DJAMBA DJƐ WEKELO 31
YEEMBO 12 Yehova ndeke Ndjambe k’ekekete (lá Otetela)
Kɛnɛ kɛ Yehova ndananghe djɛ mbikɛ ananghi wa mpekanto
‘Ndjambe akɔpaka anto lá lɛdji l’efula, djɛko ndeke ndapɛyɛ ɛtɔyi kɛ Wɔnande wɔ ndawote.’—DJ. 3:16.
IKANYI YƐ DJAMBA
Wopo wɔ Yehova ndɔshi nonghanyi kɛ ntokotshɛ́ djɛ nana la mpekanto la wopo wɔ ndananghe dj’iso nsasanga la lowiko l’etshinda, má ntotshungola má mpekanto.
1-2. a) Oye mpekanto, ko wopo wɔkɔnge w’okokaso ndonga mbandji k’onanaso la mpekanto? (Lenda “Djɛ ndjoka wɔlɔ.”) b) Ɛnaso nge lá djamba djɛnɛ la lá wamba ankina w’Etange k’Olami kɛnɛ? (Lenda ole “Nɔtɛ le antangi” lá numelo kɛnɛ.)
ƆKƆPA ndjewa ngandji k’efula kɛ Yehova okokande? Tɔkɔpa nyɛna wopo wɔ wɔlɔ efula wɔ mba ekadjimwelo: Teka kɛnɛ kɛ ndananghe djɛ nkowikɛ má mpekanto la nyɔyi. Mpekanto a kelekɔ ontonyi w’ekekete efula wɔ nghopakoke ndonga nghɔmɛlɛ kɛko. Isankfumɔ nanghaka mpekanto lofu la lofu, la tovɔ mande tonangha mpekanto. (Ɔrɔ. 5:12) Koko tolekɔ la losango lɔ wɔlɔ. La okotshɔ wɔ Yehova, tokoka ndonga mpekanto. Ape la ehamo, Yehova angototshungola má mpekanto la nyɔyi!
2 Yehova Ndjambe ambokotshɛ́ka anto djɛ nana la mpekanto l’ilá k’ɛnɔnyi ete ngo 6 000. Lamo? Mande nde ntɔkɔpaka. Ladjikɛnde nde akɔpaka anto ngo má bango bango, djɛko ndeke ndile welo djɛ ndakotshɛ́ lá mbandji kɛsɔ. Ndjambe ndjewaka ante mpekanto ntɔtɔlaka tá nyɔyi, la nde apakɔpɛ iso mvɔ. Nde nkɔpaka iso mbika etshinda etshinda. (Ɔrɔ. 6:23) Kɛsɔ ndeke okombolande le wɛ. Lá djamba djɛnɛ tongokadjimola weepó esato: 1) Nkongi djɛkɔnge Yehova ndapɛyɛ wana w’anto w’ananghi wa mpekanto? 2) Wopo wɔkɔngɔ wana w’anto wa etsho wɛ Bible yawolama me Yehova? 3) Yeso ndananghe nge djɛ mbikɛ wana w’anto w’ananghi wa mpekanto?
NKONGI DJƐKƆNGE YEHOVA NDAPƐYƐ WANA W’ANTO W’ANANGHI WA MPEKANTO?
