DJAMBA DJƐ WEKELO 29
YEEMBO 121 Iso ladjɛ ndjala la ndákota (lá Otetela)
Tokindjɛ mbadjɛ djɛ mpikama l’ehemba
‘Nyowadjɛ la nyokindjɛ ndɔmba dj’ipa nyo ndjingela l’ehemba.’—MAT. 26:41.
IKANYI YƐ DJAMBA DJƐNƐ
Djamba djɛnɛ ngotokotshɛ́ djɛ nyɛna djonyi djɛ ndjewɔ nangha mpekanto la ndjewɔ wina watɔlá tá mpekanto.
1-2. a) Ndjewo kɛkɔnge kɛ Yeso ndewola ambeki wande? b) Ladjikɛnge ambeki iyɔkfɔka lá wɛdju wɛ wana w’anto? (Lenda edjinge asango.)
‘OLOKO nkɔpaka, koko demba ndeke wɔdju.’ a (Mat. 26:41b) Má etepela wɛsɔ, Yeso ɛnyɛka ante tolekɔ anto wa ntshamba djɛ djɔ la tokoka nangha evunga. Koko etepela wɛnde wɛsɔ welekɔ la ndjewo kɛnɛ: Towadjɛ dj’ipa ndáwilela oloko la lɛdji l’indeko. Lá nkɔlɔ, ambeki watepelaka l’eshikikelo kenkfumɔ nkano djɛwɔ dj’ipa nkadjɛ Owandji wɔwɔ. (Mat. 26:35) Iwɔ wakombolaki nangha kɛnɛ kelekɔ́ wɔlɔ. Koko, watasipisoyɛki ambɔ ekakasano wɛ wolo wekoka ndatshutsheyɛ wolo wɔ nangha kɛnɛ kelekɔ wɔlɔ. Djɛko ndeke, Yeso ndawewola ante: ‘Nyowadjɛ la nyokindjɛ ndɔmba dj’ipa nyo ndjingela l’ehemba.’—Mat. 26:41a.
2 Yɛnyi nde, ambeki watakindjɛ mbadjɛ. Winá wɔ yavunde Yeso, iwɔ watshikalaka esanga lande ndo koko wokaka wɔma ko walotaka? Ladjikɛnde iwɔ lako mbadjɛ, ambeki wananghaka kɛnɛ kɛ yatepela ambɔ wapananghaki, wakadjɛka Yeso.—Mat. 26:56.
Yeso ewoyɛ ambeki wande dj’iwɔ nkindjɛ mbadjɛ la ndálama m’ehemba, koko iwɔ wambookadjɛ (Lenda itenyi 1-2)
3. a) Djɛ ndjala la nkɔmano le Yehova, lamo oyɛso ladjɛ ndjewɔ djɛ ndáwilela oloko lá lɛdji l’indeko? b) Kɛkɔnge k’ɔkɔpaso ntepela lá djamba djɛnɛ?
3 Topakoke ndawilela oloko lá lɛdji l’indeko. Lá nsɔsɔlɔ, iso ladjɛ ndɔsa nkano dj’ipa kaanga ekete kɛmɔ ntowangoyɛ me Yehova. Koko, iso tolekɔ anto wa ntshamba djɛ djɔ la tokoka ndjingela l’ehemba. (Ɔrɔ. 5:12; 7:21-23) Ipa la ndjewo, tokoka ndotanema l’akambo wakoka ntokomɛ djɛ nyɛna ente akambo wa pɔlɔ walekɔ wɔlɔ. Djɛ ntshikala la nkɔmano le Yehova la Wɔnande, tolekɔ la djonyi djɛ nkilika alako wa Yeso djɛ nkindjɛ ndálama má ikanyi yɛ nangha mpekanto. Djamba djɛnɛ ngotokotshɛ́ djɛ nangha nkambo djɛsɔ. Nkambo djɛ ntondo, tongoshishima akambo w’oyɛso ladjɛ mbadjɛ. Manyi, tongotepela wopo w’okokaso ndáwomba má ehemba. L’ekomo, tongoshishima wopo w’okokaso nkindjɛ mbadjɛ.
TOKINDJƐ MBADJƐ, LÁ AKAMBO WAKƆNGE?
