DJAMBA DJƐ WEKELO 34
YEEMBO 107 Ndjɔmbɔmba kɛ ngandji ketotshikelisá Ndjambe (lá Otetela)
Wopo wɔ ndjoka anto wamonangha mpekanto ngandji la djandji
‘Ndjambe má oloko wɔlɔ wɔnde akɔpa nkɔtɔla tii lá ndápɛla.’—ƆRƆ. 2:4.
IKANYI YƐ DJAMBA
Wopo wɔ tokokolo tɔ otshumano okokawɔ nkotshɛ́ anto wamonangha mpakanto yɛ nkekete.
1. Nkambo djɛkɔnge nkoka nanghema m’ɔkɔngɔ w’onto nangha mpekanto k’ekekete?
LÁ DJAMBA mboheta, tɛnaka wopo wɔ Poolo ndakandola nkambo djɛ mpekanto k’ekekete lá otshumano wɔ Kɔrɛtɔ. Onto wonanghisá mpekanto ataapɛla, ko ayalaka ladjɛ mposa m’otshumano. Koko, ete ngo ɔtɛ wɔ djamba ɛnyɛwɔ, Ndjambe nkoka nkomɛ anto amɔtshi wananghisá mpekanto yɛ nkekete djɛ ndápɛla. (Ɔrɔ. 2:4) Wopo wɔkɔnge tokokolo okokawɔ ndakotshɛ́ dj’iwɔ ndápɛla?
2-3. Oyɛso ladjɛ nangha nge ntsha tombewa ente winaso Okristo amonangha mpekanto k’ekekete, ko ladjikɛnge?
2 Lá ntondo kɛ ndookotshɛ́, iwɔ ladjɛ ndjewa nkambo djɛnde wɔlɔ wɔlɔ. Ko oyɛso ladjɛ nangha nge ntsha tombewa ente winaso ondjawodji ambonangha mpekanto k’ekekete—kana nkambo nkoka ndokomɛ djɛ nde mposa m’otshumano? Iso ladjɛ nkembɛ onto womonangha mpekanto djɛ mpona okotshɔ wɔ tokokolo.—Iza. 1:18; Ele. 20:28; 1 Pɛ. 5:2.
3 Ko iya ntsha onto womonangha mpekanto apakɔpɛ nshimela tokokolo? Iso ladjɛ nshimela tokokolo dj’iso ndáshikikɛ ente onto wɔkɔ angowa okotshɔ w’oyɛnde la djonyi. Ɔsɔ alekɔ nkambo djɛ ngandji dj’oyɛso ladjɛ nangha mande topakɔpɛ ntshutshɛ wɔnanyɔ kana nkaana kɛso. Ntsha onto womonangha mpekanto akindjɛ ngo la eyalelo kɛnde, angotshita djokanelo djɛnde nya Yehova. Angotshita lonkina lokumu l’otshumano. Djɛko ndeke, má ngandji k’owokaso la k’okaso Yehova, iso ladjɛ nshimela tokokolo.—Yee. 27:14.
WOPO WƆ TOKOKOLO OKOTSHƐ́WƆ ANTO WAMONANGHA MPEKANTO YƐ NKEKETE
4. Tokokolo oyɛwɔ l’okoma wɔkɔnge winá w’osawolawɔ l’onto womonangha mpekanto k’ekekete?
4 Winá w’onto ɔmɔtshi l’otshumano onanghande mpekanto k’ekekete, iloyi yɛ tokokolo ingɔsɔna wananyɔ asato walekɔ́ l’akoka m’anteyi kɛwɔ djɛ nkfumba kɔmite. a Ampame yɛsɔ ladjɛ ndjala la wɛdjimo ole l’okitshakitshɛ. Winá w’ohonawɔ djɛ nkotshɛ́ onto w’ombovunga djɛ ndápɛla, iwɔ ladjɛ ndjewa ambɔ wapakoke ntshinda onto la wolo djɛ ndápɛla. (Mvu. 30:19) Tokokolo ndjewaka ambɔ ape onto onkfumɔ womonangha mpekanto ndeke longelola ete ngo Nkfumi Davidɛ. (2 Sa. 12:13) Anto amɔtshi wamonangha mpekanto wakoka ntona ndjewo yɛ Yehova. (Ewa. 4:6-8) Kaanga oyɛwɔ nghɔsɔ, okoma wɔ tokokolo nde, ndakomɛ dj’iwɔ ndápɛla, ntsha nkokaka. Tɔkfɔ tɔkɔnge taalɔndjɛ́ winá w’osawolawɔ l’onto womonangha mpekanto?