3. Wopo wɔkɔnge ambotshi waso wa ntondo yonanghaka mpekanto?
3 Winá wɔ Yehova ndatonge mpame l’omoto wɔ ntondo, nde akɔpaka iwɔ ndjala l’osasa. Nde apɛyɛka intaselo kɛ wɔlɔ efula, opapɛyɛ wɔ bala, la olemo wɔ wɔlɔ efula. Wayalaka ladjɛ ndodjɛ looko la tonkanola tɔwɔ, nkomɛ looko l’otondo bedji djɛ Ɛdɛna. Nde apɛyɛka ngo ilɛlɛmbɛ imɔ. Ole awewoyɛka ante ntsha wambotshita ɔlɛmbɛ wɔsɔ, wambɔtɔmbɔkɛla l’onkonda, mpekanto kɛwɔ kengatɔla tá nyɔyi. Nde ewaki kɛnɛ ketakomela. Ondjelo ɔmɔtshi wɔ nyɛtshi, wotakɔpɔki Ndjambe la wotaakɔpaki, ahembaka Adama nya Eva dj’iwɔ nangha mpekanto. Adama nya Eva wadjimbamaka. Má nsamba ndjilela Papa kɛwɔ kɛ ngandji oloko, wananghaka mpekanto. Ete ngo ewaso, etepela wɛ Yehova wekotshamaka. Má lofu lɔsɔ, wayalaka ladjɛ mpomana la eposelo wɛ nyɛtshi: Iwɔ watateyɛka ntshunda, ekomo ekomo wavɔka.—Ewa. 1:28, 29; 2:8, 9, 16-18; 3:1-6, 17-19, 24; 5:5.
4. Lamo Yehova okfupande mpekanto la otokotshɛ́nde djɛ nana? (Ɔrɔma 8:20, 21)
4 Yehova ananghaka djɛ ɔkɔndɔ wɔsɔ mfunama lá wapɔ wɔso. Wotokotshɛ́ djɛ ndjoka lamo okfupande mpekanto. Mpekanto ketokapola la Papa kɛso la kɛtɔtɔla tá nyɔyi. (Iza. 59:2) Djɛko ndeke Satana, ondjelo w’ɔntɔmbɔki, ndatshinde Adama nya Eva djɛ mpendola, ɔkɔpande la onanghande djɛ mpekanto mfulanela. Akokaka nkanela ante ambowa lompongo lá Ɛdɛna. Koko nde atasipisoyɛ tii lá lɛdji lɔkɔnge Yehova oyɛnde ngandji. Ndjambe atatshikitanyɛ ikanyi yɛnde lá nkambo djɛ tonkanola tɔ Adama nya Eva. Nde nkɔpaka wana w’anto efula, ko apɛyɛka nkongi mbala kɛkɔ kɛmɔ. (Wala Ɔrɔma 8:20, 21.) Yehova ewaki ante tonkanola tɔmɔtshi tɔngɔkɔpa la tongohona okotshɔ wɔ nana la mpekanto. Edjinge ete ngo oyɛnde Papa la Ontongi, nde angapɛyɛ mbamba kɛ ntshungɔ má mpekanto la kɛ nsukana la nde. Yehova ndananghe nge djɛ nkotshɛ akambo ankfumɔ wasɔ?
5. Winá wɔkɔnge Yehova ndapɛyɛ wana w’anto nkongi djɛ ntondo? Pakisola. (Ewangelo 3:15)
5 Wala Ewangelo 3:15. Ndambo kɛ nkongi keyɛka winá wɔ Yehova ndopela Satana dombo. Ndjambe atepelaka ante ‘inkanola’ imɔtshi ingowotshɔ djɛ ndowikɛ́ wana w’anto. L’ekomo, inkanola yɛsɔ ingɔsɛpɛtanyɛ Satana, ingotshita akambo ankfumɔ wa ndaposɛ lá Ɛdɛna. (1 Dj. 3:8) Koko, inkanola anghɛna ndjolo djɛ nangha akambo wasɔ. Satana angɔnyɔkɔla la angonangha djɛ ndoyaka. Nkambo djɛsɔ ngɔpɛyɛ Yehova djodjo efula. Koko Yehova awolaka ndjoka djodjo djɛsɔ mande l’ekomo, anto wangotshungɔ má mpekanto la nyɔyi.
ANANGHI WA MPEKANTO W’ETSHO WƐ NTONDO YAWOLAMA ME YEHOVA NGETE MO?