4-5. Ladjikɛnge oyɛso ladjɛ mbadjɛ kaanga lá mpekanto yɛ tɛkɛtɛkɛ?
4 Kaanga mpekanto yɛ tɛkɛtɛkɛ ikoka ntshita djokanelo djɛso la Yehova. Lonkina, ikoka ntokomɛ djɛ nangha mpekanto yɛ nkekete efula.
5 Isankfumɔ topomana l’akambo wakoka ntokomɛ djɛ nangha mpekanto. Koko onto l’onto l’anteyi kɛso alekɔ l’akambo amɔtshi w’oyɛnde wɔdju, wakoka ndokomɛ djɛ nangha mpekanto k’ekekete, djɛ ndjala la eyalelo kɛ mbindo kana djɛ ndjala la yimba y’andja wanɛ. Ndjɔmbɔmba, onto ɔmɔtshi nkoka nana mbandji l’ikanyi yɛ nangha wayi wa mbindo wa ntshɛngi. Onkina akoka ndjala la eyalelo kɛ wayi wa mbindo, ete ngo mɔnghɔnyɔla ntenyi djɛ demba djɛ botshi kana ndenda asango wɛnyɛwɔ anto enghanghunya. Koko amɔtshi wakoka ndjala la wɔma w’onto, yimba yɛ dipanda, yimba y’ɛnkɛkɛlɛ kana akambo ankina. Ete ngo Djakɔbɔ ndatepela, ‘onto l’onto mpembamaka winá w’awolande nsepama la ndjimbama má mposɛ kɛnde.’—Dja. 1:14.
6. Oyɛso ladjɛ ndjewa akambo wakɔnge?
6 Wɛ ewa akambo amɔtshi wakokomɛka mbala efula l’ehemba? Apangoyala wɔlɔ iso ndádjimba ente topalekɔ la wɛdju kana nkanela ente topakoke nangha evunga. (1 Dj. 1:8) Poolo ɛnyɛka ante kaanga ‘anto walekɔ́ l’akoka wa nyuma’ wakoka mpembama ntsha wapakindjisa mbadjɛ. (Nga. 6:1) Isɔmɛlɛ ngɛndjɔ ladjɛ ndjewa wɛdju wɛso la akambo w’oyɛso wɔdju.—2 Kɔ. 13:5.
7. Oyɛso ladjɛ ndjila yimba efula l’akambo wakɔnge? Pɛyɛ ndjɔmbɔmba.
7 Ntsha tombisola akambo watokomɛ mbala la mbala l’ehemba, kɛkɔnge k’oyɛso ladjɛ nangha? Tonanghe la wolo djɛ mpikama lá ntondo k’ehemba wɛkɔ! Ndjɔmbɔmba, l’etsho wefunamaki Bible, idjena ilekaki wɔdju yɛ epele kɛ ngando nde nkfuke. Djɛko ndeke iyalekaka nama nkfuke efula. Wopo wɔkɔ ɔmɔ ndeke, tolekɔ la djonyi djɛ ndjila yimba efula l’akambo w’ewaso ente tolekɔ wɔdju.—1 Kɔ. 9:27.
WOPO WƆ MBADJƐ LÁ NTONDO K’EHEMBA LA MPEKANTO
8-9. Wopo wɔkɔnge olangala w’ɔkɔndɔlawɔ lá Woongo shapitrɛ 7 ndotewɔ djɛ nangha mpekanto k’ekekete? (Woongo 7:8, 9, 13, 14, 21)
8 Wopo wɔkɔnge w’okokaso ndálama? Tokolenda olakanyelo w’okokaso mba m’olangala w’otepelawɔ lá Woongo shapitrɛ 7. Nde ewanaka la omoto w’olekɔ la nsɔngu kɛ wayi wa mbindo wa ntshɛngi. Vɛrse 22 djɛnyɛ ante olangala wɔsɔ okilikaka ‘mbala kɛkɔ kɛmɔ.’ Koko ete ngo isɛnaki lá avɛrse wemá djiko, nde atapolaka wina efula w’ɔtɔlisá ndambo ndambo djɛ ntonangha mpekanto.