5. Dako djɛkɔnge tokokolo oyɛwɔ ladjɛ nkota lá yimba winá w’osawolawɔ l’onto womonangha mpekanto? (2 Timɔte 2:24-26) (Lenda edjinge ntshango.)
5 Tokokolo ɛnawɔ onto womonangha mpekanto nde ɔnkɔkɔ wɔ ntsho, wombovungá. (Luka 15:4, 6) Djɛko ndeke, winá w’otshɔwɔ ntɛnana l’onto womonangha mpekanto, wapakoke nyɛnyɛ ambɔ walekɔ wayi wolo má etepela, tokanyi, kana má wopo w’osawolawɔ la nde; wapakoke ndɔsa ntshawo djɛsɔ ete ngo nonghanyi kana ndɔnda ngo wopo wɔ yonanghaka má ndɛlɛ. Koko, iwɔ wangɛnyɛ wekeka walekɔ́ lá 2 Timɔte 2:24-26. (Wala.) Tokokolo wayale la ndákota, la vu, ole la oloko wɔlɔ winá w’onanghawɔ la wolo djɛ mvunda oloko w’onto womonangha mpekanto.
Ete ngo elami w’ɛnkɔkɔ wɛ ntondo, tokokolo nanghaka la wolo djɛ nkawoyɛ ɔnkɔkɔ wombovunga (Lenda itenyi 5)
6. Wopo wɔkɔnge tokokolo yɔngɔlɔngɔsɔla eloko wɛwɔ lá ntondo kɛ nsawola l’onto w’omonanghá mpekanto? (Ɔrɔma 2:4)
6 Tokokolo ladjɛ ndɔngɔsɔla eloko wɛwɔ. Iwɔ wangokolake Yehova winá w’osawolawɔ l’onto womonangha mpekanto, má mvungɔ etepela wɛ Poolo wɛnɛ: ‘Ndjambe má oloko wɔlɔ wɔnde akɔpa nkɔtɔla tii lá ndápɛla.’ (Wala Ɔrɔma 2:4.) Tokokolo ladjɛ mvungɔ ambɔ oyɛwɔ ntondo ntondo nde elami w’ɛnkɔkɔ lá ɛlɔndjɛlɔ kɛ Kristo. (Iza. 11:3, 4; Mat. 18:18-20) Lá ntondo k’iwɔ nsawola l’onto womonangha mpekanto, kɔmite kengoshishima lá lɔlɔmbɔ okoma wɔwɔ: Ndookomɛ djɛ nde ndápɛla. Iwɔ wangonangha ehonelo l’Afunelo la lá enkanda wɛso ole wangɔlɔmba djɛ mba ntɔnɔ. Wangɔkɔdjɛ djɛ ndjewa nkfumbo dj’onto wɔkɔ mbootshinda djɛ nde ndjala l’ikanyi, eyalelo, la ɛkɔmɔ kembookomɛ djɛ nangha mpekanto.—Woo. 20:5.
7-8. Wopo wɔkɔnge tokokolo okokawɔ ndjala la bale ntshitshi ete ngo Yehova winá w’osawolawɔ l’onto womonangha mpekanto?
7 Tokokolo ndjokolaka bale ntshitshi djɛ Yehova. Iwɔ mvungɔka wopo wɔ Yehova ndakotshɛ́ anto wananghaki mpekanto l’etsho wɛ ntondo. Ndjɔmbɔmba, Yehova akotshɛ́ka la bale ntshitshi nkfumɔ Kayina djɛ ntɔnɔla, má ndowewola eposelo wɛ nyɛtshi wɛ mpekanto la má ndɔpɛyɛ mbamba kɛ nkalɔ le nde. (Ewa. 4:6, 7) Yehova avungolaka Davidɛ má mbamba kɛ ɔprɔfɛtɛ Nata, má nkamba la ndjɔmbɔmba kevundisá oloko wɔnde. (2 Sa. 12:1-7) Edjinge Yehova ‘akindjɛki ntomela’ owila w’ɔtɛ wolo w’Isariyɛlɛ aprɔfɛtɛ wande ‘mbala la mbala.’ (Jɛr. 7:24, 25) Koko nde atakongaki enkambi wɛnde ndápɛla lá ntondo kɛ ndaakotshɛ́. Koko, ɔsaki nonghanyi kɛ ndaakembɛ dj’iwɔ ndápɛla.
