Nicolas nya Céline wapomanaka l’okakasano w’otshikitanyi. Iwɔ wawolaka odjito wɔ Filialɛ kɛ France ndaapɛyɛ dj’iwɔ nsɛkɔ tá otshumano wɔ bango. Iwɔ wakɔndɔla ambɔ: “Má bango toyalaka l’osasa efula koko m’ɔkɔngɔ totateyɛka nkanela tolongo tɔso. L’etsho wɛsɔ, totayale la djokanelo djɛ wɔlɔ la wananyɔ w’otshumano wɔ bango.” a Má ndenda ekakasano enkfumɔ wɛsɔ, wopo wɔkɔnge w’okokɛ ndjala l’osasa ole ntɔ mbambo winá w’ɔsɛkwɛ l’otshumano wɔ bango? Kɛkɔnge k’anto ankina okokawɔ nangha djɛ ndaakotshɛ́? Ole esako wɛkɔnge wɛ nyuma w’okokɛ mba la w’okokɛ ndjakala ase otshumano wɔko wɔ bango?

TƆKFƆ TƆNƐYI TONGOKOKOTSHƐ́ DJƐ NDJEKELA

1. Yawɛkɛ le Yehova. (Yee. 37:5) Kazumi, kanga lowika lá Japon, imaka m’otshumano wɔ ndananghe ɛnɔnyi 20 winá wɔ yatome womɛnde olemo t’edjena kenkina. Wopo wɔkɔnge ‘ndatshike Yehova [ndowatela] mboka’? Nde atepela ante: “Ladjipolaki Yehova oloko wɔmi mbala la mbala djɛ ndoshimela wɔma, olengedji la yɛnyi yɛ mokaka. Winá onkfumɔ wɔ mananghaka nghɔsɔ, nde ampɛyɛki wolo wɔ mayalaka la djonyi.”

Wopo wɔkɔnge w’okokɛ mfudjɛ wɛkamo wɔko te Yehova? Ngo ngete otamba oyɛnde la lonyi lɔ washi la oleelo wɔ má looko djɛ nde mfula, djawo djɛso koko dekɔ la lonyi lɔ ndɛ djɛ mfula. Nicolas, kanga isotepelisá má bango, ɛnaka ante ntɔnɔla lá ndjɔmbɔmba kɛ Abrahama, Yeso, la Poolo—ampame ilapekalisá nkete efula djɛ nangha ɛkɔpa kɛ Ndjambe—akembɛka wɛkamo wɔnde lá okotshɔ wɔ Yehova. Ndjala la nonghanyi kɛ nanghaka wekelo wɔ Bible mbala la mbala angokokotshɛ́ djɛ  mpikama lá ntondo k’otshikitano onkfumɔ welá lowiko lɔɔko ole angokolodjɛ kfu l’epapayɛ wɛ nyuma w’okokɛ nkampana l’anto ankina l’otshumano wɔko.

2. Tɛɛdjɛke otshumano wɔ ntondo la wɔ bango. (Los. 7:10) Jules apomanaka la nkfumbo efula djetshikitanyi winá wɔ ndasɛkɔ má Bénin tá États-Unis. Nde avungɔ ante: “Lawɛnaki ngo ngete ndjalaki ladjɛ nkɔndɔla onto onkfumɔ wɔ bango wɔ mapomanaka la nde ɔkɔndɔ wɔ lowiko lɔmi.” Nde awangaka mbangwana l’otshumano ladjikɛnde, nangha nghɔsɔ ayalaki otshikitano w’ekekete efula la wopo wɔ ndekela. Koko, m’ɔkɔngɔ wɔ nde ndjewana la wananyɔ l’ankaana wɔlɔ wɔlɔ, atshikitanyɛka ikanyi yɛnde. Nde atepela ante: “Lambawola ente lá idjena inkfumɔ y’oyɛso lá looko, anto walekɔ ngo wopo ɔmɔ. Ngo watepela la wanangha akambo lá lɛdji lotshikitanyi. Ndjawola anto wopo w’ɔyɛwɔ aleko djonyi efula.” Djɛko ndeke tɛdjɛke lá otshumano wɔko wɔ ntondo. Ete ngo oyɛnde nkaana la yat’ekalo, Anne-Lise atepela ante: “Lemi ntasɛkɔ́ djɛ ntohona kɛnɛ kɛ matshike. Masɛkɔ nde djɛ ntisola nkete djɛ bango.”