9 Kɛkɔnge k’okomeyisá djɛ nangha mpekanto? Ntondo ntondo la nkɔlɔ, nde ‘ahetaka lá iwoka ilekɔ entshupa la asakano wa mboka’ wa omoto wɔkɔ. Manyi atakɛndaki lá mboka kɛtɔla tá mvulu kɛ omoto wɔkɔ. (Wala Woongo 7:8, 9.) Ko m’ɔkɔngɔ, winá wɔ ndɛnyi omoto, nde lako ndopengɔ. Makɔ nde awolaka nsomana nyande la owekameyɛka winá wɔ ndoshimelaka djɛ elambo wɛ djokanelo wɛ ndɔpɛyɛ, mbala kɛmɔtshi má ndoshikikɛ ante apalekɔ onto wɔ nyɛtshi. (Wala Woongo 7:13, 14, 21.) Olangala wɔsɔ ndotewɔ akambo watɔla tá mpekanto, ntshimi atoyalama má ehemba la mpekanto.
10. Wopo wɔkɔnge onto ɔmɔtshi lɔɔko kɛnɛ okokande nangha ovunga wɔkɔ ɔmɔ ete ngo olangala wɔnɛ?
10 Ɔkɔndɔ wɔ Salɔmɔ wɛnyɛ kɛnɛ kekoka nkomela onkambi wɔ Yehova onkfumɔ. Onto ɔmɔtshi wombonangha mpekanto k’ekekete nkoka mpɛyɛ elonga ante, ntsha akfɔka lá mpekanto nde, mande akomaka “mbala kɛkɔ kɛmɔ” lá nkambo djokomeyisá djɛ nde nangha mpekanto. Koko ntsha nde ntɔnɔla l’akambo wa ndananghe lá ntondo kɛ nde nkfɔ lá mpekanto, akoka nyɛna ante ananghaka akambo amɔtshi wokomeyisá djɛ nangha mpekanto. Mbala imɔtshi nde asɔnaka tolongo topakɔpɛ Yehova, asɛkɛlɔ wa nyɛtshi, awembolaka sitɛ y’ɛntɛrnɛtɛ ipalekɔ wɔlɔ, kana atshɔka tá djena mɔtshi djɛ Okristo ndopakoke nsɔpa. Akoka ndjala atshikaka ekfumbo kɛ ndɔmba, kɛ mbala Bible, kɛ ndjingelaka nsanghanyɛ, kana kɛ mpoposanyɛ. Ete ngo olangala w’otepelawɔ lá Woongo, nde atakoma lá mpekanto ‘mbala kɛkɔ kɛmɔ,’ koko ɔsaka akano wa nyɛtshi efula wokomisá djɛ ndonangha mpekanto.
11. Kɛkɔnge k’oyɛso ladjɛ ndjewɔ dj’ipa nkfɔ l’ehemba?
11 Olakanyelo wɔkɔnge w’owaso? Iso ladjɛ ndota ape ngo mpekanto toko koko ole wina watɔla tá mpekanto. Salɔmɔ apakisola nkambo djɛsɔ m’ɔkɔngɔ wɔ nkɔndɔla kɛnɛ kehetisá l’antenyɛ olangala la omoto wolekɔ la nsɔngu kɛ wayi wa mbindo wa ntshɛngi. Nde atepela nghɔnɛ lá nkambo djɛ omoto: ‘Tawolake mpeta lá amboka yɛnde.’ (Woo. 7:25) Atepela lonkina lá nkambo djɛ omoto wɔ nyɛtshi ante: ‘Wangɔ otale mende; tɔsɛmɛlake entshupa la wiso wɔ mvulu kɛnde.’ (Woo. 5:3, 8) Ɛwo, tongoyalama má mpekanto ntsha iso nkindjɛ ndjala ibango la akambo wakoka ntokomɛ djɛ nangha mpekanto. b Kɛsɔ kesakisola ente kaanga ntsha djoyi mɔtshi mpalekɔ nyɛtshi le Okristo, topakoke nangha nkama tewa ente nkoka ntingeyɛ l’ehemba la ntokomɛ dj’iso nangha nkambo mɔtshi djɛ nyɛtshi.—Mat. 5:29, 30.
