova l’oloko wɔnde onkfumɔ.’ (2 Ɛk. 22:9) Bible djetepela lá nkambo djɛ Josiya ante: ‘Lako nkfumi keyalisá ntondo kɛnde ete ngo nde, kekalwisá le Yehova la oloko wɔnde onkfumɔ.’ (2 Nk. 23:25) Iya otepelaso mo lá nkambo djɛ Salɔmɔ, kanga loyisá ndonangha akambo wa pɔlɔ m’ɔkɔngɔ w’ɛnɔnyi? ‘Oloko wɔnde wotayalaki otondo’ le Yehova. (1 Nk. 11:4) Ole lá nkambo djɛ Abiyamɛ, nkfumi kenkina kɛ nyɛtshi, Bible ntepela ante: ‘Oloko wɔnde wotayala otondo le Yehova.’—1 Nk. 15:3.
5. Pakisola kɛnɛ kesakisola nkambela Yehova l’oloko onkfumɔ.
5 Iya kɛkɔnge kesakisola nkambela Yehova l’oloko onkfumɔ? Onto w’okambela Ndjambe l’oloko onkfumɔ apatshɔka ngo ntɔɔtɛmɔla lá eloyi k’anto toko. Koko, nde ndokambelaka má ngandji la m’ɛkɔpa. Edjinge angolamake ngandji l’ɛkɔpa kɛsɔ lowiko lɔnde l’otondo.
6. Wopo wɔkɔnge w’okokaso nkambela Yehova l’oloko onkfumɔ? (Woongo 4:23; Mateo 5:29, 30)
6 Wopo wɔkɔnge w’okokaso ndjokola ankfumi ikɔpaki Yehova l’eloko wɛwɔ enkfumɔ? Má ndjewɔ ndjimbo yɛ nyɛtshi. Ndjɔmbɔmba, etombo wɛ mbindo nkoka ndjimbola oloko wɔso. Ole ntombe yɛ nyɛtshi la ngandji k’okfudji. Ntsha tɔmɛna ente ekete kɛmɔtshi kembotateyɛ mpɔdjɛ ngandji k’okaso Yehova, tonanghe la wolo djɛ ndoowimɛ.—Wala Woongo 4:23; Mateo 5:29, 30.
7. Lamo oyɛwɔ djonyi ndjewɔ ndjimbo yɛ nyɛtshi?
7 Topakoke ndjawola djɛ oloko wɔso nkapwana. Ntsha topawadjisá, tokoka ndádjimba isɔmɛlɛ má mfɛnyɛ ente topalekɔ la lonyi lɔ ntona ndjimbo yɛ nyɛtshi, mande tolapɛyɛ efula l’elemo wɛ nyuma. Ndjɔmbɔmba, kokanela olekɔ lá bandja lofu lɔ ntshitshi la lɔ lohoye l’ekekete. Ombingela lá mvulu, ko ɔmbɔpɛtshɛ iyɛ. Kɛkɔnge kengonanghema ntsha ombotshika lokfuke oholo? Lohoye lɔ ntshitshi longhingela lonkina lá mvulu. Olakanyelo wɔkɔnge w’owaso? Iso ladjɛ nangha akambo efula ape ngo ndɛ eleelo wɛ nyuma wɛpɛtshɛ pɛtshɛ djokanelo djɛso la Yehova toko. Iso ladjɛ ndjipa lonkina lokfuke lɔ ndjimbo yɛ nyɛtshi, dj’ipa “lohoye” lɔ ntshitshi l’andja wanɛ, kana djalelo djepasasangɛ Ndjambe ndjingela la nkapola eloko wɛso.—Ɛfɛ. 2:2.
IWƆ WALAPƐLAKA MA MPEKANTO YƐWƆ
8-9. Wopo wokɔnge Nkfumi Davidɛ nya Nkfumi Hezekiya iyelola lá ikako? (Lenda djelá loposo.)
8 Ete ngo isotepelaki má djiko, Nkfumi Davidɛ ananghaka evunga wɛ nkekete efula. Koko winá wɔ ɔprɔfɛtɛ Nata ndoshimela djɛ mpekanto kɛnde, Davidɛ alapɛlaka l’okitshakitshɛ onkfumɔ. (2 Sa. 12:13) Má etepela wɛ ndafune la Yeembo 51, tɛna ente lɔpɛdji lɔ ndolapɛla loyalaka lɔ nsɔsɔlɔ. Davidɛ alapɛlaka m’anse k’oloko, koko ape djɛ ndjimba Nata kana dj’ipa nde mba iluku.—Yee. 51:3, 4, 17, etepela welá djiko djɛ shapitrɛ.