8 Tokokolo nkilikaka ndjɔmbɔmba kɛ Yehova winá w’onanghawɔ djɛ nkotshɛ́ anto wamonangha mpekanto yɛ nkekete. Ete ngo 2 Timɔte 4:2 ɛnyɛnde, wangɔtɔnɔlake ‘la bale ntshitshi nkfumɔ’ winá w’osawolawɔ la ondjawodji wombotshimbá yimba. Djɛko ndeke, tokokolo ladjɛ ndjala winá enkfumɔ vu ole la bale ntshitshi djɛ nkotshɛ́ onto womonangha mpekanto djɛ nde nangha kɛnɛ kelekɔ́ wɔlɔ. Ntsha ikokolo ambotateyɛ nyomala kana ntshimba yimba, onto apangoka dako djɛnde kana akoka ntona ndápɛla.
9-10. Wopo wɔkɔnge tokokolo okokawɔ nkotshɛ́ onto womonangha mpekanto djɛ ntɔnɔla lá kɛnɛ kɛ ndomonangha?
9 Tokokolo wangonangha la wolo djɛ ndjewa ikakambo inkfumɔ yokomisá lá mpekanto. Ndjɔmbɔmba, Okristo wɔkɔ akomaka wɔdju lá nyuma ndambo ndambo ladjikɛnde atshikaka nangha wekelo w’onto nyɔmɛlɛ la mpoposanyɛ? Atalɔmbaki lonkina Yehova kana apapaki ndɔmbɔ? Awolaka djɛ mposɛ yɛ nyɛtshi ndɔlɔndjɛ? Atɔsa akano wa wɔlɔ walendana la ntombe kana l’etombo? Akano wasɔ walekɔ la ndjimbo kɛmɔtshi l’oloko wɔnde? Nde ewa ante akano wa ndɔmbɔsa wakiyanyɛ Papa kɛnde, Yehova?
10 Tokokolo wangopola la ngandji kenkfumɔ weepó welekɔ́ djonyi djɛ ndjewa akambo wahɔdjisá djokanelo djɛnde la Yehova la wokomisá djɛ nkfɔ la mpekanto. Lako wɔlɔ ndowopola akambo walendana la lowiko lɔnde wa tokokolo yopakoke ndjewa. (Woo. 20:5) Lonkina, wakoka nkamba la ndjɔmbɔmba djɛ nkotshɛ́ onto djɛ nde ntɔnɔla la nyɛna ohanela wɔ nanghedji djɛnde, ete ngo Nata ndananghe la Davidɛ. Winá ɛmɔtshi, mbala kɛ ntondo k’opomananyo l’onto, akoka ndjoka yɛnyi yɛ kɛnɛ kɛ ndananghe. Akoka kaanga ndápɛla.
11. Yeso ndananghaka l’ananghi wa mpekanto nge?
11 Tokokolo nanghaka la wolo djɛ ndjokola Yeso. Winá wɔ ndasawolaka nya Saolo kɛ Tarsɛ, Yeso imbokfundɔ owopolaka woopó wɔnɛ djɛ nde ntɔnɔla: ‘Saolo, Saolo, lamo ɔnyɛnyɛ ndjolo?’ Yeso akotshɛ́ka Saolo djɛ ntɔnɔla lá akambo wa nyɛtshi wa ndananghaka. (Ele. 9:3-6) Yeso atepelaka ole ‘djɛ omoto wɔkɔ Jezabɛlɛ’ ante: ‘Lemi ndɔpɛyɛka winá wɔ nde ndápɛla.’—Ndj. 2:20, 21.
12-13. Wopo wɔkɔnge tokokolo okokawɔ mpɛyɛ onto womonangha mpekanto winá wɔ ndápɛla? (Lenda edjinge ntshango.)
12 Má ndjokola Yeso, tokokolo wapangɔsa akano lankeke lankeke ambɔ onto womonangha mpekanto apangolapɛla. Anto amɔtshi wamonangha mpekanto ndápɛlaka lá kɔmite kɛ ntondo, ankina ndɔsaka ndambo kɛ winá. Djɛko ndeke tokokolo nkoka ndálonghanyɛ djɛ nsawola l’onto wɔkɔ mbala efula, ape ngo kɛmɔ toko. Winá ɛmɔtshi, m’ɔkɔngɔ wɔ nsawola la nde mbala kɛ ntondo, akoka ntɔtɔnɔla lá kɛnɛ kɛ yoshimelisa. Akoka ndɔmba Yehova l’okitshakitshɛ onkfumɔ. (Yee. 32:5; 38:18) Lasɔ, mbamba kenkina kɛ nyɔngɛnana, akoka ndjala l’ikanyi yɛ wɔlɔ ileka yɛ ndɛnyɛ mbala kɛ ntondo.
