DJAMBA DJƐ WEKELO 27
YEEMBO 73 Ɔtɔpɛyɛ oloko wolo (lá Otetela)
Yala l’oloko wolo ete ngo Zadɔkɛ
‘Zadɔkɛ [ayalaki] olangala wɔ nkfulu la w’oloko wolo efula.’—1 ƐK. 12:28.
IKANYI YƐ DJAMBA DJƐNƐ
Wopo wɔ ndjɔmbɔmba kɛ Zadɔkɛ okokawɔ ntokotshɛ́ djɛ ndjala l’oloko wolo.
1-2. Zadɔkɛ ndayalaka na? (1 Ɛkɔndɔ 12:22, 26-28)
TOKOKANELA nkambo djɛnɛ. Oloyi w’ampame ndekana 340 000 watshumanaka djɛ mbekadjɛ Davidɛ nkfumi k’Isariyɛlɛ y’otondo. Ampame yɛsɔ wananghaka etsho esato l’onkókó w’ave w’oyalaki entshupa lá Hebrɔnɛ, wasawolaki, wavɔki atɔla, watshumbaki teembo l’osasa onkfumɔ djɛ numɛ Yehova. (1 Ɛk. 12:39) Anto efula watafula nyɛna Zadɔkɛ, olangala ɔmɔtshi woyalaki l’oloyi wɔkɔ. Koko Yehova ɔwɛnaka la akɔpaka dj’iso ndewa ente Zadɔkɛ ayalaka l’eteyi. (Wala 1 Ɛkɔndɔ 12:22, 26-28.) Zadɔkɛ ndayalaka na?
2 Zadɔkɛ ndayalaka nde nkfundji kekambaki l’ompandju wɔ Abiyatara, Nkfundji k’Ekekete. Ndjambe apɛyɛka lonkina Zadɔkɛ akoka wa nyɛna wɛnɛlɔ la wa nsipisoyɛ ɛkɔpa kɛnde. (2 Sa. 15:27) Anto wahonaki alako me Zadɔkɛ winá wɔ yayalaka la djonyi. Nde ayalaki lonkina mpame k’oloko wolo efula. Lá djamba djɛnɛ tɛna lɔ wopo wɔ Zadɔkɛ ndɛnyɛ oloko wolo wɔnde.
3. a) Lamo enkambi wɛ Yehova oyɛwɔ la djonyi dj’oloko wolo? b) Kɛkɔnge k’ɛnaso lɔ lá djamba djɛnɛ?
3 Lá etsho w’ekomo wɛnɛ, Satana ambetela mfudjɛ ehemba te enkambi wɛ Ndjambe djɛ ntshita nkɔmano djɛwɔ te Yehova. (1 Pɛ. 5:8) Tolekɔ la djonyi dj’oloko wolo winá w’okongaso Yehova ndjaka Satana la ndjila ekomo lá andja wande wa lopango. (Yee. 31:24) Nyontshɔ tokolenda topo tosato t’okokaso ndjokola oloko wolo wɔ Zadɔkɛ.
SUKA ONKFUMI WƆ NDJAMBE
4. Ladjikɛnge enkambi wɛ Yehova oyɛwɔ la djonyi dj’oloko wolo djɛ nsuka Onkfumi wɔ Ndjambe? (Lenda edjinge ntshango.)
4 Ete ngo oyɛso enkambi wɛ Yehova, tosuka onkfumi wɔ Ndjambe l’akambo ankfumɔ, koko mbala efula tongoyalake la djonyi dj’oloko wolo djɛ nangha nkambo djɛsɔ. (Mat. 6:33) Ndjɔmbɔmba, l’andja wa lopango wanɛ, iso ladjɛ ndjala l’oloko wolo djɛ ntɔlɔnghanyɛ mbiko yɛso l’ɛlɛmbɛ wɛ Yehova, la djɛ mpoposanyɛ losango lɔ wɔlɔ l’Onkfumi. (1 Te. 2:2) Edjinge mbala efula angɔlɔmbamake ndjala l’oloko wolo djɛ nsamba ndɔsa opiko lá wayi wa pɔlitikɛ lá nkfumbo dj’akambo mbetela nkapwana djɛnɛ. (Dj. 18:36) Enkambi wɛ Yehova efula wɛna ndjolo m’ɔtɛ wɔ osambo wɔ mfalanga, wányɔkɔla m’ɔtɛ w’otonawɔ ndɔsa opiko lá wayi wa pɔlitikɛ, kana nsuka elemo w’angala.