6. Ampame yɛ nkɔmano, ete ngo Abɛlɛ la Nowe, iyananghe nge djɛ nsukana la Yehova?
6 L’ilá kɛ nkama y’ɛnɔnyi ilɔndisá, Yehova akindjɛki nyɛnyɛ ndambo ndambo wopo wɔ wana w’anto w’ananghi wa mpekanto okokawɔ nsukana la nde. Abɛlɛ, wɔna Adama nya Eva w’ape, ayalaka onto wɔ ntondo wɛnyisá djawo le Yehova m’ɔkɔngɔ w’ɔtɔmbɔkwɛlɔ wɔ Ɛdɛna. Ladjikɛnde Abɛlɛ akɔpaki Yehova, akɔpaki ndosasangɛ la nsukana la nde, nde olambolaka olambo. Abɛlɛ ayalaki olami w’ɛnkɔkɔ, ko ɔsaka ɛsɔngɔ ɛmɔtshi w’ɛnkɔkɔ ayakaka djɛ ndambola Yehova. Yehova ndelola ngete mo? Nde ‘awolaka Abɛlɛ l’olambo wɔnde.’ (Ewa. 4:4) Yehova awolaka elambo wɛ nghɔsɔ w’anto w’ɔkɔpaki la w’owilelaki oloko, ete ngo Nowe. (Ewa. 8:20, 21) Má ndjawola elambo wɛ nghɔsɔ, Yehova ɛnyɛka ante anto wanangha mpekanto nkoka nsukana la ndjawolama me nde. b
7. Olakanyelo wɔkɔnge w’owaso má wopo w’Abrahama ndayale entshupa djɛ ndambola wɔnande?
7 Yehova alɔmbaka Abrahama, mpame keyalaki la djawo dj’ekekete djɛ nangha nkambo djɛ wolo efula, ndambola Isaka, ɛtɔyi kɛnde kɛ wɔna. Abrahama ɛnaka ante ɔsɔ ayalaka nkambo djɛ yɛnyi djɛ ndotafɛnyɛki. Kaanga yayale nghɔsɔ, nde ayalaka entshupa djɛ nangha nkambo djɛsɔ. Koko ate ngo ndolambole, Ndjambe ndomboshimba. Koko nkambo djɛsɔ ntolakanyɛ ekete kɛmɔtshi kɛ nsɔsɔlɔ. Yehova akɔpaka ndambola ɛtɔyi kɛnde kɛ Wɔna ete ngo olambo. Yehova nkɔpaka anto lombombe.—Ewa. 22:1-18.
8. Elambo efula wɛ Ɛlɛmbɛ wɛ Mɔsɛ oyɛwɔ djingingi djɛ nge? (Ase Lewi 4:27-29; 17:11)
8 Nkama y’ɛnɔnyi m’ɔkɔngɔ, ɛlɛmbɛ wɛ ndapɛyɛ Isariyɛlɛ walɔmbaki djɛ mpɛyɛ elambo djɛ ndjipa mpekanto yɛwɔ. (Wala Ase Lewi 4:27-29; 17:11.) Elambo wɛsɔ yayalaka nde djingingi djɛ olambo w’ekekete, wongowikɛ anto la kenkfumɔ. Aprɔfɛtɛ wa Ndjambe watshindamaka má nyuma djɛ mpakisola ente inkanola ilakemisá, ingokomá Wɔna Ndjambe w’otshikitanyi, ladjɛ nyɛna ndjolo ole ndjakema. Angoyakema ngo ngete ɔnkɔkɔ w’olambolawɔ olambo. (Iza. 53:1-12) Tokokanela: Yehova angolonghanyɛ djɛ wɔnande wɔ ngandji ndambolama djɛ mbikɛ wana w’anto—ndjila ole wɛ—má mpekanto la nyɔyi!
YESO NDANANGHE NGE DJƐ NTOWIKƐ?
9. Djɔanɛ ombatizanyi ndatepela nge lá nkambo djɛ Yeso? (Hebero 9:22; 10:1-4, 12)
9 Lá ɛtɛndɔ kɛ ntondo D.D., onkambi wɔ Ndjambe Djɔanɛ ombatizanyi atepelaka djɛ Yeso yɛ Nazarɛtɛ ante: ‘Nyolende Wɔna Ɔnkɔkɔ wɔ Ndjambe wimɛ́ mpekanto y’andja.’ (Dj. 1:29) Etepela wɛsɔ wɛnyɛ ente Yeso ndeke inkanola ilakemisá. Nde angɔpɛyɛ olambo w’olakemisá. Winá wɔkɔ wɔsɔ, nkongi djɛ wana w’anto w’ananghi wa mpekanto djɛ ndonga mpekanto djɛnamaka papoo.—Wala Hebero 9:22; 10:1-4, 12.
