DJAMBA DJƐ WEKELO 28
YEEMBO 123 Tokilike ɛlɔndjɛlɔ kɛ teokrasi lá nkɔmano nkfumɔ (lá Otetela)
Wɛ ongewake ntshikitanyɛ nsɔsɔlɔ la ongolo?
‘Nyopikame ndii . . . la oyɛ wɔ nsɔsɔlɔ lá nkenda yɛnyo.’—ƐFƐ. 6:14.
IKANYI YƐ DJAMBA DJƐNƐ
Ndákfumba isɔmɛlɛ djɛ ndjewa otshikitano wolekɔ́ l’antenyɛ nsɔsɔlɔ kɛ seeke me Yehova la engolo wɛ Satana la antonyi waso otshanghanyɛwɔ.
1. Oyawokɛ ngete mo djɛ akambo wa nsɔsɔlɔ?
ENKAMBI wɛ Yehova nkɔpaka nsɔsɔlɔ kelekɔ́ l’Otepela wɔ Ndjambe. Tombopika djawo djɛso lá nsɔsɔlɔ kɛsɔ. (Ɔrɔ. 10:17) Tomboyɛ́ ndoyala l’eshikikelo ente Yehova ambokfumbá otshumano w’Akristo ete ngo ‘nkondji la osukɔ w’akambo wa nsɔsɔlɔ.’ (1 Ti. 3:15) La koko, tɔngɔlɛmɛyɛke l’osasa onkfumɔ ‘anto watɔlɔndjɛ́,’ wapakisola akambo wa nsɔsɔlɔ wa Bible la watɔpɛyɛ ɛlɔndjɛlɔ k’okaná l’ɛkɔpa kɛ Ndjambe.—Heb. 13:17.
2. Lá nkilika Djakɔbɔ 5:19, okokaso ntala l’ilonga yɛkɔnge m’ɔkɔngɔ w’iso ndjeka nsɔsɔlɔ?
2 Koko, m’ɔkɔngɔ w’iso ndjawola akambo wa nsɔsɔlɔ la ndjawola olemo w’okamba olonghanyelo wɔ Ndjambe djɛ ntɔpɛyɛ ɛlɔndjɛlɔ k’oyɛso ladjɛ ndjilela oloko, tokoka ndovunga mboka. (Wala Djakɔbɔ 5:19.) Lako ekete kɛ Satana olekanda nkombola ete ngo ntotshinda dj’iso nsamba ndjilela Bible, kana ɛlɔndjɛlɔ k’owaso má olonghanyelo wɔ Yehova oloko.—Ɛfɛ. 4:14.
3. Lamo oyɛso ladjɛ ntema akambo wa nsɔsɔlɔ mpidji? (Ɛfɛsɛ 6:13, 14)
3 Wala Ɛfɛsɛ 6:13, 14. Lako ilá, Djabolo angokamba la engolo wɛ wolo efula djɛ ndjawoyɛ anto dj’iwɔ nanyɛ Yehova. (Ndj. 16:13, 14) Tokoka lonkina nkonga ente Satana angetela nangha la wolo djɛ nkfumbola enkambi wɛ Ndjambe. (Ndj. 12:9) Djɛko ndeke, tolekɔ la lonyi l’efula lɔ ndákfumba dj’iso ndjewa otshikitano wolekɔ́ l’antenyɛ nsɔsɔlɔ l’ongolo, ole nɛmɛyɛ nsɔsɔlɔ. (Ɔrɔ. 6:17; 1 Pɛ. 1:22) Ewiko kɛso lá winá wɔ ndjolo k’ekekete yongoyɛ ngo masɔ!
4. Ɔkɔpaso ndjeka nge lá djamba djɛnɛ?
4 Lá djamba djɛnɛ, tongisola lɔ wekeka ape wa djonyi wangotokotshɛ́ djɛ ndembetela nsɔsɔlɔ kɛ Bible la ndjawola ɛlɔndjɛlɔ kɛ olonghanyelo wɔ Ndjambe. Mahanyi, tongoshishima alako asato w’okokaso nkilika djɛ nkindjɛ ntema akambo wa nsɔsɔlɔ mpidji.