13 Djɛ nkotshɛ́ onto djɛ ndápɛla, tokokolo ladjɛ ndɔwɛnyɛ djandji l’oloko wɔlɔ. Iwɔ walekɔ la nkongi ente Yehova angosakola welo wɛwɔ la ente Okristo wɔntɔmbɔki wɔsɔ angoyala l’ekanedji kɛ wɔlɔ la angoyapɛla.—2 Ti. 2:25, 26.
Tokokolo wakoka nsawola l’onto womonangha mpekanto mbala efula, ape ngo kɛmɔ toko, djɛ ndɔpɛyɛ winá wɔ nde ndápɛla (Lenda itenyi 12)
14. Onto wɔkɔna w’ɔpɛyɛso lomo winá w’onanghi wɔ mpekanto olapɛlande, ko ladjikɛnge?
14 Alekɔ nkambo dj’osasa efula ntsha onto womonangha mpekanto ambolapɛla! (Luka 15:7, 10) Ɔpɛyɛso lomo na? Tokokolo? Tovungɔ kɛnɛ kɛ Poolo ndatepela lá nkambo dj’ananghi wa mpekanto: ‘Mbala imɔtshi Ndjambe nkoka ndapɛyɛ mbamba kɛ ndápɛla.’ (2 Ti. 2:25) Iso ladjɛ mpɛyɛ Yehova lomo mande nde ndeke lombokotshɛ́ Okristo djɛ ntshikitanyɛ ekanedji la eyalelo kɛnde. Poolo apakisolaka akambo wa wɔlɔ wananghemaka m’ɔkɔnge w’onto ndápɛla. Onto nkoka mba djewo djɛ djɔ dj’akambo wa nsɔsɔlɔ, nkoka ndjala l’ekanedji kɛ wɔlɔ, la nkoka ndjewɔ tolonga tɔ Satana.—2 Ti. 2:26.
15. Wopo wɔkɔnge tokokolo okokawɔ nkindjɛ nkotshɛ́ onto womonangha mpekanto wolapɛla?
15 Winá wolapɛla onto womonangha mpekanto, kɔmite kengoyalonghanyɛ djɛ nkindjɛ ndowembola djɛ nde mba okotshɔ w’oyɛnde la djonyi djɛ nkindjɛ nana la tolonga tɔ Satana la nkindjɛ nkɛnda lá mboka kɛ sii. (Heb. 12:12, 13) Lá nsɔsɔlɔ, tokokolo wapakoke nshimela anto ankina akambo wa onto wɔkɔ ndomonangha. Ko otshumano okokawɔ ndjewa nkambo djɛkɔnge?
‘KAKOLA ANTO WANANGHA MPEKANTO’
16. Lá nkilika 1 Timɔte 5:20, oye ‘anto ankfumɔ’ wa Poolo ndatepela?
16 Wala 1 Timɔte 5:20. Poolo ndafunela etepela wɛsɔ nde Timɔte, winande ikokolo djɛ nde nkakola ‘anto wanangha mpekanto.’ Kɛsɔ osakisolawɔ nge? Atakɔpa ntepela ante otshumano w’otondo ndeke ‘anto ankfumɔ’ w’otepelawɔ lá vɛrse djɛnɛ. Koko, ndatepela nde djɛ anto amangha wakokaki ndjewa mpekanto. Iwɔ wakokaka nyɛna kana ndjoka kɛnɛ kɛ onto womonangha mpekanto ndomonangha. Tokokolo wakoka ndashimela lá wisisa ambɔ wambokandola nkambo djɛkɔ la wambokakola onto wɔkɔ.
17. Ntsha mpekanto k’ekekete kembewama l’otshumano kana kekoka ndewama, ndjewo kɛkɔnge kɛngɔpɛyama, ko lamo?
17 Lá akambo amɔtshi, nkoka ndjala anto efula l’otshumano wewa nkambo djɛkɔ kana wakoka ndeewa m’ɔkɔngɔ. Lá akambo wa nghɔsɔ, ‘anto ankfumɔ’ nkoka nsakisola otshumano w’otondo. Ko ikokolo angɔpɛyɛ ndjewo l’otshumano ante wɔnanyɔ kana nkaana kapanda ambowa ikako. Lamo? Poolo akadjimola ante: ‘Djɛ anto ankina ndjoka wɔma’ dj’ipa iwɔ nangha mpekanto.
