DJAMBA DJƐ WEKELO 33
YEEMBO 130 Timeyanake (lá Otetela)
Wopo wɔ Yehova ɔkɔpande otshumano ndɔsa anto wamonangha mpekanto
‘Ntsha onto ɔmɔtshi amonangha mpekanto, tolekɔ la okotshɔ.’—1 DJ. 2:1.
IKANYI YƐ DJAMBA
Elakanyelo w’owaso má wopo wɔ yakandola mpekanto k’ekekete l’otshumano wɔ Kɔrɛtɔ, l’ɛtɛndɔ kɛ ntondo.
1. Yehova ɔkɔpakande nge lá nkambo dj’anto ankfumɔ?
YEHOVA atongaka anto la lotshungɔ lɔ nsɔna kɛnɛ k’ɔkɔpawɔ. Ongokambake l’opapɛyɛ wɔsɔ mbala la mbala winá wɔsɛ akano. Nkano deka ekekete dj’onto okokande ndɔsa nde nkano djɛ ndálambola le Yehova, la djɛ ndɔtɛmɔla esanga l’enkambi wɛnde. Yehova nkɔpaka onto onkfumɔ ndɔsa nkano djɛsɔ. Ladjikɛnge? Ladjikɛnde nde nkɔpaka anto la nkɔpaka ndananghela kɛnɛ keleka wɔlɔ. Nde nkɔpaka iwɔ ndjala la djokanelo djɛ wɔlɔ la nde la iwɔ mbika etshinda etshinda.—Mvu. 30:19, 20; Nga. 6:7, 8.
2. Yehova ɔkɔpande nge lá nkambo dj’ananghi wa mpekanto yɛ nkekete ipalapɛlɛ? (1 Djɔanɛ 2:1)
2 Koko, Yehova apatshinde kaanga onto ɔmɔ la wolo djɛ ndokambela. Nde ntshikaka onto onkfumɔ nsɔna kɛnɛ k’ɔkɔpande. Iya otepelaso mo ntsha Okristo wombolongola batisimo ambosekola ɔlɛmbɛ wɔ Ndjambe, má nangha mpekanto k’ekekete? Ntsha apalapɛlisa, nde ladjɛ mposa má otshumano. (1 Kɔ. 5:13) Koko kaanga nghɔsɔ, Yehova nkombolaka djɛ onto wɔsɔ nkalɔ le nde. Lá nsɔsɔlɔ, lá elonga kɛsɔ ndeke ndafute oshinga wɔ mbendo, djɛ nyimeyɛ anto wanangha mpekanto walapɛla. (Wala 1 Djɔanɛ 2:1.) Ndjambe kɛso kɛ ngandji nkembɛka ananghi wa mpekanto djɛ ndápɛla.—Zak. 1:3; Ɔrɔ. 2:4; Dja. 4:8.
3. Ɛnaso lá djamba djɛnɛ lɔ nge?
3 Yehova nkɔpaka iso ndjala l’ikanyi yɛnde lá nkambo djɛ mpekanto la dj’anto wamonangha mpekanto. Djamba djɛnɛ ngɛnyɛ topo tɔ nangha nkambo djɛsɔ. Winá wɔ ngotawale djamba djɛnɛ, lenda 1) wopo wɔ nkambo djɛ mpekanto k’ekekete yakandɔ lá otshumano wɔ Kɔrɛtɔ l’ɛtɛndɔ kɛ ntondo, 2) ɛlɔndjɛlɔ kɛ Poolo ndapɛyɛ winá w’olapɛlisá onto wonanghi mpekanto ndolapɛla, la 3) kɛnɛ k’ɔkɔndɔ wɔ Bible wɔsɔ ɛnyɛwɔ ikanyi yɛ Yehova lá nkambo djɛ Okristo womonangha mpekanto k’ekekete.
WOPO WƆ YAKANDOLA MPEKANTO L’ƐTƐNDƆ KƐ NTONDO
4. Nkambo djɛkɔnge nanghemisá l’otshumano wɔ Kɔrɛtɔ l’ɛtɛndɔ kɛ ntondo? (1 Kɔrɛtɔ 5:1, 2)
4 Wala 1 Kɔrɛtɔ 5:1, 2. Lá lɔkɛndɔ lɔnde l’asato lɔ misiɔnɛrɛ, Poolo okaka losango lɔ nyɛtshi lá nkambo djɛ otshumano wɔ bango wɔ Kɔrɛtɔ. Wɔnanyɔ ɔmɔtshi w’otshumano wɔsɔ asangaki mbeto nya wadjɛ isɛkɛnde. Ɔsɔ ayalaki nkambo djɛ nsɔnyi djɛ ‘kaanga ase andja yotananghaki’! Koko, otshumano wodjipaki wiso, ole nkoka ndjala woyalaki kaanga l’ofuno m’ɔtɛ wɔ nkambo djɛsɔ. Nkoka ndjala anto amɔtshi wakanelaki ambɔ ndjipa wiso lá nkambo djɛsɔ ɛnyɛ ente woka anto wa ntshamba djɛ djɔ djandji ete ngo Ndjambe. Koko Yehova apadjipe wiso lá mpekanto inanghema l’anteyi k’enkambi wɛnde. Eyalelo kɛ mpame kɛsɔ katshitaki lokumu lɔ wɔlɔ lɔ otshumano. Nde akokaka ndjimbola Akristo wawembolanaki la nde. Ko Poolo ndashimela otshumano djɛ nangha nge?