9 Edjinge Nkfumi Hezekiya ananghelaka Yehova mpekanto. Bible ntepela nghɔnɛ: ‘Oloko wɔnde w’oloyalaka la otako, ko Ndjambe owokaka nkɛlɛ efula, okaka ole Juda la Jerusalemɛ nkɛlɛ.’ (2 Ɛk. 32:25) Ladjikɛnge Hezekiya ndokomaka otako? Nkoka ndjala nde ɛnaki ante aleka anto ankfumɔ mande ayalaki l’okfudji, alongaka ase Asuriya, kana wopo wɔ ndasale má nsese. Akoka ndjala lonkina otako ndeke lootshindisá djɛ nyɛnyɛ ase Babilɔnɛ okfudji wɔnde, djɛko ndeke ɔprɔfɛtɛ Izaya ndokakola. (2 Nk. 20:12-18) Koko, ete ngo Davidɛ, Hezekiya alapɛlaka l’okitshakitshɛ onkfumɔ. (2 Ɛk. 32:26) Ekomo ekomo, winá wɔ ndoyooshishimaka, Yehova ɔwɛnaka ante alekɔ nkfumi kɛ nkɔmano ‘kekindjisá nangha kɛnɛ keyalaki wɔlɔ.’—2 Nk. 18:3.
Nkfumi Davidɛ nya Nkfumi Hezekiya walapɛla l’okitshakitshɛ onkfumɔ m’ɔkɔngɔ w’iwɔ mba ikako m’ɔtɛ wɔ mpekanto yɛwɔ (Lenda itenyi 8-9)
10. Wopo wɔkɔnge Amaziya ndelola lá ikako?
10 L’onkoko onkina, Amaziya, Nkfumi kɛ Juda ananghaki kɛnɛ keyalaki wɔlɔ ‘koko ape l’oloko ɔmɔ.’ (2 Ɛk. 25:2) Ohanela wɔkɔnge ndananghe? M’ɔkɔngɔ wɔ Yehova ndokotshɛ́ djɛ nde ndonga ase Edɔmɔ, Amaziya awangaka ntɛmɔla tondjandjambe tɔwɔ. c Manyi, winá w’ɔprɔfɛtɛ wɔ Yehova ndopangola, nde okilikaka.—2 Ɛk. 25:14-16.
11. Lá nkilika 2 Kɔrɛtɔ 7:9, 11, kɛkɔnge k’oyɛso ladjɛ nangha djɛ mba imeyelo? (Lenda edjinge asango.)
11 Elakanyelo wɛkɔnge isombowa má ndjɔmbɔmba yɛnɛ? Iso ladjɛ ndápɛla má mpekanto yɛso la nangha la wolo dj’ipa nkalɔ nkfɔ lá mpekanto yɛkɔ. Iya ntsha tokokolo t’otshumano wambɔtɔpɛyɛ dako, kaanga l’ikakambo yɛ daambi? Topakoke nyɛna ente Yehova kana tokokolo wambotokadjɛ. Kaanga ankfumi y’Isariyɛlɛ iyalaki anto wɔlɔ, wayalaki la djonyi dj’alako ole djɛ tokako. (Heb. 12:6) Winá w’owaso ikako, iso ladjɛ 1) ndjelola l’okitshakitshɛ, 2) nangha etshikitano wɛlɔmbama, la 3) nkindjɛ nkambela Yehova l’oloko wɔso onkfumɔ. Ntsha tombolapɛla má mpekanto yɛso, Yehova angotimeyɛ.—Wala 2 Kɔrɛtɔ 7:9, 11.