12. Djɔbɔ ndɔshi nkano djɛkɔnge, ko wopo wɔkɔnge iyokotshɛ́ djɛ nde ndálama m’ehemba? (Djɔbɔ 31:1)
12 Djɛ mbangɔ akambo ankfumɔ watɔla tá mpekanto, iso ladjɛ ndjala ndii l’akano waso. Nghɔsɔ ndeke Djɔbɔ ndananghe. Nde ‘akɔtaka isambi la wiso’ wande dj’ipa nde ndula kaanga omoto ɔmɔ. (Wala Djɔbɔ 31:1.) Má mpikama lá nkano djɛnde djɛsɔ, nde ayashimbaka dj’ipa nangha loseka. Ole iso tokoka ndɔsa nkano djɛ ndjewɔ akambo wakoka ntokomɛ djɛ mpembama.
13. Ladjikɛnge oyɛso ladjɛ nama timba tɔso? (Lenda edjinge asango.)
13 Iso ladjɛ nama lonkina timba tɔso. (Epo. 20:17) Anto amɔtshi nkoka mfɛnyɛ ambɔ lako nyɛtshi nkanela akambo wapɛyɛ amposɛ yɛ nyɛtshi, ntsha onto atananghe akambo wakɔ. Koko tokanyi tɔ nghɔsɔ tolekɔ nyɛtshi. Onto w’okanela akambo wapɛyɛ amposɛ yɛ nyɛtshi ndjetedjɛka amposɛ yɛ nyɛtshi. Ntsha ombonangha nghɔsɔ, ongoloposɛ ehemba wɛ nghopakoke mpika bongo. Lá nsɔsɔlɔ, winá ɛmɔtshi mposɛ yɛ nyɛtshi ntoyelaka ngo iyɔmɛlɛ lá timba tɔso. Nkambo djɛ djonyi dj’oyɛso ladjɛ nangha nde, mpɔnyɔla tokanyi tɔ mbindo tɔsɔ mbala kɛmɔ, ko ndaapɛnyɛ la tɔ wɔlɔ. Winá w’onangaso nghɔsɔ, tongonangha dj’ipa tokanyi tɔ nyɛtshi ndokoma mposɛ kɛ wolo kengoyalá okakasano leso djɛ ndonanyɛ edjinge kekoka ntokomɛ djɛ nangha mpekanto k’ekekete.—Flp. 4:8; Kɔl. 3:2; Dja. 1:13-15.
Iso ladjɛ ntona ekete kenkfumɔ kekoka ntokomɛ l’ohemba (Lenda itenyi 13)
14. Kɛkɔnge kekoka ntokotshɛ́ lonkina djɛ ndálama m’ehemba?
14 Kɛkɔnge k’okokaso nangha lonkina dj’iso ndálama m’ehemba? Iso ladjɛ ndáshikikɛ winá enkfumɔ ente tongowa wapɔ w’efula má nɛmɛyɛ ɛlɛmbɛ wɛ Yehova. Winá ɛmɔtshi akoka ndjala okakasano ndjokanyɛ tokanyi, la mposɛ yɛso la kɛnɛ kɛ Ndjambe awolande, koko ntsha tombonangha nghɔsɔ, tongoyala la vu djɛ lá yimba.
15. Wopo wɔkɔnge nkona mposɛ yɛ wɔlɔ yongotokotshɛ́ djɛ mpikama l’ehemba?
15 Tolekɔ la djonyi djɛ nkona mposɛ yɛ wɔlɔ. Ntsha tombeka djɛ ‘ntona kɛnɛ kelekɔ́ nyɛtshi la nkɔpa kɛnɛ kelekɔ wɔlɔ,’ tongokembɛ nkano djɛso djɛ nangha kɛnɛ kelekɔ́ wɔlɔ, ole tongewɔ akambo wakoka ntokomɛ djɛ nangha mpekanto. (Amɔ. 5:15) Mposɛ yɛ wɔlɔ ingotokotshɛ́ dj’iso mpikama ndii ntsha tombopomana la nkambo djɛ sopalalɔngɔsɔlisa ntondo kana djɛ sopewisa.