5. Poolo ndashimela otshumano djɛ nangha nge, ko kɛsɔ osakisolawɔ nge? (1 Kɔrɛtɔ 5:13) (Lenda edjinge ntshango.)
5 Wala 1 Kɔrɛtɔ 5:13. Má mbamba kɛ nyuma k’ekina, Poolo afunaka onkanda wɛnyɛki djɛ mposɛ onto wonanghisá mpekanto wotalapɛla wɔsɔ m’otshumano. Akristo wa nkɔmano yakoke ndɔwɔsa ngete mo? Poolo áshimelaka djɛ ‘ntshika mbembolana’ la nde. Kɛsɔ osakisolawɔ nge? Poolo apakisolaka ante wapakoke ‘ndɛ kaanga esanga l’onto wɔsɔ.’ (1 Kɔ. 5:11) Tokoka ntateyɛ mbembolana kana ndjokana l’onto má ndɛka esanga la nde. Okama papoo ente, Poolo ndakɔpɛ nde ntepela ante otshumano wopakoke mpetshɛ winá l’onto wɔkɔ. Kɛsɔ kengolama otshumano dj’ipa ndjimbɔ tá nyɛtshi. (1 Kɔ. 5:5-7) Lonkina, ntona mbembolana l’onto wɔkɔ nkoka ndotshinda djɛ nde nsipisoyɛ ante ambowangɔ otale efula la Yehova, ko akoka ndjoka yɛnyi ikoka ndotshinda djɛ nde ndápɛla.
Má wolo wɔ nyuma k’ekina, Poolo afuna onkanda wɔpɛyɛ ɛlɔndjɛlɔ kɛ mposɛ onto w’omonangha mpekanto wopalapɛlɛ m’otshumano (Lenda itenyi 5)
6. Onkanda wɔ Poolo yayale l’eposelo wɛkɔnge tá otshumano la te onto wonanghisá mpekanto?
6 M’ɔkɔngɔ wɔ nde ntomela Akristo wa Kɔrɛtɔ onkanda, Poolo awangaka ndáwopola wopo w’otshumano yongelola. Ekomo ekomo, Tito oyakalaka losango losasangisá. Otshumano welolaka wɔlɔ efula lá onkanda wɔ Poolo. (2 Kɔ. 7:6, 7) Wakilikaka alako wande. Lonkina, ngɔndɔ imangha m’ɔkɔngɔ wɔ Poolo ntoma onkanda, onto wonanghisá mpekanto alapɛlaka! Atshikitanyɛka ekanedji la eyalelo kɛnde la awangaka ndɔnda ɛlɛmbɛ wɛ sii wɛ Yehova. (2 Kɔ. 7:8-11) Iya winá wɔsɔ, Poolo óshimelande otshumano djɛ nangha nge?
WOPO W’OTSHUMANO YAYALE LADJƐ NDƆSA ONTO WOLAPƐLISÁ MÁ MPEKANTO
7. Eposelo wɛ wɔlɔ wɛkɔnge weyalisá má mposɛ onto wonanghisá mpekanto m’otshumano? (2 Kɔrɛtɔ 2:5-8)
7 Wala 2 Kɔrɛtɔ 2:5-8. Poolo atepelaka ante ‘ikako yɛ ndawa me anto efula l’anteyi kɛnyo ikoka le onto wɔ nghɔsɔ.’ Iluku yɛ ndawa ikotshɛka okoma wɔnde. Okoma wɔkɔnge? Ndotshinda djɛ nde ndápɛla.—Heb. 12:11.