WEKEKA WALƆMBAMA DJƐ NTSHIKITANYƐ NSƆSƆLƆ LA ONGOLO
5. Wopo wɔkɔnge wɔma wɔ Yehova otokotshɛ́wɔ djɛ ndjewa nsɔsɔlɔ?
5 Ndjoka Yehova wɔma. Winá w’okaso Yehova wɔma, tɔngɔɔkɔpa lombombe ko topananghaki kaanga ekete kɛmɔ kekoka ndokiyanyɛ. Tolekɔ entshupa djɛ ndjeka djɛ ndjewa otshikitano wolekɔ́ l’antenyɛ wɔlɔ la nyɛtshi, nsɔsɔlɔ l’ongolo, má nangha nghɔsɔ ndeke songawolama me Yehova. (Woo. 2:3-6; Heb. 5:14) Topakoke ntshika wɔma w’onto ndeka ngandji k’okaso Yehova, mande mbala efula akambo wasasangɛka anto nkiyanyɛka Yehova.
6. Wopo wɔkɔnge wɔma w’onto yatshinde ewandji djomi wɛ tɔkɔlɛ djɛ mpengesola nsɔsɔlɔ?
6 Ntsha tomboleka ndjoka anto wɔma ndeka wɔma w’okaso Ndjambe, tongowangɔ má nsɔsɔlɔ. Tokolenda ndjɔmbɔmba k’ewandji wɛ tɔkɔlɛ 12 wetshisá ntɔtɔmba owila wɔ Yehova ndalake djɛ mpɛyɛ wana w’Isariyɛlɛ. Wɔma wɔ antɔmbi djomi iyoke ase Kanana wolekaka ngandji kɛwɔ te Yehova ekekete. Washimelaka winawɔ ase Isariyɛlɛ ambɔ: ‘Topakoke ntshɔ ntonana l’anto wasɔ ladjikɛnde iwɔ ntoleka wolo.’ (Ew. 13:27-31) Lá ikanyi y’anto, ase Kanana wayalaki la wolo ndeka ase Isariyɛlɛ, l’etenyi kɛsɔ watepelaka nsɔsɔlɔ. Koko ntepela ente ase Isariyɛlɛ wapangoyala l’akoka wa ndonga antonyi wawɔ, oyɛwɔ nde ete ngo mvungɛ Yehova. Antɔmbi djomi wasɔ wayalaka ladjɛ mpika wiso lá kɛnɛ kɛ Yehova ndakɔpɛ wana w’Isariyɛlɛ nangha. Iwɔ wayalaka lonkina ladjɛ ntɔnɔla lá kɛnɛ kɛ Yehova ndaananghela atahete ilá. Makɔ, watayɛ ndosipisoyɛ ambɔ ase Kanana watayalaki la wolo kaanga ndambo daambi lá ndjɛdjɛ la nkfulu k’ipa wɔsɔdjɔmba kɛ Yehova. Lá lɛdji l’otshikitanyi l’antɔmbi djomi, Yosua nya Kalɛbɛ wakombolaki ndjawolama me Yehova. Washimelaka ase Isariyɛlɛ ambɔ: ‘Ntsha Yehova atɔkɔpa, mbɔ koko ape l’ehamo angotingeyɛ lá mbandja kɛkɔ lá angɔtɔpɛyɛ.’—Ew. 14:6-9.
7. Wopo wɔkɔnge w’okokaso nkembɛ wɔma w’okaso Yehova? (Lenda edjinge ntshango.)
7 Dj’iso ndjala la wɔma w’efula te Yehova, iso ladjɛ nangha la wolo djɛ ndosasangɛ lá nkano nkfumɔ dj’ɔsaso. (Yee. 16:8) Winá w’owalɛ ɛkɔndɔ wɛ Bible, yawopola ente: ‘Motayala lá nkambo djɛnɛ, nkano djɛkɔnge mɔtɔsa?’ Ndjɔmbɔmba, koyawɛna nghɔmɛlɛ kɛko ekameyɛ ewandji wɛ tɔkɔlɛ djomi wapɛyɛ losango lɔ nyɛtshi. Wɛ otawola etepela wɛwɔ la otakfɔ lá wɔma w’onto, ndo koko ngandji la mposɛ kɛko kɛ nsasangɛ Yehova ketalonga wɔma wɔko? Lɔsɔkɛ lonkfumɔ lɔ wana w’Isariyɛlɛ lotewa nsɔlɔlɔ kɛ Yosua la Kalɛbɛ iyatepelaka. Eposelo weyalisá nde, wasambaka mbamba kɛ ndjingela lá Looko lɔ Daka.—Ew. 14:10, 22, 23.