Winá w’anto ankina osukawɔ wayi wa pɔlitikɛ, wɛ nghongonangha mo? (Lenda itenyi 4)
5. Lamo Zadɔkɛ ndayale la djonyi dj’oloko wolo djɛ nsuka Davidɛ?
5 Zadɔkɛ atatshɔ tá Hebrɔnɛ ngo djɛ ntosasanga lá nkambo djɛ onkfumi wɔ Davidɛ toko. Nde atshɔka la mpeko djɛnde djɛ mbandji la ayalaka entshupa djɛ nana. (1 Ɛk. 12:38) Nde ayalaki entshupa djɛ nkilika Davidɛ tii lá mbandji la djɛ nseela Isariyɛlɛ me antonyi wande. Nkoka ndjala Zadɔkɛ atayalaki nanyi mbandji kɛ mɛlɛmɛlɛ, koko ayalaki olangala w’oloko wolo efula.
6. Wopo wɔkɔnge Davidɛ ndatshike ndjɔmbɔmba kɛ wɔlɔ k’oloko wolo kɛ Zadɔkɛ ndɔnda? (Yeembo 138:3)
6 Iya nkfundji ete ngo Zadɔkɛ ndeke djɛ ndjala l’oloko wolo nghɔsɔ má mpe? Nde ayalaki winá enkfumɔ l’ampame yɛ nkfulu ole y’eloko wolo. Ape l’ehamo nde ekaka má ndjɔmbɔmba yɛsɔ. Ndjɔmbɔmba, ladjikɛnde Davidɛ ‘alɔndjɛki Isariyɛlɛ tá ambandji’ l’oloko wolo onkfumɔ, Isariyɛlɛ inkfumɔ wakɔpaka ndowekadjɛ nkfumi. (1 Ɛk. 11:1, 2) Davidɛ ayawɛkɛki winá onkfumɔ le Yehova djɛ mpona okotshɔ djɛ nana l’antonyi wande. (Yee. 28:7; wala Yeembo 138:3.) Zadɔkɛ ekaka djɛ ndjala l’oloko wolo má ndjɔmbɔmba yɛ wɔlɔ y’ampame imɔtshi iyalaki l’ompandju wɔnde, ete ngo Yehɔyada la wɔnande wɔ nanyi mbandji Benaya la ewandji 22 wɛ tɔkɔlɛ wesukisá Davidɛ. (1 Ɛk. 11:22-25; 12:26-28) Ampame inkfumɔ yɛsɔ wɔsaka nkano djɛ mbekadjɛ Davidɛ nkfumi la djɛ ndolama.
7. a) Ndjɔmbɔmba yɛkɔnge y’oloko wolo y’etsho wɛnɛ y’okokaso ndjeka me wɔ? b) Olakanyelo wɔkɔnge ngombowa má ndjɔmbɔmba kɛ wɔnanyɔ Nsilu, ete ngo ɔkɔndɔlawɔ lá video?
7 Tongowa nkfulu l’oloko wolo ntsha tomboshishima ndjɔmbɔmba y’anto isukisá l’oloko wolo onkfumɔ ɛlɔndjɛlɔ kɛ Yehova. Nkfumi kɛso, Kristo Yeso atakɔpa kaanga ndambo daambi ndɔsa opiko lá wayi wa pɔlitikɛ wa nkfumbo dj’akambo djɛ Satana. (Mat. 4:8-11; Dj. 6:14, 15) Nde ayawɛkɛki winá enkfumɔ le Yehova djɛ mba nkfulu. L’etsho wɛso wɛnɛ, tolekɔ la ndjɔmbɔmba y’elangala itonisá ndɔsa opiko lá wayi wa pɔlitikɛ la nsuka elemo w’angala. Lamo ngopakoke mpona lá jw.org akambo amɔtshi waakomelisá? a