Edjinge tokokolo ladjɛ ndjewɔ djɛ ndjɛdjɛ otshumano wɔwɔ wɔ ntondo la wɔ bango. Ape ngo ladjikɛnde wananyɔ wanangha akambo wopo onkina l’otshumano wɔ bango, mbɔ koko wapewe nangha. Alekɔ nkambo djɛ balo ndjewa wopo w’akambo onanghemawɔ l’idjɛna y’oyalɛ, lá ntondo kɛ mpɛyɛ ikanyi. (Los. 3:​1, 7b) Angoyala wɔlɔ wɛ ndaalakanyɛ má ndjɔmbɔmba koko ape nangha la wolo dj’otshumano onkfumɔ ndjawola ngo ikanyi yɛko.—2 Kɔ. 1:24.

3. Lokapɛyɛ l’otshumano wɔko wɔ bango. (Flp. 1:27) Nsɛkɔ ndɔmbaka winá la welo efula, koko alekɔ djonyi ndjingela nsanghanyɛ y’otshumano, elongi l’elongi ntsha nkokaka, ngo má bango dj’okomɛ. La lonkina, ntsha ase otshumano wɔko wɔ bango watakɛnaka kana wapafulaka nkɛna, iyongokosuka ngete mo? Lucinda, asɛkɔka nya wana wande ape wamato tá ngando kɛmɔtshi k’ekekete kɛ Afrique du Sud, ko avungɔ ante: “Wandakaka djɛ ndápɛyɛ efula la wayi w’otshumano, mpoposanyɛ l’anto efula, la mpɛyɛ akɔmantɛrɛ lá nsanghanyɛ. Toshimelaka wananyɔ dj’iwɔ nanghaka nsanghanyɛ y’olemo w’ipoposanyɛ lá mvulu kɛso.”

Nangha la wolo djɛ ‘nkamba mpɛka la mpɛka’ elemo wɛ teokrasi la wananyɔ l’ankaana y’otshumano wɔko wɔ bango alekɔ wopo wɔ wɔlɔ efula wɔ nkotshɛ́ djɛ mfudjɛ ‘djawo djɛ losango lɔ wɔlɔ.’ Tokokolo wakembɛka Anne-Lise, kanga isotepelisa ntondo, djɛ mpoposanyɛ l’onto onkfumɔ. Eposelo wɛkɔnge? Nde atepela ante: “Atayala ilá nsipisoyɛka ente ɔsɔ ayalaka iseke yɛ lemi ndáwoka ente lambokoma ose otshumano.” Lonkina, nkamba elemo ete ngo ndjɔmba la ndɔngɔsɔla Mvulu k’Onkfumi, anghɛnyɛ ente ɔsa otshumano wɔ bango ente oyɛwɔ nde wɔko. Ntsha olapɛyɛ efula, apangoyala ilá ongɛna ente wangokolongola wɔlɔ efula la ongoyawoka ente ombokoma ose nkfumbo kɛ bango kɛ nyuma.

 4. Kɔpɛ tolongo tɔ bango. (2 Kɔ. 6:​11-13) Ndjila anto ankina yimba alekɔ wopo wɔ wɔlɔ efula wɔ nkɔpɛ ilongo, djɛko ndeke ɔsa winá lá ntondo la m’ɔkɔngɔ wɔ nsanghanyɛ djɛ nsawola l’anto la djɛ ndjewana lawɔ. Nangha la wolo djɛ ndjewa wiiná wawɔ. Mvungɔ wiiná w’anto, ndjala l’osasango ole ndjala onto w’ilana lá demba, angosepa anto ankina le wɛ, ape l’ehamo, angokokomɛ djɛ mba tolongo tɔ bango tɔ wɔlɔ lombombe.

L’edjena kɛ nkiyana ntsha wangokawola, pɛyɛ wananyɔ l’ankaana yɛ mbango mbamba kɛ nkewa wopo w’onto w’oyɛ nsɔsɔlɔ. Okoka mba olakanyelo má kɛnɛ k’etepela Lucinda: “Tolekɔ la ntombe yɛ mbango winá wɔsɔ ladjikɛnde iso tɔsaka nonghanyi kɛ ndaawetaka lá kaso.”

‘NYOLONGOLANAKE’

Ndjingela lá Mvulu k’Onkfumi kembololá tɔɔ l’anto wa ngopewe nkoka ndjala ndambo kɛ nsɔnyi. Iya wopo wɔkɔnge w’okokɛ nangha djɛ anto wasɛkɔ l’otshumano wɔko nsamba ndjala l’okakasano wɔsɔ? Ɔpɔstɔlɔ Poolo atokembɛ ante: ‘nyolongolanake, ete ngo Kristo ndatolongola.’ (Ɔrɔ. 15:7) Má nkilika Kristo, tokokolo nkoka nkotshɛ́ waasɛkɔ dj’iwɔ nyɛna ambɔ wambolongolama wɔlɔ. (Lenda ipapango “ Kɛnɛ kekotshɛ́ djɛ nsɛkɔ lá lɛdji lɔ wɔlɔ.”) Koko, anto ankfumɔ l’otshumano, ndjila ole dɛngɛ, nkoka nshimbana tolongo la waambɔsɛkɔ.