18. Wopo wɔkɔnge tokokolo okokawɔ nkandola mpekanto yɛ dɛngɛ mbolongola? (Lenda edjinge ntshango.)
18 Iya otepelaso mo ntsha ilɛngɛ imbolongala batisimo, ilekɔ́ l’anse k’ɛnɔnyi 18, amonanghá mpekanto k’ekekete? Iloyi yɛ tokokolo ingɔsa nonghanyi kɛ tokokolo tope ntosawola nya nde la ambotshi wande w’Akristo kana la kanga lowongola. b Tokokolo wangohona djɛ ndjewa kɛnɛ kɛ ambotshi yomonangha djɛ nkotshɛ́ wɔnawɔ djɛ ndápɛla. Ntsha wɔna alekɔ l’ikanyi yɛ wɔlɔ la ambotshi wambokotshɛ́ djɛ nde nkalɔ, tokokolo tope tɔsɔ wakoka nyɛna ambɔ lako ohomba wɔ nkfumba kɔmite djɛ nsawola la ilɛngɛ ole la ambotshi wande. Lá nsɔsɔlɔ, Ndjambe ndapɛyɛ odjito wɔ nsembola wana la ngandji nde ambotshi wawɔ. (Mvu. 6:6, 7; Woo. 6:20; 22:6; Ɛfɛ. 6:2-4) M’ɔkɔngɔ wɔ lasɔ, tokokolo wangolendaka mbala la mbala l’ambotshi djɛ ndáshikikɛ ntsha wɔna awa okotshɔ w’oyɛnde la djonyi. Iya ntsha ilɛngɛ imbolongola apalapɛlɛ la atshininala lá mpekanto? Kɔmite kɛ tokokolo wangosawola nya nde la ambotshi wande kana la kanga lowongola.
Winá w’ilɛngɛ onanghande mpekanto, tokokolo tope wangotshɔ ntosawola nya nde la ambotshi wande w’Akristo kana la kanga lowongola (Lenda itenyi 18)
‘YEHOVA ALEKƆ LA NGANDJI K’EFULA OLE LA NKƐTSHI’
19. Wopo wɔkɔnge tokokolo okolawɔ Yehova winá w’osawolawɔ l’onto omonangha mpekanto?
19 Tokokolo tokfumba kɔmite walekɔ l’odjito lá wiso wa Yehova djɛ nama otshumano piyɔɔ. (1 Kɔ. 5:7) Wakombola lonkina djɛ onto womonangha mpekanto ndápɛla ntsha nkokaka. Djɛ nkotshɛ okoma wɔsɔ, tokokolo ndjalaka l’ikanyi yɛ wɔlɔ ole la nkongi. Ladjikɛnge? Ladjikɛnde iwɔ nkɔpaka ndjokola Yehova, kanga lolekɔ́ la ‘ngandji k’efula ole la nkɛtshi.’ (Dja. 5:11) Tokolenda wopo wɔ Djɔanɛ, ɔpɔstɔlɔ w’ekokolo ndɛnyɛ ikanyi yɛ nghɔsɔ. Nde afunaka ante: ‘Wana wami wa dɛngɛ, lemi lamonyofunela akambo wanɛ dj’ipa nyo nangha mpekanto. Koko, ntsha onto ɔmɔtshi amonangha mpekanto, tolekɔ la okotshɔ wolekɔ́ esanga la Papa kɛsɔ, Yeso Kristo, onto wɔ wɔlɔ.’—1 Dj 2:1.
20. Sɔnghɛna lá djamba dj’ekomo dj’ɔnɔnghɔ wɔ wamba wɔnɛ nge?
20 Yɛnyi nde, winá ɛmɔtshi, Okristo womonangha mpekanto nkoka ntona djɛ ndápɛla. Ntsha nghɔsɔ, nde ladjɛ mposa m’otshumano. Tokokolo okandolakawɔ akambo wa wolo wasɔ ngete mo? Tɔngɛna lá djamba dj’ekomo dj’ɔnɔnghɔ wɔ wamba wɔnɛ.
YEEMBO 103 Elami w’ɛnkɔkɔ—Ampame ilekɔ́ epapɛyɛ (lá Otetela)
a L’etsho wɛ ntondo, setaka kɔmite kɛsɔ nde kɔmite kɛ dombo. Koko mande ndomboyɛ oyɛwɔ ngo etenyi kɛ olemo wɔwɔ, topangokamba lonkina l’itepela yɛsɔ. Koko, tongetaka kɔmite kɛsɔ ngo kɔmite kɛ tokokolo.
b Akambo w’otepelawɔ lá kɛnɛ kelendana lʼambotshi ndendanaka ole lʼonto wombowa lotshungɔ maka lɛɛta kana onto onkfumɔ wolekɔ l’odjito wɔ mbongola wɔna wolekɔ́ l’anse k’ɛnɔnyi 18.