Winá w’owaso ikako, iso ladjɛ 1) ndjelola l’okitshakitshɛ, 2) nangha etshikitano wɛlɔmbama, la 3) nkindjɛ nkambela Yehova l’oloko wɔso onkfumɔ (Lenda itenyi 11) f
IWƆ WALAPƐYƐKI L’ƆTƐMWƐLƆ WƆ NSƆSƆLƆ
12. Pekapeka nkambo djɛkɔnge djetshikitanyɛki ankfumi yɛ wɔlɔ la yɛ pɔlɔ?
12 Ankfumi yɛ Yehova ndɔshi ante ase nkɔmano walapɛyɛki l’ɔtɛmwɛlɔ wɔ nsɔsɔlɔ. Edjinge wakembɛki anto w’iyalɔndjɛka djɛ nangha wopo wɔkɔ ɔmɔ. Lá nsɔsɔlɔ, iwɔ wananghaka evunga, ete ngo isɛnaki. Koko walapɛyɛka le Yehova lá kenkfumɔ ole wananghaka la wolo djɛ nyimɛ ɔtɛmwɛlɔ wɔ tosakandole d má owila.
13. Ladjikɛnge Yehova ndɔshi Nkfumi Ahaba ete ngo onto wɔ nyɛtshi?
13 Iya otepelaso mo djɛ ankfumi yɛ Yehova ndɔshi ante anto wa pɔlɔ? Lá nsɔsɔlɔ watananghaki ngo nyɛtshi. Kaanga Ahaba, loyalaki Nkfumi kɛ nyɛtshi efula, ɛnyɛka ndambo k’okitshakitshɛ la ananghaka nkiyana lá wopo wɔ ndɔshi opiko djɛ ndjaka Nabɔtɛ. (1 Nk. 21:27-29) Apikaka lonkina angando la alongaka ambandji efula lá nkambo djɛ Isariyɛlɛ. (1 Nk. 20:21, 29; 22:39) Koko Ahaba ewamaki ete ngo onto w’onanghaki djɛ ɔtɛmwɛlɔ w’ongolo mfulanela má ndjimbo kɛ wadjɛnde. Nde atalapɛla má nkambo djɛsɔ.—1 Nk. 21:25, 26.
14. a) Ladjikɛnge Yehova ndɔshi Nkfumi Rɛhɔboama ete ngo onto wɔ nyɛtshi? b) Nkambo djɛkɔnge djɛ ankfumi yɛ nyɛtshi iyalekaka nangha?
14 Tokolenda nkfumi kenkina kɛ pɔlɔ, Rɛhɔboama. Ete ngo isotepelisá, nde ananghaka akambo efula wa wɔlɔ l’ɛlɔndjɛlɔ kɛnde. Koko winá wɔ lowandji lɔnde iyashikimala, nde akadjɛka Ɛlɛmbɛ wɛ Yehova ko awangaka ntɛmɔla tondjandjambe t’engolo. (2 Ɛk. 12:1) M’ɔkɔngɔ, nde akakanyɛki l’antenyɛ ɔtɛmwɛlɔ wɔ nsɔsɔlɔ la w’ongolo. (1 Nk. 14:21-24) Ape ngo Rɛhɔboama nya Ahaba ndeke loyalisá ankfumi ivungisá mboka k’ɔtɛmwɛlɔ wɔ nsɔsɔlɔ. Lá nsɔsɔlɔ, ankfumi efula wasukaka ɔtɛmwɛlɔ w’ongolo lá topo tɔmɔtshi. Okama papoo ente, lá wiso wa Yehova, ndápɛyɛ l’ɔtɛmwɛlɔ wɔ nsɔsɔlɔ iyayalaka nde nkambo dj’ekekete efula djɛnyɛki ntsha nkfumi alakɔ onto wɔlɔ kana lako.
15. Lamo ndápɛyɛ l’ɔtɛmwɛlɔ wɔ nsɔsɔlɔ oyɛwɔ djonyi efula le Yehova?
15 Ladjikɛnge ɔtɛmwɛlɔ iyayalaka la ntshina efula le Yehova? Elonga kɛ ntondo nde, ankfumi ndeke loyalaki l’odjito wɔ ndɔndjɛ enkambi wɛ Ndjambe tá ɔtɛmwɛlɔ wɔ nsɔsɔlɔ. Lonkina, ɔtɔmwɛlɔ w’ongolo wakomɛki djɛ nangha mpekanto yɛ nkekele la akambo wa lɛngɛyɛ. (Oze. 4:1, 2) Lá djiko djɛ lasɔ, ankfumi l’ase Isariyɛlɛ wamboshiyɛká ndalambola le Yehova. Djɛko ndeke, Bible ɛdjɛnde wopo w’iyoyapɛyɛka l’ɔtɛmwɛlɔ w’ongolo la loseka. (Jɛr. 3:8, 9) Onto w’onangha loseka, ambonanghela wadji kana womɛnde mpekanto k’ekekete efula. Lá wopo wɔkɔ ɔmɔ, onkambi wɔ Yehova wombolalambola le nde w’olapɛyɛ l’ɔtɛmwɛlɔ w’ongolo, onanghela mpekanto k’ekekete efula. e—Mvu. 4:23, 24.