KOTSHƐ́ WANANYƆ WAKO
8. Winá wɔkɔnge tokokolo okokawɔ ndjala la djonyi dj’oloko wolo djɛ mpɛyɛ wananyɔ okotshɔ wɛnama?
8 Enkambi wɛ Yehova wangɔkɔpake nkotshána. (2 Kɔ. 8:4) Koko winá ɛmɔtshi, angɔlɔmbake ndjala l’oloko wolo. Ndjɔmbɔmba, winá w’owanga mbandji l’idjena imɔtshi, tokokolo wanghɛnake ambɔ wananyɔ l’ankaana walekɔ la djonyi djɛ lokembo, osukɔ ole mbala imɔtshi oleelo wɔ nyuma la wɔ demba. Má ngandji k’okawɔ ɛnkɔkɔ, tokokolo wangilake mbiko yɛwɔ lá mbalaka djɛ ndapɛyɛ kɛnɛ k’oyɛwɔ la djonyi. (Dj. 15:12, 13) Lá lɛdji lɔsɔ, wangokolake ndjɔmbɔmba k’oloko wolo kɛ Zadɔkɛ.
9. Ete ngo ɔkɔndɔlawɔ lá 2 Samwɛlɛ 15:27-29, kɛkɔnge kɛ Davidɛ ndashimela Zadɔkɛ djɛ nangha? (Lenda edjinge ntshango.)
9 Lowiko lɔ Davidɛ loyalaka lá mbalaka. Wɔnande Abisalɔmɔ ɔsaka nkano djɛ ndoyaka djɛ nde ndjala nkfumi. (2 Sa. 15:12, 13) Davidɛ ayalaka ladjɛ ndota má Jerusalɛmɛ mbala kɛkɔ kɛmɔ! Nde ashimelaka enkambi wɛnde ante: ‘Nyongandjɔ, nyoye tolote ladjikɛnde lako kaanga onto ɔmɔ wɔ l’anteyi kɛso wongopanda m’akatshi w’Abisalɔmɔ!’ (2 Sa. 15:14) Winá wɔ enkambi iyalote, Davidɛ ayɛka ndɛna ante onto ɔmɔtshi ladjɛ ntshikala djɛ ndowewoyɛka nonghanyi yɔsaki Abisalɔmɔ. Ko nde akawoyɛka Zadɔkɛ l’ankfundji inkina lá ngando djɛ ndoyala ete ngo antɔmbi. (Wala 2 Samwɛlɛ 15:27-29.) Iwɔ wayalaka ladjɛ nangha nkambo djɛsɔ l’okoso. Kɛnɛ kɛ Davidɛ ndashimela ankfundji yɛsɔ djɛ nangha ayalaka mbalaka k’ekekete efula. Kokanela kɛnɛ kɛ Abisalɔmɔ, kanga ankɛlɛ, ole omfungi w’isɛkɛnde, ndotanangha Zadɔkɛ l’ankfundji inkina winá wɔ ndotewa ante watɔmba akambo w’onanghande dj’iwɔ mbomba Davidɛ!
Davidɛ atoma Zadɔkɛ lotomo lilá lowiko lɔnde lá mbalaka (Lenda itenyi 9)
10. Wopo wɔkɔnge Zadɔkɛ l’anto wayalaki la nde iyalame lowiko lɔ Davidɛ?
10 Davidɛ alɔmbaka Zadɔkɛ la ilongo yɛnde inkina yɛ nkɔmano Hushayi, djɛ ndokotshɛ́ má nkamba la nonghanyi kɛmɔtshi kɛ ndɔshi. (2 Sa. 15:32-37) Má nkilika nonghanyi kɛsɔ, Abisalɔmɔ ilelaka Hushayi oloko ko Hushayi ɔpɛyɛka dako lá wopo w’okokawɔ nanyɛ Davidɛ, ko kɛsɔ kɛpɛyɛka Davidɛ winá wɔ ndálɔngɔsɔla djɛ ndonana. Mahanyi, Hushayi ewoyɛka Zadɔkɛ la Abiyatara nonghanyi kɛsɔ. (2 Sa. 17:8-16) Ampame ipe yɛsɔ watomelaka Davidɛ losango. (2 Sa. 17:17) Mpeyi m’okotshɔ wɔ Yehova, Zadɔkɛ nya winande ankfundji wakotshɛ́ka djɛ nama lowiko lɔ Davidɛ.—2 Sa. 17:21, 22.
