Weepó w’antangi
Oye ‘omoto’ wotepelawɔ lá Izaya 60:1, ko wopo wɔkɔnge ‘ndangandjɔ’ la ‘ndatshanghanyɛ osase wɔnde’?
Towala lá Izaya 60:1 nghɔnɛ: ‘Ngandjɔ, wɛ omoto, tshanganyɛ osase, ladjikɛnde osase wɔko womboyɛ. Lomo lɔ Yehova lɔmbɔkɔpɛtɛla.’ Lá nkilika avɛrse ankina, ‘omoto’ nde Siɔna, kana Jerusalɛmɛ, kapitalɛ kɛ Juda dj’etsho wɛ ntondo. a (Iza. 60:14; 62:1, 2) Ngando osakisolawɔ nde owila onkfumɔ. Etepela wɛ Izaya weposɛ weepó epe wɛnɛ: Wɔ ntondo, winá la wopo wɔkɔnge Jerusalɛmɛ ‘ndangandjɔ’ la ndatshanghanyɛ osase wɔ nyuma? W’ape, etepela wɛ Izaya welekɔ l’ekotshamelo kenkina l’etsho wɛso wɛnɛ?
Winá la wopo wɔkɔnge Jerusalɛmɛ ‘ndangandjɔ’ la ndatshanghanyɛ osase wɔ nyuma? Jerusalɛmɛ la tɛmpɛlɔ kɛnde kekomaka boko winá w’ase Juda iyananghe ɛnɔnyi 70 lá lomfumbe lá Babilɔnɛ. Koko m’ɔkɔngɔ wɔ ase Mediya la Pɛrsiya nkfɛyɛ Babilɔnɛ, ase Isariyɛlɛ wayalaki lá atshuku ankfumɔ wa Onkfumi wɔ Babilɔnɛ, wawaka lotshungɔ lɔ nkalɔ lá owila wɔwɔ la nkawoyɛ ɔtɛmwɛlɔ wɔ nsɔsɔlɔ. (Ɛzr. 1:1-4) Ngo má ɔnɔnyi wɔ 537 N.D.D., anto wa nkɔmano watshikalisá w’ima tɔkɔlɛ 12 wakalɔka. (Iza. 60:4) Wawangaka mpɛyɛ Yehova ɛpapɛyɛ, nangha afɛtɛ, la wakalɔka mpika tɛmpɛlɔ. (Ɛzr. 3:1-4, 7-11; 6:16-22) Lonkina, lomo lɔ Yehova lowangaka mpɛta lá Jerusalɛmɛ, nkɔpa ntepela ente, lowangaka mpɛtɛla enkambi wɛnde. L’onkoko wɔwɔ, iwɔ wakomaka osase le ewila w’eyalaki lá widjima wɔ nyuma.
Koko, prɔfɛsi k’Izaya k’okalo kɛsɔ iyakotshama ngo ndambo daambi lá Jerusalɛmɛ dj’etsho wɛ ntondo. Ase Isariyɛlɛ efula watakindjɛ nɛmɛyɛ Ndjambe. (Nɛh. 13:27; Mal. 1:6-8; 2:13, 14; Mat. 15:7-9) M’ɔkɔngɔ, watawola edjinge Mesiya, Yeso Kristo. (Mat. 27:1, 2) Lá 70 D.D., Jerusalɛmɛ la tɛmpɛlɔ kɛnde kekalɔka ntshitana mbala k’ape.
Yehova ewoyɛka ante nkambo djɛsɔ nghonanghema. (Dan. 9:24-27) Nsɔsɔlɔ, atayalá ɛkɔpa kɛnde djɛ Jerusalɛmɛ djɛ lá looko nkotshɛ ikakambo inkfumɔ ilendana la prɔfɛsi k’okalo kelá Izaya shapitrɛ 60.
Etepela wɛ Izaya welekɔ l’ekotshamelo k’ekekete l’etsho wɛso wɛnɛ? Ee, koko lá nkambo ndendana lá omoto wɔ djingingi, ‘Jerusalɛmɛ djɛ l’olongo.’ Ɔpɔstɔlɔ Poolo afunaka lá nkambo djɛ omoto wɔsɔ ante: ‘Nde ndeke nyɔ kɛso.’ (Nga. 4:26) Jerusalɛmɛ djɛ l’olongo nde etenyi kɛ l’olongo kɛ olonghanyelo wɔ Ndjambe wɔ ntongami djɛ nyuma djɛ nkɔmano. ‘Wana’ wande nde Yeso la Akristo w’ankfutami w’avuta 144 000, walekɔ́ la nkongi djɛ ntowika l’olongo ete ngo Poolo. Akristo w’ankfutami w’avuta wakfumba ‘owila w’ekina,’ ‘Isariyɛlɛ yɛ Ndjambe.’—1 Pɛ. 2:9; Nga. 6:16.
Wopo wɔkɔnge Jerusalɛmɛ djɛ l’olongo ‘ndangandjɔ’ la ‘ndatshanghanyɛ osase’? Nde atshanghanyɛka má mbamba kɛ wana wande w’ankfutami w’avuta welá looko. Ɛdjɛ kɛnɛ kakomelisá la kɛnɛ ketepelamisá lá prɔfɛsi kelá Izaya shapitrɛ 60.