16. Lá wiso wa Yehova, kɛkɔnge keleka ntshikitanyɛ anto wa wɔlɔ la wa nyɛtshi?
16 Olakanyelo w’ɔkɔnge w’owaso? Lá nsɔsɔlɔ, iso ladjɛ ndjewɔ ɔtɛmwɛlɔ w’ongolo. Koko iso ladjɛ ndápɛyɛ l’ɔtɛmwɛlɔ wɔ nsɔsɔlɔ la nangha akambo efula l’olemo wɔ Yehova. Ɔprɔfɛtɛ Malaki atepelaka papoo kɛnɛ ketshikitanyɛ onto wɔ wɔlɔ la wɔ nyɛtshi lá wiso wa Yehova. Nde afunaka ante: ‘Nyo nyɔnghɛna lonkina otshikitano w’olekɔ́ l’antenyɛ onto wɔ wɔlɔ la wɔ nyɛtshi, l’antenyɛ onto wokambela Ndjambe la wopokambela.’ (Mal. 3:18) Djɛko ndeke, totatshikake kaanga ekete kɛmɔ, ayale kaanga evunga la wɛdju wɛso, ntɔtɛwɔla tii lá lɛdji lɔso ntshika ntɛmɔla Ndjambe. Ntshika nkambela Yehova oyɛnde nde mpekanto k’ekekete efula.
17. Wopo wɔkɔnge ɔsɔnwɛlɔ wɔ wadji kana wome oyɛwɔ l’eposelo lá wopo w’ɔtɛmɔlaso Yehova?
17 Ntsha oyɛnde epolo ko okombola ntshukana, ɛna wopo wɔ etepela wɛ Malaki ɛnyɛwɔ wopo wɔ nsɔna wadji kana wome djɛ nkambela Ndjambe? Onto nkoka ndjala la wekeka amɔtshi, ko ntsha apakambela Ndjambe, ɔsama winá wɔsɔ ete ngo onto wɔ wɔlɔ lá wiso wa Yehova? (2 Kɔ. 6:14) Winá wɔ nyɔngɔpɛtshɛ, nde angokokotshɛ́ djɛ nkambela Yehova la nkɔmano? Tokolenda nkambo djɛnɛ: Wadji w’ampanghano wa Nkfumi Salɔmɔ wakokaki ndjala la wekeka amɔtshi. Koko iwɔ watakambelaki Yehova, ole wadjimbolaka Salɔmɔ ndambo ndambo djɛ nde nkambela tondjandjambe.—1 Ɛk. 11:1, 4.
18. Kɛkɔnge k’ambotshi oyɛwɔ ladjɛ ndjekɛ wana wawɔ?
18 Ambotshi, nyokoka nkamba l’ɛkɔndɔ w’ankfumi djɛ nkona osasalo w’ɔtɛmwɛlɔ wɔ Yehova le wana wanyo. Nyakotshɛ́ dj’iwɔ nyɛna ambɔ Yehova ɔsaki ante nkfumi alekɔ onto wɔ wɔlɔ kana wɔ nyɛtshi ngo ntsha nkfumi kɛkɔ ananghaki djɛ ɔtɛmwɛlɔ wɔ nsɔsɔlɔ mfulanela. Nyekɛ wana wanyo má etepela la ndjɔmbɔmba yɛnyo wayi wa nyuma, ete ngo ndjeka Bible, ndjingela nsanghanyɛ, la mpoposanyɛ, ndeke loleka djonyi lá mbiko yɛnyo. (Mat. 6:33) Ntsha lako, wana wanyo wanghɛna ambɔ “iyomboyalá Ewakɛ wɛ Yehova ngo mande nyo ambotshi wawɔ nyolekɔ Ewakɛ,” koko ape mande wakombola ndokambela. Eposelo wengoyala nde, ɔtɛmwɛlɔ wɔ Yehova wopangoyala ekete keleka djonyi le wɔ, kana wakoka ntshika ndokambela.