8. Poolo ndashimela otshumano lonkina djɛ nangha nge?
8 Masɔ, Poolo ashimelaka otshumano ante: ‘Nyoyale entshupa djɛ ndowimeyɛ la ndokembɛ’ ole ‘nyooshikikɛ ngandji k’owokanyo.’ Tokote ente Poolo akɔpaka otshumano nangha nkambo nkina, ape ngo ndjawola djɛ nde nkalɔ l’anteyi k’enkambi wɛ Yehova. Poolo akɔpaka iwɔ nshikikɛ onto wolapɛlisá má etepela, nanghedji la wopo wɔwɔsawɔ ente iwɔ ndɔkɔpaka la wambowimeyɛ lá nsɔsɔlɔ. Má nangha nghɔsɔ wangɛnyɛ ambɔ walekɔ l’osasa lá wopo wɔ ndombokalɔ.
9. Lamo anto amɔtshi yakakanyɛ djɛ nyimeyɛ onto wonanghisá mpekanto wolapɛlisá?
9 Anto amɔtshi wakokaka nkiyana winá w’onto wonanghisá mpekanto ndakalɔ? Ɔkɔndɔ wopatepela nghɔsɔ, koko akokaka ndjala. Mande nanghedji djɛnde djilaka ovungusano l’otshumano w’otondo la nkokaka nkiyanyɛ pekapeka anto amɔtshi. Amɔtshi wakokaka nkanela ambɔ lako wɔlɔ ndjawola l’osasa onkfumɔ onto wɔ nghɔsɔ l’otshumano, mande iwɔ wananghaka la wolo djɛ ndjala piyɔɔ lá nanghedji. (Ɛdjɛ la Luka 15:28-30.) Ko lamo yayale djonyi otshumano nyɛnyɛ wɔnanyɔ wokalisá ambɔ iwɔ ndɔkɔpaka?
10-11. Kɛkɔnge ketaposa ntsha tokokolo yotatona nyimeyɛ onto wonanghisá mpekanto wolapɛlisá?
10 Kokanela kɛnɛ ketakoka mposa ntsha tokokolo otasambawɔ ndjawola onto wolapɛlisá wɔsɔ nkalɔ lá otshumano, kana otshumano otatonawɔ ndɔwɛnyɛ ngandji m‘ɔkɔngɔ wɔnde nkalɔ. Nde atakoka nsolongotɔ má ‘okiyano w’efula woyalaki la nde.’ Nde atakoka ndjoka mbala kɛmɔ ante apakokaki ndjawolama me Yehova. Nde atakoka kaanga ntshika ndjila welo djɛ ndɔngɔsɔla djokanelo djɛnde nya Yehova.
11 Nkambo deka nyɛtshi nde, ntsha wananyɔ l’ankaana inkina yɛ otshumano yotatona ndowimeyɛ, watakoka ndjila djokanelo djɛwɔ la Yehova lá mbalaka. Ladjikɛnge? Ladjikɛnde watasamba ndjokola Yehova, kanga limeyɛka ananghi wa mpekanto walapɛla, koko watokola Satana kanga wayi wolo, la kanga lopokaka djandji. Lá lɛdji lɔsɔ, watakoma mpeko nkamba la Djabolo djɛ ntshita lonyuma l’onto wɔsɔ.—2 Kɔ. 2:10, 11; Ɛfɛ. 4:27.
12. Wopo wɔkɔnge otshumano okokawɔ ndjokola Yehova?
12 Wopo wɔkɔnge otshumano wɔ Kɔrɛtɔ yokola Yehova, koko ape Satana? Má nkilika wopo wɔ Yehova ɔsande anto wananghá mpekanto walapɛla. Kolenda kɛnɛ ketepela amfunyi imɔtshi yɛ Bible djɛ Yehova. Davidɛ atepelaka ante: Nde alekɔ ‘wɔlɔ ole entshupa djɛ nyimeyɛ.’ (Yee. 86:5) Mika afunaka ante: ‘Olekɔ́ Ndjambe ngete wɛ na, kimeyɛ evunga la kevungɛ mpekanto?’ (Mika 7:18) Ole Izaya atepelaka ante: ‘Kanga nyɛtshi atshike mboka kɛnde la onto wɔ pɔlɔ atshike tokanyi tɔnde; akalɔ te Yehova, nde angowoka nkɛtshi, ɛwo le Ndjambe kɛso ladjikɛnde nde angowimeyɛ nsɔsɔlɔ.’—Iza. 55:7.
13. Lamo yayale wɔlɔ nkawoyɛ onto wonanghisá mpekanto wolapɛlisá lá otshumano? (Lenda ipapango “ Winá wɔkɔnge mpame kɛ otshumano wɔ Kɔrɛtɔ ndakalɔ?”)