16. Wopo wɔkɔnge elemo wɛ nyuma okokawɔ ntokotshɛ́ djɛ nkindjɛ mbadjɛ? (Lenda edjinge asango.)
16 Wopo wɔkɔnge w’okokaso nkona mposɛ yɛ wɔlɔ? Iso ladjɛ mpetshɛ winá efula lá elemo wɛ nyuma. Winá w’oyɛso lá nsanghanyɛ yɛ Akristo kana l’olemo w’ipoposanyɛ, apayalaka wɔdju nangha kɛnɛ kelekɔ́ nyɛtshi. Koko, iso nkembɛka mposɛ yɛso djɛ nsasangɛ Yehova. (Mat. 28:19, 20; Heb. 10:24, 25) Má mbala, ndjeka la ntɔnɔla l’Otepela wɔ Ndjambe, tongokembɛ ngandji kɛ nangha kɛnɛ kelekɔ́ wɔlɔ la ntona kɛnɛ kelekɔ́ nyɛtshi. (Yos. 1:8; Yee. 1:2, 3; 119:97, 101) Tovungɔ kɛnɛ kɛ Yeso ndashimela ambeki wande: ‘Nyokindjɛ ndɔmba dj’ipa nyo ndjingela l’ehemba.’ (Mat. 26:41) Winá w’ohetshɛso winá efula la Papa kɛso kɛ l’olongo lá lɔlɔmbɔ, tongowake lɔɔla má okotshɔ wɔnde la tongokembɛke nkano djɛso djɛ ndosasangɛ.—Dja. 4:8.
Ndjala l’enkfumbo kɛ nangha akambo wa nyuma angotokotshɛ́ djɛ mpikama l’ehemba (Lenda itenyi 16) c
KINDJƐ MBADJƐ
17. Pɛtɛlɔ ndakfu mbala efula l’ohemba wɔkɔnge?
17 Lá nsɔsɔlɔ, tokoka ndonga wɛdju wɛso ɛmɔtshi. Koko tokoka nkindjɛ nana mbandji la wɛdju enkina winá la winá. Tokolenda kɛnɛ kekomelisá ɔpɔstɔlɔ Pɛtɛlɔ. Nde atalaka ilonga yɛ wɔma w’onto winá wɔ ndanghana Yeso mbala isato. (Mat. 26:69-75) Ɛnama ete ngo Pɛtɛlɔ afumboyɛka wɔma mande apɛyɛka owakɛ l’oloko wolo onkfumɔ lá nkambo djɛ Yeso lá Mvulu kɛ Tominanyi tɔ lá djiko t’ase Juda. (Ele. 5:27-29) Koko, ɛnɔnyi emangha masɔ, nde ‘okaka oloyi w’anto wambopa ntɛtɔ wɔma,’ ko atshikaka ndɛ esanga l’Akristo w’ase ewila. (Nga. 2:11, 12) Wɔma wɔ Pɛtɛlɔ wokalɔka lonkina. Nkoka ndjala nde atafumboyɛ wɔma wɔnde lotshinda lotshinda.
18. Kɛkɔnge kekoka nanghema lá kɛnɛ kelendana la nkɔmɔ mɔtshi djɛ nyɛtshi?
18 Tokoka ndopomana la nkambo djɛfɛna la djɛnde. Ngete mo? Tokoka nkalɔ nangha nkambo mɔtshi dj’okanelaso ente tombotshiká. Ndjɔmbɔmba, wɔnanyɔ ɔmɔtshi asuyɛ ante: “Nanaka la olendelo w’asango wɛnyɛwɔ anto enghanghunya l’ilá k’ɛnɔnyi djomi ko ndáshikikɛka ente lambotshika lotshinda. Koko winá ɛmɔtshi mpembamaki djɛ ndenda lonkina.” Mpeyi ngo atapekɔ. Nde ayɛka ndɛna ante nde ladjɛ ndjila welo w’efula djɛ mpikama lá ɛkɔmɔ kɛsɔ, mbala imɔtshi lowiko lɔnde l’otondo lá nkfumbo djɛ akambo djɛnɛ. Mpeyi l’okotshɔ wɔ wadjɛnde la wɔ tokokolo t’otshumano, nde ɔsaka akano wa wolo efula djɛnde ntshininala lá ntondo k’olendelo w’asango wɛnyɛwɔ anto enghanghunya.