10. Wopo wɔkɔnge Yeso ndɛnyɛ ante ‘ayɛka ndohona’ ananghi wa mpekanto?
10 Yeso ayapɛyɛki lá lɛdji lotshikitanyi le anto wawɛmbaki odjito wɔ mpekanto la awetaki djɛ nkoma ambeki wande. Ewaki ante mpekanto ndeke djwe djɛ ndjolo yɛ wana w’anto. Djɛko ndeke ndete ampame l’amato wewamaki ete ngo ananghi wa mpekanto yɛ nkekete. Má nkamba la ndjɔmbɔmba, apakisolaka ante: ‘Anto wa alemba vu wapahonaka ifulume, koko ngo anto w’elando.’ Akfɛka ante: ‘Lemi ndjɛka ndohona ape anto wa wɔlɔ, koko ananghi wa mpekanto.’ (Mat. 9:12, 13) Yeso awikaki lá nkilika etepela wɛsɔ. La ngandji kenkfumɔ, imeyɛka omoto woosolisá ekolo la wisɔyi mpekanto yɛnde. (Luka 7:37-50) Alakanyɛka omoto ose Samariya akambo wa nsɔsɔlɔ lá mpeku djɛ washi, kaanga ndewaka ente anangha wayi wa mbindo. (Dj. 4:7, 17-19, 25, 26) Ndjambe apɛyɛka Yeso nkfulu kɛ ntshita eposelo enkfumɔ wɛ mpekanto. Lá ngete mo? Yeso akfundolaka anto, ampame l’amato, nkokolo la dɛngɛ.—Mat. 11:5.
11. Ladjikɛnge ananghi wa mpekanto yasukanaka la Yeso?
11 Topakamɔ má ndjewa ente kaanga ananghi wa mpekanto yɛ nkekete wasepamaki me Yeso. Nde awokaki djandji la nkɛtshi. Watayalaki l’okakasano djɛ nsɛmɛla te Yeso. (Luka 15:1, 2) Yeso awandjɛka la afutaka anto wayalisá la djawo le nde. (Luka 19:1-10) Nde ɛnyɛka lá lɛdji lɔ djɔ djandji djɛ Papa kɛnde. (Dj. 14:9) Ɛnyɛki má nanghedji la m’etepela ante Papa kɛnde, kanga lokana djandji la nkɛtshi, nkɔpaka anto la nkɔpaka nkotshɛ́ onto onkfumɔ djɛ ndonga mbandji k’onanande la mpekanto. Yeso akotshɛ́ka anto wakɔpaki ndokilika la ntshikitanyɛ nanghedji djɛwɔ.—Luka 5:27, 28.
12. Yeso ndalakanyɛ lá nkambo djɛ nyɔyi kɛnde nge?
12 Yeso ewaki kɛnɛ k’okongaki. Mbala efula, ashimelaka ambeki wande ante wangofunga la wangoyaka l’otamba. (Mat. 17:22; 20:18, 19) Nde ewaki ante olambo wɔnde wongimɛ mpekanto y’andja ete ngo Djɔanɛ ndapoposanyɛ l’aprɔfɛtɛ yewoyɛ. Yeso alakanyɛka lonkina ante m’ɔkɔngɔ wɔ ndambola lowiko lɔnde, ‘angosepa nkopo y’anto inkfumɔ’ le nde. (Dj. 12:32) Ananghi wa mpekanto nkoka nsasangɛ Yehova má ndjawola Yeso ete ngo Nkfumi kɛwɔ la má nkilika ɛlɛmbɛ wɛnde. Ntsha wamonangha nghɔsɔ, ekomo ekomo ‘wangotshungɔ má mpekanto.’ (Ɔrɔ. 6:14, 18, 22; Dj. 8:32) Djɛko ndeke l’ɛkɔpa ole l’oloko wolo onkfumɔ, Yeso awolaka mvɔ nyɔyi kɛ ndjolo.—Dj. 10:17, 18.