Ngotakoka ndjawola na? (Lenda itenyi 7)
8. Djekeka djɛkɔnge dj’oyɛso ladjɛ nangha la wolo djɛ nkona, ko lamo?
8 Okitshakitshɛ. Yehova ndjisolaka nsɔsɔlɔ ngo le anto w’okitshakitshɛ. (Mat. 11:25) Tawolaka l’okitshakitshɛ onkfumɔ dj’iwɔ ntokotshɛ́ djɛ ndjeka nsɔsɔlɔ. (Ele. 8:30, 31) Djɛko ndeke, iso ladjɛ mbadjɛ dj’ipa nkoma otako. Ndjala otako nkoka ntokomɛ dj’iso ndɔsa la ntshina efula tokanyi tɔso, ente toleka tɔkfɔ tɔ Afunelo la ɛlɔndjɛlɔ k’olonghanyelo wɔ Yehova.
9. Wopo wɔkɔnge w’okokaso nkindjɛ ndjala l’okitshakitshɛ?
9 Dj’iso nkindjɛ ndjala l’okitshakitshɛ, iso ladjɛ mvungɔka ente tolekɔ tontshintshi lá ndjɛdjɛ lá ekekete kɛ Yehova. (Yee. 8:3, 4) Iso nkoka lonkina ndɔmba Yehova djɛ nde ntokotshɛ́ dj’iso ndjala la yimba y’okitshakitshɛ ole yɛ nkindjɛ ndjeka. Yehova angotokotshɛ́ dj’iso ndjila tokanyi tɔnde, totolakanyɛnde má mbamba k’Otepela l’olonghanyelo wɔnde, lá ntondo kɛ tokanyi tɔso. Lá badji djɛko djɛ Bible, hona wopo wɔ Yehova ndɔkɔpaka okitshakitshɛ la ndotonaka ofuno la otako. Edjinge nangha la wolo djɛ ndjala l’okitshakitshɛ ntsha ombowa odjito ɔmɔtshi wɔkɔpɛyɛ ndambo kɛ lowandji.
WOPO W’OKOKASO NTEMA AKAMBO WA NSƆSƆLƆ MPIDJI
10. Yehova ndakambe l’anto wakɔna djɛ ndɔndjɛ la mpɛyɛ enkambi wɛnde alako?
10 Tokindjɛ ndjala la wɛkamo l’ɛlɔndjɛlɔ kɛ teokrasi. Lá Isariyɛlɛ, Yehova akambaka la Mɔsɛ ole la Yosua djɛ mpɛyɛ enkambi wɛnde alako. (Yos. 1:16, 17) Ase Isariyɛlɛ wasakolamaki winá wɔ yɔsaka anto wasɔ ete ngo antomɔ yɛ Yehova Ndjambe. Nkama y’ɛnɔnyi m’ɔkɔngɔ, winá w’otshumano w’Akristo iyakfumbama, apɔstɔlɔ 12 wapɛyɛki ɛlɔndjɛlɔ. (Ele. 8:14, 15) Mahanyi, oloyi wɔsɔ wonanɔka djɛ ndjingeyɛ ole tokokolo tonkina tɔ Jerusalɛmɛ. Má nkilika ɛlɔndjɛlɔ k’iyawaka m’ampame yɛ nkɔmano yɛsɔ, ‘ntshumano ntaakindjɛki nkemba lá djawo la lofulo l’anto lotafulaki lofu la lofu.’ (Ele. 16:4, 5) Ole iso, tosakolama l’etsho wɛso wɛnɛ, winá w’okilikaso ɛlɔndjɛlɔ k’olonghanyelo wɔ Yehova. Iya Yehova okokande ndjoka ngete mo ntsha topawolisa anto wa ndɔmbɔsɔna? Djɛ nkadjimola wopo wɔsɔ, nyontshɔ tokoshishima kɛnɛ k’ekomelisá wana w’Isariyɛlɛ winá w’iyotatshɔka tá Looko lɔ Daka.
11. Kɛkɔnge kekomelisá ase Isariyɛlɛ wasosolanisá wiso la Mɔsɛ, onto wɔ Yehova ndasɔnɛ djɛ ndɔndjɛ? (Lenda edjinge ntshango.)