13 Djɛ ndjokola Yehova, otshumano wɔ Kɔrɛtɔ woyalaka ladjɛ ndoolongola la ndɔwɛnyɛ ngandji kɛwɔ. Djɛ nkilika ɛlɔndjɛlɔ kɛ Poolo ndapɛyɛ djɛ ndoolongola, ase otshumano wɛnyɛka ‘dilɛmɛlɔ djɛwɔ lá akambo ankfumɔ.’ (2 Kɔ. 2:9) Lá nsɔsɔlɔ, mpame kɛsɔ ndapose m’otshumano ngo ngɔndɔ imangha toko, koko iluku yɛ ndawa yokotshɛ́ka djɛ nde ndápɛla lá lɛdji lɔ nsɔsɔlɔ. Djɛko ndeke atayala djonyi djɛ ndotshatshimbɛ djɛ nde nkalɔ lá otshumano.
TOKOLE SII LA DJANDJI DJƐ YEHOVA
14-15. Olakanyelo wɔkɔnge sombowa má wopo wɔ yakandola nkambo djɛ mpekanto lá otshumano wɔ Kɔrɛtɔ? (2 Pɛtɛlɔ 3:9) (Lenda edjinge ntshango.)
14 Ɔkɔndɔ w’okandwelo wɔ mpekanto kɛ lá otshumano wɔ Kɔrɛtɔ w’ofunamaka la w’olamemaka djɛ ‘ntɔpɛyɛ olakanyelo.’ (Ɔrɔ. 15:4) Má ɔkɔndɔ wɔsɔ, towa olakanyelo ente Yehova apadjipaka wiso lá mpekanto yɛ nkekete inanghema l’anteyi kɛ enkambi wɛnde. Nde apawolaka ikanyi yɛ ente iso ladjɛ ndjoka anto wamonangha mpekanto yɛ nkekete “djandji” má ndjawola dj’iwɔ nkindjɛ nsanghana l’enkambi wɛnde wɛ nkɔmano. Kaanga Yehova oyɛnde kanga lokana djandji, nde apadjipaka wiso lá mpekanto la apatɛtɔlaka ɛlɛmbɛ wɛnde. (Yuda 4) Ntshika anto wanangha mpekanto wapolapɛlɛ l’otshumano ape nkambo djɛ nkɛtshi, mande ɔsɔ angila otshumano w’otondo lá mbalaka.—Woo. 13:20; 1 Kɔ. 15:33.
15 Koko, iso ndjekaka lonkina ente Yehova apakɔpaka kaanga onto ɔmɔ ndjakema. Nde nkɔpaka anto mbika ntsha nkokaka. Nde ndjokaka onto onkfumɔ wɔkɔpa ntshikitanyɛ oloko la ndɔngɔsɔla djokanelo djɛnde nya nde djandji. (Ezk. 33:11; wala 2 Pɛtɛlɔ 3:9.) Djɛko ndeke, winá wolapɛlisá mpame kɛ Kɔrɛtɔ la ndatshike eyalelo kɛnde kɛ nyɛtshi, Yehova akambaka la Poolo djɛ mpakisola otshumano ante wowimeyɛ la wolongole.
Má ndjokola djandji la nkɛtshi kɛ Yehova, otshumano wosangela onto wombokalɔ l’osasa onkfumɔ (Lenda itenyi 14-15)
16. Olawokɛ ngete mo lá wopo wɔ yakandola nkambo djɛ otshumano wɔ Kɔrɛtɔ?
16 Nshishima wopo wɔ yakandola nkambo djɛ otshumano wɔ Kɔrɛtɔ ntɛnyɛka ente Yehova alekɔ ngandji, sii la oloko wɔlɔ. (Yee. 33:5) Wekeka wasɔ wapakotshinde djɛ ndeka numɛ Yehova? Ɛwo, tolekɔ isankfumɔ ananghi wa mpekanto, la tolekɔ la djonyi djɛ imeyelo. Tolekɔ lonkina la djedjɛ efula te Yehova lá nkambo djɛ oshinga wɔ mbendo, wonangha dj’iso nyimeyama. Ɔsɔ ngo sombowa lokembo, má ndjewa ente Yehova nkɔpaka nsɔsɔlɔ enkambi wɛnde la nkɔpaka wɔlɔ wɔwɔ!
17. Songoshishima lá wamba wa wɔlama nge?
17 Iya otepelaso mo lá nkambo djɛ mpekanto inanghema lɔɔko kɛnɛ lá otshumano? Tokokolo okokawɔ ndjala la mposɛ ete ngo kɛ Yehova kɛ nkotshɛ́ onto womonangha mpekanto djɛ ndápɛla ngete mo? Wopo wɔkɔnge otshumano okokawɔ ndjelola winá wɔ tokokolo ɔsawɔ nkano djɛ mposɛ kana nkawoyɛ onto lá otshumano? Tongokadjimola weepó wɛsɔ lá wamba wa wɔlama.
YEEMBO 109 Tokane ngandji k’efula kɛ m’anse kɛ oloko (lá Otetela)