Akristo w’ankfutami w’avuta wayalaka ladjɛ ‘ngandjɔ’ ladjikɛnde wingelaka lá widjima wɔ nyuma winá wɔ nkɛngɔ yɛ ngando yɛ apostazi iyavutɔ́ l’ɛtɔndɔ k’ape D.D. (Mat. 13:37-43) Iwɔ wayɛka ndokoma amfumbe yɛ Babilɔnɛ dj’Ekekete, osanga wɔ ntolo dj’engolo djel’andja w’otondo. Ankfutami wavundamaka mfumbe tii ‘lá ekomo kɛ nkfumbo djɛ akambo,’ eleko kewangisá má 1914. (Mat. 13:39, 40) Ndambo daambi m’ɔkɔngɔ, lá 1919, iwɔ watshungɔka ole wawangaka ntshanghanyɛ osase wɔ nyuma má nkamba olemo w’ipoposanyɛ. b L’ilá k’ɛnɔnyi, anto w’ewila enkfumɔ wavukumɔka lá osase wɔsɔ, ndjila ole antshikadji w’Isariyɛlɛ yɛ Ndjambe, ntepela ente, ‘ankfumi’ y’otepelawɔ lá Izaya 60:3.—Ndj. 5:9, 10.
Lá etsho weyaye, Akristo w’ankfutami w’avuta wangetela ntshanghanyɛ osase w’oyɛ me Yehova lá lɛdji l’efula. Ngete mo? Winá wɔ yongokoma l’ekomo kɛ lowiko lɔwɔ lelá looko, wangɔsa opiko lá ‘Jerusalɛmɛ djɛ Bango,’ kana wadjɛ Kristo wolekɔ́ l’anto 144 000 wangɔlɔndjɛ́ ete ngo ankfumi la ankfundji.—Ndj. 14:1; 21:1, 2, 24; 22:3-5.
Jerusalɛmɛ djɛ Bango ngokamba olemo wɔ djonyi lá ekotshamelo kɛ prɔfɛsi k’Izaya 60:1. (Ɛdjɛ Izaya 60:1, 3, 5, 11, 19, 20 la Ndjiso 21:2, 9-11, 22-26.) Ete ngo Jerusalɛmɛ djɛ lá looko yayalaka idjena iyalaki onkfumi wɔ Isariyɛlɛ y’etsho wɛ ntondo, Jerusalɛmɛ djɛ Bango, esanga la Kristo, ngokoma idjena ingoyala onkfumi wɔ nkfumbo dj’akambo wa bango. Wopo wɔkɔnge Jerusalɛmɛ djɛ Bango ‘yongokita m’olongo, me Ndjambe’? Má ndjila yimba yɛwɔ inkfumɔ l’akambo wa looko. Anto w’ewila enkfumɔ w’oka Ndjambe wɔma ‘wangɔkɛnda má mbamba kɛ osase wɔnde.’ Wangotshungɔ kaanga má mpekanto la nyɔyi. (Ndj. 21:3, 4, 24) Lɔɔla longoyala nde, ‘ɔlɔngɔswɛlɔ wɔ akambo ankfumɔ’ wongoyala ete ngo Izaya la aprɔfɛtɛ ankina iyewoyɛ. (Ele. 3:21) Ɔlɔngɔswɛlɔ w’ekekete w’akambo wɔsɔ wongoyala winá wɔ Kristo ndongokoma Nkfumi la ndongokoma l’ekomo k’Ɛlɔndjɛlɔ kɛnde k’Ɛnɔnyi Kinunu.
a Lá Izaya 60:1, Bible—Ekadimwelo k’andja w’oyoyo djekamba la ‘omoto’ l’edjena kɛ ‘Siɔna,’ kana ‘Jerusalɛmɛ,’ ladjikɛnde itepela yɛ Hebero ‘ngandjɔ’ la ‘ntshanghanyɛ osase’ ikambemawɔ nde le omoto, ete ngo kanga etawɔ ambɔ ‘wɛ.’ Itepela ‘omoto’ nkotshɛ́ka antangi y’otepela wɔ anglɛ djɛ nyɛna ente otepelawɔ nde nkambo djɛ omoto wɔ djingingi.
b Okalo wɔ akambo wa nyuma wonanghemisá lá 1919 wotepelama lonkina lá Ezekiyɛlɛ 37:1-14 la Ndjiso 11:7-12. Ezekiyɛlɛ ewoyɛka okalo wɔ akambo wa nyuma le Akristo ankfumɔ w’ankfutami w’avuta m’ɔkɔngɔ wɔ eleko kɛ otale kɛ lomfumbe. Prɔfɛsi kɛ Ndjiso ketoma lokanyi tá botshɔ djɛ nyuma djɛ iloyi yɛ daambi yɛ wananyɔ w’ankfutami w’avuta walɔndjɛki m’ɔkɔngɔ w’eleko k’itenyi kɛ iyasambe ndjala l’akoka wa nkambela Yehova wɔlɔ wɔlɔ, mande wawɛngɛyɛka djɛ ndaawingeyɛ lá lokando. Lá 1919, wasɔnamaka ete ngo ‘mfumbe kɛ nkɔmano la nkɛsɔ.’—Mat. 24:45; lenda Ɔtɛmwɛlɔ wa pudipudi wa Jehowa—wambokaloyama!, nki. 118.