11. Wopo wɔkɔnge w’okokaso ndjala l’oloko wolo ete ngo Zadɔkɛ winá w’okotshɛ́so wananyɔ?
11 Ntsha wambɔtɔlɔmba djɛ nkotshɛ́ wananyɔ lá winá wɔ mbalaka, wopo wɔkɔnge w’okokaso nyɛnyɛ oloko wolo ete ngo Zadɔkɛ? 1) Tɔlɔndɛ ɛlɔndjɛlɔ. Lá winá wɛ nghɔsɔ, alekɔ wɔlɔ iso ndjala l’osanga. Tokambe mpɛka la mpɛka djɛ ndɔnda ɛlɔndjɛlɔ k’owaso má biro djɛ filialɛ. (Heb. 13:17) Tokokolo ladjɛ ndendaka mbala la mbala nonghanyi yɔsamisá lá djena dj’oyɛwɔ, ilendana la wopo wɔ ndálɔngɔsɔla lá winá wɔ ambalaka yeyɛ má nkete ntongamisá, la ɛlɔndjɛlɔ k’olonghanyelo lá kɛnɛ k’oyɛwɔ ladjɛ nangha lá winá wɔ mbalaka k’ekekete. (1 Kɔ. 14:33, 40) 2) Toyale l’oloko wolo koko l’okoso. (Woo. 22:3) Tɔnɔla lá ntondo kɛ nangha nkambo nkfumɔ. Tolawilake lá mbalaka ngotoko. 3) Tolawɛkɛ le Yehova. Vungɔ ente Yehova ndjilaka yimba lá wɔlɔ wɔko wɔ demba la wɔ wananyɔ wako. Nde nkoka nkokotshɛ́ djɛ nsuka wananyɔ ipa ndáwila lá mbalaka.
12-13. Olakanyelo wɔkɔnge ngombowa má kɛnɛ kekomelisá Viktor nya Vitalii? (Lenda edjinge ntshango.)
12 Tokolenda kɛnɛ kenanghaki Viktor nya Vitalii, wananyɔ ape wa lonyuma efula watshɔki ntɔpɛyɛ winawɔ andjawodji eleelo la washi lá Ukraine. Viktor atepela ante: “Tahonaki idjena inkfumɔ iyalaki nkete djɛ ndɛ. Mbala efula asase wakandemaki ngo entshupa laso. Wɔnanyɔ ɔmɔtshi atɔpɛyɛka nkete má manghashinyi kɛnde. Epapɛyɛ wɛsɔ wɛpɛyɛka ansakodji efula kɛnɛ k’iyayalaka la djonyi dj’iwɔ mbika l’ilá kɛ winá ɛmɔtshi. Winá w’isakandaka nkete l’otuka, rɔkɛtɛ wɔkfɔka lá mɛtrɛ 20 entshupa laso. Lofu l’otondo, ndɔmbaka Yehova djɛ mpɛyɛ oloko wolo wɔ mayalaka la djonyi djɛ nkindjɛ nkotshɛ́ ansakodji.”