11 Winá wɔ wana w’Isariyɛlɛ iyotatshɔka tá Looko lɔ Daka, ampame imɔtshi iyalaki la ndambo kɛ lowandji wasosolanaka wiso la Mɔsɛ djɛ odjito wɔ Yehova ndɔpɛyɛ. Iwɔ watepelaka ambɔ: ‘Oloyi onkfumɔ [ape ngo Mɔsɛ toko] wolekɔ ekina, iwɔ iyankfumɔ, edjinge Yehova alekɔ l’anteyi kɛwɔ.’ (Ew. 16:1-3) Kaanga iyatepela nsɔsɔlɔ ambɔ ‘oloyi onkfumɔ’ woyalaki ekina lá wiso wa Yehova, nde asɔnaka Mɔsɛ djɛ ndɔndjɛ enkambi wɛnde. (Ew. 16:28) Má nangha Mɔsɛ, antɔmbɔki wasɔ iyananghaka lá nsɔsɔlɔ nde Yehova. Iwɔ watapika wiso lá kɛnɛ kɛ Yehova ndakɔpaka; wapikaka wiso lá kɛnɛ k’iyakombolaka—ndjala la lowandji la ndjewama. Ndjambe ayakaka anto wamɔmɔlisá ɔtɔmbɔkɛlɔ wɔsɔ, la nunu dj’anto dj’asukisá. (Ew. 16:30-35, 41, 49) Tokoka ndjala l’eshikikelo lɔɔko kɛnɛ ente Yehova apasasangaka l’anto wapalɛmɛyɛ nonghanyi y’olonghanyelo wɔnde.
Ngotakoka nsuka na? (Lenda itenyi 11)
12. Lamo okokaso nkindjɛ ndjala la wɛkamo l’olonghanyelo wɔ Yehova?
12 Tokoka ndjala la wɛkamo w’efula l’olonghanyelo wɔ Yehova. Winá wɛnamá papoo ente tolekɔ la djonyi djɛ nangha otshikitano ɔmɔtshi w’olendana la looka lɔ nkambo mɔtshi djɛ nsɔsɔlɔ djɛ Bible kana lá wopo w’olonghanyɛso olemo wɔso w’Onkfumi, waalɔndjɛ wapakakanyɛka djɛ nangha etshikitano. (Woo. 4:18) Iwɔ nanghaka nghɔsɔ mande, ekete k’olekawɔ nkombola nde, nsasangɛ Yehova. Iwɔ wangonanghake lonkina kenkfumɔ k’okokawɔ nangha djɛ ndɔsa akano wambopikama lá Otepela wɔ Ndjambe, ɔlɛmbɛ wɔ enkambi enkfumɔ wɛ Yehova oyɛwɔ ladjɛ nɛmɛyɛ.
13. Oye ‘ndjɔmbɔmba kɛ etepela wɛ wɔlɔ,’ ko oyɛso ladjɛ nangha nge la kɛkɔ?
13 ‘Kindjɛ nama ndjɔmbɔmba kɛ etepela wɛ wɔlɔ.’ (2 Ti. 1:13) ‘Ndjɔmbɔmba kɛ etepela wɛ wɔlɔ’ osakisolawɔ nde elakanyelo w’Akristo welekɔ́ lá Bible. (Dj. 17:17) Elakanyelo wɛ nghɔsɔ oyɛwɔ nde mpikamelo djɛ djawo djɛso. Olonghanyelo wɔ Yehova ntolakanyɛka djɛ ntɔ etepela wɛsɔ mpidji. Ntsha tombila welo djɛ nangha nghɔsɔ, tongosakolama.
14. Wopo wɔkɔnge Akristo amɔtshi iyakfutumoyɛ ‘ndjɔmbɔmba kɛ etepela wɛ wɔlɔ’?
14 Kɛkɔnge kengotokomela ntsha tombovunga má mboka kɛ ‘etepela wɛ wɔlɔ’? Tokolenda ndjɔmbɔmba kɛmɔtshi. L’ɛtɛndɔ kɛ ntondo, Akristo amɔtshi wanunghanunghaki ambɔ lofu lɔ Yehova lombokoka. Akoka ndjala onkanda ɔmɔtshi, w’iyafɛnyɛka ambɔ ɔpɔstɔlɔ Poolo ndeke lofunisá, lotepelaki nghɔsɔ. Ipa ndɔsa winá wɔ nkɔmɛ, Akristo wa Tesalɔnikɛ amɔtshi wawolaka la wawangaka mpoposanyɛ onunghanungho wɔsɔ. Iyotavungɔ akambo wa Poolo ndaalakanyɛ winá wɔ ndayalaka lawɔ, watasamba ndjimbama. (2 Te. 2:1-5) Poolo alakaka wananyɔ wande dj’ipa ndjawola nkambo nkfumɔ dj’okawɔ. Edjinge djɛ ndakotshɛ́ l’etsho weyaye, Poolo atepelaka etepela w’ekomo wɛnɛ, l’onkanda wɔnde w’ape wɔ ndafunela ase Tesalɔnikɛ: ‘Lemi Poolo lambonyotomela djemo, djembofunamá má lɔwɔ lɔmi mɔmɛlɛ, djelekɔ́ ete ngo ilembetelo yɛ wopo wɔmi wɔ mfuna, lá enkanda wɛmi enkfumɔ.’—2 Te. 3:17.