13. Yeso ndavu ngete mo, nyɔyi kɛnde otolakanyɛwɔ nge lá nkambo djɛ Yehova? (Lenda edjinge ntshango.)
13 Wafungaka Yeso, wovundaka, wɔwɔnyɔlaka, wowandaka akambo, wofunelaka dombo djɛ nyɔyi, la wɔnyɔkɔlaka. Angala wɔtɔlaka t’idjena yɛ yotoyaka la wopanyɛka l’otamba. Winá wɔ ndakfulumeyɛka ndjolo inkfumɔ yɛsɔ, Onto ɔmɔtshi okaki djodjo efula. Onto wɔkɔ nde Yehova Ndjambe. Nde ashimbaka nkfulu kɛnde k’ipa l’ekomo la ayashimba djɛ ndosela. Lamo? Nkambo djɛkɔnge djetshindisá Papa kɛ ngandji djɛ nangha nghɔsɔ? Lá yopasɛ: Ngandji. Yeso atepelaka ante: ‘Ndjambe akɔpaka anto la lɛdji l’efula, djɛko ndeke ndapɛyɛ ɛtɔyi kɛ Wɔnande wɔ ndawote, djɛ onto onkfumɔ woyala la djawo le nde atavɔke, koko awa lowiko l’etshinda.’—Dj. 3:16.
Má ndjawola djɛ wɔnande ndjakema, Yehova okaka ndjolo lá lɛdji l’indeko djɛ ntotshungola má mpekanto la nyɔyi (Lenda itenyi 13)
14. Olambo wɔ Yeso okolakanyɛwɔ nge?
14 Olambo wɔ Yeso wolekɔ ilembetelo y’ekekete efula yɛ ngandji kɛ Yehova te tonkanola tɔ Adama la Eva. Yɛnyɛ djɛ Yehova nkɔkɔpaka lombombe. Ilaka welo efula, okaka ndjolo lá lɛdji l’indeko djɛ nkowikɛ la nkotshungola má mpekanto la nyɔyi. (1 Dj. 4:9, 10) Ɛwo, nde nkɔpaka ntokotshɛ́ isankfumɔ djɛ nana la mpekanto—ole ndonga!
15. Oyɛso ladjɛ nangha nge djɛ mba wapɔ má oshinga wɔ mbendo w’olambo wɔ Yeso?
15 Opapɛyɛ wɔ Ndjambe, oshinga wɔ mbendo wɔ ɛtɔyi kɛnde kɛ Wɔna, wɔmbɔpɛyɛ mbamba kɛ mpekanto yɛso nyimeyama. Koko dj’iso mba imeyelo kɛ Ndjambe, iso ladjɛ nangha nkambo mɔtshi. Nkambo djɛkɔnge? Djɔanɛ ombatizanyi la Yeso Kristo wakadjimola ambɔ: ‘Nyolapɛlɛ, mande Onkfumi wɔ l’olongo wombosukana.’ (Mat. 3:1, 2; 4:17) Ndápɛla alekɔ nsɔsɔlɔ ekete kɛ djonyi efula ntsha tokombola nanyɛ mpekanto la nsukana la Papa kɛso kɛ ngandji. Iya ndápɛla osakisolawɔ nge, ko wopo wɔkɔngɔ otokotshɛ́wɔ djɛ nanyɛ eyalelo kɛso k’anto wa ntshamba djɛ djɔ? Djamba djɛ wekelo djeyaye ngokadjimola woopó wɔsɔ.
YEEMBO 18 Djedjɛ lá nkambo djɛ oshinga wɔ mbendo (lá Otetela)
a DJƐ NDJOKA WƆLƆ: Lá Bible, itepela ‘mpekato’ nsakisolaka nanghedji djɛ nyɛtshi, nsamba mbika kana nsamba nangha akambo lá yopo y’okana l’ɛlɛmbɛ wɛ Yehova. Koko itepela ‘mpekanto’ nsakisolaka lonkina eyayelo kɛ ntshamba djɛ djɔ la kɛ nangha mpekanto kɛ sasambela me Adama. Má mpekanto kɛ sasambela ndeke ovɔso isankfumɔ.