Ndongolana nsakisolaka ndjeta onto lá mvulu kɛko, koko nkoka nsakisola lonkina ndɔpɛyɛ okotshɔ wɛnama. Ndjɔmbɔmba, nkaana kɛmɔtshi akotshɛ́ka onto ɔmɔtshi wɔsɛkwisá má mpetshɛ winá la nde djɛ ndɔwɛnyɛ atshuku ankfumɔ wa ngando la ndopakisola wopo wɔ ndɔsa bisi la trɛ. Kɛnɛ kɛ nkaana kɛsɔ ndonanghela kookotaka efula l’oloko la kokotshɛ́ka djɛ ndjekela la ngando.

MBAMBA KƐ MFULA

Winá wɔ mpaso ndotatshunde, djowo djɛnde ngotowɔke mbala efula lá ntondo kɛ nsala yɛnde ndjala l’akoka wa mfumbɔ. Wopo wɔkɔ ɔmɔ ndeke, winá w’ɔsɛkwɛ t’otshumano wɔ bango, wɛ ladjɛ ntshika ekete kenkfumɔ kekoka nkoshimba djɛ  ntshanghanyɛ nsala yɛko l’olemo wɔ Yehova. Nicolas nya Céline wawola ambɔ: “Nsɛkɔ alekɔ okfumbelo wɔ wɔlɔ efula. Ndjekela la anto wa bango ole la djena ntshikitanyi nkokembɛka djɛ nkona wekeka wa bango.” Jean-Charles, kanga sotepelisá má bango, atepela wopo wɔ nkfumbo kɛnde iyawa wapɔ: “Otshikitano wɔsɔ w’ɔpɛyɛka wana waso mbamba k’iwɔ mɔnghɔla l’otshumano wɔ bango. M’ɔkɔngɔ wɔ ngɔndɔ imangha toko, wɔnaso w’omoto awangaka mba edjito lá nsanghanyɛ y’anteyi kɛ lobengo, la wɔnaso wɔ mpame akomaka nsakodji ketalongola.”

Iya ntsha akambo welá lowiko wapakɔpɛyɛ mbamba kɛ wɛ nsɛkɔ, ndjɔmbɔmba tá idjena ilekɔ́ la djonyi? Lamo ngopakoke nkamba l’alako wa sɔmbɛna má djiko l’otshumano w’oyalɛ? Winá w’olawɛkɛ le Yehova, yapɛyɛ lá lɛdji l’efula l’akambo waheta l’otshumano má nangha nonghanyi kɛ mpoposanyɛ l’anto ankina la má nkɔpɛ tolongo tɔ bango kana má nkembɛ djokanelo djɛko lá tolongo tɔ ntondo. Okoka nsembola lɔwɔ lɔko te waambɔsɛkɔ la te waalekɔ́ la djonyi, má ndápɛyɛ okotshɔ w’ɛnama? Ngandji kɛ nsɔsɔlɔ ndeke ilembelo yɛ Akristo wa nsɔsɔlɔ, ape l’ehamo, nangha nghɔsɔ angokokotshɛ́ djɛ mfula lá nyuma. (Dj. 13:35) Okoka ndjala l’eshikikelo ente ‘Ndjambe nsasangaka l’elambo wɛ nghɔsɔ.’—Heb. 13:16.

Kaanga oyɛwɔ okakasano, Akristo efula walekɔ l’osasa ole watɔ mbambo lá ntshumano djɛ bango dj’iyasɛkɔ, akoka ndjala wopo wɔkɔ ɔmɔ ole le wɛ! Anne-Lise atepela ante: “Ntshikitanyɛ otshumano ankotshɛ́ka djɛ lemi ndjokana l’anto efula.” Kazumi awola winá wɔsɔ ante: “Ongɛna osukɔ wɔ Yehova lá topo tɔ nghɔtɛnaka ntondo.” Iya Jules? Nde atepela ante: “Tolongo tɔ makɔpɛ tonkotshɛ́ka djɛ ndáwoka ente oyɛmi nde lá kami. Winá wɔsɔ ndáwoka ente lambekela l’otshumano wɔmi wɔ bango efula ko angoyala wolo efula le lemi djɛ ntshɔ tá idjena inkina.”