13 Vitalii atepela ante: “Alɔmbamaka ndjala l’oloko wolo w’efula. Nanghaka winá 12 lá lɔkɛndɔ lɔmi lɔ ntondo. Ntalɔmbaki Yehova ombamboka.” Vitalii ayalaka l’oloko wolo koko ayalaka lonkina l’okoso. Nde akfɛ ante: “Lakindjɛki ndɔmba Yehova djɛ nde mpɛyɛ balo la nkoka djɛ ndjewa elelo wɛmi. Mahete l’otuka wɔmi ngo l’amboka yɛ ewandji wɛ lɛɛta yawola. Djawo djɛmi nkembaka efula wopo wɔ mɛnyi wananyɔ l’ankaana wakamba esanga. Iwɔ wimɛki etamba l’enkeka má ontalimbo, watshumanyɛki la wakandaki epapɛyɛ w’anto iyapɛyɛka la watɔpɛyɛka eleelo lá djena djɛ mpomala winá wɔ sayalaka lá lɔkɛndɔ.”
Lá winá wɔ mbalaka, yala l’oloko wolo koko l’okoso winá w’okotshɛ́ wananyɔ (Lenda itenyi 12-13)
KINDJƐ NDJALA LA NKƆMANO LE YEHOVA
14. Okokaso ndjoka ngete mo ntsha onto w’ɔkɔpaso ambɔsa nkano djɛ ntɔmbɔkɛla Yehova?
14 Okakasano ɔmɔtshi w’ekekete w’okoka ntɔlɛmbɛ nde, winá w’ose nkfumbo kana ilongo yɛso imɔtshi ɔtɔmbɔkɛlande Yehova. (Yee. 78:40; Woo. 24:10) Ntsha ongoyalake la djokanelo djɛ ma ma l’onto wɔkɔ, angoyala wolo le wɛ djɛ nkfulumeyɛ. Ntsha ombopomana lá nkambo djɛ bale djodjo djɛsɔ, ndjɔmbɔmba kɛ nkɔmano kɛ Zadɔkɛ kekoka nkokembɛ.
15. Ladjikɛnge Zadɔkɛ ndayale la djonyi dj’oloko wolo djɛ ntshikala la nkɔmano le Yehova? (1 Nkfumi yɛ Nkanga 1:5-8)
15 Zadɔkɛ akindjɛka ndjala la nkɔmano le Yehova winá wɔ ilongo yɛnde yɛ ma ma, Abiyatara ndatɔmbɔkɔ. Nkambo djɛsɔ nanghemaka t’ekomo k’onkfumi wɔ Davidɛ. Davidɛ atakokaki ngandjɔ má mbeto winá wɔ ndatshunde efula, wɔnande Adɔniya asɛsaka ndjala nkfumi l’edjena kɛ Salɔmɔ, kanga Yehova ndalake. (1 Ɛk. 22:9, 10) Abiyatara asɔnaka djɛ nsuka Adɔniya. (Wala 1 Nkfumi yɛ Nkanga 1:5-8.) Má nangha nghɔsɔ, Abiyatara atayala la nkɔmano lonkina le Davidɛ la le Yehova! Okoka nkanela wopo wɔ Zadɔkɛ ndasolongɔ la ndoke yɛnyi má nkambo djɛsɔ? L’ilá k’ɛnɔnyi ndaka akumi anɛyi, nde nya Abiyatara wakambaki esanga ete ngo ankfundji. (2 Sa. 8:17) Walamaka ‘onsete w’iseke wɔ Ndjambe kɛ nsɔsɔlɔ’ esanga. (2 Sa. 15:29) Má bango ampame yɛsɔ wasukaka onkfumi wɔ Davidɛ, la wananghaka akambo ankina efula l’olemo wɔ Yehova.—2 Sa. 19:11-14.
16. Kɛkɔnge k’ekokisá nkotshɛ́ Zadɔkɛ djɛ ntshikala la nkɔmano?
16 Zadɔkɛ atshikalaka la nkɔmano le Yehova ayale nkano dj’Abiyatara ndɔshi. Davidɛ atilaki ehamo kaanga ndambo daambi ante Zadɔkɛ apalekɔ la nkɔmano. Winá w’iseke yɛ Adɔniya iyisɔka, Davidɛ asɔnaka Zadɔkɛ, Nata, la Benaya djɛ nkfuta Salɔmɔ avuta ete ngo nkfumi. (1 Nk. 1:32-34) Ndjala l’enkambi wɛ Yehova wɛ nkɔmano, ete ngo Nata l’anto ankina wasukisá Nkfumi Davidɛ ayalaka ladjɛ mpɛyɛ Zadɔkɛ wolo la lokembo. (1 Nk. 1:38, 39) Winá wɔ Salɔmɔ ndakome nkfumi, nde ‘asɔnaka Zadɔkɛ djɛ ndjala nkfundji l’edjena kɛ Abiyatara.’—1 Nk. 2:35.