15. Wopo wɔkɔnge w’okokaso ndálama má akambo w’engolo wɛnama ete ngo akambo wa nsɔsɔlɔ? Pɛyɛ ndjɔmbɔmba. (Lenda edjinge asango.)
15 Olakanyelo wɔkɔnge w’owaso m’etepela wɛ Poolo ndatomela ase Tesalɔnikɛ? Winá w’okaso ekete kɛmɔtshi kepokana lá kɛnɛ kɛ seeke má Bible, kana winá w’okaso onunghanungho ɔmɔtshi, iso ladjɛ ndjala la ntɔnɔ. Lá Union Soviétique, antonyi waso waheetshɛki onkanda w’iyatepelaka ambɔ ombotoma nde biro dj’ekekete. Onkanda wɔsɔ wakembɛki wananyɔ amɔtshi dj’iwɔ nkfumba olonghanyelo onkina dj’iwɔ ndjatɔna la nsamba ndendama m’olonghanyelo. Onkanda wɔsɔ wɛnamaki ngo ngete onkanda wɔ wɔlɔ. Koko wananyɔ wa nkɔmano watadjimbama. Iwɔ wasipisoyɛka ambɔ akambo watepelamaki l’onkanda wɔsɔ watatɔlɔnghanaki la kɛnɛ kɛ yeeke. Lɔɔko kɛnɛ, antonyi wa wayi wa nsɔsɔlɔ wangokambake l’ɛntɛrnɛtɛ ole la rɛzo sosio djɛ ntila l’ovungusano la ntokapola. L’edjena kɛ ‘ndjala entshupa djɛ ndɛngalɛnga l’ekanedji [kɛso] kɛ yimba,’ iso ladjɛ ndálama má nkɔdjɛ kɛnɛ k’okaso kana k’owalaso ntsha k’okana l’akambo wa nsɔsɔlɔ wa isombeka.—2 Te. 2:2; 1 Dj. 4:1.
Todjimbamake m’akambo w’engolo wɛnama ete ngo walekɔ nsɔsɔlɔ (Lenda itenyi 15) a
16. Lá nkilika Ɔrɔma 16:17, 18, oyɛso ladjɛ nangha nge ntsha anto amɔtshi wambopengɔ mboka k’akambo wa nsɔsɔlɔ?
16 Toyale osanga l’anto walekɔ́ lá nkɔmano le Yehova. Ndjambe nkɔpaka iso ndjala osanga lá wopo w’ɔtɛmɔlaso. Tongoyala iwoke imɔ l’ilá kenkfumɔ k’otemaso akambo wa nsɔsɔlɔ mpidji. Onto onkfumɔ w’ovunga mboka k’akambo wa nsɔsɔlɔ angoposɛ djatɔnelo l’otshumano, djɛko ndeke Yehova otolakande djɛ ‘ndáwewɔ.’ Ntsha lako, isɔmɛlɛ kɛso tongowangɔ otale la nsɔsɔlɔ.—Wala Ɔrɔma 16:17, 18.
17. Wapɔ wɔkɔnge w’owaso má ndembetela la ntema akambo wa nsɔsɔlɔ mpidji?
17 Winá w’olembetelaso la w’ovundaso akambo wa nsɔsɔlɔ mpidji, tongokindjɛ ndjala imama la Yehova la tongokindjɛ nkembɛ djawo djɛso. (Ɛfɛ. 4:15, 16) Tongoyawomba m’engolo la má nsango ipɔlɔ yɛ Satana otshanghanyɛnde, la Yehova angotowomba lá ndjolo k’ekekete. Nyokindjɛ ntema akambo wa nsɔsɔlɔ mpidji, ‘ko Ndjambe kɛ vu angoyala la nyo.’—Flp. 4:8, 9.
YEEMBO 122 Topikame ndii, ipa nsasoka! (lá Otetela)
a NSAKISO KƐ NTSHANGO: Ntshango djɛnyɛ wananyɔ wa Union Soviétique wambolongola onkanda wotomisá antonyi waso w’iyafɛnyɛka ambɔ biro dj’ekekete ndeke lombotoma. L’etsho wɛso wɛnɛ, antonyi waso wakamba l’ɛntɛrnɛtɛ djɛ mpoposanyɛ akambo w’engolo lá nkambo dj’olonghanyelo wɔ Yehova.