19. Wopo wɔkɔnge w’okokaso mpikama lá ntondo k’ɛkɔmɔ kɛmɔtshi kɛ sopatshike?
19 Wopo wɔkɔnge w’okokaso mpika bongo lá ntomdo k’ɛkɔmɔ kɛmɔtshi kɛ sopatshike dj’ipa nkoma lá mpekanto? Má nkilika dako djɛ Yeso djelendana l’ehemba djɛnɛ: ‘Nyowadjɛ.’ Kaanga lá winá wɛnɛ ente olekɔ la lonyuma lɔ wɔlɔ, kindjɛ ndjewɔ akambo wakoka nkokomɛ l’ohemba. (1 Kɔ. 10:12) Kindjɛ nangha akambo wakokotshisá djɛ ndonga wɛdju wɛsɔ. Woongo 28:14 ɛnyɛ ante: ‘Osasa le onto w’owadjɛ winá enkfumɔ.’—2 Pɛ. 3:14.
LƆƆLA LƆ NKINDJƐ MBADJƐ
20-21. a) Lofuto lɔkɔnge isongowa má nkindjɛ mpikama lá ehemba? b) Ntsha tombonangha opiko wɔso, Yehova ndongotonanghela nge? (2 Kɔrɛtɔ 4:7)
20 Tokoka ndjala l’eshikikelo ente nkindjɛ mbadjɛ alekɔ winá enkfumɔ wɔlɔ efula leso. Mbika má nkilika ɛlɛmbɛ wɛ Yehova angɔtɔpɛyɛ osasa lombombe ndeka ‘osasa w’itenyi’ w’oyɛ má nangha mpekanto. (Heb. 11:25; Yee. 19:8) Mande iso totongamaka lá ɛfɔ kɛnde. (Ewa. 1:27) Djɛko ndeke tongosasanga la nkfumi oloko kɛ piyɔɔ edjinge tongokindjɛ nkɛnda lá mboka kɛ lowiko l’etshinda.—1 Ti. 6:12; 2 Ti. 1:3; Yuda 20, 21.
21 Nsɔsɔlɔ, ‘demba dekɔ wɔdju.’ Koko kɛsɔ kepasakisola ente topakoke nangha nkambo mɔtshi lá kɛnɛ kelendana l’evunga wɛso. Yehova alekɔ entshupa djɛ ntɔpɛyɛ wolo w’oyɛso la djonyi. (Wala 2 Kɔrɛtɔ 4:7.) Koko, ewa ente Ndjambe angɔkɔpɛyɛ wolo w’efula ndeka wolo woleka w’anto. Koko ntondo ntondo, iso ladjɛ nangha kenkfumɔ k’oyɛso ladjɛ nangha djɛ mpikama lá ntondo k’ehemba. Ntsha tombonangha opiko wɔso, tokoka ndjala l’eshikikelo ente Yehova angokadjimola ndɔmbɔ yɛso djɛ ntakfeyɛ nkfulu winá w’oyɛso la djonyi. (1 Kɔ. 10:13) Ee, má okotshɔ wɔ Yehova, tokoka nkindjɛ mpikama lá ntondo k’ehemba.
YEEMBO 47 Lɔmba Yehova lofu la lofu (lá Otetela)
a DJƐ NDJOKA WƆLƆ: ‘Oloko’ w’otepelawɔ lá Mateo 26:41 oyɛwɔ nde wolo wolekɔ́ l’eteyi kɛso w’onangha dj’iso ndjoka kana nangha akambo lá wopo w’ɔkɔpaso. ‘Demba’ oyɛwɔ nde eyalelo kɛso k‘anto wa ntshamba djɛ djɔ. Djɛko ndeke, tokoka ndjala la tokanyi tɔ wɔlɔ tɔ nangha kɛnɛ kelekɔ́ wɔlɔ, koko ntsha topakɔdjisa, tokoka ndonangha kɛnɛ kɛ Bible otepelande ante kelekɔ nyɛtshi.
b Onto wombonangha mpekanto k’ekekete nkoka mba okotshɔ má onkanda Sasanga la lowiko lotshinda lotshinda!, wekelo 57 itenyi 1-3 la djamba djɛ wekelo: “‘Wiso wako watokomelake t’etsho weyaye.’” lá Etange k’Olami, Ngɔndɔ kɛ djomi l’ɔmɔ 2020, nki. 27-29, ite. 12-17.
c NSAKISO KƐ NTSHANGO: Wɔnanyɔ ashishima vɛrse djɛ lofu la lofu la nkɛsɛ, awala Bible winá w’ohomolande la midi, edjinge alekɔ lá nsanghanyɛ y’anteyi kɛ lobengo la nkɔlɔ.