19. Nkongi djɛkɔnge dj’okotshɛso lá nkambo dj’onto w’ombotshika nkambela Yehova? (Lenda ole ipapango “ Okoka nkalɔ le Yehova!”)
19 Ntsha onto ambotshika nkambela Yehova, kɛsɔ kɛnyɛ ente nde apokambelaki lonkina? Lako, ladjikɛnde nde akoka ndápɛla ko nkalɔ l’ɔtɛmwɛlɔ wɔ nsɔsɔlɔ. Djɛ nangha nkɔkɔsɔ, nde ladjɛ ndjala l’okitshakitshɛ ole ndjawola okotshɔ wɔ tokokolo t’otshumano. (Dja. 5:14) Ndjala lonkina ilongo yɛ Yehova ɛdje ndjila welo w’efula!
20. Ntsha tombokola ankfumi yɛ wɔlɔ, Yehova ndɔngɔtɔsa ngete mo?
20 Ko elakanyelo wɛkɔnge isombowa m’ankfumi y’Isariyɛlɛ? Tokoka ndjala ete ngo ankfumi yɛ wɔlɔ ntsha tombokindjɛ nkambela Yehova l’oloko onkfumɔ. Nyontshɔ towa elakanyelo má evunga wɛso, tolapɛlɛ, la tonanghe etshikitano wɛlɔmbama. Tovungɔ lonyi lɔ ndápɛyɛ lá ɔtɛmwɛlɔ w’ɛtɔyi kɛ Ndjambe kɛ nsɔsɔlɔ. Ntsha ɔmbɔwɔlama Yehova, angɔkɔsa ete ngo onto w’onangha kɛnɛ kelekɔ́ wɔlɔ lá wiso wande.
YEEMBO 45 Ekanedji kɛ yimba k’oloko wɔmi (lá Otetela)
a Lá djamba djɛnɛ, itepela “ankfumi y’Isariyɛlɛ” osakisolawɔ nde ankfumi inkfumɔ ilɔndjisá enkambi wɛ Ndjambe, ayale ilɔndjisá lá onkfumi wɔ Juda wɔ tɔkɔlɛ tope, ayale ilɔndjisá lá onkfumi w’Isariyɛlɛ wɔ tɔkɔlɛ djomi, kana ilɔndjisá lá tɔkɔlɛ 12 tɔkɔ tonkfumɔ.
b DJƐ NDJOKA WƆLƆ: Mbala efula Bible nkambaka l’itepela ‘oloko’ djɛ ntepela djɛ otondo wɔ lonto lɔ l’eteyi lɔ onto, ndjila ole nsaki, tokanyi, eyalelo, akoka, mposɛ la ekoma wɛnde.
c Lá nsɔsɔlɔ, ankfumi iyalaki ampanghano wayalaki l’ekfumbo kɛ ntɛmɔla tondjandjambe tɔ ewila w’iyalongaka.
d Nkfumi Asa ananghaka mpekanto yɛ nkekete efula. (2 Ɛk. 16:7, 10) Koko, Bible ntepela wɔlɔ lá nkambo djɛnde. Kaanga má bango ndatone ikako, nkoka ndjala nde alapɛlaka m’ɔkɔngɔ. L’akambo ankfumɔ, wekeka wande wadjipaka evunga wɛnde. Ɛnama ente, Asa atɛmɔlaki ngo Yehova la atɔnɔlaka djɛ nyimɛ ɔtɛmwɛlɔ wɔ tosakandole má onkfumi wɔnde.—1 Nk. 15:11-13; 2 Ɛk. 14:2-5.
e Tokoka nyɛna ente ɔtɛmwɛlɔ wolekɔ djonyi efula le Yehova ladjikɛnde, ɛlɛmbɛ epe wɛ ntondo wɛ Ɛlɛmbɛ wɛ Mɔsɛ, weshimba djɛ ntɛmɔla onto kana ekete kenkina nyimɛ ngo Yehova.—Epo. 20:1-6.
f NSAKISO KƐ ASANGO WELÁ: Ikokolo imɔtshi y’olangala ashimela wɔnanyɔ wopo w’olakiyanyɛnde djɛ ekfumbo kɛ wɔnanyɔ kɛ nɔyi. Wɔnanyɔ ambawola dako l’okitshakitshɛ onkfumɔ, ambonangha etshikitano wɛlɔmbama, la akindjɛ nkambela Yehova la nkɔmano nkfumɔ