17. Wopo wɔkɔnge w’okokɛ ndjokola Zadɔkɛ ntsha onto ɔmɔtshi wɔkɔpɛ efula ambɔsa nkano djɛ ntɔmbɔkɛla Yehova?
17 Wopo wɔkɔnge w’okokɛ ndjokola Zadɔkɛ? Ntsha onto ɔmɔtshi w’okana la wɛ efula ambɔsa nkano djɛ ntɔmbɔkɛla Yehova, ɛnyɛ Yehova ente ɔmbɔsa nkano djɛ ntshikala la nkɔmano le nde. (Yos. 24:15) Yehova angɔkɔpɛyɛ nkfulu l’oloko wolo w’oyɛ la djonyi. Yawɛkɛ le nde má lɔlɔmbɔ la yala entshupa la winako andjawodji walekɔ́ la nkɔmano le nde. Yehova ndɔsaka nkɔmano djɛko la ntshina la angokokofuta.—2 Sa. 22:26.
18. Olakanyelo wɔkɔnge ngombowa má kɛnɛ kekomelisá Marco nya Sidse?
18 Tokolenda ndjɔmbɔmba kɛ Marco nya wadjɛnde, Sidse, ase wana wawɔ ape w’amato wa nkokolo iyatshike nkambela Yehova. Marco atepela ante: “Ngo má lofu lowotshɔ wana wako, wɛ ongakɔpa lombombe. Ongonangha nkambo nkfumɔ djɛ ndalama má nyɛtshi. Djɛko ndeke winá w’ɔsawɔ nkano djɛ ntɔmbɔkɛla Yehova, angoyalake yɛnyi efula.” Nde akindjɛ ante: “Koko Yehova ayalaka l’onkoko wɔso. Nde ananghaki djɛ winá wɔ lemi ɔlɛmbami, wadjɛmi alekɔ la wolo, la winá wɔ nde ɔlɛmbande, lemi ndekɔ la wolo.” Sidse akfɛ ante: “Yehova ndotasamba ntɔpɛyɛ wolo w’isayalaka la djonyi, totasamba ndjala la wolo wɔ nkfulumeyɛ. Lananaki l’ikanyi yɛ ente ɛkɔmɔ oyɛwɔ nde me lemi, ko lashimelaki Yehova wopo wɔ mokaká. M’ɔkɔngɔ wɔ winá emangha, nkaana kɛmɔtshi kɛ makfuke nyɛna amboheta ɛnɔnyi efula, ayɛka le lemi, andjakfɛka lɔwɔ lá mpɛka, andendaka lá wiso ko atepelaka ante: ‘Sidse, vungɔ ente ɛkɔmɔ kepalekɔ me wɛ!’ Má okotshɔ wɔ Yehova, nanghaka la wolo djɛ ndjala l’osasa l’olemo wɔ nde.”
19. Nkano djɛkɔnge ngɔmbɔsa?
19 Yehova nkɔpaka enkambi wɛnde enkfumɔ ndjala l’oloko wolo ete ngo Zadɔkɛ. (2 Ti. 1:7) Koko, nde apakɔpɛ iso ndáwɛkɛ lá wolo wɔso. Nde nkɔpaka iso ndáwɛkɛ le nde. Djɛko ndeke, winá w’oyalɛ lá nkambo mɔtshi dɔmba djɛ ndjala l’oloko wolo, kadjimɔ te Yehova. Okoka ndjala l’eshikikelo ente nde angonangha djɛ wɛ ndjala l’oloko wolo ete ngo Zadɔkɛ!—1 Pɛ. 5:10.
YEEMBO 126 Towadjɛ, topikame ndii la toyale la nkfulu (lá Otetela)
